Roma 2–3

O le Tauamiotonuina e ala i le Faatuatua ia Iesu Keriso

Sa alofa Paulo i le Au Paia i Roma ma sa manao e fesoasoani ia i latou ia lotogatasi e ala i lo latou faatuatua ia Iesu Keriso. Sa manaomia uma e tagata Iutaia ma tagata Nuu Ese liliu mai le fesoasoani e malamalama ai i lo latou faalagolago ia Iesu Keriso ma le ala e maua ai faamanuiaga o Lana Togiola. O lenei lesona e mafai ona fesoasoani ia te oe e malamalama atili ai i le manaomia ona faamagaloina o a tatou agasala, po o le tauamiotonuina, e ala ia Iesu Keriso.

O le taulai atu i tagata taitoatasi. O se tasi o luitau o le aoao atu o le ausiaina lea o manaoga o tagata aoga e eseese talaaga, mea e fiafia i ai, faamoemoega, ma tauiviga. E mafai ona fesoasoani le Agaga Paia ia te oe e fetuunai ai lesona e faatatau i manaoga o lau vasega atoa. Vaavaai mo ni auala e tatai atu ai tagata aoga i le Faaola, o le e mafai ona fesoasoani i tagata aoga taitasi i o latou tulaga tulaga ese.

Sauniuniga a le tagata aoga: Valaaulia tagata aoga e faitau faamatalaga o uiga o upu o loo maua i le lesona e faatatau i le Roma 1–6 i le Sau Mulimuli Mai ia te A’u—Mo Tagata Taitoatasi ma Aiga: Feagaiga Fou 2023. Fai atu ia i latou e sauni e faasoa mai i ni a latou lava upu ia faauigaga o upu e pei o le tauamiotonuina ma le alofa tunoa.

Gaoioiga e ono Mafai Ona Aoao Ai

E manaomia e tagata uma Iesu Keriso

Mafaufau e valaaulia tagata aoga e tusi le vaaiga lenei i a latou api talaaga mo suesuega (po o i luga o le laupapa) a o faitauina leotele.

Mafaufau faapea o loo e i ai i luga o se ala e agai atu i se taunuuga matua manaomia lava. Peitai, a o e agai atu i le ala, ua e tau atu i se papupuni po o se puipui o loo poloka ai le ala. Ua poloka e le papupuni se isi lava laasaga agai atu i luma ma ua matua le mafai ai ona e uia nao oe lava.

Faaigoa le taunuuga o le afioaga o le Atua.

• Aisea ua avea ai le toe foi atu i le afioaga o le Atua o se mea e te manao ai?

O tagata o le Ekalesia i le taimi o Paulo na o mai mai aganuu ma tupuaga eseese. Ae peitai, o se tasi o mea sa tutusa ai i latou uma, ona sa latou agasala ma o lea sa latou le agavaa ai e ulu atu i le afioaga o le Atua. A o e suesue i le Roma 2–3, saili ia malamalama i mea na faia e le Tama Faalelagi ma Lona Alo Pele ina ia mafai ai e tagata uma ona faatoilalo le papupuni lea e taofia ai i latou mai le toe foi atu i le afioaga o le Atua.

O le faamatalaina o uiga o upu e mafai ona fesoasoani ai i tagata aoga ia malamalama atili ai i le faatatauga ma le anotusi o fuaiupu o mau. Mafaufau e faaali atu nei faauigaga e mafai ai e le vasega ona faasino i ai a o latou faitauina fuaiupu i le Tusi ia Roma. E ono fesoasoani le faitau faatasi o se fuaiupu ma suia i se faauigaga se upu i lena fuaiupu. E mafai foi ona faasoa mai tagata aoga i mea ua latou aoaoina i a latou sauniuniga a le tagata aoga.

Ina ia malamalama atili i aoaoga a Paulo i tagata Roma, atonu e mafai ona fesoasoani faauigaga nei:

Tauamiotonuga, tauamiotonu, tauamiotonuina: “O le faamagaloina lea mai le faasalaga o le agasala ma le tautinoina o le le sala. E tauamiotonuina se tagata i le alofa tunoa o le Faaola e ala i le faatuatua ia te Ia. O lenei faatuatua e faaalia i le salamo ma le usiusitai i tulafono ma sauniga o le talalelei. O le Togiola a Iesu Keriso ua mafai ai e tagata ona salamo ma tauamiotonuina pe magalo mai le faasalaga lea semanu latou te maua” (Taiala i Tusitusiga Paia, “ Tauamiotonuina, Tauamiotonu,” scriptures.ChurchofJesusChrist.org).

