វិវរណៈ ៥

« គ្រប់គ្នាក៏បន្លឺសំឡេងថាកូនចៀម »

តើការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទមានន័យយ៉ាងដូចម្ដេច ? ហេតុអ្វីបានជាអ្នកគិតថា យើងថ្វាយបង្គំទ្រង់ទាំងពីរព្រះអង្គ ? យ៉ូហានបានឃើញបល្ល័ង្ករបស់ព្រះ និងសត្វដែលមានសិរីល្អជាច្រើនកំពុងសរសើរ និងថ្វាយបង្គំទ្រង់ ។ មេរៀននេះអាចជួយអ្នកឲ្យបង្កើនបំណងប្រាថ្នារបស់អ្នកក្នុងការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទដោយសេចក្ដីស្រឡាញ់ និងភាពស្មោះត្រង់បន្ថែមទៀត ។

ការពង្រឹងទំនាក់ទំនងរបស់យើងជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។ សិស្សដែលស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទ ហើយដឹងអំពីសេចក្តីស្រឡាញ់របស់ទ្រង់ទាំងទ្វេចំពោះពួកគេមានអារម្មណ៍ថា មានបំណងប្រាថ្នាពិតប្រាកដដើម្បីនៅជិតទ្រង់ទាំងទ្វេ ។ សូមរំឭកសិស្សថា ថ្នាក់សិក្ខាសាលាអាចជួយពួកគេឲ្យទទួលអារម្មណ៍នៃសេចក្ដីស្រឡាញ់របស់ព្រះចំពោះពួកគេបាន ។

ការរៀបចំរបស់សិស្ស ៖ សូមឲ្យសិស្សនិយាយជាមួយសមាជិកគ្រួសារ ឬអ្នកដឹកនាំសាសនាចក្រអំពីអត្ថន័យនៃការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ ។

សកម្មភាពរៀនសូត្រដែលអាចមាន

បល្ល័ង្ករបស់ព្រះ

សូមពិចារណាចាប់ផ្តើមថ្នាក់ដោយការច្រៀងទំនុកតម្កើងមួយបទដែលសរសើរដល់ព្រះ ដូចជាបទ « សរសើរដល់ព្រះដ៏ខ្ពស់ » ឬ « All Creatures of Our God and King » ( ទំនុកតម្កើងល.រ. ២៧, ៦២ ) ។ សូមឲ្យសិស្សកត់សម្គាល់ពីអាកប្បកិរិយានៃការថ្វាយបង្គំនៅក្នុងទំនុកតម្កើង ។

ជម្រើសមួយទៀតគឺឲ្យសិស្សគិតអំពីនរណាម្នាក់ដែលពួកគេស្រឡាញ់ និងរបៀបដែលពួកគេបង្ហាញមនុស្សនោះថាពួកគេស្រឡាញ់គាត់ ។ សូមអញ្ជើញសិស្សឲ្យពិចារណាអំពីរបៀបដែលពួកគេបង្ហាញសេចក្ដីស្រឡាញ់ចំពោះព្រះ ។

សូមឲ្យសិស្សសរសេរចម្លើយរបស់ពួកគេនៅលើក្ដារខៀនចំពោះសំណួរដូចតទៅ ។

• តើអ្នកដឹងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ដែលជំរុញចិត្តអ្នកឲ្យមានបំណងប្រាថ្នាពិតប្រាកដក្នុងការថ្វាយបង្គំទ្រង់ទាំងទ្វេ ?

នៅពេលយើងថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ នោះយើងថ្វាយដល់ទ្រង់នូវសេចក្តីស្រឡាញ់ ការគោរព និងការបម្រើរបស់យើង ( សូមមើល សេចក្ដីណែនាំដល់បទគម្ពីរទាំងឡាយ « ថ្វាយបង្គំ, ការថ្វាយបង្គំ » នៅលើគេហទំព័រ topics.ChurchofJesusChrist.org ) ។ ការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទអាចមានឥទ្ធិពលយ៉ាងខ្លាំងលើជីវិតរបស់យើង ហើយជួយយើងឲ្យមានអារម្មណ៍ជិតស្និទ្ធនឹងទ្រង់ ។

• តើអ្នកមានឱកាសណាខ្លះដើម្បីថ្វាយបង្គំព្រះវរបិតា និងព្រះរាជបុត្រា ?

