Fakahā 6–14

Vakai Fakalūkufuá

Naʻe mamata ʻa e ʻAposetolo ko Sioné ki ha meʻa-hā-mai ʻo e Lami ʻa e ʻOtuá ʻokú Ne fakaava ʻa e fuofua fakamaʻu ʻe ono ʻo e tohi kuo fakamaʻú. Naʻá ne hiki ha ngaahi kikite fekauʻaki mo e ngaahi meʻa mahuʻinga mo fakamamahi ʻe hoko kimuʻa ʻi he Hāʻele ʻAngaua Mai ʻa Sīsū Kalaisí. Naʻá ne vahevahe ha ngaahi fakaikiiki ʻo ʻetau moʻui ʻi he maama fakalaumālié, kau ai ha “tau ʻi he langí” (Fakahā 12:7) mo e fakafepaki ʻa Sētane ki he kau muimui ʻo Sīsū Kalaisi ʻi he moʻui fakamatelié. Naʻá ne kikiteʻi foki ʻa hono Toe Fakafoki Mai ʻo e Siasi ʻo e Fakamoʻuí pea mo hono fakamavaheʻi ʻo e kau māʻoniʻoní mei he kau faiangahalá.

Fakahā 6–7

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó e mahuʻinga ʻo e falala kia Sīsū Kalaisi ke hoko ʻo haohaoa mo faivelenga lolotonga e ngaahi faingataʻa ʻo e ngaahi ʻaho fakaʻosí.

Teuteu ʻa e tokotaha akó: Fakaafeʻi e kau akó ke lau e fehuʻi ʻoku maʻu ʻi he Fakahā 6:17 pea haʻu mateuteu ke vahevahe e meʻa ʻoku nau pehē ʻe fie maʻu ke matuʻuaki ʻaki e ngaahi faingataʻa ʻo e ngaahi ʻaho fakaʻosí.

Fakahā 8–11

Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke nau ongoʻi e mālohi ʻo e ʻEikí mo ʻEne malava ke maluʻi kitautolu mei he ngaahi faingataʻa mo e kovi ʻo e ngaahi ʻaho fakaʻosí.

Teuteu ʻa e tokotaha akó: Fakakaukau ke vahevahe ʻa e lea ʻa Palesiteni Lāsolo M. Nalesoni mei he kamataʻanga ʻo e lēsoni ko ʻení pea fakaafeʻi e kau akó ke nau ako fekauʻaki mo ha niʻihi ʻo e ngaahi ngāue maʻongoʻonga ʻe fakahoko ʻe he ʻEikí kimuʻa ʻi Heʻene Hāʻele ʻAngaua Maí. ʻE lava ke hoko e ngaahi fakamatala “ Ngaahi ʻAho Fakaʻosí ” ʻi he Fakahinohino ki he Ngaahi Folofolá mo e “ Ngaahi ʻAho Fakaʻosí ” ʻi he Fakahinohino ki he Ngaahi Folofolá (ʻoku fakatou maʻu ʻi he scriptures.ChurchofJesusChrist.org) ko ha maʻuʻanga tokoni ʻaonga ki he meʻá ni.

Fakahā 12

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke fakatupulaki e tukupā ʻa e kau akó ke muimui ʻia Sīsū Kalaisí ʻaki hono tokoniʻi ke mahino kiate kinautolu ʻenau fili ʻi he maama fakalaumālié ke fili ʻa e Fakamoʻuí pea fakafisingaʻi ʻa Sētane.

Teuteu ʻa e tokotaha akó: ʻI ha ngaahi ʻaho siʻi kimuʻa ʻi he lēsoni ko ʻení, fakaafeʻi e kau akó ke nau tokanga ki he ngaahi founga ʻoku nau sio ai ki he tau ʻa Sētane mo Sīsū Kalaisi mo ʻEne kau muimuí. Poupouʻi kinautolu ke nau teuteu ke vahevahe ha ngaahi sīpinga pau ʻo e meʻa ne nau fakatokangaʻí.

Fakahā 14

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e founga ʻe lava ke tokoni ai ʻa e Fakamoʻuí mo Hono Siasi kuo fakafoki maí ki he māmaní—kau ai kinautolu—teuteu ki Heʻene Hāʻele ʻAngaua Maí.

Teuteu ʻa e tokotaha akó: Fakaafeʻi e kau akó ke nau hiki ha lisi ʻo e meʻa ʻoku nau ongoʻi ʻoku tolu pe fā ʻo e ngaahi taumuʻa mahuʻinga taha ʻ Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Toe Vakaiʻi Hono 25 ʻo e Fakataukei Fakatokāteliné

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke fakaloloto ʻenau mahino mo fakaʻaongaʻi e ngaahi moʻoni mei he ngaahi potufolofola fakataukei fakatokāteline ʻe 13 mei he konga hono ua ʻo e Fuakava Foʻoú.

Teuteu ʻa e tokotaha akó: Kapau ʻe lava, ʻoange ki he kau akó ha tatau ʻo e laʻipepa tufa ʻoku fakakau ʻi he lēsoni ko ʻení. Fakaafeʻi kinautolu ke nau toe vakaiʻi e ngaahi fakamoʻoni fakafolofolá mo e ngaahi kupuʻi lea mahuʻinga he folofolá pea fakakaukau ki he ngaahi tūkunga ʻe ala tokoni ai e mahino ʻa e ngaahi potufolofola ko iá.