ម៉ាថាយ ២៥:១៤–៤៦

ការត្រៀមខ្លួនសម្រាប់ការយាងត្រឡប់មកវិញរបស់ព្រះអង្គសង្គ្រោះ

ព្រះអង្គសង្គ្រោះបានបង្រៀនរឿងប្រៀបប្រដូចអំពីប្រាក់ និងរឿងប្រៀបប្រដូចអំពីសត្វចៀម និងពពែ ដើម្បីជួយសិស្សរបស់ទ្រង់ឲ្យដឹងពីរបៀបដើម្បីត្រៀមខ្លួនសម្រាប់ការយាងមកជាលើកទីពីររបស់ទ្រង់ ។ មេរៀននេះអាចជួយអ្នកឲ្យស្គាល់សេចក្ដីពិតមកពីរឿងប្រៀបប្រដូចទាំងនេះ ហើយជួយអ្នកឲ្យត្រៀមខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ។

ការរៀបចំរបស់សិស្ស ៖ សូមអញ្ជើញសិស្សឲ្យអានរឿងប្រៀបប្រដូចអំពីប្រាក់ ( សូមមើល ម៉ាថាយ ២៥:១៤–៣០ ) ឬរឿងប្រៀបប្រដូចអំពីចៀម និងពពែ ( សូមមើល ម៉ាថាយ ២៥:៣១–៤៦ ) ហើយរៀបចំចែកចាយមេរៀនដែលពួកគេបានរៀនមកពីការសិក្សារបស់ពួកគេ ។

សកម្មភាពរៀនសូត្រដែលអាចមាន

ដើម្បីជួយសិស្សឲ្យរំឭកពីបទពិសោធន៍អតីតកាលរបស់ពួកគេក្នុងការសិក្សារឿងប្រៀបប្រដូចនេះ សូមបង្ហាញរូបភាពគ្រាប់ពូជ កាក់ និងកែវមុក្តាមួយ ឬប្រសិនបើអាចធ្វើទៅបាន សូមនាំយកវត្ថុទាំងនេះមួយចំនួនមកថ្នាក់រៀន ។ សូមអញ្ជើញសិស្សឲ្យរំឭករឿងប្រៀបប្រដូចមួយ ដែលពួកគេបានរៀនរួចហើយនៅក្នុងព្រះគម្ពីរសញ្ញាថ្មី ហើយពន្យល់ដោយសង្ខេបអំពីអត្ថន័យរបស់វា ។ វាអាចមានប្រយោជន៍ក្នុងការផ្អាកដើម្បីឲ្យសិស្សមានពេលគ្រប់គ្រាន់ដើម្បីរំឭកឧទាហរណ៍ទាំងឡាយ ។ ប្រសិនបើចាំបាច់ សូមផ្តល់ការរំឭកខ្លះៗអំពីរឿងប្រៀបប្រដូចទាំងនេះ ( រឿងប្រៀបប្រដូចដែលទាក់ទងនឹងគ្រាប់ពូជមាននៅក្នុង ម៉ាថាយ ១៣:៣–៨, ១៨–២៣; ប្រាក់នៅក្នុង លូកា ១៥:៨–១០ និងកែវមុក្តានៅក្នុង ម៉ាថាយ ១៣:៤៥–៤៦ ) ។

សូមរំឭកពីរឿងប្រៀបប្រដូចមួយចំនួនរបស់ព្រះអង្គសង្គ្រោះ ។ រូបភាពខាងក្រោមនេះអាចជួយអ្នកឲ្យចងចាំរឿងមួយចំនួន ដែលអ្នកបានសិក្សារួចហើយនៅឆ្នាំនេះ ។

• តើអ្នកនៅចាំការបង្រៀនអ្វីខ្លះមកពីរឿងប្រៀបប្រដូចទាំងនេះ ?

• តើការបង្រៀនដែលអ្នកបានរៀនក្នុងឆ្នាំនេះ អំពីរឿងប្រៀបប្រដូចទាំងនេះបានជួយអ្នកយ៉ាងដូចម្ដេច ?

