ម៉ាថាយ ៩:៣៦–៣៨; ១០

ព្រះយេស៊ូវគ្រីស្ទបានហៅ និងត្រាស់បង្គាប់ដល់សាវកដប់ពីរនាក់

ព្រះយេស៊ូវគ្រីស្ទបានហៅ និងត្រាស់បង្គាប់ដល់សាវកដប់ពីរនាក់ ហើយបានបញ្ជូនពួកលោកឲ្យចេញទៅផ្សព្វផ្សាយ ធ្វើការងារបម្រើ និងព្យាបាលអ្នកឈឺ ។ មេរៀននេះនឹងជួយសិស្សឲ្យយល់ពីការហៅ និងតួនាទីរបស់ពួកសាវកក្នុងនាមជាអ្នកតំណាង និងសាក្សីនៃព្រះយេស៊ូវគ្រីស្ទ ។

ការស្តាប់សំណួរសិស្ស ។ សូមស្វែងយល់អំពីសិស្សដោយការស្តាប់ដោយយកចិត្តទុកដាក់ និងសួរសំណួរតាមដានដោយទឹកចិត្តនៃសេចក្តីស្រឡាញ់ និងការយល់ចិត្ត ។ សូមអធិស្ឋានទូលសុំសមត្ថភាពដើម្បីដាក់ខ្លួនរបស់អ្នកនៅក្នុងស្ថានភាពរបស់សិស្ស ។ សូមមានឆន្ទៈក្នុងការកែសម្រួលមេរៀន និងសកម្មភាពដើម្បីបំពេញតម្រូវការរបស់សិស្ស និងការយល់ដឹងបច្ចុប្បន្នរបស់ពួកគេឲ្យបានល្អបំផុត ។

ការរៀបចំរបស់សិស្ស ៖ សូមអញ្ជើញសិស្សឲ្យគិតពិចារណាអំពីបទពិសោធន៍របស់ពួកគេជាមួយពួកសាវករបស់ព្រះអម្ចាស់ ដោយសួរសំណួរដូចតទៅនេះ ៖ តើសាវករបស់ព្រះអង្គសង្រ្គោះបាននាំអ្នកមកកាន់តែជិតព្រះយេស៊ូវគ្រីស្ទយ៉ាងដូចម្តេច ? តើមានអ្វីខ្លះដែលធ្វើឲ្យអ្នកចាប់អារម្មណ៍អំពីពួកលោក ? តើអ្នកមានសំណួរអ្វីខ្លះអំពីតួនាទីរបស់សាវកម្នាក់ ?

កំណត់ចំណាំ ៖ ជម្រើសក្នុងការរៀបចំរបស់សិស្សគឺរួមមាននៅក្នុងផ្នែក « សកម្មភាពរៀនសូត្របន្ថែម » ។

សកម្មភាពរៀនសូត្រដែលអាចមាន

អារម្មណ៍ និងការយល់ដឹងរបស់អ្នកអំពីសាវកនៃព្រះយេស៊ូវគ្រីស្ទ

សូមពិចារណាពីរបៀបដែលអ្នកនឹងឆ្លើយសំណួរទទួលប័ណ្ណចូលព្រះវិហារបរិសុទ្ធខាងក្រោមនេះ ៖

តើអ្នកគំាទ្រសមាជិកគណៈប្រធានទីមួយ និងកូរ៉ុមនៃពួកសាវកដប់ពីរនាក់ ជាព្យាការី អ្នកមើលឆុត និងអ្នកទទួលវិវរណៈដែរឬទេ ?

( រ័សុល អិម ណិលសុន « Closing Remarks » Ensign ឬ Liahona ខែ វិច្ឆិកា ឆ្នាំ ២០១៩ ទំព័រ ១២១ )

• តើវាមានន័យយ៉ាងណាក្នុងការគាំទ្រសមាជិកនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់ ?

