វិវរណៈ ១
« វិវរណៈនៃព្រះយេស៊ូវគ្រីស្ទ »
ដោយសារការប្រើនិមិត្តសញ្ញារបស់វា ជួនកាលគម្ពីរវិវរណៈអាចហាក់ដូចជាចម្លែក ឬច្របូកច្របល់ ។ វាជាការពិតដែលគម្ពីរវិវរណៈពោរពេញទៅដោយនិមិត្តសញ្ញាដែលធ្វើឲ្យផ្នែកខ្លះពិបាកយល់ ។ ទោះជាយ៉ាងណាក៏ដោយ សារលិខិតជាច្រើននៅក្នុងគម្ពីរវិវរណៈ គឺជាសេចក្តីពិតដ៏សាមញ្ញអំពីរឿងដូចជា តួនាទីរបស់ព្រះយេស៊ូវគ្រីស្ទ ព្រឹត្តិការណ៍ជុំវិញការយាងមកជាលើកទីពីរ និងជ័យជម្នះចុងក្រោយនៃសេចក្តីល្អលើអំពើអាក្រក់ ។ គម្ពីរនេះត្រូវបានសរសេរដោយសាវកយ៉ូហាន ហើយត្រូវបានផ្ញើទៅកាន់ក្រុមជំនុំចំនួនប្រាំពីរនៃសាសនាចក្រនៅអាស៊ីតូច ( ប្រទេសតួកគីសម័យបច្ចុប្បន្ន ) ។ ដូចមនុស្សជាច្រើនសព្វថ្ងៃនេះដែរ អ្នកដើរតាមព្រះយេស៊ូវគ្រីស្ទដ៏ស្មោះត្រង់ទាំងនេះបានរងទុក្ខដោយសារជំនឿរបស់ពួកគេនៅលើព្រះយេស៊ូវគ្រីស្ទ ហើយត្រូវបានលួងលោមដោយសារលិខិត និងរូបភាពដែលបានសរសេរដោយយ៉ូហាន ។ មេរៀននេះមានគោលបំណងជួយអ្នកឲ្យយល់អំពីនិមិត្តសញ្ញាមួយចំនួននៅក្នុងគម្ពីរវិវរណៈ និងអ្វីដែលវាអាចបង្រៀនអ្នកអំពីព្រះយេស៊ូវគ្រីស្ទ ។
ការយល់ដឹងអំពីនិមិត្តសញ្ញា ។ និមិត្តសញ្ញាត្រូវបានប្រើជាញឹកញាប់នៅក្នុងព្រះគម្ពីរដើម្បីបង្រៀនសេចក្ដីពិតខាងវិញ្ញាណដ៏មានអត្ថន័យ ។ សូមឆ្លៀតពេលដើម្បីជួយសិស្សឲ្យអនុវត្តវិធីសាស្រ្តផ្សេងៗក្នុងការបកស្រាយនិមិត្តសញ្ញាទាំងនេះ ។ ការធ្វើដូច្នេះនឹងជួយពួកគេឲ្យយល់កាន់តែច្បាស់អំពីគម្ពីរវិវរណៈទាំងមូល ។
ការរៀបចំរបស់សិស្ស ៖ សូមឲ្យសិស្សអាន « វិវរណៈរបស់យ៉ូហាន » នៅក្នុងសេចក្ដីណែនាំដល់បទគម្ពីរទាំងឡាយ ដែលមាននៅលើគេហទំព័រ scriptures.ChurchofJesusChrist.org ហើយមករៀនដោយបានត្រៀមខ្លួនរួចជាស្រេចដើម្បីចែកចាយនូវអ្វីដែលពួកគេចាប់អារម្មណ៍ចង់រៀន និងមូលហេតុដែលធ្វើឲ្យគេចាប់អារម្មណ៍ ។
សកម្មភាពរៀនសូត្រដែលអាចមាន
ការនិមិត្តរបស់យ៉ូហាន
សូមបង្ហាញរូបភាពខាងក្រោម ហើយឲ្យសិស្សពិភាក្សាអំពីអ្វីដែលពួកគេឃើញថាកំពុងកើតឡើងនៅក្នុងរូបភាពនោះ និងសំណួរណាមួយដែលពួកគេមានអំពីវា ។
