Илчлэл 20:11–15
Эцсийн шүүлт
Та Эцсийн шүүлт ямар байх талаар хэзээ нэгэн цагт бодож байсан уу? Төлөөлөгч Иохан тэрхүү агуу өдрийн талаар бошиглосон юм. Энэ хичээл нь Эцсийн шүүлтийг илүү сайн ойлгож, тэрхүү өдөр Есүс Христийн өмнө зогсох гайхамшигт үйл явдлыг өөрийн биеэр мэдрэхэд бэлдэхэд тань туслах зорилготой.
Суралцагчдын мэдрэмжийг ажиглах. Сайн мэдээний тодорхой үнэнүүдийн талаар ярилцах үед санаа нь зовсон байдалтай харагдаж буй суралцагчдад анхаарлаа хандуул. Хичээлийн туршид Тэнгэрлэг Эцэг, Есүс Христ хоёрын хайр, энэрлийн талаар аль болох сануулахыг хичээ.
Суралцагчийн бэлтгэл: Суралцагчдыг Илчлэл 20:12 -ыг уншаад, Эцсийн шүүлтийн талаар асуух асуултуудаа бэлдэж ирэхэд урь.
Боломжит суралцах үйл ажиллагаа
Эцсийн шүүлт
Хичээлийн эхэнд уг зургийг үзүүлэхийг бод.
-
Эцсийн шүүлтээр өөр өөр хүнд ямар бодол орж ирнэ гэж бодож байна вэ? Яагаад?
-
Хэн нэгнийг тэрхүү өдөрт бэлтгэгдсэн эсэхийг нь юугаар тодорхойлдог гэж та бодож байна вэ?
-
Тэрхүү өдөрт бэлтгэхэд Есүс Христ бидэнд ямар арга замаар тусалдаг вэ?
Судлах тэмдэглэлдээ та Бурханы өмнө шүүгдэхээр зогсохдоо юу бодож, мэдэрнэ гэж найдаж буй талаараа бич. Та өөрийгөө хэр бэлтгэгдсэн гэж бодож байна вэ?Тэнгэрлэг Эцэг, Есүс Христ хоёр биднийг хайрладаг бөгөөд Эцсийн шүүлтийн өдөр биднийг амар амгалан, баяр баясгалангаар дүүрэн байгаасай гэж хүсдэг. Тэд Шүүлт ямар байх, үүнд хэрхэн бэлтгэх талаар бидэнд заахын тулд орчин үеийн Сүмийн удирдагчид болон судруудаар дамжуулан бидэнтэй ярьдаг.
Мянган жилийн тухай үзэгдэл ( Илчлэл 20:1–3 -ыг үзнэ үү) болон зөв шударга хүмүүсийн Амилуулалтыг харсныхаа дараа ( Илчлэл 20:4–6 -г үзнэ үү) Иохан Эцсийн шүүлтийг харжээ. Илчлэл 20:11–12 -ыг уншаад, Бурхан төлөөлөгч Иоханд Эцсийн шүүлтийн талаар юу илчилснийг олж мэд.
-
Та Эцсийн шүүлтийн талаар Иоханаас юу сурч мэдсэн бэ?
Бид судрын энэ хэсгээс Бурхан ажил үйлсийн маань дагуу бичигдсэн номоор биднийг шүүх болно гэсэн үнэнийг мэдэж авч болно.
Эцсийн шүүлтийн талаарх асуулт
Судлах тэмдэглэлдээ судрын энэ хэсгийн талаар асуумаар байгаа асуултаа эсвэл Эцсийн шүүлтийн талаар илүү сайн ойлгохын тулд мэдмээр байгаа өөр зүйлээ бич.
Суралцагчдыг зарим асуултаа ангийнхантайгаа хуваалцахад урьж болно.
Хэдэн минут зарцуулан, асуултуудынхаа хариултыг хай. Судруудын удирдамж дээрээс түлхүүр үг хэллэгээр нь хайж үз. Эсвэл та ChurchofJesusChrist.org эсвэл Gospel Library аппликэйшнаас хайж болно. Та дараах асуулт, өгсөн эх сурвалжуудыг хичээлдээ оруулж болох юм.
