Faaaliga 2–3, Vaega 2

“O Lē Manumalo”

Pe ua e mafaufau ea pe mafai faapefea ona e feagai ma luitau o le olaga faaletino i se tulaga faamanuiaina? Na aoao atu e le Faaola le Au Paia mai ekalesia e fitu i Asia i le ala e faatoilalo ai sauaga, agasala, ma isi luitau ina ia maua ai Ana faamanuiaga folafolaina. O lenei lesona e mafai ona fesoasoani ia te oe e lagona ai se manao faateleina e faatoilalo luitau ma maua faamanuiaga ua folafola mai e le Faaola e tuuina atu.

O le fesoasoani atu i tagata aoga ia avea ma tagata auai mataalia. O se tasi auala e fesoasoani ai i tagata aoga ia avea ma tagata auai mataalia o le tuu atu lea ia i latou o avanoa e filifili ai mea latou te mananao e suesue. Mafaufau e tuuina atu ni nai tala talitutusa e suesue ai, fesili e tali, po o gaoioiga e filifili mai ai.

Sauniuniga a le tagata aoga: Valaaulia tagata aoga e fai atu i se tagata o le aiga po o se uo faatuatuaina e faasoa mai se aafiaga i se taimi na latou faatoilaloina ai se faafitauli faatasi ma le fesoasoani a le Faaola.

Gaoioiga E Ono Mafai Ona Aoao Ai

O le vaaia o le iuga mai le amataga

Mafaufau e tuu tagata aoga i ni paga ma valaaulia i latou e faamatala i le tasi ma le isi po o le a le latou meaai e fiafia i ai ma pe aisea o le a latou fiafia ai e aai i ai. Ona faasoa atu lea o le talafaatusa lenei ma valaaulia tagata aoga e tali mai i le fesili e faatatau i ai.

Vaai faalemafaufau ia te oe lava i lou i ai i le tulaga lenei na faamatalaina e Brother Ahmad S. Corbitt o le Au Peresitene Aoao o Alii Talavou. Matamata i le “E Mafai ona E Faapotopotoina Isaraelu!,” lea e mafai ona maua i le ChurchofJesusChrist,org, mai le faailotaimi 4:49 i le 5:22, pe faitau le faamatalaga lenei.

Pe a faapea la i se tasi aso ae e te lei tuua le fale mo le a’oga, ua faia e se tasi o ou matua se folafolaga moni faapea e mafai ona e maua lau meaai e te fiafia lava i ai pe a e foi mai i le fale! Ua e fiafia tele! A o e i ai i le aoga, ua e mafaufau i le ’aiina o lena meaai ma ua foliga mai ua mafai lava ona e tofoina. Pei ona masani ai, ua e faasoa atu foi lau tala fou manaia i isi. O le naunau e alu atu i le fale ua avea o se mea ua e matua fiafia ai lava ma o lea ua foliga ai ua mama ia tofotofoga ma luitau o le a’oga. E leai se mea e mafai ona aveesea lou olioli pe e te masalosalo ai ona o lou matua talitonu lava i le folafolaga!

(Ahmad S. Corbitt, “E Mafai ona E Faapotopotoina Isaraelu!,” Liahona, Me 2021, 62)

E mafai foi ona tatou faaaogaina le talafaatusa a Brother Corbitt i o tatou olaga faaleagaga.

• Aisea e te manatu ai e mafai ona tatou onosaia lelei ia tofotofoga ma luitau o le olaga nei pe a tatou tumau i le taulai atu i folafolaga e faavavau na faia ia i tatou e lo tatou Tama Faalelagi?

I le Faaaliga 2–3, na molimau mai ai Iesu Keriso e uiga i Ana folafolaga e faavavau ma aoao mai i le Au Paia le ala e mafai ai ona latou maua nei folafolaga. Sa manaomia e le Au Paia i ona po o Ioane le fesoasoani i le tele o luitau e talitutusa ma luitau atonu o loo outou feagai, e aofia ai agasala, sauaga, ma le le ano i mea faaleagaga. A o e suesue i nei mataupu, mafaufau loloto pe mafai faapefea e le malamalama i nei folafolaga mai le Alii ona fesoasoani ia te oe i lou olaga.

Faaali atu fuaitau, faauigaga, ma fesili nei. Mafaufau e tuu tagata aoga i ni vaega toalaiti e faitau ai fuaitau ma talanoaina ia fesili.