Faatuatua: O le talitonu ma le faalagolago ia Iesu Keriso e taitaia ai se tagata e usiusitai ia te Ia” (O le Taiala i Tusitusiga Paia, “ Faatuatua,” scriptures.ChurchofJesusChrist.org).

O le tulafono: O lenei faaupuga e faasino i le tulafono a Mose ma ana faatinoga i fafo e o faatasi ai, po o “galuega” (tagai i le “Aokuso 7–13. Roma 1–6: ‘O Le Mana Lea o le Atua e Ola Ai,’” i le Sau Mulimuli Mai ia te A’u—Mo Tagata Taitoatasi ma Aiga: Feagaiga Fou 2023; tagai foi i le Taiala i Tusitusiga Paia, “ Tulafono a Mose,” scriptures.ChurchofJesusChrist.org).

Alofatunoa: O faamanuiaga, alofa mutimutivale, fesoasoani, ma le malosi o loo avanoa mo i tatou ona o le Togiola a Iesu Keriso (tagai i le Taiala i Tusitusiga Paia, “ Alofa Tunoa ”).

Faitau le Roma 3:10–12, 20–23, ma vaavaai pe na faapefea ona faamatala e Paulo le papupuni o i le va o i tatou ma le Atua.

• O a fasifuaitau mai aoaoga a Paulo e fesoasoani ia tatou malamalama ai po o le a le papupuni?

Tusi fasifuaitau nei i luga o le papupuni i lau ata. Faitau le saunoaga lenei a Peresitene Dieter F. Uchtdorf, a o i ai i le Au Peresitene Sili, ma vaavaai mo se malamalama faaopoopo i mea ua faatusa i ai le papupuni:

Ona o i tatou uma lava ua “agasala, ma ua le oo i le mamalu o le Atua” [Roma 3:23] ma ona “e le mafai e se mea eleelea ona ulu atu i le malo o le Atua”[1 Nifae 15:34], o i tatou uma taitoatasi ua le agavaa e toe foi atu i le afioaga o le Atua.

E tusa lava pe tatou te auauna atu i le Atua ma o tatou agaga atoa, e le lava lea, aua o le a avea pea i tatou ma ni “auauna lē aoga” [Mosaea 2:21]. E le mafai ona tatou galulue mo lo tatou ala i le lagi; o manaoga o le faamasinogatonu e tu o se papupuni, lea e leai ai so tatou malosi e faatoilalo ai e i tatou lava ia.

(Dieter F. Uchtdorf, “O Le Meaalofa o le Alofatunoa,” Ensign po o le Liahona, Me 2015, 108)

E mafai foi e tagata aoga ona faaopoopo i ai Manaoga o le faamasinogatonu i le papupuni i a latou ata.

Mafaufau i vaega e te le atoatoa ai po o agasala o loo e taumafai e faatoilalo.

Atonu e aoga le taimi lenei e faasoa atu ai le saunoaga a Elder Uchtdorf i le vaega o “Talatalaga ma Faamatalaga o Talaaga”.

Faitau le Roma 3:24–28 (matau le Faaliliuga a Iosefa Samita i le fuaiupu 24, vaefaamatalaga a), ma vaavaai mo mea na aoao mai e Paulo e uiga i le na o le ala e tasi e mafai ai ona tauamiotonuina i tatou, pe faamagaloina ai a tatou agasala.

Valaaulia tagata aoga e faasoa mai ni malamalamaga po o ni a latou fesili e uiga i lenei autu po o nei fuaiupu. Mo se faataitaiga, atonu e le malamalama tagata aoga i le upu “taulaga mo agasala” (fuaiupu 25). E mafai ona latou faaaoga vaefaamatalaga e fesoasoani ai i lenei mea. Fesoasoani i tagata aoga ia malamalama i le upumoni ua faamatateteleina atu mai nei fuaiupu.

