“Jebta 10: Katakin n̄an Kalōk Tōmak ilo Jisōs Kraist,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

Jebta10,” Kwaļo̧k Gospel eo Aō

Jebta 10

Katakin n̄an Kalōk Tōmak ilo Jisōs Kraist

Ļōmņak kōn Menin

Ekōjkan aō maron̄ katakin kōn Jetōb?
Ekōjkan aō maron̄ katakin jān jeje ko rekwojarjar?
Ekōjkan aō aikuj kwaļo̧k naan in kam̧ool eo aō n̄e katakin?
Ekōjkan aō maron̄ karōk im ukukōt aō katakin n̄an tōpar aikuj ko an armej ro?
Ekōjkan an maron̄ em̧m̧anļo̧k aō kajjitōk kajjitōk ko im erom juon riron̄jake em̧m̧anļo̧k?
Ekōjkan aō maron̄ jipan̄ armej ro lo uwaak ko n̄an kajjitōk ko aer im bōk tōl im kajoor?

Kar kūr eok n̄an katakin gospel eo kar kōjepļaaktok an Jisōs Kraist n̄an jon̄an lōn̄ in armej ro naaj bōk eok. Katakin ej ioļapļap n̄an aolep men ko kwoj kōm̧m̧ani. Ilo am̧ pedped ioon Irooj kōn jipan̄, E ekar kallim̧ur kaki:

“Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (Katak im Bujen Ko 84:88).

Jar, ekkatak, im kōmālmel n̄an kōkōm̧anm̧anļo̧k maron̄ in katakin eo am̧. Kōjerbal pedped in katak ko ilo jebta in im ilo jebta ko jet an bok in. Kanooj kappukōt menin letok eo an katakin bwe kwon maron̄ kōjeraam̧m̧an ro jet im kaiboojoj Anij. Irooj enaaj jipan̄ eok katakin kōn kajoor eo im mālim eo ilo am̧ niknik kappukōt E im ekkatak An naan.

Kappukōt n̄an Katakin āinwōt Rilo̧mo̧o̧r eo ekar Katakin

Ilo tōre in jerbal in karejar eo An ioon laļ in, Jisōs “ekar etetal … katakin … , kwaļo̧k … , im kemour” (Matu 4:23). E ekar katakin ilo elōn̄ jikin ko—ilo im̧ōn kweilo̧k ko, ilo im̧ōko, im ilo iaļ eo. E ekar katakin ilo koba ko reļļap im ilo bwebwenato ko retiņņo. Jet iaan ikitōltōl ko an rekajoor tata raar lukkuun kadu ak ilo jekjek ko rejej uwaer. E ekar katakin kōn jerbal ko An barāinwōt naan ko An.

Rilo̧mo̧o̧r eo ekar katakin kajjojo armej ekkar n̄an aikuj ko an rein juon. N̄an waanjon̄ak, ke ekar jerbal n̄an juon em̧m̧aan emej ānbwinin, E ekar jeorļo̧k bōd ko an im kar kemour e (lale Mark 2:1–12). Ke kar jerbal in karejar n̄an juon kōrā me ekar ļōn̄, E ekar kōjparok liin im kar kajjitōk ippān n̄an jab bar jerawiwi (lale Jon 8:2–11). Ke kar kōnono ippān juon em̧m̧aan em̧wei me ekar kōņaan mour indeeo, E ekar “yokwe e” jekdo̧o̧n n̄e ekar likao in ekar m̧akoko in bōk kūr eo An n̄an ļoor E (Mark 10:21; lale eoon 17–21).

Kwomaron̄ kōkōm̧anm̧anļo̧k am̧ katakin kōn ekkatak ekōjkan an Rilo̧mo̧o̧r eo kar katakin. N̄an waanjon̄ak, E ekar iakwe Jemen im ro E ekar katakin. E ekar jar. E ekar katakin jān jeje ko rekwojarjar. E ekar pojak ilo jetōb. E ekar kajjitōk kajjitōk ko reim̧we. E ekar kajjitōk ippān armej ro n̄an jerbal ilo tōmak. E ekar keidi pedped ko an gospel eo n̄an mour aolep raan.

Kappukōt n̄an katakin āinwōt an Rilo̧mo̧o̧r eo kar katakin ej juon jibadbad to̧o̧n wōt ad mour. Enaaj iwōj n̄an eok lain im bar lain ilo am̧ ļoor E (lale 2 Nipai 28:30; Ether 12:41).

“Kappukot n̄an Bōk Naan eo Aō”

N̄an katakin gospel eo an Jisōs Kraist, kwoj aikuj in jeļā katak ko an im̧aan tata im pedped in katak ko. Kwoj aikuj barāinwōt jeļā ilo jetōb im kapene eo kōn m̧ool ko an gospel eo. Irooj ekar ba, “Kappukot jaab n̄an kwaļo̧k naan eo aō, ak m̧okta kappukot n̄an bōk naan eo aō.”

N̄an “bōk” naan eo an Irooj ej meļeļe in n̄an ekkatak kake im kōtļo̧k bwe en deļo̧n̄ ilo būruōm̧. Ilo am̧ kōm̧m̧ane kijejeto in, E ekar kallim̧ur, “innām, eļan̄n̄e kwo kōņaan, kwo naaj bōk Jetōb eo Aō im naan eo Aō, aaet, kajoor eo an Anij n̄an karreel būruōn armej raņ” (Katak im Bujen Ko 11:21).

Irooj ekar barāinwōt ba n̄an “ko̧koņi ilo ļōmņak ko ami iien otemjej naan ko in mour” (Katak im Bujen Ko 84:85). Ko̧koņi naan ko Irooj enaaj kōļapļo̧k jeļā eo am̧ im kōkajoorļo̧k naan in kam̧ool eo am̧. Ikdeelel eo am̧ im maron̄ eo n̄an katakin gospel eo enaaj barāinwōt ļapļo̧k. (Lale Jekab 4:6–7; Alma 32:27–42; 36:26; 37:8–9.)

Jar n̄an bōk im ko̧koņi naan eo an Irooj kōn ekkatak jeje ko rekwojarjar, naan ko an rikanaan ro remour, im katak ko ilo jebta 3.

Katakin jān Jetōb eo

Gospel eo an Jisōs Kraist ej “kajoor an Anij n̄an lo̧mo̧o̧r ippān ro otemjej rej tōmak” (Rom 1:16). Kōn un jab in, ennaan eo an Jepļaaktok eo an gospel eo ej aikuj in katakin kōn kajoor eo ekwojarjar—kajoor eo an Jetōb Kwojarjar.

Ej aorōk bwe kwon kōļapļo̧k kapeel in katakin ko. Ej barāinwōt aorōk bwe kwon maron̄ ekaktak katak ko im pepded in katak ko kwoj katakin. Ijo ke, n̄e katakin m̧ool ko ilo jetōb, kwojja aikuj pedped eļap tata ioon maron̄ ko im jeļā eo am̧.

M̧ool ko ilo jetōb rej katain kōn kajoor eo an Jetōb Kwojarjar. Irooj ekar ba, “Im Jetōb eo enaaj lewōj n̄an kom̧ jān jar in tōmak; im eļan̄n̄e kom̧ij jab bōk Jetōb eo kom̧ij jamin maron̄ katakin” (Katak im Bujen Ko 42:14; lale barāinwōt Katak im Bujen Ko 50:13–14, 17–22).

Ta Meļeļe in n̄an Katakin kōn Jetōb

N̄e kwoj katakin kōn Jetōb eo, kwoj jar n̄an bōk kajoor eo an Jetōb Kwojarjar ilo katakin eo am̧. Kwoj barāinwōt jar bwe armej ro renaaj bōk m̧ool ko kōn Jetōb. Armej ro remaron̄ kilep kōn jet m̧ool ko, bōtaab n̄an oktak, ej aikuj wōr aer en̄jake ko ippān Jetōb eo (lale Katak im Bujen Ko 8:2–3).

Kōpooj eok make n̄an juon kein jerbal me Jetōb eo emaron̄ katakin. Ļōmņak kōn Jetōb Kwojarjar eo āinwōt eo m̧ōttam̧ ilo katakin.

Pedped ioon Jetōb eo n̄an jipan̄ eok jeļā ta eo n̄an ba. E enaaj bōktok katak ko kwar ekkatak n̄an ememļo̧kjeņ eo am̧. E enaaj jipan̄ eok karōk im ukukōt ta eo kwoj katakin ekkar n̄an aikuj ko an armej eo.

N̄e kwoj katakin kōn Jetōb eo, E enaaj bōkļo̧k ennaan eo am̧ n̄an būruōn armej ro. E enaaj kapene ennaan eo am̧ n̄e kwoj kwaļo̧k naan in kam̧ool eo am̧. Kwe im ro rej bōk ta eo kwoj katakin kōn Jetōb eo naaj jeļā, meļeļe doon, im lan̄lōn̄ ippān doon. (Lale 2 Nipai 33:1; Katak im Bujen Ko 50:13–22).

“Jetōb eo ej men eo aorōk tata emake wōt ilo jerbal in. Kōn an Jetōb eo kōļapļo̧k kūr eo am̧, kwomaron̄ kōm̧m̧ani mennin bwilōn̄ ko n̄an Irooj ilo jikin mijen. Ilo an jako Jetōb eo, kwojjamin naaj wejepedik jekdo̧o̧n ta tōļan eo im maron̄ eo am̧” (Ezra Taft Benson, seminar for new mission presidents, June 25, 1986).

Kallim̧ur eo an Kūr eo Am̧

Em̧ōj kar kūr eok im kōjenolo̧k eok “n̄an kwaļo̧k naan kōn gospel eo Aō jān Jetōb, em̧ool Rikaenōm̧m̧an eo kar jilkinļo̧k n̄an katakin m̧ool eo” (Katak im Bujen Ko 50:14). Ilo iien ko kwomaron̄ en̄jake ikūm̧kūm ak likjab. Bōlen kwoj inepata bwe ejab we am̧ jeļā ak bwe ejjab bwe jeļā eo ilo kwe.

Jemam̧ Ilan̄, eo eweppān an jeļā kwe, kar kūr eok kōnke kōn ta eo kwomaron̄ kōm̧m̧ane āinwōt juon rikaļoor ewijilepļo̧k an Jisōs Kraist. E ejjamin meļo̧kļo̧k eok. Lōke bwe Jetōb eo enaaj kōļapļo̧k maron̄ ko am̧ im naaj katakin m̧ool eo n̄an ro rej bōke.

Elder Neil L. Andersen ekar ba: “ Ilo aō kar etale apan̄ eo kōn mijen, Ikar lukkuun en̄jake likjab im jab pojak. Ij keememej aō kar jar, ’Jema Ilan̄, ekōjkan aō maron̄ jerbale juon mijen n̄e edik jeļā ippa?’ Ikar tōmak ilo Kabun̄ in, bōtaab ikar en̄jake an dik jeļāļo̧kjeņ eo aō ilo jetōb. Ilo aō kar jar, en̄jake in ekar itok: ’Kojjab jeļā aolep men, bōtaab ebwe jeļā eo am̧!’ Kam̧ool jab in ekar letok n̄an n̄a peran eo n̄an bōkļo̧k n̄an bar juon bun̄tōn ilo jikin mijen” (“You Know Enough,” Liahona, Nov. 2008, 13).

Karuwaineneitok Jetōb eo ilo Am̧ Jino Katakin

Iien ko jejjo im̧aan tata ippān armej ro rej lukkuun aorōk. Kwon lukkuun m̧ool im kautiej. Kwaļo̧k itok limo em̧ool im iakwe. Kappukōt n̄an bōk lo̧ok eo aer. Juon wāween n̄an bōk lōke eo ej n̄e armej ro rej en̄jake Jetōb eo ilo kwe.

