”Mataupu 8: Faataunuu le Galuega e ala i Sini ma Fuafuaga,“ Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

”Mataupu 8,“ Tala’i La’u Talalelei

Mataupu 8

Faataunuu le Galuega e ala i Sini ma Fuafuaga

Manatunatu i le Mea Lenei

Aisea e manaomia ai lo’u faatutuina o ni sini?
E mafai faapefea e faailoilo autu mo le liua ona fesoasoani ia te a’u e taulai atu ai i le alualu i luma faaleagaga o tagata taitoatasi?
E faapefea ona ou faatutuina ni sini, fai ni fuafuaga e faataunuu ai, ma faatino a’u fuafuaga?
Pe faapefea ona ou faafoeina fuafuaga faalevaiaso ma faaleaso?
E mafai faapefea ona ou faaaogaina le polokalama o le Tala’i La’u Talalelei e fesoasoani ai ia te a’u e faataunuu le galuega?
O le a le mataupu faavae o le tali atu? O le a faapefea ona faamanuiaina ai a’u taumafaiga?

Ua tofia oe e fesoaoani i le galuega a le Alii i se eria patino. E finagalo o Ia ia e faamanuiaina tagata taitoatasi i Lona alofa ma le upumoni. E finagalo o Ia ia e valaaulia ma fesoasoani ia i latou ia o mai ia te Ia.

Ua aoao mai le Alii e “tatau ona tatou auai ma le naunautai i lenei faamoemoega lelei.” Ua Ia talosagaina oe ia e ”faia mea e tele i lo outou lava loto malie, ma aumai le amiotonu tele” (Mataupu Faavae ma Feagaiga 58:27; tagai fuaiupu 26–29). Fai mea uma e te mafaia e tuua ai uarota po o paranesi taitasi lea e te galue malosi ai nai lo le taimi na e taunuu ai.

O le a fesoasoani lenei mataupu ia te oe e aoao ai pe faapefea ona faatutu ni sini, fai ni fuafuaga e faataunuu ai, ma faatino ma le filiga au fuafuaga. O loo faamatala mai ai faailoilo autu mo le liuaina, lea e taialaina au taumafaiga e fesoasoani i fanau a le Atua ia alualu i luma faaleagaga. Ona tuuina atu lea o se faagasologa faigofie o le setiina o sini e mafai ona e faaaogaina i vaega uma o le galuega faafaifeautalai, e aofia ai au sini patino ma faalesoa. O loo otooto atu ai foi le auala e faatautaia ai faatasi ma lau soa ia vasega faalevaiaso ma fuafuaga i aso taitasi.

O le aoao e faatutu ni sini ma faia ni fuafuaga e mafai ona faamanuiaina ai oe i lou olaga atoa. E mafai ona fesoasoani ia te oe e osia ma tausia feagaiga ma le Atua, auauna atu ma le faamaoni i le Ekalesia, tulitulimatāgauina aoaoga, tuputupu a’e i au galuega, ma fausia se aiga malosi.

Suesuega o Tusitusiga Paia

O le a se mea e mafai ona e aoao mai mau nei e uiga i le fuafuaina e fesoasoani e faataunuu le galuega a le Atua?

Fesoasoani i Isi ia Liua i le Faaola

Taulai Atu i Lou Faamoemoega o se Faifeautalai

Atonu sa e mafaufau pe o lē fea o au mau matafaioi faafaifeautalai e sili ona taua. O se fesili lelei lenei e mafaufau i ai a o e setiina ni sini ma fuafua i vaiaso taitasi ma aso taitasi. Ina ia fesoasoani e taliina, mafaufau i lou faamoemoega o se faifeautalai:

“Valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”

Tuu atu i lou faamoemoega faafaifeautalai e taiala au sini ma fuafuaga. Taulai atu i auala e mafai ona e fesoasoani ai i tagata taitoatasi e faaaoga lo latou faitalia e liua ai i le Faaola ma talia Lana talalelei.

Saili le taitaiga a le Agaga ma fefautuaai ma lau soa a o e setiina ni sini ma fai ni fuafuaga. Ona tulitatao lea i au fuafuaga ma faaaoga lelei lou taimi.

“Tatou te le tala’i ma aoao atu ina ia ’aumai ai tagata i le Ekalesia’ pe ia faateleina ai foi le faitau aofai o le Ekalesia. Tatou te le talai ma aoao atu ina ia faatauanauina ai tagata ina ia ola i ni olaga sili atu…. Tatou te valaaulia i latou uma ina ia o mai ia Keriso e ala i le salamo ma le papatisoga ma le faamauga ina ia tatalaina ai faitotoa o le malo selesitila i atalii ma afafine o le Atua. E leai lava se isi e mafai ona faia lenei mea” (“Dallin H.Oaks, “O le Faamoemoega o le Galuega Faafaieautalai,” faasalalauga faasatelite a faifeautalai, Ape. 1995).

Suesuega o Tusitusiga Paia

Na faapefea ona faataunuu e nei faifeautalai ma perofeta a latou fuafuaga faatasi ai ma le fesoasoani a le Alii?

Ogatusa ma Faailoilo Autu mo le Liuaina

Ua faailoa mai e taitai o le Ekalesia ni faailoilo autu se ono mo le liuaina. O faailoilo autu e fesoasoani ia te oe e taulai atu ai i le alualu i luma faaleagaga o fanau a le Atua. Ua faamoemoe e fesoasoani ia te oe e faaogatusa au taumafaiga i aso taitasi ma lou faamoemoega faafaifeautalai.

O faailoilo autu mo le liuaina o loo faaali atu i lalo.

