ម៉ាថាយ ៥:១–១២

ក្រឹត្យវិន័យមាស

ដើម្បីចាប់ផ្តើមទេសនកថានៅលើភ្នំ ព្រះអង្គសង្គ្រោះបានបង្រៀនពីរបៀបដែលមនុស្សអាចរីករាយ និងទទួលបានពរជ័យ ។ ប្រធាន ហារ៉ូល ប៊ី លី ( ឆ្នាំ ១៨៩៩–១៩៧៣ ) បានមានប្រសាសន៍ថា ការបង្រៀនទាំងនេះ « ជាការពិត កំណត់ឲ្យមានជីវិតដ៏ល្អឥតខ្ចោះ » ( Teachings of Presidents of the Church: Harold B. Lee [ ឆ្នាំ ២០០០ ] ទំព័រ ២០០ ) ។ មេរៀននេះនឹងជួយអ្នកឲ្យស្គាល់ពីគុណលក្ខណៈដូចជាព្រះគ្រីស្ទ និងដាក់ផែនការដើម្បីអភិវឌ្ឍបុគ្គលិកលក្ខណៈទាំងនោះ នៅពេលអ្នកស្វែងរកសុភមង្គល និងភាពល្អឥតខ្ចោះ ។

គោលបំណងរបស់ថ្នាក់សិក្ខាសាលា ។ គោលបំណងរបស់ថ្នាក់សិក្ខាសាលាគឺដើម្បីជួយយុវវ័យឲ្យយល់ និងពឹងផ្អែកលើការបង្រៀន និងដង្វាយធួននៃព្រះយេស៊ូវគ្រីស្ទ មានភាពស័ក្តិសមដើម្បីទទួលពរជ័យទាំងឡាយនៃព្រះវិហារបរិសុទ្ធ និងរៀបចំខ្លួនរបស់ពួកគេ ក្រុមគ្រួសាររបស់ពួកគេ និងអ្នកដទៃទៀតសម្រាប់ជីវិតដ៏នៅអស់កល្បជានិច្ចជាមួយនឹងព្រះវរបិតា ដែលគង់នៅស្ថានសួគ៌របស់ពួកគេ ។ នៅពេលអ្នករៀបចំមេរៀន សូមអធិស្ឋានដើម្បីកំណត់ពីរបៀបដែលអ្នកជួយសម្រេចបានគោលបំណងនេះជារៀងរាល់ថ្ងៃ ។

ការរៀបចំរបស់សិស្ស ៖ សូមអញ្ជើញសិស្សឲ្យជ្រើសរើសបុគ្គលិកលក្ខណៈមួយនៅក្នុង ម៉ាថាយ ៥:១–១២ ដែលពួកគេចង់ដឹងបន្ថែមទៀត ។ សូមឲ្យពួកគេរៀនពីអត្ថន័យរបស់វា ហើយគិតពីរបៀបដែលបុគ្គលិកលក្ខណៈនោះអាចនាំឲ្យមានសុភមង្គល ។

សកម្មភាពរៀនសូត្រដែលអាចមាន

ការបង្កើនសុភមង្គល

សូមពិចារណាសរសេរសំណួរខាងក្រោមនៅលើក្តារខៀនមុនចាប់ផ្ដើមបង្រៀន ។

• តើអ្នកសប្បាយចិត្តបំផុតនៅពេលណា ?

• តើសុភមង្គលនោះស្ថិតស្ថេរដែរឬទេ ? ហេតុអ្វីបានជាអ្នកគិតថា វាស្ថិតស្ថេរ ឬមិនស្ថិតស្ថេរ ?

កាលព្រះអង្គសង្គ្រោះបានចាប់ផ្ដើមការងារបម្រើរបស់ទ្រង់ នោះទ្រង់បានថ្លែងទេសនកថាមួយនៅក្បែរសមុទ្រកាលីឡេ ។ ជារឿយៗ ការបង្រៀននេះត្រូវបានគេហៅថា ទេសនកថានៅលើភ្នំ ហើយបានកត់ត្រាទុកនៅក្នុង ម៉ាថាយ ៥–៧ ។ នៅពេលដែលព្រះអម្ចាស់បានយាងទៅជួបពួកសាសន៍នីហ្វៃ នោះទ្រង់បានបង្រៀនទេសនថាស្រដៀងគ្នានេះមួយ ( សូមមើល នីហ្វៃទី៣ ១២–១៤ ) ។