Kajjitōk jejjo kajjitōk ko n̄an jipan̄ eok meļeļe bwebwenato in mour eo aer im kōtmene ko aer kōn loļo̧k ko am̧. Kanooj ron̄jake.

M̧okta jān am̧ ijjino, karuwaineneik aolep ro repād n̄an koba ilo katak eo. Kōketak er n̄an joļo̧k men ko rej kōm̧ad bwe Jetōb eo an Irooj maron̄ en̄jake.

Kōm̧eļeļeik bwe kwoj kōņaan ijjino im kōjjem̧ļo̧k kajjojo katak kōn jar. Ba kwoj kōm̧m̧ane jar in kōppeļļo̧k eo. En ļam waan im m̧ool am̧ jar bwe Anij enaaj kōjeraam̧m̧an armej ro kwoj katakin er ilo aolep jekjek ko an mour ko aer. Jar bwe ren maron̄ en̄jake m̧ool eo an ta eo kwonaaj katakin. Keememej bwe “eļap tokjān jar eo em̧m̧an an [armej] eo wānōk” (Jemes 5:16).

Kwon tōmak ilo kajoor in ukōt eo an Jetōb Kwojarjar. Āinwōt kar tōl jān Jetōb eo, kwomaron̄ kwaļo̧k ļōmņak ko āinwōt kein ilo am̧ jino katakin eo:

Anij ej Jemedwōj Ilan̄ eo ej iakwe. Jej aolep jemjān jemjati. E ej kōņaan bwe jen en̄jake lan̄lōn̄.
Kōjwōj aolep ewōr ad idajon̄jon̄ ko im apan̄ ko. Jekdo̧o̧n ta eo kwoj ioon e, Jisōs Kraist im katak ko An remaron̄ jipan̄ eok. E emaron̄ jipan̄ eok lo aenōm̧m̧an, kōjatdikdik, kemour, im m̧ōņōņō. Jisōs emaron̄ jipan̄ eok bōk eļapļo̧k kajoor n̄an apan̄ ko an mour in.
Jej aolep kōm̧m̧ani bōd ko, ko remaron̄ ejaki en̄jake ko an bōd, jook, ak ajļo̧k. En̄jake kein renaaj jako wōt ilo ad ukweļo̧k im kappukōt jeorļo̧k bōd eoa n Anij. Kōn wōt Pinmuur eo an Jisōs Kraist jemaron̄ lukkuun mour jān jerawiwi ko ad.
Naaj tōl kōj bwe jen maron̄ ekkatak m̧ool eo an ennaan eo ad kōn kōj make. Kōm naaj karuwaineneik eok n̄an kōm̧m̧ane jet men ko, ko āinwōt riiti, jar, im etal n̄an jar. Jerbal eo am̧ ej n̄an jipan̄ eok kōm̧m̧ani kūr kein im kōmeļeļeik kōjeraam̧m̧an ko kwomaron̄ būki. Jouj im kajjitōk kajjitōk ko.
Kar kūr kōm jān juon rikanaan an Anij n̄an kwaļo̧k ta eo kōm jeļā. Kōm jeļā bwe ennaan eo am̧ ej m̧ool.
Kōm naaj katakin eok ekōjkan kōm̧m̧ani bujen ko, ak kallim̧ur ko rein juon, ippān Anij. Bujen kein renaaj kobaik eok n̄an Anij im kōtļo̧k am̧ bōk lan̄lōn̄, kajoor, im kallim̧ur ko rein juon jān E.
Kwonaaj ekkatak ekōjkan kōm̧m̧ani oktak ko ilo mour eo am̧ im ļoor Jisōs Kraist im katak ko An. Juon katak aorōk an Jisōs Kraist, im bujen eo m̧oktata jej kōm̧m̧ane, ej n̄an ļoor waanjon̄ak eo An im peptaij jān mālim eo ejetjet (lale Jon 3:5; Katak im Bujen Ko 22).

M̧okta jān juon katak, leļo̧k juon jo m̧ōkaj eļem waan kōn ta eo kwonaaj katakin. Jipan̄ armej ro lo ekōjkan an naaj jetjet n̄an er. N̄an waanjon̄ak, kwomaron̄ ba, “Kōmij pād ijin n̄an kwaļo̧k ennaan eo bwe Jisōs Kraist ekar kajutak Kabun̄ eo An ioon laļ in rainin im ekar kūr rikanaan ro remour n̄an tōl kōj.” Ak kwomaron̄ ba, “Kōmij pād ijin n̄an jipan̄ eok jeļā bwe Anij ej iakwe eok im ewōr juon karōk n̄an m̧ōņōņō eo am̧.”

Aolep armej naaj jeraam̧m̧an ilo aer bōk im mour kōn gospel eo an Jisōs Kraist. Jemedwōj Ilan̄ emaron̄ kar kōjeraam̧m̧an armej ro kwoj lo kōn aorōk eo an m̧aanjabpopo ilo jetōb (lale Alma 16:16–17).

Karuwaineneiktok Jetōb eo im kwaļo̧k m̧ool eo ilo kweilo̧k eo m̧oktata naaj jipan̄ armej ro kile kom̧ āinwōt ro rikarejeran Irooj.

Ekkatak eo Am̧ Make im Ippān Kampānien Eo M̧ōttam̧

Kōjerbal elmakot ko ilo jekjōn in n̄an kōmālmeli wāween ko rookta n̄an jino juon katak.

Kōjerbal Jeje Ko Rekwojarjar

Bok in Jeje ko Rekwojarjar an Kabun̄ in rej kein jipan̄ ko im̧aan tata n̄an katakin gospel eo kar kōjepļaaktok an Jisōs Kraist. Elōn̄ un ko etke ej lukkuun aorōk n̄an kōjerbal jeje ko rekwojarjar āinwōt pedped eo n̄an katakin eo am̧. N̄an waanjon̄ok:

Jeje ko Rekwojarjar ej karuwaineniktok Jetōb Kwojarjar n̄an katakin eo am̧ (lale Luk 24:13–32).
Jeje ko Rekwojarjar ekajoorļo̧k jelet eo an ilo ļōmņak ko an armej ro jān jabdewōt bar men (lale Alma 31:5).
Jeje ko Rekwojarjar rej ņae mejļan kajjitōk ko reļlap an jetōb jebta 5; lale barāinwōt 2 Nipai 32:3; Jekab2:8).
Jeje ko Rekwojarjar ej letok mālim eo im jetjet eo n̄an katakin eo am̧.
Irooj im rikanaan ro An raar ba n̄an kōm̧m̧an āindein Katak im Bujen Ko 42:12, 56–58; 71:1).

Jān kōjerbal jeje ko rekwojarjar ilo katakin eo am̧, kwomaron̄ jipan̄ ro jet jino ekkatak jeje ko rekwojarjar kōn er make. Ilo an iakwe eo am̧ n̄an jeje ko rekwojarjar juon kam̧ool, renaaj ketak n̄an ekkatak. Kwaļo̧k ekōjkan ekkatak jeje ko rekwojarjar naaj jipan̄ er ekkatak gospel eo im iakwe eo an Anij. Leļo̧k waanjon̄ak ko kōn ekōjkan an jeje ko rekwojarjar maron̄ jipan̄ er lo uwaak ko n̄an kajjitōk ko aer im bōk tōl eo im kōkajoor eo.

Wujlepļo̧k eok make n̄an ekkatak jeje ko rekwojarjar bwe kwon maron̄ katakin er ilo wejepedik (lale jebta2). Maron̄ eo am̧ n̄an katakin jān jeje ko rekowjarjar naaj em̧m̧anļo̧k ilo am̧ ekkatak kaki aolep raan, jim̧or kwe make im ippān eo m̧ōttam̧.

Jipan̄ armej ro kaddōkļo̧k tōmak ilo Jisōs Kraist kōn ekkatak jeje ko rekwojarjar, eļap tata Bok in Mormon. Elmako kein remaron̄ jipan̄:

Kwaļo̧k kadkad in Jeje ko Rekwojarjar

Kōmeļeļeik ilo tukadu in bwebwenato eo an eoon eo. Waanjon̄ak kein rej kwaļo̧k jet wāween ko n̄an kwaļo̧k kadkad in juon eoon:

“Ilo bwebwenato eo an Josep Smith, Josep ej jiron̄ kōj ilo naan ko an make ta eo ekar waļo̧k ke ekar ilo̧k n̄an bukwin wōjke eo n̄an jar. Ekar ba, ‘Iaar lo juon jurōn meram …’”
“Ilo eoon in, rikanaan Alma ej katakin armej ro me raar jeram̧ōl n̄an kōjerbal tōmak eo aer ilo naan eo an Anij. Ej keidi naan eo an Anij n̄an juon ine me maron̄ katōke ilo būruōd. Kwonaaj ke jino riiti eoon eo … ?”

Riiti Eoon eo

Kōļap ainikien riiti eoon ko ak kajjitōk ippān armej eo kwoj katakin n̄an kōļap an riit. Mejmejkaruo n̄an ro me epen aer riit. Eļan̄n̄e eoon eo epen n̄an er n̄an meļeļe, riiti ippāer im kōmeļeļeik ilo ami riit. Kōmeļeļeik jabdewōt naan ko reppen ak eoon ko. Ak leļo̧k n̄an er juon eoon eo epidodoļo̧k n̄an riiti. Kajjitōk ippāer n̄an pukōt men ko rein juon ilo eoone o.

Kōjebal Jeje ko Rekwojarjar

Nipai ekar ba, “Iaar karōki tok aolep jeje ko rekwōjarjar n̄an kōm, bwe en n̄an am maron̄ jeraam̧m̧an im jeļā” (1 Nipai 19:23). N̄an “keidi” ej meļeļe in kōjerbal jeje ko rekwojarjar n̄an mour eo am̧.

Keidi jeje ko rekwojarjar n̄an ro me kwoj katakin kōn kwaļo̧k ekōjkan an bwebwenato ko im pedped in katak ko rejetjet n̄an er make. N̄an waanjon̄ok:

“Āinwōt kwe, armej ro doon Alma ekar wōr aer eddo ko reddo, enan̄in ļapļo̧k jen aer maron̄ kar ineek. Bōtaab ilo aer kar kōjerbal tōmak im jar, Anij ekar kōkajoorļo̧k er bwe ren maron̄ dibuki apan̄ ko. Innām E ekar kadeoor er jān mālijjon̄ ko aer. Ejja āinwōt An kar kōm̧m̧an ippān armej rein, ijeļā Anij enaaj jipan̄ eok ilo mālijjon̄ ko aer ilo am̧ …” (Lale Mosaia 24.)
“Naan in kōmeļeļe eoa n Alma n̄an armej ro ilo Dān ko an Mormon rej ejrbal n̄an kōj rainin. Jon, kwoj m̧ōņōnō ke in … ?” (Lale Mosaia 18).

Katakin armej ro ekōjkan “keidi” jeje ko rekwojarjar kōn er make. Lo kallim̧ur ko an juon make naaj jipan̄ er kōjerbal im en̄jake kajoor eo an naan an Anij.

Karuwaineneik im Jipan̄ Armej ro Riit kōn Er Make

Armej ro kwoj katakin er aikuj in riiti jeje ko rekwojarjar, eļap tata Bok in Mormon, n̄an bōk juon naan in kam̧ool kōn m̧ool eo. Kōn jetjet kōjerbal jeje ko rekwojarjar ilo katakin eo am̧, kwomaron̄ jipan̄ armej ro jino ekkatak jeje ko rekwojarjar kōn er make.

