“Jebta 13: Koba ippān Ritōl ro im Membōr ro n̄an Ejaake Kabun̄ in,” Kwaļo̧k Gospel eo Aō: Juon Unin Tōl n̄an Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jepta13,” Kwaļo̧k Gospel eo Aō

Jebta 13

Koba ippān Ritōl ro im Membōr ro n̄an Ejake Kabun̄ in

Ļōmņak kōn Menin

Ekōjkan aō maron̄ jerbal ippān ritōl ro an ward n̄an ejake Kabun̄ in?
Ta eddo ko an ritōl ro an stake im ward eo ilo jerbal in mijenede?
Ta eo ej aikuj waļo̧k ilo kweilo̧k in kōtōbalbal eo wiik otemjej ippān ritōl ro ward?
Ekōjkan aō maron̄ rie ritōl ro ilo kwaļo̧k gospel eo im kōkajoorļo̧k membōr ro rekāāl im ro rej bar 1ro̧o̧ltok.

Jerbal in mijenede ippān ritōl ro ijo jokwe ie im membōr ro n̄an pukōt armej ro n̄an katakin im tōlļo̧k er n̄an Rilo̧mo̧o̧r eo. Kwoj koba kōn iakwe eo am̧ n̄an Anij im ajri ro Nejin. E enaaj kōļapļo̧k kijejeto ko am̧ n̄an dettan eo me kwoj jerbal ilo bōro kuk ippān ritōl ro ijo jokwe ie im membōr ro. Kōm̧m̧an bwe en jerbal n̄an er āinwōt m̧ōttan eo eaorōk ilo kōttōpar ko im karōk ko am̧.

Ilo am̧ itok n̄an jeļā im iakwe ritōl ro ijo jokwe ie im membōr ro, kwonaaj lo wāween ko kwomaron̄ jipan̄ er ilo kūr ko aer im kijejeto in mjenede ko. Leļo̧k menin leļo̧k ko am̧ im tōlan ko ilo wāween eo ej ļōn̄aj im kōkajoorļo̧k er.

Jebta in ej kōmeļeļeik ekōjkan am̧ maron̄ jiperbal ippān membōr ro letok letak gospel eo im kōkajoorļo̧k membōr ro rekāāl im rej bar ro̧o̧ltok. Kōn elōn̄ļo̧k meļeļe, lale jebta 23 in Bok Bōk Meļeļe Eļap.

Ekkatak Am̧ Make im Ippān Kampānien Eo M̧ōttam̧

Etale bwebwenato in oktak eo an Kiin̄ Lamonai, ļio pāleen, im armej ro doon ilo Alma 18–19.

Ta kar jerbal eo an Abish ilo oktak in? Ta eo emaron̄ in kar kōm̧m̧an me Ammōn ekar jab maron̄ kōm̧m̧ane?
Ta eo kwoj ekkatak jān waanjon̄ak eo an liin kōn an membōr ro im mijenede ro jerbal ippān doon?

Ļōmņak kōn waanjon̄ak kein jet an membōr ro jipan̄ ilo jerbal in mijenede.

Amulek (Alma 10:1–11)
Priscilla im Aquila (Jerbal 18:24–28)
Kōrā in Samaria eo (Jon 4:5–30, 39–42)

Ekōjkan am̧ maron̄ kōketak ritōl ro im membōr ro n̄an ļoor waanjon̄ak ko aer?

Kalōk Jemjerā ko ippān Ritōl ro im Membōr ro Ijo Jokwe ie

Ritōl ro im membōr ro ijo jokwe ie rej ro m̧ōttam̧ ilo jerbal eo an Anij. Kalōk jemjerā ko me rej jipan̄ kom̧ jerbal ippān doon n̄an bōkļo̧k gospel eo kōjepļaaktok n̄an ajri ro nejin Jemedwōj Ilan̄. Jemjerā kein remaron̄ kōjeraam̧m̧an kom̧ ilo aolepān mour ko ami.

Kalōk jemjerā ko lōke ie im m̧ool ippān ritōl ro im membōr ro ijo jokwe ie. Loļo̧k er im ekkatak kōn baam̧le ko aer, bwebwenato in mour ko aer, itok limo ko, im jeļā eo an ilo Kabun̄ in. Kwon m̧ool in itok limo ilo mour ko aer.

