Romakëve 6

“Të Ecim në Risinë e Jetës”

A young man being baptized in a baptismal font in a church building in Madagascar.

T’ia dorëzojmë veten Perëndisë nuk është e lehtë. Por Jezu Krishti premton se, ndërsa e lëmë veten tonë të vjetër, mëkatare të vdesë, Ai do të na japë jetë të re, duke e ndryshuar natyrën tonë për t’u bërë më të ngjashëm me Të. Pali dha mësim që nëpërmjet ordinancës së pagëzimit, ne mund të marrim fuqinë shndërruese të Shpëtimtarit për të na ndihmuar të “ecim në risinë e jetës” ( Romakëve 6:4). Ky mësim mund të të ndihmojë të kërkosh ndryshim nëpërmjet Jezu Krishtit dhe t’i dallosh më mirë se kur ato ndryshime po ndodhin.

Të kuptuarit e fjalëve dhe frazave të vështira. Ndërsa nxënësit studiojnë shkrimet e shenjta, ata mund të ndeshin fjalë ose fraza që janë të panjohura ose të vështira për t’u kuptuar. Mësojuni nxënësve që fjalorët, manualët e nxënësve, poshtëshënimet dhe ndihmat për studimin e shkrimeve të shenjta mund t’i ndihmojnë shpesh ata t’i kuptojnë fjalët dhe përmbajtjen e vështirë të shkrimeve të shenjta.

Përgatitja e nxënësve: Ftojini nxënësit të kujtojnë hollësi rreth pagëzimit të tyre dhe mbase të sjellin një fotografi nëse e kanë një të tillë. Disa nxënës ose prindërit e tyre mund të kenë shkruar një shënim në ditar kur nxënësit u pagëzuan. Mund të jetë interesante që nxënësit ta lexojnë atë shënim në ditar ose të flasin me prindërit e tyre rreth hollësive të pagëzimit të tyre, duke përfshirë ato që nxënësit mund t’i kenë harruar.

Veprimtari të Mundshme të të Mësuarit

Merreni parasysh të tregoni hollësi dhe fotografi të pagëzimit tuaj dhe ftojini nxënësit t’i tregojnë po ashtu.

• Çfarë kujton rreth pagëzimit tënd?

• Si ke ndryshuar shpirtërisht që kur u pagëzove?

Gjej një çast për të përsiatur për përparimin tënd shpirtëror. Ti mund t’i bësh vetes pyetje si: “A po përmirësohet besimi dhe marrëdhënia ime me Atin Qiellor dhe Jezu Krishtin?” apo “Si ndikon ajo që kam mësuar rreth Shpëtimtarit tim te qëndrimi dhe veprimet e mia?” Ndërsa studion kapitullin te Romakëve 6 , përsiat nëse po bëhesh më i ngjashëm me Shpëtimtarin dhe se si Ai mund të të ndihmojë të vazhdosh të rritesh dhe të bëhesh më i ngjashëm me Të.

Pagëzimi me anë të zhytjes simbolizon vdekjen dhe ringjalljen

Të mësosh se si t’i dallosh dhe t’i kuptosh simbolet në shkrimet e shenjta është një aftësi me vlerë. Pali e përdori simbolizmin e pagëzimit me anë të zhytjes për t’i ndihmuar shenjtorët në Romë të kuptonin që ne duhet të heqim dorë nga jeta jonë e vjetër, mëkatare në mënyrë që Jezu Krishti të mund të na ndryshojë dhe të na japë jetë të re nëpërmjet Shlyerjes së Tij.

Lexo te Romakëve 6:3–8 , duke kërkuar simbole që mund të të mësojnë më shumë rreth Shpëtimtarit. Mund të jetë e dobishme të dish se Përkthimi prej Joseph Smith-it i vargut 7 thotë: “Pasi ai që ka vdekur nga mëkati është shfajësuar nga mëkati”.

• Sipas Romakëve 6:3–8 , çfarë përfaqëson për ne në pagëzim zbritja në ujë, varrosja nën ujë dhe dalja nga uji?

Presidenti Rasëll M. Nelson dha mësim:

Official portrait of President Russell M. Nelson taken January 2018

“Ordinancat thelbësore të ungjillit simbolizojnë Shlyerjen. Pagëzimi me anë të zhytjes simbolizon vdekjen, varrosjen dhe Ringjalljen e Shëlbuesit.”

(Russell M. Nelson, “The Atonement”, Ensign, nëntor 1996, f. 35.)

• Si do ta përmblidhje vargun te Romakëve 6:4 si deklaratë e së vërtetës?

Më poshtë është një mënyrë për të përmbledhur vargun te Romakëve 6:4 : Ne mund të ndryshohemi nëpërmjet Jezu Krishtit dhe “të ecim në risinë e jetës”.

• Si mendon, çfarë do të thotë të “ecë[sh] në risinë e jetës”? ( Romakëve 6:4 .)

• Kur e ke ndjerë që nëpërmjet Shpëtimtarit ti ke pasur mundësi të ecësh në risinë e jetës?