សូមចំណាយពេលមួយភ្លែតដើម្បីគិតថា តើអ្នកបានគោរពប្រណិប័តន៍ព្រះវរបិតាសួគ៌ និងព្រះយេស៊ូវគ្រីស្ទដោយស្មោះស្ម័គ្រញឹកញាប់ប៉ុណ្ណាដែរ ។ សូមសញ្ជឹងគិតអំពីរបៀបដែលជីវិតរបស់អ្នកនឹងផ្លាស់ប្តូរ ប្រសិនបើអ្នកថ្វាយបង្គំទ្រង់ទាំងពីរព្រះអង្គញឹកញាប់ និងប្រកបដោយអត្ថន័យ ។ សូមស្វែងរកឥទ្ធិពលនៃព្រះវិញ្ញាណបរិសុទ្ធ នៅពេលអ្នកសិក្សា វិវរណៈ ៥ ដើម្បីដឹងពីរបៀបដែលអ្នកអាចថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទកាន់តែស្មោះស្ម័គ្រជាងនេះទៅទៀត ។

គ្រប់គ្នាក៏បន្លឺសំឡេងថាកូនចៀម

នៅក្នុងការនិមិត្តរបស់លោក យ៉ូហានបានឃើញបល្ល័ង្ករបស់ព្រះនៅក្នុងនគរសេឡេស្ទាល ។ នៅជុំវិញបល្ល័ង្កមានសភាវៈដែលមានជីវិតដ៏រុងរឿង និងសត្វសាហាវជាច្រើនកំពុងសរសើរ និងថ្វាយបង្គំព្រះ ( សូមមើល វិវរណៈ ៤:១–១១ ) ។ លោកបានឃើញព្រះវរបិតាសួគ៌គង់លើបល្ល័ង្ករបស់ទ្រង់ ដោយកាន់ក្រាំងដែលមានបិទត្រាទាំងប្រាំពីរ ( សូមមើល វិវរណៈ ៥:១ ) ។ ក្រាំងមាននូវព្រះហឫទ័យរបស់ព្រះ សេចក្ដីអាថ៌កំបាំង និងកិច្ចការទាំងឡាយក្នុងអំឡុងពេល ៧,០០០ ឆ្នាំនៃការរស់នៅខាងសាច់ឈាមលើផែនដីនេះ ( សូមមើល គោលលទ្ធិ និង សេចក្តីសញ្ញា ៧៧:៦–៧ ) ។

សូមអាន វិវរណៈ ៥:២–៤ ដោយរកមើលប្រតិកម្មរបស់យ៉ូហាន ។

• តើអ្នកបានសម្គាល់ឃើញអ្វីខ្លះ ?

• ដោយសារក្រាំងដែលមានត្រាតំណាងឲ្យប្រវត្តិសាស្ត្រខាងសាច់ឈាមរបស់ផែនដី យ៉ូហានប្រហែលជាបារម្ភថា បើគ្មានអ្នកណាស័ក្តិសមនឹងបើកវាទេ នោះគោលបំណងរបស់ព្រះក្នុងការបង្កើតផែនដីនឹងមិនសម្រេចបានឡើយ ។ តើនឹងមានអ្វីអាចកើតឡើងចំពោះបុត្រាបុត្រីរបស់ព្រះវរបិតាសួគ៌ ប្រសិនបើផែនការរបស់ទ្រង់សម្រាប់សេចក្ដីសង្គ្រោះរបស់ពួកគេមិនត្រូវបានអនុវត្តនោះ ?

