ម៉ាថាយ ២៥:១–១៣

រឿងប្រៀបប្រដូចអំពីស្ត្រីព្រហ្មចារីដប់នាក់

នៅជិតចុងបញ្ចប់នៃការងារបម្រើក្នុងព្រះជន្មរមែងស្លាប់របស់ទ្រង់ ព្រះយេស៊ូវគ្រីស្ទបានបង្រៀនពួកសិស្សរបស់ទ្រង់ អំពីសារៈសំខាន់នៃការរៀបចំខ្លួនសម្រាប់ការយាងមកជាលើកទីពីរ ដោយបានដំណាលប្រាប់អំពីរឿងប្រៀបប្រដូចនៃស្ត្រីព្រហ្មចារីដប់នាក់ ។ មេរៀននេះអាចជួយអ្នកឲ្យយល់ និងទទួលអារម្មណ៍ថា វាមានសារៈសំខាន់ក្នុងការរៀបចំខ្លួនអ្នកដើម្បីជួបព្រះអម្ចាស់ នៅពេលទ្រង់យាងមកម្តងទៀត ។

ការរៀបចំបរិស្ថានជុំវិញខ្លួនរបស់បងប្អូន ។ ការរក្សាបរិយាកាសសិក្សាដែលរៀបចំបានល្អនិងមានភាពស្ងប់ស្ងាត់អាចជួយសិស្សឲ្យមានអារម្មណ៍ពីឥទ្ធិពលនៃព្រះវិញ្ញាណបរិសុទ្ធ និងបង្កើតជាការញាណដឹងមួយអំពីគោលបំណង ។

ការរៀបចំរបស់សិស្ស ៖ សូមអញ្ជើញសិស្សឲ្យវាយតម្លៃខ្លួនឯងលើមាត្រដ្ឋានពី ១ ដល់ ១០ ( ១ មានន័យថាអ្នកមិនយល់ស្រប; ១០ មានន័យថាអ្នកយល់ស្រប ) លើសេចក្ដីថ្លែងការណ៍ខាងក្រោមនេះ ៖ « ខ្ញុំមានអារម្មណ៍ថាបានត្រៀមខ្លួនរួចរាល់ សម្រាប់ការយាងមក ជាលើកទីពីររបស់ព្រះយេស៊ូវគ្រីស្ទ » ។ សូមអញ្ជើញពួកគេឲ្យសញ្ជឹងគិតអំពីមូលហេតុដែលពួកគេវាយតម្លៃខ្លួនពួកគេតាមរបៀបដែលពួកគេបានធ្វើ ។

សកម្មភាពរៀនសូត្រដែលអាចមាន

តើត្រៀមរួចហើយឬនៅ ?

សូមគិតអំពី ពេលវេលាដែលអ្នកមិនបានត្រៀមខ្លួនសម្រាប់អ្វីមួយ ដែលតម្រូវឲ្យមាន ការរៀបចំច្រើន ។

• តើអ្នកមានអារម្មណ៍ដូចម្ដេចដែរ ?

• តើមានហេតុផលអ្វីខ្លះ ដែលធ្វើឲ្យយើងធ្វេសប្រហែសក្នុងការរៀបចំខ្លួនសម្រាប់រឿងជាក់លាក់ទាំងនោះ ?

សូមឲ្យសិស្សចែកចាយពីបទពិសោធន៍ និងអារម្មណ៍របស់ពួកគេ ។ សូមពិចារណាចែកចាយឧទាហរណ៍មួយផងដែរ ។

សូមឲ្យសិស្សធ្វើកិច្ចការដូចខាងក្រោមជាឯកជន ។

សូមវាយតម្លៃខ្លួនអ្នកនៅលើមាត្រដ្ឋានពី ១ ដល់ ១០ ( ១ មានន័យថាអ្នកមិនយល់ស្រប ១០ មានន័យថាអ្នកយល់ស្រប ) នៅលើសេចក្តីថ្លែងការណ៍ខាងក្រោម ៖

ខ្ញុំមានអារម្មណ៍ថាបានត្រៀមខ្លួនរួចរាល់សម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ។

