“Jebta 5: Kōjerbal Kajoor eo an Bok in Mormon,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 5,” Kwaļo̧k Gospel eo Aō

Jebta 5

Kōjerbal Kajoor eo an Bok in Mormon

Ļōmņak kōn Menin

Ekōjkan an Bok in Mormon dekā in jabōn em̧ an tōmak in ad?
Etke Bok in Mormon eo ekanooj in kajoor jekjek eo an oktak?
Ta eo Bok in Mormon ej katakin kōn Jisōs Kraist?
Ekōjkan aō maron̄ kōjerbal Bok in Mormon n̄an jipan̄ eō make im ro jet epakeļo̧k Anij?
Ekōjkan an Bok in Mormon uwaaki kajjitōk ko an jetōb (soul)?
Ekōjkan aō maron̄ jipan̄ armej ro riiti im bōk juon naan in kam̧ool kōn Bok in Mormon?

Bok in Mormon, koba ippān Jetōb eo, ej juon kein jipan̄ ekajoor ilo oktak eo. Bok in ej juon ļo̧o̧k in etto, ekwojarjar kar jeje n̄an kareel aolep armej bwe Jisōs ej RiKraist eo (lale taitōļ peij eo an Bok in Mormon). Āinwōt an subtaitōļ eo ba, Bok in Mormon ej “bar juon kallim̧ur kōn Jisōs Kraist.” Ej barāinwōt juon kein kam̧ool ekajoor bwe Anij ekar kūr Josep Smith āinwōt juon rikanaan im kar kōjepļaaktok gosepl eo an Jisōs Kraist kōn e.

Bok in Mormon Ej Dekā in Jabōn Em eo an Kabun̄ in Ad

Joseph Smith eaar kam̧ool bwe Bok in Mormon eo ej “dekā in jabōn em̧ n̄an tōmak eo ad” (kadkd in Bok in Mormon). Ilo bar juon iien ekar ba: “Bōk Bok in Mormon im revelesōn ko, im ewi kabun̄ in ad? Ejjeļo̧k ippād” (Teachings of Presidents of the Church: Joseph Smith [2007], 196).

Juon arch ej architectural structure eo edipen tata kōm̧m̧ane jān wedge-shape m̧ōttan ko me rej m̧al n̄an doon. M̧ōttan eo ioļap, ak dekā in jabōn em̧, ekkā an kilepļo̧k jān wedge ko jet im ej dāpij aer ilo jikier.

Būreejtōn Ezra Taft Benson ekar ba bwe Bok in Mormon ej dekā in jabōn em̧ an tōmak eo ad ilo diktata jilu wāween ko:

Kam̧ool an Kraist. “Bok in Mormon ej dekā in jabōn em̧ ilo kam̧ool eo ad kōn Jisōs Kraist, eo ej E make lukkuun dekā in jabōņ em̧ an aolep men jej kōm̧m̧ane. Ej kwaļo̧k kam̧ool kōn m̧ool eo An kōn kajoor im alikkar.”

Tarlep in katak eo. “Irooj E make ekar kwaļo̧k bwe Bok in Mormon eo ewōr ie ‘tarlep in gospel eo an Jisōs Kraist’ [Katak im Bujen Ko 20:9; 27:5]. … Ilo Bok in Mormon jenaaj lo tarlep in [katak eo] ej menin aikuj n̄an lo̧mo̧o̧r eo ad. Im [ej] katakin ilo alikkar im ļam waan bwe jekdo̧o̧n ajri ro remaron̄ katak wāween ko an lo̧mo̧o̧r im mour ijo eutiej tata.”

Pedped an naan in kam̧ool. “Ejja āinwōt n̄e arch eo ej m̧ōram̧rōm̧ eļan̄n̄e dekā in jabōn em̧ eo ej em̧m̧akūt, kōn menin Kabun̄ in ej jutak ak okjak kōn tarlep eo an Bok in Mormon. … Eļan̄n̄e Bok in Mormon ej m̧ool … juon aikuj bōk kean̄ ko an Jepļaaktok eo.” (Teachings of Presidents of the Church: Ezra Taft Benson [2014], 129, 131, 128.)

Jān bōk juon naan in kam̧ool bwe Bok in Mormon ej naan an Anij, jemaron̄ jeļā bwe Josep Smith ekar juon rikanaan. Kōn e, mālim eo an priesthood eo an Anij ekar jepļaaktok jān rikwōj meļan in lan̄ ro. Anij ekar barāinwōt kōmālim Josep n̄an kajutak Kabun̄ eo an Jisōs Kraist. Revelesōn ej wōnm̧aanļo̧k wōt rainin kōn rikanaan ro remour.