Ālkin kajjojo loļo̧k, elmakote jepta ko rejenolo̧k ak eoon ko n̄an er n̄an riiti. Elmakote kajjitōk n̄an er n̄an ļōmņak kaki ilo aer riit. Kōketak er n̄an ekkatak jeje ko rekwojarjar raan otemjej kōn er make im ippān baam̧le ko aer. Kwomaron̄ barāinwōt kajjitōk ippān membōr ro n̄an riit ippāer ikōtaan katak ko.

M̧o̧kta jān jinoin katak eo tok juon, bar etale kōn juon iien ekōnono kōn ta eo kwar kajjitōk ippān armej ro n̄an riiti. N̄e ej aikuj, jipan̄ er meļeļe im “keidi” eoon kein. Kōketak er n̄an ļo̧o̧ke ļōmņak ko im kajjitōk ko aer.

N̄e kwoj aikuj jipan̄ armej ro riit, meļeļe, im kōjerbal jeje ko rekwojarjar—eļap tata Bok in Mormon—enaaj wōr aer en̄jake ko ilo jetōb kōn naan an Anij. Renaaj maron̄ ļapļo̧k aer riit kōn er make im kōm̧m̧an bwe jeje ko rekwojarjar en juon m̧ōttan mour ko aer aorōk.

Jipan̄ Armej ro Tōpar Jeje ko Rekwojarjar

Jeje ko Rekwojarjar im naan ko an rikanaan ro remour rej pād ilo elōn̄ļo̧k wāween ko im kajin ko jān kar m̧okta. Ekkatak kōn ta eo kar je ak ilo digital rej pād n̄an aolep armej kwoj katakin. Jipan̄ armej ro tōpar jeje ko rekwojarjar ilo wāween ko me ejetjet n̄an aikuj ko aer im kōņaan ko aer. Ļōmņak kōn men kein:

Kajjitōk ippān armej ro ewi wōt kajin eo rej kōņaan riit ak ron̄jake jeje ko rekwojarjar ie.
Ro me rej epen aer riiti, ak me epen aer meļeļe ta eo rej riiti, maron̄ jeraam̧man jān kōļap aer riit ippān doon ak ron̄jake rekoot ko kar rekooti. Ewōr men kein ilo app ko an Kabun̄ in im website ko.
Eļan̄n̄e juon armej ewōr nejin digital device, jipan̄ e tōpar jeje ko rekwojarjar, eļap tata Bok in Mormon. Bok in Mormon app eo im Gospel Library eo ejjeļo̧k wōņaer im epidodo n̄an leto letak.
Eļan̄n̄e kōjerbal text, chat, ak email, jilkinļo̧k link ko ak pija ko an jeje ko rekwojarjar. N̄e katakin ilo video chat, ļōmņak in kwaļo̧k screen eo am̧ bwe kwon maron̄ riiti eoon ko ippān doon.
Jipan̄ armej ro tōpar naan ko an rikanaan ro remour.

Ekkatak eo Am̧ Make im Ippān Kampānien Eo M̧ōttam̧

Kanoj lale bwe kwe im kampānien eo m̧ōttam̧ en update kein jipan̄ ko an jeje ko rekwojarjar ilo talboon eo am̧, ekoba Bok in Mormon app eo im Gospel Library eo.

Kāālet juon iaan eoon in jeje kein rekwojarjar: taitōļ peij eo an Bok in Mormon; 3 Nopai 11; Moronai 10:3–8; Jon 17:3; Rom 8:16–17; 1Korint 15:29; Jemes 1:5; 1 Piter 3:19–20; Amos 3:7.

Kōmlet ekōjkan am̧ naaj:

Kwaļo̧k kadkad in eoon eo.
Leļo̧k bwebwenato eo im jekjek eo.
Riiti eoon eo im kōmeļeļe meļeļe eo an.
Kōmeļeļeik naan ko reppen.
Jipan̄ ro kwoj katakin er kōjerbal e ilo mour ko aer.

Ekkatak Jeje ko Rekwojarjar

Etke ej aorōk n̄an katakin jān jeje ko rekwojarjar?

Kwaļo̧k Naan in Kam̧ool eo Am̧

Naan in kam̧ool ej juon kam̧ool ilo jetōb kar lewaj jān Jetōb Kwojarjar eo. N̄an kwaļo̧k naan in kam̧ool eo am̧ ej leļo̧k juon kean̄ kōn jeļā eļem waan, kajju ak tōmak kōn juon m̧ool an gospel eo. Kwaļo̧k naan in kam̧ool eo am̧ ej kobaik kam̧ool eo am̧ make n̄an m̧ool ko kwar katakin jān jeje ko rekwojarjar.

Kwaļo̧k naan in kam̧ool eo am̧ ej juon wāween ekajoor n̄an karuwaineneiktok Jetōb eo jipan̄ jipan̄ ro jet en̄jake karaeel eo An. Juon iaan mijen ko an Jetōb Kwojarjar eo ej n̄an kam̧ool kōn Jemādwōj Ilan̄ im Jisōs Kraist. E emakijkij an kakūrm̧ool menin ilo jemjerā eo ippam̧ ilo am̧ kwaļo̧k naan in kam̧ool eo am̧

Juon naan in kam̧ool ekajoor ejjab aikuj pedped ioon wejepedik ak dettan ainikiūm̧—bōtaab ioon kareel im m̧ool eo an būruōm̧. Mejmej karuo n̄an jab kōm̧ōkaj ak an̄ļap kōn naan in kam̧ool eo am̧. Leļo̧k n̄an armej ro iien n̄an en̄jake an Jetōb Kwojarjar eo kwaļo̧k kam̧ool n̄an er bwe ta eo kwar katakin ej m̧ool.

Naan in kam̧ool eo am̧ emaron̄ in pidodo āinwōt “Jisōs Kraist ej ad Rilo̧mo̧o̧r im Ripinmuur” ak “Ikar ekkatak ippa make bwe Bok in Mormon ej m̧ool.” Kwomaron̄ barāinwōt kwaļo̧k juon en̄jake ekadu kōn ekōjkan am̧ kar bōk naan in kam̧ool in.

N̄e kwoj katakin, kwaļo̧k naan in kam̧ool eo am̧ ilo am̧ en̄jake im̧we, ejjab wōt ilo jem̧ļo̧kin. N̄e kampānien eo m̧ōttam̧ ej katakin, kwaļo̧k naan in kam̧ool eo am̧ n̄an kwalo̧k kam̧ool eo kein karuo kōn ta eo ekar katakin.

Kwaļo̧k naan in kam̧ool eo am̧ bwe pedped in katak eo kwoj katakin enaaj kōjeraam̧m̧an mour eo an armej eo eļan̄n̄e enaaj ļoore. Kwaļo̧k kōn ekōjkan an mour kōn pedped in katak eo kar kōjeraam̧m̧an mour eo am̧. Naan in kam̧ool eo am̧ em̧ool enaaj jipan̄ ejake juon mejatoto n̄an an armej ro en̄jake an Jetōb Kwojarjar eo kapen m̧ool eo.

Ekkatak Am̧ Make

Eoon in jeje kein rekwojarjar rej waanjon̄ak ko kōn kwaļo̧k naan in kam̧ool. Ļōmņak kōn kajjitōk ko ilo am̧ riiti kajjojo eoon . Ļo̧o̧ke uwaak ko am̧ ilo jōnōļ in ekkatak eo am̧.

Ilo eoon kein, ta eo Jisōs im rijilōk ro An im rikanaan ro rej kam̧ool kake?
Ekōjkan am̧ maron̄ ba bwe rej lukkuun m̧ool kōn m̧ool eo an ta eo kwoj ba?
N̄e kwoj ba, “Ijeļā bwe ej m̧ool,” ta meļeļe in am̧ ba? Ta naan ko jet kwomaron̄ kōjerbali n̄an kwaļo̧k tōmak ko am̧?

Ekkatak Jeje ko Rekwojarjar

Ta eo eoon kein rej katakin kōn pedped in katak ko im kallim̧ur ko an kwaļo̧k naan in kam̧ool?

Karōk im Ukukōt Am̧ Katakin n̄an Tōpar Aikuj ko

Kajjojo armej kwoj katakin ainjuon. Kappuōt n̄an meļeļe itok limo ko an, aikuj ko, im n̄ūrbōktak ko. Kajjitōk kajjitōk ko im kanooj ron̄jake. Men̄e kwomaron̄ jab lukkuun meļeļe aikuj ko an armej eo, keememej bwe Jemedwōj Ilan̄ emeļeļe. E enaaj tōl eok kōn Jetōb Kwojarjar.

Kōtļo̧k bwe Jetōb en Tōl Laajrak in Katak ko

Kōtļo̧k bwe Jetōb eo en tōl laajrak eo me kwoj katakin katak ko. N̄e ewōr ippam̧ meļak eo n̄an katakin katak ko ilo laajrak eo me em̧m̧an tata n̄an aikuj ko, kajjitōk ko, im jekjek ko an ro kwoj katakin.

Iien n̄an iien kwomaron̄ kobaik pedped in katak ko jān katak ko rooktak n̄an ņa mejļan aikuj ko im itok limo ko an armej eo. Lale waanjon̄ak kein jilu.

Yuki ekar lo eok online im kajjitōk etke ro m̧ōttan ilo Kabun̄ in rejjab kōbatat ak kadōk. Kwomaron̄ katakin liin kōn kōjeraam̧m̧an ko an kien ko kōn kōjerbal jekjōn kein jān jepta 3:

Samuel ekar jab en̄jake āinwōt ekar uwaan jabdewōt. Kwomaron̄ katakin bwe paotok eo an im ijo jikin ilo baam̧le eo an Anij kōj kōjerbal jekjōn kein jān jebta 3:

Tatyana ekar ekkatak elōn̄ kabun̄ ko im kōņaan jeļā ta eo ej kōm̧m̧an an Kabun̄ in oktak. Kwomaron̄ katakin liin kōn Jepļaaktok eo an gospel eo an Jisōs Kraist kōn kōjerbal jekjōn kein jān jepta 3:

Jemedwōj Ilan̄ ejeļā ajri ro Nejin, kōn menin kappukōt im̧we eo n̄an kōm̧mane jokāālet kein ilo am̧ m̧aanjappopo n̄an katakin. Jar kōn menin letok eo an kile ilo am̧ jokāālet ta eo n̄an katakin. Lelo̧k am̧ n̄an ļōmņak ko im en̄jake ko me rej iwōj n̄an eok.

Leļo̧k Iien n̄an an Armej ro Kōjerbal Ta eo Rej Ekkatak

N̄e kwoj katakin, leļo̧k iien n̄an an armej ro kōjerbal ta eo rej ekkatak (lale 3 Nipai 17:2-3). Pukōt wāween ko rejetjet n̄an rie er ilo kōjparok kallim̧ur ko aer. Lale n̄an jipan̄ er kōn jerbal ko me renaaj kalōk juon pedped in tōmak, ko āinwōt jar, riit, im etal n̄an jar. Menin enaaj kōmaron̄ er n̄an kōjparok dam̧oļo̧k in kallim̧ur ko.

Ilo am̧ karōk im katakin, mejmej karuo kōn ewi jon̄an lōn̄ in meļeļe ko rekāāl kwoj kwaļo̧k. Jibadbad eo aorōk kōn am̧ katakin ej n̄an jipan̄ juon armej kalōk tōmak ilo Jisōs Kraist bwe en tōlļo̧k n̄an uwkeļo̧k. Jibadbad eo am̧ ejjab n̄an lo ewi jon̄an meļeļe eo kwomaron̄ leļo̧k.