ម៉ាថាយ ៥:១–១២ ត្រូវបានគេស្គាល់ថាជា ក្រឹត្យវិន័យមាស ដែលចេញមកពីពាក្យភាសាឡាតាំងដែលមានន័យថា « មានពរហើយ » ឬ « រីករាយ » ( ម៉ាថាយ ៥:៣ ) ។ នៅក្នុងខគម្ពីរទាំងនេះ ព្រះយេស៊ូវបានបញ្ជាក់ពីគុណលក្ខណៈដែលទ្រង់ និងព្រះវរបិតារបស់ទ្រង់មាន ដែលនាំឲ្យមានសុភមង្គលពិតនៅក្នុងជីវិតនេះ និងនៅក្នុងជីវិតនាពេលអនាគត ។ ការអភិវឌ្ឍបុគ្គលិកលក្ខណៈទាំងនេះនឹងជួយអ្នកឲ្យក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ ។

សូមអានម៉ាថាយ ៥:១–១២ ដោយរកមើល និងគូសចំណាំគុណលក្ខណៈដែលព្រះអង្គសង្គ្រោះបានបង្រៀន និងពរជ័យដែលបានសន្យាសម្រាប់គុណលក្ខណៈនីមួយៗ ។

ឬសូមពិចារណាមើលវីដេអូ « Sermon on the Mount: The Beatitudes » ចាប់ពីលេខកូដម៉ោង ០:០០ ដល់ ១:១៥ ដោយស្តាប់រកគុណលក្ខណៈដែលព្រះអង្គសង្គ្រោះបានបង្រៀន ។ វីដេអូនេះមាននៅលើគេហទំព័រ ChurchofJesusChrist.org ។

គោលការណ៍មួយដែលយើងអាចរកឃើញនៅក្នុងខគម្ពីរទាំងនេះបានគឺថា នៅពេលយើងអភិវឌ្ឍបុគ្គលិកលក្ខណៈដូចជាព្រះគ្រីស្ទនោះ យើងនឹងទទួលបានសុភមង្គលបានកាន់តែខ្លាំងឡើង ។

• តើអ្នកគិតថា របៀបរស់នៅរបស់ព្រះអង្គសង្គ្រោះរួមចំណែកដល់សុភមង្គលរបស់ទ្រង់តាមរបៀបណា ?

ប្រសិនបើសិស្សត្រូវបានអញ្ជើញឲ្យរៀនពីបុគ្គលិកលក្ខណៈមួយ មុនពេលមករៀន សូមអញ្ជើញពួកគេឲ្យចែករំលែកអ្វីដែលពួកគេបានរៀន ។ សូមសួរសិស្សថា តើពួកគេបានប្រើប្រាស់ប្រភពមកពីណា ដើម្បីរៀនអំពីបុគ្គលិកលក្ខណៈនេះ ។

សូមរៀនសូត្រអំពីបុគ្គលិកលក្ខណៈខាងក្រោមនេះមួយ ឬច្រើន ។ សូមពិចារណាអំពីរបៀបដែលការអភិវឌ្ឍបុគ្គលិកលក្ខណៈនេះ និងការទទួលពរជ័យដែលបានសន្យា អាចជួយអ្នកឲ្យសប្បាយរីករាយបាន ។

សូមផ្តល់សំណៅចែកជូនដល់សិស្សដែលមានសំណួរដូចខាងក្រោម ។ សូមលើកទឹកចិត្តសិស្សឲ្យរក្សាសំណៅចែកនេះទុក នៅកន្លែងណាដែលពួកគេអាចមើលឃើញបានយ៉ាងងាយស្រួល សម្រាប់ការប្រើប្រាស់នាពេលអនាគត ។