	Tagata Fou ua Aoaoina. O tagata taitoatasi (e le’i papatisoina) o lē sa mauaina se lesona i se vaiaso na atofaina (ae sa le’i aoaoina i le tolu masina ua tuanai) ma taliaina se taimi faatulagaina faapitoa e toe foi mai ai. O se lesona e masani lava ona aofia ai se tatalo (pe a talafeagai), le aoaoina e lē itiiti ifo ma le tasi le mataupu faavae o le talalelei, ma tuuina atu se valaaulia.
	O Lesona ma se Tagata o le Au Paia o Auai Ai. O le aofai o lesona i se vaiaso atofaina lea na aoaoina ai se tagata (e le’i papatiso) ma auai ai se tagata o le au paia.
	Tagata o Loo Aoaoina o e Auai i le Sauniga Faamanatuga. O tagata taitoatasi (e le’i papatisoina) o loo e aoaoina sa auai i le sauniga faamanatuga i se vaiaso atofaina.
	Tagata ma se Aso e Papatiso ai. O tagata taitoatasi ua ioeina ina ia papatiso ma faamauina i se aso faapitoa
	Tagata O E Ua Papatisoina ma Faamauina O tagata liliu mai taitoatasi o e na mauaina sauniga o le papatisoga ma le faamauga ma o e na auina atu faaeletonika le fomu i se vaiaso atofaina (Tagai i le mataupu 12 mo le faauigaga o se papatisoga liliu mai ma mo faamatalaga i le fatuina o faamaumauga.)
	Tagata Fou ua Auai i le Sauniga Faamanatuga. O tagata fou taitoatasi o le ekalesia o e na auina atu o latou fomu o le papatisoga ma le faamauga i totonu o le 12 masina ua tuanai, o e sa auai i le sauniga faamanatuga i se vaiaso na atofaina

I le aotelega, tuu atu le faamuamua i le fesoasoani i tagata e filifili e auai i nei aafiaga. Faaogatotonu au taumafaiga i gaoioiga nei:

O i latou e fesoasoani ia te oe e saili tagata fou e aoao
O i latou e fesoasoani i tagata ia agai i luma i le osia ma le tausia o feagaiga
O i latou e fesoasoani i tagata o e ua papatisoina ma faamauina i le tausaga ua tuanai

Afai e le mafai ona e iloa pe faapefea e au taumafaiga ona fesoasoani i se tagata ia alualu i luma i se auala o loo atagia mai i au faailoilo autu, iloilo pe o le gaoioiga o se faaaogaina lelei o lou taimi.

Mo tagata e itiiti sou taimi e faaaluina ai, ia faaauau pea ona faafailele lo latou fiafia i le talalelei. E mafai ona e valaaulia tagata e aapa atu ia i latou. E mafai foi ona e faaaogaina tekinolosi e uuna’ia ai i latou ma faaauau ai ona auauna atu ia i latou. Tagai i le “Faaaogaina oTekinolosi” i le mataupu 9 mo ni manatu faaopoopo.

“O le faamoemoega autu lava o le fuafuaina ma le setiina o sini o le faia lea o ni soo—o lona uiga, o le i ai o ni tagata liliu mai faapaiaina o e osia ma tausia feagaiga paia, e amata i se feagaiga o le papatisoga e taitai atu ai i feagaiga o le malumalu” (Quentin L. Cook, “Purpose and Planning,” mission leadership seminar, June 25, 2019).

Faatutu Sini o Faailoilo Autu ma Fai Fuafuaga

I le taimi o fuafuaga faalevaiaso, e faatutu ai e oe ma lau soa ni sini mo faailoilo autu uma. O au sini autu o faailoilo e tatau ona atagia mai ai lou manao e fesoasoani i isi tagata ia iloa faamanuiaga o le liuaina.

Faatutu ni sini ma fai ni fuafuaga e fai ni mea i lou puleaina lea e mafai ona tosina ai taunuuga o faailoilo autu. Mo se faataitaiga:

E mafai ona e setiina se sini autu o faailoilo e amata aoao atu ai se fuainumera patino o tagata fou i le aluga o le vaiaso. Pe e te ausia lena sini e faalagolago i le faitalia o isi tagata. Ae fai le mea o loo e puleaina ina ia ausia ai. O se tasi auala o le faatu o se sini e talanoa ma se aofaiga faapitoa o tagata fou i aso taitasi. Ona fuafua lea pe o le a faapefea ona e faia. Tagai i manatu o i le Faaopoopoga 2 o lenei mataupu ma i le mataupu e 9.
E mafai ona e setiina ni sini o faailoilo autu ina ia i ai se aofaiga faapitoa o tagata fou ma tagata o loo e aoaoina e auai i le sauniga faamanatuga. Pe latou te o mai pe leai e faalagolago i lo latou faitalia. Ae fai le mea o loo e puleaina e faatosina ai nei faailoga autu o taunuuga. Fuafua po o afea e valaaulia ai i latou ma pe faapefea ona tulitatao.
E mafai ona e setiina se sini autu e faailoa ai le auai o tagata i se aofaiga faapitoa o lesona i le aluga o le vaiaso. Pe e te ausia lena sini e faalagolago i tagata o le ekalesia ma tagata o loo e aoaoina. Ae fai le mea e te mafaia e uuna’ia ai lenei taunuuga o le faailoilo autu. Faatu se sini e galulue ma taitai o le uarota ina ia auai tagata o le au paia. Ona fuafua lea pe faapefea ona e faamaopoopoina lo latou auai.

I le avea ai ma se soa, ua e setiina ia sini autu o faailoilo mo lau lava eria. Ia faavae i latou i le (1) alualu i luma o i latou o loo e aoaoina ma (2) le manaomia ona saili ni tagata fou e aoao. O le sailia o tagata fou e aoao atu o se manaoga faifai pea.

O sini o faailoilo autu lautele a le misiona e faavae i sini ua setiina e soa taitasi.

O le polokalama o le Tala’i La’u Talalelei o le a fesoasoani ia te oe e tumau ai le taulai atu i tagata a o e setiina sini autu o faailoilo. O lenei polokalama o le a fesoasoani foi ia te oe e aoao ai mai sini ua tuanai ma faaali atu ai lou alualu i luma agai i sini o i ai nei.

