ការរំឭកចំណេះចំណានខាងគោលលទ្ធិ ៩

អនុវត្តការយល់ដឹង និងការពន្យល់អំពីសេចក្ដីពិតនានា

វគ្គបទគម្ពីរចំណេះចំណានខាងគោលលទ្ធិមានសេចក្ដីពិតសំខាន់ៗអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយអ្នកឲ្យយល់កាន់តែច្បាស់អំពីសេចក្តីពិតទាំងនេះ និងជួយអ្នកឲ្យអនុវត្តការពន្យល់សេចក្ដីពិតទាំងនោះដល់អ្នកដទៃ ។

ការអនុវត្តការពន្យល់ ។ ការផ្តល់ឱកាសឲ្យសិស្សអនុវត្តពន្យល់ពីសេចក្តីពិតដែលព្រះអង្គសង្គ្រោះបានបង្រៀនអាចជួយពួកគេឲ្យទទួលស្គាល់នូវអ្វីដែលពួកគេដឹងអំពីសេចក្តីពិត និងបង្កើនទំនុកចិត្តរបស់ពួកគេក្នុងការចែកចាយចំណេះដឹងរបស់ពួកគេជាមួយអ្នកដទៃ ។

ការរៀបចំរបស់សិស្ស ៖ សូមអញ្ជើញសិស្សឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិ ដែលពួកគេបានរៀនថ្មីៗនេះ ហើយពន្យល់វាដល់នរណាម្នាក់ ។

សកម្មភាពរៀនសូត្រដែលអាចមាន

មេរៀនវគ្គចំណេះចំណានខាងគោលលទ្ធិ អាចចាំបាច់ត្រូវបង្រៀនភ្លាមៗនៅពេលរំឭកមេរៀន ។ សូមមើលកាលវិភាគមេរៀនដែលផ្តល់ដោយនាយកតំបន់ ឬអ្នកសម្របសម្រួលតំបន់ ដើម្បីធានាថា មេរៀនវគ្គបទគម្ពីរចំណេះចំណានខាងគោលលទ្ធិនីមួយៗនឹងត្រូវបានបង្រៀនអំឡុងវគ្គសិក្សារបស់ថ្នាក់សិក្ខាសាលា ។

សូមពិចារណាអញ្ជើញសិស្សឲ្យបង្ហាញជំនាញដែលត្រូវការការអនុវត្តដើម្បីអភិវឌ្ឍ ដូចជាការលេងឧបករណ៍តន្ត្រី ឬការច្រៀង ។

ការអភិវឌ្ឍជំនាញមួយ

• តើអ្នកពូកែខាងអ្វី ?

• តើអ្នកអាចពូកែខាងជំនាញនោះរបៀបណា ?

អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បាននិយាយអំពីរបៀបដើម្បីអភិវឌ្ឍជំនាញ ។

ដើម្បីឲ្យមនុស្សម្នាក់ ស្ទាត់ជំនាញ ខាងអ្វីមួយ បន្ថែមពីលើទេពកោសល្យពីធម្មជាតិ វាតម្រូវឲ្យមានការលុតដំ ការលះបង់ដ៏ច្រើន ព្រមទាំងការបំពាក់បំប៉ន និងការអនុវត្តជាច្រើនម៉ោង ។

( ហ្គែរី អ៊ី ស្ទីវ៉ែនសុន « Your Priesthood Playbook » Ensign ឬ Liahona ខែ ឧសភា ឆ្នាំ ២០១៩ ទំព័រ ៤៧ )

• តើវាអនុវត្តចំពោះការសិក្សាព្រះគម្ពីររបស់អ្នកដូចម្តេចដែរ ?

• តើអ្នកមានទំនុកចិត្តប៉ុណ្ណាចំពោះសមត្ថភាពរបស់អ្នកក្នុងការពន្យល់ពីការបង្រៀនរបស់ព្រះអង្គសង្គ្រោះដល់អ្នកដទៃ ?

អ្នកមានសេរីភាពក្នុងការជ្រើសរើសវគ្គចំណេះចំណានខាងគោលលទ្ធិផ្សេងទៀតសម្រាប់សកម្មភាពខាងក្រោម ។