ជាញឹកញាប់ យើងគិតអំពីការគាំទ្រដល់ថ្នាក់ដឹកនាំសាសនាចក្រ ប្រៀបដូចជាសកម្មភាពនៃការលើកដៃរបស់យើងយ៉ាងដូច្នោះដែរ ។ ប៉ុន្តែការគាំទ្រគឺមានលើសពីការបង្ហាញទង្វើខាងក្រៅ ។ ការគាំទ្ររួមមានទាំងជំនួយគាំទ្រ ការលើកទឹកចិត្ត ការទុកចិត្ត និងការធ្វើតាមអ្នកដែលយើងគាំទ្រ ដោយសារយើងជឿថាពួកគេត្រូវបានហៅដោយព្រះ ។

• ហេតុអ្វីអ្នកគិតថាតម្រូវការមួយក្នុងចំណោមតម្រូវការនានាដើម្បីចូលព្រះវិហារបរិសុទ្ធនឹងទាក់ទងទៅនឹងជំនួយគាំទ្រ និងអារម្មណ៍របស់យើងចំពោះសាវករបស់ព្រះអង្គសង្គ្រោះ ?

សូមប្រើការវាស់វែងខាងក្រោម ដើម្បីវាយតម្លៃបន្ថែមអំពីអារម្មណ៍ និងអាកប្បកិរិយាផ្ទាល់ខ្លួនរបស់អ្នកចំពោះសាវកនៃព្រះយេស៊ូវគ្រីស្ទ ។ អ្នកនឹងពុំត្រូវបានសុំឲ្យចែកចាយពីចម្លើយរបស់អ្នកជាមួយអ្នកដទៃឡើយ ។

សូមពិចារណាបង្ហាញការវាស់វែងខាងក្រោមនេះ ។ វាអាចជាប្រយោជន៍ក្នុងការអានឲ្យឮៗនូវសំណួរនីមួយៗដូចខាងក្រោមសម្រាប់សិស្សពិចារណា បន្ទាប់មកអញ្ជើញពួកគេឲ្យកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។

(ក) យល់ស្របទាំងស្រុង (ខ) យល់ស្រប (គ) អព្យាក្រិត្យ (ឃ) មិនយល់ស្រប

1. ខ្ញុំជឿថាសាវករបស់ព្រះយេស៊ូវគ្រីស្ទមានសារៈសំខាន់ខ្លាំងណាស់ ។

2. ខ្ញុំចង់ឮអ្វីដែលសាវករបស់ព្រះអង្គសង្គ្រោះមានប្រសាសន៍ ហើយខ្ញុំយកចិត្តទុកដាក់នៅពេលខ្ញុំមានឱកាសស្តាប់ពួកលោក ។

3. ខ្ញុំអាចចែកចាយរឿងមួយ ឬពីរដែលសាវករបស់ព្រះយេស៊ូវគ្រីស្ទបានបង្រៀននាពេលថ្មីៗនេះ ។

សូមចំណាយពេលមួយភ្លែតដើម្បីសញ្ជឹងគិត ហើយកត់ត្រាសំណួរទាំងឡាយដែលអ្នកមានអំពីពួកសាវករបស់ព្រះយេស៊ូវគ្រីស្ទ ។ នៅពេលអ្នកសិក្សា សូមសញ្ជឹងគិតលើសំណួរទាំងនេះ ដោយស្វែងរកចម្លើយពីព្រះវិញ្ញាណបរិសុទ្ធ ។

សាវកពីបុរាណរបស់ព្រះយេស៊ូវគ្រីស្ទ

សូមអាន ម៉ាថាយ ៩:៣៦–៣៨ ដោយរកមើលបញ្ហាដែលព្រះអង្គសង្គ្រោះបានលើកឡើងនៅក្នុងខគម្ពីរទាំងនេះ ។

• តើអ្វីជាបញ្ហា ហើយតើព្រះអង្គសង្គ្រោះមានព្រះបន្ទូលថាត្រូវការអ្វី ?