Katakin ilo juon jon̄an eo me ejetjet n̄an armej eo. Kajjitōk kajjitōk ko im kanooj ron̄jake bwe kwon meļeļe ewi jon̄an em̧m̧an in an ekkatak im kōjerbal ta eo kwoj katakin.

M̧ool ko kwoj katakin, koba ippān kajoor eo an Jetōb Kwojarjar, maron̄ kareel armej ro n̄an kōjerbal anemkwoj in kāālet eo aer ilo wāween ko me rej kalōk tōmak eo aer ilo Kraist. Ilo aer kōjerbal tōmak ilo Irooj kōj kōjerbal ta eo rej ekkatak, renaaj itok n̄an jeļā jān Jetōb eo bwe gospel eo ej m̧ool.

Kōjerbal Bōjin in Iien ko Rem̧m̧an an Katakin

Iien ko rem̧m̧an n̄an katakin remaron̄ bōk elōn̄ ļamļam ko, ko āinwōt loļo̧k ko ilo kanem armej, bwebwenato ko ilo video, kōnono ko ilo talboon, jeje ilo talboon, im social media.

Kautiej Iien eo an Armej ro

Kōm̧m̧an bwe katakin eo am̧ en ļam waan im kadu. Armej ro remaron̄ kōņaan ioon kwe eļan̄n̄e kwoj kautiej iien eo aer im kajjitōk ko. Kajjitōk ewi aitokan iien loļo̧k eo ippāer. Ijjino im kōjem̧ļo̧k jabdewōt iien bwebwenato ilo iien eo errā kake, men̄e katakin ilo likio in armej ak online. Mejmejkaruo bwe ilo jet jikin ko, kōnono ko ilo talboon ak bwebwenato ko ilo vidoe remaron̄ in ļap wōņāer.

Kwonaaj aikuji elōn̄ kweilo̧k ko n̄an katakin pedped in katak ko ilo juon katak. Ekkā wōt an juon iien katakin aikuj in jab aitokļo̧k jān 30 minit ko, im kwomaron̄ katakin juon armej jon̄an kadu in 5 minit. Ukukōt katakin eo am̧ ekkar n̄an iien eo an armej ro.

Kōjerbal Technology Ilo Jim̧we

Elōn̄ am̧ iien ko rem̧m̧an n̄an katakin armej ro kōjerbal technology. Jet armej rej kōņaan ioon doon ko ilo iien em̧m̧an ak ittiņo kōn wāween ko an electronic. Jekdo̧o̧n armej ro kwoj loļo̧k ilo kanem armej remaron̄ jeraam̧m̧an jān elōn̄ļo̧k jipan̄ kōn technology. Ekōnono kōn kein jipan̄ ko repād n̄an kōnono. Innān bar etale im ekkejel wōt. Kōtļo̧k bwe kōņaan ko an kajjojo armej n̄an tōl iaio ko ami.

Technology ko āinwōt kōnono ko ilo video remaron̄ kanooj jipan̄ n̄an katakin armej ro me epoub jikejuuļ ko aer ak rej jokwe ettoļo̧k. Jet iien epidodoļo̧k n̄an membōr ro n̄an bōk kuņaer ilo juon katak kōn technology.

Jipan̄ Rikkatak ro Reddikļo̧k

Ilo tōre in jerbal in karejar eo an Rilo̧mo̧o̧r, E ekar jiron̄ rikaļoor ro An, “Kom̧win jab likūt ajri raņ bwe ren itok n̄an ippa, Kom̧win jab bōbrae er; bwe ro āierwōt, aer aelōn̄ in Anij” (Mark 10:14). N̄e kwoj katakin ajri ro, ukōt jekjek eo am̧ im ennaan eo n̄an tōpar aikuj ko aer. Jipan̄ er ekkatak gospel eo kōn ekōnono kōn men ko me reminene kaki. Kanooj lale bwe rej meļeļe ta eo kwoj katakin.

Ekkatak Jeje ko Rekwojarjar

Riiti Katak Im Bujen Ko 84:85. Ta meļeļe in n̄an leļo̧k “m̧ōttan eo naaj jon̄e n̄an armej otemjej”? Ekōjkan am̧ maron̄ kōjerbal menin ilo am̧ katakin?

Ta eo Irooj ekar kallim̧uri mijenede ro retiljek n̄an jeļā ta eo n̄an ba?

Katakin ippān Kampānien Eo M̧ōttam̧ ilo Bōro Kuk

Irooej ekar ba, “kom̧ naaj ilo̧k ilo kajoor eo an Jetōb eo Aō, kwaļo̧k naan kōn gospel eo Aō, ruo ilo̧k ruo” (Katak im Bujen Ko 42:6). E ej barāinwōt kappeik eo im eo m̧ōttam̧ n̄an “kom̧in juon” (Katak im Bujen Ko 38:27). Am katakin enaaj kajoorļo̧k im kaitoktok limo eļan̄n̄e kwe im kampānien eo m̧ōttam̧ ej jerbal ilo bōro kuk. Take doon ilo kwaļo̧k jidik in katak ko.

Ilo iien ekkatak amiro eo m̧ōttam̧, ekōnono kōn im kōmālmel ekōjkan amiro naaj katakin bwe kom̧ro en maron̄ juon wōt. Kōpooj ekōjkan amiro naaj jerbal ippān doon n̄e katakin armej ro ilo online. Ļoor kōjparok kilen kōjerbal technology, kōllaajrake ilo jebta 2.

N̄e kampānien eo m̧ōttam̧ ej katakin, jar kōn, ron̄jake, im kalimjōke. Rie eo m̧ōttam̧ kōn kwaļo̧k kam̧ool eo kein karuo kōn m̧ool ekar katakin (lale Alma 12:1). Ļoor im̧we ko am̧ n̄e Jetōb ej kōm̧akūt eo n̄an ba juon men.

Kwaļo̧k am̧ lukkuun itok limo ilo armej ro kwoj katakin. Ron̄jake er. Dāpij wōt am̧ lale ļo̧k er n̄e rej kōnono ak n̄e kwoj kōnono. Mejmejkaruo am̧ lali uwaak ko aer, im ron̄jake im̧we ko ilo jetōb.

Kajjitōk Ippān Membōr ro n̄an Bōk Koņaer

Kajjitōk ippān membōr ro n̄an jipan̄ eok katakin im rie armejro kwoj jerbal ippāer. Menin emaron̄ kōm̧m̧an ilo likio in armej ak ilo intōrnet. Ilo kweilo̧k in kōtōbalbal eo wiik otemjeļo̧k, kapilōk ippān ritōl ro an ward eo kōn wōn eo emaron̄ jipan̄.

N̄e membōr ro rej bōk koņaer ilo katakin im jemjerā, remaron̄ kobaiktok kōļmenļo̧kjeņ ko im kōm̧m̧ani ekkejel ko āinwōt ro m̧ōttan. Renaaj en̄jake lan̄lōn̄ eo an jerbal in mijenede.

Kajjitōk Ippān Membōr ro n̄an Jipan̄ Eok Katakin

M̧okta jān katak ko, pepe ippān membōr ro ekōjkan jerbal ippān doon. Kwomaron̄ kōjerbal jeje ilo talboon ak kōnono ilo talboon n̄an kapen ta eo kom̧ro naaj katakin, wōn eo enaaj jar, wōn eo enaaj tōl iien bwebwenato eo, im meļeļe ko jet.

Jerbal eo eļap tata an membōr eo ilo katak eo ej n̄an kwaļo̧k naan in kam̧ool, ilo tukadu in kwaļo̧k en̄jake ko an make, im ejake juon jemjerā ippān ro kar katakin er. Kwomaron̄ kajjitōk ippān membōr ro n̄an kwaļo̧k ekōjkan aer kar maron̄ ekkatak, bōk, im mour kōn juon baj pedped in katak ilo katak eo. Eļan̄n̄e rej rioktak, kajjitōk ippāer n̄an kwaļo̧k ekōjkan aer kar kāālet n̄an kobatok ilo Kabun̄ in.

N̄e membōr ro rej lewaj juon armej, kajjitōk ippāer n̄an bōk koņaer ilo katakin. Membōr ro emaron̄ ļapļo̧k aer bōk koņaer ilo jekjek kein. Kapilōk ippāer ekōjkan aer kōņaan bōk koņaer.

Ļōmņak kōn ekōjkan kōjerbal technology n̄an katakin ippān membōr ro maron̄ in jetjet. Technology ej kōtļo̧k an membōr ro koba ippa ippam̧ ilo an ejjeļo̧k iien kallim̧ur kake me ejjab āinwōt ilo loļo̧k ilo kanem armej ej aikuji.

Ilo kweilo̧k in kōtōbalbal eo wiik otemjeļo̧k, karōk ippān ritōl ro an ward n̄an kōm̧man bwe juon membōr en bōk koņaan jon̄an lōn̄ in wōt katak ko n̄e emaron̄ (lale jebta 13). Ļōmņak in kajjitōk ippān membōr ro rekāāl n̄an jipan̄ eok katakin.

Ekkatak eo Am̧ Make im Ippān Kampānien Eo M̧ōttam̧

Pijaikļo̧k ke ewōr juon am̧ iien katakin juon katak n̄an juon baam̧le ilo m̧ōn juon membōr. Ekōnono kōn ekōjkan am̧ naaj kar kōm̧m̧an bwe kajjojo membōr rein ren bōk koņaer ilo jipan̄ eok katakin:

Juon mijenede an ward eo ej kab ro̧o̧l jān juon mijen edipio.
Juon pris
Juon membōr kāāl.
Būreejtōn an doulul eo an elder ro im Doulul eo an Kōrā

Kajjitōk Ippān Membōr ro n̄an Lewaj Jipan̄

Membōr ro remaron̄ barāinwōt leļo̧k jipan̄ eo aorōk n̄an armej ro ikōtaan iien loļo̧k in katain ko. Remaron̄ jejeļo̧k (text), riiti jeje ko rekwojarjar ippān doon, karuwaineneik armej ro n̄an im̧ōk im̧weer ak n̄an m̧akūtkūt ko, ak karuwaineneik er n̄an jijet ippāer ilo jar. Remaron̄ barāinwōt uwaaki kajjitōk ko aer im kwaļo̧k ewi wāween mour ko aer āinwōt membōr in Kabun̄ in. En̄jake eo aer kōn mour im kōļmenļo̧kjeņ maron̄ jipan̄ er keidi ippān armej ro ilo wāween ko me jet iien relukkuun oktak jān ekōjkan an mijenede ko keidi.

Kapilōk ippān membōr ro kōn wāween ko kwomaron̄ jerbal ippān doon n̄an jipan̄ armej ro ejjab ilo iien loļo̧k in katakin ko.

Katakin n̄an Meļeļe

Katak in gospel eo an Jisōs Kraist bwe armej ro ren meļeļe kake. Ekkatak jeje ko rekowjarjar im katak ko bwe kwon maron̄ katakin ilo alikkar jān er. An alikkarļo̧k am̧ katakin, iien eo em̧m̧anļo̧k n̄an an Jetōb Kwojarjar eo kam̧ool kōn m̧ool eo.

Kajjitōk kajjitōk ko n̄an jipan̄ armej ro ļōmņak kōn ta eo kwar katakin. Innām ron̄jake n̄an lo eļan̄n̄e rej meļeļe im bōke.