N̄e kwoj loļo̧k, kōm̧m̧ane kōn juon jibadbad. Kwaļo̧k ta eo kwoj lo̧udin̄din̄ in bōk koņam̧ ilo jerbal in pukōt im katakin. Kautiej iien im jikejuuļ eo aer.

N̄e kwoj ioon ak katakin gospel eo ilo mour ko aer, kappukōt n̄an jipan̄ er kōkajoorļo̧k tōmak eo aer. Jar ilo kappukōt bwe Jetōb eo en pād ippam̧. Kwaļo̧k en̄jake ko ewōr ippam̧ kōn jerbal in mijenede ilo eria eo am̧.

Rie Ritōl ro Ijo Jokwe ie ilo Eddo ko Aer

Jet kūr an ritōl ewōr eddo ko ie n̄an jerbal in mijenede. Meļeļe eddo kein ej jipan̄ eok rie ritōl rein. Kōmeļeļe kein rej jān jebta 23 in Bok in Bōk Meļeļe eo.

Stake būreejtōn: ej kabwijer priesthood kii ko ilo stake eo n̄an leto letak gospel eo im kōkajoorļo̧k membōr ro rekāāl im ro rej bar ro̧o̧ltok. E im rikakpilōklōk ro an rej leļo̧k aolepān tōl ko n̄an kijejeto kein.

Bisoprik: Ej kōtōbalbal ippān būreejtōnji ko an doulul eo an elder ro im Doulul eo an Kōrā ilo aer tōl kijejeto ko an ward eo n̄an letok letak gospel eo im kōkajoorļo̧k membōr ro rekāāl im ro rej bar ro̧o̧ltok.

Būreejtōnji ko an doulul eo an elder ro im Doulul eo an Kōrā: Rej tōl kijejeto ko raan-n̄an-raan an ward eo n̄an kwaļo̧k gospel eo im kōkajoorļo̧k membōr ro rekāāl im ro rej bar ro̧o̧ltok. Rej jerbal ippān doon n̄an tōl kijejeto kein ippān ward ko̧o̧njeļ eo, ium̧win tōļ eo an bisop eo. Lale Bok in Bōk Meļeļe Eļap, 8.2.3 im 9.2.3.

Ritōl eo an ward mijen (eļan̄n̄e kar kūr): Ej kōtōbalbal jerbal eo an membōr ro an ward eo im ritōl ro, ward mijenede ro, im mijenede ro rej jerbl aolep raan. Eļan̄n̄e juon ritōl an ward mijen kar jab kūr, juon membōr in būreejtōnji eo an doulul eo an elder ro ej kanne jerbal in. Lale Bok in Bōk Meļeļe Eļap, 23.5.3.

Iien otemjej kajjitikin eok make, “Ij ke juon kōjeraam̧m̧an n̄an ritōl ro ijo jokwe ie?” Ejake juon m̧wil an “Ekōjkan aō maron̄ jipan̄?”

Ekkatak Ippān Kampānien Eo M̧ōttam̧

Jikejuuļi juon iien n̄an loļo̧k juon ritōl an ward en jab aitok. Kajjitōk ekōjkan an maron̄ em̧m̧anļo̧k am̧ rie e. Kōm̧m̧ani karōk ko n̄an kōkōm̧anm̧anļo̧k.

Kweilo̧k in Kōtōbalbal ko Wiik Otemjej

Kōtōbalbal ippān ritōl ro ijo jokwe ie—ekoba ritōl ro an jodikdik ro—ej aorōk n̄an ami koba ilo kijejeto in mijenede ko am̧. Eļan̄n̄e juon ritōl an ward mijen ej kūr, ej kōjeikik kweilo̧k in kōtōbalbal ko wiik otemjej N̄e ejjab, juon membōr in būreejtōn ro an doulul eo an elder ro emaron̄ tōl jerbal in.