សូមអាន វិវរណៈ ៥:៥–៧ ដោយរកមើលមូលហេតុដែលយ៉ូហានមិនចាំបាច់ត្រូវយំនោះទេ ។ សូមកំណត់ចំណាំថា នៅក្នុងការបកប្រែដោយ យ៉ូសែប ស្ម៊ីធ សម្រាប់ ខទី ៦ លេខប្រាំពីរត្រូវបានប្ដូរជាលេខដប់ពីរវិញ ( នៅក្នុង វិវរណៈ ៥:៦ , ) ។

សិស្សអាចត្រូវបានសុំឲ្យចែកចាយអារម្មណ៍របស់ពួកគេចំពោះព្រះអង្គសង្គ្រោះ ហើយហេតុអ្វីបានជាពួកគេអរព្រះគុណចំពោះទ្រង់ ។ នៅពេលសិស្សសិក្សា សូមផ្តល់ឱកាសឲ្យពួកគេចែកចាយនូវអ្វីដែលពួកគេបានរកឃើញ និងសួរសំណួរ ។ សូមជួយពួកគេឲ្យរកឃើញចម្លើយនៅក្នុងបទគម្ពីរ ។ សូមពិចារណាពិភាក្សាអំពីអ្វីដែលពួកគេបានរៀនអំពីព្រះអង្គសង្គ្រោះ អំពីព្រះនាមទ្រង់ និងរបៀបដែលទ្រង់ត្រូវបានពិពណ៌នា ។

ការយល់ដឹងបន្ថែមសម្រាប់ វិវរណៈ ៥:៥–៦ មាននៅក្នុងផ្នែក « វិចារណកថា និង ព័ត៌មានសាច់រឿង » ។

សូមអាន វិវរណៈ ៥:៨–១៤ ដោយរកមើលពីរបៀបដែលសភាវៈមានជីវិតដ៏រុងរឿងបានឆ្លើយតប នៅពេលព្រះយេស៊ូវគ្រីស្ទអាចយកក្រាំងពីព្រះហស្ដរបស់ព្រះវរបិតាសួគ៌បាន ។ អ្នកក៏អាចអានពីរបៀបដែល យ៉ូសែប ស៊្មីធ បានពិពណ៌នាអំពីសភាវៈដែលមានជីវិតនៅជុំវិញបល្ល័ង្ករបស់ព្រះនៅក្នុង គោលលទ្ធិ និង សេចក្តីសញ្ញា ៧៦:២០–២១ បានផងដែរ ។

• តើអ្នកគិតថា ហេតុអ្វីបានជាសភាវៈដែលមានជីវិតដ៏រុងរឿងបានឆ្លើយតបតាមរបៀបនេះទៅវិញ ?

• សូមស្រមៃថា អ្នកបាននៅទីនោះដែរ ។ តើអ្នកគិតថា អ្នកនឹងមានអារម្មណ៍យ៉ាងណា ? តើអ្នកនឹងធ្វើអ្វី ?

• តើយើងអាចរៀនអ្វីខ្លះ ពីរបៀបដែលសភាវៈមានជីវិតដ៏រុងរឿងទាំងនេះបានថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ ?

សេចក្តីពិតមួយដែលយើងរៀនគឺថា នៅពេលយើងទទួលស្គាល់ និងមានអំណរគុណចំពោះព្រះវរបិតាសួគ៌ និងព្រះយេស៊ូវគ្រីស្ទ នោះយើងចង់ថ្វាយបង្គំ និងសរសើរទ្រង់ទាំងពីរព្រះអង្គ ។

ការថ្វាយបង្គំ

សូមពិចារណាបង្ហាញសេចក្ដីថ្លែងការណ៍ខាងក្រោមនេះ ។

ប៊ីស្សព ឌីន អិម ដេវីស ( ឆ្នាំ ១៩៥១–២០២១ ) នៃគណៈប្រធានប៊ីស្សពបានបង្រៀនអំពីការថ្វាយបង្គំ ។ អ្នកអាចអានសេចក្ដីថ្លែងការណ៍ខាងក្រោម ឬមើលវីដេអូ « The Blessings of Worship » ( ចាប់ពីលេខកូដម៉ោង ៣:៣៤ ដល់ ៤:៤៥ និង ៨:៥៤ ដល់ ១១:១៤ ) នៅលើគេហទំព័រ ChurchofJesusChrist.org ។