Bok in Mormon Ej Aorōk n̄an Oktak eo An Juon Make

Juon m̧ōttan aorōk an oktak ej bōk juon kam̧ool kōn kajoor eo an Jetōb Kwojarjar bwe Bok in Mormon ej m̧ool. Ilo am̧ riiti im ekkatak kake ilo m̧ool, kwonaaj en̄jake naan ko aer n̄an kōļapļo̧k jetōb eo am̧. Naan ko an renaaj kōmeramļo̧k meļeļe eo am̧ kōn mour, kōn karōk eo an Anij, im kōn Jisōs Kraist (lale Alma 32:28). Jar kōn bok eo kōn lukkuun kōttōpar im tōmak ilo Kraist. Ilo am̧ kōm̧m̧ane, kwonaaj bōk juon kam̧ool kōn Jetōb Kwojarjar eo bwe ej naan an Anij (lale Moronai 10:4–5).

Naan in kam̧ool eo am̧ make kōn Bok in Mormon emaron̄ tōlļo̧k n̄an juon tōmak em̧wilaļ im indeeo ilo kajoor eo an n̄an jipan̄ ro jet erom rioktak. Jipan̄ armej ro kwoj katakin kile kōmeramļo̧k eo rej en̄jake ilo aer riiti ilo m̧ool. Kōmejajaik kam̧ool eo an ekajoor kōn Jisōs Kraist. Kōketak er n̄an jar n̄an bōk kam̧ool eo er make bwe bok eo ej m̧ool.

Kōketak armej ro n̄an kappukōt juon naan in kam̧ool eo jān Jetōb Kwojarjar kōn Bok in Mormon ej aikuj dilepān pedped in katakin eo am̧. Bok in Mormon emaron̄ ukōt mour ko aer n̄an indeeo.

Kōjerbal Bok in Mormon n̄an Katakin Gospel eo an Jisōs Kraist

Rikanaan Josep Smith ekar ba, “Bok in Mormon [ej] bok eo ejim̧we tata jān bok otemjej ioon laļ” (kadkad in Bok in Mormon). Ej kam̧ool kōn Kraist im katakin ilo alikkar katak eo An (lale 2 Nipai 31; 32:1–6; 3 Nipai 11:31–39; 27:13–22). Ej katakin tarlep eo an gospel eo An. Pedped in katak ko im kain̄i ko m̧oktata an gospel eo āinwōt kar katakin ilo Bok in Mormon rej wāween eo n̄an juon mour ejeraam̧m̧an.

Kōjerbal Bok in Mormon āinwōt kein jipan̄ eo am̧ eļap tata n̄an katakin gospel eo kar kōjepļaaktok. Jaat in ej kōllaajrak jet iaan m̧ool ko ilo Bok in Mormon me kwonaaj katakin.

Katak an Mijenede ilo Jebta 3	Katak	Bok in Jipan̄ ko
Katak an Mijenede ilo Jebta 3 Ennaan eo kōn Jepļaaktok eo an Gospel eo an Jisōs Kraist	Katak Paotok in Anij, jerbal in karejar eo im Pinmuur eo an Rilo̧mo̧o̧r, bun̄ jān tōmak eo, Jepļaaktok eo, Josep Smith, mālim eo an priesthood	Bok in Jipan̄ ko 1 Nipai 12–14 2 Nipai 3; 26–29 Mosaia 2–5
Katak an Mijenede ilo Jebta 3 Karōk in Lo̧mo̧o̧r eo an Jemedwōj Ilan̄	Katak “Karōk eo eļap an Anij Indeeo,” ekūtbuuj Wōtļo̧k eo an Adam im Iv, Pinmuur eo an Jisōs Kraist, Jerkakpeje eo, im Ekajet eo	Bok in Jipan̄ ko 2 Nipai 2; 9 Mosaia 3; 15–16 Alma 12; 34:9; 40–42
Katak an Mijenede ilo Jebta 3 Gospel eo an Jisōs Kraist	Katak Tōmak ilo Kraist, ukweļo̧k, peptaij, menin letok eo Jetōb Kwojarjar, im niknik n̄an jem̧ļo̧kin	Bok in Jipan̄ ko 2 Nipai 31–32 3 Nipai 11; 27:13–22
Katak an Mijenede ilo Jebta 3 Erom Rikaļoor ro an Jisōs Kraist To̧o̧n Wōt Ad Mour	Katak Kain̄i ko āinwōt peptaij, ekkapit an priesthood, im kwojkwoj eo	Bok in Jipan̄ ko 3 Nipai 11:22–28; 18 Moronai 2–6

Ekkatak Jeje ko Rekwojarjar

Ta eo Rilo̧mo̧o̧r eo ej ba kōn Bok in Mormon?

Bok in Mormon ej Kam̧ool kōn Kraist

Dilepān jibadbad eo an Bok in Mormon ej n̄an kam̧ool kōn Jisōs Kraist. Ej kapen m̧ool eo an mour eo, mijen eo, jerkakpeje eo, im kajoor eo An. Ej katakin katak eo em̧ool kōn Kraist im Pinmuur eo An.

