Roma 4–5

Faatuatua, Galuega, ma le Alofa Tunoa

I lana tusi i tagatanuu o Roma, sa saili ai Paulo e fesoasoani i le Au Paia i Roma ia malamalama i le alofa tunoa o Keriso e ala i le aoao atu e uiga i le sootaga i le faatuatua ma galuega. O aoaoga a Paulo e mafai ona fesoasoani e faalolotoina ai lo tatou malamalama e uiga i le tatou manaomia o le faamagaloga ma le faaolataga e ala i le alofa tunoa o Iesu Keriso. O lenei lesona o le a fesoasoani ia te oe e faateleina ai lou malamalama ma le talisapaia o le alofa tunoa o Iesu Keriso.

O le malamalama i aoaoga faavae ma mataupu faavae. A o faailoa mai e tagata aoga ia aoaoga faavae ma mataupu faavae i mau, taiala i latou i talanoaga lea o le a fesoasoani ia i latou e faavasega ma malamalama lelei ai i le uiga o nei upumoni. A malamalama tagata aoga i se aoaoga faavae po o se mataupu faavae o le talalelei, o lona uiga ua latou malamalama i lona sootaga ma isi upumoni i aoaoga faavae i le fuafuaga a le Alii ma tulaga e ono faaaoga ai i o latou olaga.

Sauniuniga a le tagata aoga: Valaaulia tagata aoga e faitau le vaega o le “Alofa Tunoa” i le Bible Dictionary po o le O le Taiala i Tusitusiga Paia (scriptures.ChurchofJesusChrist.org) ona faailoa mai lea o se tasi o auala ua latou maua ai le alofa tunoa o le Atua i o latou lava olaga.

Gaoioiga e ono Mafai Ona Aoao Ai

O le a le mea o le a laveaia oe?

Manatu faapea ua e galala i le fiainu i se toafa ma o loo i ai se faguvai i le tumutumu o se mauga lata ane. O le a le taua o mea taitasi nei i lou faasaoina o oe lava?

Mafaufau e faaali atu le faamatalaga ma le ata lenei ma valaaulia tagata aoga e kopi uma le lua i totonu o a latou api talaaga mo suesuega.

1. O lou talitonuga e mafai e le vai ona laveai oe

2. O lou taumafai ina ia e oo i le vai

3. O le vai lava ia

E mafai e tamaiti aoga ona talanoaina le fesili e faatatau i mea o le a laveaia i latou, ma fesili nei, faatasi o se vasega atoa, i ni paga, pe i ni vaega toalaiti.

• Aisea ua na o le vai ai lava o le a laveaia oe mai le oti i le fia inu?

• Aisea ua le lava ai le talitonuga i le vai ma le taumafaiga ina ia maua ai le vai?

• E faapefea ona galulue faatasi lou talitonuga, lau taumafaiga, ma le vai?

E mafai ona fesoasoani lenei tulaga faataitai e te malamalama ai i aoaoga a Paulo e uiga i le ala e fesootai ai le faatuatua, galuega, ma le alofa tunoa i le tauamiotonuina.

• E faapefea ona e faamatalaina ia upu faatuatua, galuega, ma le alofa tunoa?

Atonu e aoga le toe faamanatu o uiga o nei upu i le lesona i le Roma 2–3 po o le Taiala i Tusitusiga Paia (scriptures.ChurchofJesusChrist.org).

Afai e faitau e tagata aoga le uiga o le alofa tunoa o se vaega o a latou sauniuniga mo lenei lesona, e mafai ona valaaulia i latou e faasoa mai mea sa latou aoaoina.

I ona po o Paulo, sa talitonu nisi o Kerisiano Iutaia sa faasaoina i latou i a latou galuega i le usitaia o le tulafono a Mose. Sa taumafai Paulo e faasa’o lenei le malamalama. Faitau le Faaliliuga a Iosefa Samita o le Roma 4:16 [i le Roma 4:16, vaefaamatalaga a].

