Kūr ko n̄an Mijen
Jebta 1: Kakūrm̧ool Jibadbad in Mijenede eo Am̧

“Jepta 1: Kakūrm̧ool Jibadbad in Mijenede eo Am̧,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 1,” Kwaļo̧k Gospel eo Aō

Dan Jones ej kwaļo̧k naan

Dan Jones, juon iaan mijenede ro rem̧m̧an tata ilo epepen in, ej kwaļo̧k gosel eo ilo Wales.

© 1993 Clark Kelley Price. Jab kapeik.

Jebta 1

Kakūrm̧ool Jibadbad in Mijenede eo Am̧

Jibadbad eo Am̧: Karuwaineneik ro jet n̄an itok n̄an Kraist n̄an jipan̄ er bōk gospel eo kar kōjepļaaktok kōn tōmak ilo Jisōs Kraist im Pinmuur eo An, ukweļo̧k, peptaij, bōk menin letok eo an Jetōb Kwojarjar, im niknik n̄an jem̧ļo̧kin.

Ļōmņak kōn Menin

  • Ta Jibadbad eo aō āinwōt juon mijenede?

  • Ta mālim im kajoor eo ej itok ippān kūr eo aō?

  • Ekōjkan aō pedped ioon, kile, im katakin kōn Jetōb?

  • Ta in gospel eo an Jisōs Kraist?

  • Ta ennaan eo an Jepļaaktok eo? Etke ekanooj in aorōk?

  • Ta eddo eo aō n̄an ejake im kalōk Kabun̄ eo an Jisōs Kraist?

  • Ekōjkan aō naaj jeļā eļan̄n̄e ij juon mijenede eo ewejepedik?

Eddo eo Aō n̄an Katakin Gospel eo Kōjepļaaktok an Jisōs Kraist

Kwoj jepooļ jān armej ro. Kwoj eļļāļo̧k jān er ilo iaļ eo im itok itak ibwilijier. Kwoj loļo̧k er ilo im̧ōko im̧weer im ekkejel ippāer ilo online. Er rej aolep ajri ro nejin Anij—kwoj jeier im jatier. Anij ej iakwe er ejja wōt An iakwe eok.

Elōn̄ iaan armej rein rej pukot tokjān mour in. Er rej inepata kōn ilju jekļaj eo aer im baam̧le ko aer. Er rej aikuj juon en̄jake in uwaan me ej itok jān jeļā er rej ajri ro nejin Anij im membōr ro an baam̧le eo An indeeo. Rej kōņaan en̄jake kōjparok eo ilo juon laļ eo aorōk ko an rej oktak. Er rej kōņaan “aenōm̧m̧an ilo laļ in, mour indeeo ilo laļ eo ej itok” (Katak im Bujen Ko 59:23).

Elōn̄ rej “dāpiji er jān m̧ool eo kōnke rej jab jeļā ia eo ren pukote ie” (Katak im Bujen Ko 123:12). Gospel eo an Jisōs Kraist, āinwōt kar kōjepļaaktok kōn Rikanaan Josep Smith, ej letok mour indeeo. M̧ool in ej ņa mejļan aikuj ko ilo jetōb an armej ro im ej jipan̄ er kakūrm̧ool ikdeelel ko aer rem̧wilaļ.

Āinwōt juon ribōk jikin Jisōs Kraist eo kar kōmālimi, kwoj katakin bwe “lo̧mo̧o̧r ej itok ilo im kōn Messaia Ekwōjarjar” (2 Nipai 2:6). Kwoj karuwaineneik armej ro n̄an itok n̄an Kraist n̄an erom rioktak n̄an E im gospel eo An kar kōjepļaaktok. Ilo aer bōk kūr eo am̧, renaaj bōk juon m̧ōņōņō, kōjatdikdik, aenōm̧m̧an im jibadbad eļapļo̧k.

N̄an itok n̄an Rilo̧mo̧o̧r, ej aikuj wōr an armej ro tōmak ilo E. Kwomaron̄ jipan̄ er kōļapļo̧k tōmak in ilo am̧:

  • Katakin er gospel eo an Jisōs Kraist kar kōjepļaaktok im kam̧ool kōn m̧ool eo an.

  • Kajjitōk ippāer n̄an kallim̧ur n̄an mour ekkar n̄an katak ko ie.

  • Bar etale ippāer im jipan̄ er mour kaki kallim̧ur ko raar kōm̧m̧ani.

  • Jipan̄ er bōk en̄jake ko me rej en̄jake kareel eo an Jetōb Kwojarjar (lale 1 Nipai 10:17–19).

Tōmak ilo Jisōs Kraist enaaj tōlļo̧k armej ro n̄an ukweļo̧k. Kōn en̄taan eo n̄an jerawiwi ko ad, Jisōs ej kōm̧m̧an bwe en pidodo ukweļo̧k. Ilo an armej ukweļo̧k, renaaj erreo jān jerawiw im epakeļo̧k Jemedwōj Ilan̄ im Jisōs Kraist. Er renaaj en̄jake lan̄lōn̄ eo im aenōm̧m̧an eo an bōk jeorļo̧k bōd.

Ukweļo̧k ej kōpooj armej ro n̄an bujen eo an peptaij im menin letok eo an Jetōb Kwojarjar. “Itok n̄an eō” Rilo̧mo̧o̧r ekar ba, “im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata” (3 Nipai 27:20).

Ilo am̧ meļeļe im naan in kam̧ool eo am̧ kōn Rilo̧mo̧o̧r im Pinmuur eo An eddōkļo̧k, ikdeelel eo am̧ n̄an leto letak gospel eo enaaj ļapļo̧k. Kwonaaj en̄jake, ejja āinwōt kar Liai, “jon̄an … aorōkin n̄an kōm̧m̧an bwe ro ilaļ in ren jeļā men kein” (2 Nipai 2:8).

Visōn eo kōn Wōjke in Mour

Wōjke in Mour, jān Damir Krivenko.

Ekkatak Am̧ Make im Ippān Eo M̧ōttam̧

Etale pija kein rej ippān ilo am̧ ekaktak kōn visōn eo an wōjke in mour eo ilo 1 Nipai 8 im 11.

  • Ta eo wōjke in mour eo ej kakōļļeik ilo visōn in? (Lale 1 Nipai 11:21–23.)

  • Ta eo Liai ekar kōņaan ālkin an kan̄ leen wōjke eo? (Lale 1 Nipai 8:10–18.)

  • Ilo visōn eo, ta eo armej ro raar aikuji n̄an bōk m̧ōttan leen wōjke eo? Ta eo jej aikuj in kōm̧m̧ane n̄an bōk aolep kōjeraam̧m̧an ko an Pinmuur eo an Rilo̧mo̧o̧r? Ilo wāween ta kallim̧ur ko im bujen ko rej jipan̄ kōj bōk m̧ōttan kōjeraam̧m̧an kein?