Jejjo rikanaan ro me jeje ko aer kar kōjparoki ilo Bok in Mormon raar lo Kraist er make. Ļeo jein im jatin Jared, Nipai, im Jekab raar lo Kraist eo ilo mour eo m̧okta. Elōn̄ļo̧k raar kwaļo̧k ilo tōre in jerbal in karejar eo an Rilo̧mo̧o̧r ibwilijin Rinipai ro (lale 3 Nipai 11–28). Tokālik, Mormon im Moronai raar lo jerkakpeje Kraist (lale Mormon 1:15; Ether 12:39).

Ilo an armej ro riiti im jar kōn Bok in Mormon, enaaj em̧m̧anļo̧k aer jeļā Rilo̧mo̧o̧r eo im en̄jake iakwe eo An. Renaaj eddōkļo̧k ilo naan in kam̧ool eo aer kōn E. Renaaj jeļā ewi wāween itok n̄an E im mour. (lale 1 Nipai 15:14–15.)

“Bok in Mormon eo ej letok likio im meļeļe eo ekajoor kōn Pinmuur eo an Jisōs Kraist eo ej waļo̧k ilo aolepān. Ej katakin ta meļeļein n̄an bar ļotak. … Jej jeļā etke jej pād ioon laļ in. Men kein im m̧ool ko jet relukkuun kajoor im kareelel aer katakin ilo Bok in Mormon eo jān jabdewōt bar bok. Aolepān kajoor eo an gospel eo an Jisōs Kraist ewōr ie ilo Bok in Mormon eo” (Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Liaona, Nob. 2017, 62).

Ekkatak Am̧ Make

Ilo aolepān mijen eo am̧, je uwaak ko n̄an kajjitōk kein ilo jōnōļ in ekkatak eo am̧:

Ta eo kwar katak kōn Jisōs Kraist jān ekkatak eo am̧ kōn Bok in Mormon?
Ekōjkan kar ekkatak eo am̧ kōn Bok in Mormon kar kareel naan in kam̧ool eo kōn Jisōs Kraist?
Ekōjkan am̧ maron̄ kōjerbal Bok in Mormon n̄an jipan̄ armej ro kōkajoorļo̧k naan in kam̧ool ko aer?

Ekkatak Jeje ko Rekwojarjar

Ta un ko rikanaan ro an Bok in Mormon raar litok kōn je ļo̧o̧k ko aer?

Ekkatak Am̧ Make im Ippān Kampānien eo Am̧

Bok in Mormon ekar jeje “n̄an karreel [aolep armej] ro bwe Jisōs ej Ri Kraist” (taitōļ peij eo an Bok in Mormon). Tebōļ in ej kōllaajrak jet jebta ko an Bok in Mormon me rej kam̧ool kōn mour, katak ko, im jerbal in karejar eo an Jisōs Kraist. Kāālet eoon ko n̄an ekkatak ilo aolepān mijen eo am̧.

Ilo kakobaba, ļōmņak kōn aikuj ko an armej ro kwoj katakin. Kōm̧m̧an in karōk ko n̄an riiti jet iaan eoon kein ippāer n̄an kōkajoorļo̧k jeļā eo im naan in kam̧ool eo aer kōn Rilo̧mo̧o̧r eo.

Taitōļ peij im kadkad in	Ej kalikkar kōttōpar eo an bok eo.
1 Nipai 10–11	Liai im Nipai rej Kam̧ool kōn Rilo̧mo̧o̧r eo.
2 Nipai 2; 9	Liai im Jekab rej kam̧ool kōn Jisōs Kraist im Pinmuur eo An.
2 Nipai 31–33	Nipai ej katakin katak eo an Kraist.
Mosaia 2–5	Kiin̄ Benjamin ej kam̧ool kōn Kraist.
Alma 5; 7	Alma ej kam̧ool kōn Rilo̧mo̧o̧r eo.
Alma 36	Alma ej en̄jake kajoor in pinmuur eo an Kraist.
3 Nipai 9–10	Rilo̧mo̧o̧r eo ej karuwaineneik armej n̄an itok n̄an E.
3 Nipai 11–18	Rilo̧mo̧o̧r eo ej katakin Rinipai ro kōn Jemen im kōn katak eo An.
3 Nipai 27	Rilo̧mo̧o̧r eo ej katakin gospel eo An.
Ether 12	Ether im Moronai rej katakin bwe tōmak ilo Jisōs Kraist ej juon pedped in katak an jerbal im kajoor.
Moronai 7–8	Mormon ej katakin kōn iakwe eo erreeo an Kraist im Pinmuur eo An.
Moronai 10	Moronai ej karuwaineneik aolep n̄an itok n̄an Kraist im erom wāppen ilo E.

