“Mataupu 11: Fesoasoani i Tagata e Faia ma Tausia Tautinoga,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 11,” Tala’i La’u Talalelei

Mataupu 11

Fesoasoani i Tagata e Osia ma Tausia Tautinoga

Manatunatu i le Mea Lenei

E fesootai faapefea tautinoga ma le liuaina?
E faapefea ona fesootai le tausia o tautinoga i le tausia o feagaiga?
E mafai faapefea ona ou tuuina atu valaaulia e fesoasoani ai i tagata ia tuputupu a’e faaleagaga ma faamalosia lo latou faatuatua ia Iesu Keriso?
Aisea e taua ai le faasoa atu o se molimau faamaoni?
O a faamanuiaga e mafai ona ou folafola atu?
E mafai faapefea ona ou fesoasoani i tagata ia tausia tautinoga?

Salamo, Tautinoga, ma le Liuaina

O le avea ma se faifeautalai ma se soo o Iesu Keriso, e te manao ai i le faaolataga o agaga (tagai i le Mosaea 28:3). O le Faaola e “malosi e laveai” i latou o e tausia feagaiga latou te osia e ala i le mauaina o sauniga taua o le perisitua, e amata i le papatisoga (tagai i le 2 Nifae 31:19). O le tuuina atu o valaaulia ma fesoasoani i tagata e tausia tautinoga o le a saunia ai i latou mo le papatisoga.

E faaolaina tagata i tuutuuga o le salamo (tagai i le Helamana 5:11). O le salamo o se liliu atu atoatoa ma le faamaoni ia Iesu Keriso. O le tautinoga o se vaega taua o le salamo. Pe a e fesili atu mo tautinoga o se vaega o lau aoaoga, ua e valaaulia i latou ina ia salamo.

O le tautinoga o lona uiga o le filifilia o se ala o faatinoga ma mulimuli i lena filifiliga. O le faatinoina e lē aunoa o upumoni o le talalelei e taitai atu ai i le liuaina.

O le liuaina o se suiga i talitonuga, loto, ma le olaga o se tagata e talia ma mulimuli i le finagalo o le Atua. O se filifiliga atamai e avea o se soo o Keriso. E tupu le liuaina pe a faaaoga e tagata le faatuatua ia Keriso, salamo ia latou agasala, e papatisoina, maua le meaalofa o le Agaga Paia, ma tumau e oo i le iuga. O loo faasino le Alii ma Ana perofeta i lenei suiga o se toefanauina faaleagaga (tagai Ioane 3:3–5; Mosaea 27:25–26).

O le Togiola a le Faaola ua mafai ai ona liua, ma e aumaia e le Agaga Paia lenei liuga tele o le loto (tagai Mosaea 5:2; Alema 5:12–14).

O le liua o se faagasologa, e le o se mea e tupu i se taimi e tasi. O le fesoasoani i tagata ia liua ia Iesu Keriso e totonugalemu i lou faamoemoega faafaifeautalai. Pe a taialaina ai e le Agaga, e te valaaulia tagata e faia ni tautinoga o le a fesoasoani ia i latou e tuputupu a’e ai faaleagaga ma lagonaina le uunaiga a le Agaga Paia i o latou olaga. Ona e lagolagoina lea o tagata i le tausia o tautinoga na latou faia. E te fesoasoani ia i latou e faatino le faatuatua e agai i suiga tumau (tagai Mosaea 6:3).

O tagata e tausia tautinoga a o le’i oo i le papatisoga o le a sili atu ona osia ma tausia feagaiga paia mulimuli ane. A e aoaoina tagata e tausia tautinoga, o loo e aoaoina i latou e tausia feagaiga. O le osia ma le tausia o feagaiga o se vaega taua o le talalelei a Iesu Keriso ma le fuafuaga a le Atua mo Ana fanau.

O lenei mataupu o loo aofia ai taiala mo le tuuina atu o valaaulia, faamanuiaga folafolaina, faasoa atu lau molimau, ma fesoasoani i tagata e tausia a latou tautinoga ina ia mafai ona latou o mai i le Faaola ma faaolaina ai.

Tuuina atu ia valaaulia

I le avea ai ma se sui o Iesu Keriso, e te valaaulia tagata e mulimuli ia te Ia ma maua le olioli o Lana talalelei. E te tuuina atu ni valaaulia patino mo i latou e faia mea o le a fausia ai lo latou faatuatua ia Keriso. Ona e lagolagoina lea o i latou i le tausia o a latou tautinoga.