  • Ekōjkan am̧ maron̄ jipan̄ ro jet bōk m̧ōttan leen ko an gospel in?

Mālim eo im Kajoor eo an Kūr eo Am̧

Kar kūr eok im kōjenolo̧k eok n̄an “[kabun̄bun̄ļo̧k] naan ko rem̧m̧an in lan̄lōn̄ eļap, em̧ool gospel eo ejjeļo̧k jem̧ļo̧kin” (Katak im Bujen Ko 79:1). Ejja āinwōt ļōm̧aro nejin Mosaia, kwomaron̄ katakin kōn mālim im kajoor eo an Anij (lale Alma 17:2–3).

Ium̧win tōl an Kraist, mālim eo n̄an kwaļo̧k gospel eo kar kōjepļaaktok kōn Rikanaan Josep Smith. Ke kwar kōjenolo̧k āinwōt juon mijenede, kwar bōk mālim in. Ippān tok ej iwōj jim̧we, maron̄, im eddo eo n̄an jutak ilo etan Irooj im katakin gospel eo An.

Mālim in ekoba juon eddo n̄an mour erreo kōn kūr eo am̧. Watōk kōjenolo̧k eo am̧ ilo m̧ool. Kōttoļo̧k eok jān jerawiwi im jān jabdewōt men me ej nana ak etoon. Kōttoļo̧k eok jān wāween ko im ļōmņak an laļ in. Ļoor jon̄ak ko ilo: Missionary Standards for Disciples of Jesus Christ. Āinwōt ribōk jikin Irooj, kwon “juon jon̄ak n̄an ro rej tōmak (1 Timote 4:12). Kautiej etan Jisōs Kraist kōn jerbal ko im naan ko am̧.

Ilo kakobaba n̄an mālim in, kwoj aikuji kajoor eo ilo jetōb n̄an kakūrm̧ool kūr eo am̧. Anij ej letok kajoor eo ilo jetōb ilo an jab m̧ūjkōk am̧ jerbal n̄an kōkajoor naan in kam̧ool eo am̧ kōn E, Jisōs Kraist, im m̧ool ko an gospel eo kwoj katakin. E ej lewaj kajoor eo ilo jetōb ilo am̧ jar, ekkatak jeje ko rekwojarjar, im kappukōt n̄an kakūrm̧ool jibadbad in mijenede eo am̧. E ej letok kajoor eo ilo jetōb ilo am̧ kajjieon̄ kōjparok kien ko An im bujen ko kwar kōm̧m̧ani ke kwar bōk kain̄i ko an lo̧mo̧o̧r (lale Katak im Bujen Ko 35:24).

Kajoor eo ilo jetōb emaron̄ waļo̧k ilo am̧:

Ekkatak Jeje ko Rekwojarjar

Ekōjkan am̧ bōk im kōkajoorļo̧k juon naan in kam̧ool?

Ekōjkan am̧ bōk kajoor eo ilo jetōb?

Ekkatak Am̧ Make

Etale im kejekļo̧kjeņ kōn bujen kein kwar kōm̧m̧ani ippān Anij. Ekkatak kōn kōjeraam̧m̧an ko me Anij ekar kallim̧ur kaki n̄an ro me rej kōjparok bujen kein. Kejekļo̧kjeņ kōn kōjeraam̧m̧an ko kwar būki kōn kōjparok er. Ļo̧o̧ke ļōmņak ko am̧ ilo jōnōļ in ekkatak eo am̧.

Peptaij im Kapene

Ekkapit an Priesthood (n̄an elder ro)

Menin Letok Kwojarjar an Tampeļ

  • Mour kōn kien pokake.

  • Pokake kien kaarmejete.

  • Pokake kien eo an gospel eo an Jisōs Kraist.

  • Kōjparok kien erreo.

  • Kōjparok kien wujlepļo̧k.

  • (Lale Bok in Bōk Meļeļe Eļap, 27.2).

Ekkatak Am̧ Make im Ippān Eo M̧ōttam̧

Riiti Jon 15:1–16. Ilo wāween ta Kraist eo ej vine eo? Ekōjkan am̧ juon ra an vine eo? Ekōjkan an kōjenolo̧k eo am̧ iookļo̧k jemjerā in?

Riiti peba in jerbal in kwaļo̧k eo am̧. Ļo̧o̧ke en̄jake ko im ļōmņak ko am̧ kōn ta eo kwoj riiti. Kajjojo iien kwoj ekkatak jebta in, ļōmņak in āliji jekjek in. Je ekōjkan am̧ en̄jake ko okta ilo iien ko.

Ekkatak Am̧ Make

Ekkatak Katak im Bujen Ko 109:13–15, 21–30, 38–39, 55–57. Eoon kein rej m̧ōttan ko jān jar in aje eo eim̧we an Rikanan Josep Smith n̄an Kirtland Tampeļ.

Je juon laajrak in kōjeraam̧m̧an ko Josep Smith ekar kajjitōk kaki n̄an ro retiljek me raar bōk menin letok kwojarjar eo ilo m̧weo ekwojarjar an Irooj. Ta en̄jake ko am̧ kōn kōjeraam̧m̧an kein?

Kappukōt n̄an an Jetōb Kwojarjar pād Ippam̧

Kwar bōk menin letok eo an Jetōb Kwojarjar ke kar kapen eok juon membōr an Kabun̄ in. Āinwōt juon mijenede—im ilo aolepān mour eo am̧—juon iaan aikuj ko am̧ rem̧m̧an tata enaaj bōk Jetōb Kwojarjar eo ippam̧ (lale 1 Nipai 10:17; 3 Nipai 19:9). Jetōb Kwojarjar ej membōr eo kein kajilu an Doulul in Anij.

Jetōb Kwojarjar ej tōl, ej katakin, im ej kaenōm̧m̧an eok. E ej karreoik im ej kōkwojarjar eok. E ej kam̧ool kōn m̧ool eo im ej kwaļo̧k kam̧ool eo kōn Jemen im Nejin. E ej bōktok oktak eo am̧ im oktak eo an ro kwoj katakin er. (Lale 3 Nipai 27:20; 28:11; Ether 12:41; Moronai 8:26; 10:5; Jon 15:26.)

Jetōb Kwojarjar “enaaj kwaļo̧k n̄an kom̧ aolep men ko kom̧ij aikuj kōm̧m̧an” (2 Nipai 32:5). E enaaj kōļapļo̧k maron̄ ko am̧ im jerbal in jipan̄ eo eļapļo̧k jān ta eo kwomaron̄ kōm̧m̧ane n̄an kwe make.

Kappukōt n̄an an Jetōb Kwojarjar eo pād ippam̧ aikuj in juon iaan ikdeelel ko am̧ raorōk tata. Kwonaaj en̄jake jemjerā eo An ilo am̧:

Būreejtōn Russell M. Nelson

“Ij akweļap ippāmi n̄an kōļapļo̧k maron̄ in jetōb eo ami n̄an bōk revelesōn. … Kāālet n̄an kōm̧m̧ane jerbal eo ekwojarjar eaikuje lan̄lōn̄ kōn menin letok eo an Jetōb Kwojarjar im eo̧ron̄ ainikien Jetōb eo emakijkijļo̧k im alikkarļo̧k” (Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96).

