Valaauga o le Misiona
Mataupu 7: Aoao Lau Gagana o le Misiona

“Mataupu 7: Aoao Lau gagana o le Misiona,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 7,” Tala’i La’u Talalelei

kelope ma fu’a

Mataupu 7

Aoao Lau Gagana o le Misiona

Manatunatu i le Mea Lenei

  • E mafai faapefea ona ou faamalosia lo’u faatuatua i le Alii e fesoasoani ia te a’u e aoao se gagana fou?

  • Aisea e tatau ai pea ona ou saga faaleleia lo’u tomai i le gagana?

  • E mafai faapefea ona ou faaleleia lo’u tomai e tautala ma aoao atu i le gagana a la’u misiona?

  • E mafai faapefea ona ou maua le meaalofa o le tautala i gagana?

Saunia Oe Lava Faaleagaga

Na folafola mai e le Alii, “Aua e oo ina faalogo i lena aso, tagata taitoatasi i le faaatoatoaga o le talalelei i lana lava tautala ma lana lava gagana, mai ia i latou ua faauuina i lea mana” (Mataupu Faavae ma Feagaiga 90:11).

O loo lisi atu i lalo ia auala e mafai ona e faamalosia ai lou faatuatua o le a fesoasoani le Alii ia te oe ina ia e aoao atu ma molimau atu i le gagana a lau misiona:

  • Ia talitonu na valaauina oe e le Atua e ala mai i se perofeta.

  • Ole atu mo le fesoasoani a le Atua e ala i le tatalo faamaoni.

  • Galue ma le filiga e ala i le suesue, faataitai, ma le faaaogaina o le gagana a lau misiona i aso taitasi.

  • Ia agavaa mo le mafutaga a le Agaga Paia e ala i le tausia o poloaiga ma ola i tulaga faatonuina faafaifeautalai.

  • Faamama ou faamoemoega e ala i le alofa i le Atua ma e ala i le alofa i Ana fanau ma mananao e faamanuia i latou.

Ia Tuuto ma Maelega

O le aoao ina ia matuai lelei ona aoao atu i le gagana a lau misiona, e moomia ai taumafaiga maelega ma meaalofa a le Agaga. Aua e te ofo pe afai e foliga mai e faigata le galuega. E manaomia ai le taimi. Ia onosai ia te oe lava. A o e tuuto atu oe lava i le aoaoina o le gagana, o le a e maua tomai e tatau ai e faataunuu ai lou faamoemoega o se faifeautalai.

E le o tuua na o oe i le aoaoina o le gagana a lau misiona. O le a fesoasoani le Tama Faalelagi ma Iesu Keriso ia te oe a o e sailia la La’ua fesoasoani. Saili ma ia talia le fesoasoani a lau soa, tagata o le ekalesia, i latou e te aoaoina, isi faifeautalai, ma isi tagata.

Faalogo ma le toto’a ma tautala i le gagana i avanoa uma. Aua e te fefe i le faia o mea sesē. O tagata uma lava e aoaoina se gagana fou, e i ai lava sese. O le a malamalama tagata, ma o le a latou talisapaia au taumafaiga uma ina ia aoaoina le latou gagana.

Faaauau pea ona faaleleia ou tomai o le gagana seia oo i le faaiuga o lau misiona. A o faatupulaia lou tomai e tautala i le gagana, o le a faateleina foi ona faalogo atu tagata i mea e te tautala atu ai nai lo le auala e te fai atu ai. O le a faaitiitia lou popole i le auala e fesootai atu ai ma sili atu ona mafai ona tali atu i manaoga o isi.

Elder Jeffrey R. Holland

“Matou te … faamoemoe i faifeautalai uma o loo aoaoina se gagana …fou o le talaiga ina ia matuai atamamai ai lava i soo se vaega… . A o faapea ona e faia, o le a faaleleia foi ou tomai e [aoao atu] ma molimau atu ai. O le a sili atu ona taliaina oe ma sili atu ona faagaeetia faaleagaga oe i [au tagata e aoao]… .