ជាជម្រើស សូមពិចារណាចាប់ផ្តើមមេរៀននេះដូចតទៅនេះ ៖ មុនពេលចូលរៀន សូមដាក់វត្ថុមួយនៅលើតុ ឬកៅអីនៅខាងមុខថ្នាក់ ។ សូមគ្របវត្ថុនោះ ដើម្បីកុំឲ្យសិស្សដឹងថាវាគឺជាអ្វី ។ នៅពេលថ្នាក់ចាប់ផ្ដើម សូមអញ្ជើញសិស្សឲ្យទស្សន៍ទាយថាវត្ថុនោះគឺជាអ្វី ។ បន្ទាប់ពីសិស្សបីបួននាក់បានទស្សន៍ទាយរួច សូមឲ្យសិស្សម្នាក់ឡើងមកលើក្ដារខៀន ហើយឲ្យគាត់បើកមើលវត្ថុនោះមើលតែម្នាក់ឯងបានហើយ ។ សូមឲ្យសិស្សនេះពិពណ៌នាអំពីវត្ថុនោះទៅកាន់សិស្សក្នុងថ្នាក់ដោយមិននិយាយថាវាជាអ្វីនោះទេ ។ សូមឲ្យសិស្សទៅកាន់កន្លែងអង្គុយវិញ ។ សូមពិចារណាសួរសំណួរខាងក្រោមនេះ ៖
តើសិស្សដែលបានពិពណ៌នាអំពីវត្ថុនោះអាចតំណាងឲ្យតួនាទីមួយរបស់ពួកព្យាការី និងពួកសាវកបានយ៉ាងដូចម្ដេច ?
ដោយសារវាជា « វិវរណៈនៃព្រះយេស៊ូវគ្រីស្ទ » ( វិវរណៈ ១:១ ) ពេលខ្លះគម្ពីរនេះត្រូវបានគេហៅថា « អ័ប៉ូកាលិព្ស » ដែលចេញពីភាសាក្រិកមានន័យថា « បើកសម្ដែង ឬបើកឲ្យឃើញ » ពីអ្វីដែលលាក់កំបាំង ( សូមមើល សេចក្ដីណែនាំដល់បទគម្ពីរទាំងឡាយ « វិវរណៈរបស់យ៉ូហាន » ) ។
គម្ពីរនេះគឺជាការបើកសម្តែងមួយរបស់ព្រះអម្ចាស់ព្រះយេស៊ូវគ្រីស្ទ និងសិទ្ធិអំណាច ព្រះចេស្តា និងតួនាទីដ៏ឧត្តមរបស់ទ្រង់នៅក្នុងផែនការនៃសេចក្តីសង្គ្រោះរបស់ព្រះវរបិតា ។ គម្ពីរនេះក៏បើកសម្តែងជាច្រើនផងដែរអំពីព័ត៌មានសំខាន់ៗនៃព្រឹត្តិការណ៍នានារហូតដល់ការយាងមកជាលើកទីពីរ និងសហស្សវត្សរ៍ ។
សាវកយ៉ូហាន ដែលជាសិស្សសំណព្វរបស់ព្រះយេស៊ូវគ្រីស្ទ គឺជាអ្នកសរសេរគម្ពីរនេះ ។ យ៉ូហានបានសរសេរគម្ពីរចេញពីកោះប៉ាតម៉ុស នៅគ្រាដែលពួកគ្រីស្ទានកំពុងជួបប្រទះនឹងការបង្រៀនខុសឆ្គង ភាពព្រងើយកន្តើយ និងការបៀតបៀនដ៏ខ្លាំងក្លា ( សូមមើល វិវរណៈ ១:៩ ; ២:៤, ១០, ១៤–១៥ ; ៣:១៦ ; ៦:៩ ) ។
ព្រះគម្ពីរមរមនបញ្ជាក់ថា យ៉ូហានត្រូវបានតែងតាំងពីមុនកំណើតលោកិយមកម៉្លេះ ដើម្បីសរសេរការណ៍នានាដែលបានកត់ត្រានៅក្នុងគម្ពីរវិវរណៈ ( សូមមើល នីហ្វៃទី១ ១៤:១៨–២៧ ; អេធើរ ៤:១៦ ) ។
នេះអាចជាពេលវេលាដ៏ល្អមួយដើម្បីឲ្យសិស្សចែកចាយគំនិតរបស់ពួកគេពីសកម្មភាពរៀបចំរបស់សិស្ស ។
សូមអាន វិវរណៈ ១:១–៣ ហើយកត់ចំណាំអ្វីដែលយ៉ូហានបានបង្រៀនអំពីវិវរណៈដែលគាត់បានទទួល ។ ( សូមកត់ចំណាំថា ការបកប្រែដោយយ៉ូសែប ស្ម៊ីធ ចែងថា « មានពរហើយ អ្នកណា ដែលមើល និងអស់អ្នកណាដែលស្ដាប់ ហើយយល់ នូវពាក្យទាំងឡាយនៃការព្យាករណ៍នេះ » ) ។
-
តើមានអ្វីដែលអ្នកចាប់អារម្មណ៍នៅក្នុងខគម្ពីរទាំងនេះ ?