O valaaulia ma tautinoga e taua mo mafuaaga nei:

Latou te fesoasoani i tagata ia ola i mataupu faavae latou te aoaoina ina ia latou lagonaina le molimau faamautu a le Agaga.
O le tausia o tautinoga o se tasi lea o auala e faaalia ai e tagata le salamo (tagai i le Mataupu Faavae ma Feagaiga 20:37).
O le salamo e fesoasoani i tagata ia lagonaina le filemu ma le olioli o le faamagaloga a le Atua. O le a latou maua foi le fesoasoani faateleina mai le Atua mo o latou luitau.
O le tausia o tautinoga e saunia ai tagata e osia ma tausi feagaiga paia.
E mafai ona e faaalia lou alofa mo tagata ma lou faatuatua i folafolaga a le Atua e ala i le fesoasoani i tagata e tausia a latou tautinoga.

Valaaulia a o Taitaia e le Agaga

Saili le taitaiga a le Agaga e uiga i valaaulia e tuuina atu ma le taimi e tuuina atu ai. Mafaufau po o le a le aoaoga po o le aoaoga faavae, e malamalama sa’o i ai, o le a fesoasoani i se tagata e talia lau valaaulia. O le valaaulia sa’o i le taimi sa’o e mafai ona uunaia tagata e faia mea o le a fausia ai lo latou faatuatua. O nei faatinoga e mafai ona taitai atu ai i se liuga tele o le loto (tagai Mosaea 5:2; Alema 5:12–14).

O valaaulia e te tuuina atu atonu e laiti, e pei o le faitauina o se mataupu o tusitusiga paia po o le o mai i le sauniga faamanatuga. Pe atonu foi e taua tele e pei o le papatisoina. E tatau ona talafeagai valaaulia po o fea o i ai se tagata i lana malaga faaleagaga.

O valaaulia e taitaia e le Agaga e fausia i luga o le tasi ma le isi e fesoasoani ai i se tagata ia alualu i luma faaleagaga (tagai i le 2 Nifae 28:30; Mataupu Faavae ma Feagaiga 93:12–13). Fesili ifo ia te oe lava, ”O a tautinoga o loo tausia e le tagata? O le a le isi mea e tatau ona ia faia ina ia alualu i luma?”

Faalogo ia i latou o loo e talanoa i ai po o aoaoina. Mai mea e te faalogo i ai ma lagonaina, saili le taitaiga a le Agaga e uiga i valaaulia o le a fesoasoani i tagata taitoatasi ia alualu i luma i le osia o feagaiga paia.

Mataupu Faavae mo le Tuuina Atu o Valaaulia

O le tuuina atu o valaaulia e manaomia ai le faatuatua ia Keriso. Ia faatuatua o le a Ia faamanuiaina tagata pe a latou talia ma mulimuli i au valaaulia.

O le a sili atu ona suia tagata pe a e valaaulia i latou e faatino se upumoni o le talalelei ma fesoasoani ia latou iloa le ala o le a faamanuiaina ai i latou i nei suiga. O le a latou suia i le tulaga latou te lagonaina ai le Agaga ma lagonaina ai le olioli o le ola ai i le talalelei a Iesu Keriso.

Soo se taimi lava e te auai ai ma tagata, faafesagai pe i luga o le initoneti, mafaufau po o le a le valaaulia e mafai ona fesoasoani ia i latou e faamalosia ai lo latou faatuatua ia Keriso ma lagona ai le Agaga. O nisi taimi atonu e faigofie lava lenei mea e pei o le toe feiloai ma oe pe o mai foi i se gaoioiga a le Ekalesia.

A o e sauni e aoao atu se lesona, mafaufau i manaoga ma le alualu i luma o tagata taitoatasi. Ia mautinoa o lau fuafuaga o le lesona e aofia ai se valaaulia se tasi pe sili atu o le a fesoasoani i le tagata ia alualu i luma.

Ia faaeteete aua nei tuuina atu le tele o valaaulia i le taimi e tasi. E manaomia e se tagata se taimi e faatino ai, tuputupu a’e, ma aoao mai valaaulia taitasi.

Ia lototele ma ia toa a’o e valaaulia tagata e faia ni tautinoga (tagai i le Alema 38:12). Faaaloalo i le faitalia a tagata.

