Суралцахуйгаа үнэлэх 12

Илчлэл 1–22

Энэ хичээл нь Шинэ Гэрээнээс судлах явцад тавьсан зорилго, олж авсан хувийн өсөлт хөгжлөө үнэлэхэд тань туслах зорилготой.

Суралцахуйгаа үнэлэхэд нь суралцагчдад туслах. Суралцахуйгаа үнэлэх боломжийг суралцагчдад олго. Ийн үйлдэх нэг арга зам бол тэднийг сурч мэдсэн зүйлс, итгэлийнхээ үр дүнд хэрхэн өсөж хөгжиж, хөгжиж дэвшсэнээ хуваалцахад урих явдал юм.

Суралцагчийн бэлтгэл: Суралцагчдыг Шинэ Гэрээг судалж дуусах үед энэ жил судалсан судрын хэсгүүдээсээ хамгийн их нөлөө үзүүлсэн 3-аас 5 хэсгийг жагсааж бичихэд урь.

Боломжит суралцах үйл ажиллагаа

Энэ хичээл нь Шинэ Гэрээний сургаалыг тайлбарлах чадвар, тавьсан зорилго, сайн мэдээний дагуу амьдрах хандлага, хүсэл, чадвар нь хэрхэн өөрчлөгдөж байгааг үнэлэхэд суралцагчдад туслах зорилготой. Хэрэв хичээл дээр өөр өөр үнэнийг онцолж авч үзсэн бол тэдгээр сургаалыг оролцуулахын тулд дараах үйл ажиллагааг тохируулан өөрчилж болно.

Шинэ Гэрээг судалж, зааснаар олж авсан өсөлт хөгжил, баяр баясгалангийн талаарх хувийн гэрчлэлээр хичээлээ эхлүүлэхийг бод.

Таны хувийн хөгжил дэвшил

Энэ хичээлээр та суралцахуйгаа болон Илчлэл 1–22-т заасан зарчмуудыг хэрхэн амьдралд хэрэгжүүлснээ үнэлэх боломжтой. Та мөн сүүлийн хэдэн сарын дотор Үйлсээс Илчлэл хүртэл номуудыг судлахдаа гаргасан өсөлт хөгжлөө эргэн харж, үнэлнэ. Дараах суралцах үйл ажиллагаанууд нь Тэнгэрлэг Эцэг, Есүс Христ хоёрыг гэх таны хайр хэрхэн нэмэгдсэн мөн Тэдэнтэй хэр адилхан болсноо олж харахад танд тусална.

Илчлэл ном

Суралцагчид өөрсдийн сурсан чухал гэж бодож буй үнэнээ хамтрагчтайгаа хуваалцаж эсвэл самбарт бичих замаар давтах боломжтой. Мөн суралцагчид өрөөн дундуур явж ангийнхаа өөр өөр гишүүнтэй хуваалцаж болно.

Илчлэл номыг судлахдаа тэмдэглэсэн аль нэгэн судар, судар дээрх тэмдэглэл эсвэл тэмдэглэлдээ бичсэн зүйлсээ цаг гарган эргэн хар.

• Илчлэл номыг судлах үед сурч мэдсэн эсвэл мэдэрсэн ямар зүйл таны санаанд орж ирж байна вэ?

• Та Илчлэл номоос өөрийн Аврагч Есүс Христийн талаар юу олж мэдсэн бэ?

• Суралцаж байхад тань ямар ямар үнэний дагуу үйлдэх сэдэл танд төрж байсан бэ?

Дараах үйл ажиллагаануудыг хэвлэж өгөөд эсвэл харуулаад, алин дээр нь бие даан эсвэл хамтрагчтайгаа ажиллахаа сонгох боломжийг суралцагчдад олгох вэ гэдгээ бод.

Зарим суралцагчийн хувьд шалгалт өгөх, шүтлэг бишрэл, гэрчлэлийнхээ талаарх хувийн мэдрэмжээ хуваалцах нь хэцүү байж болох юм. Суралцагчдад сайн дураараа хуваалцах боломжийг гаргаж өг. Гэхдээ тэдний сонгох эрхийг хүндэл.