ប្រសិនបើសិស្សមិនអាចគិតពីវិធីជាក់លាក់ដែលការបង្រៀនបានជួយពួកគេទេ សូមពិចារណាចែកចាយគំរូផ្ទាល់ខ្លួនមួយ ។

• តើអ្នកមានទំនុកចិត្តប៉ុណ្ណាដែរ ទៅលើសមត្ថភាពរបស់អ្នកក្នុងការរៀនសូត្រអំពីព្រះអង្គសង្គ្រោះតាមរយៈរឿងប្រៀបប្រដូចរបស់ទ្រង់ ?

សូមស្តាប់ចម្លើយរបស់សិស្សចំពោះសំណួរពីមុន ហើយកែសម្រួលឯកសារមេរៀនខាងក្រោមតាមតម្រូវការរបស់ពួកគេ ។

សូមរំឭកពីរបៀបយល់ដឹងរឿងប្រៀបប្រដូច

វាអាចមានប្រយោជន៍ក្នុងការរំឭកមតិយោបល់ឡើងវិញ អំពីរបៀបដែលយល់ពីរឿងប្រៀបប្រដូច ។ នៅដើមឆ្នាំនេះ អ្នកបានរៀនបួនជំហានអំពីការយល់ដឹងរឿងប្រៀបប្រដូច ។ ប្រសិនបើអ្នកមិនបានសិក្សាជំហានទាំងនេះទេ ឬត្រូវការជំនួយក្នុងការចងចាំពីជំហានទាំងនេះ សូមពិចារណាយោងទៅមេរៀន « ម៉ាថាយ ១៣ » ។

សូមសរសេរចំណងជើងដូចខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។ សូមទុកចន្លោះរវាងចំណងជើងនីមួយៗ ដើម្បីកត់ត្រាការរកឃើញ និងការយល់ដឹងនានា ។

1. ស្វែងរកព័ត៌មានលម្អិតសំខាន់ៗ ។

2. ធ្វើការប្រៀបធៀបខាងវិញ្ញាណ ។

3. ស្វែងយល់ពីមេរៀនដ៏មានតម្លៃ ។

4. កំណត់ការអនុវត្តផ្ទាល់ខ្លួន ។

នៅពេលអ្នកបន្តមេរៀននេះ អ្នកនឹងអនុវត្តគោលការណ៍ទាំងបួននេះចំពោះរឿងប្រៀបប្រដូច ដែលមាននៅក្នុង ម៉ាថាយ ២៥:១៤–៤៦ ។

ស្វែងរកព័ត៌មានលម្អិតសំខាន់ៗ

ដូចដែលព្រះអង្គសង្គ្រោះបានបង្រៀនអំពីការយាងមកជាលើកទីពីរ និងការជំនុំជម្រះ ទ្រង់បានចែកចាយរឿងប្រៀបប្រដូចទាំងឡាយ ដើម្បីគូសបញ្ជាក់ពីអ្វីដែលយើងអាចធ្វើបាន ដើម្បីត្រៀមខ្លួនសម្រាប់ការយាងមកវិញរបស់ទ្រង់ផងដែរ ។ សូមជ្រើសរើស ហើយសិក្សារឿងប្រៀបប្រដូចខាងក្រោមមួយដែលព្រះអង្គសង្គ្រោះបានប្រទានឲ្យ ដោយរកមើលព័ត៌មានលម្អិតសំខាន់ៗ ។

សូមប្រាកដថាត្រូវបង្ហាញ ឬផ្តល់សំណៅចែកដូចខាងក្រោមដើម្បីឲ្យសិស្សប្រើ នៅពេលពួកគេសិក្សា ។ សំណៅចែកផ្តល់យោបល់ឲ្យសិស្សគូររូបភាពនៃរឿងប្រៀបប្រដូច ។ សិស្សអាចធ្វើដូចនេះបាននៅខាងក្រោយសំណៅចែក ។ ដោយផ្អែកលើអ្វីដែលល្អបំផុតសម្រាប់សិស្សក្នុងថ្នាក់ សូមពិចារណាបែងចែកថ្នាក់ជាពីរក្រុមជំនួសវិញ ហើយអញ្ជើញក្រុមនីមួយៗឲ្យរៀបចំដើម្បីដើរតួសម្ដែងរឿងប្រៀបប្រដូចដែលពួកគេបានសិក្សា ។ ប្រសិនបើការណ៍នេះបានធ្វើរួច សូមពិចារណាលើចាត់តាំងតួនាទីឲ្យសិស្ស ( ឧទាហរណ៍ ធ្វើជាអ្នកដឹកនាំ អ្នកអាន និងតួសម្តែង ) ដើម្បីជួយពួកគេឲ្យចូលរួមក្នុងក្រុមរបស់ពួកគេ ។