Bok in Mormon ej Jipan̄ Kōj Epakeļo̧k Anij

Ikkijen Bok in Mormon, Rikanaan Josep Smith eaar ba bwe “juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet” (Kadkad in Bok in Mormon). Kōn jab m̧ūjkōk katakin im kūr armej ro n̄an mour kōn pedped in katak ko ilo Bok in Mormon, kwoj jipan̄ er kalōk tōmak ilo Jisōs Kraist im epaakeļo̧k Anij.

Bok in Mormon ej kalōk naan in kam̧ool eo im ej karuwaineneiktok revelesōn an juon make. Kōjerbal Bok in Mormon n̄an jipan̄ armej ro bōk en̄jake ko ilo jetōb, eļap tata juon kam̧ool jān Jetōb Kwojarjar eo bwe bok eo make ej naan an Anij.

Door im̧aan tata eoon ko an Bok in Mormon n̄e kwoj katakin. Ewōr ippāer kajoor in oktak eo kōn Jetōb Kwojarjar. N̄e kwoj katakin gospel eo kōjerbal Bok in Mormon, am̧ katakin enaaj kobrak kōn kajoor im alikkar eo ilo bōro im ļōmņak.

Būreejtōn Gordon B. Hinckley ekar katakin bwe “ro me raar riiti [Bok in Mormon] ilo jar, men̄e rej m̧wier ak jeram̧ōl, mālōtlōt ak jab mālōtlōt, raar eddōkļo̧k ium̧we kajoor eo an.” Ekar wōnm̧aanļo̧k wōt ilo katakin:

“Kōn ejjeļo̧k pere ij kallim̧uri kom̧ bwe eļan̄n̄e kom̧ naaj jar ilo riiti Bok in Mormon, jekdo̧o̧n jete kōttan ami kar riiti im̧aanļo̧k, enaaj itok n̄an būruwōmi juon jon̄an eļapļo̧k kōn Jetōb eo an Irooj. Enaaj itok juon kijejeto in kōkajoorļo̧k n̄an etetal ilo pokake n̄an kien ko An, im enaaj itok juon naan in kam̧ool ekajoorļo̧k kōn m̧ool eo kōn Nejin Anij emour” (“The Power of the Book of Mormon,” Ensign, June 1988, 6).

Bok in Mormon ej Uwaaki Kajjitōk ko an Jetōb

Riiti Bok in Mormon kōn tōl eo an Jetōb emaron̄ jipan̄ armej ro lo uwaak ko ak kōļmenļo̧kjeņ ko n̄an kajjitōk ko aer make—ak kajjitōk ko an jetōb eo (soul). Jipan̄ armej ro lo ekōjkan an katak ko an Bok in Mormon uwaaki kajjitōk ko an mour.

Jet iaan kajjitōk kein rej ellaajrak itulaļ, ippānļo̧k bok in jipan̄ ko an Bok in Mormon me rej uwaaki.

Anij emour ke? Wōn in Anij? (Mosaia 4:9; Alma 18:24–40; 22:4–23; 30:44)
Anij ejeļā ke kajjiō im kea kōn n̄a? Ekōjkan aō maron̄ en̄jake iakwe eo An? Ekōjkan aō maron̄ en̄jake epakeļo̧k Anij? (2 Nipai 26:24; Mosaia 4:9–12; Inōs 1:1–12; Alma 18:32; Moronai 10:32–33)
Ta jibadbad eo an mour in? (2 Nipai 2:25; Alma 34:32)
Etke mour in ekanooj in pen jet iien? Ekōjkan aō maron̄ lo kajoor ilo iien ko reppen? (1 Nipa 17:3; 2 Nipai 4:20–21; Alma 36:3; Ether 12:27)
Ekōjkan aō maron̄ lo aenōm̧m̧an ilo iien kein reppen? (Mosaia 24:13–15; Hilamōn 5:47)
Ekōjkan aō maron̄ in m̧ōņōņōļo̧k? (Mosaia 2:41; Alma 22:15–16)
Ekōjan aō maron̄ juon armej em̧m̧anļo̧k? (Mosaia 26:30–31; Alma 5:12–13; 7:23–24; Ether 12:27)
Ekōjkan aō maron̄ en̄jake jeorļo̧k bōd eo an Anij? (Enos 1:2–8; Alma 36:17–21)
Ta eo ej waļo̧k ālkin aō mej? (2 Nipai 9:3–6, 11–13; Alma 11:42–44; 40:11)

Bok in Mormon ej barāinwōt letok tōl kōn kajjitōk ko jet raorōk, ko āinwōt:

Ekōjkan aō maron̄ jipan̄ļo̧k kōn mour in jetōb eo an baam̧le eo aō? (1 Nipai 1:1; 8:36–38; Mosaia 2:5–6; 4:14–15; 3 Nipai 18:21)
Ekōjkan aō maron̄ jipan̄ ajri ro nejū kalōk kōkajoorļo̧k n̄an jum̧ae kapo? (1 Nipai 15:23–25; Hilamōn 5:12; 3 Nipai 18:15, 18–21, 24–25)
Ekōjkan an pokake kien ko an Anij maron̄ jipan̄ eō bōk juon mour em̧ōņōņōļo̧k, im ļapļo̧k an jeraam̧m̧an? (2 Nipai 2:25–28; 4:35; Mosaia 2:41; 4 Nipai 1:15–18)

“Mijenede ro rej aikuj jeļā ekōjkan kōjerbal Bok in Mormon n̄an uwaaki kajjitōk ko aer make bwe ren maron̄ kōjerbale ilo wejepedik n̄an jipan̄ ro jet katak n̄an kōm̧m̧ane ejja wōt. … Rej aikuj kile kajoor eo an Bok in Mormon ilo katakin gospel eo kar kōjepļaaktok, m̧okta kōn kōjerbale ilo mour ko aer make innām kwaļo̧ke ippān ro rej katakin” (Dallin H. Oaks, “Counsel for Mission Leaders,” seminar for new mission leaders, June 25, 2022).

Ekkatak Am̧ Make im Ippān Eo M̧ōttam̧

Laajraki kajjitōk ko an jetōb eo me ewōr ippam̧ ak me kwar ron̄ jān ro jet. Pukōt eoon ko ilo Bok in Mormon me rej jipan̄ uwaaki kajjitōk kein. Je kōļmenļo̧kjeņ ko im Bok in Mormon bok in jipan̄ ko ilo jōnōļ in ekkatak eo am̧. Kōjerbali ilo am̧ katakin.

Bok in Mormon im Baibōļ eo rej Rie Doon

Irooj ekar ba n̄an “katakin kōn pedped ko an gospel eo Aō, ko rej pād ilo Baibōļ eo im Bok in Mormon eo, eo ilo e epād tarlep in gospel” (Katak im Bujen Ko 42:12). Armej ro Rekwojarjar ilo Raan-ko Āiktata rej “Baibōļ eo ej naan an Anij toun wōt an jim̧we ukok eo an” (Laajrak in Tōmak ko 1:8; lale barāinwōt 1 Nipai 13:29). Baibōļ eo ej jeje ko rekwojarjar. Bok in Mormon ej m̧ōtttan jeje ko rekwojarjar me ekūtbuuj tarlep in gospel eo an Jisōs Kraist.

Baibōļ eo im Bok in Mormon eo rej aeran doon im kōkōm̧anm̧an doon (lale Ezekiel 37:16–17; 1 Nipai 13:40; Mormon 7:8–9). Bok in jeje kein rekwojarjar jim̧or rej kobain katak ko kar ļo̧o̧ki jān rikanaan ro etto. Baibōļ eo ej kōnono kōn jerbal ko an Anij ippān armej ro ilo Eastern Hemisphere ium̧win taujin iiō ko. Bok in Mormon ej kōnono kōn jerbal ko an Anij ippān armej ro ilo Amedka eo etto ium̧win elōn̄ļo̧k jān taujin iiō ko.

armej eo ej kakōļļik jeje ko rekwojarjar

Eo aorōk tata, Baibōļ eo im Bok in Mormon rej aerān doon n̄an kam̧ool kōn Jisōs Kraist. Baibōļ eo ej letok bwebwenato eo kōn ļotak, jerbal in karejar eo ilo mour in, im Pinmuur eo an Rilo̧mo̧o̧r eo—ekoba mej im Jerkakpeje eo An. Bok in Mormon ej kūtbuuj naan in kanaan ko kōn ļotak im mijen eo an Rilo̧mo̧o̧r, katak ko kōn Pinmuur eo An, im bwebwenato eo kōn jerbal in karejar eo An ilo Amedka. Bok in Mormon ej kapen im kōdepakpakļo̧k naan in kam̧ool eo an Baibōļ eo bwe Jisōs ej Make Wōt Jitōnbōro Nejin Anij im Rilo̧mo̧o̧r an laļ in.

Baibōļ eo im Bok in Mormon rej jim̧or katakin kien an rikam̧ool ro: “Kōn lo̧n̄iin ruo ak jilu ri kōnnaan renaaj kapen naan otemjej” (2 Korint 13:1; lale barāinwōt 2 Nipai 11:2–3). Jokkun wōt juon ippān kien in, bok in jeje kein rekwojarjar jim̧or rej kam̧ool kōn Jisōs Kraist (lale 2 Nipai 29:8).

Ekkatak Am̧ Make im Ippān Kampānien eo M̧ōttam̧

Pukōt cross-reference (eoon in jipan̄ ko) kōn unin kōnono kein ilo Bok in Mormon im Baibōļ eo. Waanjon̄ak ko kar litok ilo pāārōntijij ko ālkin kajjojo unin kōnono. Kobaik unin kōnono ko im eoon ko am̧ make.