Суралцагчдыг хийж дуусахад нь асуултуудад хариулах үеэр төрсөн зарим бодол санаа, мэдрэмжээ сайн дураараа хуваалцахад урь. Хувийн шүтлэг бишрэл, Есүс Христийн талаарх гэрчлэлийнхээ хүчийг гүнзгийрүүлэх тал дээр үргэлжлүүлэн ажиллахад суралцагчдыг уриал. Яагаад хувь хүний шүтлэг бишрэл, гэрчлэл бидний сүнслэг өсөлт хөгжилд чухал болох талаарх хувийн гэрчлэлээ хуваалцаж болно.

Үйл ажиллагаа А: Бурханыг чин сэтгэлээсээ шүтэж биширч, дагах нь

Илчлэл 4 – 5 -аас Иоханы Тэнгэрлэг Эцэг, Есүс Христ хоёрыг шүтэн биширч буй төрөл бүрийн биес болон араатан амьтдаар хүрээлүүлсэн Бурханы сэнтийг харсан үзэгдлийг та судалсан байх. Таныг Тэнгэрлэг Эцэг, Есүс Христ хоёрыг хэрхэн магтан дуулдгаа болон хувийн шүтлэг бишрэлээ сайжруулах арга замуудыг тунгаан бодоход урьсан.

• Тэнгэрлэг Эцэгийг эсвэл Есүс Христийг шүтэн бишрэх сэдлийг төрүүлсэн Тэдний талаарх юуг та саяхан олж мэдсэн эсвэл мэдэрсэн бэ?

• Та шүтлэг бишрэлээ сайжруулахын тулд ямар хүчин чармайлт гаргасан бэ? Жишээлбэл: Та залбирал, судар судлах, ариун ёслолоос хүртэх, Хүндэтгэлийн өдрийг ариунаар сахих, мацаг барих, ариун сүмд орох болон өөр бусад арга замаар шүтлэг бишрэлээ гүнзгийрүүлэхийг эрэлхийлсэн байж болох юм.

• Эдгээр хүчин чармайлт нь хэрхэн таны Тэнгэрлэг Эцэг, Есүс Христ хоёртой харилцах харилцаанд нөлөөлсөн бэ?

Үйл ажиллагаа Б: Христэд итгэх итгэлээр ёс бусыг эсэргүүцэж, ялан дийлэх

“Илчлэл 2–3, 2-р хэсэг” хичээлээр заасан дэлхийг ялан дийлэхэд гаргаж буй ахицаа үнэлэхийн тулд дараах үйл ажиллагааг тохируулан өөрчилж болно.

Илчлэл 12 – 13 -аас бид бүгдээрээ Сатаныг ялан дийлэхийн тулд Есүс Христэд итгэх итгэлээ хэрэгжүүлсэн болохыг сурч мэдсэн. Таныг эдгээр сургаалд итгэх итгэлийнхээ талаар болон энэхүү мөнх бус амьдралд дайсны эсрэг тулалдахдаа Есүс Христэд үргэлжлүүлэн итгэж найдахын тулд юу хийж чадахаа тунгаан бодоход таныг урьсан байж болох юм.

• Танд суралцсаныхаа дараа ямар үйлдэл хийх хэрэгтэй гэсэн санаа орж ирсэн бэ?

• Тэдгээр үйлдлийг хийхэд танд ямар саад бэрхшээл эсвэл сорилт тулгарсан бэ? Та ямар амжилт гаргасан бэ?

• Эдгээр алхмыг хийх нь хэрхэн танд Есүс Христэд ойртоход эсвэл Сатаныг ялан дийлэх хүчийг Түүнээс хүлээн авахад тусалсан бэ?

