Илчлэл 12

“Тэнгэр дэх дайн”

Та дэлхий дээр төрөхөөсөө өмнө хаана амьдардаг байсан бэ? Үүнийг мэдэх нь таны амьдралд хэрхэн нөлөөлөх вэ? Иохан эцсийн өдрүүд, Есүс Христийн Хоёр дахь ирэлтийн талаарх буюу “үүний дараа юу тохиолдох ёстой” ( Илчлэл 4:1) зүйлсийн тухай харсан үзэгдлээ дүрслэхдээ бидний мөнх бус байдлын өмнөх оршихуй, үүнд “тэнгэр дэх дайн” ( Илчлэл 12:7), мөн мөнх бус амьдрал дахь Есүс Христийн дагагчдын эсрэг үйлдэгч Сатаны талаар нарийн ширийн мэдээлэл хуваалцжээ. Энэ хичээл танд мөнх бус амьдралын өмнө Аврагчийг дагаж, Сатаныг эсэргүүцэхийг сонгосон сонголтоо ойлгоход туслах замаар Есүс Христийг дагах үүрэг амлалтаа илүү сайн биелүүлэхэд тань туслах зорилготой.

Суралцагчдад тунгаан бодох цаг гаргаж өгөх. Тэдэнд мэддэг, итгэдэг зүйлээ мөн суралцаж буй зүйлийнхээ талаар юу мэдэрч байгаагаа тунгаан бодох боломж олго. Ийн үйлдэх нь тэдний Сүнсээр заалгах магадлалыг нэмэгдүүлнэ. Энэ нь мөн тэдэнд одоогийн сүнслэг байдлын хувьд гаргаж буй ахицаа болон өөрчлөгдөж, өсөж хөгжихийн тулд юу хийх ёстойгоо олж харахад тусална.

Суралцагчийн бэлтгэл: Энэ хичээлээс хэдэн хоногийн өмнө Сатан Есүс Христ болон Түүний дагалдагчдын эсрэг ямар ямар арга замаар тэмцдэг тухайд анхаарлаа хандуулахад суралцагчдыг урь. Тэднийг ажигласан тодорхой жишээнүүдээ хуваалцахаар бэлдэж ирэхэд урамшуул.

Боломжит суралцах үйл ажиллагаа

Энэ нь ямар өөрчлөлтийг авчрах вэ?

Өсвөр үеийнхэнд зориулсан дэлхий даяарх онцгой цугларалтаар ерөнхийлөгч Рассэлл М.Нэлсоны эхнэр Вэнди В.Нэлсон эгч дараах мэдэгдлийг хуваалцжээ. Тэр таныг юуг төсөөлж, мэдрэхэд урьсныг төсөөлөхийг хичээ. Та ChurchofJesusChrist.org дээрх “Израилын найдвар” (1:01:34) видеог цагийн код 20:52-оос 21:37 хүртэл үзэж эсвэл дараах мэдэгдлийг уншиж болох юм.

Дараах догол мөрүүдийг нэг нэгээр нь хуваалцаад, суралцагчдад Нэлсон эгчийн мэдэгдлийн талаар ярилцах боломж олгохыг бод. Тэд бидний мөнх бус оршихуйн өмнөх амьдрал ямар байсан, Нэлсон эгчийн дурдсан үйл явдлыг өөрөө үзэж туулах нь ямар байх талаар тунгаан бодож болно.

Та нарын мөнх бус байдлын өмнөх амьдралыг харуулсан 10 минутын видеог YouTube дээрээс үзэх боломж байсан ч болоосой.

Бошиглогч Иосеф Смит, хэрэв та нар тэнгэр рүү таван минут ширтвэл ямар нэгэн сэдвийн талаар бүх амьдралынхаа турш сурснаасаа хавьгүй илүүг ойлгох болно гэж заасан. Тиймээс мөнх бус байдлын өмнөх амьдралаа 10 минут ажиглан харж байна гэж төсөөлөөд үз дээ!