O sini ma taunuuga autu e otometi lava ona lipoti atu i ou taitai o le misiona ma taitai faifeautalai talavou e ala i le polokalama o le Tala’i La’u Talalelei.

Ia faaeteete ia aua nei faamamafaina atu se tasi o sini autu e tasi i luga o isi. O se taulaiga faifai pea i faailoilo autu uma o le a fesoasoani ia te oe e valaaulia ai pea lava pea isi e o mai ia Keriso ma osia feagaiga.

“Pe a fuaina le faatinoga, ona faaleleia lea o le faatinoga. Pe a fuaina ma lipotia le faatinoga, o le a televave le faaleleia” (sii mai e Thomas S. Monson, “Thou Art a Teacher Come from God,” Improvement Era, Dec. 1970, 101).

Galue Maelega

E finagalo le Alii ia e “galue … i le filiga atoa” i lau galuega faafaifeautalai (Mataupu Faavae ma Feagaiga 107:99). O le maelega o se taumafaiga faifai pea ma le lototoa.

Galue ma le filiga i au sini o faailoilo autu. Valaaulia tagata e faia ni tautinoga e taitai atu ai i le liuaina. O au taumafaiga maelega e mafai ona musuia ai i latou e faia faatinoga o le a fesoasoani ia i latou e o mai ai ia Keriso (tagai i le 2 Nifae 2:14–16).

Aoao atu le talalelei i auala e fetaui ma manaoga o tagata. O le aoaoga faavae, pe a malamalama i ai le Agaga, e sili atu nai lo se isi lava mea e musuia ai i latou e faatino.

I le taimi lava e tasi, ia iloa o sini autu o faailoilo e faalagolago lea i le faitalia o isi. Ia faaaloalo e lē aunoa i le faitalia a tagata.

Manatua o faailoilo autu e le o le sini faaiu lea. Nai lo lena, ua fai ma sui o le alualu i luma faaleagaga o se tagata e agai atu i le papatisoga, faamauga, ma le liua tumau. O le alualu i luma moni o tagata o le a faalagolago i a latou filifiliga. E te lagolagoina lo latou alualu i luma e ala i le faatinoina o le faatuatua ia Keriso mo i latou a o e setiina ni sini, fuafua, galue ma le filiga, ma auauna atu ia i latou i se auala musuia.

Auala e Seti ai Sini ma Faia ni Fuafuaga e Ausia ai

O le setiina o sini ma faia fuafuaga o ni faatinoga o le faatuatua. O sini e atagia mai ai manaoga o lou loto ma lau vaaiga mamao o le fesoasoani ia te oe lava ma isi ia o mai i le Faaola.

O sini ma fuafuaga ua iloiloina ma le faaeteete o le a tuuina atu ia te oe se taitaiga manino. E mafai ona latou fesoasoani ia te oe e saili nisi tagata e aoao. E mafai ona latou taialaina oe i le fesoasoani atu ia i latou o loo e aoaoina e faamalosia lo latou faatuatua ma alualu i luma i le liua.

Fai lau setiina o sini ma fuafua se aafiaga musuia. Tatalo faatauanau, faatino le faatuatua, fefautuaa’i ma lau soa, ma mulimuli i uuna’iga a le Agaga. A o e fuafuaina lenei auala, o le a e lagonaina le galue o le Alii e ala atu ia te oe e faamanuia ai isi.

“O se sini o se taunuuga po o se mutaaga, a o se fuafuaga o le auala lea e te oo ai iina. … O le faatutuina o sini e taua le amata faatasi ma le taunuuga i le mafaufau. Ma o le fuafuaina o le faia lea o se auala e oo atu ai i lena iuga” (M. Russell Ballard, “Toe Foi Atu ma Maua,” Liahona, Me 2017, 62–63).

Mataupu Faavae mo le Setiina ma le Ausiaina o Sini

O le faagasologa lenei o le a fesoasoani ia te oe e seti ma ausia ai sini.

Faatutu Sini ma le agaga tatalo ma fai fuafuaga. Faatutu ni sini e moni ae o le a tata’i atu ai oe ma manaomia ai le faatuatua. Aloese mai le setiina o sini e maualuluga tele pe maualalo tele. Fuafua pe o le a faapefea ona e faia.
Tusifaamaumau ma Faatulaga. Tusifaamaumau au sini ma fuafuaga i se faasologa auiliili.
Faatino i au fuafuaga. Galulue ma le filiga ia ausia au sini. Faatino le faatuatua i le Alii e fesoasoani ia te oe.
Iloilo ma tulitatao. Iloilo le alualu i luma ma faamaumau e lē aunoa au taumafaiga. Filifili po o le a le mea e ese ona fai ma pe faapefea ona faaleleia. Fetuunai fuafuaga pe a manaomia.

A o e faaaogaina lenei faagasologa o le setiina o sini, o le a faalauteleina e le Alii au taumafaiga. O le a e tuputupu a’e i lou gafatia o se meafaigaluega i Ona aao. O le a e aumaia le tele o mea lelei i le faamanuiaina o fanau a le Tama Faalelagi.

Faatutu ni Sini ma Fai ni Fuafuaga i Vaega Uma o le Galuega

Saili ma le agaga tatalo le taitaiga a le Agaga a o e faaaogaina le faagasologa o le setiina o sini i vaega uma o le galuega faafaifeautalai. O nisi o nei vaega e aofia ai:

Fesoasoani i tagata o loo e aoaoina ia alualu i luma (tagai i le Faaopoopoga 1 i le mataupu lenei).
Mauaina o tagata fou e aoao atu (tagai i le Faaopoopoga 2 i le mataupu lenei).
Galulue faatasi ma tagata o le ekalesia ma auauna atu i tagata i le nuu ma le uarota (tagai i mataupu 9 ma le 13).
Galulue i le lotogatasi ma lau soa (tagai i le aitema 6 i le “Sauniga o Fuafuaga Faalevaiaso”).
Faaloloto atili lou faatuatua ia Iesu Keriso.
Faaleleia o lou malamalama ma tomai, e aofia ai le aoaoina o le gagana (tagai i le mataupu 7).