រឿងប្រៀបប្រដូចអំពីប្រាក់

សូមអាន ម៉ាថាយ ២៥:១៤–៣០ ឬមើលវីដេអូ « The Parable of the Talents » ( ៣:០៣ ) ដែលមាននៅលើគេហទំព័រ ChurchofJesusChrist.org ។

ព័ត៌មានខាងក្រោមនេះអាចនឹងផ្ដល់អត្ថប្រយោជន៍ នៅពេលអ្នកសិក្សារឿងប្រៀបប្រដូចនេះ ៖

• « ប្រាក់មួយពាន់ » សំដៅទៅលើប្រាក់ដ៏ច្រើននៅសម័យបុរាណ ។ ក្នុងរឿងប្រៀបប្រដូចនេះ វាអាចតំណាងឲ្យ « អ្វីដែលមានតម្លៃដ៏អស្ចារ្យ » ដូចជាដំណឹងល្អ ឬពរជ័យ អំណោយ សមត្ថភាព និងឱកាសដែលព្រះអម្ចាស់ប្រទានដល់យើង ( សូមមើល សេចក្ដីណែនាំដល់បទគម្ពីរទាំងឡាយ « ប្រាក់ » នៅលើគេហទំព័រ scriptures.ChurchofJesusChrist.org) ។

• ពាក្យ « ការប្រាក់ » អាចសំដៅទៅលើការគិតការប្រាក់លើប្រាក់កម្ចី ឬអាចបង្ហាញពីអត្រាការប្រាក់ខ្ពស់ហួសហេតុ ( សូមមើល សេចក្តីណែនាំដល់បទគម្ពីរទាំងឡាយ « ប្រាក់ » ) ។

• ព្រះអម្ចាស់តំណាងឲ្យព្រះយេស៊ូវគ្រីស្ទ ។

• អ្នកបម្រើតំណាងឲ្យយើងម្នាក់ៗ ។

សូមគូររូបភាពដែលបង្ហាញពីរឿងប្រៀបប្រដូចនេះ ។

រឿងប្រៀបប្រដូចអំពីចៀម និងពពែ

សូមអាន ម៉ាថាយ ២៥:៣១–៤៦ ឬមើលវីដេអូ « Ye Have Done It unto Me » ( ៣:១៤ ) ដែលមាននៅលើគេហទំព័រ ChurchofJesusChrist.org ។

ការដឹងព័ត៌មានខាងក្រោមអាចមានប្រយោជន៍ នៅពេលអ្នកសិក្សារឿងប្រៀបប្រដូចនេះ ៖

• « ខាងស្តាំ » ៖ នៅសម័យបុរាណ ការអង្គុយនៅខាងស្តាំព្រះហស្ដស្តេច ឬនៅជាប់នឹងស្តេចនៅខាងស្តាំទ្រង់ គឺជាទីតាំងដ៏មានកិត្តិយសបំផុតនៅក្នុងពិធីជប់លៀង ។

សូមគូររូបភាពដែលបង្ហាញពីរឿងប្រៀបប្រដូចនេះ ។

ធ្វើការប្រៀបធៀបខាងវិញ្ញាណ ហើយស្វែងរកមេរៀនដ៏មានតម្លៃ

សូមប្រើសំណួរខាងក្រោមនេះ ដើម្បីជួយអ្នកឲ្យស្គាល់មេរៀនដែលព្រះអង្គសង្គ្រោះបានបង្រៀន តាមរយៈរឿងប្រៀបប្រដូចរបស់ទ្រង់ ។ សូមធ្វើវាឲ្យជាក់លាក់បំផុតតាមដែលអាចធ្វើបាន ។