-
តើយ៉ូហាននិយាយថាមនុស្សម្នាក់ត្រូវធ្វើអ្វីខ្លះ ដើម្បីទទួលបានពរជ័យតាមរយៈខ្លឹមសារនៃគម្ពីរវិវរណៈ ?
សូមអានការបកប្រែដោយយ៉ូសែប ស្មីធ នៃ វិវរណៈ ១:៤–៨ ហើយរកមើលអ្វីដែល យ៉ូហាន ចង់ឲ្យពួកបរិសុទ្ធដឹង និងទទួលអារម្មណ៏អំពីព្រះយេស៊ូវគ្រីស្ទ ។
សូមមើលផ្នែក « វិចារណកថា និង ព័ត៌មានសាច់រឿង » ដើម្បីយល់ដឹងអំពី « នគរ និងពួកសង្ឃ » និង « អាលផា និងជាអូមេកា » ។
-
តើអ្នកបានរកឃើញអ្វីខ្លះនៅក្នុង វិវរណៈ ១:៤–៨ ដែលយ៉ូហានចង់ឲ្យពួកបរិសុទ្ធស្គាល់ និងទទួលអារម្មណ៍អំពីព្រះយេស៊ូវគ្រីស្ទ ?
-
តើសេចក្ដីពិតណាមួយអំពីព្រះយេស៊ូវគ្រីស្ទនឹងមានប្រយោជន៍ដល់ពួកបរិសុទ្ធ ដែលកំពុងរងការបៀតបៀនទាំងនេះ ?
សូមពិចារណាសរសេរសេចក្ដីពិតដែលសិស្សរកឃើញដាក់នៅលើក្ដារខៀន ។
-
តើសេចក្ដីពិតទាំងនេះអាចមានប្រយោជន៍យ៉ាងណាចំពោះអ្នក នៅពេលអ្នកប្រឈមមុខនឹងឧបសគ្គក្នុងជីវិត ?
និមិត្តសញ្ញានៃការនិមិត្តរបស់យ៉ូហាន
នៅក្នុងការនិមិត្តរបស់លោក យ៉ូហានបានឮព្រះសូរសៀងរបស់ព្រះគ្រីស្ទ ( សូមមើល វិវរណៈ ១:១០–១១ ) ។ ពេលលោកបែរទៅរកព្រះសូរសៀងរបស់ព្រះអង្គសង្គ្រោះ លោកបានឃើញរូបភាពជានិមិត្តសញ្ញា ដែលស្រដៀងនឹងរូបភាពដែលបានបង្ហាញនៅដើមមេរៀននេះដែរ ។
ពេញមួយព្រះគម្ពីរ ព្យាការីបានប្រើនិមិត្តសញ្ញាដើម្បីពង្រឹងការយល់ដឹងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ និមិត្តសញ្ញាអាចជាឧបករណ៍បង្រៀនដ៏មានប្រសិទ្ធភាព ព្រោះមនុស្សដែលមានភាសា វប្បធម៌ និងជំនាន់ផ្សេងៗគ្នាក៏អាចយល់បានដែរ ។ និមិត្តសញ្ញាក៏អាចទំនាក់ទំនងសារផ្សេងៗជាច្រើនផងដែរ ។ លើសពីនេះ និមិត្តសញ្ញាអាចបង្កើនការយល់ដឹងដោយការបំផុសគំនិត និងអារម្មណ៍ដែលពិបាកប្រាស្រ័យទាក់ទងតាមរយៈពាក្យសម្ដីតែមួយមុខ ។
-
តើអ្នកមានទំនុកចិត្តលើសមត្ថភាពរបស់អ្នកប៉ុណ្ណាដែរ ក្នុងការយល់ពីអត្ថន័យនៃនិមិត្តសញ្ញានៅក្នុងព្រះគម្ពីរ ?
