Young men and young women walk through Crystal Gardens at Navy Pier in Chicago. There are palm trees and other plants in the background.
Nakasinati na ba kamo og kalisod sa pagbati nga nahiusa sa ubang miyembro sa Simbahan?Ang mga Santos sa Roma kinsa nagpuyo panahon ni Pablo nagagikan sa nagkalainlaing mga kagikan ug mga kultura. Usahay sila adunay mga dili pagsinabtanay ug mga tensiyon sa usa’g usa. Agig tubag, si Pablo miawhag kanila nga “[ma]nagkaangay kamo sa inyong panghunahuna, ang usa ngadto sa usa” (Mga Taga-Roma 12:16). Kini nga leksiyon makatabang ninyo aron makakita og mga paagi aron mahimong mas mahiusa sa ubang mga miyembro sa Simbahan sa Manluluwas.
Pag-ila sa mga baroganan. Kon ang mga estudyante nagkat-on sa pag-ila sa mga baroganan sa ebanghelyo diha sa mga kasulatan, sila mamahimong mas pamilyar sa mga kamatuoran nga magdala kanila ngadto sa Manluluwas. Ang pag-ila sa mga baroganan sa ebanghelyo nagkinahanglan og mahunahunaong paningkamot ug pagbansay. Samtang ilhon sa mga estudyante kini nga mga baroganan, ibalik pagsulti kini nga mga kamatuoran nga klaro ug yano aron matabangan ang mga estudyante nga makahinumdom niini sa umaabot.
Pagpangandam sa estudyante: Dapita ang mga estudyante nga mobasa sa Doktrina ug Mga Pakigsaad 38:27 ug paghunahuna kon nganong ang Ginoo gusto nga ang mga miyembro sa Iyang Simbahan mahiusa.
Posible nga mga Kalihokan sa Pagkat-on
Kitang tanan mahimong magkahiusa
Ipaambit ang mosunod nga senaryo sa klase, o pagpaambit og laing istorya o pananglitan nga naghulagway og usa ka susama nga hagit.
Si Micah ug iyang pamilya nabunyagan tulo ka tuig ang milabay. Nagkinahanglan og pipila ka panahon aron mapahiangay ang pamilya ni Micah sa bag-ong paagi sa kinabuhi isip mga miyembro sa Simbahan, apan sila nakadawat og lig-ong sosyal nga suporta ug pagdawat gikan sa mga miyembro sa ilang branch. Bag-ohay lang, ang amahan ni Micah nakadawat og bag-ong trabaho, ug ang iyang pamilya mibalhin sa lain nga lugar. Si Micah nagtambong og mga kalihokan sa simbahan ug kabatan-onan sa iyang bag-o nga ward sulod sa pipila ka semana, apan naglisod siya sa pagbati nga gidawat didto. Ang mga batan-on daw buotan, apan ang kadaghanan kanila ingon og dugay nang mga miyembro sa Simbahan, ug si Micah nahibulong kon ila ba siyang hukman tungod sa iyang pagkadili hingpit ug kawalay kasinatian sa Simbahan.
Unsa nga tambag ang inyong ihatag kang Micah aron matabangan siya niini nga sitwasyon?
Unsa nga tambag ang inyong ihatag sa kabatan-onan sa bag-ong ward ni Micah?
Si Pablo nagsulat sa iyang epistola ngadto sa mga Taga-Roma sa dihang ang mga miyembro sa Simbahan gikan sa lainlaing mga relihiyon ug kultural nga mga kagikan nagsugod pagsimba nga magkauban. Adunay mga panahon diin kining mga Santos wala magkauyon sa usa’g usa o dili patas nga gihukman ang ubang mga miyembro sa Simbahan kansang mga gipili lahi sa ilaha. Usa sa mga leksiyon nga atong makat-onan gikan sa mga pagtulon-an ni Pablo sa Mga Taga-Roma 12–15 mao nga bisan tuod kitang tanan adunay mga kalainan, ang mga miyembro sa Simbahan makapaningkamot nga magkahiusa pinaagi sa mga pagtulon-an ni Jesukristo.
Unsa ang makapalisod sa pagbati nga mahiusa sa ubang mga miyembro sa Simbahan?
Dapita ang mga estudyante sa paghunahuna sa ilang pagpangandam alang sa klase sa dili pa mangutana sa sunod nga pangutana. Mahimo usab nga makatabang ang pagpabasa kanila og kusog sa Doktrina ug mga Pakigsaad 38:27 .
Nganong sa inyong hunahuna nga importante sa Ginoo nga ang mga miyembro sa Iyang Simbahan mahiusa?