សូមប្រាកដថា ត្រូវទុកពេលគ្រប់គ្រាន់រវាងសំណួរនីមួយៗខាងក្រោម ដើម្បីឲ្យសិស្សឆ្លើយតបប្រកបដោយការពិចារណា ។

• តើសេចក្ដីពិត ឬមេរៀនអ្វីខ្លះដែលអ្នកបានរៀន នៅពេលអ្នកសិក្សារឿងប្រៀបប្រដូចនេះ ?

ទាំងនេះគឺជាសេចក្តីពិតមួយចំនួន ដែលសិស្សអាចកត់សម្គាល់ឃើញ ៖ ប្រសិនបើយើងប្រើអំណោយ និងសមត្ថភាពដែលព្រះអម្ចាស់បានប្រទានមកយើងដោយស្មោះត្រង់ នោះទ្រង់នឹងសព្វព្រះទ័យចំពោះការខិតខំរបស់យើង ហើយនឹងប្រទានសេចក្ដីអំណរ និងជីវិតដ៏នៅអស់កល្បជានិច្ចជាពរជ័យដល់យើង ។ យើងអាចបង្ហាញសេចក្ដីស្រឡាញ់របស់យើងចំពោះព្រះអម្ចាស់តាមរបៀបដែលយើងប្រព្រឹត្តចំពោះអ្នកដទៃ ។

• តើការដឹង និងការរស់នៅតាមសេចក្តីពិតទាំងនេះអាចជួយយើងឲ្យរៀបចំសម្រាប់ការយាងមកជាលើកទីពីររបស់ព្រះអង្គសង្គ្រោះ បានដោយរបៀបណា ? ហេតុអ្វីបានជាអ្នកគិតថា ព្រះអង្គសង្គ្រោះបានបង្រៀនសេចក្ដីពិតទាំងនេះ ?

• តើព្រះអម្ចាស់មានព្រះហឫទ័យមេត្តាករុណា និងយុត្តិធម៌តាមរបៀបណា ?

• តើអ្នកអាចទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះនៅក្នុងសេចក្ដីពិត ដែលទ្រង់បានបង្រៀនតាមរយៈរឿងប្រៀបប្រដូចនេះរបៀបណា ?

• តើការដឹងពីសេចក្តីពិតទាំងនេះជះឥទ្ធិពលលើបំណងប្រាថ្នារបស់អ្នកក្នុងការរៀបចំខ្លួន ដើម្បីជួបព្រះអង្គសង្គ្រោះក្នុងការយាងមកជាលើកទីពីររបស់ទ្រង់យ៉ាងដូចម្ដេច ?

កំណត់ការអនុវត្តផ្ទាល់ខ្លួន

សូមជួយសិស្សឲ្យអនុវត្តនូវអ្វីដែលពួកគេបានរៀនមកពីមេរៀននេះ តាមរបៀបដែលពោរពេញដោយអត្ថន័យផ្ទាល់ខ្លួន ។ សកម្មភាពខាងក្រោមគឺជាយោបល់មួយចំនួន ។ សូមប្រើប្រាស់ ឬសម្របសកម្មភាពទាំងនេះតាមតម្រូវការ និងសមត្ថភាពរបស់សិស្ស ។

1. ប្រសិនបើអ្នកសិក្សារឿងប្រៀបប្រដូចអំពីប្រាក់ សូមធ្វើបញ្ជីអំពីសមត្ថភាព និងពរជ័យដែលព្រះអម្ចាស់បានប្រទានដល់អ្នក ។ ប្រសិនបើអាចធ្វើបាន សូមកំណត់ពរជ័យមួយចំនួន តាមរយៈការឈោងទៅរកមនុស្សដែលអ្នកស្គាល់ ឬដោយការអានពររបស់ លោកអយ្យកោរបស់អ្នក ប្រសិនបើអ្នកមាន ។ សូមគិតអំពីរបៀបដែលព្រះអម្ចាស់អាចនឹងសព្វព្រះទ័យឲ្យអ្នកប្រើសមត្ថភាព និងពរជ័យទាំងនេះ ។