Faatutu ni Sini Talafeagai

Aloese mai le setiina o sini autu mo isi faifeautalai. Peitai, e mafai ona e taialaina ma uuna’ia i latou i le faaaogaina o mataupu faavae o le setiina o sini a o latou faatutuina a latou lava sini.

Ia faaeteete ia aua nei faia ni faatusatusaga ma isi.

Aua nei faaaogaina le ausiaga o sini o se aofaiga, mo le aloa’iaina faalaua’itele, po o le faasa’o faalaua’itele pe faamaasiasi ai soo se tasi.

“Matou te talitonu i le faatutuina o sini. Ua tatou ola e ala i sini. … O le sini taua [e tasi] o le aumaia lea o le talalelei i tagata uma. … O la tatou sini o le ausia lea o le ola e faavavau. O le sini aupito sili lena i le lalolagi” (Spencer W. Kimball, semina a sui risone, 3 Ape., 1975, 6).

Faatautaia Sauniga Faalevaiaso ma Fuafuaga Faaleaso

O fuafuaga faalevaiaso e fesoasoani ia te oe e iloa ai le ata tele ma le taulai atu i tagata. E fesoasoani foi ia te oe e taulai atu ai i gaoioiga e sili ona taua. O fuafuaga i aso taitasi e fesoasoani ia te oe e fetuunai ma saunia ai e faia ni faatinoga patino i aso taitasi. E te manao ia faamanuiaina, ae le na o le pisi.

I le taimi o le fuafuaina o sauniga, fesili ifo ia te oe lava i fesili autu e uiga i mea e te lagona e finagalo le Alii e te faia. Saili musumusuga e tali ai nei fesili i auala e talafeagai mo tulaga ma tagata taitasi. Ona tatau lea ona mamanuina tali i au fuafuaga.

Sauniga o Fuafuaga Faalevaiaso

Fai se fuafuaga faalevaiaso ma lau soa i se aso ma se taimi faatulagaina e lau peresitene o le misiona. Mulimuli i laasaga o i lalo.

Tatalo ma saili musumusuga. Ole atu i le Tama Faalelagi e taiala oe i le faia o fuafuaga o le a fesoasoani e faataunuu ai Ona faamoemoega. Ole atu ia te Ia e faamanuia au taumafaiga e fesoasoani i tagata ia alualu i luma ma o mai ia Keriso.
Faatutu ni sini ma fai ni fuafuaga mo faailoilo autu uma e faaaoga ai le polokalama o le Tala’i La’u Talalelei. Faaaoga le faagasologa o le setiina o sini na faamatalaina i le amataga o le mataupu lenei. Amata i le:
- O tagata o e na papatisoina ma faamauina i totonu o le tausaga ua tuanai.
- Tagata ua i ai se aso o le papatisoga.
- Tagata o loo e aoaoina ua auai i le sauniga faamanatuga.
- Tagata fou ua aoaoina.
- Tagata ua toe foi mai, aiga e le lolotu uma, ma toeaina faaolioli.
- Tagata ua uma ona aoaoina.
Tagai i le Faaopoopoga 1 i le mataupu lenei mo manatu e uiga i le faaaogaina o le faagasologa o le setiina o sini i le galulue ai ma tagata o loo e aoaoina.
Faaaoga le faagasologa o le setiina o sini e saili ai tagata e aoao (tagai Faaopoopoga 2 i le mataupu lenei ma le mataupu 9 mo se fesoasoani i le sailia).
Faaaoga le faagasologa o le setiina o sini e fausia ai sootaga ma taitai ma tagata o le uarota. Faatutu ni sini ma faia ni fuafuaga mo auala o le a e lagolagoina ai i latou i a latou taumafaiga e faasoa atu le talalelei (tagai i manatu i mataupu 9 ma le 13). Saunia mo le fonotaga faamaopoopo faalevaiaso a le uarota (tagai i le mataupu 13).
Iloilo au fuafuaga ma sini i le polokalama o le Tala’i La’u Talalelei. Faamautu au taimi faatulagaina ma fonotaga.
Fai se Fonotaga Faalesoa. E masani ona aofia ai elemene nei:
- Afai e manaomia, faasoa atu ni sini patino talafeagai ma fesili atu i lau soa mo se fesoasoani i le faataunuuina o na sini.
- Talanoaina le malosi o le lua sootaga. Talanoaina soo se luitau i le usiusitai po o le galulue i le lotogatasi. Foia soo se feteenaiga e ala i le (1) faatagaina o tagata taitoatasi e faailoa atoa mai ona manatu, (2) malamalama ma talia popolega o tagata taitoatasi, ma (3) fausia faatasi se fofo e talanoaina ai popolega e sili ona taua.
- Faasoa atu i lau soa po o le a sou manatu i ona malosiaga. Fesili atu mo ni fautuaga i ni auala e mafai ai ona faaleleia oe.
- Faatutu ni sini o le a faaleleia ai le lua sootaga.
O fono faalesoa e mafai ona fesoasoani ia te oe e atiina a’e ni tomai taua e mafai ona e faaaogaina i lou olaga patino ma faaleaiga, auaunaga i le Ekalesia, galuega, ma isi fegalegaleaiga.
Faaiu i se tatalo.

Fuafuaga Faaleaso

Faatutu ni sini ma fai ni fuafuaga ma lau soa mo le 30 minute i taeao uma. Mulimuli i laasaga o i lalo.

Tatalo ma saili musumusuga.
Toe iloilo le alualu i luma i au sini o faailoilo autu faalevaiaso.
Iloilo au fuafuaga e fesoasoani ai i tagata o loo e aoaoina. Faamuamua au taumafaiga e fesoasoani ia i latou o e o loo sili atu ona alualu i luma. Fetuunai sini ma fuafuaga faaleaso pe a manaomia.
Tuuto atu i faatinoga o le a e faia i lena aso e saili ai ni tagata fou e aoao atu ma fesoasoani i tagata o loo e aoaoina.
Fuafua pe faapefea ona e galue ma taitai ma tagata o le ekalesia i le lotoifale.
Faaiu i se tatalo.