Ekkatak n̄an Kile Jetōb

Enaaj em̧m̧anļo̧k am̧ kakūrm̧ool jibadbad in mijenede eo am̧ ilo am̧ ekkatak n̄an kile im ļoor tōl jān Jetōb Kwojarjar. Jetōb ekkā kōnono ilo mera, kōn en̄jake ko im ļōmņak ko am̧. Wujepļo̧k eok make n̄an kappukōt, kile, im ļoor im̧we kein rem̧m̧an. Rej itok ilo elōn̄ wāween ko (lale jebta 4; lale barāinwōt Katak im Bujen Ko 8:2–3; 11:12–14; Galetia 5:22–23).

Katakin jān Jetōb

Gospel eo an Jisōs Kraist ej “kajoor an Anij n̄an lo̧mo̧o̧r ippān ro otemjej rej tōmak” (Rom 1:16). Kōn un jab in, ennaan eo an Jepļaaktok eo an gospel eo ej aikuj in katakin kōn kajoor eo ekwojarjar—kajoor eo an Jetōb Kwojarjar.

Irooj ekar ba, “Jetōb eo enaaj lewōj n̄an kom̧ jān jar in tōmak; im eļan̄n̄e kom̧ij jab bōk Jetōb eo kom̧ij jamin maron̄ katakin” (Katak im Bujen Ko 42:14; lale barāinwōt 50:13–14, 17–22). Ilo am̧ katakin kōn kajoor eo an Jetōb Kwojarjar, E enaaj:

  • Katak in eok m̧ool eo im bōktok katak eo kwar ekkatak n̄an ememļo̧kjeņ eo am̧ (lale Jon 14:26).

  • Lewaj n̄an eok naan ko n̄an kōnono n̄e kwoj aikuji er (lale Katak im Bujen Ko 84:85).

  • Bōkļo̧k ennaan eo am̧ n̄an bōro ko an armej ro kwoj katakin (lale 2 Nipai 33:1).

  • Jipan̄ eok—im ro rej bōke jān Jetōb eo—n̄an meļeļe doon im katakin im lem̧ōņōnō ippān doon (lale Katak im Bujen Ko 50:17–22).

  • Kam̧ool kōn tarlep in m̧ool eo an ennaan eo am̧ im kapen naan ko am̧ n̄an ro me rej bōk eok (lale Katak im Bujen Ko 100:5–8).

Irooj enaaj kōjeraam̧m̧an eok eļap ilo am̧ kappukōt, pedped ioon, im katakin kōn Jetōb Kwojarjar (lale jebta 4 im 10).

Juon illo̧k Juon, jān Walter Rane

Gospel eo an Kraist im Katak an Kraist

Gospel eo an Jisōs Kraist ej kōmeļeļeik jim̧or ennaan eo am̧ im jibadbad eo am̧. Ej letok jim̧or “ta” eo im “etke” kōn jerbal in jipan̄ an mijenede eo am̧. Gospel eo An ej kobaik aolep katak, pedped in katak eo, kakien ko, kien ko, kain̄i ko, im bujen ko remenin aikuj n̄an lo̧mo̧o̧r im mour ijo eutiej tata.

Ennaan eo an gospel eo ej bwe jemaron̄ tōpar kajoor in lo̧mo̧o̧r eo, pinmuur eo an Jisōs Kraist kōn kōjerbal tōmak ilo E, ukweļo̧k, peptiaj, bōk menin letok eo an Jetōb Kwojarjar, im niknik n̄an jem̧ļo̧kin (lale 3 Nipai 27:13–22).

Menin ej barāinwōt jeļā kake āinwōt katak eo an Kraist. Mour kōn katak in ej en̄in ejkōjkan ad itok n̄an Kraist im mour (lale 1 Nipai 15:14). Menin ej ļōmņak kajoor ilo Bok in Mormon (lale 2 Nipai 31; 32:1–6; 3 Nipai 11:31–40). Jibadbad eo am̧ ej n̄an jipan̄ armej itok n̄an Kraist kōn jipan̄ er mour kōn katak eo An.

Hyrum Smith

“Kwaļo̧k pedped in katak ko m̧oktata an Gospel in—kwaļo̧ki im bar kwaļo̧ki; kwonaaj lo men jab in raan n̄an raan, ļōmņak ko rekāāl im eļapļo̧k meram kōn er enaaj waļo̧k n̄an kwe. Kwomaron̄ eddōkļo̧k ioer ejjeļo̧k oktak n̄an alikkar meļeļe kaki. Innām kwonaaj maron̄ in kōm̧m̧ani eļapļo̧k aer alikkar n̄an meļeļe jān ro kwoj katakin er” (Hyrum Smith, in History, 1838–1856, volume E-1 [1 July 1843–30 April 1844], 1994, josephsmithpapers.org).

Ekkatak Jeje ko Rekwojarjar

Ta eo eoon ko im naan in kean̄ ko rej katakin kōn gospel eo an Jisōs Kraist im katak eo an Kraist? Kōm̧m̧an kakeememej ko ilo jōņōļ in ekkatak eo am̧ n̄an jipan̄ eok meļeļe im keememej.

Kajoor in Oktak eo an Bok in Mormon, jān Ben Sowards

Tōmak ilo Jisōs Kraist

Tōmak ej pedped eo n̄an pedped in katak ko an gospel ko jet. Ej juon pedped in katak in jerbal im kajoor.

Tōmak eo ad ej aikuj in pād ioļapļap ilo Jisōs Kraist n̄an an tōlļo̧k kōj n̄an lo̧mo̧o̧r. Rilo̧mo̧o̧r ekar katakin, “Bwe kin an Anij yokwe laļ, ear letok juōn wōt Nejin ear keotak, bwe jabdewōt eo ej leke e en jab jako, ak en mour indeeo” (Jon 3:16).

Tōmak ilo Jisōs Kraist ekoba tōmak bwe E Nejin Anij Jitōnbōro Emake Wōt. Ej lōke E āinwōt ad Rilo̧mo̧o̧r im Ripinmuur (lale Mosaia 3:17; 4:6–10; Alma 5:7–15). Ej bōk lōke edipio ilo E im An in naan, katak ko, im kallim̧ur ko Ad tōmak ilo Kraist ej eddōkļo̧k ilo ad ļoor katak ko An im waanjon̄ak eo kōn lukkuun jibadbad an bōro (lale 2 Nipai 31:6–13; 3 Nipai 27:21–22).

Āinwōt juon mijenede, jipan̄ armej ro kōm̧m̧an im kōjparok kien ko me rej kalōk tōmak eo aer ilo Jisōs Kraist. Kien kein rej kōpooj er n̄an bōk kain̄i ko im kōm̧m̧an im kōjparok bujen ko rekwojarjar ippān Anij.