Suesuega o Tusitusiga Paia

Aisea e taua ai ia tautinoga?

Valaaulia ma le Agalelei ma se Gagana Manino

O le valaaulia mo se tautinoga e masani ona faaaoga ai le fesili “pe o le a e”, lea e manaomia ai se tali ioe po o le leai. Ia agalelei, patino, ma manino au valaaulia. E tatau ona latou valaaulia pe taitai tagata ia faia se tautinoga e faatino ma le faatuatua ia Iesu Keriso.

E ui o au valaaulia o le a tulaga ese mo tagata taitoatasi, mafaufau i faataitaiga nei:

O le auai i le lotu e maua ai se taimi ma se nofoaga mo oe e te tapuai ai i le Atua ma lagona ai Lona Agaga. E mafai foi ona fesoasoani ia te oe e avea ai ma se vaega o se nuu lagolagosua a o e faia ni suiga e latalata atili atu ai i le Faaola. Pe tou te o mai ma i matou i le sauniga faamanatuga i le Aso Sa nei?
O lea la ua tatou talanoaina le taua o le suesueina o tusitusiga paia, pe o le a e faitauina ea [se fuaitau patino o tusitusiga paia]? Pe o le a e tusia i lalo soo se uunaiga po o ni au fesili o i ai? E mafai ona tatou talanoaina ou manatu i le isi taimi tatou te feiloai ai.
Ua tatou talanoaina le soifuaga o le Faaola ma Ana poloaiga. Pe o le a e mulimuli ea i Lana faataitaiga e ala i le papatisoina i Lana Ekalesia ma faia folafolaga faatasi ma Ia? (Tagai ”O Le Valaaulia ina ia Papatisoina ma Faamauina“ i le mataupu 3.)
Sa e faaalia lou fiafia e fesootai atili ma le Atua i lou olaga. Pe o le a e tatalo ea ma le faatuatua i nai aso o sosoo ai ina ia mafai ona e maua faamanuiaga o le tatalo?
E i ai se matou vitio matou te manatu o le a e maua ai le fesoasoani. E mafai ona matou faaali atu ia te oe pe auina atu se sootaga ia te oe? Pe o le a e matamata i ai? E mafai ona matou siakia a taeao e vaai po o le a sou manatu?

Saili uunaiga a le Agaga Paia a o e mafaufau i auala masani e tuuina atu ai ni valaaulia agalelei, patino, ma manino.

Suesuega a le Tagata Lava Ia pe Faalesoa

Tusi i lau tusi talaaga o suesuega ia se valaaulia e faigofie, tuusao, ma manino mo tautinoga taitasi i totonu o se lesona. Afai na e faia muamua le gaoioiga lenei, ia toe fai ma faatusatusa au valaaulia fou i valaaulia muamua.

Ia toe faamanatu faatasi ma lau soa ia valaaulia ua e tusia. Ona talanoaina lea o fesili nei:

E mafai faapefea ona tatou fesoasoani i tagata ia malamalama i faamanuiaga folafolaina a le Alii e o faatasi ma lenei valaaulia?
Aisea e taua ai lenei valaaulia ia te a’u?
E mafai faapefea ona ou fesoasoani i tagata ia lagonaina le alofa o le Atua mo i latou a o ou tuuina atu ni valaaulia?
E mafai faapefea ona ou faaleleia le fesoasoani atu i isi e faatino ia valaaulia ou te tuuina atu?

Mafaufau i se tasi o loo e aoaoina. Faataitai ona tuuina atu nei valaaulia e pei o loo e talanoa atu i lena tagata. Toe faamanatu au valaaulia pe a manaomia.

Folafola Atu Faamanuiaga i Tagata

Ua folafola mai le Atua e faamanuia i tatou a o tatou tausia Ana poloaiga (tagai Mataupu Faavae ma Feagaiga 130:20–21). O tagata o e tausia poloaiga ma tumau faamaoni “ua faamanuiaina i mea uma” ma o le a “mau faatasi ma le Atua i se tulaga o le fiafia e lē gata” (Mosaea 2:41).