-
សូមគិតអំពីនិមិត្តសញ្ញាមួយចំនួនដែលបានប្រើនៅក្នុងព្រះគម្ពីរសញ្ញាថ្មីដើម្បីពិពណ៌នាអំពីព្រះយេស៊ូវគ្រីស្ទ ( ដូចជាកូនចៀម នំប៉័ង ទឹក ថ្ម និងអ្នកគង្វាល ) ។ តើនិមិត្តសញ្ញាទាំងនេះជួយអ្នកឲ្យយល់កាន់តែច្បាស់អំពីទ្រង់ដោយរបៀបណា ?
សូមអាន វិវរណៈ ១:១២–១៨ ហើយរកមើលព័ត៌មានលម្អិត និងនិមិត្តសញ្ញាបន្ថែមទៀតនៅក្នុងការនិមិត្តរបស់យ៉ូហានអំពីព្រះយេស៊ូវគ្រីស្ទ ។
នៅក្នុងតារាងខាងក្រោមនេះ អ្នកនឹងឃើញនិមិត្តសញ្ញាមួយចំនួនដែលបានលើកឡើងក្នុងការនិមិត្តរបស់យ៉ូហាន ។ របៀបដ៏មានតម្លៃមួយដើម្បីយល់ពីនិមិត្តសញ្ញានៅក្នុងបទគម្ពីរគឺការប្រើបទគម្ពីរផ្សេងទៀត ។
សូមពិចារណាចម្លងសំណៅចែកនេះសម្រាប់សិស្សម្នាក់ៗ ។ សូមឲ្យពួកគេអានព្រះគម្ពីរ ហើយសរសេរអត្ថន័យដែលអាចជារបស់និមិត្តសញ្ញាទាំងនោះ ។ វាអាចមានប្រយោជន៍សម្រាប់សិស្សក្នុងការធ្វើការលើសំណៅចែកនេះជាគូ ជាក្រុមតូចៗ ឬជាថ្នាក់រួមគ្នា ។
ការយល់ដឹងអំពីនិមិត្តសញ្ញាបន្ថែម ដែលមិនមាននៅក្នុងតារាងអាចមាននៅក្នុងផ្នែក « វិចារណកថា និង ព័ត៌មានសាច់រឿង » ។
និមិត្តសញ្ញានៅក្នុងការនិមិត្តរបស់យ៉ូហាន
|
និមិត្តសញ្ញា |
អត្ថន័យដែលអាចមាន |
|
១. ជើងចង្កៀងមាស៧ ( វិវរណៈ ១:១២ ) |
១. សូមមើល វិវរណៈ ១:២០ ; នីហ្វៃទី៣ ១៨:២៤ |
|
២. ព្រះហស្តស្តាំរបស់ព្រះអង្គសង្គ្រោះ ( វិវរណៈ ១:១៦–១៧ ) |
២. សូមមើល និក្ខមនំ ១៥:១៦ ; អេសាយ ៤១:១០ |
|
៣. ផ្កាយ៧ ( វិវរណៈ ១:១៦ ) |
៣. សូមមើល វិវរណៈ ១:២០ ; ការបកប្រែដោយ យ៉ូសែប ស្មីធ, វិវរណៈ ១:២០ ( នៅក្នុង វិវរណៈ ១:២០ , ) |
|
៤. ដាវមុខ២ដ៏មុត ( វិវរណៈ ១:១៦ ) |
៤. សូមមើល ហេព្រើរ ៤:១២ ; ហេលេមិន ៣:២៩–៣០ |
|
៥. កូនសោនៃសេចក្តីស្លាប់ និងស្ថានឃុំព្រលឹងមនុស្សស្លាប់ ( វិវរណៈ ១:១៨ ) |
៥. សូមមើល នីហ្វៃទី២ ៩:១០–១៣ |
សូមអនុញ្ញាតឲ្យសិស្សចែកចាយការរកឃើញរបស់ពួកគេ និងសំណួរណាមួយដែលពួកគេអាចមាន ។
ដោយគិតអំពីសិរីល្អរបស់ព្រះយេស៊ូវ និងអត្ថន័យដ៏មានសក្តានុពលនៃនិមិត្តសញ្ញានៅក្នុងការនិមិត្តរបស់យ៉ូហាន សូមក្រឡេកទៅមើលរូបភាពដែលបានបង្ហាញនៅដើមមេរៀន ។
-
តើអ្នកនឹងពន្យល់យ៉ាងដូចម្ដេចថារូបភាពនេះតំណាងឲ្យអ្វី ?