ថ្ងៃនេះ អ្នកនឹងប្រើវគ្គបទគម្ពីរចំណេះចំណានខាងគោលលទ្ធិ ដើម្បីធ្វើឲ្យការយល់ដឹងរបស់អ្នកស៊ីជម្រៅអំពីសេចក្ដីពិតដែលព្រះអង្គសង្គ្រោះបានបង្រៀន ហើយអ្នកនឹងអនុវត្តការពន្យល់អំពីសេចក្ដីពិតទាំងនេះដល់អ្នកដទៃ ។ ដំបូង វាអាចមានប្រយោជន៍ក្នុងការពិនិត្យមើលវគ្គចំណេះចំណានខាងគោលលទ្ធិ ដែលអ្នកបានសិក្សានាពេលថ្មីៗនេះ ។ សូមព្យាយាមផ្គូផ្គងសេចក្ដីយោងបទគម្ពីរចំណេះចំណានខាងគោលលទ្ធិជាមួយនឹងឃ្លាបទគម្ពីរគន្លឹះដែលត្រឹមត្រូវ ។

អ្នកមានសេរីភាពក្នុងការជ្រើសរើសវគ្គចំណេះចំណានខាងគោលលទ្ធិផ្សេងទៀតសម្រាប់សកម្មភាពខាងក្រោម ។ ចម្លើយសម្រាប់សកម្មភាពដែលត្រូវគ្នាគឺ ១–គ, ២–ខ, ៣–ក, ៤–ឃ ។

១. ម៉ាថាយ ១១:២៨–៣០	ក. « បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្តីបង្រៀននេះមកពីព្រះ » ។
២. ម៉ាថាយ ១៦:១៥–១៩	ខ. ព្រះយេស៊ូវបានមានបន្ទូលថា « ខ្ញុំនឹងឲ្យកូនសោនៃនគរស្ថានសួគ៌ដល់អ្នក » ។
៣. យ៉ូហាន ៧:១៧	គ. « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក » ។
៤. ម៉ាថាយ ២២:៣៦–៣៩	ឃ. « ត្រូវឲ្យស្រឡាញ់ព្រះអម្ចាស់ជាព្រះនៃឯង ។ … ត្រូវឲ្យស្រឡាញ់អ្នកជិតខាង » ។

ការយល់ដឹងអំពីវគ្គបទគម្ពីរ

សូមពិចារណាធ្វើសកម្មភាពខាងក្រោមនេះជាថ្នាក់ ។ សូមសរសេរវគ្គបទគម្ពីរចំណេះចំណានខាងគោលលទ្ធិនៅលើក្ដារខៀន ( មុនពេលចូលថ្នាក់ ប្រសិនបើអាចធ្វើទៅបាន ) ។ សូមចែកចាយការណែនាំខាងក្រោម ហើយអញ្ជើញសិស្សឲ្យសរសេរសំណួររបស់ពួកគេនៅលើក្ដារខៀន ។

សូមសរសេរសំណួរឲ្យបានច្រើនតាមដែលអាចធ្វើទៅបានអំពីវគ្គចំណេះចំណានខាងគោលលទ្ធិ ។ ( ឧទាហរណ៍នៃសំណួរដែលអ្នកអាចសួររួមមានដូចតទៅ ៖ តើឃ្លានេះមានន័យយ៉ាងណា ? តើព្រះអង្គសង្គ្រោះកំពុងមានព្រះបន្ទូលទៅកាន់អ្នកណា ហើយហេតុអ្វី ? តើសេចក្តីពិតអ្វីខ្លះដែលព្រះអង្គសង្គ្រោះបានបង្រៀន ហើយហេតុអ្វី ? តើការបង្រៀននេះអាចមានគុណប្រយោជន៍ដល់ខ្ញុំនៅពេលណា ? )សូមស្វែងរកចម្លើយចំពោះសំណួររបស់អ្នក ដោយប្រើធនធានដូចជា វគ្គបទគម្ពីរផ្សេងទៀត ការអធិស្ឋាន ជំនួយការសិក្សាដំណឹងល្អ និងមនុស្សដែលអ្នកទុកចិត្ត ។ សូមកត់ត្រាចម្លើយដែលអ្នករកឃើញ ។

វាជាការសំខាន់ដែលត្រូវចងចាំថា ចម្លើយទាំងអស់មិនមែនសុទ្ធតែរកឃើញដោយឆាប់រហ័សនោះទេ ។ អ្នកខ្លះត្រូវការពេលបន្ថែម ការសិក្សាបន្ថែម និងវិវរណៈផ្ទាល់ខ្លួន ។ ទោះជាយ៉ាងណាក៏ដោយ ការហាត់សួរសំណួរ និងការស្វែងរកចម្លើយអាចពង្រឹងទំនាក់ទំនងរបស់អ្នកជាមួយព្រះវរបិតាសួគ៌របស់អ្នក និងជួយអ្នកឲ្យបង្កើនសមត្ថភាពរបស់អ្នក ដើម្បីមានភាពពឹងខ្លួនទីពឹងខ្លួនខាងវិញ្ញាណ ។