ក្រឹត្យវិន័យមាស
សេចក្ដីយោង	បុគ្គលិកលក្ខណៈ
ម៉ាថាយ ៥:៣; នីហ្វៃទី៣ ១២:៣	មានសេចក្តីកំសត់ខាងឯវិញ្ញាណ ។ ភាពរាបសា ឬ « ការទទួលស្គាល់ដោយដឹងគុណចំពោះការពឹងផ្អែករបស់យើងទៅលើព្រះអម្ចាស់—ជាការយល់ថា យើងត្រូវការជំនួយពីទ្រង់ជានិច្ច ។ ការបន្ទាបខ្លួនគឺជាការទទួលស្គាល់ថា ទេពកោសល្យ និងសមត្ថភាពរបស់យើងគឺជាអំណោយមកពីព្រះ » ( Gospel Topics « Humility » នៅលើគេហទំព័រ topics.ChurchofJesusChrist.org ) ។
ម៉ាថាយ ៥:៤	យំសោក ។ ការមានអារម្មណ៍ និងការបង្ហាញពីទុក្ខព្រួយដោយសាររឿងអ្វីមួយ ។ មនុស្សម្នាក់អាចយំសោកដោយសារការសាកល្បងនៃជីវិតរមែងស្លាប់ ដែលពួកគេ និងអ្នកដទៃជួបប្រទះ ។ មនុស្សម្នាក់ក៏អាចយំសោកបាន ដោយសារតែភាពសោកសៅនៃអំពើបាបផងដែរ ។
ម៉ាថាយ ៥:៥	ស្លូតត្រង់ ។ ការធ្វើ « ជាអ្នកកោតខ្លាចដល់ព្រះ អ្នកមានចិត្តសុចរិត អ្នកមានចិត្តសុភាពរាបសា អ្នកចង់រៀន និងចេះអត់ធន់ចំពោះការរងទុក្ខ » [ សេចក្ដីណែនាំទាំងឡាយដល់បទគម្ពីរ « ស្លូតបូត, ភាពស្លូតបូត » នៅលើគេហទំព័រ scriptures.ChurchofJesusChrist.org ] ។ អ្នកដែលមានបុគ្គលិកលក្ខណៈនេះ មានឆន្ទៈធ្វើតាមព្រះយេស៊ូវគ្រីស្ទ ហើយអារម្មណ៍របស់ពួកគេគឺស្ងប់ស្ងៀម អធ្យាស្រ័យ មេត្តាធម៌ និងរាបទាប » ( អូលីសេស សូរ៉េស « Be Meek and Lowly of Heart » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ៩ ) ។
ម៉ាថាយ ៥:៦; នីហ្វៃទី៣ ១២:៦	ស្រេកឃ្លាននូវសេចក្តីសុចរិត ។ ការមានបំណងប្រាថ្នាចង់ដឹងដ៏ធំធេង និងធ្វើតាមព្រះហឫទ័យរបស់ព្រះ ។
ម៉ាថាយ ៥:៧	មានចិត្តមេត្តាករុណា ។ ការមាន « ចិត្តអាណិតអាសូរ គោរព អភ័យទោស សុភាពរាបសា និងអត់ធ្មត់ ទោះបីជាយើងដឹងពីកំហុសរបស់អ្នកដទៃក៏ដោយ » ( Gospel Topics « Mercy » នៅលើគេហទំព័រ topics.ChurchofJesusChrist.org ) ។
ម៉ាថាយ ៥:៨	មានចិត្តបរិសុទ្ធ ។ ការត្រូវបានរាប់ក្នុងចំណោមអ្នកដែល « ស្រឡាញ់ព្រះអម្ចាស់ ដែលព្យាយាមដើរតាមទ្រង់ ហើយកាន់តាមព្រះបញ្ញត្តិទាំងឡាយរបស់ទ្រង់ ដែលកំពុងប្រឹងរស់នៅក្នុងជីវិតប្រកបដោយគុណធម៌ ហើយស៊ូទ្រាំដោយចិត្តស្មោះត្រង់ដល់ទីបំផុត ។ អ្នកដែលមានចិត្តបរិសុទ្ធគឺជាអ្នកដែលគ្រប់គ្រងគំនិតរបស់ពួកគេ ដើម្បីរក្សាខ្លួនពួកគេឲ្យរួចផុតពីការស្រមើស្រមៃអសីលធម៌ និងអំពើអសីលធម៌ » ( Sheldon F. Child « Words of Jesus: Chastity » Ensign ឬ Liahona ខែ មករា ឆ្នាំ ២០០៣ ទំព័រ ៤៤ ) ។
ម៉ាថាយ ៥:៩	អ្នកដែលផ្សះផ្សាគេ ។ « ការជួយមនុស្សឲ្យរកឃើញមូលដ្ឋានរួម នៅពេលអ្នកដទៃកំពុងឃើញភាពខុសគ្នា » ( ហិនរី ប៊ី អាវរិង « Learning in the Priesthood » Ensign ឬ Liahona ខែ ឧសភា ឆ្នាំ ២០១១ ទំព័រ ៦៣ ) ។
ម៉ាថាយ ៥:១០–១២	ត្រូវគេបៀតបៀនដោយព្រោះសេចក្តីសុចរិត ។ ការមានឆន្ទៈគោរព និងការពារព្រះយេស៊ូវគ្រីស្ទ និងការបង្រៀនរបស់ទ្រង់ សូម្បីតែនៅពេលដែលយើងត្រូវបានគេចំអក ឬធ្វើបាបចំពោះការធ្វើដូច្នោះក៏ដោយ ។