• O le a se mea o aoao mai e lenei fuaiupu e uiga i le ala e tauamiotonuina ai i tatou, pe faamagaloina ai a tatou agasala?

I le fuaiupu lenei, o loo aoao mai ai Paulo e tauamiotonuina i tatou e le faatuatua ma galuega e ala i le alofa tunoa o Iesu Keriso.

Tusi upu nei faatuatua, galuega, ma le alofa tunoa i autafa o le fasifuaitau mai lau ata e fetaui i ai upu taitasi.

• O a mea e mafai ona e aoaoina mai lenei tala faatatau e uiga i le faatuatua ma galuega?

• O le a se mea e mafai ona e aoao mai le tala faatatau e uiga i le alofa tunoa o le Faaola?

Afai e manaomia, fesoasoani i tagata aoga ia malamalama o le talitonuga i le vai e faatusaina i le faatuatua, o le taumafaiga e oo atu i le vai e faatusaina i a tatou galuega, po o faatinoga, ae o le vai lava ia e faatusa i le alofa tunoa o le Atua. Fesoasoani ia latou malamalama e ui e manaomia le faatuatua ma galuega ina ia maua ai le alofa tunoa o Iesu Keriso, ae o Lona alofa tunoa lea e aumaia ai le faamagaloga, ae le o lo tatou faatuatua po o galuega.

O le malamalama atili ai e uiga i le alofa tunoa o Iesu Keriso

O le alofa tunoa o Iesu Keriso ua mafai ai ona tauamiotonuina i tatou, pe faamagaloina ai a tatou agasala, ma e faamanuiaina ai foi tatou i isi auala. E le gata ina saunia e Iesu Keriso le vai-ola, ae Na te faamalosia foi lo tatou faatuatua ma taumafaiga ina ia mafai ai ona tatou maua le vai. E mafai ona faamanuiaina i tatou i Lona alofa tunoa a o lei galueaina le faatuatua, i le taimi e faatino ai, ma pe a uma ona faatino le faatuatua ia te Ia ma faia galuega lelei.

Sa aoao mai Peresitene Dieter F. Uchtdorf, a o i ai i le Au Peresitene Sili:

I o tatou olaga atoa, ua foai mai ai e le alofa tunoa o le Atua faamanuiaga faaletino ma meaalofa faaleagaga ia e faalauteleina ai o tatou agavaa ma faatamaoaigaina ai o tatou olaga. O Lona alofa tunoa na te faamamaina i tatou. E fesoasoani Lona alofa tunoa ia avea ai lava i tatou ma ni tagata silisili ona lelei.

(Dieter F. Uchtdorf, “O le Meaalofa o le Alofa Tunoa,” Ensign po o le Liahona, Me 2015, 108)

• E mafai faapefea e le alofa tunoa o le Faaola ona fesoasoani e te avea ai ma ou tagata sili ona lelei?

Faitau fuaitau o mau nei ma vaavaai mo nisi faamanuiaga e fesootai ma le alofa tunoa o le Faaola. Roma 5:1–2, 21

Eteru 12:27

Moronae 10:32–33

• O a faamanuiaga faaopoopo e mafai ona maua mai ia Iesu Keriso e ala i Lona alofa tunoa?

• O anafea na e lagonaina ai le alofa tunoa o le Faaola i lou olaga?

• E faapefea e lenei mea ona faatosina ou lagona agai i le Faaola?

Afai na saunia tagata aoga mo le lesona e ala i le mafaufau i ni auala na latou maua ai le alofa tunoa o le Faaola i o latou olaga, e mafai ona latou faasoa mai o latou aafiaga. Mafaufau e faasoa sou aafiaga patino po o se faataitaiga foi.

Afai e lei saunia e tagata aoga ni aafiaga e faasoa mai pe o le a aoga foi se isi faataitaiga, mafaufau e faaali le vitio “Faith Journey: When Parents Get Divorced” (tagai i le vaega o “Tala Auiliili ma Faamatalaga o Talaaga”).