“Aua ne’i faamalieina oe i le mea ua tatou ta’ua o le gagana na o faifeautalai. Ia aoaoina lou tagata i le gagana, ma o le a tele atu ai le avanoa e te pa’i atu ai i loto o tagata” (Jeffrey R. Holland, faasalalauga faasatelite a faifeautalai, Aok. 1998).

Faaauau pea ona faaaoga le gagana a lau misiona pe a e toe foi i le fale. Ua tele mea ua tuuina atu e le Alii ia te oe, ma e mafai ona i ai nisi taimi i le lumanai e mafai ona Ia faaaogaina ai ou tomai i le gagana.

Aoao le Igilisi

Afai e te le tautala Igilisi, e tatau ona e suesueina a o avea ai ma se faifeautalai. O le a faamanuiaina ai oe i le taimi o lau misiona faapea ma lou olaga atoa. O le aoaoina o le Igilisi o le a faamanuiaina ai foi lou aiga.

Mo nisi fesoasoani i le aoaoina o le Igilisi, tagai EnglishConnect mo Faifeautalai.

tamaitai o loo tusitusi i le apitalaaga

Mataupu Faavae o le Aoaoina o le Gagana

Faia le Tiutetauave

Faatutu ni sini mo le faaleleia atili o lou tomai i le gagana, ma fetuunai e lē aunoa. Ia fatu se fuafuaga e suesue ai le gagana Faaaoga le gagana i avanoa uma.

Ia Anoa Au Suesuega

Ia faatatau mea na e suesueina i ni tulaga moni lava o le olaga faapea gaoioiga i aso taitasi. Suesue vaega o le gagana na o le a fesoasoani ia te oe e ta’u atu mea e te manao e ta’u atu.

Saili ina ia Fesootai

Ia tautatala ma lau soa i le gagana i le tele o taimi e mafai ai. Faaaoga avanoa uma e aoao ma faataitai ai. Mo se faataitaiga, e mafai ona e fesili atu i se tagata ua toe foi mai po o se tasi o loo e aoaoina e fesoasoani ia te oe i le gagana. E leai se mea e sili atu nai lo le talanoa atu i tagata e tautatala ai i le gagana.

Aua le Faatusatusa

Aua nei faatusatusaina ou tomai o le gagana ma tomai o lau soa po o isi faifeautalai. O le faatusatusa e taitai atu ai i le faamaualuga po o le lotovaivai.

Aoao Mae’ae’a Ia Manatu Faavae Fou

Iloilo e lē aunoa mea sa e suesueina, ma faataitai i ni tulaga fou. O le a fesoasoani lenei mea ia te oe e manatua ai ma faaaoga mea o loo e aoaoina.

alii o loo tilotilo i le tusi

Ia Fausia se Fuafuaga e Suesue ai le Gagana

O se fuafuaga e suesue ai le gagana e fesoasoani lea i faifeautalai fou ma faifeautalai ua lava le malamalama, ia taulai atu i mea e mafai ona latou faia i aso taitasi e faaleleia ai lo latou tomai e tautatala i le gagana a le latou misiona. O lau fuafuaga o le a aofia ai mea o le a e faia i lou taimi e suesue ai le gagana ma mea o le a e faia i le aso atoa.

O laasaga nei o loo faaalia ai le auala e mafai ona e fatuina ai se fuafuaga e suesue ai le gagana e ala i le faaaogaina o le faagasologa o le setiina o sini mai le mataupu 8. Fetuunai lenei faagasologa pe a manaomia.

  1. Faatutu Sini ma Fai Fuafuaga ma le agaga tatalo. Faatutu ni sini faalevaiaso ma faaleaso e faaleleia ai lou tomai lautele e fesootai atu ai ma aoao atu le talalelei. Ia aofia ai mea e te manao e tautino atu e manatua, e pei o upu, fasifuaitau, mau, ma fuaitau.