Ukweļo̧k

Tōmak ilo Jisōs Kraist ej tōlļo̧k kōj n̄an ukweļo̧k (lale Hilamōn 14:13). Ukweļo̧k ej jekjek eo n̄an oktakļo̧k n̄an Anij im oktakļo̧k jān jerawiwi. Ilo ad ukweļo̧k, jerbal ko ad, ikdeelel ko, im ļōmņak ko rej oktak n̄an jokkun wōt ippān ankilan Anij.

Kōn en̄taan in pinmuur eo An, Rilo̧mo̧o̧r eo ekar kōļļāik wōņaan jerawiwi ko ad (lale Mosaia 15:9; Alma 34:15–17). Ilo ad ukweļo̧k, maron̄ bar jeorļo̧k jeraiwiw ko ad kōnke Jisōs Kraist im en̄taan eo An, bwe E ej bōk jim̧we ko An an meanwōd im būrom̧ōj (lale Moronai 7:27–28). Ilo naan ko an rikanaan Liai, ad “lo̧mo̧o̧r ej itok … kōn tōllo̧ke, im tūriam̧okake, im jouj an Messaia Ekwōjarjar” (2 Nipai 2:6, 8).

Ukweļo̧k eļapļo̧k jān kōjerbal kajoor in kōņaan eo n̄an ukōt juon m̧wil ak anjo̧ ioon juon m̧ōjņo̧. Ukweļo̧k ej juon oktak m̧ool n̄an Kraist, eo ej letok n̄an kōj kajoor eo n̄an en̄jake juon “oktak ekajoor” ilo būruōd (lale Alma 5:12–14). Menin ekoba ettā ilo ron̄jake Jetōb eo im ajeļo̧k n̄an ankilan Anij. Ilo ad ukweļo̧k, jej kōļapļo̧k kallim̧ur eo ad n̄an jerbal n̄an Anij im pokake kien ko An. Jej bar ļotak ilo jetōb ilo Kraist.

Ukweļo̧k ej juon pedped in katak em̧m̧an me ej bōktok lan̄lōn̄ im aenōm̧m̧an. Ej bōktok n̄an kōj “kajoor in Ripinmuur eo, n̄an lo̧mo̧o̧r eo an armej ro [ad]” (Hilamōn 5:11).

Kwon peran im iakwe ilo jipan̄ armej ro meļeļe etke rej aikuj ukweļo̧k. Kōn kajjitōk ippān armej ro kwoj katakin er n̄an kōm̧m̧ani kallim̧ur ko, kwoj kajjitōk ippāer n̄an ukweļo̧k im kwoj leļo̧k n̄an er kōjatdikdik.

Ekkatak Jeje ko Rekwojarjar

Ta eo kwomaron̄ ekkatak jān eoon kein kōn kean̄ n̄an ukweļo̧k?

Peptaij

Tōmak ilo Jisōs Kraist im ukweļo̧k ej kōpooj kōj n̄an kain̄i eo an peptaij. “leen ko m̧oktata an ukeļo̧k ej peptaij” (Moronai 8:25). Jej deļo̧n̄ ilo oror eo an mour indeeo n̄e jej peptaij kōn katulo̧k jān juon eo ewōr an mālim jān Anij.

N̄e jej peptaij, jej kōm̧m̧ane juon bujen ippān Anij. Ilo ad kōjparok bujen in, Anij ej kallim̧ur n̄an letok n̄an kōj jemjerā eo an Jetōb Kwojarjar, jeorļo̧k jerawiwi ko ad, im letok n̄an kōj uwaan ilo Kabun̄ eo an Jisōs Kraist (lale Katak im Bujen Ko 20:77, 79; Moronai 6:4). Jej kobaļo̧k ippān Irooj im bar ļotak ilo jetōb kōn kain̄i in elan̄lōn̄, im ekōjatdikdik.

Peptaij im kapene armej ro kwoj katakin er rej ioļapļap n̄an jibadbad eo am̧. Jipan̄ er meļeļe bwe n̄an er maron̄ peptaij, rej aikuj tōpar jekjkein ko ilo Katak im Bujen Ko 20:37).

Ekkatak Ippān Kampānien Eo M̧ōttam̧

Etale eoon kein:

Pedped ioon ekkatak eo am̧ kōn eoon kein itulōn̄, kōm̧m̧ane ruo laajrak ko:

  1. Men ko aikuji n̄an peptaij

  2. Bujen ko kar kōm̧m̧ani ilo peptaij

Ekōnono ippān kampānien eo m̧ōttam̧ kōn ekōjkan katakin menin n̄an ro jet.

Kapene im Menin Letok eo an Jetōb Kwojarjar

Peptaij ej itok ilo ruo m̧ōttan ko: peptaij kōn dān im peptaij kōn Jetōb. Ālkin ad peptaij kōn dān, peptaij ej dedeļo̧k n̄e jej kapen kōn likūt pā ko ioon bar jān juon eo ewōr an mālim jān Anij. Jān kapene eo jemaron̄ bōk menin letok eo an Jetōb Kwojarjar im juon jeorļo̧k bōd in jerawiwi ko ad.

Rikanaan Josep Smith ekar katakin, “Peptaij kōn dān ej bōtaab ej jimettan in peptaij, im ejjab em̧m̧an n̄e ejako jimettan eo juon—en̄in ej, peptaij eo kōn Jetōb Kwojarjar” (Teachings of Presidents of the Church: Joseph Smith [2007], 95).

Alma ekar katakin, “Aolep armej … reaikuj bar ļotak; ļotak jān Anij, oktak jān jekjek in ļōn̄ im wōtlo̧k eo aer, n̄an jekjek eo ejim̧we, im bōk lo̧mo̧o̧ren jān Anij, erom m̧aan im kōrā ro nejin; Im āindein rej erom armej ro rekāāl” (Mosaia 27:25–26).

Kōn būrom̧ōj eo, peptaij kōn dān im kōn Jetōb ej bar ļotak ilo jetōb.

Ekkatak Jeje ko Rekwojarjar

Ta jet iaan kōjeraam̧m̧an ko an bōk menin letok eo an Jetōb Kwojarjar?

Etke jej kōņaan menin letok eo an Jetōb Kwojarjar?

Niknik n̄an Jem̧ļo̧kin

Ļoor Jisōs Kraist ej juon kallim̧ur to̧o̧n wōt ad mour. Jej niknik n̄an jem̧ļo̧kin ilo ad wōnm̧aanļo̧k wōt ilo aolepān mour ko ad n̄an kōjerbal tōmak ilo Kraist, ukweļo̧k raan otemjeļo̧k, bōk aolep kain̄i ko im bujen ko an gospel eo, kōjparok bujen kein, im bōk jemjerā eo an Jetōb Kwojarjar. Menin ekoba bar kōkāāl bujen ko jaad kōm̧m̧ani kōn bōk m̧ōttan kwojkwoj eo.