A o e valaaulia tagata e faia ni tautinoga, folafola atu ia i latou faamanuiaga mo le tausia o a latou tautinoga. E mafai ona e faailoa mai le tele o nei faamanuiaga e ala i le suesueina o tusitusiga paia, o aoaoga a perofeta o aso e gata ai, ma lesona i le mataupu e 3. Mafaufau foi i faamanuiaga i lou lava olaga. Ia filifili ma le agaga tatalo po o a faamanuiaga e folafola atu i tagata taitoatasi a o e tuuina atu ni valaaulia.

Pe a valaaulia se tagata e ola i se poloaiga, aoao atu mea nei:

O le usiusitai i poloaiga e faaalia ai lo tatou alolofa mo le Tama Faalelagi ma Lona Alo, o Iesu Keriso (tagai Ioane 14:15).
O le usiusitai i poloaiga e faaali atu ai i le Atua tatou te faalagolago ia te Ia (tagai Faataoto 3:5–6).
O faamanuiaga a le Atua e faaleagaga ma faaletino (tagai Mosaea 2:41).
O le faamanuiaga silisili a le Atua o le ola e faavavau (tagai Mataupu Faavae ma Feagaiga 14:7).
A o tatou tatalo faamaoni ma faatino i le faatuatua, o le a fesoasoani mai le Atua ia i tatou e faataunuu mea ua Ia poloaiina i tatou e fai (tagai i le 1 Nifae 3:7).
E faataunuu e le Atua Ana folafolaga e faamanuia i tatou e tusa ai ma Lana ala ma Lana taimi (tagai Mataupu Faavae ma Feagaiga 88:68).

E masani ona feagai tagata ma mea faafeagai i le tausiga o poloaiga. Lagolago i latou e te aoaoina, ma faamautinoa atu ia i latou o le a faamanuiaina i latou e le Atua a o latou taumafai e faia Lona finagalo. Fesoasoani ia latou malamalama o le faafeagai o se avanoa e tuputupu a’e ai e ala i le filifili e mulimuli ia Keriso e tusa lava pe faigata (tagai i le 2 Nifae 2:11, 13–16).

E pei ona aoao mai Elder Jeffrey R. Holland, “O nisi faamanuiaga e vave oo mai, o ni isi e tuai, a o nisi e le oo mai lava seia oo i le lagi, ae mo i latou o e taliaina le talalelei a Iesu Keriso, e oo mai” (“An High Priest of Good Things to Come,” Ensign, Nov. 1999, 38).

Suesuega o Tusitusiga Paia

O le a se mea o aoao mai e mau nei e uiga i le finagalo o le Alii e faamanuia i tatou?

Suesuega Faaletagata Lava Ia

Faitau le Mataupu Faavae ma Feagaiga 82:10 ma le 130:20–21. Ona suesue lea o mau o loo i lalo. Ia fai ni koluma se lua i lau tusi talaaga o suesuega. I le isi itu, tusi ai le poloaiga e te maua i fuaitau taitasi. O le isi itu, tusi ai le folafolaga mo le tausia o le poloaiga.

Faasoa Atu Lau Molimau

Faasoa atu lau molimau i soo se taimi lava e te tuuina atu ai se valaaulia ma ni faamanuiaga folafolaina. Faamatala pe na faapefea ona faamanuiaina oe a o e ola i le mataupu faavae o loo e aoaoina atu. Faasoa atu lau molimau o le mataupu faavae o le a faamanuiaina ai le olaga o le tagata a o ia ola ai.

O lau molimau faamaoni o le a fesoasoani e fausia se siosiomaga mo tagata ia lagona ai le faamautuina mai e le Agaga Paia o le upumoni. O lenei mea e saunia ai i latou e talia ia valaaulia o le a e tuuina atu.

Mo nisi faamatalaga, tagai i le “Faasoa Atu Lau Molimau” i le mataupu 10.

Fesoasoani i Tagata e Tausia a Latou Tautinoga

A talia e tagata au valaaulia e fai se mea, tulitatao e fesoasoani ia i latou e tausia a latou tautinoga. O loo e fesoasoani i tagata e atiina a’e le faatuatua ia Keriso. O lau matafaioi o le fesoasoani lea ia i latou e faamalosia lo latou faatuatua ma lo latou naunautaiga e agai i luma i le liua atoatoa. Aua le na ona valaaulia tagata ia sui; lagolago i latou i le faia o lena mea.