O se upumoni e tasi e mafai ona e aoao mai nei fuaiupu e faapea, e ala i le taliaina ma le faamaoni o Iesu Keriso, e mafai ai ona tauamiotonuina tagata uma e ala i Lona alofa tunoa.

Atonu e fesoasoani le faaali atu o le vitio “Why We Need a Savior” (2:15), lea o loo aofia ai i le vaega o “Tala Auiliili ma Faamatalaga o Talaaga”. O loo faapupula mai ai e fesoasoani Iesu Keriso ia i tatou ia manumalo i a tatou agasala ma luitau.

• O a ni ou manatu po o lagona e i ai pe a e tomanatu i lenei upumoni?

Na aoao mai e Elder Uchtdorf o le Korama a Aposetolo e Toasefululua le ala e mafai ai e le Togiola a Iesu Keriso ona suia le tatou vaai i a tatou agasala ma faaletonu:

O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou soligatulafono ma faaletonu. Nai lo le nofoa’i i na mea ma lagonaina le lē togiolaina ma le leai o se faamoemoe, e mafai ona tatou a’oa’o mai ai ma lagonaina le faamoemoe. O le meaalofa faamamā o le salamo e mafai ai ona tatou lafoai a tatou agasala ma tutula’i a’e o ni tagata fou.

Ona o Iesu Keriso, o le a le avea ai o tatou toilalo ma ni mea e faamatalaina ai i tatou. E mafai ona latou faaleleia i tatou.

(Dieter F. Uchtdorf, “O Loo ia i Tatou le Atua,” Liahona; Me 2021, 8–9)

O fesili nei atonu e sili ona tali faalilo e tagata aoga i a latou api talaaga mo suesuega.

• E faapefea ona faatusatusa lau vaai i au lava mea sese ma ou faaleatoatoa i mea na faamatalaina e Elder Uchtdorf?

Faaopoopo i lau ata e ala i le faapupulaina mai o le auala e fesoasoani ai Iesu Keriso ia i tatou e faatoilalo le papupuni.

• E mafai faapefea e le malamalama faapea o i tatou uma lava e agasala ma lē atoatoa e agavaa mo le faaolataga ona suia ai la tatou vaai atu ia Iesu Keriso?

• O a ni manatu loloto, lagona, po o uunaiga ua e maua ona o mea ua e aoaoina i lenei lesona?

Manatu ma Talaaga o Faamatalaga

E mafai faapefea ona ou malamalama atili i le tauamiotonuina?

Na aoao mai e Elder D.Todd Christofferson o le Korama a Aposetolo e Toasefululua mea nei e uiga i le upu tauamiotonuina:

Ona o le “mama e faavavau o Lana taulaga togiola sili,” ua mafai ai e Iesu Keriso ona faamalieina pe “tali le iuga o le tulafono” mo i tatou. E oo mai le faamagaloga e ala mai i le alofa tunoa o Ia o le sa faamalieina tuutuuga o le faamasinoga tonu e ala i Ona lava puapuaga. … Ua Ia aveesea o tatou tausalaga e aunoa ma le aveeseina o le tulafono. Ua faamagaloina i tatou ma tuu ai i se tulaga o le amiotonu faatasi ma Ia. Ua avea i tatou, e faapei o Ia, e aunoa ma le agasala. Ua lagolagoina ma puipuia i tatou e le tulafono, e le faamasinoga tonu. I se faaupuga, ua tauamiotonuina i tatou.

O lea, e ono tatau ona tatou faapea ane o se tasi ua tauamiotonuina, o ia lea ua faamagaloina, ua aunoa ma se agasala pe ua le tausalaina foi.

(D. Todd Christofferson, “Justification and Sanctification,” Ensign, Iuni 2001, 20)

Aisea e manaomia ai e le lalolagi ia Iesu Keriso?

Matamata le vitio “Why We Need a Savior” (2:15), o loo maua i le ChurchofJesusChrist.org.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Pe na faalavelave le agasala i le fuafuaga a le Tama Faalelagi?