សូមពិចារណាពិភាក្សាអំពីវិធីផ្សេងៗ ដែលពិភពលោកនេះឲ្យនិយមន័យពាក្យសុភមង្គល ។ សូមដាក់វាឲ្យផ្ទុយគ្នានឹងសុភមង្គលតាមរបៀបរបស់ព្រះអម្ចាស់ ។ សូមពិភាក្សាអំពីរបៀបដែលការរស់នៅតាមក្រឹត្យវិន័យមាសនេះ អាចខុសពីការរស់នៅតាមរបៀបរបស់ពិភពលោក ប៉ុន្តែដែលនឹងនាំឲ្យមានសុភមង្គលយូរអង្វែងតាមរបៀបរបស់ព្រះ ។

• តើព្រះអង្គសង្គ្រោះបានធ្វើជាគំរូនៃគុណលក្ខណៈទាំងនេះមួយ ឬច្រើននៅក្នុងព្រះគម្ពីរ ឬក្នុងជីវិតរបស់អ្នកតាមរបៀបណា ?

• តើអ្នកគិតថា ការអភិវឌ្ឍបុគ្គលិកលក្ខណៈនេះ ឬបុគ្គលិកលក្ខណៈជាច្រើនទៀតដែលអ្នកបានជ្រើសរើស នឹងជួយបង្កើនសុភមង្គលរបស់អ្នកបានយ៉ាងដូចម្តេច ? ហេតុអ្វីទៅ ?

ការស្គាល់ពីបុគ្គលិកលក្ខណៈដូចជាព្រះគ្រីស្ទនៅក្នុងខ្លួនអ្នក

សូមធ្វើការស្ទង់មតិខាងក្រោមនេះ ។ វាមានបំណងដើម្បីជួយអ្នកឲ្យស្គាល់ពីបុគ្គលិកលក្ខណៈដែលអ្នកមានស្រាប់ និងបុគ្គលិកលក្ខណៈដែលអ្នកអាចអភិវឌ្ឍឲ្យបានកាន់តែពេញលេញថែមទៀត ។

សូមដាក់លេខពីលេខ ១ ដល់លេខ ៥ នៅជាប់នឹងបុគ្គលិកលក្ខណៈដូចជាព្រះគ្រីស្ទនីមួយៗខាងក្រោមនេះ ( ១ មានន័យថា « មិនមានការរីកចម្រើនខ្លាំង » និង ៥ មានន័យថា « មានការរីកចម្រើនខ្លាំង » ) ។

__ ខ្ញុំមានសេចក្តីកំសត់ខាងឯវិញ្ញាណ ។__ ខ្ញុំមានអារម្មណ៍សោកសៅចំពោះអ្នកដទៃ នៅពេលពួកគេយំសោក ហើយមានអារម្មណ៍សោកស្ដាយចំពោះព្រះ នៅពេលខ្ញុំធ្វើអំពើបាប ។__ ខ្ញុំស្លូតត្រង់ ។__ ខ្ញុំស្រេកឃ្លាននូវសេចក្ដីសុចរិត ។__ ខ្ញុំមានចិត្តមេត្តាករុណា ។__ ខ្ញុំមានចិត្តបរិសុទ្ធ ។__ ខ្ញុំគឺជាអ្នកដែលផ្សះផ្សាគេ ។__ ខ្ញុំនៅបន្ដស្មោះត្រង់ ពេលត្រូវគេបៀតបៀនដោយសារជំនឿរបស់ខ្ញុំ ។

សូមកំណត់ពីបុគ្គលិកលក្ខណៈ ដែលអ្នកកំពុងអភិវឌ្ឍបានល្អប្រសើរ ហើយអរព្រះគុណដល់ព្រះចំពោះការរីកចម្រើន ដែលអ្នកកំពុងតែមាន ដើម្បីប្រែក្លាយកាន់តែដូចជាទ្រង់ និងព្រះយេស៊ូវគ្រីស្ទ ។ សូមគិតអំពីបុគ្គលិកលក្ខណៈ ដែលអ្នកចង់អភិវឌ្ឍឲ្យបានកាន់តែពេញលេញ ហើយទូលសូមព្រះឲ្យជួយអ្នកអភិវឌ្ឍវា ។