ម៉ាថាយ ២៥:១–១៣ មានរឿងប្រៀបប្រដូចរបស់ព្រះយេស៊ូវគ្រីស្ទអំពីស្ត្រីព្រហ្មចារីដប់នាក់ដែលទ្រង់បានបង្រៀនដើម្បីជួយអ្នកដើរតាមរបស់ទ្រង់ឲ្យរៀបចំខ្លួនសម្រាប់ការយាងមកជាលើកទីពីររបស់ទ្រង់ ។ នៅពេលអ្នកសិក្សា សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកឲ្យដឹងពីវិធីដែលអ្នកបានរៀបចំ និងវិធីដែលអ្នកអាចកែលម្អ ។ សូមពិចារណាសំណួរដូចជា « តើខ្ញុំជានរណានៅក្នុងរឿងប្រៀបប្រដូចនេះ ? »

សូមពិចារណាចែកចាយព័ត៌មានខាងក្រោមជាមួយសិស្ស ហើយសួរថាហេតុអ្វីបានជាពួកគេគិតថា ព្រះអង្គសង្គ្រោះបានប្រៀបធៀបការយាងមកជាលើកទីពីររបស់ទ្រង់ទៅនឹងការរៀបពិធីអាពាហ៍ពិពាហ៍មួយ ។

មុននឹងសិក្សារឿងប្រៀបប្រដូចនេះវាជាការសំខាន់ដើម្បីយល់ពីទំនៀមទម្លាប់អាពាហ៍ពិពាហ៍របស់សាសន៍យូដា នៅសម័យរបស់ព្រះអង្គសង្គ្រោះ ។ កូនកំលោះ ដែលអមដោយមិត្តជិតស្និទ្ធនឹងទៅផ្ទះកូនក្រមុំពេលយប់ដើម្បីរៀបចំពិធីមង្គលការ ។ បន្ទាប់ពីពិធីនោះពិធីជប់លៀងទទួលអាហារសម្រាប់អាពាហ៍ពិពាហ៍បានធ្វើឡើងនៅផ្ទះកូនកំលោះ ។ ភ្ញៀវដែលមកចូលរួមក្នុងអាពាហ៍ពិពាហ៍ដែលដើរក្បួនដង្ហែ រួមទាំងកូនក្រមុំ ឬអ្នកកំដរកូនក្រមុំ ត្រូវបានគេរំពឹងថានឹងកាន់ចង្កៀង ឬចន្លុះផ្ទាល់ខ្លួន ដើម្បីបង្ហាញថាពួកគេជាផ្នែកមួយនៃពិធីមង្គលការ និងដើម្បីបន្ថែមពន្លឺ និងភាពស្រស់ស្អាតដល់ឱកាសនោះ ។

សូមអាន ម៉ាថាយ ២៥:១–៤ ហើយធ្វើបញ្ជីមួយអំពីចំណុចសំខាន់ៗនៅក្នុងរឿងប្រៀបប្រដូចរបស់ព្រះអង្គសង្គ្រោះ ដូចជាមនុស្ស ឬវត្ថុនានា ។ នៅជិតនឹងចំណុចនីមួយៗ សូមសរសេរថា តើតំណាងឲ្យនរណា ឬតំណាងឲ្យអ្វី ។

អ្នកអាចសរសេរព័ត៌មានខាងក្រោមនេះដាក់នៅលើក្ដារខៀន ឬសង្ខេបសម្រាប់សិស្ស ។ សូមលើកទឹកចិត្តសិស្សឲ្យសរសេរនៅក្នុងព្រះគម្ពីររបស់ពួកគេថា តើចំណុចប្រៀបប្រដូចនេះជានិមិត្តរូបអំពីអ្វី ។

វិវរណៈសម័យទំនើប និងការបង្រៀនរបស់ព្យាការីអាចជួយអ្នកឲ្យយល់ពីអត្ថន័យនៃនិមិត្តរូបក្នុងរឿងប្រៀបប្រដូចនេះបាន ។

1. កូនកំលោះគឺជានិមិត្តរូបនៃព្រះអង្គសង្គ្រោះ ហើយការយាងមករបស់កូនកំលោះតំណាងឲ្យការយាងមកជាលើកទីពីរ ( សូមមើល គោលលទ្ធិ និង សេចក្តីសញ្ញា ៣៣:១៧ ; ៨៨:៩២ ; ១៣៣:១០ ) ។