ពេលយើងថ្វាយបង្គំព្រះ យើងទៅរកទ្រង់ដោយសេចក្ដីស្រឡាញ់ដ៏គាវរភាព ចិត្តរាបសា និងភាពអស្ចារ្យ ។ យើងទទួលស្គាល់ ហើយទទួលយកទ្រង់ជាស្ដេច ជាព្រះបង្កបង្កើតសកលលោក ជាព្រះវរបិតារបស់យើង ។

យើងគោរព ហើយមានគារវភាពចំពោះទ្រង់ ។

យើងបន្ទាបខ្លួនចំពោះទ្រង់ ។

យើងលើកដួងចិត្តរបស់យើងក្នុងការអធិស្ឋានដ៏ខ្លាំងក្លា ស្រឡាញ់បន្ទូលទ្រង់ អររីករាយក្នុងព្រះគុណទ្រង់ ហើយតាំងចិត្តដើរតាមទ្រង់ដោយស្មោះស្ម័គ្រ ។ …

កាលយើងថ្វាយបង្គំ ចិត្តយើងសរសើរតម្កើងព្រះទាំងថ្ងៃទាំងយប់ ។

យើងគោរពទ្រង់ជាបន្តបន្ទាប់—នៅក្នុងសាលាប្រជុំ ផ្ទះ ព្រះវិហារបរិសុទ្ធ និងរាល់កិច្ចការរបស់យើង ។

នៅពេលយើងថ្វាយបង្គំ យើងបើកដួងចិត្តរបស់យើងចំពោះអំណាចនៃការព្យាបាលនៃដង្វាយធួនរបស់ព្រះយេស៊ូវគ្រីស្ទ ។

ជីវិតយើងក្លាយជាភស្តុតាង និងការស្តែងឲ្យឃើញនៃការថ្វាយបង្គំរបស់យើង ។

( ឌីន អិម ដេវីស « The Blessings of Worship » Ensign ឬ Liahonaខែ វិច្ឆិកា ឆ្នាំ ២០១៦ ទំព័រ ៩៤–៩៥ )

• តើអ្នកបានរៀនអ្វីខ្លះអំពីការថ្វាយបង្គំចេញពីសេចក្ដីថ្លែងការណ៍នេះ ?

ដើម្បីវាយតម្លៃការយល់ដឹងរបស់សិស្សអំពីការថ្វាយបង្គំ សូមឲ្យពួកគេពន្យល់ពីគោលគំនិតនៃការថ្វាយបង្គំព្រះដល់មិត្តរួមថ្នាក់ ។ សូមស្តាប់ការឆ្លើយតបរបស់ពួកគេដោយប្រុងប្រយ័ត្ន ហើយផ្តល់ការយល់ដឹងបន្ថែមតាមតម្រូវការ ។

• តើអ្នកគិតថា ការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទដោយស្មោះស្ម័គ្រនឹងប្រទានពរដល់ជីវិតរបស់អ្នកយ៉ាងដូចម្ដេច ?

• តើនៅពេលណាដែលអ្នកមានអារម្មណ៍ជិតស្និទ្ធនឹងព្រះវរបិតាសួគ៌ ឬព្រះយេស៊ូវគ្រីស្ទ តាមរយៈការគោរពប្រណិប័តន៍ដោយស្មោះ ?

• តើការថ្វាយបង្គំរបស់អ្នកអាចបង្ហាញឲ្យឃើញកាន់តែច្បាស់ពីអារម្មណ៍ដែលអ្នកមានចំពោះព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?