O le valaauliaina o le alofa tunoa o le Faaola i lou olaga

Na tuuina mai e Peresitene Uchtdorf lenei malamalamaga e uiga i le ala e mafai ai ona sili atu lou mauaina atoa ai o le alofa tunoa o Iesu Keriso:

O le alofa tunoa o le meaalofa a le Atua, ma o lo tatou naunau ina ia usiusitai i poloaiga taitasi a le Atua o le aapa atu lea o lo tatou lima faaletino e taliaina lenei meaalofa paia mai lo tatou Tama Faalelagi.

(Dieter F. Uchtdorf, “O le Meaalofa o le Alofa Tunoa,” Ensign po o le Liahona, Me 2015, 110)

Mafaufau e valaaulia tagata aoga e tali fesili nei i totonu o a latou api talaaga mo suesuega.

• O a ni manatu ma ni lagona e oo mai ia te oe pe a e mafaufau e uiga i aafiaga o le alofa tunoa o Iesu Keriso i lou olaga?

• O le a se mea e mafai ona e faia ina ia valaaulia atoatoa atili ai le alofa tunoa o Iesu Keriso i lou olaga?

Molimau atu i lo tatou manaomia o le alofa tunoa o le Atua e avea o se malosi ma se meaalofa i o tatou olaga a o lei amataina a tatou taumafaiga, i le taimi o ia taumafaiga, ma pe a uma foi ia taumafaiga ina ia tatou faamaoni ma usiusitai.

Manatu ma Talaaga o Faamatalaga

E mafai faapefea ona tatou tautino atu lo tatou manaomia o le alofa tunoa?

Sa fesili Dieter F. Uchtdorf, a o i ai i le Au Peresitene Sili, i fesili nei e uiga i lo tatou manaomia o le alofa tunoa:

O tatou malamalama ea i lo tatou nofoaitalafu i le Tama Faalelagi ma aioi atu ma o tatou loto atoa mo le alofa tunoa o le Atua?

A tatou tootutuli e tatalo, pe ina ia toe tautau atu ai na o vaega sili ona iloga o lo tatou lava amiotonu, po o le tautau atu o tatou faaletonu, aioi atu mo le alofa mutimutivale o le Atua, ma maligi loimata o le loto faafetai mo le fuafuaga ofoofogia o le togiolaina?

(Dieter F. Uchtdorf, “O Le Meaalofa o le Alofatunoa,” Ensign po o le Liahona, Me 2015, 109)

O le a se faataitaiga o le alofa tunoa i le galue ai i le olaga o se tasi?

O le vitio “Faith Journey: When Parents Get Divorced” (3:05), o loo maua i le ChurchofJesusChrist.org, o loo faapupula mai ai le aafiaga o se tamaitai o le na iloaina o le alofa tunoa o Iesu Keriso na fesoasoani ia te ia e tali atu ai i le tatalaga o le faaipoipoga a ona matua.

Roma 4:16 . Aisea na faaaoga ai Aperaamo o se faataitaiga o le tauamiotonuina?

Ina ia faasa’o le manatu faapea e na o i latou o e sa peritomeina ma sa tausia le tulafono a Mose e mafai ona faaolaina, sa aoao atu Paulo e faapea, sa maua e Aperaamo faamanuiaga a o lei peritomeina o ia mo seneturi e tele a o lei tuuina mai le tulafono a Mose. Ona tumau ai pea lea o le faamaoni o Aperaamo ina ua uma ona osifeagaiga ma le Atua ma ua peritomeina. O lea la, sa mafai ai e Paulo ona faaali atu e lei tauamiotonuina tagata taitoatasi e ala i le usiusitai i le tulafono a Mose ae e ala i le faatuatua ma i galuega e ala i le alofa tunoa o Iesu Keriso.

E faapefea ona fesootai le alofa tunoa o le Atua i le Pa’ū o Atamu?