Paghunahuna kon unsa ang inyong gibati nga konektado sa mga tawo sa inyong ward o branch, sa inyong mga klasmeyt sa seminary, o sa laing mga miyembro sa Simbahan. Atol niini nga leksiyon, paghunahuna mahitungod kon unsaon ninyo pagkahimong mas mahiusa sa ubang mga miyembro sa Simbahan sa Manluluwas.
Mga pagtulon-an ni Pablo mahitungod sa paghiusa
Ipakita ang mosunod nga mga hugpong sa mga bersikulo aron tun-an sa mga estudyante. Mahimong makatabang ang pag-assign sa kada hugpong sa mga bersikulo ngadto sa usa ka gamay nga grupo sa mga estudyante.
Aron matabangan ang mga estudyante nga mas mutuhop ang ilang gitun-an, ikonsiderar ang pagdapit kanila sa pagpili og usa ka bersikulo o hugpong sa mga pulong ug pagmugna og usa ka biswal nga representasyon aron mahulagway unsa ang gitudlo niana nga bersikulo. Pananglitan, ang mga estudyante mahimong magdibuho og usa ka litrato o maghimo og usa ka collage nga nagrepresentar sa maong bersikulo.
Dapita ang mga estudyante sa pagpakigbahin sa unsay ilang nakat-onan gikan sa ilang mga pagtuon. Kon ang mga estudyante nagmugna og usa ka biswal nga representasyon, dapita sila nga mopaambit niini ngadto sa uban. Paggamit og mga pangutana sama sa mosunod aron makabaton og makahuluganong panaghisgot mahitungod sa paghiusa.
Unsa ang inyong nakat-onan gikan sa mga bersikulo nga inyong gitun-an nga makatabang kaninyo aron mas mahimong mahiusa sa uban?
Sa unsang paagi nga ang pagpaningkamot nga mahiusa sa uban makatabang kanato nga mahimong mas sama ni Jesukristo?
Unsa nga mga kasinatian gikan sa inyong kinabuhi o sa kinabuhi sa uban ang nagpakita kaninyo sa importansya sa pagkahiusa sa ubang mga miyembro sa Simbahan?
Ngano man?
Paggamit sa inyong nakat-onan
Paghunahuna kon unsa ang inyong nakat-onan o gibati mahitungod sa panaghiusa diha sa inyong pagtuon karon. Paggahin og higayon sa paghimo og usa ka plano kon unsaon ninyo paglakip niining mga pagtulon-an nganha sa inyong kinabuhi. Pagsulat og usa ka tumong kon unsaon ninyo sa pagpaningkamot alang sa panaghiusa sa usa o daghan pa sa mosunod nga mga kahimtang:
Uban sa mga sakop sa inyong klase sa Young Women o korum sa pagkapari
Uban sa mga sakop sa inyong klase sa seminary
Uban sa lain pang mga miyembro sa inyong ward o branch
Mahimo usab nga makatabang ang pagsulat og bisan unsang mga babag nga inyong giatubang sa pagkab-ot sa inyong tumong. Unsaon ninyo sa pagbuntog niadtong mga babag? Sa unsa nga paagi ang Ginoo makatabang?
Dapita ang pipila ka boluntaryo sa pagpaambit sa ilang mga plano diha sa klase. Pangita og mga paagi sa pagdayeg kanila alang sa ilang mga ideya, ug awhaga ang mga estudyante nga sundon ang ilang mga plano. Pagpamatuod sa mga kamatuoran nga gihisgotan karon.
Komentaryo ug Background nga Impormasyon
Unsa ang atong makat-onan gikan sa mga hagit nga giatubang sa Simbahan sa Roma atol sa panahon ni Pablo?
Si Elder Quentin L. Cook sa Korum sa Napulog Duha ka Apostoles mipasabot:
Imahe
Official portrait of Elder Quentin L. Cook. Called to the Quorum of the Twelve Apostles on 6 October 2007.
Ang atong kultura sa Simbahan nagagikan sa ebanghelyo ni Jesukristo. Ang Sulat ni Apostol Pablo ngadto sa mga Taga-Roma makahuluganon. …
… Nagpahimangno si Pablo sa mga Judeo ug sa mga Hentil sa pagsunod sa mga sugo ug paghigugma sa usag usa ug nagmatuod nga ang pagkamatarong mosangpot sa kaluwasan.
Ang kultura sa ebanghelyo ni Jesukristo dili usa ka Hentil nga kultura o Judaic nga kultura. Wala kini gitino pinaagi sa kolor sa panit sa usa ka tawo o kon asa ang usa ka tawo nagpuyo. Samtang nagmaya kita sa managlahi nga mga kultura, kinahanglan nga biyaan nato ang mga aspeto niadto nga mga kultura nga nagsumpaki sa ebanghelyo ni Jesukristo.
Unsa ang mahitabo diha sa atong mga paningkamot nga maghiusa nga mga miyembro sa Simbahan sa Manluluwas?
