Mga Taga-Roma 7–12
“Ang Manluluwas … Pagahinginlan Niya ang Pagkadili-diosnon”
Usahay sa atong panaw sa kinabuhi, kita lagmit mobati og pagkawala sa kadasig o pagkahigawad kon kita mapakyas kon kinsa gayod kita. Uban sa maong pagbati sa kahigawad, si Apostol Pablo misinggit, “Alaut ako nga tawo!” (Mga Taga-Roma 7:24). Bisan pa sa mga kahuyang nga atong nasinati sa mortalidad, kita makasinati og paglaum ug kalinaw diha sa atong pagsalig kang Jesukristo. Kini nga leksiyon makatabang kaninyo nga mapakita ang mas dako nga pagtuo kang Jesukristo aron mabuntog ang inyong mga kahuyang.
Paggamit sa Basahon ni Mormon. Si Nephi gitudloan nga ang Basahon ni Mormon ug uban pang mga kasulatan sa ulahing adlaw moabot aron “motukod sa kamatuoran” sa Biblia ( 1 Nephi 13:40). Ang pagdapit sa mga estudyante sa pagtuon sa mga tudling sa Basahon ni Mormon uban niadtong anaa sa Biblia mahimong makatabang kanila nga mas klarong makita ang mga kamatuoran sa ebanghelyo ni Jesukristo.
Pagpangandam sa estudyante: Dapita ang mga estudyante nga basahon ang Mga Taga-Roma 7:14, 18–19, 24–25 , uban sa 2 Nephi 4:17–20, 26–32 . Hangyoa sila nga moanhi nga andam mopaambit kon giunsa sa tudling sa Basahon ni Mormon pagdugang o pagpatin-aw sa ilang pagsabot sa unsay gitudlo sa Mga Taga-Roma 7. Pahinumdomi ang mga estudyante nga magdala usab og usa ka personal nga kopya sa Basahon ni Mormon ngadto sa klase.
Posible nga mga Kalihokan sa Pagkat-on
Pag-atubang sa mga kahuyang sa mortalidad
Ikonsiderar ang pagpahiangay sa mosunod nga senaryo base sa mga panginahanglanon sa mga estudyante o pagdapit og mga estudyante nga maghimo og ilang kaugalingon nga senaryo mahitungod sa usa ka tinedyer kinsa mibati og pagkawala sa kadasig tungod sa iyang mga kahuyang.
Si Trey usa ka miyembro sa Ang Simbahan ni Jesukristo sa mga Santos sa Ulahing mga Adlaw. Gusto siya nga mosunod kang Jesukristo apan mibati nga siya wala makabuhat og ingon kamaayo sama sa iyang gibuhat sa kasagaran. Kanunay siyang mobati nga sad-an tungod sa iyang mga kahuyang ug mga kabalaka nga siya lagmit dili maayo.
Hunahunaa kon unsa ang imong bation usahay nga susama kang Trey.
-
Sa unsang paagi nga kining mga pagbati makaimpluwensiya sa inyong relasyon sa Langitnong Amahan ug kang Jesukristo, ingon man usab sa laing mga tawo?
-
Nganong importante man ang pagpangita og panabang gikan sa Langitnong Amahan ug kang Jesukristo aron mabuntog ang inyong mga kahuyang ug mga pagkadili hingpit?
Si Presidente Russell M. Nelson nagtudlo nga “ang Ginoo mosabot sa atong mortal nga kahuyang. Kitang tanan usahay masayop. Apan nahibalo usab Siya sa atong talagsaon nga potensyal” (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, May 2021, 102). Samtang magtuon kamo niini nga leksiyon, hinumdomi unsa ang gitudlo ni Presidente Nelson ug pangitaa ang mga kamatuoran nga makatabang kaninyo dihang inyong mailhan ang mortal nga mga kahuyang. Pamalandongi kon sa unsang paagi kini nga mga kamatuoran makadugang sa inyong pagtuo nga si Jesukristo makatabang kaninyo.