2. ប្រធាន ដាល្លិន អេក អូក ក្នុងគណៈប្រធានទីមួយបានបង្រៀន ៖ « វាស្ដែងឲ្យឃើញថាស្ត្រីព្រហ្មចារីទាំងដប់នាក់ តំណាងឲ្យសមាជិកនៃសាសនាចក្ររបស់ព្រះគ្រីស្ទ ដ្បិតសមាជិកទាំងអស់គ្នាត្រូវបានអញ្ជើញឲ្យទទួលភោជនាអាហារ ហើយសមាជិកទាំងអស់គ្នាបានដឹងពីតម្រូវការដើម្បីបានអនុញ្ញាតឲ្យចូលទៅ នៅពេលកូនកំលោះបានមកដល់ » ( ដាល្លិន អេក អូក « Preparation for the Second Coming » Ensign ឬ Liahona ខែ ឧសភា ឆ្នាំ ២០០៤ ទំព័រ ៨ ) ។

3. ចង្កៀងអាចតំណាងឲ្យទីបន្ទាល់របស់យើង ( សូមមើល ដេវីឌ អេ បែដណា « Converted unto the Lord » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ១០៩ ) ។ សូមកំណត់ចំណាំថា ស្ត្រីព្រហ្មចារីទាំងដប់នាក់មានចង្កៀង ។

4. ប្រេងអាចតំណាងឲ្យការប្រែចិត្តរបស់យើងចំពោះព្រះអម្ចាស់ព្រះយេស៊ូវគ្រីស្ទ ( សូមមើល ដេវីឌ អេ បែដណា « Converted unto the Lord » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ១០៩ ) ។ ទាំងនេះអាចរួមបញ្ចូលការខិតខំរបស់យើងដើម្បីធ្វើតាមការណែនាំពីព្រះវិញ្ញាណបរិសុទ្ធ និងដើម្បីរស់នៅដោយគោរពប្រតិបត្តិចំពោះព្រះអង្គសង្គ្រោះ និងដំណឹងល្អរបស់ទ្រង់ ( សូមមើល គោលលទ្ធិ និង សេចក្ដីសញ្ញា ៤៥:៥៦–៥៨ ; ស្ពែនស៊ើរ ដបុលយូ ឃឹមបឹល Faith Precedes the Miracle [ ឆ្នាំ ១៩៧២ ] ទំព័រ ២៥៦ ) ។

• តើអត្ថន័យនៃនិមិត្តរូបណាមួយដែលសំខាន់ខ្លាំងបំផុតចំពោះអ្នក ហើយហេតុអ្វី ?

• តើអ្នកនឹងពន្យល់ជាពាក្យសម្ដីរបស់អ្នកផ្ទាល់អំពីភាពខុសគ្នារវាងស្ត្រីព្រហ្មចារីល្ងង់ និងស្រ្តីព្រហ្មចារីមានគំនិតដូចម្តេចទៅ ?

• តើមានឧទាហរណ៍អ្វីខ្លះដែលយើងអាចធ្វើបាន ដើម្បីដាក់ប្រេងជានិមិត្តរូបទៅក្នុងចង្កៀងរបស់យើង ?

សូមសម្រេចចិត្តថា តើអ្វីទៅដែលនឹងផ្តល់នូវបទពិសោធន៍រៀនសូត្រដ៏ល្អបំផុតដល់សិស្ស នៅពេលពួកគេសញ្ជឹងគិតពីគំនិត និង អារម្មណ៍ របស់ពួកគេ ។ ជាឧទាហរណ៍ សិស្សអាចអាន មើល ឬស្តាប់រឿងប្រៀបប្រដូចនេះបាន ។