M̧ōttam̧ eo an katakin n̄an meļeļe ej n̄an kōmeļeļeik naan ko, eoon ko, im ļōmņak ko. Kwomaron̄ kōkōm̧anm̧anļo̧k maron̄ eo am̧ n̄an katakin gospel eo kōn:

Meļeļe kōn naan ko kwoj kōjerbali.
Kwaļo̧k meļeļe in naan ko me ro jet remaron̄ jab meļeļe.
Kajjitōk ippān armej ro kajjitōk ko āinwōt “Kwomaron̄ ke kwaļo̧k ippām meļeļe eo am̧ kōn ta eo kōm kar kōmeļeļeik?” ak “Kwoj mōņōņō ke in ba ilo tukadu in ta eo jekar kōnono kake?”

Ilo am̧ katakin katak eo ilo jebta 3, je jabdewōt naan ko, eoon ko, im ļōmņak ko me armej ro remaron̄ in jab meļeļe. Kōmeļeļe men kein kōn kōjerbal kein jipan̄ ko ilo Gospel Library eo, ko āinwōt Unin Tōl eo n̄an Jeje ko Rekwōjarjar, the Bible Dictionary, im Gospel Topics.

Kōm̧m̧an bwe katakin eo am̧ en ļam waan im kadu. Pedpede wōt ioon gospel eo an Jisōs Kraist, kalōk meļeļe eo kōn katak eo im pedped in katak ko jinoin tata. Jipan̄ armej ro kappukōt meļeļe eo me ej itok jān Jetōb Kwojarjar. Ilo am̧ bōk meļeļe in, renaaj itok n̄an tōmak ennaan eo an gospel eo.

Ekkatak Jeje ko Rekwojarjar

Etke jej aikuj kōmeļeļeik katak eo?

Ekōjkan ad ekkatak? Etke eaorōk n̄an katakin meļeļe jidik kōn jidik?

Etke pidodo eaorōk?

Etke jemaron̄ ekkatak jān eoon kein ekōjkan an Anij kōnono ippān ajri ro Nejin?

Kajjitōk kajjitōk ko

Rilo̧mo̧o̧r eo ekar kajjitōk kajjitōk ko me rekar karuwainenetok armej ro n̄an buuļ ļōmņak kōn m̧ool ko E ekar katakin. Kajjitōk ko an rekar im̧we jetōb eo n̄an kappukōt im kallim̧ur.

Kajjitōk ko rem̧m̧an rej barāinwōt aorōk ilo katakin eo am̧. Renaaj jipan̄ eok meļeļe kōn itok limo ko, inepata ko, im kajjitōk ko aer. Kajjitōk ko rem̧m̧an remaron̄ karuwaineneiktok Jetōb im jipan̄ armej ekkatak.

Kajjitōk Kajjitōk ko Reim̧we

Kappukōt tōl eo an Jetōb ilo kajjitōk kajjitōk ko rem̧m̧an. Kajjitōk ko rejim̧we ilo iien ko rejetjet maron̄ jipan̄ armej ro ekkatak gospel eo im en̄jake Jetōb.

Kajjitōk ko reim̧we im m̧ool ilo ron̄jake naaj jipan̄ armej ro ļapļo̧k aer ineem̧man jab idādiki aer ekōnono im kwaļo̧k en̄jake ko aer. Menin emaron̄ jipan̄ er lo juon naan in kam̧ool ej eddōkļo̧k. Enaaj barāinwōt ļapļo̧k aer ineem̧m̧an ilo kajjitōk kajjitōk ko n̄e rejjab meļeļe juon men ak ewōr juon aer n̄ūrbōktak.

Tebōļ in ej kwaļo̧k jet pedped in katak ko kōn kajjitōk kajjitōk ko reim̧we, ippānļo̧k jet waanjon̄ak ko.

Pedped In Katak ko im Waanjon̄ak ko kōn Kajjitōk ko Reim̧we

Pedped in Katak ko	Waanjon̄ok ko
Kajjitōk kajjitōk ko me rej jipan̄ armej ro en̄jake Jetōb.	Kwomaron̄ ke kwaļo̧k juon en̄jake ke kwar en̄jake kareel eo an Anij ilo mour eo am̧? Kwonan̄in ke kar en̄jake iakwe eo an Anij n̄an kwe?
Kajjitōk kajjitōk ko me reļem waan im pidodo n̄an meļeļe.	Ta eo kwar ekkatak kake kōn Jisōs Kraist jān eoon in?
Kajjitōk kajjjitōk ko me rej jipan̄ armej ro ļōmņak kōn ta eo kwoj katakin.	Ekōjkan an mein ainļo̧k wōt ta eo ekadede am̧ tōmak e? Ewi wāween an oktak?
Kajjitōk kajjitōk ko me rej jipan̄ eok jeļā ewi jon̄an am̧ meļeļe armej ro ta eo kwoj katakin.	Ta kajjitōk ko ewōr ippam̧ kōn ta eo jaar katak kake rainin? Ekōjkan am̧ naaj kar kwaļo̧k ilo tukadu in bwebwenato eo ad rainin?
Kajjitōk kajjitōk ko me rej jipan̄ armej ro kwaļo̧k ta eo rej en̄jake.	Ekōjkan an Jisōs Kraist kar jipan̄ eok ilo mour eo am̧? Kar ta men eo aorōk tata n̄an kwe jān ta eo jekar kōnono kake rainin?
Kajjitōk kajjitōk kok me rej kwaļo̧k iakwe im n̄ūrbōktak.	Ekōjkan am maron̄ jipan̄ eok?
Kajjitōk kajjitōk ko me rej jipan̄ armej ro kōjerbal ta eo rej ekkatak.	Ta eo jemaron̄ ekkatak kake jān eoon in? Ekōjkan an eoon in jipan̄ eok ilo mour eo am̧? Ilo ad kar kōnono, ta eo kwar en̄jake eim̧we n̄an kōm̧mane jān ta eo kwar ekkatak?

Ekkatak Ippān Kampānien Eo M̧ōttam̧

Etale karōk in katak eo amiro jān juon katak m̧oktaļo̧k kom̧ro kar katakin. Je juon kajjitōk n̄an kajjojo pedped in katak ko raorōk tata kar kōllaajrake ilo karōk eo amiro.

Etale kajjitōk ko amrio n̄an lale eļan̄n̄e rej jokkun wōt juon ippān pedped in katak ko ilo jekjōk in.

Eo tok juon, uwaake kajjojo kajjitōk ko āinwōt n̄e kom̧ro kar juon eo kar katakin.

Kwaļo̧k kajjitōk ko am̧ ippān eo m̧ōttam̧. Ippān doon, etale im kōkōm̧anm̧anļo̧k kajjitōk ko amiro.

Ekkatak an juon make im an Kam̧pānien

Armej ro kom̧ro ej katakin remaron̄ in ioonen̄jake kein rej ellaajrak:

Ewōr kadede juon aer en̄jake ilo jetōb ilo aer kar riiti Bok in Mormon.
Rijerbal ro m̧ōttaer emakijkij aer kōm̧m̧an kōjak kōn men ko an jetōb.
Ro uwaan baam̧le eo aer rekajoor ilo bar juon kabun̄.
Ro m̧ōttaer rej tōm bwe “Mormon ro” rejjab Rikūrijin.

Ļōmņak kōn juon kajjitōk kwonaaj kajjitōk n̄an ekkatak eļapļo̧k kōn kajjojo jekjek kein. Je uwaak kein ilo jōnōļ in ekkatak eo am̧ Ekōnono ippān eo m̧ōttam̧ ekōjkan amiro maron̄ kōkōm̧anm̧anļo̧k kajjitōk ko kwar je.

Joļo̧k Kajjitōk ko Rejjab Kobbā im Rejekkar

Kajjieon̄ jab kajjitōk kajjitōk me:

Ealikkar uwaak ko.
Maron̄ kajook juon eļan̄n̄e ejjab jeļā uwaak eo.
Ekoba elōn̄ļo̧k jān juon aitia.
Iookļo̧k katak eo kwojjan̄in de kar katakin.
En ejjeļo̧k juon kōttōpar alikkar.
Rejekkar.
Rej ļōbat ak maron̄ kakūtōtō im kōmetak armej ro.

Laajrak in rej waanjon̄ak ko kōn kajjitōk ko edik aer kobbā:

Wōn kar rikanaan eo m̧oktata? (Armej eo emaron̄ jab jeļā uwaak eo.)
Ekōjkan an kōjparok ānbwin ko ad eddeo jipan̄ kōj bōk Jetōb eo im kwaļo̧k me jej m̧ōņōņō in ļoor juon rikanaan an Anij? (Elōn̄ļo̧k jān juon aitia.)
Ej ke aorōk n̄an jeļā kōn kien ko an Anij? (Menin ej juon aaet ak jaab kajjitōk, im uwaak eo ej alikkar.)
Ta juon men eo jemaron̄ kōm̧m̧an aolep raan me enaaj jipan̄ kōj en̄jake ad epaakeļo̧k Anij? (Menin ej juon kajjitōk ejalikkar ej pukōt juon uwaan ainjuon: jar.)
Wōn rikanaan eo kar ālikin Noa? (Armej eo emaron̄ in jab jeļā uwaak eo, im kajjitōk eo ejjab aorōk n̄an ennaan eo am̧.)
Kwoj ke meļeļe ta eo ij ba? (Armej eo emaron̄ en̄jake āinwōt kwoj kōnono in kōttāer e.)

Ekkatak an juon make im an Kam̧pānien

Ļōmņak kōn aikuj ko an juon eo kwoj katakin. Ekōnono kōn ekōjkan an maron̄ uwaaki kajjitōk ko am̧. Karōk jet kajjitōk ko n̄an kajjitōk me ej ļoor unin tōl ko ilo jekjōk in. Ekōnono kōn ekōjkan an kajjitōk kein maron̄ karuwaineneiktok Jetōb eo im jipan̄ armej eo ekkatak gosepl eo.

Ron̄jake

N̄e kwoj lukkuun ron̄jake ro jet, em̧m̧anļo̧k am̧ meļeļe kōn er. N̄e kwojeļā bwe ļōmņak ko im en̄jake ko aer rej aorōk n̄an kwe, eļapļo̧k aer maron̄ bōk katak ko am̧, kwaļo̧k en̄jake ko aer make, im kōm̧

Ilo am̧ ron̄jake, kwoaaj bōk kōļmenļo̧kjeņ ko kōn ekōjkan ukukōt katakin eo am̧ n̄an aikuj ko im itok ko aer. Enaaj wōr juon am̧ meļeļe em̧m̧anļo̧k kōn ewi wōt m̧ool ko an gospel eo enaaj kanooj ļap an kōjeraam̧m̧an er.

Eļap tata ron̄jake unoojdikdik ko an Jetōb. N̄e ro jet rej kwaļo̧k en̄jake ko aer, Jetōb Kwojarjar eo emaron̄ im̧we eok kōn ļōmņak ko ak aitia ko. Jetōb eo emaron̄ barāniwōt jipan̄ eok meļeļe ta eo ro jet rej kajjieon̄ kwaļo̧k.

Ron̄jake ilo Lukkuun Kea

Ron̄jake ebōk kijejeto im lukkuun kea. Ilo an ro jet kōnono, kanooj lale bwe kwon wujlepļo̧k ilo ta eo rej ba. Joļo̧k ļōmņak eo n̄an karōk ta eo kwonaaj ba.