Si Apostol Pablo nakasinati usab og mga pagbati sa kahuyang ug sa pagpakigbisog tali sa “unod” ( Mga Taga-Roma 7:18), o pisikal nga mga gana, ug “ang sulod nga tawo” ( bersikulo 22), o pagka-espirituhanon.
Basaha ang Mga Taga-Roma 7:14, 18–19, 24–25 ug ang Hubad ni Joseph Smith alang niining mga bersikulo nga anaa sa Hubad ni Joseph Smith diha sa appendix sa Biblia. Pangita og mga pulong ug hugpong sa mga pulong nga naghulagway sa mga hunahuna ug mga pagbati ni Pablo. Ikonsiderar ang pagmarka sa unsay inyong nakit-an. Timan-i nga diha sa bersikulo 24 “kining kamatayon” nagtumong sa espirituhanong kamatayon, o pagkabulag gikan sa Dios, nga nagagikan sa sala.
-
Sa unsang paagi nga ang mga hunahuna ug mga pagbati ni Pablo susama niadtong tingali anaa kaninyo?
-
Unsa nga mga kamatuoran ang gitudlo ni Pablo?
Usa ka kamatuoran nga tingali inyong mailhan gikan niining mga bersikulo mao nga si Jesukristo makaluwas kanato gikan sa pagkabihag sa sala. Mahimo ninyong isulat kini nga kamatuoran duol sa Mga Taga-Roma 7:24–25 .
-
Sama sa nahimo niini kang Pablo, ngano kaha nga ang paghinumdom niini nga kamatuoran sa dihang kamo nakigbisog sa inyong kaugalingong mga kahuyang makatabang kaninyo nga mobati og dugang pa nga paglaom?
Ang Basahon ni Mormon mao ang usa ka gamhanang himan nga atong magamit sa pagpalig-on sa atong pagsabot sa mga kamatuoran nga gitudlo sa Biblia (tan-awa sa 1 Nephi 13:40 ; 2 Nephi 3:12).
Pananglitan, sa 2 Nephi 4 , si Nephi mipaambit sa mga pagtulon-an nga susama sa mga nag-una nga inyong natun-an gikan kang Pablo diha sa Mga Taga-Roma 7 .
Basaha ang 2 Nephi 4:17–20, 26–32 , nga mangita kon giunsa ni Nephi pagpahayag og mga pagbati nga susama sa kang Pablo.
-
Hain sa mga pulong o hugpong sa mga pulong ni Nephi ang labing mahinungdanon alang kaninyo? Ngano man?
-
Sa unsang paagi ang mga pagtulon-an ni Nephi makatabang kaninyo nga mapaduol sa Langitnong Amahan ug kang Jesukristo diha sa inyong pagpakigbisog sa kahuyang o pagduhaduha sa kaugalingon?
Paggamit sa Basahon ni Mormon aron mas makasabot sa kamatuoran
Kon adunay nahabilin nga panahon sa leksiyon, ikonsiderar ang paggamit sa mosunod nga materyal aron matabangan ang mga estudyante nga makakita og lain pang koneksiyon tali sa mga pagtulon-an gikan ni Pablo ug sa Basahon ni Mormon.
Sama nga ang 2 Nephi 4 nagpalambo sa inyong pagtuon sa mga pagtulon-an ni Pablo diha sa Mga Taga-Roma 7 , daghang laing mga tudling sa Basahon ni Mormon ang makatabang ninyo aron mas makasabot ug makadayeg sa mga pagtulon-an ni Pablo.
Praktisa ang paggamit sa Basahon ni Mormon aron mapalambo ang inyong pagsabot sa mga pagtulon-an ni Pablo pinaagi sa pagpili og duha o daghan pa sa mosunod nga mga tudling gikan sa Mga Taga-Roma aron basahon. Dayon itandi kini diha sa kaubang mga tudling sa Basahon ni Mormon (o pangita og inyong kaugalingong mga tudling nga may kalabotan sa Basahon ni Mormon gamit ang Giya ngadto sa mga Kasulatan). Pangitaa kon giunsa sa mga tudling sa Basahon ni Mormon pagkonpirmar o pagpatin-aw sa mga kamatuoran nga gitudlo sa Mga Taga-Roma.