សូមអានរឿងប្រៀបប្រដូចដែលនៅសល់នៅក្នុង ម៉ាថាយ ២៥:៥–១៣ ។ នៅពេលដែលអ្នកអាន សូមស្រមៃថា ខ្លួនអ្នកជាស្ត្រីព្រហ្មចារីម្នាក់ ។ អ្នកអាច ស្តាប់ការអាន បទគម្ពីរនៅលើគេហទំព័រ ChurchofJesusChrist.org ឬកម្មវិធីបណ្ណាល័យដំណឹងល្អ ។ អ្នកក៏អាច មើល វីដេអូព្រះគម្ពីរប៊ីប « The Ten Virgins » ( ១:៤០ ) ឬវីដេអូ « They That Are Wise » ចាប់ពីលេខកូដម៉ោង ០:០០ ដល់ ៥:៤១ បានផងដែរ ។

នៅក្នុង ម៉ាថាយ ២៥:១២ សូមកត់សម្គាល់ពីការឆ្លើយតបរបស់កូនកំលោះចំពោះស្ត្រីព្រហ្មចារីដែលល្ងង់ដែលព្យាយាមចូលក្នុង ពិធីជប់លៀងមង្គលការយឺត ពីព្រោះតែគ្មានប្រេង ។ ការបកប្រែដោយ យ៉ូសែប ស៊្មីធ ម៉ាថាយ ២៥:១១ បញ្ជាក់ថាកូនកំលោះបានថ្លែងថា « ខ្ញុំមិនស្គាល់នាងទេ » ( នៅក្នុង ម៉ាថាយ ២៥:១២ ) ។

• សូមចងចាំថាប្រេងតំណាងឲ្យអ្វី ហេតុអ្វីបានជាប្រេងមានសារៈសំខាន់ដើម្បីស្គាល់ ព្រះអង្គ សង្គ្រោះយ៉ាងពិតប្រាកដ ហើយត្រៀមខ្លួន ដើម្បីជួបទ្រង់ ?

• ហេតុអ្វីបានជាស្រ្តីព្រហ្មចារីមានគំនិត មិនអាចឲ្យប្រេងដល់ស្រ្តីព្រហ្មចារីល្ងង់បាន ?

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖

គោលបំណងដ៏ធំក្នុងជីវិតរមែងស្លាប់នេះគឺពុំគ្រាន់តែរៀនអំពី ព្រះរាជបុត្រាបង្កើតតែមួយរបស់ព្រះវរបិតាទេប៉ុន្តែក៏ព្យាយាមស្គាល់ ទ្រង់ដែរ ។ … យើងស្គាល់ព្រះអង្គសង្គ្រោះ នៅពេលយើងធ្វើឲ្យអស់ពីសមត្ថភាព ដើម្បីទៅកន្លែងដែលទ្រង់សព្វព្រះទ័យឲ្យយើងទៅ ព្យាយាមថ្លែងអ្វីដែលទ្រង់សព្វព្រះទ័យឲ្យយើងថ្លែង និងក្លាយជាមនុស្ស ដែលទ្រង់សព្វព្រះទ័យឲ្យយើង ក្លាយ ។

( ដេវីឌ អេ បែដណា « If Ye Had Known Me » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ១០៣, ១០៤ )

សូមពិចារណាកត់ត្រាសេចក្ដីពិតខាងក្រោមនេះ ៖ ខ្ញុំអាចមកស្គាល់ព្រះអង្គសង្គ្រោះ ហើយរៀបចំខ្លួនសម្រាប់ការយាងមករបស់ទ្រង់ ដោយខិតខំធ្វើតាមគំរូរបស់ទ្រង់នៃការរស់នៅដ៏សុចរិត ។សូមចំណាយពេលពីរបីនាទីដើម្បីសរសេរកំណែសម័យទំនើបនៃរឿងប្រៀបប្រដូចនេះ ។ តើសព្វថ្ងៃនេះស្រ្តីព្រហ្មចារីដែលមានគំនិតនឹងរស់នៅរបៀបណា ? តើអ្នកអាចនិយាយបានថាពួកគេស្គាល់ព្រះអម្ចាស់ និងបានប្រែចិត្តជឿលើទ្រង់ដោយរបៀបណា ? តើសព្វថ្ងៃនេះ ស្ត្រីព្រហ្មចារីដែលល្ងង់នឹងរស់នៅរបៀបណា ? តើមានហេតុផលអ្វីខ្លះដែលពួកគេនឹងរង់ចាំដើម្បីស្គាល់ព្រះអម្ចាស់ ?

