Ром 4–5
Итгэл үнэмшил, үйлс, ач ивээл
Ромчуудад бичсэн захидалдаа Паул Ромын гэгээнтнүүдэд Христийн ач ивээл нь итгэл, үйлс хоёртой хэрхэн холбогддог талаар заах замаар үүнийг ойлгуулахад туслахыг эрэлхийлсэн. Паулын сургаалууд бидэнд Есүс Христийн ач ивээлээр дамжуулан өршөөл, авралын хэрэгцээний талаарх ойлголтоо гүнзгийрүүлэхэд тусална. Энэ хичээл танд Есүс Христийн ач ивээлийн талаарх ойлголт, ач холбогдлыг өсгөн нэмэгдүүлэхэд туслах болно.
Сургаал, зарчмуудыг ойлгох. Суралцагчдыг судраас сургаал, зарчмуудыг олж тодорхойлох үед эдгээр үнэний утга агуулгад дүн шинжилгээ хийж, илүү сайн ойлгоход туслах ярилцлагаар дамжуулан тэднийг чиглүүл. Суралцагчид сайн мэдээний сургаал, зарчмуудыг ойлгодог болсноор тэдгээр нь Их Эзэний төлөвлөгөөний өөр сургаалын үнэнүүдтэй хэрхэн холбогдож байгааг мөн үүнийг амьдралдаа хэрхэн хэрэгжүүлэхээ ойлгодог.
Суралцагчийн бэлтгэл: Суралцагчдыг Bible Dictionary эсвэл Судруудын удирдамж (scriptures.ChurchofJesusChrist.org) дээрх “Ач ивээл”-ийг уншаад, амьдралдаа Бурханы ач ивээлийг хүлээн авч байсан нэг арга замаа тодорхойлоход урь.
Боломжит суралцах үйл ажиллагаа
Таныг юу аврах вэ?
Та өөрийгөө цөлд ангаж үхэх гэж байгаагаар мөн ойролцоох толгодын оройд савтай ус байна гэж төсөөл. Дараах зүйлс таны авралд хэр чухал вэ?
Дараах бичвэр болон зургийг үзүүлээд, аль алиныг нь судлах тэмдэглэлдээ хуулахад суралцагчдыг урих талаар бодож үз.
-
Ус таныг аварна гэдэгт итгэх таны итгэл
-
Усанд хүрэхийн тулд гаргах таны хүчин чармайлт
-
Ус өөрөө
Суралцагчид юу тэднийг аврах талаарх асуултыг дараах асуултуудын хамт ангиараа, хосоороо эсвэл жижиг бүлгээр ярилцаж болно.
-
Яагаад ус дангаараа таныг ангаж үхэхээс аврах вэ?
-
Усанд найдах итгэл, усанд хүрэхийн тулд гаргах хүчин чармайлт яагаад хангалтгүй вэ?
-
Таны итгэл, хүчин чармайлт, ус гурав гурвуулаа хэрхэн нэгдэж байж ажиллах вэ?
Энэ жишээ нь итгэл, үйлс, ач ивээл гурав зөвтгөлтэй хэрхэн холбогддог талаарх Паулын сургаалыг ойлгоход танд тусална.
-
Та итгэл, үйлс, ач ивээл гэсэн үгийг хэрхэн тодорхойлох вэ?
Эдгээр үгийн тодорхойлолтыг Ром 2–3-ыг судлах хичээл эсвэл Судруудын удирдамж (scriptures.ChurchofJesusChrist.org) дээрээс эргэж харах нь тустай байж болох юм.
Хэрэв суралцагчид энэ хичээлд бэлдэж байхдаа ач ивээл гэдэг үгийн тодорхойлолтыг уншсан бол олж мэдсэн зүйлээ хуваалцахад тэднийг урьж болно.
Паулын амьдарч байсан цаг үед, Христэд итгэдэг зарим иудей хүн Мосегийн хуулийн дагуу үйлдсэн зүйлсийнхээ ачаар аврагдсан гэдэгт итгэдэг байжээ. Паул энэ буруу ойлголтыг залруулахыг хичээсэн. Ром 4:16 -ийн Иосеф Смитийн Орчуулгыг уншина уу [ Ром 4:16 , зүүлт тайлбар a-д].