2. ប្រសិនបើអ្នកបានសិក្សារឿងប្រៀបប្រដូចអំពីចៀម និងពពែ សូមគិតអំពីអត្ថន័យរបស់វានៅក្នុងកាលៈទេសៈរបស់អ្នកក្នុងការផ្តល់អាហារ ភេសជ្ជៈ សម្លៀកបំពាក់ និងភាពជាដៃគូដល់នរណាម្នាក់ ។ សូមគិតអំពីមនុស្សដែលអ្នកតែងតែឃើញ ហើយកំណត់នរណាម្នាក់ដែលអ្នកមានអារម្មណ៍ថាព្រះអម្ចាស់ចង់ឲ្យអ្នកជួយ ។ សូមសរសេរពីរបៀបដែលអ្នកអាចជួយបុគ្គលនោះឲ្យខិតទៅជិតទ្រង់ ។

3. សូមចែកចាយសេចក្ដីពិតមួយដែលអ្នកបានរៀននៅក្នុងមេរៀននេះមកពីរឿងប្រៀបប្រដូចរបស់ព្រះអង្គសង្គ្រោះ ហើយពន្យល់ពីរបៀបដែលអ្នកអាចអនុវត្តតាមគោលការណ៍នោះនៅក្នុងសកម្មភាពប្រចាំថ្ងៃរបស់អ្នក ។

សូមពិចារណាអញ្ជើញសិស្សឲ្យចែកចាយគំនិតរបស់ពួកគេមកពីសកម្មភាពដែលពួកគេបានបញ្ចប់ ។

វាអាចជាប្រយោជន៍ក្នុងការច្រៀងទំនុកតម្កើង « ចូររាប់ព្រះពរ » ( ទំនុកតម្កើង ល.រ. ១៥០ ) ។

សូមអញ្ជើញសិស្សឲ្យថ្លែងទីបន្ទាល់អំពីគោលការណ៍ដែលពួកគេបានកំណត់ ។ សូមលើកទឹកចិត្តពួកគេឲ្យប្រើអំណោយទាន និងសមត្ថភាពរបស់ពួកគេដើម្បីបម្រើអ្នកដទៃ និងដើម្បីរៀបចំខ្លួនទៅជួបព្រះអង្គសង្គ្រោះ ។

វិចារណកថា និង ព័ត៌មានសាច់រឿង

ចុះបើនរណាម្នាក់ទទួលបានច្រើនជាង ឬតិចជាងខ្ញុំទទួលនោះ ?

អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានថ្លែង ៖

ការអភិវឌ្ឍទេពកោសល្យផ្ទាល់ខ្លួន គឺជារង្វាស់ដ៏ល្អបំផុតនៃការរីកចម្រើនផ្ទាល់ខ្លួន ។ … ការប្រៀបធៀបពរជ័យគឺជាការដកយកសេចក្ដីអំណរចេញយ៉ាងពិតប្រាកដ ។ យើងពុំអាចមានការដឹងគុណ និងការច្រណែនក្នុងពេលតែមួយបានឡើយ ។ ប្រសិនបើយើងពិតជាចង់បានព្រះវិញ្ញាណនៃព្រះអម្ចាស់ ហើយទទួលបទពិសោធន៍នូវសេចក្ដីអំណរ និងសុភមង្គល នោះយើងគួរតែរីករាយនៅក្នុងពរជ័យរបស់យើង ហើយចូរមានអំណរគុណ ។

( ឃ្វីនថិន អិល ឃុក « Rejoice! » Ensign ខែ វិច្ឆិកា ឆ្នាំ ១៩៩៦ ទំព័រ ២៩–៣០ )

តើសកម្មភាពអ្វីខ្លះដែលព្រះអង្គសង្គ្រោះនឹងវិនិច្ឆ័យយើង ?