សូមពិចារណាអញ្ជើញសិស្សឲ្យអានបទគម្ពីរខាងក្រោមនេះជាគូ ឬជាក្រុមតូចៗ ។

ដើម្បីជួយផ្តល់ការងារបម្រើដល់ប្រជាជន ព្រះយេស៊ូវគ្រីស្ទបានហៅពួកសាវក ។ ពាក្យថា សាវក ចេញមកពីពាក្យមួយរបស់ភាសាក្រិកដែលមានន័យថា « អ្នកដែលចាត់ឲ្យចេញទៅ » ។ ដំបូងឡើយ ពួកសាវកត្រូវបានបញ្ជូនតែនៅក្នុងចំណោមពួកសាសន៍អ៊ីស្រាអែលប៉ុណ្ណោះ ។ ក្រោយមកទៀត ព្រះអង្គសង្គ្រោះដែលមានព្រះជន្មរស់ឡើងវិញបានបង្គាប់ថា ពួកលោកក៏ត្រូវប្រកាសដំណឹងល្អនៅក្នុងចំណោមពូជសាសន៍ដទៃ ឬជនទាំងឡាយណាដែលពុំមែនជាពួកសាសន៍អ៊ីស្រាអែលផងដែរ ។ សព្វថ្ងៃនេះ ពួកគេត្រូវបានបង្គាប់ឲ្យផ្សព្វផ្សាយទៅកាន់ពិភពលោកទាំងមូល ( សូមមើល កិច្ចការ ១០ ) ។

សូមអានការហៅ និងត្រាស់បង្គាប់របស់ព្រះអង្គសង្គ្រោះដល់សាវកដប់ពីរនាក់នៅក្នុង ម៉ាថាយ ១០:១–៨ និង គោលលទ្ធិ និងសេចក្ដីសញ្ញា ១០៧:២៣ ។ បន្ទាប់មក សូមឆ្លើយសំណួរខាងក្រោមទាំងនេះ ។

• តើព្រះអម្ចាស់បានបង្គាប់ពួកសាវករបស់ទ្រង់ឲ្យធ្វើអ្វីខ្លះ ?

• តើអ្នកបានសង្កេតឃើញភាពស្រដៀងគ្នាអ្វីខ្លះរវាងកិច្ចការដែលព្រះយេស៊ូវបានធ្វើ និងកិច្ចការដែលទ្រង់បានបង្គាប់ឲ្យពួកសាវករបស់ទ្រង់ធ្វើ ?

• តើយើងអាចរៀនសេចក្ដីពិតអ្វីខ្លះ មកពីខគម្ពីរទាំងនេះ អំពីអ្វីដែលព្រះយេស៊ូវគ្រីស្ទហៅឲ្យពួកសាវករបស់ទ្រង់ធ្វើ ?

សាវកសម័យទំនើបរបស់ព្រះយេស៊ូវគ្រីស្ទ

ប្រសិនបើអាចធ្វើបាន សូមបង្ហាញរូបភាពរបស់គណៈប្រធានទីមួយ និងកូរ៉ុមនៃពួកសាវកដប់ពីរនាក់នាពេលបច្ចុប្បន្ន ។

សេចក្តីពិតមួយដែលយើងរៀនមកពី ម៉ាថាយ ១០:១–៨ និង គោលលទ្ធិ និងសេចក្តីសញ្ញា ១០៧:២៣ គឺថា ព្រះអម្ចាស់ហៅពួកសាវកឲ្យធ្វើជាសាក្សីពិសេសនៃព្រះនាមរបស់ព្រះគ្រីស្ទនៅទូទាំងពិភពលោក ហើយធ្វើកិច្ចការទាំងឡាយរបស់ទ្រង់ ។ នេះជាការពិតទាំងសាវករបស់ព្រះអង្គសង្គ្រោះពីបុរាណ និងពួកអ្នកដែលទ្រង់ហៅជាសាវកសព្វថ្ងៃនេះ ។

សូមអាន ម៉ាថាយ ១០:៤០ ដោយរកមើលឱវាទរបស់ព្រះអង្គសង្គ្រោះចំពោះអ្នកដែលទទួលពួកសាវករបស់ទ្រង់ ។

• ហេតុអ្វីការទទួលយកពួកសាវករបស់ព្រះអង្គសង្គ្រោះប្រៀបដូចជាការទទួលយកព្រះអង្គសង្គ្រោះដែរ ?