-
Бид хэрхэн зөвтгөгдөх буюу гэм нүглээсээ өршөөгдөх талаар энэ шүлэгт юу гэж заасан байна вэ?
Энэ шүлэгт Паул бид Есүс Христийн ач ивээлээр дамжуулан итгэл, үйлсээрээ зөвтгөгдөнө гэж заасан.
Итгэл, үйлс, ач ивээл гэсэн үгсийг зургийнхаа хажууд байгаа тохирох үг хэллэг бүрийн дэргэд бич.
-
Та итгэл, үйлсийн талаар энэ зүйрлэлээс юу сурч мэдэж болох вэ?
-
Та Аврагчийн ач ивээлийн талаар энэ зүйрлэлээс юу мэдэж авч болох вэ?
Шаардлагатай бол усанд найдах итгэл нь бидний итгэлийг, усанд хүрэх хүчин чармайлт нь бидний үйлс буюу үйлдлийг, ус нь өөрөө Бурханы ач ивээлийг төлөөлж байгааг ойлгоход суралцагчдад тусал. Есүс Христийн ач ивээлийг хүлээн авахад итгэх, үйлдэхийн аль аль нь шаардлагатай боловч өршөөлийг бидний итгэл, үйлс биш харин Түүний ач ивээл авчирдаг болохыг ойлгоход тэдэнд тусал.
Есүс Христийн ач ивээлийн талаар илүү гүн гүнзгий ойлголттой болох
Есүс Христийн ач ивээл нь бидэнд зөвтгөгдөж, гэм нүглээсээ өршөөгдөх боломжийг олгодог бөгөөд өөр олон арга замаар биднийг адисалдаг. Есүс Христ амийг аврах усыг өгөхөөс гадна усыг олж авах итгэл, хүчин чармайлтыг маань хүчирхэгжүүлдэг. Бид Түүнд итгэх итгэлээ хэрэгжүүлж, сайныг үйлдэхээсээ өмнө мөн үйлдэх явцдаа болон үйлдсэнийхээ дараа ч Түүний ач ивээлээр адислагдаж болно.
Тэргүүн зөвлөлийн ерөнхийлөгч байхдаа Дийтр Ф.Угдорф ийнхүү заажээ.
Амьдралын маань туршид Бурханы ач ивээл бидний чадварыг өсгөж, амьдралыг маань баяжуулах материаллаг, сүнслэг бэлгүүдийг өгдөг. Түүний ач ивээл биднийг цэвэршүүлдэг. Түүний ач ивээл бидэнд хамгийн сайнаараа байхад тусалдаг.
(Дийтр Ф.Угдорф, “Ач ивээлийн бэлэг,” Ensign, May 2015, 108 эсвэл 2015 оны 4-р сарын Ерөнхий чуулган, 95)
-
Аврагчийн ач ивээл таныг өөрийн болж чадах хамгийн сайн хүн болоход хэрхэн тусалж чадах вэ?
Дараах судрын хэсгүүдийг уншаад, Аврагчийн ач ивээлтэй холбоотой бусад адислалыг хайж ол. Ром 5:1–2, 21
-
Есүс Христийн ач ивээлээр дамжуулан Түүнээс ямар нэмэлт адислалуудыг хүлээн авч чадах вэ?
-
Хэзээ та Аврагчийн ач ивээлийг амьдралдаа мэдэрч байсан бэ?
-
Энэ нь Аврагчийн тухай таны бодол санаанд хэрхэн нөлөөлсөн бэ?
Хэрэв суралцагчид амьдралдаа Аврагчийн ач ивээлийг хүлээн авч байсан арга замынхаа талаар бодож байгаад уг хичээлд бэлдсэн бол туршлагаа хуваалцаж болно. Хувийн туршлага эсвэл жишээг хуваалцахыг бод.