  2. Tusifaamaumau ma Faatulaga. Filifili po o lē fea meafaigaluega o le gagana o le a fesoasoani ia te oe e ausia ai au sini. O meafaigaluega o gagana e mafai ona aofia ai tusitusiga paia, lomifefiloi, tusi o le kalama, polokalama TALL Embark, ma isi. Faatulaga taimi o le a e suesue aloaia ai ma faaaoga le gagana. Mo se faataitaiga, e mafai ona e faatulagaina e faitau leotele mai le Tusi a Mamona mo le 15 minute i aso taitasi i le taimi o le taumafataga o le aoauli.

  3. Faatino i au fuafuaga. E fiafia le Alii i taumafaiga, o lea ia galue ma le filiga e ausia au sini. Puipui le taimi e suesue ai lau gagana ma toe faatulaga mo se taimi mulimuli ane pe a tulai mai ni feteenaiga.

  4. Iloilo ma toe tulitatao. Iloilo soo lau fuafuaga o suesuega e iloilo ai po o le a le lelei o lo o i ai. Valaaulia lau soa, taitai o le misiona, tagata o le ekalesia, ma isi i lau eria e fautua mai ni auala e mafai ona e faaleleia ai. Auai i faavasegaga masani o gagana ua faatulagaina e siata ai lou alualu i luma ma faailoa ai auala e faaleleia ai.

Faapaleni lau suesuega o le gagana i le va o sini uumi mo le fatuina o se faavae o le gagana ma sini mo taimi pupuu mo gaoioiga patino ma tagata o loo e aoaoina.

I le taimi o lau suesuega aloaia o le gagana, faapaleni au sini ma fuafuaga i vaega faavae o le gagana o loo faaalia i lalo. Filifili mea o le a e aoaoina i le aso atoa.

tomai o le faalogo

tomai faitau

kalama

tomai e tautala ai

tomai tusitusi

vaogagana

Suesuega a le Tagata Lava Ia pe Faalesoa

Faaalu se taimi i vaiaso taitasi e iloilo ai lau suesuega o le gagana e ala i le fai atu o fesili nei:

  • Pe na ou suesueina le gagana a la’u misiona i aso taitasi o lenei vaiaso? O le a se mea e mafai ona ou faia e faaleleia atili ai pea la’u gagana o le misiona?

  • Pe o fesoasoani la’u fuafuaga ia te a’u ia maua, aoao atu, ma galulue ma tagata o le ekalesia ia sili atu? O a fetuunaiga e tatau ona ou faia i lau fuafuaga?”

  • O le a se mea e sili ona ou fiafia i ai e uiga i la’u suesuega o le gagana? O le a se mea e mafai ona ou faia ia sili atu ai le olioli i ai?

  • O le a le tele o le taimi e tatau ona ou faaaluina e faataitai ai le faalogo, faitau, tusitusi, ma le tautala? E mafai faapefea ona ou aoaoina lelei le vaogagana, kalama, ma le faaleoga?

  • O a gaoioiga ma punaoa o loo ou faaaogaina e suesue ai le gagana? O fea o loo sili ona fesoasoani ia te a’u? O a isi punaoa po o gaoioiga e ono fesoasoani?

  • O le a se mea e manaomia ona gauai atili atu i ai?

A uma ona tali nei fesili, fetuunai au fuafuaga o suesuega ma vaai pe latou te faaleleia au taunuuga. O le a taialaina oe e le Agaga a o e saili pea e faaleleia lau suesuega o le gagana.

Aoao Faatasi ma Au Soa

Fesoasoani i au soa ia maua le aafiaga o le faamanuiaina ma maua le mautinoa i le aoaoina o le gagana a le misiona po o le aoaoina o le Igilisi. Ia tuuina atu soo ma le faamaoni le faamalo i au soa ma isi faifeautalai i lo latou alualu i luma.

