Natintal na ba ka sa paghunahuna sa panahon nga makapahigawad, dili makiangayon, o lisod nga mga sitwasyon kung ang Dios nagpakabana kaninyo? Ang sulat ni Pablo sa mga Santos sa Roma, ang pipila kinsa nag-antos sa makalilisang nga mga pagsulay, naglakip og makapahupay nga mensahe alang ni bisan kinsa nga nag-antos.Kini nga leksiyon makatabang kaninyo nga mobati og paglaom ug kahupayan pinaagi sa gugma sa Langitnong Amahan ug ni Jesukristo samtang nag-atubang ka sa mga pagsulay ug walay kasegurohan.
Ang pagkat-on sa ebanghelyo usa ka kalihokan nga nakasentro sa panimalay. Pangita og mga kahigayonan aron maawhag ang mga estudyante nga mopaambit sa unsay ilang nasinati sa seminary kauban ang ilang mga pamilya ug mopaambit sa unsay ilang nakat-onan sa panimalay kauban ang ilang mga klasmeyt.
Pagpangandam sa estudyante: Dapita ang mga estudyante sa pagbuhat og usa ka butang alang sa usa ka sakop sa pamilya nga nagpakita sa ilang gugma pinaagi sa mga buhat kaysa mga pulong ug andam nga mopaambit sa unsay ilang nakat-onan gikan niini nga kasinatian.
Posible nga mga Kalihokan sa Pagkat-on
Unsa ang imong ipabuhat?
Paghunahuna mahitungod sa unsay isugyot sa usa ka doktor aron makatabang sa mosunod nga mga kondisyon:
Ikonsiderar ang pagdapit sa mga estudyante nga mosugyot sa unsay lagmit nilang irekomendar kon sila mao ang doktor. Mahimong dapiton ang mga boluntaryo ngadto sa atubangan sa klase ug hatagan og usa ka papel nga adunay komon nga pisikal nga sakit sama sa kadtong nalista sa ubos. Sila mahimong maghulagway sa tagsa-tagsa sa ilang sakit ug mangita og pipila ka mubo nga tambag kon unsaon pagtambal ang ilang kondisyon.
Sakit sa tiyan
Nabali nga tudlo sa tiil
Labad sa ulo tungod sa migraine
Sip-on
Tubaga ang mosunod nga mga pangutana:
Unsang piho nga tambag ang lagmit mahatag alang sa matag usa niadtong mga kondisyon?
Unsa ang kinatibuk-ang tambag ang lagmit makatabang sa pagtambal sa tanan niadtong mga kondisyon?
Siyempre, dili tanang mga pagsulay pisikal ang kinaiya. Daghang mga tawo ang nag-antos sa mental, emosyonal, ug espiritwal nga mga hagit. Ang atong Manluluwas nasayod unsaon sa pagtabang ug paglig-on ang matag usa kanato, bisan unsa pa ang atong gipanlimbasogan. Samtang ang mga pagsulay sa matag tawo talagsaon, ang Dios nagtudlo kanato og mahangturong mga kamatuoran nga makatabang ug makahupay kanato sa bisan unsang malisod nga sitwasyon.Sa inyong journal sa pagtuon, paghimo og mubo nga listahan sa mga pagsulay nga gusto ninyo o inyong mga minahal nga tabangan.
Ikonsiderar ang pagpasa og mga piraso sa papel ug pagdapit sa matag estudyante nga dili magpaila nga mosulat og usa ka pagsulay nga ilang giantos o giantos sa usa ka minahal. Pahibaloa ang mga estudyante nga ang ilang gisulat mahimong ipaambit nga dili mailhan sa klase. Kolektaha ang mga papel, basaha kini sa hilom, ug isulat sa pisara ang daghang mga pagsulay nga labing importante—ilabi na kadtong gihisgotan sa sobra pa sa usa ka estudyante. I-refer ang mga estudyante niini nga listahan samtang sila motubag sa mosunod nga pangutana ug sa hustong mga higayon sa tibuok leksiyon.