Irooj Ej Aō Seperd, jān Yongsung Kim

Irooj Ej Aō Seperd, jān Yongsung Kim. Pija eo kōn jipan̄ jān Havenligh.

Gospel eo—Iaļ eo an Jemedwōj Ilan̄ Ļo̧k n̄an Ippān

Gospel eo an an Jisōs Kraist emaron̄ ukōt wāween ad mour im wōn eo jej erom. Pedped in katak ko an rejjab baj bun̄tōn ko me jej en̄jaki juon alen ilo mour ko ad. N̄e jej āliji er ilo aolepān mour, rej kepaakļo̧k kōj n̄an Anij im jino kōļapļo̧k jon̄an eo an mour ejeraam̧m̧an. Rej bōktok aenōm̧m̧an, kemour, im jeorļo̧k bōd. Rej barāinwōt kōmeļeļeik iaļ eo an Jemedwōj Ilan̄ ekar letok n̄an kōn̄ n̄an bōk mour indeeo Ippān.

Gospel eo an Jisōs Kraist ej tōl ekōjkan am jerbal āinwōt juon mijenede. Ej barāinwōt kapedped kijejeto ko am̧. Jipan̄ armej ro bōk tōmak ilo Jisōs Kraist n̄an ukweļo̧k (lale Alma 34:15–17). Katakin im kam̧ool bwe tarlep eo an gospel eo an Jisōs Kraist im mālim eo an priesthood eo em̧ōj kōjepļaaktok. Kajjitōk ippān armej ro n̄an peptaij im mour kōn katak ko an Rilo̧mo̧o̧r.

Gospel eo an Jisōs Kraist ej Kōjeraam̧m̧an Aolep Ajri ro Nejin Anij

Gospel eo an Jisōs Kraist ej kōjeraam̧m̧an aolep ajri ro nejin Anij. Jeje ko rekwojarjar rej katakin bwe “aolep reier wōt juon” n̄an Anij. E ej karuwaineneik “aolep n̄an itok n̄an Ippān im bōk leen em̧m̧an eo An” (2 Nipai 26:33).

Gospel eo ej kōjeraam̧m̧an kōj ilo aolepān mour ko ad ilo mour in im aolepān mour indeeo. Āinwōt enaaj ļap wōt ad m̧ōņōņō—jim̧or āinwōt kajjojo armej im āinwōt baam̧le ko—n̄e jej mour kōn katak ko an Jisōs Kraist (lale Mosaisa 2:41; “Baam̧le Eo: Juon Naan in Kean̄ n̄an Laļ in,” ChurchofJesusChrist.org). Mour kōn gospel eo ej kam̧wilaļļo̧k lan̄lōn̄ ko ad, im̧we jerbal ko ad, im kōkōm̧anm̧an jemjerā ko ad.

Juon iaan ennaan ko an gospel eo kōjepļaaktok ej bwe jej aolep m̧ōttan baam̧le eo an Anij. Jej ļaddik im leddik ro Nejin rejitōnbōro. Jekdo̧o̧n ta jekjek eo an baam̧le eo aō, kajjojo iaad ej juon membōr in baam̧le eo an Anij.

Bar juon m̧ōttan ennaan eo ad em̧m̧an ej bwe baam̧le ko remaron̄ koba ippān doon n̄an indeeo. Baam̧le eo ej ekkapit jān Anij. Rikanaan ro ilo raan-ko āliktata raar katakin:

“Karōk in mōņōņō eo [Jemedwōj Ilan̄] ekwojarjar ej kōmaron̄ kōtaan ko ilo baam̧le n̄an eļļā ioon lōb. Kain̄i ko im bujen ko rekwojarjar rej kōm̧m̧an ilo tampeļ ko n̄an kapidodo n̄an kajjojo n̄an aer jepļaak n̄an im̧aan mejen Anij im n̄an baam̧le ko n̄an aer koba ippān doon n̄an indeeo” (“Baam̧le Eo: Juon Naan in Kean̄ n̄an Laļ in”).

Elōn̄ armej ro ewōr aer iien ko rem̧m̧an ewōr jon̄aer n̄an m̧are ak jemjerā ko rem̧m̧an an baam̧le. Elōn̄ raar ioon jepel im jekjek ko jet reppen an baam̧le. Ijo ke, gospel eo ej kōjeraam̧m̧an kōj kajjojo jekdo̧o̧n ta jekjek eo an baam̧le eo ad. Ilo ad tiljek, Anij enaaj letok juon iaļ n̄an kōj n̄an bōk kōjeraam̧m̧an ko an baam̧le ko rem̧m̧an, men̄e ilo mour in ak ilo mour eo ej itok (lale Mosaia 2:14).

Ennaan eo an Jepļaaktok eo: Pedped eo an Tōmak

Jekdo̧o̧n ia eo kwoj jerbal ie ak wōn eo kwoj katakin, mije katakin eo am̧ ioon Jisōs Kraist im Jepļaaktok eo an gospel eo An. Ilo am̧ ekkatak katak eo ilo katak ko an mijenede, kwonaaj lo bwe ewōr juon ad ennaan: Jisōs ej RiKraist eo, ad Rilo̧mo̧o̧r im Ripinmuur. Kōn juon rikanaan raan kein, Jemedwōj Ilan̄ ekar kōjepļaaktok jeļā eo kōn karōk in lo̧mo̧o̧r eo An. Karōk in ej pedped ioon Jisōs Kraist. Kōn en̄taan in pinmuur eo An, Rilo̧mo̧o̧r eo ej kapidodoik n̄an aolepedwōj n̄an lo̧mo̧o̧r jān jerawiw im mej im bar ro̧o̧lļo̧k n̄an ippān Jemedwōj Ilan̄.

Jipan̄ armej ro kwoj katakin er meļeļe men kein:

  • Anij ej lukkuun Jemed ilo Lan̄. E ewāppen an iakwe kōj. Aolep armej ioon laļ in ej juon ajri nenij Anij im juon membōr in baam̧le eo An.

  • Jemedwōj Ilan̄ ej letok juon karōk n̄an kōj n̄an bōk mour jab wabanban im mour indeeo, ko rej kōjeraam̧m̧an ko reļļap tata An (lale Moses 1:39). Jaar itok n̄an laļ in n̄an ekkatak, eddōkļo̧k, im kōppopo n̄an tarlep in kōjeraam̧m̧an ko An.

  • Āinwōt m̧ōttan karōk eo An, Jemedwōj Ilan̄ ekar letok kien ko n̄an tōl kōj ilo mour in im jipan̄ kōn̄ bar ro̧o̧lļo̧k n̄an Ippān (lale, n̄an waanjon̄ak, Exodus 20:3–17).