Elder Jeffrey R. Holland ekar katain: “Eļapļo̧k jān kōnono ej ron̄jake. Armej rein rejjab men ko ejjeļo̧k tokjāer rej ukōt m̧arer āinwōt juon bōnbōn in ripeptaij. … Kajjitōk ippān rein m̧ōttad ta eo aorōk tata n̄an er. Ta eo rej kaorōke, im ta eo rej kōm̧m̧an aorōk n̄an er? Innām ron̄jake. Eļan̄n̄e ejetjet jekjek eo kwomaron̄ kajjitōk ta men ko rej kamijak er, ta eo rej kōņaan, ak ta eo rej en̄jake ejako ilo mour ko aer. Ij kallim̧uri eok bwe juon men ilo ta eo renaaj ba iien otemjeje enaaj kalikkar juon m̧ool an gospel eo me kwomaron̄ kwaļo̧k am̧ naan in kam̧ool kake im kōn ewi wōt eo kwomaron̄ leļo̧k eļapļo̧k. … Eļan̄n̄e jej ron̄jake kōn iakwe, jeban aikuj ļōmņake ta eo jenaaj ba. Naaj letok n̄an kōj—jān Jetōb eo im jān ro m̧ōttad” (“Witnesses unto Me,” Ensign, May 2001, 15).

Etale Ennaan ko Jab Kōnono kaki

Armej ro rej barāinwōt kōnono kōn kajin eo an ānbwinier. Kile wāween aer jijet, paotok ko an turin mājeer, ta eo rej kōm̧m̧an kōn peier, toņ eo an ainikier, im ia eo rej reilo̧k n̄an e. Etale ennaan kein jab kōnono kaki emaron̄ jipan̄ eok meļeļe en̄jake ko an ro kwoj katakin er.

Barāinwōt ekkōl kōn kajin eo an ānbwinūm̧ make. Kwaļo̧k juon ennaan in itok limo im lo̧udin̄din̄ kōn ron̄jake ilo m̧ool.

Leļo̧k n̄an Armej ro Iien n̄an Ļōmņak im Uwaak

Rilo̧mo̧o̧r eo ekkā an kōn kajjitōk kajjitōk ko me ekar aikuj iien n̄an an armej ro uwaak. N̄e kwoj kajjitōk juon kajjitōk, bōjrak n̄an leļo̧k n̄an armej eo iien n̄an ļōmņak im uwaak. Jab mijak in ikōn̄. Armej ekkā aer aikuj iien n̄an ļōmņak kōn im uwaake kajjitōk ko ak n̄an kwaļo̧k ta eo rej en̄jake.

Kwomaron̄ bōjrak ālkin juon kajjitōk, ālkin kwaļo̧k juon en̄jake ilo jetōb, ak n̄e epen an armej ro kwaļo̧k ta eo ilo er. Kanooj lale bwe kwon leļo̧k n̄an er iien n̄an kadedeļo̧k ļōmņak ko aer m̧okta jān am̧ uwaak. Jab kōm̧m̧an kabbōjrak ilo aer kōnono.

Uwaak ilo Meļeļe

N̄e juon armej ej uwaake juon kajjitōk, jino uwaak eo am̧ kōn kwaļo̧k am̧ meļeļe eļan̄n̄e ekkar. Meļeļe ej kwaļo̧k bwe kwoj m̧ool in kea. Bōjrak jān kwaļo̧k jem̧ļo̧k eok, m̧ōkaj in kwaļo̧k uwaak ko, ak etan ke ewōr ippām aolep uwaak ko.

Kalikkar Bwe Kwoj Meļeļe Ta eo Armej eo Ba

N̄e kappukōt n̄an meļeļe ta eo juon armej ej ba, kajjitōk n̄an kanooj jeļā bwe kwoj meļeļe. N̄an waajon̄ak, kwomaron̄ kajjitōk, “Ekwe ta eo kwoj ba ej . Ejim̧we ke?” ak “Eļan̄n̄e ejim̧we aō meļeļe, kwoj en̄jake bwe .” N̄e kwojjab kanooj jeļā eļan̄n̄e kwoj meļeļe, kajjitōk ippān armej eo n̄an kalikkare.

Kōtōbalbal Iaio ko Reppen

Kwonaaj jipan̄ armej ro eļap tata n̄an katakin er gospel eo an Jisōs Kraist. Jet armej remaron̄ kōņaan kōm̧m̧an elōn̄ wōt iaan ekōnono ko. Jet iien armej rej aikuji juon eo n̄an ron̄jake ilo meanwōd n̄an apan̄ ko im en̄jake ko aer. Ro jet remaron̄ kappukōt n̄an bōk ļap ak iakweelel.

Ekkatak n̄an jeļā meļlan kain jekjek rōt in ilo lo̧ļe im kōn iakwe. Kwomaron̄ in ukukōt am̧ katakin n̄an ņa meļļan juon men armej eo ekar kwaļo̧k. Ak kwomaron̄ aikuj in jouj im ba bwe kwon kōņaan ekōnono kōn n̄ūrbōktak eo aer ilo bar juon iien. Jetōb eo emaron̄ jipan̄ eok n̄an jeļā ekōjkan uwaak ilo jekjek ko reppen.

Jipan̄ Armej ro En̄jake Aenōm̧m̧an Kwaļo̧k En̄jake ko Rem̧ool

N̄an joļo̧k kajookok, jet armej renaaj uwaaki kajjitōk ko ilo wāween eo rej ļōmņak kwon kōņaan bwe ren uwaak ijello̧kin kwaļo̧k en̄jak ko aer rem̧ool. Kappukōt n̄an ejake juon jemjerā eo me ej kōm̧m̧an bwe ren ineem̧m̧an kwaļo̧k en̄jake ko aer rem̧ool ippam̧.

Meļeļe im ekkejel ippān armej ro enaaj kōm̧m̧an bwe kwon jipan̄ er, ņa meļļan itok limo ko im aikuj ko aer, im kwaļo̧k iakwe eo an Rilo̧mo̧o̧r n̄an er. Ejake juon jemjerā in lōke kōn m̧ool n̄an er, dāpij wōt jemjerā in mijenede eo ejetjet, im kwaļo̧k kautiej.

Ekkatak an juon make im an Kam̧pānien

Kejekļo̧kjeņ kōn ewi em̧m̧an in amiro ron̄jake doon. Je uwaak ko am̧ ilo jōnōļ in ekkatak eo am n̄an kajjitōk ko itulaļ. Ak ekōnono kaki ippān eo m̧ōttam̧.

A = Ejjab m̧ool kōn n̄a, B = Jet iien em̧ool kōn n̄a, C = Ekkān an m̧ool kōn n̄a, D = Aolep iien em̧ool kōn n̄a

N̄e ro jet rej kōnono n̄an n̄a, ij ļōmņak kōn ejja kain en̄jake rōt kin wōt imaron̄ kwaļo̧k ijello̧kin kanooj ron̄jake.
N̄e ro jet rej jiron̄ eō kōn en̄jake ko aer, ij kajjieon̄ door eō make ilo jekjek eo aer n̄an lo ekōjkan aō en̄jake.
N̄e ij katakin armej ro, ij ļōmņak kōn ta eo inaaj ba ak katakin tok ālik.
Ij inepata n̄e armej eļap aer kōnono.
Ij kakkōt n̄an ļoor ak meļeļe ta eo ro jet rej kajjieon̄ jiron̄ eō.
Ļōmņak eo aō ekkā an ļōmņak ilo an kampānien eo m̧ōtta katakin.
Ij illu eļan̄n̄e juon ej kōnono n̄an n̄a im ro jet rej kejoon eō ak kōm̧ad aō.
Ij bōk im̧we ko ilo jetōb n̄an ba ak kōm̧m̧ane juon men, bōtaab ij kowaan er.

Jipan̄ Armej ro Lo Uwaak ko n̄an Kajjitōk ko im N̄ūrbōktak ko Aer

Kōm̧m̧ane juon kijejeto em̧ool n̄an uwaaki kajjitōk ko an armej ro im jipan̄ er ņa mejļan n̄ūrbōktak ko aer. Ijo ke, ejjab am̧ eddo n̄an uwaake aolep kajjitōk. Āliktata, armej ro rej aikuj ņa mejļan kajjitōk ko im n̄ūrbōktak ko aer kōn er make.

Kile bwe ejjab aolep kajjitōk ko im n̄ūrbōktak ko maron̄ in lukkuuk uwaaki. Jet uwaak ko rej erom alikkarļo̧k ilo iien ko. Ko jet rejjan̄in waļo̧k. Kalimjōk wōt kalōk juon pedped epen an m̧ool ko im̧aan tata, raorōk an gospel eo. Pedped in enaaj jipan̄ eok im ro kwoj katakin er bun̄ m̧aanļo̧k kōn kijenmej im tōmak n̄e ewōr kajjitōk rejjab uwaak ak eppen.

Jet pedped in katak ko n̄an uwaaki kajjitōk ko rej ellaajrak ilo jekjōk in.

Meļeļe N̄ūrbōktak eo

Jet iaan ta eo kwoj katakin armej ro emaron̄ in pen ak jab jeļā kaki n̄an er. Eļan̄n̄e armej ewōr aer kajjitōk ko ak n̄ūrbōktak ko, m̧oktata en alikkar am̧ meļeļe kaki. Jet iien n̄ūrbōktak ko an armej ro rej āinwōt juon iceberg. Jidik in wōt ej jādmatmat ilōn̄ in aijet. N̄ūrbōktak kein remaron̄ in kapokpok. Jar kōn menin letok eo an jeļā, im ļoor Jetōb eo n̄an ekōjkan am̧ ņa mejļan. Jemedwōj Ilan̄ ejeļā bōro ko im en̄jake ko an aolep armej (dipio in iceberg eo). E enaaj jipan̄ eok jeļā ta eo em̧m̧an tata n̄an kajjojo armej.

Emakijkij an n̄ūrbōktak ko eļapļo̧k wōt aer kōn iaio jān katak. N̄an waanjon̄ak, jet armej remaron̄ mijak kōn jum̧ae jān ro uwaan baam̧le eo eļan̄n̄e rej kobatok ilo Kabun̄ in. Ak remaron̄ mijak kōn aer jab m̧ōņōņō ippāer jān ro ro m̧ōttaer ilo jerbal.

Kappukōt n̄an meļeļe un eo an n̄ūrbōktak eo kōn kajjitōk kajjitōk ko im ron̄jake. N̄ūrbōktak eo eo ekar ke waļo̧k kōnke armej eo ekar jab bōk juon kapen ilo jetōb kōn m̧ool eo an Jepļaaktok eo? Ekar ke jarjar kōnke armej eo ejjab kōņaan kallim̧ur n̄an mour kōn juon pedped in katak an gospel eo? Jeļā unleplep in n̄ūrbōktak eo aer enaaj jipan̄ eok jeļā eļan̄n̄e n̄an pedped ioon naan in kam̧ool ak kallim̧ur.

Kōjerbal Jeje ko Rekwojarjar, Eļaptata Bok in Mormon, n̄an Jipan̄ Uwaaki Kajjitōk ko

Kwaļo̧k n̄an armej ro ekōjkan an m̧ool ko ilo jeje ko rekwojarjar maron̄ jipan̄ uwaaki kajjitōk ko aer im ņa mejļan n̄ūrbōktak ko aer. (Lale “Bok in Mormon ej Uwaaki Kajjitōk ko an Jetōb eo” ilo jebta 5.) N̄e armej ro rej kappukōt im̧we kōn ekkatak im kōjerbal jeje ko rekwojarjar, renaaj kōļapļo̧k maron̄ eo aer n̄an ron̄jake im ļoor Irooj. Tōmak eo aer ilo E enaaj ļapļo̧k. Kōn an ļapļo̧k tōmak naaj ļapļo̧k naan in kam̧ool, ukweļo̧k, im kain̄i eo an peptaij.