Unsa ang nahibaloan na ninyo mahitungod sa Langitnong Amahan, ni Jesukristo, ug sa plano sa kaluwasan nga nakatabang ninyo niining mga pagsulay? Sa unsang paagi kana nga kahibalo nakatabang kaninyo?
Samtang ang inyong pagpamatuod wala makapamenos sa katinuod, kasakit, o kalisod sa mga pagsulay nga nasinati ninyo ug sa inyong mga minahal, kini makahatag og paglaom, kahupayan, ug usa ka mahangturong panglantaw atol niadtong mga pagsulay.
Ikonsiderar ang pagpakita sa mosunod nga mga pakisayran sa kasulatan.
Pipila lang ka tuig human mipadala si Pablo sa iyang epistola [sulat] ngadto sa mga taga Roma, ang mga Santos sa Roma nag-antos og makalilisang nga mga pagpanggukod. Basaha ang Mga Taga-Roma 8:18, 24–25, 28, 31–39 , ug markahi ang kada hugpong sa pulong nga sa inyong pagtuo makatabang o makahupay sa usa ka tawo, bisan pa sa ilang piho nga mga kalisdanan.
Dapita ang mga estudyante sa pagkompleto sa mosunod nga kalihokan diha sa ilang mga journal sa pagtuon.
Pagrekord og usa ka hugpong sa pulong gikan niini nga mga bersikulo nga nakapadayeg ninyo. Nganong gipili ninyo kana nga hugpong sa pulong?
Niining puntoha, dapita ang daghang mga estudyante aron mopaambit sa hugpong sa pulong nga ilang narekord. Sa ilang pagpaambit, ikonsiderar ang pagpunting og piho nga mga pagsulay diha sa listahan sa pisara ug mohangyo kanila sa pagpasabot kon giunsa niining mga kamatuoran nga anaa sa hugpong sa pulong nga ilang naila pagtabang ug paghupay sa usa ka tawo nianang piho nga sitwasyon.
Irekord kon sa unsang paagi nga ang pagkasayod sa mga kamatuoran nga gitudlo nianang hugpong sa mga pulong makatabang kaninyo ug sa inyong minahal sa pipila sa inyong piho nga mga kalisdanan.
Ikonsiderar ang pagmemorya sa hugpong sa mga pulong nga inyong gipili. Mahimo usab kang magmugna og inadlaw nga pahinumdom niining hugpong sa mga pulong diha sa elektronik nga aparato o isulat kini ug ibutang kini diin inyong makita adlaw-adlaw alang sa sunod nga pipila ka mga adlaw.
Ang mosunod nga seksiyon sa leksiyon nagpokus sa usa ka hugpong sa mga pulong nga makita sa Mga Taga-Roma 8:39 . Ayaw kahadlok sa pagpokus sa usa o daghan pang lain-laing mga hugpong sa mga pulong o mga kamatuoran nga gitudlo sa Mga Taga-Roma 8 kon sila mas may kalabotan sa mga estudyante.
Ang gugma sa Langitnong Amahan ug ni Jesukristo
Sa dili pa ipaambit ang mosunod nga kamatuoran, dapita ang mga estudyante nga nakakompleto sa sugyot sa pagpangandam sa estudyante aron mopaambit unsay ilang gibuhat sa pagpakita sa ilang gugma alang sa usa ka tawo.
Usa sa mga hugpong sa mga pulong nga lagmit inyong namarkahan niining mga bersikulo nagtudlo sa kamatuoran nga “[walay maka-] pahimulag kanato gikan sa gugma sa Dios” ( Mga Taga-Roma 8:39).
Ang Langitnong Amahan ug si Jesukristo gusto nga kamo mahibalo nga Sila nahigugma kaninyo. Sila nagpakita nianang maong gugma pinaagi sa mga buhat ug mga pulong.
Sumala sa Mga Taga-Roma 8:32 , unsa ang gibuhat sa Langitnong Amahan aron mapakita nga Siya nahigugma kaninyo?