អែលឌើរ យ៉ូសែប ប៊ី វ៉ឺតលីន ( ឆ្នាំ ១៩១៧–២០០៨ ) ក្នុងកូរ៉ុមនៃពួកសាវកដប់ពីរនាក់បានថ្លែង ៖

នៅថ្ងៃចុងក្រោយ ព្រះអង្គសង្គ្រោះនឹងមិនសួរអំពីលក្ខណៈនៃការហៅរបស់យើងទេ ។ ទ្រង់នឹងមិនសាកសួរអំពីទ្រព្យសម្បត្តិ ឬកេរ្តិ៍ឈ្មោះរបស់យើងទេ ។ ទ្រង់នឹងសួរថាតើយើងបានបម្រើអ្នកជំងឺ ផ្តល់អាហារ និងទឹកដល់អ្នកស្រេកឃ្លាន ទៅសួរសុខទុក្ខអ្នកដែលជាប់គុក ឬផ្តល់ជំនួយដល់អ្នកទន់ខ្សោយដែរឬទេ [ សូមមើល ម៉ាថាយ ២៥:៣១–៤០ ] ។ ពេលយើងឈោងទៅជួយបុត្រាបុត្រីរបស់ព្រះវរបិតាសួគ៌ដែលតូចបំផុត នោះវាក៏ដូចជាយើងធ្វើចំពោះទ្រង់ដែរ [ សូមមើល ម៉ាថាយ ២៥:៤០ ] ។ នោះគឺជាខ្លឹមសារនៃដំណឹងល្អរបស់ព្រះយេស៊ូវគ្រីស្ទ ។

( យ៉ូសែប ប៊ី វ៉ឺតលីន « The Great Commandment » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៣០ )

តើព្រះអម្ចាស់រំពឹងអ្វីពីយើងជាមួយនឹងអ្វីដែលទ្រង់ប្រទានដល់យើង ?

អែលឌើរ ស្ទែនលី ជី អេលីស ក្នុងកូរ៉ុមនៃពួកចិតសិបនាក់បានចែកចាយការយល់ដឹងអំពីរឿងប្រៀបប្រដូចស្តីពីប្រាក់ ៖

អ្នកបម្រើដែលបានទទួលប្រាក់ប្រាំពាន់ ហើយបានប្រគល់មកវិញមួយម៉ឺន ព្រមទាំងអ្នកដែលបានពីរពាន់ ហើយបានប្រគល់មកវិញបួនពាន់ នោះត្រូវបានគេប្រកាសថាជាអ្នកបម្រើដ៏ល្អ និងស្មោះត្រង់ ។ ប៉ុន្តែអ្វីដែលធ្វើឲ្យខ្ញុំចាប់អារម្មណ៍នោះ គឺអ្នកបម្រើដែលបានទទួលមួយពាន់នោះ បានមើលថែ ហើយប្រគល់វាត្រឡប់ទៅម្ចាស់វិញដោយសុវត្ថិភាព ។ ខ្ញុំភ្ញាក់ផ្អើលចំពោះការឆ្លើយតបរបស់ចៅហ្វាយ ៖ « បាវអាក្រក់ ហើយខ្ជិលច្រអូសអើយ … ចូរដកប្រាក់១ពាន់នោះពីវាចេញ … ចូរបោះវាចោលទៅឯទីងងឹតខាងក្រៅទៅ » ! ( សូមមើល ម៉ាថាយ ២៥:១៤–៣០. )

រឿងនេះហាក់ដូចទ្រង់មានប្រតិកម្មយ៉ាងតឹងរ៉ឹងចំពោះអ្នកដែលហាក់ដូចជាកំពុងព្យាយាមថែរក្សាអ្វីដែលគាត់ត្រូវបានផ្តល់ឲ្យ ។ ប៉ុន្តែព្រះវិញ្ញាណបានបង្រៀនខ្ញុំពីសេចក្តីពិតនេះ—ព្រះអម្ចាស់រំពឹងថានឹងមានភាពខុសគ្នា !