សូមឲ្យសិស្សចែកចាយនូវអ្វីដែលពួកគេបានរកឃើញ ។ បន្ទាប់មក សូមអញ្ជើញពួកគេឲ្យធ្វើសកម្មភាពដូចគ្នាដោយខ្លួនឯង ជាមួយនឹងវគ្គផ្សេង ។ ឬវាអាចមានអត្ថប្រយោជន៍ក្នុងការដាក់វគ្គបទគម្ពីរចំណេះចំណានខាងគោលលទ្ធិមួយដែលកំពុងពិនិត្យមើលឲ្យទៅសិស្សម្នាក់ៗ ហើយបន្ទាប់មកបំបែកសិស្សជាក្រុម ដោយសិស្សម្នាក់ៗក្នុងក្រុមទទួលបាននូវវគ្គបទគម្ពីរផ្សេងៗគ្នា ។

ការពន្យល់ពីសេចក្ដីពិត

សូមពិចារណាពីការធ្វើតាមសកម្មភាពខាងក្រោមនេះដោយការបិទស្រោមសំបុត្រដាក់ជុំវិញបន្ទប់ដោយមាននូវវគ្គបទគម្ពីរចំណេះចំណានខាងគោលលទ្ធិតែមួយនៅក្នុងស្រោមសំបុត្រនីមួយៗ ។ សូមឲ្យសិស្សម្នាក់ៗសិក្សាពីវគ្គចំណេះចំណានខាងគោលលទ្ធិមួយក្នុងចំណោមវគ្គចំណេះចំណានខាងគោលលទ្ធិទាំងឡាយ ។ សូមបំបែកសិស្សជាក្រុម ហើយសូមធានាឲ្យបានថាបានដាក់វគ្គបទគម្ពីរផ្សេងៗគ្នាឲ្យទៅសិស្សម្នាក់ៗ ។ សូមអញ្ជើញក្រុមទាំងអស់ឲ្យទៅមើលស្រោមសំបុត្រនីមួយៗ ។ បន្ទាប់ពីពួកគេបើកស្រោមសំបុត្រហើយ សូមឲ្យសិស្សក្នុងក្រុមដែលបានសិក្សាវគ្គចំណេះចំណានខាងគោលលទ្ធិដែលមានក្នុងស្រោមសំបុត្រនោះពន្យល់ដល់ក្រុមផ្សេងទៀត អំពីអត្ថន័យនៃវគ្គបទគម្ពីរនេះ និងអ្វីដែលពួកគេបានរៀនអំពីវា ។

សូមស្រមៃថា មិត្តម្នាក់បានអានវគ្គបទគម្ពីរចំណេះចំណានខាងគោលលទ្ធិដែលអ្នកទើបតែបានសិក្សាហើយ ប៉ុន្តែមិនសូវយល់អំពីវគ្គបទគម្ពីរនោះ និងរបៀបដែលវាទាក់ទងនឹងជីវិតរបស់ពួកគេ ។ ពួកគេសួរអ្នកអំពីវគ្គបទគម្ពីរនោះ ។

សូមសរសេរការពន្យល់អំពីវគ្គបទគម្ពីរចំណេះចំណានខាងគោលលទ្ធិទៅកាន់មិត្តរបស់អ្នក ។ ត្រូវប្រាកដថាបានស្វែងយល់អំពីសេចក្ដីពិតសំខាន់ៗ និងពន្យល់ពីមូលហេតុដែលវាមានសារៈសំខាន់ចំពោះអ្នក ។

ការតាមដានលើការអនុវត្ត

សូមសញ្ជឹងគិតលើបទពិសោធន៍នៃការខិតខំស្វែងយល់ឲ្យកាន់តែស៊ីជម្រៅ និងពន្យល់ពីសេចក្តីពិតដែលមាននៅក្នុងវគ្គបទគម្ពីរចំណេះចំណានខាងគោលលទ្ធិ ។

• តើការយល់ដឹងកាន់តែស៊ីជម្រៅជះឥទ្ធិពលដល់សមត្ថភាពរបស់អ្នកក្នុងការពន្យល់អំពីសេចក្ដីពិតនៃដំណឹងល្អយ៉ាងដូចម្ដេច ?

• តើអ្នកអាចធ្វើអ្វីខ្លះនាពេលអនាគត ដើម្បីត្រៀមខ្លួនពន្យល់ដល់អ្នកដទៃអំពីសេចក្តីពិតដែលមាននៅក្នុងវគ្គបទគម្ពីរចំណេះចំណានខាងគោលលទ្ធិ និងនៅក្នុងវគ្គបទគម្ពីរផ្សេងៗទៀត ?