Փիլիպպեցիներ և կողոսացիներ

Ուժ գտնել Հիսուս Քրիստոսում

Ի՞նչ խնդիրների կամ մարտահրավերների եք հանդիպում դուք և ձեր շրջապատի մարդիկ: Ի՞նչն է բարդացնում այդ մարտահրավերները։ Երբևէ մտածե՞լ եք՝ կարո՞ղ եք ստանալ այն օգնությունը, որն անհրաժեշտ է ձեր մարտահրավերները հաղթահարելու համար: Պողոսն իր կյանքում բախվեց բազմաթիվ դժվարությունների, այդ թվում՝ Հռոմում տնային կալանքի տակ գտնվելու տարիներ եղան։ Այդ իրավիճակներում գտնվելով՝ Պողոսը նամակներ գրեց Փիլիպպեի և Կողոսայի սրբերին, ուսուցանելով նրանց դիմել Հիսուս Քրիստոսին՝ ուժ ստանալու համար: Այս դասը կօգնի ձեզ հասկանալ, որ Հիսուս Քրիստոսի միջոցով դուք կարող եք ուժ գտնել՝ ձեր մարտահրավերներին դիմակայելու համար:

Օգնեք ուսանողներին ուսուցանել Ուսանողներին միմյանց ուսուցանելու հնարավորություն տալով, դուք կօգնեք, որ նրանք ավելի լավ հասկանան և կիրառեն այն ճշմարտությունները, որոնք սովորում են։

Ուսանողի նախապատրաստում․ Առաջարկեք ուսանողներին անգիր անել Փիլիպպես 4.13-ը։

Հնարավոր ուսումնական վարժություններ

Երիտասարդներին հանդիպող մարտահրավերներն ու խնդիրները

Կարող եք խնդրել, որ ուսանողները գրատախտակին գրեն ստորև տրված առաջին հարցի իրենց պատասխանները՝ դասի ողջ ընթացքում այդ գրածին դիմելու համար։

• Որո՞նք են ընդհանուր խնդիրներից կամ մարտահրավերներից մի քանիսը, որոնց բախվում են ձեր տարածքի երիտասարդները:

• Ձեր կարծիքով, այս խնդիրներից կամ մարտահրավերներից որո՞նք են, որ երիտասարդները չեն կարող ինքնուրույն հաղթահարել: Ինչո՞ւ։

Ձեր ուսումնական օրագրում նշեք ձեր սեփական մարտահրավերներն ու խնդիրները և բացատրեք, թե ինչու են դրանք դժվար ձեզ համար: Ներառեք մտքեր այն մասին, թե ինչու է ձեզ անհրաժեշտ օգնություն՝ դրանք հաղթահարելու համար:

Այս դասին դուք հնարավորություն կունենաք պատրաստել և ուսուցանել հակիրճ դաս՝ օգտագործելով Պողոսի նամակները փիլիպպեցիներին և կողոսացիներին: Երբ ուսումնասիրեք այդ նամակները, տեսեք, թե Պողոսի խոսքերը ինչպես կարող են օգնել ձեզ և ուրիշներին՝ ապավինել Հիսուս Քրիստոսին դժվարությունների ժամանակ:

Ուսանողներից մեկին հրավիրեք բարձրաձայն կարդալ կամ ամփոփել հետևյալ պարբերությունը, որպեսզի օգնեք դասարանին հասկանալ փիլիպպեցիների և կողոսացիների պայմանները:

Պողոս Առաքյալը բախվեց բազմաթիվ խնդիրների և մարտահրավերների: «Ե՛վ փիլիպպեցիները, և՛ կողոսացիները գրություն են ստացել Պողոսից, մինչ վերջինս ձերբակալված էր Հռոմում, բայց ուշագրավ է, որ հենց այս դժվար ժամանակաշրջանում Պողոսը գրել է․ «Աստծու խաղաղությունը, որ ամեն մտքից վեր է» ( Փիլիպպեցիս 4․7)։ Այս երկու նամակները հետևողականորեն դրական և լավատեսական են, և դրանք պարունակում են Պողոսի ամենապարզ և ամենալուրջ ուսմունքներից մի քանիսը՝ Հիսուս Քրիստոսի մասին: Պողոսն ուսուցանել է, որ եթե ապրենք հավատքով և երախտագիտությամբ, Տերը կարող է առաջ մղել ավետարանի գործը մեր միջոցով, անկախ մեր հանգամանքներից, և որ Հիսուս Քրիստոսի հիմքի վրա կառուցելով՝ մենք կարող ենք խույս տալ մոլորվելուց աշխարհիկ փիլիսոփայությունների և ավանդությունների պատճառով» (Նոր կտակարանի ուսանողի ձեռնարկ [2014], 433, տես նաև Bible Dictionary, “ Pauline Epistles ” և Սուրբ գրքերի ուղեցույց, «Թուղթ առ Փիլիպպեցիս» և «Թուղթ առ Կողոսացիս» scriptures.ChurchofJesusChrist.org)։

Եթե ուսանողներին հրավիրել եք անգիր սովորել Փիլիպպեցիս 4․13-ը որպես նախապատրաստություն այս դասի համար, ապա հրավիրեք մեկ կամ մի քանի ուսանողների՝ արտասանելու հատվածը:

Կարդացեք Փիլիպպեցիս 4․13-ը, փնտրելով, թե ինչ է Պողոսը ասել իր կյանքում Հիսուս Քրիստոսի կարևորության մասին:

• Ձեր կարծիքով, ինչո՞ւ է դա կարևոր ուսմունք, որը պիտի իմանանք։

Դիտեք «Ես կարող եմ ամեն ինչ անել» տեսանյութը (1.17)՝ ծանոթանալով օրինակներին, թե ինչով կարող է ձեզ օգնել Փրկիչը: Այս տեսանյութը կարելի է գտնել ComeUntoChrist.org-ում։

I Can Do All Things

Հիսուս Քրիստոսը կարող է մեզ օգնել դժվարությունների ժամանակ

Մտածեք, թե ինչ խնդիրներ և մարտահրավերներ ունեն ձեր տարածքի երիտասարդները, ինչպես նաև ձեր սեփական մարտահրավերների մասին: Ստորև տրված Ա, Բ և Գ քայլերի օգնությամբ պատրաստեք հինգ-րոպեանոց մի դաս։ Կենտրոնացեք այն բանի վրա, թե ինչ կարող եք ուսուցանել Հիսուս Քրիստոսի մասին, որը կօգնի ձեզ և մյուսներին հաղթահարել դժվարությունները:

Ցուցադրեք դասի հետևյալ համառոտ շարադրանքը և հրահանգները, որոնք կօգնեն ուսանողներին պատրաստել իրենց դասերը: Երբ ուսանողները աշխատում են, քայլեք սենյակով մեկ և անհրաժեշտության դեպքում օգնեք։ Բավարար ժամանակ տվեք նրանց դասերը պատրաստելու համար:

Ուսանողները կարող են ինքնուրույն դասեր պատրաստել կամ աշխատել զույգերով՝ առաջադրանքը կատարելու համար։ Զույգերով աշխատող ուսանողներից յուրաքանչյուրը կարող է ինքնուրույն ուսումնասիրել հատվածների կեսը, այնուհետև քննարկեն հատվածները զուգընկերոջ հետ: Այնուհետև զույգը կարող է միասին պատրաստել և ուսուցանել դասը:

Ա. Ուսումնասիրեք հետևյալ հատվածները, փնտրելով ճշմարտություններ, որոնք ձեր կարծիքով օգտակար կլինեն ձեզ և ուրիշներին.

Փիլիպպեցիս 2․5-8, 3․20-21, 4․6-7

Կողոսացիս 1․12-18, 3․1-2, 12-17, 23-24

Բ. Ընտրեք հատված կամ հատվածների խումբ և բացահայտեք մի ճշմարտություն, որը կարող եք ուսուցանել Փրկչի ավետարանի մասին: Օրինակ, Կողոսացիս 1․12-14-ի ճշմարտություններից մեկն այն է, որ Երկնային Հայրն ուղարկեց Իր Որդուն, որպեսզի մենք կարողանանք ազատվել խավարից և ներվել մեղքից:

Գ. Ներառեք ձեր դասում հետևյալներից մեկը կամ մի քանիսը.