Basaha ang tudling sa doktrinal nga kahanas nga makita sa Juan 3:16 , ug matikdi unsa ang gitudlo sa Manluluwas mahitungod sa rason sa pagpadala sa Langitnong Amahan sa Iyang Anak dinhi sa yuta. Mahimo kamo nga mo-cross reference o mo-link niini nga tudling ngadto sa Mga Taga-Roma 8:32 .
Aron matabangan ang mga estudyante nga mobati nga ang Espiritu Santo mopamatuod ngadto kanila sa gugma sa Dios, ikonsiderar ang pagdapit kanila nga mokanta o maminaw sa kanta sa Primary “Mipadala sa Bugtong Anak” (Songbook sa Mga Kabataan, 34–35).
Kanus-a ninyo gibati ang gugma sa Langitnong Amahan ug ni Jesukristo diha sa inyong kinabuhi? Sa unsang paagi ang Ilang gugma nakatabang kaninyo sa inyong mga kalisdanan?
Ikonsiderar ang pagpaambit og usa ka personal nga pananglitan kon sa unsang paagi ang pagsabot sa gugma sa Dios nakatabang panahon sa kalisdanan.
Sa inyong journal sa pagtuon, irekord unsa ang inyong nakat-onan karon mahitungod sa Langitnong Amahan ug kang Jesukristo nga gusto ninyong mahinumdoman. Mahimo usab kamong magsulat og usa ka mubo nga sulat ug ihatag kini sa usa ka sakop sa pamilya o higala kinsa makabenepisyo gikan sa usa ka butang nga inyong nakat-onan o nabati karon.
Komentaryo ug Background nga Impormasyon
Unsa ang buot ipasabot nga ang pag-antos nga atong giagian sa yuta “dili takus nga itandi sa himaya nga ipadayag ra unya kanato”? ( Mga Taga-Roma 8:18)
Si Sister Linda S. Reeves, kanhi Ikaduhang Magtatambag sa Kinatibuk-ang Kapangulohan sa Relief Society, mitudlo:
Imahe
Official portrait of Linda S. Reeves, sustained at the April 2012 general conference as second counselor in the Relief Society general presidency, October 2012. Released April 2017 General Conference.
Mga sister, wala ko masayud nganong daghan kita og mga pagsulay, apan kini ang akong personal nga gibati nga ang ganti dako kaayo, hilabihan ka mahangturon ug walay katapusan, hilabihan ka malipayon ug lapas pa sa atong panabut nga nianang adlaw sa pagganti, atong bation nga moingon ngadto sa atong maloloy-on, mahigugmaong Amahan, “Kadto lang ba ang tanan nga gikinahanglan?” Ako nagtuo nga kon kada adlaw mahinumdom ug maila nato ang kadako sa gugma sa atong Langitnong Amahan ug sa atong Manluluwas alang kanato, andam kitang mobuhat sa bisan unsa aron mahibalik og usab sa Ilang presensya, gilibutan sa Ilang gugma sa kahangturan. Unsay kapuslanan … sa atong giantus dinhi kon, sa katapusan, kadtong mga pagsulay mao gayud ang mga butang nga mopasarang kanato alang sa kinabuhing dayon ug kahimayaan didto sa gingharian sa Dios uban sa atong Amahan ug Manluluwas?
Sa unsang paagi nga ang atong mga pagsulay “alang sa [atong] kaayohan”? ( Mga Taga-Roma 8:28)
Si Elder James B. Martino sa Seventy miingon:
Imahe
Official Portrait of Elder James B. Martino. Photographed March 2017.
Ang atong Langitnong Amahan, nga nagmahal kanato sa hilabihan ug sa hingpit, nagtugot kanato nga makabaton og mga kasinatian nga makapahimo kanato sa pagpalambo sa mga kinaiya ug mga hiyas nga atong gikinahanglan aron mahimong mas mahisama ni Kristo. Ang atong mga pagsulay moabut sa daghang mga matang, apan ang matag usa nagtugot kanato nga mas mahisama sa Manluluwas samtang nagkat-on kita sa pag-ila sa maayo nga nagagikan sa matag kasinatian. Sa atong pagsabut niini nga doktrina, atong nabatunan ang mas dako nga kasigurohan sa gugma sa atong Amahan. Mahimong dili kita masayud niining kinabuhia nganong nag-atubang kita sa unsay atong gisagubang, apan atong bation ang kamasaligon nga kita motubo gikan sa kasinatian.