Суралцагчдыг судалж байх зуур өрөөн дундуур явж, тусламж хэрэгтэй байгаа хүмүүсийг олох талаар бодож үз. Хэрэв хэрэгтэй гэж үзвэл, нэг эсвэл хоёр суралцагчтай хамт хэсэг чимээгүй суугаад судалж, хичээлийн “Тайлбар ба нөхцөл байдлын талаарх мэдээлэл” хэсэг дээрх тус болж болох аливаа мэдэгдлийг хуваалцахыг бод.
Суралцагчдыг олж мэдсэн зүйлээ судлах тэмдэглэлдээ эсвэл судар дээрээ Илчлэл 20:12 -ын ойролцоо бичиж тэмдэглэхэд урамшуул. Тэд мөн тэдгээр асуултад хариулахад туслах асуулт, эх сурвалжуудыг судар дээрээ тэмдэглэж болно.
Сонирхолтой байлгахын тулд дараах дөрвөн асуултыг асуулт бүрийн доор жагсаасан санал болгосон эх сурвалжуудтай нь хамт өрөөний өөр өөр хэсэгт байрлуулж болно. Суралцагчид сонгосон асуултынхаа дэргэд цугларч, адил асуулт сонгосон нөхөдтэйгөө хамт судалж болно. Эсвэл дотор нь эх сурвалжуудыг нь бичсэн цаас бүхий дугтуйн дээр асуулт бүрийг бич. Тэдгээр дугтуйг самбарын өмнө байрлуулж болно. Суралцагчид сонирхож буй асуулт бүхий дугтуйг сонгоод, дотор нь бичсэн эх сурвалжуудыг ашиглан судалсны дараа дугтуйг буцааж өгч, өөрийг сонгож болно. (Асуулт бүрд хэд хэдэн дугтуй бэлдэх шаардлагатай болж болно.)
1. Иохан Их Эзэний шүүхдээ ашиглах ямар ямар номыг харсан бэ?
Судруудын удирдамж эсвэл Bible Dictionary , “Амийн Ном”
2. Яг хэн бидний Шүүгч болох вэ, яагаад Тэр биднийг шүүхэд хамгийн сайн тохирох хүн бэ?
3. Бид юугаараа шүүгдэх вэ?
Уг хичээлийн “Тайлбар ба нөхцөл байдлын талаарх мэдээлэл” хэсэг дээрх Тэргүүн зөвлөлийн ерөнхийлөгч Даллин Х.Өүксийн мэдэгдлийг үзнэ үү.
4. Би Эцсийн шүүлтэд хэрхэн бэлдэх вэ?
Суралцагчдыг олж мэдсэн зүйлээ ангийнхантай хуваалцахад урь. Дараах асуултуудын заримыг хэлэлцүүлэг явуулахад ашиглаж болно.
-
Та Эцсийн шүүлтийн талаар юу олж мэдсэн бэ?
-
Энэ сургаалыг ойлгож, үүнд итгэх нь бидний үйлдэлд хэрхэн нөлөөлөх вэ?
-
Аврагчийн ямар зан чанарууд Түүнд Өөрийн Шүүгчийн хувиар итгэхэд тусалдаг вэ? Тэр Эцсийн шүүлтэд бэлтгэхэд тань хэрхэн туслах вэ?
Таны амийн ном
Илчлэл 20:12 -ыг дахин уншаад, “амийн ном” гэсэн хэллэгийг тэмдэглэхийг бод. Өөрөөр хэлбэл, амийн ном бол хүн нэг бүрийн амьдралын тэмдэглэл юм.
Дараах үйл ажиллагаагаар, суралцагчид харуулах зорилгоор самбарт нэг жишээ бич.
Хэрэв суралцагчид судлах тэмдэглэлийнхээ оронд цаас ашиглаж байвал тэд цааснуудаа ном шиг болгон дундуур нь нугалж болно. Дараа нь тэд гадна талын хавтсан дээр нь “Миний амийн ном” гэж хаяглаж болно.
Судлах тэмдэглэлийнхээ хоосон хуудасны дээд талд “Миний амийн ном” гэж гарчиглаад, хуудсыг хоёр баганад хуваа. Зүүн талын баганыг “Би үүнийг хийсэндээ баяртай байна” гэж нэрлээд, уг баганад амийн номд орсон байгаад талархаж байгаа зүйлээ жагсаан бич. Үүнд дараах зүйлс орж болно.