សូមមើលវីដេអូ « President Nelson: Prophet of God » ចាប់ពីលេខកូដម៉ោង ០:០០ ដល់ ៥:៤១ ។ វីដេអូនេះបង្ហាញពីប្រធាន រ័សុល អិម ណិលសុន លើកតម្កើងតួនាទីនៃ « អ្នកដែលចាត់ឲ្យចេញទៅ » ដើម្បីតំណាង និងនាំមនុស្សមករកព្រះអង្គសង្គ្រោះ ។

សូមពិចារណាបង្ហាញឧទាហរណ៍បន្ថែមនៃរបៀបដែលពួកសាវកសម័យទំនើបនេះផ្តល់ការងារបម្រើដូចព្រះអង្គសង្គ្រោះ ។ ឧទាហរណ៍ខ្លះគឺបានរួមបញ្ចូលនៅក្នុងផ្នែក « វិចារណកថា និងព័ត៌មានសាច់រឿង » ។

• តើអ្នកមើលឃើញប្រធាន ណិលសុន ធ្វើការងារបម្រើដល់អ្នកដទៃដូចជាព្រះយេស៊ូវគ្រីស្ទបានធ្វើដោយរបៀបណា ?

ដោយសារគណៈប្រធានទីមួយ និងកូរ៉ុមនៃពួកសាវកដប់ពីរនាក់តំណាងឲ្យព្រះអង្គសង្គ្រោះ ហើយជាសាក្សីពិសេសរបស់ទ្រង់ ការសិក្សាការបង្រៀនរបស់ពួកលោកគឺដូចជាការសិក្សាការបង្រៀនរបស់ព្រះអង្គសង្គ្រោះ ហើយជាវិធីមួយដើម្បីរៀនអំពីព្រះអង្គសង្គ្រោះ ( សូមមើល គោលលទ្ធិ និង សេចក្តីសញ្ញា ១:៣៨ ) ។ ដោយប្រើធនធានមួយក្នុងចំណោមធនធានខាងក្រោម ( មាននៅគេហទំព័រ ChurchofJesusChrist.org ) សូមសិក្សាការបង្រៀនរបស់ពួកសាវកសម័យទំនើប ដោយរកមើលអ្វីដែលអ្នកអាចរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ។

សូមកំណត់ថាធនធានណាមួយអាចជួយសិស្សបានល្អបំផុត និងផ្តល់មធ្យោបាយសម្រាប់សិស្សដើម្បីចូលប្រើធនធានទាំងនោះ ។

« ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក »

« សាក្សីពិសេសនៃព្រះគ្រីស្ទ »

សុន្ទរកថានៅក្នុងសន្និសីទទូទៅថ្មីៗ

សូមអនុញ្ញាតឲ្យសិស្សចែកចាយបទពិសោធន៍របស់ពួកគេដែលរៀនមកពី និងអំពីព្រះយេស៊ូវគ្រីស្ទ តាមរយៈការសិក្សាព្រះបន្ទូលនៃពួកសាវកសម័យទំនើបរបស់ទ្រង់ ។

• តើអ្នកបានរកឃើញអ្វីខ្លះនៅក្នុងការសិក្សារបស់អ្នក ដែលជួយអ្នកឲ្យមានអារម្មណ៍យល់កាន់តែខ្លាំងអំពីព្រះវរបិតាសួគ៌ និងព្រះយេស៊ូវគ្រីស្ទ និងសេចក្ដីស្រឡាញ់ចំពោះទ្រង់ទាំងទ្វេ ?

• តើពេលណាដែលអ្នកមានអារម្មណ៍ និងទទួលស្គាល់ថាសាវករបស់ព្រះអម្ចាស់គឺតំណាងឲ្យព្រះយេស៊ូវគ្រីស្ទ ?