• Si mendon, përse Ati Qiellor dhe Jezu Krishti duan që ne të ecim në risinë e jetës?

Merreni parasysh t’u tregoni nxënësve një përvojë vetjake. Mund të jetë e dobishme edhe t’u kujtoni nxënësve të mos i tregojnë mëkatet e kaluara.

Siç është shënuar në vargjet 5–6 , Pali dha mësim që nëpërmjet besëlidhjes dhe ordinancës së pagëzimit, “njeriu ynë i vjetër” ose “trupi i mëkatit” “u kryqëzua me [Jezu Krishtin]” dhe “anul[ohet] … që ne të mos i shërbejmë më mëkatit”.

Shihni pjesën “Veprimtari Plotësuese të të Mësuarit” të këtij mësimi për një ide të mundshme mësimdhënieje rreth marrjes së fuqisë nga Perëndia nëpërmjet bërjes dhe mbajtjes së besëlidhjeve. Merreni parasysh nëse kjo do të ishte e dobishme për t’u bërë me nxënësit.

Gjej një çast për të përsiatur për mëkatet ose dobësitë që të mundojnë që do të doje t’i hiqje nga jeta jote. Ti do t’u rikthehesh këtyre mendimeve më vonë në këtë mësim.

Çfarë ndryshimesh mund të bëj?

• Çfarë lloj ndryshimesh mendon se janë të lehta për t’u bërë? Cilat janë të vështira?

Pali përdori shembullin e Shpëtimtarit që mposhti vdekjen dhe mëkatin për të na mësuar që edhe ne mund t’i mposhtim mëkatet tona nëpërmjet Tij.Lexo te Romakëve 6:9–14 , duke kërkuar mënyrën se si Pali e lidhi vdekjen dhe Ringjalljen e Krishtit me mënyrën se si ne mund ta mposhtim mëkatin.

Shkrimet e Palit mund të jenë të vështira për t’u kuptuar, sidomos kur shumë vargje lexohen me radhë pa ndaluar për ta analizuar mesazhin e tij. Nëse ka numër të mjaftueshëm nxënësish, merreni parasysh t’ia caktoni çdo varg dy ose tre nxënësve për ta lexuar, diskutuar dhe përmbledhur me fjalët e tyre. Nxitini ata të përdorin ndihmat për studimin e shkrimeve të shenjta ose të kërkojnë përkufizimet e çdo fjale apo fraze të vështirë. Më pas kërkojuni grupeve t’ia mësojnë klasës vargun e tyre. Pyetjet vijuese mund të ndihmojnë me disa nga vargjet.

• Ashtu si Jezu Krishti “vdiq për mëkatin një herë” ( vargu 10), ne pagëzohemi vetëm një herë për heqjen e mëkateve tona. Megjithatë, ne mund ta ripërtërijmë çdo javë zotimin tonë për të “e[cur] në risinë e jetës” ( vargu 4) duke marrë pjesë në sakrament. Si të ndihmon kjo ordinancë javore ta tregosh dashurinë tënde për Atin Qiellor dhe Jezu Krishtin?

• Çfarë mendon se donte të thoshte Pali me anë të fjalëve “konsidero[j]eni veten të vdekur për mëkatin, por të gjallë për Perëndinë, në Jezu Krishtin”? ( Vargu 11 .)

• Përse një i ri mund të zgjedhë ta ndjekë këshillën e Palit të shënuar te vargu 12 ? Çfarë bekimesh vijnë nga të jetuarit në këtë mënyrë?

• Fjala gjymtyrët te vargu 13 u referohet pjesëve të trupit tonë. Si mund t’i përdorësh duart, këmbët, kokën dhe zemrën tënde “si mjete drejtësie për Perëndinë”? ( Vargu 13 .)

• Përkthimi prej Joseph Smith-it i pjesës së parë të vargut 14 thotë: “Sepse duke e bërë këtë, mëkati nuk do të ketë më pushtet mbi ju”. ). Si e bën të arritshëm ndjekja e mësimeve të shënuara te vargjet 11–13 premtimin që jepet te vargu 14 ?

Jepuni nxënësve pak kohë për të përsiatur në heshtje se cilat mëkate duan të lënë pas. Për shkak të natyrës së ndjeshme të këtij reflektimi, nxënësve nuk duhet t’u kërkohet t’i diskutojnë mendimet e tyre me klasën.

Ju mund të çliroheni nga mëkati

Lexo te Romakëve 6:16–18, 22–23 , duke kërkuar bekimet e ecjes në risinë e jetës.

• Si i përshkroi Pali bekimet e ecjes në risinë e jetës?

• Ndërsa përpiqesh ta mposhtësh mëkatin nëpërmjet Krishtit, si mendon se do të duket dhe ndihet risia e jetës në Jezu Krishtin?

• Çfarë mund të bësh për të ecur në risinë e jetës duke filluar që sot?

Dëshmoni për dëshirën dhe fuqinë e Shpëtimtarit për t’i ndryshuar zemrat tona teksa përpiqemi të ecim në risinë e jetës.

