Mateu 2:11–23

“Perëndia i Udhëzoi”

Pasi Dijetarët ia dhanë dhuratat e tyre Krishtit fëmijë, Zoti i paralajmëroi të mos ktheheshin te mbreti Herod. Një engjëll iu shfaq Jozefit në ëndërr dhe i tha që ta çonte familjen e tij në Egjipt. Këto paralajmërime e shpëtuan Jezusin fëmijë nga masakra e Herodit ndaj të gjithë fëmijëve dy vjeç e poshtë në zonën përreth Bethlehemit. Pas vdekjes së Herodit, Zoti e udhëzoi Jozefin të kthehej në Izrael. Ashtu si Zoti i bekoi Dijetarët, Jozefin dhe Marinë me zbulesë, Ai dëshiron t’ju bekojë edhe ju me zbulesë. Në këtë mësim do të përcaktosh disa mënyra se si Zoti mund të komunikojë me ty. Gjithashtu do të marrësh ftesë që ta kërkosh këtë komunikim në jetën tënde.

Ndihmojini nxënësit të përcaktojnë parimet. Një aftësi e rëndësishme për nxënësit që ta fitojnë dhe ushtrojnë gjatë kohës së tyre në seminar është aftësia për të përcaktuar parimet nga shkrimet e shenjta. Kur nxënësit janë në gjendje të përcaktojnë parimet, aftësia e tyre për ta kuptuar dhe jetuar ungjillin do të rritet.

Përgatitja e nxënësve: Kërkojuni nxënësve t’i kushtojnë vëmendje mënyrës se si Zoti po përpiqet të komunikojë me ta, përfshirë edhe nëpërmjet zbulesës dhe frymëzimit nga Fryma e Shenjtë. Nxitini nxënësit t’i mbajnë shënim këto komunikime.

Veprimtari të Mundshme të të Mësuarit

Zoti paralajmëron Dijetarët dhe Jozefin

Merreni parasysh t’i paraqitni pyetjet e mëposhtme. Për t’i ndihmuar nxënësit të dallojnë atë që dinë dhe mund të mos e dinë për marrjen e zbulesës, ftojini ata t’u përgjigjen këtyre pyetjeve në ditarët e tyre të studimit.

Mendo për mënyrat se si Ati Qiellor ka komunikuar me ty në jetën tënde dhe përgjigjju pyetjeve të mëposhtme.

• Sa mirë mendon se i dallon rastet kur Ati Qiellor po komunikon me ty?

• Cilat janë disa mënyra se si Perëndia të ka dhënë zbulesë ose udhërrëfim?

• Në cilën fushë të jetës mendon se ke më shumë nevojë për udhërrëfimin dhe drejtimin e Atit Qiellor?

Merreni parasysh t’u kërkoni nxënësve të tregojnë mënyrat se si Perëndia komunikon me ta ose t’i ftoni ata të bëjnë pyetjet që kanë për marrjen e zbulesës.

Ndërsa studion kapitullin Mateu 2 , do të kesh një mundësi për të mësuar rreth marrjes së udhëzimit dhe drejtimit nga Ati Qiellor.

Në kohën e lindjes së Shpëtimtarit, sundimtari në Jude njihej si Herodi i Madh. Ai ishte një njeri i lig. Kur u takua me Dijetarët, ai u kërkoi të ktheheshin dhe ta informonin për atë që zbuluan për Krishtin fëmijë (shih Mateu 2:8). Për shkak të ligësisë së Herodit, Perëndia i paralajmëroi Dijetarët dhe dërgoi një engjëll që ta paralajmëronte Jozefin në ëndërr.

Pjesa tjetër e mësimit ka për qëllim t’i ndihmojë nxënësit të ushtrojnë përcaktimin e parimeve kur i studiojnë shkrimet e shenjta.

Ndërsa i studion shkrimet e shenjta, është e rëndësishme të përcaktosh parimet. Një parim është një e vërtetë e qëndrueshme që mund të të ofrojë këndvështrim dhe të të ndihmojë për marrjen e vendimeve. Ne shpesh mund t’i përcaktojmë parimet duke u përgjigjur për pyetje si ato në vijim:

• Si mendon, cili ishte morali apo mesazhi i historisë?