E mafai ona valaaulia tagata aoga e fai ni fesili e uiga i nei folafolaga ma suesue i tusiga i le Taiala i Tusitusiga Paia, Taiala o Autu, po o isi punaoa o le a fesoasoani ia i latou e malamalama atili ai i nei folafolaga.

Fatu se siata i lau api faamaumau mo suesuega e pei o lea.

Fuaiupu	Folafolaga a le Atua ia i latou o e manumalo
Faaaliga 2:7, 10–11, 17, 25–29 ; 3:5, 11–12, 20–21

Faitau fuaiupu o loo i le itu tauagavale o le siata, ma tusi folafolaga e te maua i na fuaiupu i le itu taumatau o le siata (manatua e tele folafolaga e mafai ona maua i mataupu taitasi). Atonu e fesoasoani faauigaga nei ia te oe.

Oti faalua ( Faaaliga 2:11): Oti faaleagaga, po o le vavaeese mai le Atua e faavavau (tagai i le Taiala i Tusitusiga Paia, “ Oti Faaleagaga ,” scriptures.ChurchofJesusChrist.org)

Manai lilo ( Faaaliga 2:17): O se mau faasino ia Iesu Keriso (tagai i le Ioane 6:48–51)

Maa sinasina ( Faaaliga 2:17): O le Urima ma le Tumema (tagai i le Mataupu Faavae ma Feagaiga 130:8–11)

Fetu ao ( Faaaliga 2:28): O se faalagiga mo Iesu Keriso (tagai i le Faaaliga 22:16)

• O a ni mea e talitutusa ai o loo e vaaia i nei folafolaga?

• E faapefea ona e aoteleina upu a le Faaola e uiga i le ala e maua ai Ana folafolaga e faavavau?

O nei fuaitau e mafai ona fesoasoani tatou te malamalama ai e faapea, afai tatou te manumalo, o le a tuuina mai e le Faaola ia i tatou faamanuiaga o le faaeaga.

• E mafai faapefea e le iloaina ua folafola mai e Keriso ia te oe faamanuiaga e faavavau ona fesoasoani ia te oe e onosaia ai luitau o le olaga nei?

• O le fea o nei folafolaga e faaosofia ai oe e faatoilalo mea o loo feagai ma oe? Aisea?

Faamanatu i tagata aoga e faaaoga a latou sauniuniga mo le vasega a o latou tali atu i le fesili lenei. Valaaulia tagata aoga e lisi a latou tali i luga o le laupapa.

• O le a se mea e ono manaomia ona tatou faatoilaloina ina ia maua ai le faaeaga?

Saili le fesoasoani mai le Tama Faalelagi e ala i le Agaga Paia e faailoa ma tusi ai i lalo se mea e manaomia ona e faatoilaloina i lou olaga. Atonu o se agasala, vaisu, po o se isi luitau patino. Tusi pe aisea e faigata ai ia te oe ma pe aisea e te manao ai e faatoilaloina. A o faaauau pea ona e suesue, saili le fesoasoani a le Tama Faalelagi e ala i le Agaga Paia e iloa ai i mea e mafai ona e faia e faatoilalo ai.

O le manumalo i le lalolagi

Sa faasoa mai Elder Neil L. Andersen o le Korama a Aposetolo e Toasefululua e uiga i lenei manumalo:

Mata e ono mafai ona manumalo i le lalolagi ma maua nei faamanuiaga? Ioe, o lea lava.

O i latou o e manumalo i le lalolagi e atiaeina se alofa tauaofia-atoa mo lo tatou Alii ma le Faaola, o Iesu Keriso. …

O le manumalo i le lalolagi e le na o se taimi patino se tasi i le olaga atoa e tupu ai, ae e tupu i le olaga atoa lea e iloa ai lou taunuuga e faavavau.

(Neil L. Andersen, “Manumalo i le Lalolagi,” Ensign po o le Liahona, Me 2017, 59)

• O le a se mea na e aoaoina mai ia Elder Andersen e uiga i le faatoilaloina?

Ona e alolofa ma tausia i tatou e le Tama Faalelagi ma Iesu Keriso, ua La finagalo ai e fesoasoani ia i tatou e faatoilalo mea uma e manaomia e agavaa ai mo le faaeaga.