Их Эзэн тэдгээр дурсамжийг ухаалгаар халхлан, хөшиг татсан байдаг гэдгийг бид ухаарах нь гарцаагүй. Гэхдээ мөнх бус байдлын өмнөх амьдралынхаа 10 минутыг үзэх зөвшөөрөл олдвол яг одоо үүний та нарын амьдралд үзүүлэх байсан нөлөө ямар байхыг хэсэгхэн зуур төсөөл.

(Вэнди В. Нэлсон, “Израилын итгэл найдвар,” [өсвөр үеийнхэнд зориулсан дэлхий даяарх онцгой цугларалт, 2018 оны 6-р сарын 3], ChurchofJesusChrist.org)

• Хэрэв та мөнх бус байдлын өмнөх оршихуйд өөрийгөө харсан бол тэрхүү туршлагаас ямар онцгой зүйлийг олж харж, мэдэж авч, мэдэрч эсвэл ойлгоно гэж найдах байсан бэ?

• Энэ нь таны амьдралд ямар өөрчлөлт авчирна гэж та бодож байна вэ?

Илчлэл 12 дээр Иохан Тэнгэр дэх мөнх бус байдлын дайны талаар бичжээ. Судалж байхдаа та Есүс Христтэй тогтоосон өөрийн мөнх бус байдлын харилцаа холбооны талаарх нарийн ширийн зүйлсийг хайж ол. Энэхүү харилцаа холбоог ойлгох нь одоо амьдралдаа Түүнийг дагаж, Сатаныг даван туулах чадварт тань хэрхэн нөлөөлөхийг бодож үз.

Мөнх бус оршихуйн Тэнгэр дэх дайн

Дараах материал нь Иоханы үзэгдлийн бэлгэдэл, дүр зургийг ойлгоход суралцагчдад туслах замаар хичээлийн явцад Тэнгэр дэх дайны талаар ойлгоход нь туслах зорилготой. Хичээлийн сүүл хэсэгт хийж гүйцэтгэх үйл ажиллагаануудад хангалттай цаг үлдээхийн тулд эдгээр шүлэгт зарцуулах суралцагчдын цагийг зохицуул.

Тэнгэр дэх дайны талаарх Иоханы сургаалыг судлах бэлтгэлд тань Илчлэл 12:1–5 -ыг судалсны дараа тэдгээр шүлэг дээрх зарим бэлгэдлийг дүрсэлсэн доорх зургийг харах тус болж болох юм. Эдгээр бэлгэдлийн илэрхийлж байгаа зүйлийг ойлгоход туслах дараах хүснэгтийг ашигла.

Дараах мэдээллийг суралцагчдад үзүүлэхийг бод.

Бэлгэдэл	Юуг илэрхийлсэн байна вэ?
Эмэгтэй хүн ( Илчлэл 12:1)	“Бурханы сүм” ( Иосеф Смитийн Орчуулга, Илчлэл 12:7 -г үзнэ үү [Bible appendix дээр])
Эмэгтэйн хүүхэд ( Илчлэл 12:2)	“Манай Бурхан болон түүний Христийн хаанчлал” ( Иосеф Смитийн Орчуулга, Илчлэл 12:7 -г үзнэ үү [Bible appendix дээр])
Луу ( Илчлэл 12:3)	Сатан ( Иосеф Смитийн Орчуулга, Илчлэл 12:8 -ыг үзнэ үү [Bible appendix дээр])

Тэнгэр дэх дайны талаар олж мэдэхийн тулд судлах тэмдэглэлдээ дараахтай адилхан хүснэгт зур. Иосеф Смитийн Орчуулга, Илчлэл 12:7–11 -ийг унш [Bible appendix дээр]). “Михаел болон түүний тэнгэр элч нар” ( Илчлэл 12:7) гэдэг нь Адам болон Бурханы бусад зөв шударга сүнсэн хүүхэд болохыг анхаар.