• Si mendon, pse shkrimtari i përfshiu këto ngjarje apo fragmente në analin e tij?

• Çfarë mësimesh mund të ketë pasur qëllim shkrimtari që ne të mësojmë?

Zgjidh një nga pyetjet e mësipërme dhe përgjigju për të ndërsa përsiat vargjet te Mateu 2:11–16 .

• Cili është një parim që përcaktove nga Mateu 2:11–16 ?

Sipas nevojës, ndihmojini nxënësit të përcaktojnë parimet e tyre. Merreni parasysh t’i ftoni nxënësit që t’i shkruajnë parimet e tyre në tabelë. Përgëzojini nxënësit ndërsa përcaktojnë parimet. Nxënësit mund të përcaktojnë një parim të ngjashëm me sa vijon: Zoti mund të na paralajmërojë dhe të na mbrojë nga rreziku.

• Si mund të të ndihmojë parimi që përcaktove për vendimet në jetën tënde?

Zoti do të na paralajmërojë

Nga Mateu 2:11–16 , mund të kesh përcaktuar një parim rreth marrjes së paralajmërimeve nga Zoti. Presidenti Bojd K. Paker (1924–2015), i Kuorumit të Dymbëdhjetë Apostujve, dha një premtim për paralajmërimet përmes Frymës së Shenjtë.

“Nuk pritet që ju të shkoni nëpër jetë pa bërë gabime, por ju nuk do të bëni gabime të mëdha pa qenë të paralajmëruar më parë nga nxitjet e Frymës së Shenjtë. Ky premtim vlen për të gjithë anëtarët e Kishës.”

(Bojd K. Paker, “Këshillë për Rininë”, Ensign ose Liahona, nëntor 2011, f. 18.)

• Çfarë na tregon dëshira e Atit Qiellor për të na paralajmëruar me anë të Shpirtit për natyrën dhe karakterin e Tij?

• Si mund të të ndihmojë kërkimi dhe përgjigjja ndaj nxitjeve dhe paralajmërimeve të Shpirtit tani dhe në të ardhmen?

Jozefi, Maria dhe Jezusi kthehen nga Egjipti

Merreni parasysh kohën në dispozicion të orës mësimore dhe nevojave të nxënësve, dhe përshtateni pjesën tjetër të mësimit në përputhje me rrethanat. Për shembull, nxënësit mund të lexojnë te Mateu 2:19–23 dhe të përcaktojnë parimin e tyre, ata mund t’i përmbledhin vargjet ose mund të diskutojnë mënyrat se si Zoti mund të komunikojë me ne.

Te Mateu 2:19–23 , ne lexojmë se kur Herodi vdiq, Zoti i dha një mesazh tjetër Jozefit ndërsa ai, Maria dhe Jezusi ishin në Egjipt. Nga ky komunikim me Jozefin, mësojmë se nëse jemi të gatshëm të dëgjojmë dhe bindemi, mund të marrim zbulesë dhe udhërrëfim.

Lexo te Mateu 2:19–23 , duke kërkuar hollësi që e japin këtë parim.

Ndërsa nxënësit tregojnë atë që gjetën, ndihmojini ata të kuptojnë disa nga mënyrat se si Fryma e Shenjtë mund të komunikojë me ne. Merrni parasysh të përdorni disa nga materialet në pjesën “Komente dhe Informacion për Rrethanat” dhe “Veprimtari Plotësuese të të Mësuarit”.

Te Mateu 2 , Perëndia komunikoi me Dijetarët dhe Jozefin përmes ëndrrave dhe përmes vizitave nga engjëjt. Ati në Qiell gjithashtu komunikon me fëmijët e Tij në shumë mënyra të tjera, përfshirë edhe përmes frymëzimit dhe zbulesës nga Fryma e Shenjtë. Ndërsa e studion ungjillin në shtëpi dhe në seminar, kushtoji vëmendje asaj që po mëson nga shkrimet e shenjta, si dhe asaj që Ati Qiellor po të mëson nëpërmjet Frymës së Shenjtë. Studimi i ungjillit nga ana jote mund të përmirësohet dhe të bëhet më personal ndërsa e dëgjon atë që Perëndia po të mëson nëpërmjet Shpirtit të Tij.