សូមអញ្ជើញសិស្សពីរបីនាក់ឲ្យចែកចាយរឿងប្រៀបប្រដូចក្នុងសម័យទំនើបរបស់ពួកគេនិងការយល់ដឹងណាមួយដែលពួកគេ មានអារម្មណ៍ថាមានប្រយោជន៍ ។ វាអាចជួយសិស្សឲ្យមានអារម្មណ៍ស្រួលក្នុងការចែកចាយនៅមុខមិត្តរួមថ្នាក់ ប្រសិនបើពួកគេចែកចាយជាលើកដំបូងជាមួយក្រុមតូចសិន ។

សូមពិចារណាសួរសំណួរខាងក្រោមនេះ ដើម្បីជួយពួកគេឲ្យដឹងពីសារៈសំខាន់នៃការមកស្គាល់ព្រះយេស៊ូវគ្រីស្ទ ។

• តាមគំនិតរបស់អ្នក ហេតុអ្វីបានជាវាមានតម្លៃដើម្បីខិតខំមកស្គាល់ព្រះអង្គសង្គ្រោះហើយត្រៀមខ្លួនដើម្បីជួបទ្រង់នៅពេលទ្រង់យាងមកម្តងទៀត ?

• តើការព្យាយាមរស់នៅដូចព្រះអង្គសង្គ្រោះជួយយើងឲ្យស្គាល់ទ្រង់កាន់តែច្បាស់ដោយរបៀបណា ?

• តើបទពិសោធន៍ និងសកម្មភាពសុចរិតអ្វីខ្លះ ដែលបានជួយអ្នកឲ្យស្គាល់ព្រះយេស៊ូវគ្រីស្ទបានល្អបំផុត ?

សូមទុកពេលខ្លះឲ្យសិស្សសញ្ជឹងគិតពីសកម្មភាពបន្ទាប់ ។

សូមគូរចង្កៀងសាមញ្ញមួយនៅក្នុងសៀវភៅកំណត់ហេតុការសិក្សារបស់អ្នក ។ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីដឹងពីគំរូនៃអ្វីដែលអ្នកបានធ្វើ ដើម្បីមកស្គាល់ព្រះអង្គសង្គ្រោះ និងរបៀបដែលអ្នកបានរៀបចំខ្លួនសម្រាប់ការយាងមករបស់ទ្រង់ ។ សូមពិចារណាសរសេរការណែនាំទាំងនេះនៅខាងក្នុងចង្កៀង ដើម្បីតំណាងឲ្យប្រេងរបស់អ្នក ។ សូមស្វែងរកការបំផុសគំនិតផងដែរ ដើម្បីដឹងពីអ្វីដែលព្រះអម្ចាស់សព្វព្រះទ័យឲ្យអ្នកធ្វើក្នុងពេលនេះ ដើម្បីអាចស្គាល់ទ្រង់ឲ្យកាន់តែច្បាស់ហើយត្រៀមខ្លួនបន្ថែមទៀតសម្រាប់ការយាងមករបស់ទ្រង់ ។ សូមសរសេរនិមិត្តរូបមួយ ឬពីរនៅក្រៅចង្កៀង ដែលតំណាងឲ្យប្រេងដែលអ្នក នៅតែ ត្រូវការដើម្បីចាក់ចូលចង្កៀង ។

សូមស្វែងរកជំនួយពីព្រះអម្ចាស់ នៅពេលអ្នកខិតខំស្គាល់ទ្រង់ឲ្យកាន់តែច្បាស់ ហើយរៀបចំ ខ្លួន ដើម្បី ជួបទ្រង់ ។

វិចារណកថា និង ព័ត៌មានសាច់រឿង

ម៉ាថាយ ២៥:៦ ។ តើការដែលកូនកំលោះមកពាក់កណ្ដាលអធ្រាត្រមានសារៈសំខាន់អ្វីខ្លះ ?