• Կիսվեք ձեր կամ մեկ ուրիշի փորձառությամբ, որը ցույց է տալիս այդ ճշմարտությունը: Հրավիրեք նրանց, ում ուսուցանում եք, նույնպես կիսվել փորձառություններով: Դուք կարող եք նաև կիսվել սուրբ գրություններից կամ գերագույն համաժողովի ելույթներից օրինակներով կամ փորձառություններով: Օրինակ, փորձառությունները, որոնք վերաբերում են վերը նշված համարձակ ճշմարտությանը, կարող են կենտրոնանալ այն բանի վրա, որ Փրկիչը ներել է ինչ-որ մեկին կամ ազատել խավարից:

• Գտեք օգտակար խաչաձև հղումներ: Օրինակ, վերը նշված համարձակ ճշմարտության համար կարող եք կիսվել Մոսիա 16․9 կամ Բ Պետրոս 2․9 հատվածներով։ Հրավիրեք ձեր ուսանողներին որոնել լրացուցիչ խաչաձև հղումներ՝ օգտագործելով այնպիսի աղբյուրներ, ինչպիսիք են Սուրբ Գրքերի ուղեցույցը կամ թեմատիկ ուղեցույցը:

• Գտեք Եկեղեցու որևէ ղեկավարի ասած օգտակար խոսքերը: Օրինակ, համարձակ ճշմարտություն է Սփոփող Միության գերագույն նախագահությունից քույր Ռեյնա Ի․ Ըբարթոյի հետևյալ խոսքը․

Եթե դուք անընդհատ շրջապատված եք «խավարի մեգով» [ 1 Նեփի 8․23], դարձե՛ք դեպի Երկնային Հայրը: Ձեզ հետ կատարված ոչ մի բան չի կարող փոխել այն հավերժական ճշմարտությունը, որ դուք Նրա զավակն եք, և որ Նա սիրում է ձեզ։ Հիշեք, որ Քրիստոսը ձեր Փրկիչն ու Քավիչն է, իսկ Աստված ձեր Հայրն է: Նրանք հասկանում են։ Պատկերացրեք նրանց ձեր կողքին՝ լսելով և աջակցություն առաջարկելով։ «[Նրանք] կսփոփեն ձեզ ձեր չարչարանքների մեջ» [Հակոբ 3․1 ]։ Արեք հնարավոր ամեն բան և ապավինեք Տիրոջ քավող շնորհին։

(Ռեյնա Ի. Ըբարթո, «Ամպերի և արևի շողերի միջով, Տե՛ր մնա ինձ հետ» Ensign կամ Լիահոնա, նոյ. 2019, 58-59)

Պատրաստակամ ուսանողներին առաջարկեք ուսուցանել դասարանին: Կարող եք նաև հրավիրել ուսանողների փոքր խմբերին ուսուցանել միմյանց իրենց դասերը:

Խրախուսեք ուսանողներին լինել անկեղծ և ջանասիրություն գործադրել, երբ ուսուցանում և ուսուցանվում են: Հրավիրեք նրանց օգնություն փնտրել իրենց դժվարությունների ժամանակ, երբ նրանք ուշադիր լսեն իրենց դասընկերների դասերը:

Երբ մենք ուսուցանում և սովորում ենք Հոգով, մենք զորանում ենք (տես Վարդապետություն և ուխտեր 50․22-23)։ Ձեր ուսումնական օրագրում գրեք այն, ինչ սովորեցիք և զգացիք, որը կօգնի ձեզ ուժ ստանալ Հիսուս Քրիստոսից՝ դժվարություններին դիմակայելիս: Փնտրեք Երկնային Հոր օգնությունը Սուրբ Հոգու միջոցով՝ որոշելու, թե Նա ինչ կցանկանար, որ դուք անեիք Փրկչից ուժ ստանալու համար: Հետևեք ձեր ստացած հուշումներին:

Խրախուսեք ուսանողներին իրենց դասերը սովորեցնեն տանը՝ իրենց ընտանիքի անդամներին։ Կարող է օգտակար լինել հաղորդագրություն ուղարկել ծնողներին, որպեսզի նրանք տեղեկացված լինեն այս դասի մասին, որ խրախուսեն ուսանողներին՝ տանն ուսուցանել իրենց դասերը։

Բացատրական և պատմական տեղեկություններ

Փիլիպպեցիս 2․12-13 Պողոսն ուսուցանել է արդյո՞ք, որ մենք պետք է վաստակենք մեր փրկությունը

Թեև Հիսուս Քրիստոսի հանդեպ հավատք ցույց տվող գործողությունները կարևոր են, կարևոր է գիտակցել, որ հնարավոր չէ, որ մենք «վաստակենք» մեր փրկությունը (տես 2 Նեփի 2․8, Մոսիա 2․24, Ալմա 22․14)։ Փիլիպպեցիս 2․13-ը բացատրում է, որ Աստված գործում է մեր մեջ՝ օգնելու մեզ անել բաներ, որոնք մենք ինքներս չենք կարող անել (տես Սուրբ գրքերի ուղեցույց, «Շնորհ», scriptures.ChurchofJesusChrist.org; Bible Dictionary, “ Grace ”)։ Այս օգնությունն ու ուժը կոչվում է Փրկչի շնորհ և դա այն զորությունն է, որով Նա փրկում է մեզ (տես Եփեսացիս 2․8)։

Այս թեմայի մասին ավելին իմանալու համար դիտեք Տասներկուսի քվորումից երեց Դեյլ Գ. Ռենլանդի ելույթը «Օրհնությունները շատ են», ժամային կոդ՝ 0:00-5:39 կամ Առաջին Նախագահության Նախագահ Դալլին Հ. Օուքսի ելույթը What Think Ye of Christ?, ժամային կոդ՝ 8:58-12:50։

Օրհնությունները շատ են

“What Think Ye of Christ?”

Փիլիպպեցիս 4․13 Ի՞նչ է նշանակում, որ «Ամեն բան կարող եմ ինձ զորացնող Քրիստոսով»

Երիտասարդ կանանց գերագույն նախագահությունից քույր Միշել Դ. Քրեյգն ասել է.

Իհարկե, յուրաքանչյուրս կթերանա մեր աստվածային ներուժն իրականացնելիս, և դրա մեջ որոշ ճշմարտություն կա, որ մենակ մենք չենք կարող դա անել: Սակայն ավետարանի լավ նորությունը նրանում է, որ Աստծո շնորհով մենք կկարողանանք: Քրիստոսի օգնությամբ մենք ամեն բան կարող ենք անել [Փիլիպպեցիս 4․13]։ Սուրբ գրությունները խոստանում են, որ մենք «շնորհ կգտնենք մեզ օգնության պատեհ ժամին» [Եբրայեցիս 4․16]։

(Միշել Դ․ Քրեյգ, «Սուրբ դժգոհություն», Ensign կամ Լիահոնա, նոյ․ 2018, 54)

Նախագահ Դալլին Հ. Օուքսն ուսուցանել է․

Խոսելով մահկանացու կյանքի իր սեփական որոշ մարտահրավերների մասին Պողոս Առաքյալը գրել է. «Ամեն բան կարող եմ ինձ զորացնող Քրիստոսով» (Փիլիպպեցիս 4.13):

Եվ այսպիսով մենք տեսնում ենք, որ Իր Քավության շնորհիվ Փրկիչն իշխանություն ունի սատարել՝ օգնել յուրաքանչյուր երկրային ցավի ու չարչարանքի դեպքում: Երբեմն Նրա զորությունը բուժում է թուլությունները, բայց սուրբ գրություններն ու մեր փորձը ուսուցանում են, որ երբեմն Նա սատարում կամ օգնում է՝ ուժ ու համբերություն տալով մեզ, որ կարողանանք տանել այդ թուլությունները:

(Դալլին Հ․ Օուքս, «Զորանալով Հիսուս Քրիստոսի Քավությամբ», Ensign կամ Լիահոնա, նոյ․ 2015, 62)