សូមផ្តល់ពេលវេលាគ្រប់គ្រាន់ឲ្យសិស្សបញ្ចប់ការស្ទង់មតិនេះ និងពិចារណាពីការរីកចម្រើនរបស់ពួកគេជាមួយនឹងបុគ្គលិកលក្ខណៈនោះ ។ ការធ្វើដូច្នេះអាចជួយពួកគេឲ្យឃើញខ្លួនឯងបានកាន់តែច្បាស់លាស់ និងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ ។

ប្រសិនបើអ្នកពិបាករកឃើញថា តើបុគ្គលិកលក្ខណៈមួយណាដែលអ្នកធ្វើបានល្អ ឬត្រូវការលត់ដំបន្ថែម វាអាចមានគុណប្រយោជន៍ក្នុងការនិយាយជាមួយឪពុកម្តាយ ឬបុគ្គលដទៃទៀតដែលអាចទុកចិត្តបាន ។ សូមឲ្យពួកគាត់ប្រាប់ពីបុគ្គលិកលក្ខណៈដូចជាព្រះគ្រីស្ទដែលពួកគាត់ឃើញនៅក្នុងខ្លួនអ្នក និងបុគ្គលិកលក្ខណៈណាដែលអ្នកអាចអភិវឌ្ឍបានបន្ថែមទៀត ។

តួនាទីរបស់ព្រះអង្គសង្គ្រោះក្នុងការអភិវឌ្ឍបុគ្គលិកលក្ខណៈដូចជាព្រះគ្រីស្ទ

យើងត្រូវតែមានជំនួយពីព្រះអង្គសង្គ្រោះ ដើម្បីអភិវឌ្ឍបុគ្គលិកលក្ខណៈដូចជាព្រះគ្រីស្ទ ។ អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានពន្យល់ ៖

គុណលក្ខណៈដូចជាព្រះគ្រីស្ទគឺជាអំណោយមកពីព្រះ ។ វាពុំអាចបានអភិវឌ្ឍដោយគ្មានជំនួយពីទ្រង់បានឡើយ ។ ជំនួយមួយដែលយើងទាំងអស់គ្នាត្រូវការ គឺត្រូវបានប្រទានដល់យើងដោយឥតគិតថ្លៃ តាមរយៈដង្វាយធួននៃព្រះយេស៊ូវគ្រីស្ទ ។ ការមានសេចក្ដីជំនឿលើព្រះយេស៊ូវគ្រីស្ទ និងលើដង្វាយធួនរបស់ទ្រង់មានន័យថា ការពឹងផ្អែកទាំងស្រុងទៅលើទ្រង់—ដោយទុកចិត្តទៅលើព្រះចេស្ដា ព្រះបញ្ញាញាណ និងសេចក្ដីស្រឡាញ់ជានិរន្ដរ៍របស់ទ្រង់ ។ នៅពេលយើងប្រើប្រាស់សិទ្ធិជ្រើសរើសរបស់យើងដោយសុចរិត នោះគុណលក្ខណៈដូចជាព្រះគ្រីស្ទនឹងកើតមាននៅក្នុងជីវិតរបស់យើង ។ សេចក្ដីជំនឿលើព្រះយេស៊ូវគ្រីស្ទនាំទៅរកសកម្មភាព ។ នៅពេលយើងមានសេចក្ដីជំនឿលើព្រះគ្រីស្ទ នោះយើងជឿជាក់លើព្រះអម្ចាស់ល្មមនឹងធ្វើតាមព្រះបញ្ញត្តិទាំងឡាយរបស់ទ្រង់—សូម្បីតែពេលដែលយើងមិនយល់ច្បាស់ពីហេតុផលនៃព្រះបញ្ញត្តិនោះក៏ដោយ ។ ក្នុងការព្យាយាមដើម្បីប្រែក្លាយដូចជាព្រះអង្គសង្គ្រោះ យើងត្រូវវាយតម្លៃជីវិតរបស់យើងឲ្យបានទៀងទាត់ឡើងវិញ និងពឹងផ្អែកលើមាគ៌ានៃការប្រែចិត្តដ៏ពិត ដោយផ្អែកលើព្រះគុណរបស់ព្រះយេស៊ូវគ្រីស្ទ និងពរជ័យនៃដង្វាយធួនរបស់ទ្រង់ ។