Suesuega Faalesoa

Iloilo le Faaopoopoga 1 ma le Faaopoopoga 2 i le faaiuga o le mataupu lenei mo manatu e uiga i le auala e faaaoga ai le faagasologa o le setiina o sini i le aoao atu ma le sailia. Faailoa mai pe mafai faapefea ona e faaaogaina nisi o nei manatu.

Faaaoga le Polokalama o le Tala’i La’u Talalelei

E faatatau ia i latou na papatisoina i ona aso, na saunoa ai Moronae, “ma sa ave o latou igoa ina ia manatua i laou a tausia i le afioga lelei a le Atua, e faatutumau ai i latou i le ala sao” (Moronae 6:4). O le tausia o faamaumauga lelei o se tasi lea o auala e mafai ona e faaaogaina ai lenei mataupu faavae.

Faamaumau Au Taumafaiga

O le tausia o faamaumauga o se vaega o le leoleoina ma le filiga o la outou eria ma le alofa ma le popole. Ia sa’o lelei au faamaumauga e teuina ma ia oo mai i le taimi nei. O le a fesoasoani lenei mea ia te oe e manatua ai mea e tatau ona e faia e fesoasoani ai i tagata.

O le polokalama o le Tala’i La’u Talalelei e faatagaina oe e faamaopoopo ma faasoa atu faamatalaga taua i taitai ma tagata o le ekalesia i le lotoifale i le alualu i luma o tagata ma le galuega.

Mulimuli i Faamatalaga ma Taiala o le Lē Faalaua’iteleina

Mulimuli i taiala o le faatumauina o faamaumauga ma le le faalaua’iteleina pe a faamaumauina sini ma fuafuaga i le polokalama o le Tala’i La’u Talalelei ma i meafaigaluega ua lolomiina. Mo faamatalaga, tagai i le Tulaga Faatonuina Faafaifeautalai mo Soo o Iesu Keriso, 4.8.

Fesili ifo ia te oe lava i fesili nei ae e te le’i faamaumauina pe faasoa atu faamatalaga i le polokalama o le Tala’i La’u Talalelei, imeli, ala o faasalalauga faaagafesootai, faamatalaga, po o isi fesootaiga:

O a ni lagona o lenei tagata e uiga i le mea o loo ou pu’eina?
O le a so’u lagona pe afai e faasoa mai e se tasi lenei ituaiga o faamatalaga e uiga ia te a’u i isi?
Pe o ou mulimuli i aiaiga faavae a le Ekalesia ma tulafono o le lē faalaua’iteleina o faamaumauga mo la’u eria pe afai ou te faamaumauina pe faasoa atu lenei faamatalaga?

Tali Atu

O le mataupu faavae o le tali atu e taua i le fuafuaga e faavavau a le Atua (tagai Alema 5:15–19; Mataupu Faavae ma Feagaiga 104:13; 137:9). O lenei mataupu faavae e aafia ai ou manatu ma lagona e uiga i le tiutetauave paia ua tuuina atu e le Alii ia te oe. O le tali atu e aafia ai foi le auala e te taulimaina ai lau galuega.

I le taimi o Lana galuega i le lalolagi, sa tuuina atu ai e le Faaola ni tofiga i Ona soo e fesoasoani ai ia i latou ia tuputupu a’e, atia’e, ma faataunuu Lana galuega. Sa Ia tuuina atu foi ia i latou avanoa e tali atu ai mo le galuega na tuuina atu ia i latou e fai (tagai Luka 9:10; 3 Nifae 23:6–13). I le avea ai ma se faifeautalai, e faapena foi ona e tali atu mo le galuega ua tuuina mai e le Alii ia te oe e fai.

Vaai i le setiina ma le fuafuaina o lau sini ma le manatu o le a e tali atu i le Alii e ala i le tatalo i aso taitasi. Ia tali atu foi ia te oe lava ma ou taitai o le misiona.

O le tuuina atu o se tala e tatau ona avea o se aafiaga alofa, ma lelei lea e iloa ai au taumafaiga ma e iloa ai auala e mafai ona e faaleleia ai.

Suesuega o Tusitusiga Paia

O le a le uiga o le tali atu?

Mataupu Faavae ma Feagaiga 58:26–33; 101:78

Aisea e taua ai le faitalia i le tali atu?

E faapefea ona galulue faatasi se faifeautalai ma le taitai misiona?

O le a le mea ua folafola mai e le Alii ia i latou o e faamaoni i o latou tiutetauave?

Mataupu Faavae ma Feagaiga 51:19; 78: 22

Manatu mo le Suesue ma le Faaaogaina

Suesuega Faaletagata Lava Ia

Vaai i le fuaiupu lenei i lau tusi o le valaauga: “Pe a e tuuto atu lou taimi ma le gaua’iga e auauna ai i le Alii, ma lafoai ese uma isi mea e patino ia te oe lava, o le a faamanuiaina oe e le Alii i le malamalama faateleina ma le molimau ia Iesu Keriso ma Lana talalelei toefuataiina.” Fesili ifo ia te oe lava i fesili nei, ma tusifaamaumau ou lagona uunai.
- O faapefea ona ou faia i le tuuto atu o lo’u taimi ma le gauaiga i le auauna atu i le Alii?
- O a ni faamanuiaga ua ou mauaina?
- Na faapefea ona faamalosia la’u molimau?
- E mafai faapefea ona ou faaleleia?
Faaalu sina taimi e mafaufau ai e uiga i lou aso mulimuli i le galuega faamisiona. Pe a oo mai lena aso:
- O le a se mea e te manao ia avea ai lou sootaga ma le Tama Faalelagi ma Iesu Keriso?
- O le a sou manao i le mea e fia avea ai oe?
I lau api talaaga mo suesuega, tusi ai se tali i fesili taitasi nei. Faaaoga le faagasologa o le setiina o sini e fuafua ai mea e mafai ona e faia i le taimi nei e galue agai atu i nei sini. Tusifaamaumau au fuafuaga.