Rikanaan ro (Jekab 4:4–6; Amos 3:7)
Maroklep eo (2 Nipai 28; 2 Timote 4:3–4)
Jepļaaktok eo (1 Nipai 13:34–42; Jerbal 3:19–21)
Jej aolep ajri ro nejin Anij (1 Nipai 17:36; Jerbal 17:29)

Jipan̄ Armej ro Riiti im Meļeļe Bok in Mormon

Ro me rejjab riit ak meļeļe Bok in Mormon enaaj pen aer bōk juon kam̧ool bwe ej m̧ool. Kwomaron̄ jipan̄ er meļeļe bok eo kōn riiti ippāer. Riiti ilo juon iien katakin, ilo juon iien etale ļo̧kanļo̧k, ak kōn technology. Kwomaron̄ barāinwōt kōm̧m̧an karōk n̄an an membōr ro riit ippāer. Alooje juon pija in alooj an Bok in Mormon innām riiti jepta ko reiookļo̧k maron̄ in lukkuun jipan̄.

Jar kōn jipan̄ ilo am̧ kāālet eoon ko me rej uwaaki n̄urbōktak ko im aikuj ko an armej ro. Riit im ekōnono kōn eoon ko rekkadu, ko āinwōt 1 Nipai 3:7 ak Mosaia 2:17. Barāinwōt riiti im ekōnono kōn eoon ko raitokļo̧k ak kadedeļo̧k jepta ko, ko āinwōt 2 Nipai 31, Alma 7, ak 3 Nipai 18. Kōketak armej ro n̄an riiti Bok in Mormon jān jinoin, ekoba naan in kam̧ool ko an Rikam̧ool ro Jilu im Ruwalitōk im naan in kam̧ool eo an Rikanaan Josep Smith.

Ļōmņak kōn elmakot kein ilo am̧ riiti Bok in Mormon ippān armej ro:

Jar m̧okta jān riit. Kajjitōk kōn jipan̄ ilo riit. Jar bwe Jetōb Kwojarjar eo enaaj kam̧ool n̄an er bwe ej m̧ool.
Take doon ilo riit. Etal ilo jon̄an m̧ōkaj eo em̧m̧an ippāer. Kōmeļeļeik naan ko im eoon ko jab jeļā kaki.
Jān iien n̄an iien bōjrak n̄an ekōnono kōn ta eo rej riiti.
Kōmeļeļeik bwebwenato eo im jekjek ko an eoon eo, ko āinwōt wōn eo ej kōnono, ewi jekjek in armej eo, im ta jekjek eo. Eļan̄n̄e ewōr juon pija in alooj ejetjet n̄an Bok in Mormon, ļōmņak in kwaļo̧ke.
Kalikkare ennaan ko ak katak ko raorōk n̄an pukōti.
Kwaļo̧k naan in kam̧ool eo am̧ im kōļmenļo̧kjeņ ko rejetjet, en̄jake ko, im en̄jake ko an juon make.
Katakin katak eo kajju jān naan ko an rikanaan ro an Bok in Mormon. Menin enaaj jipan̄ armej ro en̄jake kajoor in jetōb eo an bok eo.
Jipan̄ armej ro “keidi” ta eo rej riiiti n̄an mour ko aer make (1 Nipai 19:23). Jipan̄ er lo ekōjkan an jeje ko rekwojarjar jetjet n̄an er make.

Ilo am̧ kōjerbal pedped in katak kein, kwonaaj jipan̄ ejake maron̄ im ikdelel eo n̄an riiti Bok in Mormon ippāer make. Kōmejajaik bwe riiti bok eo raan otemjeļo̧k ej ki eo n̄an eddōk m̧aanļo̧k n̄an peptaij im oktak eo to̧o̧n wōt ad mour.

Pedped ioon kallim̧ur eo ilo Moronai 10:3–5. Kōketak armej ro n̄an riiti Bok in Mormon ilo m̧ool im n̄an jar kōn lukkuun kōttōpar n̄an jeļā bwe ej m̧ool. Kōmeļeļeik bwe lukkuun kōttōpar eo ej meļeļe in m̧ōņōņō in jerbale uwaak eo rej bōke kōn Jetōb Kwojarjar. Aolep armej ro me rej m̧ool in riit im jar kōn lukkuun kōttōpar kōn Bok in Mormon maron̄ jeļā kake tarlep in m̧ool eo kōn kajoor eo an Jetōb Kwojarjar.

Kwoj aikuj barāinwōt kōjerbal kallim̧ur in iien otemjeļo̧k n̄an kōkajoorļo̧k naan in kam̧ool eo am̧ make kōn Bok in Mormon. Naan in kam̧ool eo am̧ enaaj lewaj lōke eo me ro me rej kōjerbal kallim̧ur in naaj bōk juon kam̧ool bwe bok eo ej naan an Anij.