• តើអ្វីដែលអ្នកបានរៀនថ្ងៃនេះជះឥទ្ធិពលលើរបៀបដែលអ្នកគាំទ្រ និងស្តាប់ពួកសាវកសម័យទំនើបរបស់ព្រះអង្គសង្គ្រោះយ៉ាងដូចម្ដេច ?

សូមពិចារណារំឭកសិស្សអំពីសកម្មភាពរៀបចំ ប្រសិនបើពួកគេបានធ្វើវាហើយ ។ សូមអញ្ជើញពួកគេឲ្យប្រើបទពិសោធន៍នោះក្នុងសកម្មភាពខាងក្រោម ។

សំណួរដើម្បីគិតពិចារណា

សូមគិតអំពីរបៀបដែលអ្នកអាចអនុវត្តអ្វីដែលអ្នកបានសិក្សាថ្ងៃនេះ ហើយស្វែងរកការដឹកនាំពីព្រះវរបិតាសួគ៌ប្រកបដោយការអធិស្ឋាន ដោយយកចិត្តទុកដាក់ចំពោះការបំផុសគំនិតទាំងឡាយពីព្រះវិញ្ញាណបរិសុទ្ធ ។ សូមសញ្ជឹងគិតអំពីសំណួរខាងក្រោមនេះ ហើយពិចារណាកត់ត្រានៅក្នុងសៀវភៅកំណត់ហេតុការសិក្សារបស់អ្នកនូវចំណាប់អារម្មណ៍ណាមួយដែលអ្នកទទួលបាន និងរបៀបដែលអ្នកអាចធ្វើសកម្មភាពលើចំណាប់អារម្មណ៍ទាំងនោះ ។

• តើអ្នក និងគ្រួសាររបស់អ្នកកំពុងធ្វើបានល្អប៉ុនណា ក្នុងការទទួលយក និងការធ្វើតាមដំបូន្មានរបស់ពួកសាវកសម័យទំនើបនេះ ?

• តើអ្នកបានចូលទៅជិតព្រះយេស៊ូវគ្រីស្ទដោយរបៀបណាខ្លះ ដោយសារដំបូន្មាន និងការបង្រៀនរបស់ពួកសាវករបស់ព្រះអង្គសង្គ្រោះ ?

• តើការមានផែនការជាក់លាក់មួយដើម្បីស្គាល់ ពួកសាវករបស់ព្រះអង្គសង្គ្រោះឲ្យកាន់តែច្បាស់ និងធ្វើតាមពួកលោកអាចផ្ដល់ពរជ័យដល់អ្នកយ៉ាងដូចម្ដេច ?

• តើសំណួររបស់អ្នកអំពីពួកសាវករបស់ព្រះអង្គសង្គ្រោះបានឆ្លើយនៅថ្ងៃនេះដែរឬទេ ? តើអ្នកបានរៀនអ្វីខ្លះ ? តើអ្នកនៅតែមានសំណួរអ្វីខ្លះ ហើយតើអ្នកអាចស្វែងរកចម្លើយចំពោះសំណួរទាំងនោះដោយរបៀបណា ?

• សូមគិតអំពីក្រុមគ្រួសារ មិត្តភក្តិ និងអ្នកដទៃដែលអ្នកទាក់ទងជាមួយ ឬអាចមានឥទ្ធិពលលើពួកគេ តើនរណាអាចទទួលបានអត្ថប្រយោជន៍តាមរយៈការរៀនសូត្រ និងពិភាក្សាអំពីបទពិសោធន៍របស់អ្នកនៅថ្ងៃនេះ ? តើអ្នកអាចចែកចាយវាជាមួយពួកគេដោយរបៀបណា ?