Mafaufau e faaali atu manatu nei, pe tuu atu i tagata aoga e o mai ma a latou lava auala e faailoa mai ai mea e mafai ona latou faia e maua ai le fesoasoani a le Faaola e faatoilalo ai o latou luitau.

Afai e manaomia, lolomi ni kopi o le saunoaga lenei a Elder Andersen.

1. Faitau le lauga i le konafesi aoao i le Aperila 2017 ua faaautuina “Manumalo i le Lalolagi,” na saunia e Elder Neil L. Andersen o le Korama a Aposetolo e Toasefululua. Vaavaai mo ni malamalamaaga i mea e mafai ona e faia e te manumalo ai.

2. Faitau le Ioane 16:33 , ona suesue lea pe na faapefea ona faatoilalo e le Faaola ia faaosoosoga a Satani i le Mataio 4:1–11 . Vaavaai pe mafai faapefea ona e mulimuli i le fautuaga ma le faataitaiga a le Faaola a o e taumafai e faatoilalo luitau ma agasala.

3. Saili mo le upu “faatoilalo” i le polokalama o le Potutusi o le Talalelei po o i luga o le ChurchofJesusChrist.org. Suesue i upusii po o mau e te maua e faailoa ai pe mafai faapefea foi ona e faatoilaloina. I se isi faiga, e mafai ona e suesue i fuaitau o mau mai i le Taiala mo Autu i lalo o le “ Faatoilalo, Faatoilaloina .”

Tuu atu i tagata aoga se taimi ia lava e faamae’a ai a latou suesuega. Ona valaaulia lea o i latou e faasoa mai mea na latou maua pe na aoaoina faapea foi ma manatu po o lagona i auala latou te ono faaaoga ai mea sa latou aoaoina.

Mafaufau ia le itiiti ifo ma le tasi se mea e mafai ona e faia e fesoasoani ai ia te oe e faatoilalo le luitau po o le agasala lea sa e mafaufau muamua i ai i le lesona. I lau api faamaumau patino, tusi i lalo mea o le a e faia ma tautino atu o le a e faia. Mafaufau e faasoa atu lau fuafuaga i ou matua po o se taitai faatuatuaina o le Ekalesia.

• O le a se mea na e aoaoina e uiga i le Tama Faalelagi ma Iesu Keriso mai lenei lesona?

• O le a se mea ua uma ona e iloa e uiga ia Iesu Keriso ma Lana Togiola lea e tuuina atu ia te oe le lotomautinoa e mafai ona Ia fesoasoani ia te oe e faatoilalo mea uma ma maua Ana faamanuiaga folafolaina?

Tala Auiliili ma Faamatalaga o Talaaga

Gaoioiga Faaopoopo e Aoao Ai

O le malamalama i faamanuiaga o le faaeaga

Afai e manaomia e tagata aoga ona malamalama atili i folafolaga a le Faaola e faatatau i le faaeaga, mafaufau e valaaulia i latou e sue tusiga i le Taiala i Tusitusiga Paia e pei o le “ Laau o le Ola ,” “ Palealii ,” po o le “ Manai ” (scriptures.ChurchofJesusChrist.org). E mafai foi ona fesoasoani le faaali atu o faamatalaga mai le vaega o “Tala Auiliili ma Faamatalaga o Talaaga” lea e mafai ona fesoasoani i le malamalama ai i nei folafolaga.

Taofi mau

Afai o le a manuia tagata aoga mai le vaai pe faapefea e le “taofi mau” ( Faaaliga 2:25 ; tagai foi i le 3:3) ona fesoasoani ia i latou e manumalo ai i le lalolagi, valaaulia i latou e suesue le 1 Nifae 8:30 ma faauigaga na tuuina mai e Nifae i le 1 Nifae 15:21–25 . Valaaulia tagata aoga e faailoa mai ni faatinoga e mafai ona latou faia e “taofi mau,” ma manatua ai o le laau o le ola ma le ai u’amea o faatusa ia o Iesu Keriso ma Lana afioga. E mafai foi ona latou faaaogaina faamatalaga mai le vaega o “Tala Auiliili ma Faamatalaga o Talaaga” i lalo o lenei autu. Valaaulia i latou e faasoa mai ni aafiaga i se taimi na latou taofi mau ai ma manumalo i luitau po o agasala. Ona mafai lea ona latou faia se fuafuaga e faatoilalo ai nei luitau po o agasala e pei ona otooto atu muamua i le lesona.