Kōjerbal Bok in Mormon ilo Aolep Jekjek in Jerbal eo Am̧

Bok in Mormon ej juon kein jipan̄ ekajoor ilo oktak. Kōjerbale āinwōt kein jipan̄ eo am̧ eļap tata n̄an katakin m̧ool eo kōjepļaaktok. Būreejtōn Russell M. Nelson ekar ba:

“Juon men ekajoor ej waļo̧k n̄e juon ajri nejin Anij ej pukot n̄an jeļā eļapļo̧k kōn E im Nejin Ejitōn Bōro. Ejjeļo̧k ilo bar juon jikin me m̧ool kein rej katakin ralikkarļo̧k im kajoorļo̧k jān Bok in Mormon eo. …

“N̄e ij ļōmņak kōn Bok in Mormon eo, ij ļōmņak kōn naan eo kajoor. Lōke ko ewōr ilo Bok in Mormon ej kajoor n̄an kōmour, kaenōm̧m̧an, kōjepļaaktok, joļo̧k, kōkajoorļo̧k, kōjebwebweik, im kam̧ōņōņik jetōb ko” (“Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” 61, 62).

N̄e riiti Bok in Mormon ippān armej ro, kwaļo̧k naan in kam̧ool eo am̧ kōn kajoor in jetōb eo kwar en̄jake ilo am̧ kar riiti. Kōmejajaik aorōk eo an kam̧ool eo an kōn Jisōs Kraist im Pinmuur eo An. Kwaļo̧k eoon ko me remaron̄ jipan̄ armej ro en̄jake iakwe an Rilo̧mo̧o̧r n̄an er. Jipan̄ er lo ekōjkan aer maron̄ itok an em̧m̧anļo̧k aer jeļā Rilo̧mo̧o̧r eo kōn peij ko an.

Riiti eoon ko me renaaj ļōn̄aj im kōkajoorļo̧k armej ro. Kalimjōk wōt aikuj ko aer. Kwaļo̧k waanjon̄ak ko kōn ekōjkan an katak ko an Bok in Mormon jerbal n̄an mour ko ad rainin.

Ļōmņak ko n̄an Ekkatak im Kōjerbali

Ekkatak Am̧ Make

Riiti 2 Nipai 2; 9; 30; 31; 32. Kakōļļeik kajjojo eoon in jipan̄ ko kōn Jisōs Kraist. Kōm̧m̧ane juon laajrak in āt ko rooktak im taitōļ ko kōn Kraist ilo jepta kein. Kakōļleik naan ko E ekar kōnono. Kalikkar m̧wil ko im jerbal ko An.
Ilo am̧ riit raan otemjeļo̧k jān Bok in Mormon, ļo̧o̧ke ilo jōnōļ in ekkatak eo am̧ eoon ko me aorōk meļeļeier n̄an kwe. Je ekōjkan am̧ naaj kōjerbali ilo mour eo am̧.
Je ilo jōnōļ in ekkatak eo am̧ ekōjkan am̧ kar en̄jake ke kwar ilo jino tata bōk juon kam̧ool in jetōb bwe Bok Mormon ej m̧ool.
Je kajjitōk kein jilu ilo jōnōļ in ekkatak eo am̧. Ilo aolepān mijen eo am̧, kobaik tok uwaak ko n̄an kajjitōk kein.
- Ta eo mour eo aō enaaj kar ilo an jako Bok in Mormon?
- Ta eo iban kar jeļā ilo an jako Bok in Mormon?
- Ta eo eban kar wōr ippa ilo an jako Bok in Mormon?
Riiti Kwaļo̧k eo ioon Toļ eo Matu 5–7 im kwaļo̧k eo an Kraist ilo tampeļ eo ilo 3 Nipai 12–14. Ekōjkan an riiti men kein ippān doon jipan̄ kōkōm̧anm̧anļo̧k am̧ meļeļe katak ko an Rilo̧mo̧o̧r eo?
Ekkatak kajjojo waanjon̄ak ko ilo Bok in Mormon me ej kōnono kōn juon eo ej jar. Ilo jōnōļ in ekkatak eo am̧, je ta eo kwoj katak jān Bok in Mormon kōn jar.
Jān heading jebta ko an Mosaia 11–16, je juon kōmeļeļe ekadu kōn ta eo Abinadai ekar katakin. Innām riiti jebta kein im kōdepakpakļo̧k am̧ kōmeļeļeiki.
Jān jebta heading ko an Mosaia 2–5, je juon kōmeļeļe ekadu kōn ta eo Kiin̄ Benjamin ekar katakin. Innām riiti jebta kein im kōdepakpakļo̧k kōmeļeļe eo am̧ ekadu.

Ekkatak Am̧ Make im Jānij Kampānien

Riiti eoon ko ilo Bok in Mormon ippān doon. Kajjitōk ta eo raar katak kake im kar en̄jake. Ekōnono kōn ekōjkan am̧ naaj kōjerbali ilo mour eo am̧.
Riiti Alma 26 im 29 ippān doon. Kwaļo̧k ekōjkan am̧ en̄jkae kōn mijen eo am̧. Je en̄jake ko am̧ ilo jōnōļ in ekkatak eo am̧.
Riiti Alma 37:9 im ekōnono kōn ekōjan an kar lukkuun aorōk jeje ko rekwojarjar n̄an Ammōn im mijenede ro m̧ōttan. Pukōt eoon in jipan̄ ko me rej kōmeļeļeik ekōjkan aer kar kōjerbal jeje ko rekwojarjar.
Riiti Alma 11–4, kōn juon iamiro ej bōk jerbal eo an Alma ak Amulek im eo juon bōk jerbal eo an rikōraat ro. Ekōnono kōn ekōjkan an mijenede ro kar uwaaki kajjitōk ko rekar eppen.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Kōmālmel kōjerbal Bok in Mormon ilo kajjojo wāween ko kar kwaļo̧ki ilo heading ko an jebta in.
Kōllaajraki kajjitōk ko kar kwaļo̧k jān ro kwoj katakin. Kōmeļeļeik doon ekōjkan ami naaj kar uwaake kajjitōk kein kōjerbal Bok in Mormon.
Riiti eoon ko an Bok in Mormon ippān doon. Kwaļo̧k jeļā eo, en̄jake ko, im naan in kam̧ool.
Kōmālmel kōjerbal Bok in Mormon n̄an kapen ennaan eo an Jepļaaktok eo.
Kūr mijenede ro n̄an kwaļo̧k en̄jake ko me Bok in Mormon ekar jipan̄ er im ro raar katakin er ilo wāween oktak.
Kōm̧m̧an bwe mijenede ro ren kwaļo̧k juon eoon em̧m̧an tata ippāer ilo Bok in Mormon me ej jipan̄ uwaake juon kajjitōk an jetōb.
Kūr juon membōr me ej juon rioktak n̄an kwaļo̧k jerbal eo an Bok in Mormon ilo oktak eo an.

Ritōl ro an Mijen im Rikakpilōklōk ro an Mijen

Katakin mijenede ro ekōjkan kōjerbal Bok in Mormon n̄an kapen tarlep in m̧ool eo an ennaan eo an Jepļaaktok eo.
Riit 1 Nipai 1 ippān mijenede ro im keidi ippān en̄jake eo an Josep Smith.
Leļo̧k n̄an mijenede ro juon kape in Bok in Mormon ekāāl n̄an pāākpāk eo. Kūr er n̄an riiti im kakōļļeik bok eo ruo alen ium̧win ruo ak jilu iien kōm̧m̧akūt (transfer) ko.
- Ilo iien riit eo im̧aan, kajjitōk ippāer n̄an kakōļleik aolep jekjek ko ak kam̧ool ko kōn Jisōs Kraist.
- Ilo iien riit eo kein karuo, kajjitōk ippāer n̄an kakōļļeik katak im pedped in katak ko.
Kōm̧m̧an bwe mijenede ro rej kwaļo̧k ta eo raar katak im kar en̄jake. Elder Ronald A. Rasband ekar kōmeļeļeik ekōjkan an riiti Bok in Mormon ilo wāween in kar jelet e āinwōt juon mijenede:

“Ekar kanooj lōn̄ men ko ij aikuj riiti jān baj kōkaļļeik eoon ko. Kajjojo iien ij riiti Bok in Mormon, tum̧an n̄an tulik, ikar obrak kōn juon iakwe em̧wilaļ n̄an Irooj. Ikar en̄jake juon kam̧ool em̧wilaļ kōn m̧ool eo an katak ko An im ekōjkan aer jerbal ilo ‘rainin.’ Bok in ekkar n̄an taitōļ eo an, ‘Bar Juon Kallim̧ur kōn Jisōs Kraist.’ Kōn ekkatak in im kam̧ool ilo jetōb eo ikar en̄jake, ikar erom̧ juon mijenede in Bok in Mormon im juon rikaloor an Jisōs Kraist” (“Rainin,” Liaona, Nob. 2022, 25).

Kūr mijenede ro n̄an kwaļo̧k ippam̧ eoon ko an Bok in Mormon me raar aorōk ilo mour ko aer.
Kalikkar kajjitōk ko an jetōb n̄an armej ro ilo mijen eo am̧. Kūr mijenede ro n̄an pukōt eoon ko ilo Bok in Mormon me rej jipan̄ uwaaki kajjitōk kein.