  • Ilo mour in, jej aolep jerawiwi, im jej aolep mej. Kōn wōt iakwe eo an Jemedwōj Ilan̄ n̄an kōj, E ekar jilkintok Nejin, Jisōs Kraist, n̄an lo̧mo̧o̧ren kōj jān jerawiwiw im mej.

  • Kōnke kōn en̄taan in pinmuur eo an Jisōs, jemaron̄ erreo jān jerawiwi ko ad ilo ad ukwelo̧k im peptaij im kapen. Menin ej bōktok n̄an kōj aenōm̧m̧an im kōm̧m̧an bwe en pidodo n̄an ad bar ro̧o̧lļo̧k n̄an im̧aan mejān Anij im bōk juon tarlep in lan̄lōn̄.

  • Kōnke kōn Jerkakpeje eo an Jisōs, jenaaj aolep jerkakpeje ālkin ad mej. Ej meļeļe in bwe kajjojo jetōb im ānbwin an armej renaaj bar koba ippān doon n̄an mour indeeo.

  • Ilo aolep bwebwenato in baibōļ, Irooj ekar kwaļo̧k gospel eo An im kajutak Kabun̄ eo an kōn rikanaan ro. Āliji im bar āliji, elōn̄ wōt armej raar jab bōke. Juon jon̄an an wōtlo̧k jān gospel eo im aikuj eo n̄an bar kōjepļaaktok ekar ijjino ilo tōre ko an Kallim̧ur M̧okta.

  • Ālkin mej im Jerkakpeje eo an Rilo̧mo̧o̧r, Rijilōk ro An raar tōl Kabun̄ in ilo juon tōre. Āliktata, raar mej, mālim eo an priesthood eo kar jakko, im ekar bar wōr juon wōtļo̧k jān katak ko an Rilo̧mo̧o̧r. Armej ro raar ukōt katak eo im kain̄i ko.

  • Gospel eo an Jisōs Kraist kar bar kōjepļaaktok jān Jemedwōj Ilan̄ kōn Rikanaan Josep Smith. Jemedwōj Ilan̄ im Jisōs Kraist raar waļo̧kļļo̧k Josep ilo spring in 1820 eo. Tokālik Josep Smith ekar bōk mālim eo an priesthood im kar tōlļo̧k n̄an ejake Kabun̄ eo an Jisōs Kraist bar juon alen ioon laļ in.

Katakin bwe Kabun̄ eo an Jisōs Kraist ejjab baj bar juon kabun̄. Ak ejjab juon kabun̄ in Amedka. Ijello̧kin, ej jepļaaktok eo an “tarlep in gospel [eo]” an Jisōs Kraist (Katak im Bujen Ko 1:23). Ejjamin naaj bar bōk jān laļ in.

Bok in Mormon: Bar Juon Kallim̧ur kōn Jisōs Kraist ej kwaļo̧k kam̧ool kōn Jisōs Kraist im mijen kwojarjar eo An āinwōt Rilo̧mo̧o̧r an laļ. Ej barāinwōt juon rikam̧ool ekajoor bwe Jisōs Kraist ekar kōjepļaaktok gospel eo An im Kabun̄ eo kōn Rikanaan Josep Smith. Kajjitōk im jipan̄ armej ro n̄an riiti Bok in Mormon im jar kōn ennaan eo an.

Lōke kallim̧ur eo ekabwilōn̄lōn̄ ilo Moronai 10:3–5). Kōketak armej ro n̄an kajjitōk ippān Anij ilo m̧ool im kōn juon lukkuun kōttōpar eļan̄n̄e Bok in Mormon ej naan an Anij. Jar kōn lukkuun kōttōpar ej meļeļe in m̧ōņōņō in jerbale uwaak eo me ej itok jān kam̧ool eo an Jetōb Kwojarjar. Kam̧ool in en erom pedped in tōmak eo an armej eo bwe Kraist ekar kōjepļaaktok Kabun̄ eo An. Jipan̄ ro kwoj katakin er n̄an kappukōt kapen in jetōb jab in.

Ekkatak Jeje ko Rekwojarjar

Ekōjkan am̧ aikuj kōjerbal Bok in Mormon ilo jerbal in mijenede?

Ekkatak Am̧ Make

Pijaikļo̧k am̧ tōn je juon pārokūrāāp kōn ennaan eo an Jepļaaktok eo ilo social media ak n̄an juon jikin kōm̧m̧an nuuj ijo jokwe ie. Ilo jōņōļ in ekkatak eo am̧, je juon taitōļ me ej kōmeļeļeik ennaan eo aorōk. Innām ļo̧o̧ke ļōmņak im en̄jake ko am̧ kōn ennaan in. Ekoba ekōjkan an em̧m̧anļo̧k meļeļe kake kar ukōt wāween eo kwoj mour im wāween eo kwoj kalimjōk laļ eo ipeļakūm̧.

Kajutak im Kalōk Kabun̄ in

Ke Jisōs Kraist ekar kōjepļaaktok Kabun̄ eo An, E ekar kōmeļeļeik Rikanaan Josep Smith im ro jet n̄an “kajutak” e im “kalōk [e]” (Katak im Bujen Ko 31:7; 39:13). Kabun̄ in ej jutak im ekkal ilo an armej ro kōn naan in kam̧ool ko peptaij im kapen, kōjparok bujen ko aer, kōppopo n̄an etal n̄an tampeļ, im jipan̄ kōkajoorļo̧k ward im branch eo aer.

juon em̧m̧aan ej jar

Āinwōt juon mijenede, kwoj jipan̄ kajutak im kalōk Kabun̄ eo an Rilo̧mo̧o̧r. Elōn̄ wāween ko kwomaron̄ kōm̧m̧ane menin. Kwomaron̄ rie membōr ro ilo aer leto letak gospel eo kōn pedped in katak ko an iakwe, kwaļo̧k, im karuwainene (lale Bok in Bōk Meļeļe Eļap, 23.1). Kwomaron̄ jipan̄ armej ro bōk peptaij im eddōkļo̧k ilo tōmak eo aer. Kwomaron̄ jipan̄ membōr ro rekāāl okoktak n̄an mour eo aer ekāāl im wōnm̧aanļo̧k wōt n̄an eddōkļo̧k ilo jetōb. Kwomaron̄ barāinwōt jipan̄ membōr ro rej bar ro̧o̧ltok kōkajoorļo̧k tōmak eo aer ilo Jisōs Kraist.

Membōr ro rekāāl im ro rej bar ro̧o̧ltok rej eddōkļo̧k ilo naan in kam̧ool im tōmak n̄e rej en̄jake an gospel eo jerbal ilo mour ko aer. N̄an jipan̄ bōktok menin, ej aorōk bwe ren:

  • Wōr ro m̧ōttaer em rej membōr in Kabun̄ in.

  • Rej leļo̧k juon eddo ilo Kabun̄ in.

  • Rej naajdik kōn em̧m̧an in naan eo an Anij.

(Lale Gordon B. Hinckley, “Converts and Young Men,” Ensign, May 1997, 47.)