“Jet iien ij ilo̧k n̄an jeje ko rekwojarjar n̄an katak eo. Jet iien ij etal n̄an jeje ko rekwojarjar n̄an naan in kōmeļeļe. Ij ilo̧k kōn juon kajjitōk, im uwaak eo ekkā an ‘Ta eo Anij enaaj kar kōm̧m̧an bwe in kōm̧m̧ane?’ ak ‘Ta eo E naaj kar kōm̧m̧an bwe in en̄jake?’ Iien otemjej ij lo aitia ko rekāāl, ļōmņak ko ijjan̄in kar būki m̧okta, im ij bōk im̧we im naan in kōmeļeļe n̄an uwaaki kajjitōk ko aō” (Henry B. Eyring, in “A Discussion on Scripture Study,” Ensign, July 2005, 22).

Emaron̄ in jipan̄ n̄an kōmeļeļeik bwe meļeļe eo ad kōn gospel eo an Jisōs Kraist ej itok jān ta eo kar kwaļo̧k n̄an Rikanaan Josep Smith im ro me raar bōk jikin. Kajjitōk ko kōn tarlep in m̧ool eo an gospel eo maron̄ in ņa mejļan kōn bōk juon naan in kam̧ool bwe Josep Smith ekar juon rikanaan an Anij. Riit im jar kōn Bok in Mormon ej juon wāween aorōk n̄an bōk naan in kam̧ool in.

Jipan̄ armej ro pedped ioon kōkajoorļo̧k tōmak eo aer ilo Jisōs Kraist. Riiti im jar kōn Bok in Mormon ej juon wāween aorōk n̄an kōkajoorļo̧k tōmak eo aer.

Kajjitōk Ippān Armej ro n̄an Jerbal ilo Tōmak

Ilo an armej ro ejake im kōkajoorļo̧k naan in kam̧ool eo aer kōn gospel eo kōjepļaaktok, renaaj maron̄ in uwaaki kajjitōk ko aer im n̄ūrbōktak ko jān juon pedped in tōmak. Ilo aer jerbal ilo tōmak ioon m̧ool kok rej tōmak, renaaj maron̄ in bōk naan in kam̧ool ko kōn m̧ool ko jet an gospel eo.

Jet wāween n̄an jerbal ilo tōmak ekoba:

Kōmakijkij jar im kōn lukkuun kōttōpar n̄an im̧we tōl.
Ekkatak jeje ko rekwojarjar, eļap tata Bok in Mormon.
Etal n̄an jar.

Ekkatak Ippān Kampānien Eo M̧ōttam̧

Kāālet juon kūr n̄an leļo̧k n̄e kwoj katakin juon katak. Innām kile n̄ūrbōktak eo me emaron̄ in dāpij juon jān bōk kūr eo ak kōjparok kallim̧ur eo. Ekōnono im kōmālmel ekōjkan am̧ maron̄ jipan̄ armej ro jerbal n̄an ņa mejļan n̄ūrbōktak ko aer.

Ekkatak an juon make im an Kam̧pānien

Ilo jōnōļ in ekkatak eo am̧, je ekōjkan am̧ naaj kar kōnono kōn Josep Smith im Bok in Mormon n̄an uwaake n̄ūrbōktak kein:

“Ijjab tōmak bwe Anij ej kōnono n̄an armej ļo̧k wōt n̄an jidik.”
“Ij tōmak bwe imaron̄ kabun̄-jar n̄an Anij ilo wāween eo aō make ijello̧kin etal n̄an im̧ōn jar ko kar kajutaki.”
“Etke ij aikuj joļo̧k aō idaak wain ippān m̧ōn̄a ko kijō eļan̄n̄e ij koba ilo kabun̄ eo am̧?”
“Etke ij aikuji juon kabun̄?”

Door Juon Men n̄an Ekkatak im Jar Kake

Ilo jem̧ļo̧kin kajjojo iien katakin, leļo̧k n̄an armej ro juon men n̄an ekkatak, kejekļo̧kjeņ, im jar kake n̄an m̧aanjabpopo n̄an iien katak eo tok juon. Riit, jar, im kejekļo̧kjeņ ikōtaan iien katakin ko ej karuwaineneik kareel eo an Jetōb Kwojarjar n̄an mour ko aer.

Kwomaron̄ kajjitōk ippān armej ro n̄an riiti jebta ko ilo Bok in Mormon. Ak kwoaron̄ kōketak er n̄an kōjerbal kein jipan̄ ko an Kabun̄ in, eo āinwōt Gospel Library eo, n̄an pukōt uwaak ko n̄an kajjitōk ko, ekkata kōn juon unin kōnono, ak alooej juon pija in alooj. Menin emaron̄ erom juon unin kōnono in kōppeļļo̧k an iien ekōnono eo tok juon kwoj ioon er.

Joļo̧k leļo̧k n̄an armej ro eļap n̄an kōm̧m̧ane, eļap tata eļan̄n̄e ekadu iien, emakijkij am̧ katak ippāer.

Ekkatak an juon make im an Kam̧pānien

Ļōmņak kōn kajjojo armej kwoj jikejuuļ n̄an katakin ilo wiik in. Jebta ta ko ilo Bok in Mormon eo renaaj lukkuun jipan̄ er? Ta kein jipan̄ kok jet renaaj kōjeraam̧m̧an er? Ļo̧o̧ke ta eo kwoj kōņaan leļo̧k n̄an kajjojo armej. Barāinwōt ļo̧o̧ke ta eo kwonaaj bar etale ilo loļo̧k eo tok juon am̧.

Jipan̄ Armej ro kōn Aūrlep ko

Kwomaron̄ jipan̄ armej ro me rej kakkōt n̄an anjo̧ ioon an̄ūrlep kōn ekōnono kōn apan̄ ko aer, rie er, im leļo̧k n̄an er kein jipan̄ ko. Kwomaron̄ kōketak er n̄an etal n̄an juon iaan kumi in jipan̄ joļo̧k an̄ūlep jen Kabun̄ in. Kumi kein remaron̄ ioon doon ilo likio in armej ak ilo online. (Lale AddictionRecovery.ChurchofJesusChrist.org.) Kōketak er n̄an kōjerbal kein jipan̄ ko ilo “Addiction” jekjōk eo an Life Help ilo Gospel Library eo.

Ritōl ro an Kabun̄ in ijo jokwe ie im membōr ro remaron̄ barāinwōt leļo̧k jipan̄. Jet armej ro kōn an̄ūrlep ko maron̄ aikuji kōm̧adm̧ōd ko jān ritijem̧ļo̧k ro an jikin taktō im mental health.

Erkein jejjo iaan elmakot ko kōn ekōjkan am̧ maron̄ jipan̄ armej ro rej ļon̄tak n̄an anjo̧ ioon an̄ūrlep:

Bar kakijin̄en̄eikļo̧k kijejeto ko aer n̄an itok n̄an Kraist. Jipan̄ er lo bwe kijejeto ko aer n̄an deoor im mour rej kili im kaorōki jān Jemedwōj Ilan̄ im Jisōs Kraist. Katakin er bwe maron̄ kōkajoorļo̧k er kōn Rilo̧mo̧o̧r eo im Pinmuur eo An. E ej lukkuun kile kōttōpar eo an būruier n̄an kōm̧m̧an em̧m̧an.
Jar kōn er ilo jar ko am̧ make, im jar ippāer. N̄e ejetjet, kōketak er n̄an kappukōt juon kōjeraam̧m̧an an priesthood eo jān ritōl ro an priesthood ijo jokwe ie.
Wōnm̧aanļo̧k wōt n̄an katakin er gospel eo an Jisōs Kraist. Katakin er bwe Jemedwōj Ilan̄, Rilo̧mo̧o̧r eo, im Jetōb Kwojarjar eo rej iakwe er im kōņaan bwe ren tōprak.
Kōketak er n̄ane tal n̄an jar iien otemjej im ejake jemjerā ko ippān membō ro.
Kwon em̧m̧an im retjak, eļap tata eļan̄n̄e rej lukkuun jorrāān.

An̄ūrlep epen n̄an anjo̧ ioon, im nanaļo̧k ko remaron̄ waļo̧k. Ritōl ro an Kabun̄ in im membōr ro rejjab aikuj in ilbōk kōn menin. Rej aikuj kwaļo̧k iakwe, jab ekajet.

Juon membōr kāāl eo ej bōjrak in etal n̄an jar emaron̄ in kar bar ro̧o̧lļo̧k n̄an an̄ūrlep eo m̧okta im maron̄ en̄jake an jab aorōk ak ebbwer. Juon loļo̧k em̧ōkaj ej leļo̧k kōketak im rie maron̄ jipan̄. Membōr ro rej aikuj kwaļo̧k ilo naan im ilo jerbal bwe Kabun̄ in ej juon jikin ijo iakwe eo an Kraist maron̄ loe ie (lale 3 Nipai 18:32).

Ekkatak an juon make im an Kam̧pānien

Ļōmņak kōn juon eo kwoj katakin ak juon membōr eo ekāāl ak ej bar ro̧o̧ltok me ej kajjieon̄ anjo̧ ioon juon an̄ūrlep. Etale “Tōmak ilo Jisōs Kraist” im “Ukweļo̧k” jān “Gospel eo an Jisōs Kraist” katak ilo jebta 3.

Ta eo kwomaron̄ katakin armej in jān katak jab in im jān jepta in me emaron̄ jipan̄ e?
Ejake juon karōk in katak n̄an jipan̄ armej in.

Katakin Armej ro Me Ejjeļo̧k juon Aer Jekjek an Rikūrijin

Jet armej ro kwoj katakin ejjeļo̧k juon aer jekjekin Rikūrijin ak maron̄ jab tōmak ilo Jemedwōj Ilan̄ im Jisōs Kraist. Ijo ke, elōn̄ iaan armej rein ewōr aer tōmak ko, iminene ko, im jikin ko rej watōk rekwojarjar. Ej menin aikuj bwe kwoj kwaļo̧k kautiej n̄an tōmak ko im iminene ko an kabun̄ eo aer.

Jipan̄ Er Meļeļe Wōn Eo Anij

Kwomaron̄ ļōmņak ekōjkan am̧ aikuj ukukōt am̧ katakin armej ro me ejjeļo̧k aer jekjek an Rūkirijin. Pedped in katak ko me rej jipan̄ juon armej kalōk tōmak reier wōt juon ilo aolep m̧anit. Kōketak armej ro n̄an bōk juon meļeļe ejim̧we kōn Anij im mijen kwojarjar eo an Jisōs Kraist. Wāween eo em̧m̧an tata n̄an er n̄an ekkatak m̧ool kein ej kōn bōk en̄jake in jetōb ko an juon make. Jet wāween ko kwomaron̄ jipan̄ er bōk en̄jake kein rej ellaajrak itulaļ:

Katakin bwe Anij ej Jemedwōj Ilan̄, im E ej iakwe kōj. Jej ajri ro Nejin. Kajjitōk ippāer n̄an kappukōt kam̧oo jab in kōn er make.
Katakin kōn karōk in lo̧mo̧o̧r eo.
Katakin bwe Anij Jemed im Jisōs Kraist raar waļo̧kļo̧k n̄an Rikanaan Josep Smith.
Kwaļo̧k kam̧ool eo em̧ool kōn gosepl eo, ekoba ekōjkan am̧ en̄jake iakwe eo an Jemedwōj Ilan̄ im etke kwoj kāālet n̄an ļoor Jisōs Kraist.
Kajjitōk ippāer n̄an kōm̧m̧ani jar ko repidodo, an bōro—ippam̧ im kōn er make.
Kajjitōk ippāer n̄an riiti Bok in Mormon raan otemjej—ippam̧ im kōn er make.
Kajjitōk ippāer n̄an etal n̄an jar.
Kwaļo̧k kadkadier n̄an membōr ro an Kabun̄ in me remaron̄ kōmeļeļeik ekōjkan aer kar itok n̄an tōmak ilo Jemedwōj Ilan̄ im Jisōs Kraist.
Kajjitōk ippāer n̄an kōjparok kien ko.