Suesuega Faalesoa ma le Felafolafoaiga Faalesoa

I le faaaogaina o le polokalama Tala’i La’u Talalelei, tali fesili o loo i lalo:
- Pe o i ai uma faamaumauga o i ai nei ma sa’o?
- Pe faamata e aoga i se faifeautalai e fou atu i le eria lau faamaumauga o au taumafaiga e saili ai ni tagata fou e aoao atu?
- Afai e te iloiloina lau polokalama i le taimi nei, faamata e fesoasoani ia te oe e iloa ai po o fea o i ai tagata? Faamata e fesoasoani e te iloa ai lo latou alualu i luma?

Aufono a le Itu, Konafesi Faalesone, ma le Aufono a Taitai o le Misiona

Valaaulia faifeautalai e faasoa mai ni aafiaga i sini ua latou faatuina ma fuafuaga na latou faia e fesoasoani ai i tagata ia alualu i luma. O faataitaiga e ono aofia ai sini ma fuafuaga e fesoasoani ai i tagata:
- Atiina a’e le faatuatua sili atu i le Faaola.
- Salamo ma faia ni suiga ia latalata atili atu ai i le Atua.
- Ia papatisoina ma faamauina.
- Toe foi mai i le Ekalesia ma faafou a latou feagaiga o le papatisoga.
Faitau atu se tasi o tulaga nei i faifeautalai. Tuu atu i faifeautalai e vaevae i ni vaega toalaiti. Tuu atu i vaega taitasi e faaaoga laasaga 1 ma le 2 i le faagasologa o le setiina o sini e fesoasoani ai i tagata i nei faataitaiga ia agai i luma i le papatisoga ma le faamauga. Ia tuu atu i vaega taitasi e faasoa mai o latou manatu.
- O se tagata o loo e aoaoina ua taliaina se valaaulia e auai i le lotu i lenei vaiaso.
- Ua taliaina e se tagata se valaaulia mo le papatisoga ma ua faatuina se sini ma oe ina ia papatisoina.
- Ua taliaina e se tagata lau valaaulia e faitau le Tusi a Mamona ma ua tautino atu e faitau le 1 Nifae 1.
Valaaulia faifeautalai e faaaoga le polokalama o le Tala’i La’u Talalelei e fesoasoani ai ia i latou e faatutu ni sini moni ae lautele e ala i le:
- Iloiloina o le talafaasolopito o faailoilo autu ua tuanai ma le alualu i luma.
- Setiina o sini faaleaso, faalevaiaso, ma faalemasina.
- Faaopoopo tagata i sini o faailoilo autu.
Ia talanoaina pe mafai faapefea e nei laasaga ona fesoasoani i faifeautalai e fuafua lelei atili a o latou fesoasoani i tagata ia alualu i luma. Fai i faifeautalai e mafaufau i mea nei:
- E faapefea ona e faaaogaina le polokalama o le Tala’i La’u Talalelei i le lumanai a o e fuafuaina?
- O a isi auala ua e iloaina e faaaoga lelei ai le polokalama?

Taitai Misiona ma Fesoasoani o le Misiona

Ia iloilo soo le polokalama Tala’i La’u Talalelei a faifeautalai. Valaaulia i latou e faasoa mai pe faapefea ona latou faaaogaina e siaki ai a latou sini ma fuafuaga ma fesoasoani ai i tagata ia alualu i luma.
Ia iloilo soo fuafuaga faalevaiaso pe faaleaso a faifeautalai.

Faaopoopoga 1

Faaaoga le Faagasologa o le Setiina o Sini i le Galulue ai ma Tagata o Loo E Aoaoina

O lenei vaega o loo tuuina atu ai ni faataitaiga o auala e mafai ona e faaaogaina ai le faagasologa o le setiina o sini e fesoasoani ai i tagata o loo e aoaoina.

1. Faatutu Sini ma Fai Fuafuaga

Mafaufau ma le agaga tatalo i manaoga faaleagaga o tagata o loo e aoaoina. Faatutu ni sini ma fai ni fuafuaga e fesoasoani ai ia i latou e faataunuu nei manaoga. Faaaoga le polokalama Tala’i La’u Talalelei e iloilo ai le alualu i luma o tagata taitoatasi. Faaaoga faailoilo autu mo le liua e faailoa ai faatinoga o le a fesoasoani i tagata taitoatasi e faia le laasaga e sosoo ai i le o mai ia Keriso.

A o e setiina ni sini ma fai ni fuafuaga, fesili ifo ia te oe lava i fesili faapenei:

O a filifiliga o loo faia e le tagata e faaalia ai se faatuatua tuputupu a’e ia Iesu Keriso?
O a ni aafiaga o le mauaina e le tagata o le Agaga?
O a ni luitau atonu o loo feagai ma ia?
O le a se isi mea e mafai ona tatou aoao mai lenei tagata e fesoasoani ai ia te ia?
O le a le mea e manaomia ona tupu e fesoasoani ai i lenei tagata e atiina a’e le faatuatua ia Iesu Keriso, lagona ma iloa le Agaga, salamo, ma ia papatisoina?
E mafai faapefea ona tatou saunia mo le fonotaga faamaopoopo faalevaiaso a le uarota e faaaofia ai taitai ma tagata o le uarota i le fesoasoani atu i lenei tagata? (Tagai i le mataupu 13.)
O a ni sini autu faailoilo e mafai ona tatou setiina e atagia ai lo tatou faatuatua i le Alii?

2. Faamaumau ma Faatulaga Au Fuafuaga

Faaaoga le polokalama Tala’i La’u Talalelei e faamaumau ma faatulaga auiliili ai au sini ma fuafuaga. O le a fesoasoani lenei mea ia te oe e faatulaga ai le galuega ma faailoa ai faatinoga e fai i aso taitasi. Mulimuli i tulafono o le lē faalaua’iteleina o faamaumauga mo la outou eria.