Mijenede ro, ritōl ro ijo jokwe ie, im membōr ro jet an Kabun̄ in rej aikuj m̧ōņōņō bōk iien eo em̧m̧an n̄an naajdik im kōkajoorļo̧k membōr ro rekāāl im ro rej bar ro̧o̧ltok. Jerbal in jipan̄ in ej jipan̄ “kōjparok er ilo wāween ejim̧we” (Moronai 6:4).

Kōm̧m̧ane Jerbal eo an Anij

Ilo tōre in jerbal in karejar eo An, Rilo̧mo̧o̧r eo ekar jerbal n̄an ro jet. Ekar ilo̧k n̄an “kōm̧anm̧an em̧m̧an” im “kwaļo̧k gospel” (Jerbal 10:38; Matu 4:23). Ilo am̧ ļoor waanojn̄ak eo An, kwonaajlo armej ro kwomaron̄ jerbal n̄an er im ro renaaj bōk eok.

Kōn jerbal in jipan̄ eo, kwoj kakūrm̧ool ruo kien ko reļļap n̄an iakwe Anij im iakwe ro iturum̧ (lale Matu 22:36–40; 25:40; Mosaia 2:17). Kōn jerbal in jipan̄ eo, kwe im ro jet maron̄ koba ippān doon ilo juon wāween ekajoor, im̧we.

Āinwōt juon mijenede, kwoj kōm̧man jerbla in jipan̄ eo kar karōke kajjojo wiik (lale Jon̄an ko an Mijenede, 2.7 im 7.2, kōn meļeļe im unin tōl ko). Ium̧win tōl eo an mijen būreejtōn eo, kwomaron̄ lo iien ko rem̧m̧an n̄an jerbal ilo jukjuk in pād eo kōn JustServe (ijo kar kōmālim) im humanitarian eo an Kabun̄ in im kijejeto ko n̄an jipan̄ ilo iien jorrāān ko reļļap.

Ilo aolep kajjojo raan, jar im pukōt iien ko rem̧m̧an kar jab karōki n̄an kōm̧m̧an em̧m̧an. Ron̄jake Jetōb eo n̄an kile iien ko n̄an jerbal ko rem̧m̧an deddik kwomaron̄ kōm̧m̧ani.

Būreejtōn Gordon B. Hinckley

“Kwon kōņaan ke m̧ōņōņō? Meļo̧kļo̧k eok make im boub ilo jerbal in eļap. Leļo̧k kijejeto ko am̧ n̄an jipan̄ amrej. … Jutak aitokļo̧k, kotak ro em̧ōjņo neer, kotak pein ro alitoto peier. Mour kōn gospel eo an Jisōs Kraist” (Gordon B. Hinckley, Teachings of Presidents of the Church: Gordon B. Hinckley [2016], 209).

Ekkatak Jeje ko Rekwojarjar

Ta kar jerbal eo an jerbal in jipan̄ ilo mour eo an Rilo̧mo̧o̧r?

Kar ta jerbal eo an jerbal in jipan̄ ilo mijen ko an Ammōn im Aron?

Ta eo Irooj ekar kajjitōk ippam̧ n̄an kōm̧m̧ane?

Juon Mijenede Ewejepedik

Wejepedik eo am̧ āinwōt juon mijenede ej kōmlet eļap tata kōn ikdeelel eo am̧ im kallim̧ur eo n̄an pukōt, katakin, peptaij, im kapen rioktak ro im n̄an jipan̄ er erom rikaļoor ro retiljek an Kraist im membōr ro an Kabun̄ eo An (lale Alma 41:3).

Wejepedik eo am̧ ejjab kōmlet kōn ewi lōn̄ in armej ro kwoj katakin er ak jipan̄ er peptaij. Ak ej kōmlet kōn kabwijer jerbal ko an ritōl.

Wejepedik eo am̧ ejjab pedped ioon wāween an ro jet kāālet n̄an uwaak n̄an eok, n̄an kūr ko am̧, ak n̄an jerbal in jouj ko am̧ rem̧ool. Armej ro ewōr aer anemkwoj in kāālet n̄an kāālet eļan̄n̄e bōk ennaan eo an gospel eo ak jaab. Eddo eo am̧ ej n̄an katakin ilo alikkar im kajoor bwe ren maron̄ kōm̧m̧ane juon kāālet meļeļe kake me enaaj kōjeraam̧m̧an er.

Ļōmņak kōn būrabōl eo an tōļan ko an Rilo̧mo̧o̧r ilo Matu 25:14–28). M̧aajta eo, eo ej jutak ilo etan Irooj, ekar nōbar jim̧or ro Rikarejeran retiljek jekdo̧o̧n jon̄an dettan jortak ko aer raar oktak (lale Matu 25:21, 23). E ekar barāinwōt leļo̧k n̄an er jim̧or ejjab nōbar eo wōt, kajjitōk ippāer n̄an deļo̧n̄ “deļo̧n̄ ilo lan̄lōn̄ an am̧ Irooj” kōnke raar kōļapļo̧k ta eo kar leļo̧k n̄an er.

Anij ekar lewaj n̄an eok tōļan ko im menin letok ko n̄an kōjerbali ilo jerbal in jipan̄ eo An. Tōļan ko im menin letok ko am̧ rej oktak jān ko an ro jet. Kile bwe aolepān men kein rej aorōk, ekoba ko me edik loi. Ilo am̧ wūjlepļo̧k tōļan ko im menin leļo̧k ko am̧ n̄an E, E enaaj kōļapļo̧k er im jerbali mennin bwilōn̄ ko kōn ta eo kwoj leļo̧k.

Joļo̧k keidi eok make n̄an mijenede ro jet im jon̄ake tōprak ko rej waļo̧k an kijejeto ko am̧ ippān ko aer. Keidi emakijkij an tōlļo̧k n̄an jem̧ļo̧k ko renana, ko āinwōt ebbwer ak utiej bōro. Keidi ej barāinwōt emakijkij an tōl pilo. Ta eo Irooj ej kōņaan ej kijejeto eo am̧ em̧m̧an tata—n̄an kwe n̄an “jerbal n̄an e kōn aolepān būruōmi, ami maron̄, ļōmņak im kajoor” (Katak im Bujen Ko 4:2; kakobaba in katak).

