“Faatomuaga,” Tala’i La’u Talalelei

Ua faatonuina e le Alii Ana auauna, “e talai atu la’u talalelei e ala i le Agaga, le Faamafanafana lea na auina atu e aoao atu le upu moni” (Mataupu Faavae ma Feagaiga 50:14).

Tala’i La’u Talalelei ua mamanuina e fesoasoani ia te oe e faataunuu ai lou faamoemoega o se faifeautalai. E taulai atu i mea taua o le galuega faafaifeautalai. E le taliina ai fesili uma pe tuuina mai ai se taitaiga mo tulaga uma o le a fetaiai ma oe. Peitai, o se punaoa taua mo oe i le tuputupu a’e i le mana ma le tomai faaleagaga. Suesue ma faaaoga aoaoga faavae ma mataupu faavae o le talalelei o loo maua i tusitusiga paia ma i lenei tusi.

Ua faatulagaina le Tala’i La’u Talalelei e fesoasoani ia te oe i auala nei:

• Malamalama i lou faamoemoega o se faifeautalai

  • Mataupu 1: Faataunuu Lou Faamoemoega o se Faifeautalai

• Aoao ma aoao atu le aoaoga faavae

  • Mataupu 3: Suesue ma Aoao Atu le Talalelei a Iesu Keriso

• Tuputupu a’e i lou atina’ega faaleagaga ma le liua faaletagata lava ia

  • Mataupu 2: Suesue i Tusitusiga Paia ma Oofu i le Ofutau o le Atua

  • Mataupu 4: Saili ma Faalagolago i le Agaga

  • Mataupu 5: Faaaoga le Mana o le Tusi a Mamona

  • Mataupu 6: Saili Uiga Faa-Keriso

• Faaleleia lou tomai e valaaulia ai ma fesoasoani i tagata ia maua le talalelei toefuataiina

  • Mataupu 7: Aoao Lau Gagana o le Misiona

  • Mataupu 8: Faataunuu le Galuega e ala i Sini ma Fuafuaga

  • Mataupu 9: Saili Tagata e Aoao

  • Mataupu 10: Aoao Atu e Fausia le Faatuatua ia Iesu Keriso

  • Mataupu 11: Fesoasoani i Tagata e Osia ma Tausia Tautinoga

  • Mataupu 12: Fesoasoani i Tagata e Saunia mo Papatisoga ma Faamauga

  • Mataupu 13: Ia Galulue Faatasi ma Taitai ma Tagata o Au Paia e Faatu le Ekalesia

Suesue pea lava pea i mataupu i lau misiona atoa. Iloilo au galuega. Seti ni sini ma fai ni fuafuaga ina ia ausia ai na sini. O faifeautalai o e saunia i latou lava i aso taitasi ma faaleleia e le aunoa, o le a faamanuiaina olaga o i latou o loo latou aoaoina ma auauna atu i ai. O le a latou maua foi faamanuiaga i o latou lava olaga.

Avanoa mo Suesuega ma le Aoaoina

O suesuega mataalia i le taimi o lau misiona o le a fesoasoani ia te oe e faamalosia ai lau molimau o le talalelei ma avea ai o se soo faamaoni sili atu o Iesu Keriso.

O le suesueina o tusitusiga paia ma le Tala’i La’u Talalelei o le a fesoasoani ia te oe e aoao atu ai ma le mana faaleagaga. O le a fesoasoani foi ia te oe e faia ai lau aoaoga ia talafeagai ma manaoga o tagata taitoatasi.

O suesuega taua ma avanoa e aoao ai e aofia ai:

• Suesuega Faaletagata Lava Ia.

• Suesuega Faalesoa.

• Felafolafoaiga Faalesoa.

• Fonotaga faamaopoopo a le itu.

• Konafesi faalesone

• Aufono a taitai o le misiona (mo taitai faifeautalai talavou).

Most days, your missionary schedule includes time for personal and companion study. Tagai i Tulaga Faatonuina Faafaifeautalai mo Soo o Iesu Keriso, 2.4, mo faamatalaga e uiga i au faatulagaga o aso taitasi.

O mea e te aoaoina i suesuega faaletagata lava ia o le a fesoasoani ia te oe i suesuega faalesoa ma isi avanoa e aoao ai o loo lisi atu i luga. I nei tulaga tou te “aoao i le tasi mataupu faavae o le malo” (Mataupu Faavae ma Feagaiga 88:77).

Manatu e Faaleleia Ai Au Suesuega o le Tala’i La’u Talalelei

O le Tala’i La’u Talalelei e lalagaina faatasi tusitusiga paia ma mataupu faavae o le talalelei e fesoasoani ia te oe ia iloa le Faaola ma Lana talalelei. Ua faamoemoe e fesoasoani e tata’i mai oe i totonu o tusitusiga paia ma faatamaoaigaina lau suesuega o tusitusiga paia. Suesue mau faasino i mataupu taitasi i lau misiona atoa.