Аврагчийн ач ивээлийг амьдралдаа урин авчрах
Ерөнхийлөгч Угдорф Есүс Христийн ач ивээлийг хэрхэн илүү бүрэн дүүрэн хүлээн авч болох тухай дараах ойлголтыг өгсөн.
Ач ивээл бол Бурханы бэлэг бөгөөд Түүний зарлиг бүрд дуулгавартай байх хүсэлтэй байх нь Тэнгэрлэг Эцэгээсээ энэхүү ариун нандин бэлгийг хүлээн авахаар мөнх бус гараа сунгаж буй хэрэг юм.
(Дийтр Ф.Угдорф, “Ач ивээлийн бэлэг,” Ensign, May 2015, 110 эсвэл 2015 оны 4-р сарын Ерөнхий чуулган, 97)
Суралцагчдыг дараах асуултуудад судлах тэмдэглэлдээ хариулахад урих талаар бодож үз.
-
Амьдралд тань Есүс Христийн ач ивээлийн үзүүлсэн нөлөөний талаар бодоход танд ямар бодол, мэдрэмж төрж байна вэ?
-
Та Есүс Христийн ач ивээлийг өөрийн амьдралд илүү бүрэн дүүрэн урин авчрахын тулд юу хийж болох вэ?
Бурханы ач ивээл бидэнд хэр хэрэгтэйг мөн энэ нь итгэлтэй, дуулгавартай байхаар хүчин чармайлт гаргахын өмнө, гаргах үеэр мөн дараа хэрхэн бидний амьдралд өгөх хүч чадал, бэлэг болохыг гэрчил.
Тайлбар ба нөхцөл байдлын талаарх мэдээлэл
Бид өөрсдөд маань ач ивээл хэрэгтэй байгааг хэрхэн мэдэх вэ?
Тэргүүн зөвлөлийн ерөнхийлөгч байхдаа Дийтр Ф.Угдорф ач ивээлийн талаарх бидний хэрэгцээ шаардлагын талаар дараах асуултуудыг тавьжээ.
Бид Тэнгэрлэг Эцэгийнхээ өмнө хүлээсэн үүргээ ухамсарлан, Бурханы ач ивээлийг хүртэхийн тулд сэтгэл зүрхнийхээ угаас гуйн залбирдаг уу?
Бид өвдөг сөгдөн залбирахдаа, өөрсдийн зөв шударга байдлын тухай магтаалаа дахин дахин уншдаг уу эсвэл өөрийн бурууг хүлээн зөвшөөрч, Бурханы өршөөлийг хүсэмжлэн, гэтэлгэлийн агуу төлөвлөгөөнд талархан, нулимс унаган залбирдаг уу?
(Дийтр Ф.Угдорф, “Ач ивээлийн бэлэг,” Ensign эсвэл 2015 оны 4-р сарын Ерөнхий чуулган, 95)
Хэн нэгний амьдралд ач ивээл үйлчилж буй ямар жишээ байна вэ?
Ром 4:16 . Яагаад Абрахамыг зөвтгөгдөхийн жишээ болгон ашигласан бэ?
Паул зөвхөн хөвч хөндүүлж, Мосегийн хуулийг сахиж буй хүмүүс аврагдах боломжтой гэсэн санааг залруулахын тулд, Абрахам нь хөвчөө хөндүүлэхээсээ өмнө буюу Мосегийн хууль гарч ирэхээс хэдэн зууны өмнө адислалуудаа хүлээн авсан тухай заажээ. Абрахам Бурхантай гэрээ байгуулж, хөвч хөндүүлснийхээ дараа ч итгэлдээ үнэнч хэвээр байсан. Ийнхүү Паул хүмүүс Мосегийн хуульд дуулгавартай байснаар биш, харин Есүс Христийн ач ивээлээр дамжуулан итгэл, үйлсээрээ зөвтгөгддөг гэдгийг харуулж чаджээ.
Бурханы ач ивээл Адамын уналттай хэрхэн холбогддог вэ?