សូមអនុញ្ញាតឲ្យសិស្សដែលស្ម័គ្រចិត្តចែកចាយចំណាប់អារម្មណ៍ដែលពួកគេបានទទួល ទីបន្ទាល់ដែលពួកគេមាន ឬសកម្មភាពដែលពួកគេមានអារម្មណ៍បំផុសគំនិតឲ្យធ្វើដោយសារតែការសិក្សារបស់ពួកគេ ។

វិចារណកថា និងព័ត៌មានសាច់រឿង

ម៉ាថាយ ១០:១៤ . តើវាមានន័យយ៉ាងណាដើម្បី « រលាស់ធូលីពីជើងអ្នកចេញ » ?

អែលឌើរ ជេមស៍ អ៊ី តាល់ម៉ីជ បានផ្តល់ការយល់ដឹងនេះអំពីសេចក្តីណែនាំរបស់ព្រះអង្គសង្គ្រោះ ទាក់ទងនឹងការរលាស់ធូលីចេញពីជើងរបស់មនុស្សម្នាក់ ៖

ចំពោះពីធីនៃការរលាស់ធូលីចេញពីជើងរបស់មនុស្សម្នាក់ ទុកជាទីបន្ទាល់ទាស់នឹងអ្នកដទៃ តាមដែលបានធ្វើនោះ គឺត្រូវបានពួកយូដាយល់ថា ជានិមិត្តសញ្ញានៃការបញ្ចប់នូវការរាប់អាន និងការផ្ដាច់ខ្លួនចេញពីរាល់ទំនួលខុសត្រូវទាំងអស់ ចំពោះផលវិបាកដែលនឹងអាចកើតមានឡើងដល់អ្នកនោះ ។ វាក្លាយជាពិធីមួយនៃការចោទប្រកាន់ និងទីបន្ទាល់ តាមសេចក្តីណែនាំរបស់ព្រះអម្ចាស់ចំពោះពួកសាវករបស់ទ្រង់ ដូចដែលបានដកស្រង់នៅក្នុង [ ម៉ាថាយ ១០:១៤ ] ។ នៅក្នុងគ្រាកាន់កាប់ត្រួតត្រាបច្ចុប្បន្ន ព្រះអម្ចាស់បានធ្វើការដឹកនាំស្រដៀងគ្នានេះដល់ពួកអ្នកបម្រើដែលមានសិទ្ធិអំណាចរបស់ទ្រង់ ឲ្យធ្វើទីបន្ទាល់ទាស់នឹងអ្នកទាំងឡាយដែលមានការជំទាស់នឹងសេចក្ដីពិតដោយចេតនា ហើយដោយបំណងអាក្រក់ នៅពេលត្រូវបានបង្ហាញដោយមានសិទ្ធិអំណាចនោះ ។

( ជេមស៍ អ៊ី តាល់ម៉ីជ Jesus the Christ [ ឆ្នាំ ១៩១៦ ] ទំព័រ ៣៤៥; សូមមើលគោលលទ្ធិ និងសេចក្តីសញ្ញា ២៤:១៥; ៧៥:១៨–២២; ៨៤:៩២–៩៦ ផងដែរ ) ។

នេះមិនមែនជាការអនុវត្តបច្ចុប្បន្នរបស់ពួកអ្នកផ្សព្វផ្សាយសាសនារបស់យើងទេ ហើយវានឹងមិនអាចកើតឡើងទេ លុះត្រាតែអ្នកដឹកនាំសាសនាចក្រផ្តល់ការណែនាំបន្ថែម ។

ហេតុអ្វីបានជាយើងត្រូវការសាវករបស់ព្រះយេស៊ូវគ្រីស្ទនៅលើផែនដីសព្វថ្ងៃនេះ ?

តើខ្ញុំអាចរៀនបន្ថែមទៀតអំពីសាវកសម័យទំនើបរបស់ព្រះយេស៊ូវគ្រីស្ទ និងរបៀបដែលពួកគេបម្រើដូចព្រះអង្គសង្គ្រោះនៅឯណា ?