Дараах хүснэгтийг самбарт зур мөн үүнийг судлах тэмдэглэлдээ буулгаж зурах боломжийг суралцагчдад өг. Хүснэгтийг судлах тэмдэглэлдээ бөглөхөөс гадна суралцагчид жижиг цаасан дээр хэт хувийн шинж чанартай биш бол хариултуудаа бичээд, самбар дээрх холбогдох өгүүлбэрийнх нь хажууд тавих боломжтой.

Тэнгэр дэх дайн Иосеф Смитийн Орчуулга, Илчлэл 12:7–11 [Bible appendix дээр]
Би Сатан … гэдгийг олж мэдсэн
Би Есүс Христ … гэдгийг олж мэдсэн
Би өөрийгөө … гэдгийг олж мэдсэн

Уншсан болон хүснэгт дээр бичсэн зүйлсээ эргэцүүлэн бод.

• Танд юу нь онцгой санагдсан бэ? Танд ямар асуулт байна вэ?

• 11-р шүлэг нь мөнх бус байдлын өмнөх оршихуйд ямар байснаа ойлгоход танд хэрхэн тусалж байна вэ? Сатаныг ялан дийлэхэд Аврагч ямар үүрэг гүйцэтгэн тусалсан бэ?

Мөнх бус байдлын өмнөх амьдрал, тэнд хийсэн үйлдлийн талаар заахдаа ерөнхийлөгч Даллин Х.Өүкс дараахыг онцолжээ.

Тэнгэр дэх Зөвлөлд Бурханы бүх сүнсэн хүүхдэд Эцэгийн төлөвлөгөөг, тухайлбал мөнх бус оршихуйн үр дагавар, сорилт бэрхшээл, тэнгэрлэг тусламж, алдар суу бүхий хувь заяаг танилцуулсан. Бид эхлэлээс төгсгөлийг нь хүртэл харсан. Энэ дэлхийд төрсөн тоо томшгүй олон мөнх бус хүмүүн бүгдээрээ Эцэгийн төлөвлөгөөг сонгон, үүний төлөө дараа нь болсон тэнгэр дэх тулаанд орж тэмцсэн.

(Даллин Х.Өүкс, “Агуу төлөвлөгөө,” 2020 оны 4-р сарын Ерөнхий чуулган, 115)

• Есүс Христэд итгэх итгэлийг тань хөгжүүлж, Түүнийг дагахад туслах юуг та сурч мэдсэн бэ?

Энэ хичээлээс та Есүс Христийн Цагаатгалаар дамжуулан мөн гэрчлэлдээ үнэнч хэвээр үлдсэнээр мөнх бус байдлын өмнөх амьдралдаа Сатаныг ялан дийлсэн гэх үнэнийг сурч болох юм.

• Энэ үнэнийг ойлгох нь өөрийгөө болон бусдыг өөр өнцгөөс харахад хэрхэн нөлөөлөх вэ?

• Энэ үнэн Аврагч болон Түүний Цагаатгалын хүчийг ойлгоход хэрхэн танд туслах вэ?

Сатаны бослогын дараа тэр болон түүний дагалдагчид “дэлхий рүү доош хаягдсан” ( Илчлэл 12:9) гэдгийг эргэн сана. Илчлэл 12:12, 17 -г уншаад, Сатан тэнгэрээс доош хаягдсаныхаа дараа хэний эсрэг дайн өдөөснийг олж мэд. Зурсан хүснэгтдээ ойлголтуудаа нэмж оруул.

Дараагийн асуултыг тавихаас өмнө, суралцагчийн бэлтгэх үйл ажиллагаанд өгсөн урилгыг нь суралцагчдад сануул.

• Христийн дагагчдын эсрэг эхлүүлсэн Сатаны дайн өнөөдөр хэрхэн үргэлжилж байна гэж та харж байна вэ?

• Мөнх бус оршихуйн Тэнгэр дэх дайны талаар үнэнийг олж мэдэх нь өнөөдрийн Сатаны эсрэг дайнд танд хэрхэн тусалж байна вэ?