( ឌៀថើរ អេហ្វ អុជដូហ្វ « Christlike Attributes—the Wind beneath Our Wings » Ensign ឬ Liahona ខែ វិច្ឆិកា ឆ្នាំ ២០០៥ ទំព័រ ១០២–៣ )

• តើអ្នកបានកត់សម្គាល់ឃើញអ្វីខ្លះ នៅក្នុងសេចក្តីថ្លែងការណ៍នេះដែលអាចជួយអ្នកឲ្យអភិវឌ្ឍបុគ្គលិកលក្ខណៈដូចជាព្រះគ្រីស្ទបាន ?

ដាក់ផែនការមួយ

សូមដាក់ផែនការធ្វើសកម្មភាព ដើម្បីប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។ សូមរួមបញ្ចូលសកម្មភាពជាក់លាក់ ដែលអ្នកអាចអនុវត្តបានរាល់ថ្ងៃ ដែលអ្នកមានអារម្មណ៍ថានឹងអាចជួយបាន ។ សូមចងចាំថា ត្រូវស្វែងរកជំនួយពីព្រះអង្គសង្គ្រោះ ។ សូមពិចារណាស្នើសុំឲ្យសមាជិកគ្រួសារ ឬមិត្តភក្តិដែលអាចទុកចិត្តបាន ឲ្យគាំទ្រអ្នកក្នុងការខិតខំរបស់អ្នក ។ អ្នកក៏ប្រហែលជាចង់កត់ត្រាផែនការសកម្មភាពរបស់អ្នកនៅក្នុង សៀវភៅណែនាំយុវវ័យ របស់អ្នក ឬនៅក្នុងសៀវភៅកំណត់ហេតុការសិក្សាផងដែរ ។

វិចារណកថា និង ព័ត៌មានសាច់រឿង

តើព្រះអង្គសង្គ្រោះបង្រៀនយើងអំពីបុគ្គលិកលក្ខណៈរបស់ទ្រង់នៅក្នុងទេសនកថានៅលើភ្នំយ៉ាងដូចម្ដេច ?

ប្រធាន ហារ៉ូល ប៊ី លី ( ឆ្នាំ ១៨៩៩–១៩៧៣ ) បានបង្រៀន ៖

ព្រះគ្រីស្ទមិនត្រឹមតែបានយាងមកពិភពលោកនេះ ដើម្បីធ្វើដង្វាយធួនសម្រាប់អំពើបាបនៃមនុស្សលោកនោះទេ ប៉ុន្ដែទ្រង់ថែមទាំងបានធ្វើជាគំរូមួយដល់ពិភពលោកនេះផងដែរ អំពីបទដ្ឋាននៃភាពល្អឥតខ្ចោះនៃក្រឹត្យវិន័យរបស់ព្រះ និងការគោរពប្រតិបត្តិដល់ព្រះវរបិតា ។ នៅក្នុងទេសនកថារបស់ទ្រង់នៅលើភ្នំ លោកចៅហ្វាយបានប្រទានដល់យើងនូវវិវរណៈមួយបែបអំពីបុគ្គលិកលក្ខណៈរបស់ទ្រង់ផ្ទាល់ ដែលល្អឥតខ្ចោះ … ហើយពេលធ្វើដូច្នោះ ទ្រង់បានប្រទានដល់យើងនូវប្លង់មេមួយសម្រាប់ជីវិតរបស់យើងផ្ទាល់ ។

( Teachings of Presidents of the Church: Harold B. Lee [ ឆ្នាំ ២០០០ ] ទំព័រ ១៩៩–២០០ )

តើវាមានន័យយ៉ាងណាដែលថា អស់អ្នកដែលស្រេកឃ្លាននូវសេចក្តីសុចរិតនឹងបានឆ្អែត ?

នៅពេលព្រះអង្គសង្គ្រោះបានបង្រៀនទេសនកថានៅលើភ្នំនៅទ្វីបអាមេរិក នោះទ្រង់បានថ្លែងថា អ្នកទាំងឡាយណាដែលស្រេកឃ្លាននូវសេចក្ដីសុចរិត « នឹងបានពោរពេញដោយព្រះវិញ្ញាណបរិសុទ្ធ » ( នីហ្វៃទី៣ ១២:៦ ) ។

តើមានបុគ្គលិកលក្ខណៈដូចជាព្រះគ្រីស្ទអ្វីខ្លះទៀត ?