Si Elder Jorge T. Becerra sa Seventy nagtudlo:
Imahe
Elder Jorge T. Becerra, First Quorum of the Seventy official portrait.
Sa matag ward ug branch nagkinahanglan kita sa usag usa—kadtong kinsa tingali malig-on ug kadtong kinsa tingali nanglimbasog. Ang tanan gikinahanglan ug mga mahinungdanon sa pagpalig-on sa tibuok “lawas ni Kristo.” Kanunay nakong gihunahuna kon kinsa ang wala sa atong mga kongregasyon nga makapalig-on kanato ug makakompleto nato.
Si Sister Sharon Eubank sa Kinatibuk-ang Kapangulohan sa Relief Society mipaambit sa mosunod nga asoy:
Imahe
Official Portrait of Sister Sharon Eubank. Photographed in 2017.
Niadtong 1842, ang mga Santos naningkamot pag-ayo sa pagtukod sa Templo sa Nauvoo. Human matukod ang Relief Society pagka-Marso, si Propeta Joseph Smith kanunay nga moapil sa ilang mga miting aron sa pag-andam nila alang sa sagrado, makahiusang mga pakigsaad nga sa dili madugay ilang himoon diha sa templo.
Pagka-Hunyo 9, ang Propeta “misulti nga mosangyaw siya mahitungod sa kalooy[.] Pananglit nga si Jesukristo ug [ang] balaang mga anghel mosaway kanato tungod sa walay hinungdang mga butang, unsa ang mahitabo kanato? Kita kinahanglang magmaloloy-on ug pasagdan ang walay hinungdang mga butang.” Si Presidente Smith mipadayon, “Nakapasubo kanako nga walay hingpit nga panaghiusa sa pagbati—kon ang usa ka miyembro nag-antus ang tanan mobati niini—pinaagi sa panaghiusa sa pagbati kita makaangkon og gahum sa Dios.” [“Minutes and Discourse, 9 Hunyo 1842,” 61, Joseph Smith Papers].
Kanang gamay nga kapahayag adunay dakong epekto kanako. Pinaagi sa panaghiusa sa pagbati kita makaangkon og gahom sa Dios. Dili nako gusto nga ingon niini ang kalibotan. Dunay daghang butang nga gusto nakong maimpluwensyahan ug mahimong mas maayo. Ug sa prangkang pagkasulti, dunay daghang oposisyon sa unsay akong gilauman, ug usahay daw wala akoy mahimo. Bag-o lang, duna akoy laglom nga mga pangutana sa akong kaugalingon: Unsaon nako nga mas maayong makasabut sa mga tawo sa akong palibut? Unsaon nako pagmugna nianang “panaghiusa sa pagbati” kon lahi kaayo ang tanan? Unsa nga gahom gikan sa Dios ang mahimo nakong magamit kon mas nahiusa lang ko og gamay ngadto sa uban?
Si Elder Patrcik Kearon sa Kapangulohan sa Seventy namulong mahitungod sa paglakip ug panaghigalaay diha sa Simbahan.
Dugang nga mga Kalihokan sa Pagkat-on
Ang Dios nagdahom kanato sa pagpahinungod sa atong kinabuhi ngadto Kaniya ug molikay gikan sa pagpahiuyon ngadto sa kalibotan
Aron matudlo kini nga kamatuoran nga makita sa Mga Taga-Roma 12:1–2 , pagdala sa klase og duha ka sudlanan sa lainlaing mga porma ug usa ka tasa nga tubig. Ibubo ang tubig gikan sa usa ka sudlanan ngadto sa lain, nagpunting kon unsaon sa tubig pagpahiuyon sa mga porma sa sudlanan.
Ipasabot nga niini nga demonstrasyon, ang tubig nagrepresentar sa katawhan, ug ang mga sudlanan nagrepresentar sa lainlaing mga kalibotanon nga tinuhoan ug mga binuhatan. Dapita ang mga estudyante sa pagtubag niini nga pangutana: “Unsa nga mga peligro ang moabot gikan sa padayon nga pagpahiuyon sa kalibotanong mga tinuohan ug mga binuhatan?”
Alternatibong pagsugod sa leksiyon: silhig nga object lesson
Pagdala og silhig ngadto sa klase o pagpakita og litrato niini.
Imahe
A broom in a room at Cove Fort, Utah.
Paghisgot mahitungod sa kaepektibo sa paggamit og silhig alang sa paglimpyo sa salog. Unsa ang mahitabo kon inyong sulayan paglimpyo gamit ang usa lamang ka tukog sa silhig? Dapita ang mga estudyante nga ikonsiderar kon unsa ang matabang kanato sa paghiusa sa mga tukog sa silhig aron kita makasabot mahitungod sa panaghiusa.