ពិធីមង្គលការរបស់សាសន៍យូដាភាគច្រើននឹងធ្វើឡើងនៅពេលល្ងាច ។ វគ្គបទគម្ពីរជាច្រើនសំដៅលើការយាងមកម្ដងទៀតរបស់ព្រះអង្គសង្គ្រោះដូចជាចោរនៅពេលយប់ ( សូមមើល ការបកប្រែដោយ យ៉ូសែប ស្ម៊ីធ លូកា ១២:៤៤ [ នៅក្នុងឧបសម្ព័ន្ធព្រះគម្ពីរប៊ីប ] ថែស្សាឡូនីច ទី១ ៥:២ ; ពេត្រុស ទី២ ៣:១០ ; គោលលទ្ធិ និង សេចក្ដីសញ្ញា ៤៥:១៩ ; ១០៦:៤ ) ។ ការមកដល់របស់កូនកំលោះនៅពាក់កណ្តាលអធ្រាត្រ បង្ហាញពីម៉ោងដែលមិនបានរំពឹងទុកនៃការយាងមករបស់ព្រះអង្គសង្គ្រោះ ។ ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) បានពន្យល់ ៖

ស្ដ្រីព្រហ្មចារីដែលល្ងង់ ពុំបានផ្ដោតអារម្មណ៍ទៅលើការទិញប្រេងនោះទេ ។ ពួកគេដឹងថា ពួកគេគួរតែមានប្រេង ។ ពួកគេគ្រាន់តែពន្យារពេល ដោយសារពុំបានដឹងពីពេលវេលាដែលកូនកំលោះនឹងមកដល់ឡើយ ។ … កណ្តាលអធ្រាត្រគឺយឺតណាស់សម្រាប់អ្នកដែលចូលចិត្តពន្យារពេល ។

( ស្ពែនស៊ើរ ដបុលយូ ឃឹមបឹល Faith Precedes the Miracle [ ឆ្នាំ ១៩៧២ ] ទំព័រ ២៥៦ )

ចុះបើថ្ងៃនៃការយាងមករបស់ទ្រង់គឺជាថ្ងៃស្អែកវិញនោះ ?

ប្រធាន ដាល្លិន អេក អូក ក្នុងគណៈប្រធានទីមួយបានបង្រៀនដូចខាងក្រោមនេះ ៖

ប្រសិនបើយើងបានដឹងថា យើងត្រូវជួបនឹងព្រះអម្ចាស់នៅថ្ងៃស្អែក—តាមរយៈការស្លាប់មុនអាយុ ឬតាមរយៈការយាងមកដែលមិនបានរំពឹងជាមុនរបស់ទ្រង់ —តើយើងនឹងធ្វើអ្វីខ្លះនៅថ្ងៃនេះ ? តើយើងនឹងសារភាពអ្វីខ្លះ ? តើយើងនឹងបញ្ឈប់ការអនុវត្តអ្វីខ្លះ ? តើយើងនឹងយកដំណើររឿងណាមួយមកដោះស្រាយ ? តើការអត់ទោសណាខ្លះដែលយើងនឹងធ្វើ ? តើយើងនឹងថ្លែងទីបន្ទាល់ដូចម្ដេច ?

ចុះបើយើងនឹងត្រូវធ្វើការណ៍ទាំងនោះនៅពេលនោះ ហេតុអ្វីយើងមិនធ្វើឥឡូវនេះ ? ហេតុអ្វីបានជាយើងមិនស្វែងរកសេចក្ដីសុខសាន្ដ ខណៈដែលសេចក្ដីសុខសាន្ដអាចទទួលបាននោះ ? ប្រសិនបើចង្កៀងនៃការរៀបចំរបស់យើងអស់ប្រេង សូមយើងចាប់ផ្តើមចាក់បំពេញភ្លាមៗ ។

( ដាល្លិន អេក អូក « Preparation for the Second Coming » Ensign ឬ Liahona ខែ ឧសភា ឆ្នាំ ២០០៤ ទំព័រ ៩ )

ហេតុអ្វីបានជាស្រ្តីព្រហ្មចារីដែលមានគំនិត មិនព្រមចែករំលែកប្រេងរបស់ពួកគេ ?