Sa aoao mai Peresitene Dieter F. Uchtdorf, a o i ai i le Au Peresitene Sili:

Sa silafia e lo tatou Tama Faalelagi ae tatou te lei o mai i lenei olaga faaletino o le a faaosoosoina i tatou e malosiaga faataumaoi ina ia tatou o ese ai mai lo tatou ala, “aua ua agasala tagata uma lava, ma ua le oo i le mamalu o le Atua” [ Roma 3:23 ]. O le mafuaaga lena na Ia saunia ai se ala mo i tatou e faia ai faasa’ga. E ala i le faagasologa o le alofa mutimutivale o le salamo moni ma le Togiola a Iesu Keriso, e mafai ai ona faamagaloina a tatou agasala ma o le a tatou “le fano, ae maua le ola e faavavau” [ Ioane 3:16 ].

(Dieter F. Uchtdorf, “Na o Ni Nai Tikeri Lava,” Ensign po o le Liahona, Me 2008, 60)

O le a le uiga o le tala a Paulo ina ua ia faapea mai o “tagata Nuu Ese … e fai fua mea e tusa ai ma le tulafono”? (Roma 2:14)

“Sa iloa e Paulo o nisi o tagata Nuu Ese na ola ma le malamalama i ni olaga mama. … O nei tagata Nuu Ese sa mulimuli i le Malamalama o Keriso, o ‘se faatosinaga mo le lelei i olaga o tagata uma (Ioane 1:9; MF&F 84:46–47)’ [O Le Taiala i Tusitusiga Paia, “ Malamalama, Malamalama o Keriso,” scriptures.ChurchofJesusChrist.org]. E ui e lei ia i latou le tulafono a Mose, ae na fai mai Paulo ua ia i latou ‘le galuega o le tulafono ua tusia i o latou loto’ (Roma 2:15)” (“Roma 1–3,” i le New Testament Student Manual [2018], 337).

Gaoioiga Faaopoopo e Aoao Ai

O le usitai mai le loto

Mafaufau e valaaulia se tagata aoga e faitau le Roma 2:28–29, ae sui le upu Iutaia i le Au Paia o Aso e Gata Ai ma le upu peritomeina i le feagaiga. O le a se mea ua faaopoopo e lenei suiga i lo tatou malamalama i aoaoga a Paulo? O a ni faataitaiga o mea tatou te faia o ni tagata o le Ekalesia ia e sili atu le anoa ma mamana pe a faia “i le loto, mai le agaga”? (Roma 2:29). (Fetuunaiga mai ia “Aokuso 7–13. Roma 1–6: ‘O Le Mana o le Atua E Ola Ai,’” Sau, Mulimuli Mai ia te A’u—Mo le Aoga Sa: Feagaiga Fou 2023.)

O le aoaoga faavae o le tauamiotonuina i tusitusiga paia o le Toefuataiga

O le aoaoga faavae o le tauamiotonuina o loo aoao mai foi i le Tusi a Mamona ma le Mataupu Faavae ma Feagaiga. E mafai e tagata aoga ona fai paga ma faitau a le o le 2 Nifaei 2:5–8 po o le Mataupu Faavae ma Feagaiga 20:29–31 e sue ai malamalamaga e uiga i le tauamiotonuina.

O talitonuga a le Au Paia Iutaia e uiga i le tulafono a Mose

O le vaaiga faataitai lenei e mafai ona faatusa i talitonuga o nisi o le Au Paia Roma ia na tusi i ai Paulo. Mafaufau e faaaoga e fesoasoani ai ia malamalama tamaiti aoga i nisi o manatu sese sa tautalagia e Paulo.

O Asa e sau mai se aiga Iutaia faamaoni sa nonofo i Roma mo augatupulaga e lua. A o tuputupu ae, sa aoaoina o ia e ola ma le filiga i le tulafono a Mose. Sa talitonu i taimi uma lona aiga o le a faasaoina i latou e ala i le ola e tusa ai ma sauniga, faatinoga faaaliali atu i fafo, ma sauniga o le tulafono a Mose. Ina ua iloa e le aiga o Asa e uiga ia Iesu Keriso, sa latou talitonu o Ia o le Mesia sa latou faatalitali i ai. Sa papatisoina i latou ae sa faaauau pea ona ola i le tulafono a Mose, ma le talitonuga o le usiusitai atoatoa o le a aumaia ai ia i latou le faaolataga.

• O a upumoni e manaomia pea ona aoaoina e Asa ma lona aiga?