Tuuina atu ni manatu faaalia faigofie ma aoga ma le agalelei. Ia tuu atu ia i latou ni avanoa se tele e aoao ma molimau atu ai ma le faamanuiaina. Ia matauina le auala na fesoasoani atu ai se faifeautalai ua lava le iloa i lana soa o loo i le lenei tala moni.

Na faatoa ou taunuu atu lava i la’u eria lona lua ae ta’u mai e la’u soa ua oo ia te a’u le faasologa ou te faia ai se mafaufauga faaleagaga i le ma fafaga. O la’u soa muamua e fiafia lava o ia na te faia le aoaoga, ae o a’u sa faaaoga e tuuina atu ni nai vaega laiti o le lesona ona ou faalogologo lea.

Sa ou taumafai e faasufi la’u soa e tatau ona ia tuuina atu le mafaufauga faaleagaga, ae sa ia faamalosiau mai ia te au ou te talia le tofiga. Sa ou faataitaia faatasi ai ma lana fesoasoani.

Ina ua oo i le taimi e fai ai, sa ou susueina a’u tusitusiga paia ma faitau atu mai le 3 Nifae 5 ma le 7. Sa feto’i la’u alu ae sa ou mafaia lava ona faamalamalama atu le mafuaaga na ou lagona ai le taua tele o a’u fuaiupu na filifilia, ma sa ou maua le to’a ina ua uma. Ina ua tuu mai se fesili, sa ou tilotilo atu i la’u soa e tali, ae le’i matala lona gutu. O le taimi lena sa ou ofo ai ia te a’u lava ia ona o lo’u tuuina atu o se tali na manino lelei i le faaFarani. Sa sili ona ou ofo ona sa foliga mai e le’i iloa e le tagata lea o a’u lea e faaletonu ona o o’u tomai i fesootaiga. Sa ou maua le to’a ma iloaina sa sili atu la’u faaFarani nai lo se togi na ou tuuina e au lava ia i ai.

Sa mavae atu vaiaso, ma sa faaauau pea ona tuu mai a’u e la’u soa ou te faia ia aoaoga—e tusa lava pe ou te le’i manatu ou te mafaia, e tusa lava foi pe sa tau mafaufau o ia pe ou te mafaia. Sa ou lagonaina ua avea au ma se meafaigaluega a lo tatou Tama oi le Lagi nai lo le na o le avea ma se soa filemu.

Suesuega a le Tagata Lava Ia pe Faalesoa

Galulue faatasi ma isi faifeautalai e fesoasoani ia te oe e aoao le gagana a lau misiona.

  • Afai o loo oulua galulue faatasi ma se faifeautalai fou, e mafai faapefea ona sili atu ona e fesoasoani i lau soa ina ia aoaoina le Igilisi?

  • Afai o oe o se faifeautalai fou, o le a se ituaiga fesoasoani atonu e te talosagaina mai lau soa?

faifeautalai o loo aoaoina se tamaitai

Aoaoina o le Aganuu ma le Gagana

O le aganuu ma le gagana e vavalalata lava lo la sootaga. O le malamalama i le aganuu a tagata o le a fesoasoani e faamalamalama ai i le auala e faaaoga ai le gagana. O lenei malamalamaaga o le a fesoasoani foi ia te oe e fesootai atu ai vaega tulaga ese o le sāvali o le Toefuataiga i se auala o le a manino i tagata.

O se tasi o mea silisili e mafai ona e faia ina ia maua ai le faatuatuaga ma le alofagia o oe o le taliaina lea o le latou aganuu i ni auala talafeagai. O le toatele o faifeautalai maoa’e sa latou faia faapena (tagai i le 1 Korinito 9:20–23).

Suesuega a le Tagata Lava Ia pe Faalesoa

Faaaoga le manatu o loo i lalo e fesoasoani ia te oe e saunia ai e aoao atu se tasi e ese se aganuu po o se talaaga.