A o e faamaumauina ma faatulaga a outou fuafuaga, fesili ia te outou lava i fesili faapenei:

O a ni mea patino e mafai ona tatou faia i le aso ma lenei vaiaso e lagolago ai le alualu i luma o lenei tagata?
O le a le aoaoga faavae (po o le lesona) o le a fesoasoani i lenei tagata e atiina a’e ai se faatuatua malosi atu ia Keriso ma ola ai i le talalelei? E mafai faapefea ona tatou aoao atu lenei aoaoga faavae ina ia malamalama i ai o ia ma faagaeetia ai e le Agaga Paia?
E faapefea ma o afea o le a tatou faamaonia ai taimi faatulaga?
O a valaaulia e tatau ona tatou tuuina atu pe tulitataoina? E faapefea ma o afea o le a tatou tulitataoina ai?
E faapefea ma o afea o le a tatou fesoasoani ai i le tagata ia auai i le lotu, faitau tusitusiga paia, tatalo, ma tausia tautinoga e taitai atu ai i le osia o feagaiga ma le Atua?
E faapefea ona auai tagata lotu?
O a punaoa i luga o le initoneti e mafai ona tatou faasoa atu i le tagata?
O a ni fuafuaga faaleoleo e mafai ona tatou faia pe afai e leai se mea e oo e pei ona fuafuaina?

3. Faatino Au Fuafuaga

Fai se tatalo i lou loto i le aso atoa a o e faatinoina au fuafuaga. O le a fesoasoani le Agaga ia te oe ia iloa le mea e alu i ai, le mea e fai, mea e fai atu ai, ma po o a fetuunaiga e fai.

I le aluga o le aso, fesili ifo ia te outou lava i fesili faapenei:

E mafai faapefea ona tatou galulue ma le faatuatua, faalagolago i le Alii e fesoasoani ia i tatou ma faalautele a tatou taumafaiga e auauna atu i Ana fanau?
E mafai faapefea ona tatou fatufatua’i ma lototetele pe a faatino a tatou fuafuaga?
E mafai faapefea ona tatou fetuuna’ia a tatou fuafuaga e tusa ai ma manaoga ma tulaga o tagata?

O fuafuaga o le a le ogatusa i taimi uma e pei ona e faamoemoe i ai. Ia fetuutuuna’i ma faaaoga fuafuaga faaleoleo pe a manaomia.

4. Iloilo le Alualu i Luma ma Tulitatao

Faatasi ai ma lau soa, iloilo le alualu i luma agai i sini ua e setiina e aoao ai tagata ma fesoasoani ia i latou ia alualu i luma. Fuafua ni auala e tulitatao ai. Fetuuna’i au fuafuaga pe a manaomia a o e taumafai e ausia au sini.

Fai fesili e pei o nei ia te oe lava:

Pe o agai atu tagata o loo tatou aoaoina i le osia o feagaiga ma le Atua?
O a luitau o feagai ma i latou? O a ni o latou popolega?
O le a se mea e mafai ona tatou faia i le taimi lenei e fesoasoani ai ia i latou ma uuna’ia i latou e galulue—faaletagata pe ala i tekinolosi?
Pe o i ai ni o latou aafiaga i le lagonaina o le Agaga?
Pe o fesootai i latou i taitai o le Ekalesia ma tagata o le ekalesia ma fausia ni faauoga? O ai e mafai ona auai i le isi taimi tatou te aoao atu ai?
O le a se mea e mafai ona tatou aoaoina mai papupuni?
O le a le lelei na tatou faia i le ausiaina o a tatou sini? E i ai se mea e tatau ona tatou fetuuna’ia pe ese ona fai?
Pe ua oo i le taimi e faaitiitia ai fesootaiga faifai pea?

Tagai i le mataupu 11 mo nisi mataupu faavae ma manatu i le auala e tulitatao ai ma fesoasoani ai i tagata ia alualu i luma.

Faaopoopoga 2

Faaaoga le Faagasologa o le Setiina o Sini i le Sailia o Tagata e Aoao

O lenei vaega o loo tuuina atu ai ni faataitaiga o auala e mafai ona e faaaogaina ai le faagasologa o le setiina o sini i le sailia o tagata fou e aoao atu. Faaaoga lenei faagasologa i au fuafuaga faalevaiaso ma faaleaso.

1. Faatutu Sini ma Fai Fuafuaga

Faatasi ai ma lau soa, ia mafaufau ma le agaga tatalo i mea e finagalo le Tama Faalelagi e te lua faia e maua ai nisi tagata e aoao atu. Fai lenei mea i vaiaso taitasi ma aso taitasi. Ia faatuatua o loo Ia saunia tagata mo oe (tagai i le Mataupu Faavae ma Feagaiga 100:3–8).

Faatutu ni sini e saili ai i aso taitasi. Fai ni fuafuaga mo faatinoga i lou puleaina lea e tosina ai taunuuga o faailoilo autu. O faataitaiga e aofia ai:

E toafia ni tagata fou o le a e talanoa i ai e uiga i le talalelei i aso taitasi.
E faafia ona e fesili atu i tagata o le ekalesia, tagata o loo e aoaoina, ma tagata e te faafesoota’ia pe latou te iloa se tasi atonu e fiafia i lau sāvali.
O le a se vave o le a e tali atu ai i igoa na faailoa mai po o manatu faaalia i luga o faasalalauga faaagafesootai.