Ipakita ang mosunod nga tsart aron makita ug magamit sa mga estudyante. Dasiga sila nga mangita usab sa ilang kaugalingong pagpatin-aw sa mga tudling sa Basahon ni Mormon kon ilang mahimo.
|
Mga Taga-Roma |
Basahon ni Mormon |
-
Sa unsang paagi nga ang mga tudling gikan sa Basahon ni Mormon makapalig-on sa inyong pagsabot sa mga pagtulon-an ni Pablo diha sa Mga Taga-Roma?
Pamalandongi ang inyong kasinatian sa pagkakita kon giunsa sa Basahon ni Mormon pagtabang kaninyo sa inyong pagtuon sa Biblia. Tinguhaa ang paggamit sa Basahon ni Mormon aron matabangan kamo sa inyong pagpadayon sa pagtuon sa Bag-ong Tugon.
Komentaryo ug Background nga Impormasyon
Unsaon man ni Jesukristo pagtabang kanako aron mabuntog ang akong mga kahuyang sa mortalidad?
Samtang nagserbisyo sa Unang Kapangulohan, si Presidente Dieter F. Uchtdorf mitudlo:
Daghang tawo ang mawad-an og kadasig tungod kay sila kanunay nga masayop. Nasayud sila sa sinugdan nga “ang espiritu matinguhaon apan maluya ang lawas” [ Mateo 26:41 ]. Misinggit sila uban kang Nephi sa pagpamahayag, “Ang akong kalag nagmagul-anon tungod sa akong kadautan” [ 2 Nephi 4:17 ]. …
Kon ako maghunahuna sa unsay nabuhat sa Manluluwas alang kanato kabahin nianang unang Dominggo sa Pasko sa Pagkabanhaw, buot kong mopataas sa akong tingog ug mosinggit og mga pagdayeg ngadto sa Labing Halangdong Dios ug sa Iyang anak, si Jesukristo!
Ang mga ganghaan sa langit naablihan!
Ang tamboanan sa langit nabuksan!
Karon ug sa kanunay ang grasya sa Dios anaa alang sa tanan kansang mga kasingkasing mapainubsanon ug kansang mga espiritu mahinulsulon [tan-awa sa 3 Nephi 9:19–20 ]. Gihawanan ni Jesukristo ang dalan alang kanato sa pagsaka ngadto sa mga kinatas-an nga dili masabtan sa mortal nga mga hunahuna [tan-awa sa 1 Mga Taga-Corinto 2:9 ].
(Dieter F. Uchtdorf, “Ang Gasa sa Grasya,” Liahona, Mayo 2015, 110)
Sa unsang paagi nga ang Biblia ug ang Basahon ni Mormon nagtinabangay ug nagpakita sa gugma sa Dios alang kanato?
Si Presidente Harold B. Lee (1899–1973) mipasabot:
Ang atong mahangturong Langitnong Amahan, kinsa kanunay nabalaka mahitungod sa espirituhanong kaayohan sa Iyang mga anak, naghatag kanato og kauban nga basahon sa mga kasulatan, nga giila isip ang Basahon ni Mormon, isip usa ka depensa sa mga kamatuoran sa Biblia nga gisulat ug gipamulong pinaagi sa mga propeta sumala sa gisugo sa Dios. …
… Pinaagi niining ikaduha nga saksi kita mas sigurado nga makahibalo sa kahulugan sa mga pagtulon-an sa daang mga propeta ug, sa pagkatinuod, sa Agalon ug sa Iyang mga disipulo samtang sila nagpakabuhi ug nagtudlo sa mga tawo. Kini kinahanglang modasig sa tanan kinsa mahimong matinud-anong nagtinguha sa kamatuoran sa paghiusa niining duha ka sagradong mga kasulatan ug sa pagtuon niini isip usa ka basahon, pagsabot, sama sa atong gibuhat, sa ilang tinuod nga relasyon.
(Harold B. Lee, Ye Are the Light of the World [1974], 89, 91)
Nganong si Pablo miingon nga kita kinahanglan lamang mangumpisal sa ngalan ni Jesus aron maluwas?