ដោយថ្លែងអំពីស្រ្តីព្រហ្មចារីមានគំនិត ដែលមិនចែករំលែកប្រេងរបស់ពួកគេជាមួយនឹងស្ដ្រីព្រហ្មចារីល្ងង់ ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) បានបង្រៀន ៖

ទង្វើបែបនេះពុំមែនជាភាពអាត្មានិយម ឬការមិនមានសណ្ដានចិត្តនោះទេ ។ ប្រេងដែលយើងត្រូវការដើម្បីបំភ្លឺផ្លូវ និងបំភ្លឺភាពល្ងិតល្ងង់មិនអាចចែករំលែកបានឡើយ ។ តើមនុស្សម្នាក់អាចចែកចាយការគោរពប្រតិបត្តិចំពោះគោលការណ៍ដង្វាយមួយភាគក្នុងដប់… យ៉ាងដូចម្ដេច ? … តើបុគ្គលម្នាក់អាចចែកចាយឥរិយាបថ ឬបរិសុទ្ធភាព ឬចែកចាយបទពិសោធន៍ក្នុងបេសកកម្មបានយ៉ាងដូចម្ដេចទៅ ? តើបុគ្គលម្នាក់អាចចែកចាយឯកសិទ្ធិ ដើម្បីចូលក្នុងព្រះវិហារបរិសុទ្ធបានយ៉ាងដូចម្ដេចទៅ ? បុគ្គលម្នាក់ៗត្រូវតែមានប្រេងនោះដោយខ្លួនឯង ។ …

នៅក្នុងជីវិតយើង ប្រេងនៃការត្រៀមខ្លួនជាស្រេច គឺស្រក់មកមួយតំណក់ម្ដងៗតាមរយៈការរស់នៅដោយសុចរិត ។ … រាល់ទង្វើនៃការលះបង់ និងការគោរពប្រតិបត្តិ គឺជាការបន្ថែមតំណក់ប្រេងធ្លាក់ចូលក្នុងស្តុករបស់យើង ។

( ស្ពែនស៊ើរ ដបុលយូ ឃឹមបឹល Faith Precedes the Miracle [ ឆ្នាំ ១៩៧២ ] ទំព័រ ២៥៥–២៥៦ )

សកម្មភាពរៀនសូត្របន្ថែម

ការអនុវត្តសាច់រឿង

នៅចុងបញ្ចប់នៃមេរៀន វាអាចមានប្រសិទ្ធភាពក្នុងការឲ្យសិស្សពិចារណាពីរបៀប ដែលមនុស្សផ្សេងគ្នាគួរអនុវត្តមេរៀន ដែលពួកគេបានរៀនពីរឿងប្រៀបប្រដូចអំពីស្ត្រីព្រហ្មចារីដប់នាក់នេះ ។ សូមពិចារណាអញ្ជើញសិស្សឲ្យឆ្លើយតបនឹងសាច់រឿងមួយក្នុងចំណោមសាច់រឿងខាងក្រោមនេះ ៖

• ប្រសិនបើនរណាម្នាក់បានទម្លាក់ចោលអ្វីគ្រប់យ៉ាងដើម្បីចូលជិតព្រះអម្ចាស់ ហើយរស់នៅដោយសុចរិត តើអ្នកចង់ឲ្យពួកគេមានអារម្មណ៍យ៉ាងណានៅក្នុងមេរៀននេះ ? តើជំហានដំបូងអ្វីដែលអ្នកនឹងអញ្ជើញពួកគេឲ្យធ្វើ ?

• ប្រសិនបើនរណាម្នាក់ព្យាយាមមករកព្រះអម្ចាស់ដោយឧស្សាហ៍ព្យាយាម ប៉ុន្តែមានអារម្មណ៍ភិតភ័យ និងខ្លាចចំពោះការយាងមកជាលើកទីពីររបស់ព្រះអង្គសង្គ្រោះ តើអ្នកចង់ឲ្យពួកគេដឹង និងមានអារម្មណ៍បែបណាបន្ទាប់ពីការសិក្សាមេរៀននេះ ?

• ប្រសិនបើនរណាម្នាក់មិនខ្វល់ពីការយាងមកជាលើកទីពីររបស់ព្រះអម្ចាស់ទេ តើអ្នកចង់ឲ្យពួកគេមានអារម្មណ៍បែបណា និងធ្វើអ្វីខ្លះបន្ទាប់ពីការសិក្សាមេរៀននេះ ?