O le a maua e tagata se molimau a le Agaga a o latou faaaogaina le faatuatua e salamo ai e ala i le tausia o tautinoga. O lena molimau e masani ona le oo mai “seia mavae le tofotofoina o lo [latou] faatuatua” (Eteru 12:6). Aua e te ofo pe a tulai mai mea faafeagai. Fuafua pe faapefea ona e fesoasoani ia i latou i le taimi o le tofotofoga ina ia latou maua le molimau a le Agaga. O isi tagata o le Ekalesia e mafai foi ona tuuina atu le lagolago.

E masani ona lagona e tagata le uunaiga a le Agaga pe a e faatasi ma i latou. Faamamafa atu le taua o le tatalo, faitauina o tusitusiga paia, ma le mulimuli i au valaaulia ina ia latou maua nei lagona pe a na o i latou lava.

O le tausia o tautinoga e saunia ai tagata mo sauniga ma feagaiga i luga o le ala o le liua i le olaga atoa. O au taumafaiga e mafai ona fesoasoani ia i latou e “faaalia i a latou galuega” lo latou manao e mulimuli ia Iesu Keriso (Mataupu Faavae ma Feagaiga 20:37).

Fuafua mo se Fesootaiga Puupuu i Aso Taitasi

O le fesoasoani i tagata e tausia tautinoga e amata i le taimi muamua e te asiasi atu ai ma aoao i latou. Fai atu ia i latou e faamaumau a latou tautinoga i luga o a latou telefoni, kalena, po o se mea e te tuua ma i latou.

Fesili atu pe o oe, po o se tagata o le ekalesia sa auai, e mafai ona faia se fesootaiga puupuu i aso taitasi i le va o asiasiga faafaiaoga. Faamalamalama atu o le faamoemoega o nei fesootaiga o le lagolagoina lea o i latou, ma faamatala nisi o auala e mafai ona e faia ai lena mea. O nei fesootaiga o se tasi lea o auala e faaaoga ai le mataupu faavae i le Mataupu Faavae ma Feagaiga 84:106.

Fuafua le auala e faafesootai ai o le a sili ona aoga, e pei o se asiasiga puupuu, valaau i le telefoni, tesi, po o se sāvali o ala o faasalalauga faaagafesootai. Ua ofoina mai e tekinolosi le tele o filifiliga mo faamanatu faaopoopo ma le lagolago.

Uunaia ma Fesoasoani i Tagata i Au Fesootaiga i Aso Taitasi

Mo valaaulia uma e te tuuina atu, tusifaamaumau faamatalaga i le polokalama o le Tala’i La’u Talalelei e uiga i le auala e tulitatao ai i le aso e sosoo ai. A o e fuafuaina le aso e sosoo ai, saili le taitaiga a le Agaga a o e talanoaina pe faapefea ona fesoasoani i tagata e tausia a latou tautinoga.

Fai au fesootaiga i aso taitasi ma tagata e lelei ma faamalosiauina. Tatalo mo i latou. Faaali atu le alofa ma le malamalama a o e fesoasoani ia i latou e tausia a latou tautinoga. Tali fesili ma fesoasoani ia i latou e faatoilalo luitau. Afai e i ai se taimi, faitau faatasi mai le Tusi a Mamona. Faasoa atu ala o faasalalauga talafeagai a le Ekalesia, e aofia ai musika na gaosia e le Ekalesia e ono siitia ai i latou. Ia faaaloalo i o latou taimi ma moomooga.

Faailoa atu i latou i isi tagata o le Ekalesia. Pe a talafeagai ai, fai atu i tagata e fesoasoani i tagata e tausia a latou tautinoga ( tagai i le mataupu 10).

Faamalo atu i tagata o loo galulue e tausia a latou tautinoga. Fesoasoani ia latou iloa le ala e fiafia ai le Alii i a latou taumafaiga. O loo suia e nei tagata o latou olaga, lea e manaomia ai le tele o galuega ma le onosai. Fesoasoani ia latou iloa faamanuiaga o loo latou mauaina. Faaali atu le talitonuga mautinoa e mafai ona faamanuiaina i latou.

Ia faaali atu foi le alofa pe afai e le’i tausia e tagata a latou tautinoga. Ofo atu e lagolago i latou i le taimi o lau fesootaiga i aso taitasi. Mo se faataitaiga, afai na talia e se tasi se valaaulia e faitau se mataupu i le Tusi a Mamona ae e le’i faia lava, ofo atu e faitau faatasi. Fesoasoani i le tagata ia iloa e ala i aafiaga o le tausia o tautinoga e mafai ona faamanuiaina ai lona olaga.