I le Roma 5:12–21 na aoao mai ai Paulo e fesoasoani Iesu Keriso ia i tatou e faatoilalo aafiaga o le Pa’ū. Ona o le solitulafono a Atamu, na oo mai ai le agasala ma le oti i le lalolagi. Peitai, ona o “le mea e foaifuaina mai i le alofa tunoa, ua i le tagata e toatasi, o Iesu Keriso lea” ( Roma 5:15), e mafai ai e tagata uma ona manumalo i aafiaga o le agasala ma le oti ma maua ai le ola e faavavau. O le faasinoga a Paulo i le Pa’ū e fesoasoani ia tatou malamalama ai i le mana e le gata o le alofa tunoa o le Faaola e manumalo ai i mea uma.

Gaoioiga Faaopoopo e Aoao Ai

“O le puapuaga e tupu ai le onosai”

Fesili i le vasega pe na i ai se taimi na latou matua lotofaafetai ai mo se tofotofoga na latou aafia ai. O fesili e ono talanoaina e mafai ona pei “O le a le taimi na amata ai ona e lotofaafetai?” po o le “O le a sau tala e fai atu i se tasi o feagai ma se tofotofoga e ono fesoasoani ia i latou e onosaia lelei ai?” (tagai i le Mataupu Faavae ma Feagaiga 121:7–8). Faamatala atu e faapea na feagai Paulo ma le tele o tofotofoga faigata i lona olaga ma ia tusia e uiga i faamanuiaga na afua mai i mea na ia mafatia ai. Valaaulia tagata aoga e faitau le Roma 5:3–5, ma vaavaai mo mea na fai mai Paulo e mafai ona afua mai tofotofoga po o puapuaga i o tatou olaga. Mafaufau e fai atu i tagata aoga e faasoa mai pe na faapefea ona latou maua se aafiaga o nei faamanuiaga.

O le aoao e uiga i le alofa tunoa mai le Tusi a Mamona

Na musuia perofeta o le Tusi a Mamona e aoao atu ma tusitusi e uiga ia Iesu Keriso ma le alofa tunoa o loo avanoa mo i tatou e ala mai ia te Ia. E mafai e tagata aoga ona faitau se tolu pe sili atu o fuaiupu nei, ma mafaufau po o a mea ua aoao mai e nei fuaiupu ia i latou e uiga i le alofa tunoa.

O se isi faiga o le tuu lea o tagata aoga i ni vaega ma atofa atu i tagata taitasi o le vaega se tasi pe sili atu o fuaitau o mau. Faatonu i latou e faitau a latou mau ma tusi le mau faasino ma se upu po o se fasifuaitau e sili ona fiafia i ai mai le mau i luga o se fasipepa. Ona faatonu lea ia latou faataamilo pepa ma toe fai le faagasologa mo pepa taitasi a isi tagata o le vaega. A maea loa le gaoioiga, e mafai e tagata aoga ona tilotilo i a latou uluai pepa ma vaai i upu ma fasifuaitau ua filifilia e tagata o le vaega mo fuaiupu uma.

2 Nifae 2:8

2 Nifae 10:24–25

2 Nifae 25:23

Eteru 12:27

Eteru 12:41

Moronae 10:32–33

Valaaulia faaiu

Ina ia fesoasoani i tagata aoga e faaaoga mea sa latou aoaoina i lenei lesona, mafaufau e tuu atu ia i latou se kata po o se fasipepa laitiiti. Valaaulia i latou e tauave le fasipepa ma i latou mo le isi 24 itula a o latou vaavaai mo le alofa tunoa o le Atua i o latou olaga ma tusi i lalo soo se faamaoniga latou te maua. Valaaulia i latou e tatalo ma faailoa atu le lotofaafetai mo na faamaoniga taitasi ma ole atu i le Tama Faalelagi e fesoasoani ia i latou ia maua ni mata e vaai lelei atili ai i Lona alofa tunoa i o latou olaga. E mafai e tagata aoga ona lipoti mai e uiga i o latou aafiaga i le isi taimi o le vasega.