  • Mafaufau i tulaga faaleaganuu ma faalelotu o tagata o loo e aoaoina. Faailoa se vaega o lo latou talaaga e ono faigata ai mo i latou ona malamalama i se mataupu faavae o le talalelei. Fuafua ni auala e manino ai ona aoao atu lenei aoaoga faavae.

O Le Meaalofa o le Tautala i Gagana

O meaalofa a le Agaga e moni. O le meaalofa o gagana ma le faaliliuga o gagana e tele faaaliga. O nisi o nei meaalofa e aofia ai le tautala, malamalama, ma le faamatalatalaina o gagana. O aso nei, o le meaalofa o gagana e tele lava ina faaalia i le aoaoina ma le suesueina i le Agaga e fesoasoani ai i faifeautalai e aoao le gagana i a latou misiona.

E mafai e le Agaga Paia ona faaali mai le moni o lau molimau e ui atonu o loo i ai se papupuni o le gagana i le va o oe ma i latou e te aoaoina. E faapena foi, e mafai e le Agaga Paia ona aumaia upu ma fasifuaitau i lou manatuaina ma fesoasoani ia te oe ia malamalama i mea o loo fai mai ai tagata mai o latou loto.

Mo le tele o vaega, o le a e le mauaina nei meaalofa e aunoa ma se taumafaiga. E manaomia ona e sailia ma le mataalia i latou e faamanuia ai isi (tagai i le Mataupu Faavae ma Feagaiga 46:8–9, 26). O se vaega o le sailia o le meaalofa o le tautala i gagana, o le galue lea ma tauivi ma faia mea uma e te mafaia ina ia aoaoina ai le gagana. Ia onosai a o e suesue ma le agaga tatalo ma faataitai le gagana. Talitonu o le a fesoasoani le Agaga ia te oe a o e faia se taumafaiga maelega. Ia faatuatua e mafai ona e maua le meaalofa o gagana e fesoasoani ia te oe ma i latou e te aoaoina.

Afai e te lagona lou tauivi ina ia faailoa atu ou lagona i le manino e te manao i ai, ia manatua e mafai e le Agaga ona tautala atu i loto o fanau uma a le Atua. Na aoao mai Peresitene Thomas S. Monson:

“E i ai le gagana e tasi … ua silafia uma e faifeautalai—o le gagana lea a le Agaga. E le aoaoina mai ni tusi ua tusia e tagata popoto aoaoina, pe aoaoina foi i le faitau po o le tauloto. E maua le gagana a le Agaga e soo se tasi e saili ma lona loto atoa ia iloa le Atua ma tausi Ana poloaiga paia. O le malamalama atoatoa i lenei gagana e mafai ai e le tagata ona soloia puniala, manumalo i toatuga, ma uunaia loto o tagata” (“O Le Agaga e Ola Ai,” Liahona, Iuni 1997, 4).

Suesuega a le Tagata Lava Ia pe Faalesoa

Faaaoga faamatalaga nei e iloilo ai au taumafaiga e saili le meaalofa o gagana. Tusifaamaumau lagona uunai ma sini e fesoasoani ia te oe e faaleleia ai lou aoaoina o le gagana.

Manatu mo le Suesue ma le Faaaogaina

Suesuega Faaletagata Lava Ia

  • Iloilo punaoa o le gagana i luga o le Saite a Faifeautalai. Ia iloa se mea e te le’i faataitaia, ma faatu se sini ina ia faataitai i ai i ni nai aso o sosoo ai.

  • I le isi a outou fonotaga faaleitu, ia talosaga atu i se faifeautalai ua lava le iloa ma ua i ai ni tomai lelei i le gagana, e faailoa atu po o le a le mea na ia faia e aoaoina ai le gagana.