-
តើសេចក្ដីពិតអ្វីខ្លះដែលយើងអាចរៀនអំពីទំនាក់ទំនងរវាងព្រះយេស៊ូវគ្រីស្ទ និងអ្នកដើរតាមដ៏ស្មោះត្រង់របស់ទ្រង់ ?
សេចក្តីពិតមួយដែលយើងអាចរៀនពីនិមិត្តសញ្ញាទាំងនេះគឺថា ព្រះយេស៊ូវគ្រីស្ទមើលថែ និងយកព្រះទ័យទុកដាក់លើអ្នកដើរតាមដ៏ស្មោះត្រង់របស់ទ្រង់ ។
-
តើសេចក្ដីពិតនេះ និងនិមិត្តសញ្ញាទាំងនេះអាចជាពរជ័យដល់ពួកបរិសុទ្ធនៃសាសនាចក្រទាំងប្រាំពីរយ៉ាងដូចម្ដេច ?
-
តើសេចក្ដីពិត ឬរូបភាពជានិមិត្តសញ្ញានៃព្រះគ្រីស្ទនេះអាចជាប្រភពនៃការសម្រាលទុក្ខដល់ក្មេងជំទង់ម្នាក់នៅជំនាន់នេះក្នុងកាលៈទេសៈណាខ្លះ ?
-
តើនិមិត្តសញ្ញានៃជំពូកនេះបានជួយអ្នកឲ្យយល់កាន់តែច្បាស់ថាព្រះអង្គសង្គ្រោះជានរណា ហើយទ្រង់មានលក្ខណៈយ៉ាងណាដោយរបៀបណាទៅ ?
-
តើអ្នកបានរៀនអ្វីខ្លះអំពីនិមិត្តសញ្ញាដែលអាចជួយដល់អ្នក នៅពេលអ្នកបន្តសិក្សាគម្ពីរវិវរណៈនេះ ?
សូមពិចារណាចែកចាយទីបន្ទាល់អំពីអ្វីដែលអ្នកមានអំពីព្រះយេស៊ូវគ្រីស្ទ និងរបៀបដែលទ្រង់មើលថែ និងយកព្រះទ័យទុកដាក់លើអ្នកដើរតាមដ៏ស្មោះត្រង់របស់ទ្រង់ ។ សិស្សក៏អាចត្រូវបានអញ្ជើញឲ្យចែកចាយការរកឃើញរបស់ពួកគេផងដែរ ។
វិចារណកថា និង ព័ត៌មានសាច់រឿង
សកម្មភាពរៀនសូត្របន្ថែម
បរិបទនៃគម្ពីរវិវរណៈ
ដើម្បីណែនាំបរិបទនៃគម្ពីរវិវរណៈ សូមពិចារណាអំពីការបង្កើតសំណួរដើម្បីសួរថា តើអ្នកណា ពីកន្លែងណា និងមូលហេតុដែលគម្ពីរនេះត្រូវបានសរសេរ ។ សិស្សអាចអាន វិវរណៈ ១:៤, ៩ ដើម្បីស្វែងរកចម្លើយ ។
ការនិមិត្តដំបូងរបស់យ៉ូហាន និងព្រះគម្ពីរមរមន
ខគម្ពីរខាងក្រោមអាចត្រូវបានប្រើដើម្បីបង្ហាញថា ការនិមិត្តរបស់យ៉ូហានមានសារៈសំខាន់គ្រប់គ្រាន់ដើម្បីត្រូវបានបង្រៀនដោយព្យាការីនៃព្រះគម្ពីរមរមន ។ សូមឲ្យសិស្សអាន នីហ្វៃទី១ ១៤:១៨–២៩ ហើយរកមើលអ្វីដែលនីហ្វៃបានឃើញ និងមូលហេតុដែលលោកមិនបានសរសេរអំពីផ្នែកនៃការនិមិត្តរបស់លោក ។ សិស្សក៏អាចអាន អេធើរ ៤:១៦ ដើម្បីរកមើលអ្វីដែលព្រះអម្ចាស់បានមានបន្ទូលអំពីការសម្រេចបាននៃការនិមិត្តរបស់យ៉ូហានផងដែរ ។