Судлах тэмдэглэлдээ жагсаасан зүйлсээ эргэн хараад, мөнх бус байдлын өмнөх оршихуйн талаарх мөн Сатан болон Есүс Христийг дагадаг хүмүүсийн хоорондох бодит дайны талаарх хувийн итгэл үнэмшлийнхээ талаар дотроо тунгаан бодож, залбир. Өнөөдрийн олж мэдсэн зүйлс тань мөнх бус байдлын өмнөх оршихуйд байхад Есүс Христэд өгч байсан итгэл найдвараа илүү сайн ойлгоход танд хэрхэн туслах талаар эргэцүүлэн бод. Та энд буюу мөнх бус амьдралд Түүнд хэрхэн илүү бүрэн дүүрэн итгэж, найдаж болох вэ? Төрсөн мэдрэмж, сэтгэгдлээ судлах тэмдэглэлдээ бичиж тэмдэглэ.

Тайлбар ба нөхцөл байдлын талаарх мэдээлэл

Би мөнх бус оршихуйн Тэнгэр дэх дайнд Сатаныг хэрхэн ялан дийлсэн бэ?

Тэргүүн зөвлөлийн ерөнхийлөгч Хэнри Б.Айринг дараахыг хуваалцсан.

Биднийг төрөхөөс өмнөх сүнсний дэлхийн талаар мэддэг зүйлээ эргэн харъя. Тэнгэрлэг Эцэг маань хүүхдүүддээ зориулсан төлөвлөгөөг танилцуулсан. Бид тэнд байв. … Бидний сүнсэн ах Люсифер бидэнд сонгох эрх чөлөө олгох уг төлөвлөгөөг эсэргүүцсэн бөгөөд Тэнгэрлэг Эцэгийн Хайртай Хүү Иехова уг төлөвлөгөөг дэмжсэн. Люсифер бослогыг удирдав. Иеховагийн дэмжсэн дуу хоолой давамгайлж, Тэрээр Өөрийн саналаар бидний Аврагч болохыг зөвшөөрсөн билээ.

Та нар одоо мөнх бус байдалд байгаа нь та нар Эцэг, Аврагч хоёрыг сонгосны баталгаа юм. Та нар мөнх бус байдалд тохиолдох саад бэрхшээлийн талаар тун бага зүйл ойлгодог байсан ч аз жаргалын төлөвлөгөөг болон үүнд Есүс Христийн эзлэх байр суурийг дэмжихийн тулд Есүс Христэд итгэх итгэл шаардагдсан.

(Хэнри Б.Айринг, “Дэмжих итгэлийн хүч,” 2019 оны 4-р сарын Ерөнхий чуулган, 71)

Залуу эрэгтэйчүүдийн ерөнхий ерөнхийлөгчийн зөвлөлийн нэгдүгээр зөвлөх Ахмад С.Корбитт ах дараахыг хуваалцжээ.

Есүс Христ [мөнх бус оршихуйд] мөнх бус амьдралд ирээд, биднийг цуглуулж, аврахын тулд Өөрийн амийг өгнө хэмээн амлахад та Түүнд зүгээр нэг итгээгүй. “Нэр төртэй суутнууд” та нар “үлэмж агуу итгэлтэй” байсан тул Түүний амлалтыг баттай болохыг харсан [Рассэлл М. Нэлсон ба Вэнди В. Нэлсон, “Израилын найдвар,” 8; Алма 13:3 ]. Тэрээр худлаа хэлж чаддаггүй тул та Түүнийг төрөхөөс бүр өмнө, аль хэдийн таны төлөө цусаа урсгасан байгаагаар харсан. …

… Үүнтэй адил, “нэр төртэй суутнууд” та нар төрөхөөсөө өмнө Христийн амлалтыг ийм итгэлтэйгээр харж сурч, Түүний авралыг амталсан билээ. Агуу итгэл тань хөгжих тусам илүү хүчирхэгжиж, илүү томрох булчинтай адил мөртлөө аль хэдийн таны дотор оршин байдаг.