Kwomaron̄ in būrom̧ōj eļan̄n̄e armej ro rejjan̄in de bōk gospel eo. Jet iien kwomaron̄ en̄jake ebbwer. Jekdo̧o̧n mijenede ro rebun̄bun̄ im rikanaan ro ilo jeje ko rekwojarjar ewōr jet iien raar en̄jake ebbwer (lale 2 Nipai 4:17–19; Alma 26:27). Ilo kain iien rōt in, ļoor waanjon̄ak eo an Nipai kōn otkaļo̧k n̄an Irooj, likūt am̧ lōke ilo E, jar kōn kajoor, im keememej men ko rem̧m̧an E ekar kōm̧m̧ani n̄an kwe (lale 2 Nipai 4:16–35).

ruo mijenede rej jar

Ilo am̧ oktakļo̧k n̄an Irooj ilo iien ko reppen, E ekar kallim̧ur, “Inaaj kōkajoor eok, aet Inaaj jipan̄ eok; aet, Inaaj bo̧ur eok” (Aiseia 41:10). N̄an kōjerbal tōmak ilo Kraist, kwomaron̄ lo aenōm̧m̧an im kam̧ool kōn kijejeto ko am̧. Tōmak enaaj jipan̄ eok bun̄ m̧aanļo̧ im wōnm̧aanļo̧k wōt ilo ikdeelel ko rejim̧we.

Pād wōt ilo am̧ kalimjōk wōt kallim̧ur eo am̧ n̄an Kraist im jibadbad in mijenede eo am̧—ejjab kōn tōprak ko rej waļo̧k itulik. Tōprak kein emakijkij aer jab kein kam̧ool ko em̧ōj aer waļo̧k. Ilo ejja iien eo wōt, dāpij wōt kōtmene ko am̧ ilo utiej jekdo̧o̧n ta kapan̄pan̄ ko kwoj jelm̧ai. Kōtmene ko rōutiej renaaj kōļapļo̧k wejepedik eo am̧, ikdeelel eo am̧, im maron̄ eo am̧ n̄an ļoor Jetōb eo.

Jet wāween ko kwomaron̄ etalei kallim̧ur eo am̧ n̄an Irooj im kijejeto eo am̧ n̄an erom juon mijende ewejepedik rej ellaajrak itulaļ.

N̄e kwoj kōm̧m̧ane ijo em̧m̧an tata ippam̧, emaron̄ in wōr wōt am̧ inepata ko, bōtaab kwojjamin inepatak ippam̧ make. Kwomaron̄ en̄jake kam̧ool eo bwe Irooj ej m̧ōņōņō n̄e kwoj en̄ajke Jetōb eo ej jerbal ilo kwe.

Ekkatak Jeje ko Rekwojarjar

Ekōjkan an ro rikarejeran Irooj en̄jake kōn jerbal eo? Ekōjkan an ro rikarejeran Irooj kareel ro me rej jerbal n̄an er? Ekōjkan am̧ en̄jake kōn jerbal eo?

Ekkatak Am̧ Make

  • Riiti Hilamōn 10:1–5 im 3 Nipai 7:17–18. Ekōjkan an Irooj kar en̄jake kōn mijenede ro im jerbal in jipan̄ eo aer?

  • Ļōmņak kōn kijejeto ko an mijenede eo an Abinadi im Ammōn (lale Mosaia 11–18; Alma 17–20; 23–24). Etke mijenede rein jim̧or raar bōke jān Irooj jekdo̧o̧n men̄e tōprak ko aer kōn kijejeto ko aer raar pen?

  • Ļo̧o̧ke ta eo kwoj ekkatak ilo jōņōļ in ekkatak eo am̧.

Ļōmņak ko n̄an Ekkatak im Kōjerbali

Ekkatak Am̧ Make

Ekkatak Ippān Kampānien Eo M̧ōttam̧ im Jānij M̧ōttam̧

  • Kāālet juon iaan mijenede rein rem̧m̧an, im riiti eoon ko rej ellaajrak. Ilo am̧ riiti, ekōnono kōn mijenede in (1) kar meļeļe im ajeļo̧k e make n̄an kūr eo an, (2) kwaļo̧k m̧wil eo an im ikdeelel eo n̄an jerbal, im (3) kar jipan̄ ro jet bōk gospel eo.

  • Kāālet ruo al in jar ko kōn Jepļaaktok eo an gospel eo. Riit ak al al in jar ko. Ekōnono kōn meļeļe in naan ko.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

  • Kajjitōk ippān ruo ak jilu rioktak ro rekāāl n̄an kwaļo̧k en̄jake in oktak ko aer. Ekōjkan aer kar en̄jake kōn mijenede ro? Ekōjkan aer kar en̄jake ta eo mijenede ro raar katakin? Ta eo ekar jipan̄ er kōjparok kallim̧ur ko? Ta kar kareel eo ekajoor tata kōn oktak eo aer?

  • Jejjo raan ko m̧otak jān kweilo̧k eo, jitōn̄ jejjo mijenede ro n̄an kejekļo̧kjeņ ilo kāālet kajjitōk ko jān “Ļōmņak kōn Menin” ilo jinoin jebta eo. Kajjitōk ippān kajjojo mijenede n̄an kōpooj ruo- n̄an jilu-minit kōnono kōn kajjitōk eo kar kappeik. Ilo iien district ko̧o̧njeļ ak kweilo̧k eo eļap an zone, kajjitōk ippān mijenede ro n̄an kwaļo̧k kōnono ko aer. Ālkin kōnono kok, ekōnono ta eo kar ekkatak im ekōjkan an maon̄ kar kōjerale ilo jerbal in mijenede.

  • Ajije mijenede ro n̄an emen kumi ko. Kajjitōk ippān kajjojo kumi ko n̄an laajrake lōn̄ in wōt m̧ool ko, bujen ko, im kain̄i ko ilo aer maron̄ me raar jepļaaktok im kwaļo̧k kōn Rikanaan Josep Smith. Kōm̧m̧an bwe kajjojo kumi ren kwaļo̧k laajrak ko aer. Kajjitōk ippān mijenede ro n̄an kwaļo̧k ekōjkan an jabdewōt m̧ool ko kar kwaļo̧k kōn Jepļaaktok eo kar kareel mour ko aer.

  • Ekōnono kōn ta meļeļe in n̄an erom juon mijenede wejepedik. Kajjitōk ippān mijenede ro n̄an leļo̧k waanjon̄ak ko remakeļo̧k.

Ritōl ro an Mijen im Rikakpilōklōk ro an Mijen

  • Ilo iien intōrpiu ko ak ilo bwebwenato ko ippān mijenede ro, iien n̄an iien kajjitōk ippāer n̄an kwaļo̧k ippam̧:

    • Naan in kam̧ool eo aer kōn Jisōs Kraist.

    • Naan in kam̧ool eo aer kōn gospel eo em̧ōj an kar jepļaaktok im jerbal eo an Josep Smith

    • Naan in kam̧ool eo aer kōn Bok in Mormon.

    • Ļōmņak ko aer kōn jibadbad eo aer āinwōt juon mijenede.

  • Kajjitōk ippān mijenede ro n̄an ļo̧o̧ke ilo jōnōļ in ekkatak eo aer ta eo rej en̄jake jet iaan jibadbad ko an mijen eo aer. Ilo iien intōrpiu eo ak ilo bwebwenato eo, kajjitōk ippāer n̄an kwaļo̧k ta eo raar je.

  • Jilkinļo̧k juon leta in kōjeraam̧m̧an n̄an membōr ro rekāāl.