Iloilo le polokalama Tala’i La’u Talalelei ma fesili ifo ia te outou lava i fesili faapenei:

O le a se mea e finagalo le Tama Faalelagi tatou te faia i le aso ma lenei vaiaso e saili ai tagata e aoao?
O a sini autu faaleaso ma faalevaiaso e mafai ona tatou setiina e saili ai tagata e aoao?
O lē fea gaoioiga o le sailiga e sili ona lelei mo lenei taimi o le aso ma le nofoaga?
E mafai faapefea ona tatou musuia ma lagolagoina tagata o le uarota ia latou taumafaiga e faasoa atu le talalelei e ala i mataupu faavae o le alofa, faasoa atu, ma le valaaulia?
O ai tagata fou e mafai ona tatou faafesoota’ia e fesoasoani ia i latou e auai i le sauniga faamanatuga? Pe i ai ni a latou uo latou te ono valaauliaina?
E mafai faapefea ona tatou galulue faatasi ma le aufono a le uarota po o tagata auai i le fonotaga faamaopoopo faalevaiaso a le uarota e faailoa ai aiga e le lolotu uma, tagata ua toe foi mai, ma toeaina faaolioli e faafesootai?
O ai tagata o loo aoaoina i le taimi nei, tagata sa aoaoina muamua, ma tagata na faasino mai e mafai ona tatou faafesoota’ia? E faapefea ona tatou faafesoota’ia i latou? (I le tagata lava ia, e ala i tekinolosi, e ala i telefoni, po o isi auala)
O a nisi auala e mafai ai ona tatou mauaina tagata?
O a taleni ma malosiaga patino e mafai ona tatou faaaogaina?
E mafai faapefea ona tatou faaleleia lo tatou tomai e saili ai tagata e aoao?
E mafai faapefea ona tatou fesoasoani ia i latou tatou te faafesoota’ia ia lagona le uuna’iga a le Agaga Paia?

Mo faataitaiga o gaoioiga mo le sailia, tagai i mataupu 9, 10, ma le 13.

Faaaoga le polokalama Tala’i La’u Talalelei e fesoasoani ia te oe e faailoa ai gaoioiga e saili ai na aoga i le taimi ua tuanai. Mo se faataitaiga, e mafai ona e vaai i le auala na maua ai tagata faato’ā liliu mai.

Saili musumusuga ma ia tatala atu i uuna’iga ma manatu fou. Aloese mai le mau i se faiga masani. O faifeautalai o e saili e lē aunoa ni tagata fou e aoao atu e masani ona faaaoga ni auala eseese i vaiaso taitasi. Latou te galulue i ai i taimi uma.

2. Faamaumau ma Faatulaga Au Fuafuaga

Faatasi ai ma lau soa, faaaoga le polokalama Tala’i La’u Talalelei e faamaumau ai ma faatulaga auiliili au sini ma fuafuaga. O le faamaumauina ma le faatulagaina o au fuafuaga o le a fesoasoani ia te oe e faailoa ai po o a faatinoga e fai ma le taimi e fai ai.

Fai fesili e pei o nei ia te outou lava.

O afea ma e faapefea ona tatou faafesoota’ia tagata? O a auala e sili ona lelei e fai ai? O fea o nofoaga e sili ona lelei? O a taimi sili ona lelei o aso mo auala eseese o le sailia o tagata?
E mafai faapefea ona tatou faia ni talanoaga anoa ma tagata tatou te feiloai i ai?
E faapefea ma o afea o le a tatou maua ai i luga o le initoneti e faaaoga ai ala o faasalalauga faaagafesootai ma isi tekinolosi?
O afea o le a tatou faafesoota’ia ai tagata na faailoa mai?
O a fuafuaga faaleoleo o le a tatou faia pe a le sologa lelei isi fuafuaga?

3. Faatino Au Fuafuaga

Taumafai ma le filiga ia ausia au sini e saili tagata e aoao. Fai se tatalo i lou loto i le aso atoa. Ia fiafia i le faafeiloaiga ma le talanoa atu i tagata tou te feiloai. O le a fesoasoani le Agaga ia te oe ia iloa le mea e alu i ai, le mea e fai, mea e fai atu ai, ma po o a fetuunaiga e fai.

I le aluga o le aso, fesili ifo ia te outou lava i fesili faapenei:

E mafai faapefea ona tatou galulue ma le faatuatua, faalagolago i le Alii e fesoasoani ia i tatou ma faalautele a tatou taumafaiga e auauna atu i Ana fanau?
E mafai faapefea ona tatou fatufatua’i ma lototetele pe a faatino a tatou fuafuaga?
E mafai faapefea ona tatou fetuuna’ia a tatou fuafuaga e tusa ai ma manaoga ma tulaga o tagata?
E mafai faapefea ona tatou fesoasoani i tagata ia lagona le uuna’iga a le Agaga Paia?

O fuafuaga o le a le ogatusa i taimi uma e pei ona e faamoemoe i ai. Ia fetuutuuna’i ma faaaoga fuafuaga faaleoleo pe a manaomia.

4. Iloilo le Alualu i Luma ma Tulitatao

I le aluga o le aso ma le vaiaso, ia iloilo ma le agaga tatalo le alualu i luma i le ausiaina o au sini e saili tagata e aoao. Fai fesili e pei o nei ia te outou lava:

O le a le lelei na tatou faia i le ausiaina o a tatou sini ma mulimuli i a tatou fuafuaga?
O a ni fetuuna’iga e tatau ona tatou faia e ausia ai a tatou sini e saili tagata?
E mafai faapefea ona tatou aloese mai le se’e atu i se faiga masani e le aoga i le sailia o tagata e aoao?
O le a se mea fou e mafai ona tatou taumafai i ai i lenei taimi o le aso?
O a nisi o manatu e mafai ona tatou talanoaina i le fonotaga faamaopoopo faalevaiaso a le uarota e fesoasoani ia i tatou e saili tagata e aoao? (Tagai i le mataupu 13.)

I le avea ai ma se soa, faaaoga le siata o le “Sailiga o Taumafaiga” i le mataupu 9 e iloilo ai au taumafaiga faalevaiaso ma aso taitasi mo le sailia. Ia iloa na mea o loo lelei ona e faia, ma mafaufau pe mafai faapefea ona e faaleleia atili.

I le aluga o le aso, taofi mo ni nai minute e iloa ai le aao o le Atua i lau galuega.