Unsa ang buot ipasabot nga walay “makapahimulag kanato gikan sa gugma sa Dios”? ( Mga Taga Roma 8:39)
Si Presidente Thomas S. Monson (1927–2018) miingon:
Imahe
Official portrait of President Thomas S. Monson, 2008.
Ang inyong Langitnong Amahan nahigugma kaninyo—matag usa ninyo. Kana nga gugma dili gayud mausab. Dili kini maimpluwensyahan sa inyong panagway, mga kabtangan, o kantidad sa kwarta nga anaa sa inyong bank account. Dili kini mausab sa inyong mga talento ug mga abilidad. Anaa ra kini. Anaa kini alang kaninyo kon kamo naguol o malipayon, nawad-an sa pagla[o]m o mala[o]mon. Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay.
Tungod kay ang Dios mahigugmaon kaayo, Iya bang luwason ang tanan bisan pa sa ilang mga pagpili?
Si Elder D. Todd Christofferson sa Korum sa Napulog Duha ka Apostoles mitudlo sa mosunod mahitungod sa gugma sa Dios:
Imahe
Official portrait of President Thomas S. Monson, 2008.
Ang gugma sa [Dios] gihulagway sa kasulatan isip “dako nga katingalahan nga gugma,” “hingpit nga gugma,” “matubsanon nga gugma,” ug “gugma nga walay katapusan.” Mas maayo kini nga mga termino tungod kay ang pulong nga walay kondisyon maghatud og sayop nga mga impresyon mahitungod sa balaang gugma, sama sa, mouyon ra ang Dios sa tanang butang ug dili ra kita hukman kay ang Iyang gugma walay kondisyon, o ang Dios walay pangayoon gikan kanato tungod kay ang Iyang gugma walay kondisyon, o ang tanan luwas na sa langitnong gingharian sa Dios tungod kay ang Iyang gugma walay kondisyon. Ang gugma sa Dios walay sukod ug kini mohangtud, apan kon unsay kahulugan niini sa matag usa kanato mag-agad kon unsaon nato sa pagsanong ang Iyang gugma.
Ang Basahon ni Mormon mikompirmar ug mipatin-aw sa mga kamatuoran nga gitudlo diha sa Biblia
Sa milabay nga leksiyon, ang mga estudyante mahimong dapiton sa paggamit sa Basahon ni Mormon aron matabangan sila nga mas makasabot sa mga sulat ni Pablo o lain pang mga biblikanhong tudling.
Ikonsiderar ang pagdapit sa mga estudyante sa pagpraktis niini nga kahanas pinaagi sa pagpangita og mga tudling sa Basahon ni Mormon nga nagkompirmar ug nagpatin-aw sa mga kamatuoran nga ilang nailhan sa Mga Taga-Roma 8 . Pipila ka posibleng mga tudling naglakip sa 1 Nephi 1:1 ; Alma 31:31 ; Alma 36:3 .
Ang gugma sa Dios ug ang mga panalangin nga Iyang gitanyag kanato
Ikonsiderar ang pagtanyag og usa ka gamayng ganti sa tanang anaa sa klase kinsa andam mokompleto og usa ka yano nga tahas. Kon bisan kinsa modesisyon nga dili mokompleto sa maong tahas, pangutan-a ang mga estudyante kon kini ba dili patas o nagmatuod nga ang estudyante dili parehas nga gihigugma kon sila dili makadawat sa susamang ganti sama sa mga estudyante nga nakakompleto sa maong tahas.
Ikonsiderar ang paggamit sa pamahayag ni Elder Christofferson nga makita sa “Komentaryo ug Background nga Impormasyon” nga seksiyon aron matabangan ang mga estudyante nga makakita nga ang atong mga pagpili makatampo sa mga panalangin nga atong nadawat.