( ស្ទែនលី ជី អ៊ែលលីស « He Trusts Us! » Ensign ឬ Liahona ខែ វិច្ឆិកា ឆ្នាំ ២០០៦ ទំព័រ ៥២ )

អែលឌើរ អេលីស បានផ្តល់យោបល់ថាយើងអាចធ្វើ « ឲ្យមានភាពខុសគ្នា » នៅក្នុងជីវិតរបស់យើង តាមរយៈការនៅជាប់នឹងព្រះអម្ចាស់ ( សូមមើល យ៉ូហាន ១៥:៥ ) ការបំពេញកាតព្វកិច្ចខាងវិញ្ញាណរបស់យើង និងការធ្វើតាមព្រះវិញ្ញាណ និងថ្នាក់ដឹកនាំសាសនាចក្ររបស់យើង ។

សកម្មភាពរៀនសូត្របន្ថែម

ការប្តូរគំនិតមេរៀន ៖ ប្រាក់ស្លឹងរបស់ស្រ្តីម៉េម៉ាយ

ប្រសិនបើសិស្សនឹងទទួលបានអត្ថប្រយោជន៍ពីការរៀនពីរបៀប ដែលព្រះអម្ចាស់មានអារម្មណ៍ចំពោះអ្វីដែលយើងថ្វាយទ្រង់ សូមពិចារណាអញ្ជើញសិស្សឲ្យរៀនអំពីរឿងប្រាក់ស្លឹងរបស់ស្រ្តីមេម៉ាយម្នាក់ ។

សូមយកលុយពីរសន្លឹកមកដែលមួយសន្លឹក ជាក្រដាសប្រាក់តូចជាងគេ និងមួយសន្លឹកទៀតធំជាងគេបំផុត ។ សូមឲ្យសិស្សគិតអំពីអ្វីដែលពួកគេអាចទិញបានជាមួយនឹងក្រដាសប្រាក់ទាំងពីរនេះ ។ បើមនុស្សពីរនាក់នោះឲ្យលុយទាំងនេះមកអ្នក តើអំណោយមួយណាដែលសិស្សឲ្យតម្លៃជាង ? ហេតុអ្វីទៅ ?

បន្ទាប់មក សិស្សអាចអាន ម៉ាកុស ១២:៤១–៤៤ ឬ លូកា ២១:១–៤ ឬមើលវីដេអូ « Jesus Teaches about the Widow’s Mites » ( ០:៥៨ ) ដែលមាននៅលើគេហទំព័រ ChurchofJesusChrist.org ដោយរកមើលពីរបៀបដែលព្រះអម្ចាស់កំណត់តម្លៃលើការថ្វាយដង្វាយរបស់យើង ។ សិស្សអាចរាយបញ្ជីឧទាហរណ៍នៃដង្វាយដែលពួកគេបានថ្វាយព្រះអម្ចាស់ ( ឧទាហរណ៍ ចំនួនដង្វាយមួយភាគក្នុងដប់តិច តែពេញលេញ ធ្វើការងារបម្រើស្ងាត់ៗ ឬការបង្រៀនមេរៀន ឬការថ្លែងសុន្ទរកថា ទោះបីជាពួកគេភ័យក៏ដោយ ) ហើយពិភាក្សាអំពីមូលហេតុ ដែលព្រះអម្ចាស់សព្វព្រះទ័យចំពោះដង្វាយរបស់យើង ។

ការបម្រើមនុស្សដទៃ

ដើម្បីបង្ហាញពីគោលគំនិតនៃការប្រើប្រាស់ « ទេពកោសល្យ » ដែលបានប្រទានដល់យើងដើម្បីជួយអ្នកដទៃ ( សូមមើល ម៉ាថាយ ២៥:៣៥–៤០ ) សូមពិចារណាបង្ហាញវីដេអូ « The Coat » ( ២:០៨ ) ដែលពិពណ៌នាពីព្រឹត្តិការណ៍មួយនៅក្នុងកុមារភាពរបស់ប្រធាន ហ៊ីប៊ើរ ចេ ក្រាន្ត ។ វីដេអូនេះមាននៅលើគេហទំព័រ ChurchofJesusChrist.org ។

សូមអញ្ជើញសិស្សឲ្យមើលវីដេអូនេះ ដោយរកមើលថា តើក្មេងប្រុសនោះបានបម្រើដល់នរណា ។