Atonu e tele ni taumafaiga mo tagata e tausia se tautinoga, ma atonu e manaomia ona e faia ni nai asiasiga e fesoasoani ai ia i latou. Talanoaina pe mafai faapefea ona latou faatoilaloina luitau i le tausia o tautinoga. Ia onosai ma lagolagosua, ae le o le faitio po o le faamasinosino.

Ia i ai le Uunaiga a le Agaga Paia i Lau Fesootaiga i Aso Taitasi

A e tulitataoina tagata, fai atu ia i latou e faasoa mai o latou aafiaga i le tausia o tautinoga. Ia fesili atu i mea na latou aoaoina ma lagonaina. O le a fesoasoani lenei mea ia i latou e iloa ai le faatosinaga a le Agaga i o latou olaga ma fesoasoani ai ia latou iloa le isi laasaga.

A o e faafesootaia tagata i aso taitasi, o se vaega taua o lou faamoemoega o le valaaulia lea o le uunaiga a le Agaga Paia i o latou olaga. Fesoasoani ia latou iloa le auala e lagona ai le Agaga pe a e le i ai. O lau fesootaiga i aso taitasi e tatau ona faamalosia ai lagona faaleagaga latou te lagonaina ina ua e aoaoina i latou. O le a liua i latou a o latou lagonaina le mana ma le uunaiga a le Agaga Paia.

Faaali Atu le Alofa

O le faagasologa o le liua e totonugalemu i le alofa faa-Keriso (tagai i le 4 Nifae 1:15). Saili le meaalofa o le alofa mama. O le faaalia o le alofa faamaoni e mafai ona fesoasoani i tagata ia lagonaina le Agaga i o latou olaga. O ou faailoaga o le alofa e mafai foi ona fesoasoani ia i latou e talia valaaulia ma tausia tautinoga e taitai atu ai i le liuaina.

A o e alofa ma aoao atu isi, o le a faalolotoina lou lava liua i le Faaola.

O le fesoasoani i le liua o se isi tagata o se galuega paia. O le a e maua le olioli tumau a o e tuuto atu oe lava i lenei galuega ma auauna atu i isi (tagai Mataio 10:39; Mosaea 2:17; Alema 27:17–18; Mataupu Faavae ma Feagaiga 18:10–16).

Suesuega a le Tagata Lava Ia pe Faalesoa

Faamaumau i le polokalama Tala’i La’u Talalelei au fuafuaga mo fesootaiga i aso taitasi ma tagata taitasi o loo e aoaoina. Ia fuafua mamao ni nai aso po o le a se mea o le a e faia e toe siaki ai ia tagata taitasi.

Ia filifili se valaaulia se tasi mo le tautinoga o le a e tuuina atu pe a e aoaoina atu ia tagata taitasi. Ona vaai lea pe o a popolega eseese e ono taofia mai ai se tasi mai le taliaina po o le tausia foi o lena tautinoga. Ia talanoaina ma faataitai pe mafai faapefea ona e fesoasoani lelei i tagata a o latou galulue e foia o latou popolega.

E Finagalo le Alii i Tagata ia O Mai ma Tumau ai

O le galuega faafaifeautalai e i ai sona aafiaga silisili a o faia ma tausia e tagata le tautinoga e ola i le talalelei ma tumau le toaga i le Ekalesia i o latou olaga atoa. E le lava mo i latou le na ona o mai i totonu o le Ekalesia. E finagalo le Alii ia latou o mai ma tumau ai (tagai Ioane 15:16). Taitai uma au aoaoga ma valaaulia e agai atu i lena iuga. Ina ia maua faamanuiaga uma ua i ai i le Tama Faalelagi mo i latou, e tatau i tagata o le ekalesia ona faaauau pea ona ola i le talalelei e ala i le tausia o poloaiga ma feagaiga ua latou osia a o latou tumau malolosi i le Ekalesia.

Na faapea mai Nifae: “Pe a uma ona outou i ai i lenei ala lauitiiti ma le vaapiapi, ou te fesili atu pe ua uma ona faia o mea uma? Faauta, ou te fai atu ia te outou, E leai; … e tatau ai ona outou fetaomi atu i luma ma le tumau ia Keriso, … ma [outou] tumau e oo i le iuga, faauta, ua faapea ona fetalai mai o le Tama: O le a outou maua le ola e faavavau” (2 Nifae 31:19–20).