Komente dhe Informacion për Rrethanat

Cilat janë disa mënyra se si mund të ndryshoj?

Motra Beki Krejvën, ish-Këshilltare e Dytë në Presidencën e Përgjithshme të Të Rejave, dha mësim:

Sister Rebecca L. Craven, second counselor, Young Women general presidency. Official Portrait as of October 2018.

“Në këmbim për pagesën e Tij të paçmueshme për secilin prej nesh, Zoti na kërkon një ndryshim të zemrës. Ndryshimi që Ai kërkon prej nesh, nuk është për dobinë e Tij, por për dobinë tonë. …

Pasi i dëgjuan fjalët e thëna nga mbreti Beniamin, njerëzit e tij thirrën, shpallën se zemrat e tyre kishin ndryshuar, duke thënë: ‘Për shkak të Shpirtit të Zotit të Plotfuqishëm, i cili ka bërë një ndryshim të madh te ne, … ne nuk kemi më prirje të bëjmë keq, por të bëjmë mirë vazhdimisht’ [Mosia 5:2]. Shkrimet e shenjta nuk thonë se ata menjëherë u bënë të përsosur, përkundrazi, dëshira e tyre për të ndryshuar i detyroi ata të vepronin. Ndryshimi i zemrës së tyre nënkuptonte zhveshjen e burrit ose gruas të natyrshme dhe hapjen udhë ndaj Shpirtit teksa u përpoqën fort për t’u bërë më shumë si Jezu Krishti.”

(Beki Krejvën, “Mbajeni Ndryshimin”, Ensign ose Liahona, nëntor 2020, f. 58.)

Veprimtari Plotësuese të të Mësuarit

Këndvështrimi i një pjesëtari të sapopagëzuar

Nëse keni në klasë, lagje ose degë një të kthyer në besim kohët e fundit, ftojeni atë t’ia tregojë klasës përvojën e kthimit në besim dhe mendimet rreth pagëzimit të tij. Sigurohuni që të merrni leje nga udhëheqësi vendor i priftërisë dhe drejtori ose bashkërenduesi zonal ose rajonal përpara se t’ia çoni ftesën.

A mund të mëkatoj tani duke planifikuar të pendohem më vonë?

(Pali dha mësim se “të gjithë mëkatuan dhe u privuan nga lavdia e Perëndisë” ( Romakëve 3:23). Ai dëshmoi gjithashtu se, për shkak të Shlyerjes së Jezu Krishtit, “aty ku mëkati është i tepruar, hiri është akoma më i tepërt” ( Romakëve 5:20). Më pas ai bëri pyetjen retorike: “A të mbetemi në mëkat, që të teprojë hiri?” ( Romakëve 6:1 .) Pali dha përgjigje për pyetjen e tij siç është shënuar te Romakëve 6:2 .

Ftojini nxënësit ta diskutojnë në grupe të vogla problemin e të qëndruarit në mëkat ndërkohë që planifikoni të pendoheni më vonë. Si pjesë e këtij diskutimi ata mund t’u përgjigjen disa ose të gjitha pyetjeve në vijim:

• Çfarë i bën të vazhduarit në mëkat marrëdhënies së një personi me Atin Qiellor dhe Jezu Krishtin?

• Cilat janë disa mënyra se si një i ri mund të përpiqet ta shfajësojë mëkatin ndërkohë që planifikon të pendohet më vonë?

• Cilat janë rreziqet e të mëkatuarit tani, duke e ditur që planifikoni të pendoheni më vonë?

• Si mundet të kuptuarit siç duhet të planit të shpëtimit ose të identitetit dhe qëllimit tonë hyjnor të na ndihmojë ta mposhtim tundimin për të mëkatuar me dashje tani dhe për t’u penduar më vonë?

Si më ndihmon bërja dhe mbajtja e besëlidhjeve me Perëndinë që ta marr “risinë e jetës”?

Mësimet e Mbretit Beniamin në Librin e Mormonit përshkruajnë mënyrat se si ne mund të dallojmë “risinë e jetës” për të cilën Pali dha mësim te Romakëve 6:4 . Pasi mbreti Beniamin u mësoi njerëzve të tij rreth shëlbimit nga mëkati dhe vdekjes nëpërmjet Jezu Krishtit, ai i pyeti nëse ata i besuan fjalët e tij.

Ftojini nxënësit të lexojnë te Mosia 5:2, 5–8 , duke kërkuar përgjigjen e njerëzve dhe atë që mbreti Beniamin u mësoi atyre rreth bekimeve që ne marrim nga Perëndia nëpërmjet bërjes dhe mbajtjes së besëlidhjeve tona.

• Çfarë ndikimi pati tek ta besimi i njerëzve te flijimi shëlbues i Krishtit?

• Çfarë dha mësim mbreti Beniamin rreth mënyrës se si besëlidhjet na ndihmojnë të marrim “risinë e jetës”? ( Romakëve 6:4 .)

Jezu Krishti mund të na japë jetë të re dhe të na çlirojë nga mëkati