ធនធានខាងក្រោម ( ទាំងអស់នេះមាននៅលើគេហទំព័រ ChurchofJesusChrist.org ) អាចជួយអ្នកស្វែងយល់បន្ថែមអំពីសាវកសម័យទំនើបរបស់ព្រះយេស៊ូវគ្រីស្ទ ។

« The Restoration of the Fulness of the Gospel of Jesus Christ: A Bicentennial Proclamation to the World »

នែល អិល អាន់ឌើរសិន « The Prophet of God » Ensign ឬ Liahona ខែ ឧសភា ឆ្នាំ ២០១៨ ទំព័រ ២៤–២៧

បន្ថែម សុន្ទរកថាទាំងឡាយនៃសន្និសីទទូទៅថ្មីៗ

« Meet Today’s Prophets and Apostles »

« អែលឌើរ បែដណា និយាយអំពីតួនាទីរបស់ពួកសាវក »

« Elder Bednar in England » ( ចាប់ពីកូដម៉ោង ៤:០៦ ដល់ ៤:៤៧ )

សកម្មភាពរៀនសូត្របន្ថែម

ជម្រើសក្នុងការរៀបចំរបស់សិស្ស

សូមអញ្ជើញសិស្សឲ្យមករៀនដោយបានត្រៀមខ្លួន ដើម្បីបង្ហាញអំពីជីវប្រវត្តិសង្ខេប និងការបង្រៀនដែលបានជ្រើសរើសពីសមាជិកបច្ចុប្បន្នម្នាក់នៃគណៈប្រធានទីមួយ ឬកូរ៉ុមនៃពួកសាវកដប់ពីរនាក់ ។ សូមអញ្ជើញពួកគេឲ្យមករៀនដោយបានត្រៀមខ្លួន ដើម្បីចែកចាយពីរបៀបដែលការរៀនបន្ថែមអំពីសាវកនេះបានចង្អុលបង្ហាញពួកគេឲ្យទៅកាន់ព្រះយេស៊ូវគ្រីស្ទផងដែរ ។ សូមពិចារណាចាប់ផ្តើមថ្នាក់ដោយអនុញ្ញាតឲ្យសិស្សដែលបានត្រៀមខ្លួន ដើម្បីចែកចាយអ្វីដែលពួកគេបានរៀនជាមួយនឹងសិស្សក្នុងថ្នាក់ ។

សូមជួយសិស្សឲ្យរៀបចំខ្លួនសម្រាប់សន្និសីទទូទៅ

សូមពិចារណាប្រើប្រាស់ ឬកែសម្រួលផ្នែកនៃមេរៀននេះ ដើម្បីជួយសិស្សរៀបចំសម្រាប់សន្និសីទទូទៅនាពេលខាងមុខ ។ វាអាចមានប្រយោជន៍ក្នុងការសង្កត់ធ្ងន់លើចំណេះដឹងរបស់សិស្សអំពីព្យាការី និងសាវកទាំងឡាយនៅសម័យចុងក្រោយ និងការបង្រៀនរបស់ពួកលោកអំពីព្រះយេស៊ូវគ្រីស្ទ ( ឧទាហរណ៍ តាមរយៈការបង្កើតកម្រងសំណួរផ្អែកលើជីវិតរបស់ពួកលោក ដោយសិស្សបង្កើតកម្រងសំណួរសម្រាប់ថ្នាក់ ដោយសិក្សាពីសុន្ទរកថាពីអតីតកាលរបស់ពួកលោកខ្លះៗ និងស្វែងរកឃ្លា ឬកថាខណ្ឌដែលថ្លែងទីបន្ទាល់អំពីព្រះយេស៊ូវគ្រីស្ទ និងបេសកកម្មរបស់ទ្រង់។ល។ ) ។ សិស្សក៏អាចយល់ឃើញថាវាមានប្រយោជន៍ផងដែរក្នុងការពិភាក្សាអំពីវិធីរៀបចំដើម្បីស្តាប់ និងកំណត់អាទិភាពនៃសន្និសីទទូទៅ ( ដូចជា ការលុបបំបាត់ការរំខាន ការទុកកាលវិភាគឲ្យនៅទំនេរ ការមករៀនដោយបានត្រៀមសំណួរនៅក្នុងចិត្តជាដើម ) ។