Tuu atu au taumafaiga sili e fesoasoani ai i tagata ia agavaa mo le “ola e faavavau, le meaalofa silisili lea o meaalofa uma a le Atua” (Doctrine and Covenants 14:7).

Manatu mo le Suesue ma le Faaaogaina

Suesuega Faaletagata Lava Ia

Faailoa mai se poloaiga mai le lesona 4. Sue ma tusifaamaumau mau faasino ma upusii mai perofeta o aso e gata ai o loo faamatala mai ai faamanuiaga folafolaina e o faatasi ma lenei poloaiga. Mafaufau i faamanuiaga ua e maua mai i le usitaia o lenei poloaiga, ma tusi i totonu o lau tusi talaaga o suesuega.
Pe a e fesootai ma lou aiga po o isi, fesili pe na faapefea ona faamanuiaina i latou e ala i le usitaia o se poloaiga patino (mo se faataitaiga, tausia o le aso Sapati ia paia, usiusitai i le tulafono o le sefuluai, po o le tausia o se poloaiga e faigata mo se tasi o loo e aoaoina).
Tali fesili nei e fesoasoani ia te oe e faailoa ai vaega e mafai ona e faaleleia pe a tuuina atu ni valaaulia. Fai ni fuafuaga e faaleleia ai.
- Pe ua iloa e tagata ou te alofa ia i latou?
- Pe ou te mautinoa o le a faamanuiaina i latou e ala i le faatinoina o a tatou valaaulia?
- Pe ou te tuuina atu ea se taimi talafeagai ma se gauaiga i le faia o fesootaiga i aso taitasi ma tagata e fesoasoani ai ia i latou e tausia a latou tautinoga?
- Pe o aofia i a tatou fuafuaga o lesona ni valaaulia patino e faatino?

Suesuega Faalesoa ma Felafolafoaiga Faalesoa

Ia toe faamanatu ia valaaulia o loo i se tasi o lesona a faifeautalai. Mo valaaulia taitasi, ia tali ia fesili nei:
- O a faamanuiaga na folafola mai e le Alii ia i latou o e tausia lenei tautinoga?
- E faapefea ona fesoasoani le usitai i lenei mataupu faavae i tagata ia faateleina lo latou faatuatua ma molimau?
- E faapefea ona fesoasoani lenei tautinoga i tagata e salamo ai ma atili vave ai ona lagonaina le Agaga?
Mai au meafaigaluega o le fuafuaga, ia fai se lisi o tagata na e faafesootaia i aso e lua ua mavae. Ia aofia ai i latou o loo e aoaoina ma tagata o le ekalesia.
- Mo tagata taitoatasi, tusi valaaulia na e tuuina atu ma tautinoga na latou faia.
- Mafaufau po o a isi valaaulia semanu e mafai ona e tuuina atu.
- Ia talanoaina pe aisea na mafai ai ona e maua mai ni tautinoga mai nisi o nei tagata ae le o isi.
- O le a se mea e te faia e toe tulitatao ai nei tautinoga?

Aufono a le Itu, Konafesi Faalesone, ma le Aufono a Taitai o le Misiona

Ia talanoaina ia manatu lelei ma manatu fou mo fesootaiga i aso taitasi ma tagata o loo e aoaoina. Na faapefea ona faamanuiaina le galulue faatasi o faifeautalai ma tagata o le ekalesia? O a tusi po o faasalalauga faaeletonika e aoga? O a ni mea e mafai ona e faia pe a le o i ai tagata i aiga, pe ua pisi tele foi ua le mafai ai ona outou feiloai?
Ia talanoaina ia auala na lelei ai le aoaoina e faifeautalai o poloaiga o loo i le lesona 4.

Taitai Misiona ma Fesoasoani o le Misiona

Afai e mafai, Ia i ai faatasi ma faifeautalai mai lea taimi i lea taimi a o latou aoao atu. Fesoasoani ia i latou e taulai atu i le fesoasoani i tagata e osia ma tausia tautinoga.
Uunaia taitai perisitua o le uarota, taitai o faalapotopotoga, ma tagata o le ekalesia ina ia faia ni fesootaiga i aso taitasi ma tagata o loo aoaoina e faifeautalai—pe afai ua malilie tagata i lenei fesootaiga.