Pyetje të mundshme për diskutim

• Cilat janë disa mënyra se si Zoti komunikon me ty?

• Çfarë përvojash ke pasur në të cilat Fryma e Shenjtë të ka paralajmëruar ose udhërrëfyer? Si ndikuan këto përvoja në jetën tënde?

• Nëse do të dëgjoje zërin e Shpëtimtarit që të flet përmes Frymës së Shenjtë ndërsa studion, si do të ndikonte kjo në përvojën tënde të seminarit?

• Çfarë mendon se mund të bësh për të qenë më pranues ndaj udhërrëfimit dhe zbulesës së Frymës së Shenjtë që Ati Qiellor dhe Jezu Krishti duan të të japin?

Merrni parasysh të tregoni një përvojë vetjake dhe t’i ftoni nxënësit të kërkojnë mënyra se si Ati Qiellor po komunikon me ta në jetën e tyre të përditshme.

Komente dhe Informacion për Rrethanat

Si mund të më ndihmojë Fryma e Shenjtë?

Presidenti Henri B. Ajring, i Presidencës së Parë, dha mësim:

“Shoqërimi i Frymës së Shenjtë e bën atë që është e mirë më tërheqëse dhe tundimin më pak bindës. Kjo e vetme duhet të mjaftojë që të na bëjë të vendosur për t’u kualifikuar për Shpirtin që të jetë me ne gjithmonë.”

(Henri B. Ajring, “Fryma e Shenjtë si Shoqëruesi Juaj”, Ensign ose Liahona, nëntor 2015, f. 104.)

Plaku Ronald A. Rasband, i Kuorumit të Dymbëdhjetë Apostujve, dha mësim:

“Ati ynë në Qiell e dinte se në vdekshmëri ne do të hasnim sfida, mundime dhe shqetësime; Ai e dinte se do të na mundonin pyetjet, zhgënjimet, tundimet dhe dobësitë. Për të na dhënë forcë fizike dhe udhërrëfim hyjnor, Ai siguroi Shpirtin e Shenjtë, një emër tjetër i Frymës së Shenjtë.”

(Ronald A. Rasband, “Shpirti i Shenjtë na Udhëzoftë”, Ensign ose Liahona, maj 2017, f. 93.)

Si mund ta kuptoj kur po më flet Zoti?

Pse Herodi masakroi fëmijë të pafajshëm?

Mbreti Herod, i “shqetësua[r]” nga lajmi se kishte lindur një tjetër “mbret i Judenjve” ( Mateu 2:2–3), donte ta vriste Jezusin për të siguruar fronin e vet. Duke ditur se Jezusi kishte lindur në Bethlehem rreth dy vjet më parë, Herodi urdhëroi vdekjen e të gjithë fëmijëve atje nën moshën dy vjeç (shih Mateu 2:4, 7, 12–16). Herodi ishte famëkeq për egërsinë e tij kundër kërcënimeve të dyshuara, madje duke ekzekutuar edhe gruan dhe tre nga djemtë e tij (shih Bible Dictionary [Fjalori Biblik], “Herod” [“Herodi”]).

Veprimtari Plotësuese të të Mësuarit

Mënyrat se si Fryma e Shenjtë mund të komunikojë me ne

Merreni parasysh të përdorni shkrimet e shenjta në vijim për t’i ndihmuar nxënësit të njohin mënyra të ndryshme se si Zoti mund të komunikojë me ne.

1 Mbretërve 19:12 ; Gjoni 14:26 ; 2 Nefi 32:3 ; Moroni 8:26 ; Doktrina e Besëlidhje 6:23 ; Doktrina e Besëlidhje 8:2–3 .

Zoti mund të komunikojë me ne në seminar

Nxënësit mund të përfitojnë nga të menduarit dhe diskutimi i pyetjeve të tilla si “Çfarë po dëgjoni përmes Shpirtit që nuk po thuhet në klasë?” ose “Si mund ta ftoni Zotin t’ju mësojë ndërsa studioni në seminar?” Nxitini nxënësit t’i mbajnë shënim udhërrëfimin dhe zbulesën që marrin nga Zoti në seminar. Sipas nevojës, referojuni mësimit “Të Mësuarit me Anë të Shpirtit”.

Shembuj të marrjes së paralajmërimeve nga Shpirti