-
Таны хүлээн авсан ёслол
-
Таны үйлдсэн сайн үйлс
-
Таны зөв шударга хүсэл
-
Есүс Христтэй харилцах харилцааны тань өсөлт хөгжил.
Таны зөв шударга байдлын тэмдэглэлийг Аврагчтай хамт нэгэн өдөр харахад ямар сайхан байхыг төсөөл дөө!
Одоо хуудасны баруун баганыг “Миний хийхийг хүсэж байгаа зүйл” гэж нэрлэ. Шүүлтийн өмнө номдоо нэмэхийг хүсэж байгаа зөв шударга үйлс, ёслолуудыг бич эсвэл энэ талаар зүгээр л тунгаан бод. Та мөн Есүс Христийн Цагаатгалаар дамжуулан амийн номоос арилгахыг хүсэж байгаа сонголт, хандлагуудаа оруулж болно.
Аврагч амийн номд таны талаар тэмдэглэсэн зүйлийг өөрчлөх боломжийг олгосон. Чин сэтгэлээсээ наманчилдаг хүмүүст Түүний өгсөн амлалтуудыг Сургаал ба Гэрээ 58:42–43 -аас унш.
-
Эдгээр амлалт Эцсийн шүүлт болон бидний Шүүгчийн талаарх таны бодол санаанд хэрхэн нөлөөлж байна вэ?
Тэргүүн зөвлөлийн ерөнхийлөгч асан Дийтр Ф.Угдорф ийн хэлсэн.
Шүүлтийн өдөр нь харууссан зүрх эдгээгдэн, гашуудлын нулимс талархлын нулимсаар солигдож, бүх зүйл зөв болох нигүүлсэл, хайрын өдөр байх болно.
Тийм ээ, нүглийн улмаас илүү их гашуудах болно. Бид бас өөрсдийг маань илүү агуу ирээдүйд хүргэх боломжуудыг алдахад хүргэсэн алдаа, мунхаглал, зөрүүд зангаасаа болсон харамсал, тэр ч бүү хэл цөхрөлийг мэдрэх болно.
Гэхдээ бид Бурханы шүүлтэд сэтгэл хангалуун байгаад зогсохгүй хүүхдүүд биднийгээ гэсэн Түүний хязгааргүй ач ивээл, нигүүлсэл, өгөөмөр сэтгэл, хайранд гайхширч, цочирдоно гэдэгт би итгэлтэй байдаг.
(Дийтр Ф.Угдорф, “Ай Бурханы маань төлөвлөгөө хэчнээн агуу билээ!” 2016 оны 10-р сарын Ерөнхий чуулган, 6)
Шүүлтийн өдөр Аврагчийн өмнө зогсоход бэлэн байхын тулд юу хийх сэдэл танд төрж байгааг тунгаан бод.
Эцсийн шүүлт нь гэм нүглээ наманчилж, Аврагчид итгэх итгэлээ өсгөн нэмэгдүүлэхийг хичээдэг бүх хүнд гайхалтай сайхан үйл явдал байх болно гэдгийг гэрчил.
Тайлбар ба нөхцөл байдлын талаарх мэдээлэл
Би өөрийн хүсэн хүлээж буй шүүлтэд өөрийгөө хэрхэн бэлтгэх вэ?
Ерөнхийлөгч Рассэлл М.Нэлсон ийн тайлбарласан.
Бүх хүмүүнийг ажлууд болон зүрх сэтгэлийнх нь хүслийн дагуу шүүх болно. … Селестиел, террестиел, телестиел хаант улсад таны эзлэх эцсийн байр суурийг тохиолдлоор шийдвэрлэдэггүй. Их Эзэн хүн бүрд зориулан хэзээ ч өөрчлөгдөхгүй шаардлагуудыг тавьсан. Та сударт юу заадгийг олж мэдээд, уг зүйлийнхээ дагуу амьдрах хэрэгтэй.
(Russell M. Nelson, “Constancy amid Change,” Ensign, Nov. 1993, 35)
Тэргүүн зөвлөлийн ерөнхийлөгч Даллин Х.Өүкс ийн хэлжээ.