O mataupu taitasi i le Tala’i La’u Talalelei e aofia ai manatu ma gaoioiga e fesoasoani ia te oe e suesue ma faaaoga mea o loo e aoaoina. Faaaoga mea nei i au suesuega faaletagata lava ia ma faalesoa (tagai i le Tulaga Faatonuina Faafaifeautalai, 2.4). E mafai foi ona e faaaogaina i taimi o fonotaga a aufono a le itu ma konafesi faalesone. O le a sili atu ona aoga lau suesuega pe a e maua ni auala e faaaoga ai mea ua e aoaoina.

E aoga le i ai o se fuafuaga mo au suesuega faaletagata lava ia. E mafai ona e fatuina lau lava fuafuaga e tuuina atu ai le faamuamua i mataupu faavae o le talalelei e te manao e malamalama atili i ai. E mafai foi ona faatulaga au suesuega i mataupu i le Tala’i La’u Talalelei. Mo se faataitaiga, e mafai ona e faaaogaina lesona i le mataupu 3 e taiala ai lau suesuega o aoaoga faavae ma mataupu faavae o le a e aoao atu. E tatau ona e iloa lelei nei lesona ina ia mafai ona e aoao atu e ala i le Agaga i au lava upu.

Tusi ni faamatalaga a o e suesue. Faaaoga se pepa po o se api talaaga mo le suesueina faaeletonika (e pei o le Gospel Library) e fesoasoani e te malamalama ai, faamanino, ma manatua ai mea o loo e aoaoina.

Ia amata lau suesuega i le tatalo mo le Agaga Paia ina ia fesoasoani ia te oe e aoao. O le a Ia aumaia le atamai, malamalama, ma le talitonuga maumaututu lea o le a faamanuiaina ai lou olaga ma mafai ai ona e faamanuiaina olaga o isi. Tatala lou mafaufau ma lou loto i uunaiga ma manatu e te maua mai ia te Ia. Ia aofia ai nei malamalamaaga i au faamatalaga tusitusia.

Iloilo e le aunoa lau api talaaga o suesuega e manatua ai aafiaga faaleagaga, tagai i malamalamaaga fou, ma iloa ai lou tuputupu a’e.

Polokalama o le Tala’i La’u Talalelei

Faaaoga le polokalama Tala’i La’u Talalelei e fesoasoani ai ia te oe e faaaoga mataupu faavae o loo e aoaoina. O loo maua lenei polokalama i luga o lau telefoni feaveai. O loo i ai vaega e fesoasoani ia te oe e faataunuu lelei ai lou faamoemoega faafaifeautalai. O nei vaega ua aofia ai:

• Faamatalaga e uiga i manaoga ma le alualu i luma o tagata o loo e aoaoina.

• O se nofoaga e tusifaamaumau ai lou alualu i luma agai i sini o faailoilo autu.

• O se kalena e faamaumau ai au fuafuaga ma faatulaga gaoioiga.

• O se faafanua o lau eria ma isi faamatalaga taua e fesoasoani ia te oe e ausia ai au sini.

O le Tala’i La’u Talalelei e aofia ai le tele o manatu mo le faaaogaina o le polokalama e fesoasoani ia te oe e saili, aoao atu, ma papatiso tagata

Faaaogaina o le Tala’i La’u Talalelei e Tagata o le Ekalesia

O le Tala’i La’u Talalelei o se punaoa taua e le mo na o faifeautalai ae mo tagata uma o le Ekalesia. Mo se faataitaiga, o le suesueina o le a fesoasoani i tagata o le ekalesia e:

• Aoao mai ma aoao atu le talalelei a Iesu Keriso (suesue le mataupu 1, 2, 3, ma le 10).

• Tali fesili e uiga i le talalelei (suesue le mataupu 3 ma le 5).

• Malamalama atili e uiga i le sailia ma le faalagolago i le Agaga Paia (suesue le mataupu 4).

• Malamalama i le mana o le Tusi a Mamona (suesue le mataupu 5).

• Saili uiga faa-Keriso (suesue le mataupu 6).

• Faataunuu lo latou tiutetauave faalefeagaiga e faasoa atu le talalelei e ala i le ola ai i mataupu faavae o le alofa, faasoa atu, ma valaaulia (suesue le mataupu 9 ma le 13).

• Fausia le lotogatasi ma faifeautalai faamisiona (suesue i le mataupu 13).

O le suesueina o le Tala’i La’u Talalelei—aemaise lava le mataupu 3—o le a faapitoa ona aoga mo le autalavou ma tagata matutua o loo sauniuni mo le galuega faafaifeautalai.