Шинэ Гэрээ: Үйлс–Илчлэл

Хэрэв суралцагчийн бэлтгэл үйл ажиллагааг ашигласан бол хэдэн суралцагчийг сонгосон судрын хэсгээ хуваалцахад мөн яагаад тэдгээрийг сонгосноо хуваалцахад урих талаар бодож үз. Тэдний хуваалцсан судрын эшлэлүүдийг самбарт бич. Энэ нь бусад хүнд дараах үйл ажиллагаан дээр тэдгээрийг ашиглах боломж олгоно.

Дараах зураг болон догол мөрүүд захидал бичих үйл ажиллагааг танилцуулахад тусалж болох юм.

Есүс Христийн талаарх Паулын гэрчлэлийг сонссоныхоо дараа Агрип хаан “Чи ч намайг төдхөн ятгаж Христ итгэгч болгох нь ээ” хэмээн хэлснийг та санаж байгаа байх. Паул “Зөвхөн та ч биш, харин өнөөдөр энд намайг сонсогсод бүгд энэхүү хүлээснээс бусдаар надтай адил болоосой гэж би Бурханд залбирмаар байна” ( Үйлс 26:28–29) хэмээн зоригтойгоор хариулжээ.

Паул болон бусад төлөөлөгч сургаал, гэрчлэлээрээ дамжуулан бусдыг Христэд авчрах гүн хүсэл эрмэлзэлтэй байв. Тэдний олонх нь Христийн төлөө амьдралаа зориулж, амиа өгсөн бөгөөд өөрсдийн сургаалыг Үйлс номд болон захидлуудад үлдээсэн юм. Таныг тэдгээр гэрчлэлийг зүрх сэтгэлдээ хүлээн авч, сургаалыг нь амьдралдаа хэрэгжүүлсэн байх гэж найдаж байна. Одоо харин зааж, гэрчлэх таны ээлж ирлээ.

Өөрийн сонгосон хүнд хаягласан захидал бич. Жишээлбэл: Та үүнийг Шинэ Гэрээг судлахаас нэг жилийн өмнөх өөртөө, яагаад семинарт явдгийг тань ойлгодоггүй найздаа эсвэл Аврагчийн талаарх таны гэрчлэл тус болж болох гэр бүлийн гишүүндээ хаяглаж болно.

Захидлаа хэнд хаяглахаар шийдсэнээс тань үл хамааран Үйлсээс Илчлэл хүртэлх номуудын нэг эсвэл хэд хэдэн шүлгийг, эдгээр шүлэг дээрх үнэнүүд таны амьдралыг хэрхэн адисалсан талаар багтааж болно. Дараах асуултууд танд чиглэл өгөх ч юу бичихээ та өөрөө сонгох боломжтой.

• Таны сурч мэдсэн зүйлс Христэд ирж, Түүн дотор амар амгаланг олоход тань хэрхэн тусалсан бэ?

• Таны сурч мэдсэн зүйлс Есүс Христэд итгэх итгэлээр ёс бус байдлыг эсэргүүцэж эсвэл ялан дийлэхэд тань хэрхэн тусалсан бэ?

• Мөн тэдгээр нь асуултад хариулж эсвэл санаа зовоосон зүйл эсвэл асуудлыг шийдвэрлэхэд тань хэрхэн тусалсан бэ?

• Та өөрийн таньдаг хэн нэгнийг Шинэ Гэрээг судалж, Христ рүү ирэхэд урамшуулахын тулд юуг мэдээсэй гэж хүсэж байна вэ?

Суралцагчдыг бичиж дуусахад, захидлаа ангийнхандаа сайн дураараа уншиж өгөхөд урь. Тэд захидалдаа талархал, гэрчлэлээ хэрхэн илэрхийлж байгаад анхаарлаа хандуул. Бичсэн болон хуваалцсан зүйлсийнх нь төлөө суралцагчдад таларх. Тэднийг захидлаа ангийнхнаас өөр хүнтэй хуваалцаад, амьдралынхаа туршид бошиглогчдын үгсийг үргэлжлүүлэн судлахад урьж болно.

Аврагчийн талаар болон судрууд дээрх Түүний үг, сонгосон үйлчлэгчдээрээ дамжуулан хийдэг ажлынх нь талаарх гэрчлэлээ хуваалц.