Suesuega Faalesoa ma le Felafolafoaiga Faalesoa

  • Faataitai ona aoao e le tasi ia le isi i lesona a faifeautalai i le gagana a lau misiona. I le taimi muamua, atonu e faigofie lava le aoao atu a faifeautalai fou, faasoa atu se molimau faigofie, ma tauloto atu ia mau. A o faateleina lo latou mautinoa ma le gafatia, o le a mafai ona latou auai atoatoa i le aoaoina o tagata.

  • Toe iloilo manatu o i lenei mataupu ma punaoa o le gagana i luga o le Saite a Faifeautalai. Ia talanoaina ia fautuaga e mafai ona e faaaogaina i suesuega faalesoa i le gasologa o le vaiaso e sosoo ai.

  • Fai i lau soa e faalogo atu i lau faaleoga o upu ma fesoasoani ia te oe ina ia faaleleia. Fai atu ia te ia e tusi i lalo ni tulaga e le malamalama ai ia te oe. Ia fai se lisi o upu, fuaitau, po o le kalama o le a fesoasoani. Ia faamalamalama ma faataitai le auala e faaaoga ai upu o loo i le lisi i gaoioiga o le a oo mai.

  • Faataitai le faalogo mataalia. Fuafua se taimi i le aso e faalogologo ai ma le mataalia e faailoa mai upu ma mamanu ua e aoaoina. Afai e te faalogo i se fuaitau e ese lona faaaogaga mai le auala e te faaaogaina ai, ia tusi i lalo ma faataitai.

  • Fai se lisi o mea e ono fai mai ai tagata i lena aso. Fuafua ma faataitai ni auala e mafai ona e tali atu ai.

Aufono a le Itu, Konafesi Faalesone, ma le Aufono a Taitai o le Misiona

  • Valaaulia tagatanuu e tautatala i o latou lava gagana e auai i se tasi o nei sauniga. Ia fuafua e aoaoina i latou e faifeautalai i ni vaega toalaiti. Fai atu i tagatanuu e tautatala i le gagana ina ia tusi i lalo mea latou te matauina ma aumai ni manatu faaalia e tusa ai ma le tomai i gagana a faifeautalai.

  • Ia vave tofi se faifeautalai se toatasi pe toalua e faamatala ni tulaga faamanuiaina sa la mauaina i le suesueina o le gagana.

  • Ia tofi se faifeautalai ua lava le malamalama e tuu atu faapuupuu ni vaega o le gagana lea e masani ona faigata i faifeautalai. Tuu atu ia te ia ni faataitaiga o le faaaogaina lelei o le gagana, ma tuu atu i faifeautalai e faataitai.

  • Ia tuu atu i faifeautalai o le atunuu ia faasoa atu ni o latou manatu.

Taitai Misiona ma Fesoasoani o le Misiona

  • Faamamafa atu le taua o le suesueina pea lava pea o le gagana i aso taitasi.

  • Uunaia faifeautalai e faaaoga le gagana o le misiona i le tele e mafai ai.

  • Tuuina atu ni elemene o se fuafuaga suesue o le gagana a le misiona i se faatulagaga faatulagaina lelei o suesuega. Iloilo lenei mea i fonotaga a le aufono a le itu.

  • Vaavaai mo avanoa e talanoa ai ma faifeautalai i le gagana o loo latou aoaoina. Ia faatalanoa faavaitaimi i latou i lenei gagana.

  • Talosaga atu i taitai o le lotoifale ma tagata lotu mo ni manatu i le auala e mafai ai e faifeautalai ona faaleleia lo latou tomai i gagana.

  • Tuu atu faatonuga i le konafesi faalesone po o le aufono a taitai o le misiona i mea sese masani e faia e faifeautalai o e o loo aoaoina le gagana a lau misiona.

  • Aoao faifeautalai e uiga i meaalofa faaleagaga.

  • Ia matauina faifeautalai pe a latou aoao atu i le gagana a le misiona.