Ang Mga Taga-Roma 10:1–13 kanunay nga gikutlo aron pagpanalipod sa posisyon nga kita kinahanglan lamang mangumpisal sa ngalan ni Jesukristo aron maluwas. Hinuon, ang Manluluwas piho nga namulong batok niini nga doktrina sa dihang Siya miingon, “Dili ang tanang magaingon kanako, Ginoo, Ginoo, makasulod sa gingharian sa langit, kondili ang nagatuman sa kabubut-on sa akong Amahan nga anaa sa langit” ( Mateo 7:21).
Dugang pa, si Pablo mihatag og gibug-aton sa kaimportante sa ordinansa sa bunyag sa sayo pa sa iyang sulat ngadto sa mga Taga-Roma (tan-awa sa Mga Taga-Roma 6:1–6) ug nagtudlo usab sa kaimportante sa maayong mga buhat ug sa kausaban sa kasingkasing (tan-awa sa Mga Taga-Roma 2:1, 3, 6–13, 25–29).
Usab, ang pulong nga “kumpisal” sa Mga Taga-Roma 10:9 mahimong mahubad isip “pakigsaad,” ug ang pulong nga “magsangpit” sa Mga Taga-Roma 10:13 mahimong mahubad isip “pagbutang og ngalan” (tan-awa sa James Strong, The New Strong’s Exhaustive Concordance of the Bible, nga makita sa http://lexiconcordance.com/greek/3670.html; http://lexiconcordance.com/greek/1941.html). Kining mga pulong mahimong nagpasabot sa pagsulod ngadto sa mga pakigsaad ug pagdala diha sa atong kaugalingon sa ngalan ni Kristo, nga haom sa ubang mga pagtulon-an ni Pablo (tan-awa sa Mga Taga-Galacia 3:27 ; Mga Taga-Roma 6:14–22) ingon man usab sa may kalabotang mga tudling diha sa Basahon ni Mormon, sama sa Mosiah 5:1–9 .
Dugang nga mga Kalihokan sa Pagkat-on
Mga Taga-Roma 9 ug 11: “Dili ang tanang misanay gikan kang Israel nasakop sa Israel” ( Mga Taga-Roma 9:6)
Ikonsiderar ang pagpahiangay sa pokus sa leksiyon ngadto sa doktrina sa eleksiyon ug pag-orden nang daan. Ang mga estudyante mahimong magtuon sa Mga Taga-Roma 9:1–7 ug 11:1–5, 25–32 kauban sa Guide to the Scriptures nga mga entry “ Election ” ug “ Foreordination ” (sa “Mga Tabang sa Pagtuon” sa scriptures.ChurchofJesusChrist.org). Mahimo nilang pangitaon ang pakigpulong sa komperensiya ni Presidente Nelson nga giulohan og “Ipatigbabaw ang Dios Labaw sa Tanan” (Liahona, Nob. 2020, 92–95) ug ipaambit ang mga panabot nga ilang makit-an kon sa unsang paagi kini nga mga kamatuoran magamit ngadto kanila (tan-awa sa Mga Taga-Roma 8:14–15).
Alternatibong pokus sa leksiyon
Ikonsiderar ang pagpokus niini nga leksiyon sa pagtabang sa mga estudyante nga makasabot sa pipila sa mga hinungdan nga anaa kitay Basahon ni Mormon agig dugang sa Biblia. Ikonsiderar ang pagsugod sa paghulagway og usa ka senaryo diin ang mga estudyante adunay usa ka higala kinsa nag-post sa social media mahitungod kon sa unsang paagi nga wala niya makita ang panginahanglan sa bisan unsang dugang nga mga kasulatan gawas sa Biblia ug mga pangutana nganong adunay nakakita sa panginahanglan sa Basahon ni Mormon.
Ang mga estudyante mahimong mogamit sa mga kasulatan nga gi-reference niini nga leksiyon aron makita kon giunsa sa Basahon ni Mormon pagpatin-aw ug pagkonpirmar sa mga kamatuoran sa Bibliya ug aron makasulat og tubag ngadto sa higala.