(Ахмад С.Корбитт, “Та Израилыг цуглуулж чадна!,” 2021 оны 4-р сарын Ерөнхий чуулган, 64)

Би мөнх бус байдлын өмнөх амьдралынхаа талаар хаанаас илүү ихийг мэдэж авч болох вэ?

Доорх эх сурвалжуудыг ашиглахыг бод.

Moсe 4:1–4

 

Судруудын удирдамж, “ Тэнгэр дэх дайн ,” scriptures.ChurchofJesusChrist.org

 

 

Тэнгэрт болсон дайн ямар дайн байсан бэ?

Арван хоёр төлөөлөгчийн чуулгын ахлагч Брүс Р.Макконки (1915–1985) тэнгэрт гарсан зөрчлийг ийн тайлбарлажээ.

Ямар төрлийн дайн? Энэ нь дэлхий дээр өргөн тархсан; Сатан болон сүнсэн биетүүд тэмцэлдэж чадах цорын ганц төрөл болох үгсийн дайн, үзэл бодлын үймээн, үзэл суртлын зөрчилдөөн; үнэн, худал хоёрын дайн юм. … Тулааны шугамууд тавигдсаар байна. Урьд өмнө нь тэнгэрт ямар байсны нэгэн адилаар одоо дэлхийд тийм байна; хүн бүр ямар жанжинг дагах эсэхээ сонгох ёстой.

(Брүс Р.Макконки, Шинэ Гэрээний сургаалын тайлбар [1973], 3:518)

Нэмэлт суралцах үйл ажиллагаа

Хичээлийг эхлүүлэх өөр аргууд

Хичээлийн эхэнд санал болгосны хоёрдогч хувилбар болгож, дэлхий дээр дайн дажин өрнөж байсан цаг үед амьдарч байсан туршлагынхаа талаар ярилцах нь суралцагчдад тустай байж болно. Тэд сүнслэг тулаан, дайн болон тэдгээрийн үр нөлөөний талаар ярилцахын өмнө, хамгийн их нөлөөтэй байсан эсвэл сүүлийн үед гарсан дайнууд болон тэдгээр дайны үр нөлөөг ярилцаж болно. Нэмэлтээр суралцагчдаас авралын төлөвлөгөөний талаар юу мэддэгээ товчхон эргэн харж, зураглал үүсгэж эсвэл хуваалцах болон дараа нь мөнх бус байдлын өмнөх амьдралын талаар бодохыг хүсэж болно. Тэд уг төлөвлөгөөний энэ хэсгийн талаар мэддэг, итгэдэг эсвэл мэдэхийг хүсэж буй зүйлсээ ярилцаж болно.

Цөлд байсан эмэгтэй

Илчлэл 12 дээр дурдсан “эмэгтэй” нь “Бурханы сүмийг” илэрхийлдэг болохыг суралцагчдад сануул ( Иосеф Смитийн Орчуулга, Илчлэл 12:7 [Bible appendix дээр]). Илчлэл 12:7–11 дээрх Тэнгэр дэх дайны талаар уншсаныхаа дараа Илчлэл 12:8–17 -г уншаад, Сатан Аврагчийн Сүмээр юу хийлгэхийг хүсдэг болохыг олж мэд. Эдгээр шүлэг дээрх Иоханы бэлгэдлийн шинжтэй сургаалын талаар ойлгоход нь суралцагчдад туслахын тулд дараахтай адил асуултууд тавихыг бод. “Лууны хавчлагад өртсөнийхөө дараа цөл рүү нисэж очиж буй эмэгтэй юуг илэрхийлж байна гэж та бодож байна вэ?” ( Илчлэл 12:13–14 -ийг үзнэ үү; мөн Сургаал ба Гэрээ 86:1–3 -ыг үзнэ үү.)