• សូមជ្រើសរើសសកម្មភាពមួយ ឬច្រើនខាងក្រោមនេះ ហើយពិចារណាពីរបៀបដែលការថ្វាយបង្គំដោយស្មោះអាចជួយដល់ ការអធិស្ឋាន ការសិក្សាព្រះគម្ពីរ ការទទួលទានសាក្រាម៉ង់ ការគោរពថ្ងៃឈប់សម្រាក ការតមអាហារ ការចូលរួមព្រះវិហារបរិសុទ្ធ ឲ្យកាន់តែមានអត្ថន័យ ។

• តើអ្នកបានទទួលអារម្មណ៍អ្វីខ្លះដើម្បីកែលម្អ ឬផ្លាស់ប្ដូររបៀបដែលអ្នកថ្វាយបង្គំ ?

វាអាចសមរម្យក្នុងការចែកចាយបទពិសោធន៍ផ្ទាល់ខ្លួននៃការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ ។

វិចារណកថា និង ព័ត៌មានសាច់រឿង

សកម្មភាពរៀនសូត្របន្ថែម

ការថ្វាយបង្គំជារៀងរាល់ថ្ងៃ

ដើម្បីជួយសិស្សឲ្យឃើញឧទាហរណ៍នៃការថ្វាយបង្គំក្នុងជីវិតប្រចាំថ្ងៃ សូមពិចារណាមើលវីដេអូ « This Is Church » ( ១:១០ ) ដែលមាននៅលើគេហទំព័រ ChurchofJesusChrist.org ។

ឧទាហរណ៍នៃការថ្វាយបង្គំនៅក្នុងព្រះគម្ពីរមរមន

សិស្សអាចសិក្សាគំរូខាងក្រោមពីព្រះគម្ពីរមរមនជាថ្នាក់ ឬជាក្រុមតូចៗ ហើយរាយការណ៍ពីអ្វីដែលពួកគេបានរៀនអំពីការថ្វាយបង្គំព្រះ ។

នីហ្វៃទី១ ១:៥–៨

យ៉ាកុប ៤:៤–៦

ម៉ូសាយ ១៨:១៧–៣០

អាលម៉ា ៤៥:១

នីហ្វៃទី៣ ១១:១០–១៩

សូមស្រមៃថាអ្នកស្ថិតនៅក្នុងវត្តមានរបស់ព្រះ

ដើម្បីជួយសិស្សឲ្យស្រមៃថាមាននៅក្នុងវត្តមានរបស់ព្រះ ពួកគេអាចសិក្សា អាលម៉ា ៣៦:២២ ដើម្បីមើលថា តើអាលម៉ាមានអារម្មណ៍យ៉ាងណានៅពេលលោកស្រមៃឃើញព្រះ ។ សិស្សអាចសញ្ជឹងគិតពីអារម្មណ៍របស់ពួកគេនៅក្នុងវត្តមាននៃព្រះ ហើយប្រៀបធៀបអារម្មណ៍របស់ពួកគេទៅនឹងអាលម៉ា ។ សិស្សក៏អាចសិក្សាបទពិសោធន៍របស់អាលម៉ានៅក្នុង ខទី ១៧–២១ ផងដែរ ។ តើអាលម៉ាបានរកឃើញអ្វីខ្លះអំពីព្រះយេស៊ូវគ្រីស្ទ ? តើការរកឃើញរបស់លោកស្រដៀងនឹងអ្វីដែលយ៉ូហានបានរៀនអំពីព្រះយេស៊ូវគ្រីស្ទនៅក្នុង វិវរណៈ ៥:២–៩ យ៉ាងដូចម្ដេច ?

ការបង្កើតរបស់សិស្ស

បទចម្រៀងគឺជាលក្ខណៈមួយនៃការថ្វាយបង្គំ ( សូមមើល វិវរណៈ ៥:៩ ) ។ សិស្សខ្លះអាចនឹងរីករាយនឹងការសរសេរទំនុកតម្កើងដែលសរសើរ និងថ្វាយបង្គំព្រះអម្ចាស់ ។ ជម្រើសមួយទៀតគឺអញ្ជើញឲ្យសិស្សសរសេរកំណាព្យ ឬគូររូបភាព ។