សូមពិចារណាមើលវីដេអូ « Christlike Attributes » ( ២:៥៣ ) ដែលមាននៅលើគេហទំព័រ ChurchofJesusChrist.org ។ វីដេអូនេះកំណត់ពីបុគ្គលិកលក្ខណៈបន្ថែមទៀត ដែលព្រះអង្គសង្គ្រោះបានមាន និងបានធ្វើជាគំរូក្នុងអំឡុងពេលទ្រង់មានព្រះជន្ម ។

//media.ldscdn.org/webvtt/youth/2014-youth-activity-resources/2014-01-001-christlike-attributes-eng.vtt

សកម្មភាពរៀនសូត្របន្ថែម

ការអញ្ជើញសិស្សឲ្យបង្រៀន

សូមពិចារណាអញ្ជើញសិស្សឲ្យរៀបចំសុន្ទរកថាមួយស្ដីពីក្រឹត្យវិន័យមាស ។ ( ការណ៍នេះអាចធ្វើជាមួយមិត្តរួមថ្នាក់ម្នាក់បាន ) ។ បន្ទាប់ពីសិស្សបានរៀបចំសុន្ទរកថារបស់ពួកគេរួចហើយ សូមអញ្ជើញសិស្សមួយចំនួនឲ្យចែករំលែកជាមួយនឹងសិស្សនៅក្នុងថ្នាក់ ។ ប្រសិនបើសិស្សបានធ្វើការជាមួយមិត្តរួមថ្នាក់ម្នាក់ នោះពួកគេអាចចែករំលែកសុន្ទរកថារបស់ពួកគេជាមួយសិស្សក្នុងថ្នាក់ជាមួយគ្នាបាន ។

ក្រឹត្យវិន័យមាស និងភាពល្អឥតខ្ចោះ

ថ្លែងពីក្រឹត្យវិន័យមាស ប្រធាន ហារ៉ូល ប៊ី លី ( ឆ្នាំ ១៨៩៩–១៩៧៣ ) បានបង្រៀនថា « ការប្រកាសទាំងនេះរបស់លោកចៅហ្វាយ … ជាការពិត កំណត់ឲ្យមានជីវិតដ៏ល្អឥតខ្ចោះ » ( Teachings of Presidents of the Church: Harold B. Lee [ ឆ្នាំ ២០០០ ] ទំព័រ ២០០ ) ។

សូមអញ្ជើញសិស្សឲ្យពិភាក្សាអំពីវិធីផ្សេងៗ ដែលការរស់នៅតាមក្រឹត្យវិន័យមាសអាចជួយយើងឲ្យបានល្អឥតខ្ចោះដូចជាព្រះវរបិតាសួគ៌ និងព្រះយេស៊ូវគ្រីស្ទដែរ ( សូមមើល ម៉ាថាយ ៥:៤៨ ; នីហ្វៃទី៣ ១២:៤៨ ) ។

កំណែផ្សេងទៀតនៃក្រឹត្យវិន័យមាស

សូមអញ្ជើញសិស្សឲ្យអាន លូកា ៦:២០–២៦ និង នីហ្វៃទី៣ ១២:១–១២ ហើយពិភាក្សាអំពីការយល់ដឹងបន្ថែមដែលទទួលបានពីខគម្ពីរទាំងនេះ ។

លំហាត់ធ្វើសៀវភៅកំណត់ហេតុ

សូមអញ្ជើញសិស្សឲ្យបង្កើតចំណងជើងមួយដូចខាងក្រោម នៅក្នុងសៀវភៅកំណត់ហេតុការសិក្សារបស់ពួកគេ ៖

« ម៉ាថាយ ៥–៧ ៖ ខ្ញុំអាចប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទបានតាមរយៈ … »

សូមលើកទឹកចិត្តសិស្សឲ្យបន្ថែមគំនិត និងចំណាប់អារម្មណ៍ដែលពួកគេទទួលបាន នៅពេលពួកគេសិក្សាអំពីទេសនកថានៅលើភ្នំទៅក្នុងការសរសេរសៀវភៅកំណត់ហេតុនេះ ។