Эцсийн шүүлт бол бидний хийсэн сайн, муу үйлсийг дэнслэн, үнэлэлт дүгнэлт өгөх төдий зүйл биш. Энэ нь бидний хэн болсон буюу үйлс, бодлын маань эцсийн үр дүнгийн хариу байх болно. Хүмүүсийн хувьд зүгээр урсгалаараа явах нь хангалттай биш юм. Сайн мэдээний зарлиг, ёслол, гэрээнүүд нь тэнгэр дэх хадгаламжид хураагдаж байдаг зүйлсийн жагсаалт биш. Есүс Христийн сайн мэдээ бол Тэнгэрлэг Эцэг биднийг ямар хүмүүс болохыг хүсдэг шиг тийм хүмүүс хэрхэн болохыг бидэнд харуулдаг төлөвлөгөө юм.
(Dallin H. Oaks, “The Challenge to Become,” Ensign, Nov. 2000, 32)
Есүс Христ бидний Шүүгч болохын тулд ямар шалгуурыг давсан бэ?
Арван хоёр төлөөлөгчийн чуулгын ахлагч Ричард Г.Скотт (1928–2015) ийн заасан.
Тоолж баршгүй үнэ цэн, төсөөлшгүй зовлон, тарчлалаар Аврагч бидний Гэтэлгэгч, Зуучлагч, Эцсийн Шүүгч байх эрхийг олж авсан гэдгийг би гэрчилж байна.
(Richard G. Scott, “The Atonement Can Secure Your Peace and Happiness,” Ensign or Liahona, Nov. 2006, 42)
Нэмэлт суралцах үйл ажиллагаа
Есүс Христ бол төгс Шүүгч
Хувь хүний эцсийн шүүлтийг Есүс Христэд үлдээх ёстой гэдгийг ухаарахад нь суралцагчдад туслахын тулд ангийнхныг зохиомол хүний амьдралын хэд хэдэн мэдээллийг зохиоход урь. Тэдгээр мэдээлэлд Сүмийн дуудлага, сургуульдаа хэр сайн сурч байсан болон зан чанар, зарим сул ба давуу талуудыг оруулж болно.
Дараа нь энэхүү зохиомол хүнийг алдар суугийн ямар хаант улсад очих ёстой болохыг шийдэх итгэлтэй байгааг нь суралцагчдаас асуу. Төгс шүүхийн тулд тэд өөр юуг мэдэх ёстойг асуу.
Аврагчид бидний амьдралыг төгс шүүх боломжийг олгодог, бидний талаарх юуг Тэр мэддэг тухай ярилцахад суралцагчдыг урь. Тэр тэдний хувийн Шүүгч байна гэдгийг мэдэж байгаадаа яагаад талархаж байгааг нь асуу.
Мянган жилийн үед Сатан хүлэгдэх болно
Гинж эсвэл гинжний зураг үзүүлэхийг бодоорой. Суралцагчдаас Илчлэл 20:1–3 -ыг уншаад, дараах асуултуудын хариултыг олохыг хүс.
-
Эдгээр шүлэгт хэн гинжлэгдсэн байна вэ?
-
Тэр хэр удаан гинжтэй байх вэ?
-
Цаашид тэр юуг хийж чадахгүй вэ?
Суралцагчдыг 1 Нифай 22:26 -г уншаад, Сатаны хүлэгдэх болсон нэг шалтгааныг олоход урь.
Ерөнхийлөгч Спэнсэр В.Кимбалл (1895–1985) “Сатан аль нэг гэр бүлд хүлэгдсэн үед, Сатан хэн нэгний амьдралд хүлэгдсэн бол, мянган жил нь тэр гэр бүлд, тэр амьдралд аль хэдийн эхэлсэн гэсэн үг юм” хэмээн заасан (The Teachings of Spencer W. Kimball, ed. Edward L. Kimball [1982],172).
Суралцагчдыг Алма 48:11–13, 17 -г уншаад, амьдралд нь үзүүлэх Сатаны нөлөөг аль хэдийн “хүлсэн” зөв шударга хүний жишээг олж харахад урь.
Тэднийг Их Эзэнд хандаж, өөрсдийн амьдрал дахь Сатаны нөлөөг хэрхэн багасгахаа тунгаан бодоход урь.