Паул Ром 5:12–21 -д Есүс Христ Уналтын үр дагаврыг ялан дийлэхэд бидэнд тусалдаг гэж заасан. Адамын алдаанаас болж нүгэл болон үхэл дэлхийд гарч иржээ. Гэхдээ “Есүс Христ хэмээх ганц Хүний нигүүлслээр ирсэн бэл[гийн]” ( Ром 5:15) ачаар бүх хүн нүгэл, үхлийн үр дагаврыг ялан дийлж, мөнх амийг хүлээн авах боломжтой. Уналтын талаарх Паулын эшлэл нь бүхнийг ялан дийлж чадах Аврагчийн ач ивээлийн бүхнийг хамрах хүчийг ойлгоход тусалдаг.
Нэмэлт суралцах үйл ажиллагаа
“Зовлон нь тэвчээрийг төрүүлдэг”
Суралцагчдаас өөрт тулгарсан сорилт бэрхшээлд талархаж байсныг нь асуу. “Та яг ямар үед талархах болсон бэ?” эсвэл “Тэвчээрийг төрүүлэхэд нь туслах сорилт бэрхшээлтэй тулгарсан хэн нэгэнд та юу гэж хэлэх байсан бэ?” зэрэг асуултуудыг ярилцаж болно ( Сургаал ба Гэрээ 121:7–8 -ыг үзнэ үү). Паул амьдралдаа олон хүнд хэцүү сорилт бэрхшээлтэй тулгарсан бөгөөд зовлон бэрхшээлийнхээ үр дүнд хүлээн авсан адислалуудынхаа талаар бичсэн гэдгийг тайлбарла. Суралцагчдыг Ром 5:3–5 -ыг уншаад, амьдралд тулгарах сорилт, зовлон бэрхшээлийн үр дүнд юу хүлээн авдаг талаар Паул юу гэж хэлснийг олж мэдэхэд урь. Суралцагчдаас эдгээр адислалын алийг нь хүлээн авснаа хуваалцахыг хүсэх талаар бодож үз.
Мормоны Номоос ач ивээлийн талаар суралцах
Мормоны Номын бошиглогчид Есүс Христийн тухай болон Түүгээр дамжин хүлээн авах боломжтой ач ивээлийн талаар зааж, бичихэд сүнслэгээр өдөөгдсөн. Суралцагчид дараах шүлгүүдээс дор хаяж гурвыг нь уншаад, эдгээр нь ач ивээлийн талаар юу зааж байгаа тухай бодож болно.
Өөр нэгэн сонголт бол суралцагчдыг бүлгүүдэд хуваагаад, бүлгийн гишүүн бүрд судрын нэг эсвэл хэд хэдэн хэсгийг оноож өгөх явдал юм. Тэд судраа уншаад, цаасан дээр судрын эшлэл, судрын хэсгээс таалагдсан үг, хэллэгээ бичиж болно. Дараа нь цаасаа дамжуулж, багийнхаа гишүүн бүрийн цаасыг авах хүртэл уг үйл явцаа давт. Үйл ажиллагааг дуусгасан бол суралцагчид өөр өөрийнхөө цаасыг харж, бүлгийн гишүүдийн бүх шүлэгт зориулан сонгосон үг, хэллэгийг харж болно.
Эцсийн урилга
Энэ хичээлээр олж мэдсэн зүйлээ хэрэгжүүлэхэд нь суралцагчдад туслах үүднээс тэдэнд ил захидал эсвэл жижигхэн цаас өгөхийг бод. Тэднийг уг цаасаа дараагийн 24 цагийн турш амьдралаасаа Аврагчийн ач ивээлийг хайхдаа биедээ авч яван, олж харсан аливаа нотолгоогоо бичиж тэмдэглэхэд урь. Дараа нь залбирч, олсон нотолгоо бүрдээ талархаж, өөрсдийн амьдралаас Түүний ач ивээлийг илүү сайн олж харах нүд хайрлахыг Тэнгэрлэг Эцэгээс хүсэхэд тэднийг урь. Суралцагчид дараагийн хичээлээр туршлагаа ярьж болно.