Elōn̄ wōt armej ro rej ikdeelel n̄an bōk juon ekkejel ekilepļo̧k ippān Anij im n̄an pukōt unin im meļeļe in mour in. Jipan̄ er lo ekōjkan aer ajri ro nejin juon Jemen ilo Lan̄ eo ej iakwe im ekōjkan An wōr an juon karōk n̄an er. N̄an waanjon̄ak, kwomaron̄ jino kōn ba juon men eo āinwōt kein:

Anij ej Jemed ilo Lan̄, im E ej iakwe kōj. Jej ajri ro Nejin. Jekar mour ippān Anij m̧okta jān ad kar ļotak. Kōnke jej aolep arji ro Nejin, jej aolep jemjān jemjati. Ikdeelel ko An n̄an kōj n̄an bar ro̧o̧lļo̧k n̄an Ippān. Kōnke kōn iakwe eo An n̄an kōj, E ekar letok juon iaļ n̄an kōj n̄an bar ro̧o̧lļo̧k n̄an Ippān kōn Nejin, Jisōs Kraist.

Ukukōt Am̧ Katakin n̄e Emenin Aikuj

Elōn̄ rioktak ro jān jekjeko an jab-Rūkirijin rej ba bwe raar jab meļeļe eļap kōn ta eo mijenede ro raar katakin. Ijo ke, raar en̄jake Jetōb eo im kar kōņaan kōm̧m̧ane ta eo mijenede ro raar kajjitōk. Kōm̧man aolep men kwomaron̄ kōm̧m̧ane n̄an jipan̄ armej ro meļeļe katak eo an gospel eo. Kwon kijenmej im rejtak. Emaron̄ bōk iien n̄an an armej ro ekkatak n̄an kile im kwaļo̧k en̄jake ko aer. Kwomaron̄ aikuj in ukukōt iiūm̧ eo im m̧wilaļ eo kwoj katakin n̄an jipan̄ er.

Elmakot kein remaron̄ jipan̄ ilo am̧ m̧aanjapbopo n̄an katakin armej ro me ejjeļo̧k aer jekjek an juon Rikūrijin:

Meļeļe ta aikuj eo ilo jetōb im itok limo eo ej im̧we er n̄an ioon kwe.
Leļo̧k juon kōmeļeļe ko im etale ko repidodo n̄an kajjojo katak.
Kajjitōk ippāer n̄an jiron̄ eok ta eo rej meļeļe im ta eo raar en̄jake.
Kōmeļeļeik naan ko im pedped in katak ko raorōk. Armej ro remaron̄ jab jeļā elōn̄ iaan naan ko kwoj kōjerbali ilo am̧ katakin.
Bar ro̧o̧lļo̧k n̄an katak eo kar katain im̧aanļo̧k n̄an kalikkarļo̧k katak eo. Menin emaron̄ menin akuj jabdewōt iien ilo iien katak eo.
Kile kūr ko me kwomaron̄ lilo̧k n̄an jipan̄ armej ro en̄jake kōjeraam̧m̧an koa n gospel eo.

Ellaajrak itulaļ rej jet kein jipan̄ ko ilo Gospel Library eo me kwomaron̄ kōjerbali n̄an jipan̄ ro ejjeļo̧k juon jekjek an Rikūrijin ippān.

“Wōn in Anij”
“Wōn in Jisōs Kraist?”
“Jisōs Kraist, Nejin Anij”
“Ta eo n̄an Kōtmene N̄e Loļok ippān Mijenede ro an Kabun̄ eo an Jisōs Kraist im Armej ro Rekwojarjar ilo Raan-ko Aliktata”
“Muslim ro im Armej ro Rekwojarjar ilo Raan-ko Āliktata: Tōmak ko, Aorōk ko, im Jekjek in Mour ko”

Ekkatak an juon make im an Kam̧pānien

Eļan̄n̄e ekkar, kile juon rioktak me ekar jab wōr juon an jekjek an Rikūrijin m̧okta jān an ioon mijenede ro. Kōm̧m̧an karōk n̄an ioon doon im kajjitōk kōn en̄jake in oktak eo an. N̄an waajon̄ak, kwomaron̄ kajjitōk ippān armej eo kōn:

Ta eo ekar tōlļo̧k e n̄an tōmak ilo Jemedwōj Ilan̄ im Jisōs Kraist.
Ta en̄jake eo kōn jar ilo iien eo kein kajuon ekar āinwōt.
Ekar ewi kōjkan ilo iien eo jinoin tata ekar en̄jake juon uwaak n̄an jar eo an.
Jerbal eo an jeje ko rekwojarjar ilo oktak eo an.
Ekar ewi kōjkan etal n̄an jar.

Je ta eo kwoj ekaktak kake ilo jōnōļ in ekkatak eo am̧.

Ļōmņak in kajjitōk ippān armej eo n̄an jipan̄ eok katakin juon eo me ejjeļo̧k an juon jekjek an Rikūrijin.

Ļōmņak ko n̄an Ekkatak im Kōjerbali

Ekkatak Am̧ Make

Ļōmņak etan ke kwoj pād ilo jekjek kein: Ekōjkan am̧ maron̄ in kōjerbal pedped in katak ko im kapeel ko ilo jetpa in n̄an jipan̄ armej rein eddōkļo̧k? Karōk ekōjkan am̧ naaj kōjerbal er ilo kajjojo jekjek.
- Juon eo ekar m̧aanjabpopo n̄an peptaij ej jiron̄ eo bwe ejako an kōņaan ioon kwe.
- Kweilo̧k eo am̧ kein kajimjuon ippān armej eo me ekar katakin jān jejjo mijenede ro ium̧win ruo iiō ko. Ekar wōr jejjt eļan̄n̄e ejjab jejjo kakōļļe ko kōn eddōkļo̧k.
Kāālet juon iaan katak ko an mijenede ro. Kile juon ak ruo eoon in jeje ko rekwojarjar jān kajjojo pedped in katak aorōk. Kōmālmel katakin jān eoon ko āinwōt kar kōllaajraki ilo “Kōjerbal Jeje Ko Rekwojarjar” jekjōk eo ilo jebta in.

Ekkatak Am̧ Make im Ippān Kampānien Eo M̧ōttam̧

Riiti bwebwenato eo an Amōn im Kiin̄ Lamonai Alma 18–19 im bwebwenato eo an Aron ilo Alma 22:4–18. Ilo am̧ riiti, kile im kōmeļeļeik ekōjkan Amōn im Aron:
- Kar ļoor Jetōb eo im katakin kōn iakwe.
- kar jino katakin.
- kar ukukōt katak eo aer n̄an tōpar aikuj ko.
- Kar kwaļo̧k naan in kam̧ool.
- Kar kōjebal jeje ko rekwojarjar.
- Kar kajjitōk kajjitōk ko, ron̄jake, im jipan̄ ro me raar katakin er ņa mejļan n̄ūrbōktak ko aer.
- Kar kōketak ro raar katakin er n̄an kōm̧m̧ani kallim̧ur ko.
Ekōnono kōn ekōjkan an jerbal in jipan̄ eo aer kar jelet Kiin̄ Lamonai, jemen, im Abish.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Kajjitōk ippān membōr ro ak ro kwoj katakin er kiiō n̄an kweilo̧k ippam̧. Kōmeļeļeik kumi eo bwe kwoj kōņaan bwe mijenede ro ren kōkōm̧anm̧an maron̄ in katak eo aer n̄an kwaļok ennaan eo aer aorōk. Kāālet juon katak im juon kapeel. Kōm̧m̧an bwe mijenede ro ren katakin armej eo ak armej ro katak eo kwar kāālete ium̧win 20 minit, pedped ioon kapeel eo kwar kile. Kōm̧m̧an bwe ren ukōt ro rej katakin ālkin 20 minit. Ālkin an mijenede ro kar katakin, bōktok kumi ko ippān doon. Kōm̧m̧an bwe armej eo ak armej ro ren jiron̄ mijenede ro ta eo ewejepedik tata im juon wāween remaron̄ kōkōm̧anm̧anļo̧k.
Kwaļo̧k pija in alooj eo kōn waanjon̄ak ko an mijenede ro katakin ak kepaak armej ro. Kāālet juon kapeel im ekōnono kōn ewi jon̄an an em̧m̧an an mijenede ro kar kōjerbal pedped in katak ko n̄an kapeel jab eo.
Kāālet juon kapeel, im kile katak eo ak eoon in jeje ko rekwojarjar me ej rie. Katakin pedped in katak eo an kapeel eo n̄an mijenede ro.

Ritōl ro an Mijen im Rikakpilōklōk ro an Mijen

Jān iien n̄an iien etal ippān mijenede ro ilo aer katakin. Karōk ekōjkan am̧ maron̄ bōk koņam ilo katakin eo.
Kōketak ritōl ro ijo jokwe ie n̄an bōk koņaer ippān mijenede ro ilo iien loļo̧k in katakin ko aer.
Kwaļo̧k im jipan̄ mijenede ro kōmālmel juon iaan kapeel in katakin ko kar kōmeļeļeik ilo jepta in, eo āinwōt kajjitōk kajjitōk ko rem̧m̧an im ron̄jake.
Kwaļo̧k wāween eo ewejepedik tata kōjerbal jeje ko rekwojarjar n̄e katakin mijenede ro ilo kweilo̧k ko reļļap an zone eo, ko̧o̧njeļ an ritōl an mijen, im intōrpiu ko. Kōm̧m̧an ejja in wōt n̄e kwoj katakin ippāer.
Jipan̄ mijende ro meļeļe jeje ko rekwojarjar im ejake juon iakwe n̄an er. Elder Jeffrey R. Holland ekar kapilōk ritōl ro an mijen:

“Kōm̧m̧ane juo iakwe n̄an naan eo an Anij en lukkuun ioļapļap n̄an m̧antin mijen eo am̧. … Jeļā kōn revelesōn ko im iien otemjej kōjerbal jeje ko rekwojarjar ej juon iaan ļamļam ko raorōk tata an mijenede ro ami to̧o̧n wōt aer mour.

“N̄e kwoj katakin mijenede ro ami—im bwe ej aolep iien—katakin er jān jeje ko rekwojarjar. Kōm̧m̧an bwe ren lo ia eo kwoj bōk kajoor im im̧we eo am̧. Katakin er n̄an iakwe im pedped ioon revelesōn kein kar aini.

“Mijen būreejtōn eo [aō] kar katakin jān Bok in Mormon im jeje ko rekwojarjar [jet] aolep iien kōm kar pād ippān, ak āinwōt ekar. Intōrpiu ko an juon make raar loklok ippān jeje rekwojarjar. Ellaajrak ko n̄an … kweilo̧k ko raar itok jān jeje ko rekwojarjar. …

“Kōm kar jab jeļā ilo iien eo, bōtaab būreejtōn eo am ekar kōpooj kōm itu ambwijmaron̄ im ituanmiin̄, kōketak kōm kōn aolep kajoor an jetōb eo an im kōn aolepān maron̄ ko ekar ippān n̄an jiron̄ pen n̄an aen in dāpdep eo n̄an maron̄ am maron̄ jab jako [lale 1 Nipai 15:23–25]” (“The Power of the Scriptures” seminar for new mission leaders, June 25, 2022).