Ilo kweilo̧k kein iminene kaki, rekkadu, ritōl ro ijo jokwe ie im kwe kom̧ij kōtōbalbal kijejeto ko n̄an kwaļo̧k gospel eo im kōkajoorļo̧k membōr ro rekāāl im ro rej bar ro̧o̧ltok (lale Bok in Bōk Meļeļe Eļap, 23.4). Kweilo̧k kein remaron̄ kōm̧m̧an ilo likio in armej ak ilo online. Kōtōbalbal eo ej aikuj barāinwōt kōm̧m̧an ilo wāween ko jet ilo wiik eo, ekoba kūrļo̧k ilo talboon, text ko, im email ko.

“Juon kijejeto in ippān doon im pedped ioon ijo karōk im kōm̧m̧an kōttōpar an mijenede rej koba ippān karōk im kōm̧m̧an kōttōpar an ward im branch eo maron̄ lukkuun jipan̄ n̄an kadedeļo̧k jerbal eo an aintok Israel” (Quentin L. Cook, “Purpose and Planning,” mission leadership seminar, June 25, 2019).

Kōppopo eo n̄an Kweilo̧k in Kōtōbalbal eo Wiik Otemjej

Rie ritōl ro an ward eo kōn m̧aanjabpopo n̄an bōk koņaer ilo kweilo̧k in kōtōbalbal eo wiik otemjej. M̧okta jān kweilo̧k eo, bōk iien ilo iien ekkatak eo an ippān kampānieo eo m̧ōttam̧ n̄an ekōnono kōn ekōjkan am̧ maron̄ bōk koņam̧.

Kōkāāl im bar kōkāāl ļo̧o̧k ko am̧ ilo Preach My Gospel app eo bwe ritōl ro en wōr aer meļeļe ko rekāāl kōn ro kwoj jerbal ippāer. M̧aanjabpopo n̄an riboot kōn ijjitōn̄ ko jān kweilo̧k ko m̧oktaļo̧k.

Bōk koņam̧ ilo Kweilo̧k in Kōtōbalbal eo Wiik Otemjeļo̧k

Kweilo̧k in kōtōbalbal ko wiik otemjej rej n̄an pedped ioon aikuj ko an kajjojo armej. Ilo iien kweilo̧k eo, leļo̧k ekōjkan am̧ maron̄ rie membōr ro an ward eo, ekoba jodikdik ro, ilo tōpar aikuj ko an kajjojo armej.

Kweilo̧k in kōtōbalbal eo wiik otemjeļo̧k ekka an kōnono kōn unin kōnon kein kemen:

Ekōjkan ad maron̄ jipan̄ ro kar katakin? Aitōm ko maron̄ ekōnono kaki:

Ewi wōt membōr ro remaron̄ bōk koņaer ilo katak ko ilo wiik in tok? Wōņ ro kwonaaj kūr er n̄an bōk koņaer?
Ta kapan̄pan̄ ko n̄an ro kwoj katakin er? Ekōjkan an membōr ro maron̄ jipan̄?
Ta aikuj ko n̄an ro ewōr aer jikejuuļ in peptaij? Em̧ōj ke an peptaij eo kar karōke? (Lale “Iien Peptaij eo” ilo jebta 12.)

Ekōjkan ad maron̄ jipan̄ ro me ejkab m̧ōj aer peptaij? Aitōm ko maron̄ ekōnono kaki:

Ewi wōt membōr kāāl ro ilo iiō eo kein kajuon in aer membōr rej pād ilo kweilo̧k in kwojkwoj eo? Ekōjkan ad maron̄ jipan̄ jabdewōt ro me rejjab pād?
Ewi wōt membōr ro ewōr m̧ōttaer ilo ward eo? Ekōjkan an m̧aan im kōrā in jerbal in karejar ro maron̄ jipan̄? Ekōjkan an doulul ko an jodikdik ro im kūļaaj ko maron̄ jipan̄?
Ewi wōt membōr ro ewōr juon aer ijjitōn̄ ak kūr?
Ekōjkan ad maron̄ jipan̄ membōr ro jino kappukōt rūtto ro aer raar mej bwe kain̄i ko an tampeļ ren maron̄ kōm̧m̧ani n̄an er? Ewōr ke an membōr ro rekāāl juon peba in mālim n̄an deļo̧n̄e tampeļ? Eļan̄n̄e tampeļ eo epaak, ekōjkan ad maron̄ jipan̄ er etal n̄an tampeļ n̄an kōm̧m̧ani peptaij ko n̄an rūtto rein?
Ewi wōt katak ko jān jebta 3 rej aikuj in bar katakin? Ekōjkan an membōr ro bōk koņaer?
Etale Iaļ in Bujen eo Aō eddōkļo̧k an kajjojo membōr kāāl ro.

Ekōjkan ad maron̄ jipan̄ membōr ro rej bar ro̧o̧ltok? Aitōm ko maron̄ ekōnono kaki:

Ewi wōt baam̧le kome rejjab membōr maron̄ loļo̧k er jān mijenede ro im katakin?
Ewi wōt membōr ro rej bar ro̧o̧ltok me mijenede ro remaron̄ loļo̧k im katakin er?
Ewi wōt membōr ro rej bar ro̧o̧ltok ewōr m̧ōttaer ilo ward eo im im iien ko rejetjet n̄an jerbal?
Ekōjkan ad maron̄ jipan̄ membōr rein?

Ekōjkan ad maron̄ lo elōn̄ļo̧k armej ro n̄an katakin? Aitōm ko maron̄ ekōnono kaki:

Ekōjkan ad maron̄ jipan̄ kajjojo, ekoba jodikdik ro, im baam̧ļe ko kōjerbal pedped in katak ko an iakwe, kwaļo̧k, im karuwainene? (Lale “Koba ippān Membōr ro” ilo jebta 9.)
Ekōjkan ad maron̄ jipan̄ membōr ro, ekoba ritōl ro an Būraimere, karuwaineneik ro m̧ōttaer n̄an m̧akūtkūt ko an ward eo?

Ekkatak Ippān Kampānien Eo M̧ōttam̧

Alooje pija in alooj eo kōn juon kweilo̧k in kōtōbalbal wiik otemjeļo̧k ilo Bok in Bōk Meļeļe Eļap, 23.4. Ta eo kwar ekkatak me kwomaron̄ kōjerbale ilo kweilo̧k in kōtōbalbal wiik otemjeļo̧k eo tok juon? Ekōjkan an em̧m̧anļo̧k aō maron̄ m̧aanjabpopo n̄an ekōnono kōn aikuj ko im karōk eo ippān ritōl ro an ward eo? Ilo m̧wen̄an in karōk eo am̧ tok juon, kōm̧m̧ani kōttōpar ko kōn ekōjkan am̧ naaj em̧m̧anļo̧k?

Rie Karōk eo an Ward eo n̄an Leto Letak Gospel eo

Ward ko̧o̧njeļ eo ej ejake juon karōk eļam waan kōn leto letak gospel eo (lale Bok in Bōk Meļeļe Eļap, 23.5.6). Jino jeļā kōn karōk in. Ilo kweilo̧k in kōtōbalbal ko wiik otemjeļo̧k, pukōt wāween ko n̄an jipan̄ ritōl ro jerbal n̄an kōttōpar ko aer. Karon̄ wōt ritōl ro kōn ta eo kwoj kōm̧m̧ani n̄an rie membō ro ilo leto letak gospel eo.

Eļan̄n̄e kūr eok n̄an etal n̄an juon kweilo̧k in ko̧o̧njeļ an ward eo, kōppopo n̄an leļo̧k juon meļeļe ekāāl ekadu kōn eddōkļo̧k eo an ro kwoj katakin er im jabdewōt ijjitōn̄ ko kwar būki (lale Bok in Bōk Meļeļe Eļap, 29.2.5). Lo iien in em̧m̧an āinwōt juon iieni n̄an kalōk po lel eo im lōke eo an ritōl ro an ward eo .

Ukukōt n̄an Aikuj ko an Eria eo Ijo Jokwe ie

Ewōr an kajjojo ward im branch aikuj ko rein juon n̄an eok n̄an ukukōt n̄ane. Kwomaron̄ jerbal ilo juon branch edik ak juon ward an rūm̧m̧an ded ro ejjeļo̧k pāleer, ak kwomaron̄ jerbal ilo elōn̄ ward ko. Jet ritōl enaaj lōn̄ļo̧k aer en̄jake im jet eiet. Jet ritōl enaaj lōn̄ļo̧k aer iien jān jet.

Pukōt wāween ko n̄an jipan̄ ritōl ro ijo jokwe ie. Remaron̄ kajjitōk ippam̧ n̄an jipan̄ rie membōr ro ilo kappe in jerbal in karejar ko aer. Remaron̄ kajjitōk ippam̧ n̄an kōketak membōr ro rekāāl n̄an karuwaineneik ro m̧ōttaer n̄an pād ilo jar. Kwomaron̄ leļo̧k ļōmņak ko raorōk kōn jerbal in mijenede āinwōt ritōl ro im membōr ro ekkatak wāween ko n̄an leto letak gospel eo.

Ijo me Kabun̄ in ej kāāl wōt, ritōl ro an branch eo remaron̄ kajjitōk ippam̧ n̄an jipan̄ membōr ro rekāāl meļeļe ekōjkan an Irooj kar ejake Kabun̄ eo An.

Jerbal eo am̧ ippān ritōl ro maron̄ oktak ilo eria ko rooktak, bōtaab aolep m̧akūtkūt ko rej aorōk n̄an kōjeraam̧m̧an eo an kajjojo armej im kajutak Kabun̄ eo an Irooj.

Jipan̄ Membōr ro im Ritōl ro n̄an Iakwe, Kwaļo̧, im Karuwainene

Kōketak membōr ro n̄an leto letak gospel eo ilo wāween ko iminene kaki im ekkā. Bok in Bōk Meļeļe Eļap ej letok naan in kōmeļeļe im pija in alooj ko n̄an jipan̄ membōr ro im ritōl ro kōm̧m̧ane menin kōn mour kōn pedped in katak ko an iakwe, kwaļo̧k, im karuwainene (lale Bok in Bōk Meļeļe Eļap, 23.1.1, 23.1.2, im 23.1.3). Likūt pedped in katakin kein ilo ļōmņak ilo am̧ jerbal ippān ritōl ro.

Kwonaaj juon kōjeraam̧m̧an n̄an ritōl ro ilo am̧ rie kijejeto ko aer ilo jerbal in. Ilo kōro̧o̧ltok, waanjon̄ak eo aer enaaj jipan̄ membōr ro ļapļo̧k aer bōk koņaer ilo leto letak gospel eo im kōkajoorļo̧k membōr ro rekāāl im ro rej bar ro̧o̧ltok.

Lale “Koba ippān Membōr ro” ilo jebta 9 kōn aitia ko kōn rie membōr ro ilo kijejeto ko aer n̄an leto letak gospel eo.

Ekkatak Jeje ko Rekwojarjar

Ekkatak kōn eoon kein rej ellaajrak. Ekōjkan an Rilo̧mo̧o̧r eo im rikaļoor kein kar iakwe, leto letak, im karuwainene? Ta jerbal ko waanjon̄ak kein rej im̧we ilo katakin eo am̧? Ekōjkan am̧ maron̄ jipan̄ membōr ro leto letak gospel eo ilo wāween ko iminene im jeļā kaki?

Iakwe

Leto Letak

Karuwainene

Kajjojo iien kwoj ekkatak, ļo̧o̧ke ta eo kwoj ekkatak.

Rie Ritōl ro Ijo Jokwe ie ilo Kōkajoorļo̧k Membōr ro Rekāāļ

N̄e armej ro rej peptaij im kapen, rej erom “citizen ippān ro rem̧m̧an, im kom̧ nukun Anij” (Epesōs 2:19; lale barāinwōt 1 Korint 12:12–27). Jebal ippān ritōl ro ijo jokwe ie n̄an jipan̄ membōr ro rekāāl “naajdik er jān em̧m̧an eo an naan in Anij, n̄an kōjparok er ilo wāween ejim̧we, … atartar make ioon em̧m̧an ko an Kraist” (Moronai 6:4).

“Rioktak ro rekāāl rej itok n̄an Kabun̄ in kōn lo̧udin̄din̄ eo kōn ta eo raar loe. Im jej aikuj m̧ōkaj in ekkal ioon lo̧udin̄din̄ jab in. … Mijenede ro remaron̄ jipan̄ kwaļo̧k kadkad in im kakkejel armej ro rej katakin er im rioktak ro rekāāl n̄an membōr ro retiljek me renaaj pukōtļo̧k er, ron̄jake er, tōl er, im karuwaineneik er n̄an jar em̧ool m̧okta jān aer peptaij. … Ilo ad [jerbal in karejar] n̄an ro me rej deļo̧n̄ ilo dān ko an peptaij, jenaaj lo elōn̄ļo̧k ajri ro nejin Anij ren niknik n̄an jem̧ļo̧kin im bōk mour indeeo” (Ulisses S. Soares, “Convert Retention,” mission leadership seminar, June 25, 2018).

Jipan̄ Membōr ro Rekāāl Pād ilo Kweilo̧k in Kwojkwoj eo

Ewōr juon am̧ jerbal eaorōk ilo jipan̄ membōr ro rekāāl pād lo jar. Jerbal ippān ritōl ro n̄an kanooj lale bwe kwe ak membōr ro an ward eo ren jipan̄ er pād. Juon kakōļļe aorōk ej kwaļo̧k an juon membōr kāāl pād ilo kweilo̧k eo emaron̄ jipan̄ eok im ritōl ro an ward eo lo n̄e emaron̄ aikuji eļapļo̧k kōketak.

Membōr ro rekāāl āinwōt eļap wōt aer naaj wōnm̧aanļo̧k wōt in pād ilo kweilo̧k in kwojkwoj eo im bōk m̧ōttan kwojkwoj eo n̄e ewōr ro m̧ōttaer ilo ward eo. Jipan̄ er en̄jake juon en̄jake in uwaan, eļap tata ilo iiō eo aer kein kajuon in mour kōn gospel eo. (Lale Katak im Bujen Ko 84:106, 108.)

Bar katakin katak ko ilo Jebta 3

Jipan̄ membōr ro rekāāl wōnm̧aanļo̧k wōt n̄an kōkajoor tōmak eo aer ilo Rilo̧mo̧o̧r Jisōs Kraist im gospel eo An. M̧ool ko im pedped in katak ko an gospel eo rōliok titbok ilo an membōr ro rekāāl wōnm̧aanļo̧k wōt n̄an ekkatak jān Jetōb eo.

Ālkin kapene eo, katakin katak ko an mijenede bar juon alen. Bōk m̧aan ilo katakin eo. Ijo ke, kōtōbalbal ippān ritōl ro an ward ak ward mijenede ro ak membōr ro jet n̄an bōk koņaer. Bar katakin katak ko ilo jebta 3 ej juon wāween aorōk n̄an jipan̄ membōr ro rekāāl “naajdik er jān em̧m̧an eo an naan an Anij” (Moronai 6:4). Ilo am̧ katakin, kōketak membōr ro rekāāl n̄an kōjparok aolep kien ko ilo katak ko.

Riiti jeje ko rekwojarjar ippān membōr ro rekāāl, eļap tata Bok in Mormon, im katakin pedped in katak ko an gospel eo. Jipān̄ er leto letak gospel eo ippān ro m̧ōttaer im baam̧le. Kajjojo membōr rekāāl ewōr aer aikuj ko rein juon, im kwomaron̄ jipan̄ e en̄jake im ruwainene.

Riboot in Eddōkļo̧k an Iaļ in Bujen im Iaļ in Bujen eo Aō

Ritōl ro ijo jokwe ie ewōr aer kein jipan̄ ko n̄an kijejeto ko an mijenede ro aer āinwōt an lōn̄ am̧. Juon iaan men kein ej riboot in Eddōkļo̧k an Iaļ in Bujen eo, lo ilo Member Tools app eo ak Leader and Clerk Resources. Riboot in ej kōtļo̧k bwe ritōl ro ijo jokwe ie ren lo aorōk in en̄jake ko juon armej ej aikuji n̄an eddōkļo̧k ilo iaļ in bujen eo m̧okta im ālkin aer peptaij.

Iaļ in Bujen eo Aō ej juon kein jipan̄ n̄an jipan̄ membōr ro rekāāl “emjak pen n̄an tōmak eo [aer] ilo Jisōs Kraist im en̄jake āinwōt ruwainene ilo Kabun̄ in” (Iaļ in Bujen eo Aō, iv). Ej kwaļo̧k kadkad in membōr ro rekāāl n̄an m̧akūtkūt ko im iien ko rem̧m̧an, ko āinwōt menmenbwij an baam̧le im jipan̄ rūtto ro raar mej bōk kain̄i ko rekwojarjar ilo tampeļ. Kōketak membōr ro ijo jokwe ie n̄an tōl membōr ro rekāāl ilo en̄jake kein. Leļo̧k rie n̄e kajjitōk.

Ekkatak Am̧ Make im Ippān Kampānien Eo M̧ōttam̧

Ekkatak kōn Iaļ in Bujen eo Aō. Ta eo kwar ekkatak kōn jerbal eo am̧ ilo jipan̄ membōr ro kōkajoorļo̧k rioktak ro rekāāl? Ekōjkan am̧ maron̄ rie kijejeto ko an ward ko̧o̧njeļ eo? Kajjojo iien kwoj ekkatak jebta in, ļo̧o̧ke ta eo kwoj ekkatak.

Rie Ritōl ro Ijo Jokwe ie ilo Kōkajoorļo̧k Membōr ro rej Bar Ro̧o̧ltok

Jet membōr rej kāālet n̄an bōjrak jān aer bōk koņaer ilo Kabun̄ in. Ritōl ro ijo jokwe ie im membōr ro jet rej kajjieon̄ n̄an kalōk jemjerā ko rekajoor ippāer im pukōtļo̧k er. Rilo̧mo̧o̧r eaar ba:

“Bwe n̄an rein kom̧ naaj wōnm̧aanļo̧k wōt im jipan̄; bwe kom̧ij jab jeļā eļan̄n̄e ak ta renaaj ro̧o̧l im ukeļo̧k, im itok n̄an Eō kōn aolepān kōttōpar in bōro, im Inaaj kōmour er; im kom̧ naaj wāween eo n̄an bōktok lo̧mo̧o̧r n̄an er” (3 Nipai 18:32).

Ritōl ro ijo jokwe ie maron̄ kajjitōk ippam̧ n̄an jipan̄ membōr ro rej bar ro̧o̧ltok kalōk tōmak eo aer. Emakijkij an ijjitōn̄ kein naaj ippān baam̧le ko ejjab aolep rej membōr. Jar ilo ļōmņak kōn ekōjkan am̧ maron̄ karuwaineneiktok Jetōb eo n̄an im̧ōko im̧ōn membōr ro rej bar ro̧o̧ltok ilo am̧ katakin er pedped in katak ko an gospel eo im kajjitōk ippāer n̄an jerbal. Kwalo̧k meļeļe im meanwōd n̄an n̄ūrbōktak ko aer.

Ilo an jekjek ko kōtļo̧k, katakin gospel eo n̄an ro ilo im̧weo me rejjan̄in ded peptaij. Am iakwe im rie emaron̄ jipan̄ er kam̧wilaļļo̧k tōmak eo aer ilo Kraist im kōļapļo̧k ikdeelel eo aer n̄an kōm̧m̧an im kōjparok bujen ko.

Kōtōbalbal ippān ritōl ro ijo jokwe ie n̄e kwoj jerbal ippān membōr ro rej bar ro̧o̧ltok. Kijejeto kein emaron̄ wōr juon jelet aitok kitien ilo kajjojo armej ro im jarlepju eo ijo jokwe ie.

Ekkatak Jeje ko Rekwojarjar

Ta eo Jisōs Kraist ekar katakin kake kōn jipan̄ ro me remaron̄ apan̄?

Alma im Amulek raar katakin elōn̄ ro me raar wōtļo̧k jān Kabun̄ in. Ta eo kwoamron̄ ekkatak jān en̄jake kein aer kōn kōkajoorļo̧k membōr ro rej bar ro̧o̧ltok?

Ļōmņak ko n̄an Ekkatak im Kōjerbali

Ekkatak Am̧ Make

Kōjerbal Kwaļo̧k Aō Gospel app eo n̄an kōm̧m̧ani karōk ko n̄an kōnono n̄an membōr ro rekāāl im membōr ro rej kab bar ro̧o̧ltok me rej ukōt mour ko aer im pād ilo jar. Ta eo ekar jipan̄ er eļap tata? Ilo jōnōļ in ekkatak eo am̧, je ļōmņak ko am̧ kōn en̄jake ko aer. Ta eo kwar ekkatak me enaaj jipan̄ eok jerbal ippān ro kwoj katakin er kiiō?
Ekkatak 2 Nipai 31:18–20, Alma 26:1–7, Alma 32:32–43, im Moronai 6. Je ta eo kwoj ekkatak jān eoon kein kōn kōkajooorļo̧k membōr ro rekāāl.

Ekkatak Ippān Eo M̧ōttam̧ im Iien Jānij M̧ōttā

Riiti im ekōnono kōn jebta 23 ilo Bok in Bōk Meļeļe Eļap. Ekōjkan am̧ maron̄ rie ritōl ro ijo jokwe ie ilo eddo ko aer?
Ilo kweilo̧k in kōtōbalbal ko wiik otemjeļo̧k, kajjitōk ippān ritōl ro an ward eo eļan̄n̄e ewōr jabdewōt membōr ro rej bar ro̧o̧ltok ilo eria eo am̧ rej kōņaan bwe kwon loļo̧k wiik in. Ilo am̧ loļo̧k er, kappukōt n̄an kalōk tōmak eo aer ilo Jisōs Kraist.
Kile aolep ro me raar peptaij im kapene ilo iiō eo ļo̧k. Etale rekoot eo an juon iaer im ekōnono kōn ekōjkan am̧ maron̄ jerbal ippān ritōl ro ilo kweilo̧k in kōtōbalbal eo wiik otemjeļo̧k tok juon n̄an jipan̄ armej in. Ļo̧oke aitia ko im elmakot ko am̧ ilo Kwaļo̧k Gospel eo Aō app eo. Bar āliji menin n̄an aolep rioktak ro rekāāl ilo erai eo am̧.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Kajjitōk ippān bisop eo ak juon bar ritōl an ward eo n̄an kōnono kōn kōkajoorļo̧k membōr ro rekāāl im ro rej bar ro̧o̧ltok. Kajjitōk ippān armej in n̄an kōmejajaik ekōjkan an mijenede ro maron̄ jipan̄.
Ekōnono kōn būrabōļ ko kōn sip eo ejōbwābwe, jāān deka eo ekar jako, im nejin eo ejerwaan (lale Luk 15). Kajjitōk ippān mijenede ro n̄an kwaļo̧k ta eo rej ekkatak im ekōjkan aer maron̄ kōjerbale ilo jerbal in mijenede eo aer.

Ritōl ro an Mijen im Rikakpilōklōk ro an Mijen

Jerbal ippān ritōl ro ijo jokwe ie n̄an kōketak er n̄an jipan̄ membōr ro rekāāl.
- Ekkapit n̄an juon opiij ilo priesthood eo (n̄an em̧m̧aan ro ejetjet iiō eo aer).
- Kappeik n̄an e m̧aan ro an jerbal in karejar (im kōrā ro an jebral in karejar n̄an kōrā ro).
- Bōk juon peba in mālim n̄an delo̧n̄e tamepļ n̄an peptaij ilo tampeļ eo n̄an rūtto ro aer remej.
- Kōpooj āt ko etan juon rūtto ekar mej n̄an bōkļo̧k n̄an tampeļ.
- Bōk juon ijjitōn̄ ak kūr n̄an jerbal ilo ward ak branch eo aer.
Ilo kōtōbalbal ippān stake būreejtōn eo, katakin ritōl ro ijo jokwe ie kōn ekōjkan kōm̧m̧ane kweilo̧k in kōtōbalbal ko wiik otemjeļo̧k rewejepedik.
Jān iien n̄an iien bar etale ippān membō ro rekāāl n̄an lale ekōjkan aer pād im ekōjkan an mijenede ro im membōr ro maron̄ jipan̄.
Kajjitōk ippān membōr ro rekāāl n̄an kōnono ippān mijenede ro im kwaļo̧k en̄jake ko aer ilo Kabun̄ in.