Օժանդակ ուսումնական վարժություններ

Փիլիպպեցիս 2․12-13։ Գործեր, շնորհ և փրկություն

Փիլիպպեցիս 2․12-13-ը գուցե դժվար հասկանալի լինի։ Հրավիրեք ուսանողներին ուշադիր ուսումնասիրել այն և բացահայտել, թե ինչ է ուսուցանում Պողոսը: Կարող եք հրավիրել նրանց ուսումնասիրել «Բացատրական և պատմական տեղեկություններ» բաժնի նյութը Փիլիպպեցիս 2․12-13-ի վերաբերյալ և այդ հատվածների մասին՝ Եկ, հետևիր ինձ․ Անհատների և ընտանիքների համար. Նոր Կտակարան 2023-ում։ Խնդրեք նրանց բացատրել, թե ինչ գտան, որն օգնեց նրանց ավելի լավ հասկանալ գործերի, շնորհի և փրկության կարևոր վարդապետությունը: Հրավիրեք նրանց կիսվել, թե ինչպես է այս գիտելիքն ամրացնում իրենց հավատքն ու սերը Հիսուս Քրիստոսի հանդեպ:

Կողոսացիս 1.9-18: Հիսուս Քրիստոսի դերերը

Հրավիրեք ուսանողներին այս հատվածներում փնտրել Հիսուս Քրիստոսի անունները, կոչումները և դերերը: Հրավիրեք ուսանողներին կիսվել օրինակներով սուրբ գրություններից, իրենց կյանքից կամ իրենց ծանոթների կյանքից, երբ Փրկիչը մարմնավորել է այս անունները, դերերը կամ կոչումները: Հրավիրեք ուսանողներին կիսվել իրենց համար առավել նշանակալից դերով և ասել, թե ինչպես է այն ազդում Հիսուս Քրիստոսի հանդեպ իրենց զգացումների վրա:

Կողոսացիս 2․6։ Ընթանալ Քրիստոսով

Հրավիրեք ուսանողներին կիսվել, թե իրենց կարծիքով ինչ է նշանակում «ընթանալ [Քրիստոսով]» ( Կողոսացիս 2․6)։ Հրավիրեք նրանց ուսումնասիրել հետևյալ հատվածները՝ փնտրելով, թե ինչ է նշանակում ընթանալ Քրիստոսով. Կողոսացիս 1․9-18, Կողոսացիս 2․6, Կողոսացիս 3․1-11։ Նրանք կարող էին նաև ուսումնասիրել Նախագահ Հենրի Բ. Այրինգի այս խոսքերը.

Ի՞նչ է նշանակում քայլել Տիրոջ հետ։ Դա նշանակում է անել այն, ինչ Նա անում է, ծառայել, ինչպես Նա է ծառայում: Նա անձնական հարմարավետությունը զոհաբերեց, որպեսզի օրհնի նրանց, ովքեր կարիքի մեջ են, այնպես որ մենք էլ փորձում ենք դա անել: Նա կարծես որոշակիորեն նկատում էր մարդկանց, ում անտեսում ու նույնիսկ մերժում էր հասարակությունը. մենք ևս փորձում ենք նկատել նրանց: Նա համարձակորեն, բայց սիրով վկայում էր ճշմարիտ վարդապետության մասին, որը ստացել էր Իր Հոր կողմից, չնայած որ այն լայնորեն ընդունված չէր, և մենք ևս պետք է այդպես վկայենք: Նա ասաց բոլորին, «Եկեք ինձ մոտ» (Մատթեոս 11․28), իսկ մենք ասում ենք բոլորին. «Եկեք Նրա մոտ»:

(Հենրի Բ. Այրինգ, «Քայլիր ինձ հետ», Ensign կամ Լիահոնա, մայիս 2017, 84)

Հրավիրեք ուսանողներին կիսվել իրենց գտածով և փնտրել Երկնային Հոր օգնությունը՝ ծրագիր կազմելու համար, թե ինչպես կարող են լիարժեք քայլել Քրիստոսի հետ: