“Jebta 11: Jipan̄ Armej ro Kōm̧m̧an im Kōjparok Kallim̧ur ko,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 11,” Kwaļo̧k Gospel eo Aō

Jebta 11

Jipan̄ Armej ro Kōm̧m̧an im Kōjparok Kallim̧ur ko

Ļōmņak kōn Menin

Ekōjkan n̄an kōjparok kallim̧ur ko iookļo̧k oktak eo?
Ekōjkan an kōjparok kallim̧ur ko iookļo̧k kōjparok bujen ko?
Ekōjan aō maron̄ leļo̧k kūr ko n̄an jipan̄ armej ro eddōkļo̧k ilo jetōb im kōkajoorļo̧k tōmak eo aer ilo Jisōs Kraist?
Etke ej aorōk n̄an kwaļo̧k juon naan in kam̧ool em̧ool?
Ta kōjeraam̧m̧an ko imaron̄ kallim̧ur kaki?
Ekōjkan aō maron̄ jipan̄ armej ro kōjparok kallim̧ur ko?

Ukweļo̧k, Kallim̧ur, im Oktak

Āinwōt juon mijenede im rikaļoor an Jisōs Kraist, ikdeelel eo am̧ kōn lo̧mo̧o̧r eo an jetōb ko (lale Mosaia 28:3). Rilo̧mo̧o̧r eo ekar ba, “ekajoor n̄an lo̧mo̧o̧ren” ro me rej kōjparok bujen ko raar kōm̧m̧ani kōn bōk kain̄i ko an priesthood remenin aikuj, ijjino kōn peptaij (lale 2 Nipai 31:19). Leļo̧k kūr ko im jipan̄ armej ro kōjparok kallim̧ur ko naaj kōpooj er n̄an petpaij.

Armej rej lo̧mo̧o̧r kōn jekjek eo an ukweļo̧k (lale Hilamōn 5:11). Ukweļo̧k ej juon oktak edipio im oktak eo em̧ool n̄an Jisōs Kraist. Kallim̧ur ej juon m̧ōttan aorōk an ukweļo̧k. N̄e kwoj kūr armej ro n̄an kōm̧m̧ani kallim̧ur ko ej m̧ōttan katakin eo am̧, kwoj kūr er n̄an ukweļo̧k.

Kallim̧ur ko rej meļeļe kāālet juon iaļ in jerbal im ļoore im etale kāālet jab eo. Jerbali m̧ool ko an gospel eo ej tōlļo̧k n̄an oktak.

Oktak ej juon oktak ilo tōmak ko an juon armej, bōro, im mour n̄an bōk im ļoor ankilan Anij. Ej juon jokāālet jeļā kake n̄an erom juon rikaļooran Kraist. Oktak ej waļo̧k ilo an armej ro kōjerbal tōmak ilo Kraist, ukweļo̧k jān jerawiwi ko aer, rej peptaij, bōk menin letok eo a Jetōb Kwojarjar, im niknikn n̄an jem̧ļo̧kin. Irooj im rikanaan ro An rej kōnono kōn oktak in āinwōt bar ļotak in jetōb (lale Jon 3:3–5; Mosaia 27:25–26).

Pinmuur eo an Rilo̧mo̧o̧r ej kōm̧m̧an bwe en pidodo oktak, im Jetōb Kwojarjar ej bōktok oktak in bōro in ekajoor (lale Mosaia 5:2; Alma 5:12–14).

Oktak ej juon eddōkļo̧k, ejjab juon iien. Jipan̄ armej ro erom riotak n̄an Jisōs Kraist ej dilepān jibadbad in mijenede eo am̧. Āinwōt kar tōl jān Jetōb eo, kūr armej ro n̄an kōm̧m̧ani kallim̧ur ko me renaaj jipan̄ er eddōkļo̧k ilo jetōb im en̄jake kareel eo an Jetōb Kwojarjar ilo mour ko aer. Innām kwon rie armej ro ilo kōjparok kallim̧ur ko raar kōm̧mani. Kwoj jipan̄ er jerbal ilo tōmak m̧aanļo̧k n̄an oktak eo aitok kitien (lale Mosaia 6:3).

Armej ro me rej kōjparok kallim̧ur ko m̧okta jān peptaij āinwōt remaron̄ naaj kōm̧m̧an im kōjparok bujen ko rekwojarjar ālkin. N̄e kwoj katakin armej ro n̄an kōjparok kallim̧ur ko, kwoj katakin er n̄an kōjparok bujen ko. Kōm̧m̧an im kōjparok bujen ko ej juon m̧ōttan aorōk an gospel eo an Jisōs Kraist im karōk eo an Anij n̄an ajri ro Nejin.

Jebta in ekitbuuj unin tōl ko n̄an leļok kūr ko, kōjeraam̧m̧an ko kallim̧ur kaki, kwaļo̧k naan in kam̧ool eo am̧, im jipan̄ armej ro kōjparok kallim̧ur ko aer bwe ren maron̄ itok n̄an Rilo̧mo̧o̧r eo im mour.

Leļo̧k Kūr ko

Āinwōt juon ribōk jikin Jisōs Kraist, kwoj kūr armej ro n̄an ļoor E im bōk lan̄lōn̄ eo an gospel eo An. Kwoj leļo̧k kūr ko rejenolo̧k n̄an er n̄an kōm̧m̧an men ko me renaaj kalōk tōmak eo aer ilo Kraist. Innām kwon rie er ilo kōjparok kallim̧ur ko aer.

Kūr ko im kallim̧ur ko rej aorōk n̄an kōn un kein:

Rej jipan̄ armej ro mour kōn pedped in katak ko rej katak bwe ren en̄jake kapen in kam̧ool eo an Jetōb.
.Kōjparok kallim̧ur ko ej juon wāween armej ro rej kwaļo̧k ukweļo̧k (lale Katak im Bujen Ko 20:37).
Ukweļo̧k ej jipan̄ armej ro en̄jake aenōm̧m̧an im lan̄lōn̄ an jeorļo̧k bōd eo an Anij. Enaaj barāinwōt ļapļo̧k jipan̄ eo aer jān Anij n̄an apan̄ ko aer.
Kōjparok kallim̧ur ko ej kōpooj armej ro n̄an kōm̧m̧an im kōjparok bujen ko rekwojarjar.
Kwomaron̄ kwalo̧k iakwe eo am̧ n̄an armej ro im tōmak eo am̧ ilo kallim̧ur ko an Anij kōn jipan̄ armej ro kōjparok kallim̧ur ko aer.

Kūr āinwōt Tōl jān Jetōb eo

Kappukōt tōl eo an Jetōb kōn ta kūr ko n̄an liļo̧k im n̄āāt eo n̄an liļo̧ki. Ļōmņak kōn ta katakin eo ak katak eo, ejim̧we meļeļe kake, enaaj jipan̄ juon armej bōk kūr eo am̧. Kūr eo ejim̧we ilo iien ejim̧we maron̄ im̧we armej ro n̄an kōm̧m̧ani men ko me renaaj kalōk aer tōmak. M̧akūtkūt kein remaron̄ tōlļo̧k n̄an juon oktak in bōro ekajoor (lale Mosaia 5:2; Alma 5:12–14).

Kūr ko kwoj liļo̧k remaron̄ in dik, ko āinwōt riiti juon jepta an jeje ko rekwojarjar ak itok n̄an kweilo̧k in kwojkwoj eo. Ak remaron̄ in aorōk āinwōt peptaij. Kūr ko rej aikuj in ekkar n̄an ia eo juon armej ej pād ie ilo iaļ eo an ilo jetōb.

Kūr ko tōl-in Jetōb rej ekkal ioon doon n̄an jipan̄ juon armej eddōkļo̧k ilo jetōb (lale 2 Nipai 28:30; Katak im Bujen Ko 93:12–13). Kajjitikin eok make, “Ta kallim̧ur ko armej eo ej kōjparoki? Ta eo ej aikuj in kōm̧m̧ane tok juon n̄an eddōkļo̧k?”

Ron̄jake ro kwoj kōnono ak katakin er. Jān ta eo kwoj ron̄ ak en̄jake, kappukōt tōl eo an Jetōb kōn ta kūr ko renaaj jipan̄ kajjoo armej eddōkļo̧k m̧aanļo̧k n̄an kōm̧m̧ani bujen ko rekwojarjar.

Pedped in Katak ko kōn Leļo̧k Kūr ko

Leļo̧k kūr ko ej aikuji tōmak ilo Kraist. Bōk tōmak bwe E enaaj kōjeraam̧m̧an armej ro n̄e rej bōk im ļo̧o̧ri kūr ko am̧.

Emaron̄ ļapļo̧k an armej ro naaj oktak n̄e kwoj kūr er n̄an jerbale juon m̧ool an gospel eo im jipan̄ er lo ekōjkan an oktak eo naaj kōjeraam̧m̧an er. Renaaj oktak n̄an juon jon̄ak eo me rej en̄jake Jetōb eo im en̄jake lan̄lōn̄ kōn mour kōn gospel eo an Jisōs Kraist.

Jabdewōt iien kwoj kobaik armej ro, ilo kanem armej ak online, ļōmņak kōn ta kūr eo emaron̄ jipan̄ er kōkajoorļo̧k tōmak eo aer ilo Kraist im en̄jake Jetōb eo. Jet iien menin emaron̄ in pidodo in wōt bar ioon kom̧ ak itok n̄an juon m̧akūtkūt an Kabun̄ in.

Ilo am̧ m̧aanjabpopo n̄an katakin juon katak, ļōmņak kōn aikuj ko im eddōkļo̧k eo an kajjojo armej. Kanooj lale bwe karōk in katak eo am̧ en kitbuuj juon ak lōn̄ļo̧k kūr ko me renaaj jipan̄ armej eo eddōkļo̧k.

Mejmejkaruo n̄an jab leļo̧k bōjin kūr ko ilo juon wōt iien. Juon armej ej aikuj iien n̄an jerbale, eddōkļo̧k, im katak jān kajjojo kūr.

Kwon peran jab kabwilōn̄lōn̄ilo am̧ kūr armej ro n̄an kōm̧m̧ani kallim̧ur ko (lale Alma 38:12). Kautiej anemkwoj in kāālet eo an armej eo.

Ekkatak Jeje ko Rekwojarjar

Etke kallim̧ur ko raorōk?

Kūr kōn Jouj im Kajin eo Alikkar

Juon kūr emakijkij an kōm̧m̧an kōn jekjek eo an “kwonaaj ke” kajjitōk, eo ej aikuj aaet ak jaab uwaak eo. Kōm̧m̧ani kūr ko am̧ rejouj, jenolo̧k, im alikkar. Rej aikuj kūr ak tōl armej ro n̄an kōm̧m̧ane juon kallim̧ur n̄an jerbal kōn tōmak ilo Jisōs Kraist.

Men̄e kūr ko am̧ renaaj jej uwaer n̄an kajjojo armej, ļōmņak kōn waanjon̄ak kein:

Etal n̄an jar ej letok juon iien im jikin n̄an kwe n̄an kabun̄-jar n̄an Anij im en̄jake Jetōb eo An. Emaron̄ barāinwōt jipan̄ eo erom m̧ōttan juon jukjuk in pād in rie ilo am̧ kōm̧m̧ani oktakko n̄an epakeļo̧k Rilo̧mo̧o̧r eo. Kwonaaj ke itok ippām n̄an kweilo̧k in kwojkwoj eo Jabōt in?
Kiiō ke em̧ōj ad kar kōnono kōn aorōk eo an ekkatak jeje ko rekwojarjar, kwonaaj ke riiti [eoon in jeje ko rekwojarjar remakeļo̧k]? Kwonaaj ke je jabdwōt im̧we ko ak kajjitōk ko emaron̄ wōr am̧? Jemaron̄ kōnono kōn ļōmņak ko am̧ iien eo tok juon n̄e jej bar ioon doon.
Jaar ekōnono kōn mour eo an Rilo̧mo̧o̧r eo im kien ko An. Kwonaaj ke ļoor waanjon̄ak eo An kōn peptaij n̄an Kabun̄ eo An im kōm̧m̧ani kallim̧ur ko Ippān? (Lale “Kūr eo n̄an Peptaij im Kepen” ilo jebta 3.)
Kwar kwaļo̧k am̧ itok limo ilo ekkejel eļapļo̧k ippān Anij ilo mour eo am̧. Kwonaaj ke jar kōn tōmak ilo jejjo raan ko rej itok bwe kwon maron̄ en̄jake kōjeraam̧m̧an ko an jar?
Ewōr juon am pija in alooj me kōmij ļōmņak kwonaaj lo bwe ejipan̄. Kōm maron̄ ke kwaļo̧ke n̄an kwe ak jilkinwaj juon link n̄an kwe? Kwonaaj ke alooje? Kōm maron̄ bar lale tok ippam̧ ilju n̄an lale ta am̧ ļōmņak?

Kappukōt im̧we ko an Jetōb Kwojarjar ilo am̧ ļōmņak kōn wāween ko iminene kake n̄an leļo̧k kūr ko rejouj, jenolo̧k, im alikkar.

Ekkatak Am̧ Make ak Ippān Kampānien Eo M̧ōttam̧

Ilo jōnōļ in ekkatak eo am̧, je juon kūr me epidodo, kajju, im alikkar n̄an kajjojo kallim̧ur ilo juon katak. Eļan̄n̄e kwar kōm̧m̧an m̧akūtkūt in m̧oktaļo̧k, āliji im keidi kūr ko am̧ rekāāl ippān ko im̧aanļo̧k.

Etale kūr ko kwar je ippān kampānien eo m̧ōttam̧. Innām ekōnono kōn kajjitōk kein:

Ekōjkan ad maron̄ jipan̄ armej ro meļeļe kōjeraam̧m̧an ko kar kallim̧ur kaki an Irooj rej koba ippān kūr in?
Etke kūr in eaorōk n̄an n̄a make?
Ekōjkan aō maron̄ jipan̄ armej ro en̄jake iakwe eo an Anij n̄an er ilo aō leļo̧k kūr ko?
Ekōjkan aō maron̄ kōkōm̧anm̧anļo̧k jipan̄ ro jet jerbali kūr ko ij liļo̧k?

Ļōmņak kōn juon eo kwoj katakin. Kōmālmel leļo̧k kūr kein āinwōt n̄e kwar kōnono n̄an armej jab eo. Ukōti kūr ko am̧ n̄e menin aikuj.

Kallim̧ur Armej ro Kōjeraam̧m̧an ko

Anij ej kallim̧ur n̄an kōjeraam̧m̧an kōj ilo ad kōjparok kien ko An (lale Katak im Bujen Ko 130:20–21). Armej ro rej kōjparok kien ko im tiljek wōt “rej jeraam̧m̧an ilo aolep men ko otemjeļo̧k” im naaj “ jokwe ippān Anij ilo wāween m̧ōņōņō eo ejjeļo̧k jem̧ļo̧kin” (Mosaia 2:41).

Ilo am̧ kūr armej ro n̄an kōm̧m̧ani kallim̧ur ko, kallim̧uri er kōjeraam̧man ko kōn aer kōjparok kallim̧ur ko aer. Kwomaron̄ kūli elōn̄ iaan kōjeraam̧man kein kōn ekkatak jeje ko rekwojarjar, katak ko an rikanaan ro ilo raan-ko āliktata, im katak ko ilo jebta 3). Ļōmņak barāinwōt kōn kōjeraam̧m̧an ko ilo mour eo am̧ make. Jar ilo jokāālet ta kōjeraam̧m̧an ko n̄an kallim̧uri kajjojo aramej ilo am̧ leļo̧k kūr ko.

N̄e kūr juon armej n̄an mour kōn juon kien, katakin kōn men kein:

Pokake kien ko ej kwaļo̧k iakwe n̄an Jemedwōj Ilan̄ im Nejin, Jisōs Kraist (lale Jon 14:15).
Pokake kien ko ej kwaļo̧k n̄an Anij bwe jej lōke E (lale Jabōn Kōnnaan Ko 3:5–6).
Kōjeraam̧m̧an ko an Anij rej jim̧or ilo jetōb im ilo kanniōk (lale Mosaia 2:41).
Kōjeraam̧m̧an eo eļap tata an Anij ej mour indeeo (lale Katak im Bujen Ko 14:7).
Ilo ad m̧ool in jar im jerbal ilo tōmak, Anij enaaj jipan̄ kōj kadedeļo̧k men ko E ekar kakien kōj n̄an kōm̧m̧ani (lale 1 Nipai 3:7).
Anij ej kakūrm̧ool kallim̧ur ko An n̄an kōjeraam̧m̧an kōj ekkar n̄an wāween eo im iien eo An (lale Katak im Bujen Ko 88:68).

Emakijkij an armej jelm̧ae jum̧ae ilo kōjparok kien ko. Rie ro kwoj katakin, im kam̧ool n̄an er bwe Anij enaaj kōjeraam̧m̧an er ilo aer kajjieon̄ in kōm̧anm̧an Ankilan. Jipan̄ er meļeļe bwe jum̧ae ej juon iien em̧m̧an n̄an eddōkļo̧k kōn kāālet n̄an ļoor Kraist men̄e epen (lale 2 Nipai 2:11, 13–16).

Elder Jeffrey R. Holland ekar katakin: “Jet kōjeraam̧m̧an ko em̧ōkaj aer itok, jet erum̧wij, im jet rejjab itok m̧ae iien lan̄; bōtaab n̄an ro me rej kautiej gospel eo an Jisōs Kraist, rej itok” (“An High Priest of Good Things to Come,” Ensign, Nov. 1999, 38).

Ekkatak Jeje ko Rekwojarjar

Ta eo eoon kein rej ellaajrak rej katakin kōn ikdeelel eo an Irooj n̄an kōjeraam̧m̧an kōj?

Ekkatak Am̧ Make

Riiti Katak im Bujen Ko 82:10 im 130:20–21. Innām ekkatak eoon kein. Kōm̧m̧ane ruo kaļōm̧ ko ilo jōnōļ in ekkatak eo am̧. Ilo juon rejet, je kien eo kwoj lo ilo kajjojo eoon. Ilo rejet eo juon, je kallim̧ur eo kōn kōjparok kien eo.

Kwaļo̧k Naan in Kam̧ool eo Am̧

Kwaļo̧k naan in kam̧ool eo am̧ jabewōt iien kwoj leļo̧k juon kūr im kallim̧ur kōn kōjeraam̧m̧an. Ba ekōjkan am̧ kar jeram̧m̧an ilo am̧ kar mour kōn pedped in katak eo kwoj katakin. Kwaļo̧k naan in kam̧ool eo am̧ bwe pedped in katak eo enaaj kōjeraam̧m̧an mour eo an armej eo ilo an mour kōn pedped in katak eo.

Naan in kam̧ool eo am̧ em̧ool enaaj jipan̄ ejake juon mejatoto n̄an an armej ro en̄jake an Jetōb Kwojarjar eo kapen m̧ool eo. Menin enaaj kōketak er n̄an bōk kūr ko kwonaaj liļo̧k.

Kōn elōn̄ļo̧k meļeļe, lale “Kwaļo̧k Naan in Kam̧ool eo Am̧” ilo jebta 10.

Jipan̄ Armej ro Kōjparok Kallim̧ur ko Aer

N̄e armej ro rej bōk kūr ko am̧ n̄an kōm̧m̧ane juon men, etale n̄an jipan̄ er kōjparok kallim̧ur ko aer. Kwoj jipan̄ armej ro kalōk tōmak ilo Kraist. Jerbal eo am̧ ej n̄an jipan̄ er kōkajoorļo̧k tōmak eo aer im uwaaki kajjitōk ko aer n̄an eddōk m̧aanļo̧k n̄an oktak eo elikio. Kwoj jab baj kūr armej ro n̄an oktak; rie er n̄an kōm̧m̧ane.

Armej ro enaaj bōk juon kam̧ool an Jetōb ilo aer kōjerbal tōmak n̄an ukweļo̧k n̄an kōjparok kallim̧ur ko. Kam̧ool jab in emakijkij an jab itok “m̧ae ālikin mālejjon̄ in [aer] tōmak” (Ether 12:6). Kwon jab ilbōk n̄e jum̧ae ej waļo̧k. Karōk ekōjkan am̧ naaj jipan̄ er ilo mālijjon̄ eo bwe ren bōk kam̧ool eo an Jetōb. Membōr ro jet an Kabun̄ in remaron̄ barāinwōt leļo̧k jipan̄.

Emakijkij an armej ro en̄jake kareel eo an Jetōb n̄e kwoj pād ippāer. Kwaļo̧k aorōk eo an jar, riiti jeje ko rekwojarjar, im etali kūr ko am̧ bwe renaaj bōk en̄jake kein n̄e rej makeļo̧k kōn er make.

Kōjparok kallim̧ur ko ej kōpooj armej ro n̄an kain̄i ko im bujen ko ilo iaļ in oktak eo to̧o̧n wōt ad mour. Kijejeto ko am̧ remaron̄ jipan̄ er “kwaļo̧k jān jerbal ko aer” aer ikdeelel n̄an ļoor Jisōs Kraist (Katak im Bujen Ko 20:37).

Karōk juon IIen n̄an Loļo̧k Jidik Raan Otemjeļo̧k

Jipan̄ armej ro kōjparok kallim̧ur ko ej ijjino ke kwar loļo̧k im katakin er iien eo jinoin tata. Kajjitōk ippāer n̄an ļo̧o̧ke kallim̧ur eo aer ilo talboon eo aer, kōļōnta eo, ak ilo juon men eo kwoj doore ippāer.

Kajjitōk eļan̄n̄e kwe, ak membōr eo elakkar bōk koņan, maron̄ kōm̧m̧ane juon iien loļo̧k ekadu raan otemjeļo̧k ikōtaan iien katakin ko. Kōmeļeļeik bwe jibadbad eo an loļo̧k kein ej n̄an rie er, im kōmeļeļeik jet wāaan ko kwomaron̄ kōm̧m̧an. Loļo̧k kein rej juon wāween n̄an kōjerbal pedped in katak eo ilo Katak im Bujen Ko 84:106).

Jokāālet m̧ōņakjān in loļo̧k eo me enaaj wejepedik tata, ko āinwōt juon iien loļo̧k jidik, kūrļo̧k ilo talboon, jeje lo talboon, ak ennaan ilo social media. Technology ej letok elōn̄ jokāālet ko kōn elōn̄ļo̧k kakeememej ko im rie.

Kōketak im Jipan̄ Armej ro ilo Loļo̧k eo Am̧ Raan Otemjeļo̧k

N̄an aolep kūr kwoj liļo̧k, ļo̧o̧ke kakeememej ko ilo Kwaļo̧k Aō Gospel app eo kōn ekōjkan etale ļo̧kanļo̧k raan eo juon. Ilo am̧ karōk raan eo tok juon, kappukōt tōl eo an Jetōb ilo am̧ ekōnono kōn ekōjkan jipan̄ armej ro kōjparok kallim̧ur ko aer.

Kōm̧m̧an iien loļo̧k ko am̧ raan otemjeļo̧k ippān armej rem̧m̧an im kōketak. Jar kōn er. Kwaļo̧k iakwe im meļeļe ilo am̧ jipan̄ er kōjparok kallim̧ur ko aer. Uwaaki kajjitōk ko im jipan̄ er anjo̧ ioon apan̄ ko. Eļan̄n̄e ewōr iien, riit ippān doon jān Bok in Mormon. Kwaļo̧k media eo ekkar an Kabun̄ in, ekoba al ko kōm̧m̧ani jān Kabun̄ in me emaron̄ ļōn̄aj er. Kautiej iien im kōņaan ko aer.

Kwaļo̧k kadkadier n̄an membōr ro jet an Kabun̄ in. N̄e ekkar, kajjitōk ippān membōr ro n̄an jipan̄ armej ro kōjparok kallim̧ur ko aer (lale jebta 10).

Nebar armej ro me rej jerbal n̄an kōjparok kallim̧ur ko aer. Jipan̄ er lo ekōjkan an Irooj m̧ōņōņō kōn kijejeto ko aer. Armej rein rej ukōt mour ko aer, eo ebōk eļap jerbal im kijenmej. Jipan̄ er kile kōjeraam̧m̧an ko rej būki. Kwaļo̧k lōke bwe remaron̄ wejepedik.

Barāinwōt kwaļo̧k iakwe eļan̄n̄e armej ro rejjab kōjparok kallim̧ur ko aer. Leļo̧k jipan̄ n̄an er ilo iien loļo̧k ko am̧ raan otemjeļo̧k. N̄an waanjon̄ak, eļan̄n̄e juon ekar bōk kūr eo n̄an riiti juon jebta ilo Bok in Mormon bōtaab ejjan̄in de riiti, kwaļo̧k n̄an riiti ippān doon. Jipan̄ armej eo loe kōn en̄jake ekōjkan an kōjparok kallim̧ur ko maron̄ kōjeraam̧m̧an mour eo an.

Emaron̄ in bōk elōn̄ kōttan kajjieon̄ ko n̄an an armej ro kōjparok juon kallim̧ur, im kwomaron̄ aikuj n̄an kōm̧m̧ane jejjeo loļo̧k ko n̄an jipan̄ er. Ekōnono kōn ekōjkan aer maron̄ anjo̧ ioon apan̄ ko n̄an kōjparok kallim̧ur ko. Kwon kijenmej im rie, jab kōraat ak ekajet.

Kōm̧m̧an bwe kareel eo an Jetōb Kwojarjar en pād ilo Iien Loļo̧k eo Am̧ Raan Otemjeļo̧k

N̄e kwoj etale ippān armej ro, kajjitōk ippāer n̄an kwaļo̧k en̄jake eo aer kōn kōjparok kallim̧ur ko. Kajjitōk ta eo raar katak kake im en̄jake. Menin enaaj jipan̄ er kile kareel eo an Jetōb ilo mour ko aer im jipan̄ er kile bun̄tōn eo tok juon.

Ilo am̧ loļo̧k armej ro kajjojo raan, juon m̧ōttan aorōk an jibadbad eo am̧ ej n̄an karuwaineneik kareel eo an Jetōb Kwojarjar n̄an mour ko aer. Jipan̄ er kile ekōjkan en̄jake Jetōb eo n̄e kwoj jab pād. Iien loļo̧k ko am̧ raan otemjeļo̧k raikuj in kōkajoorļo̧k en̄jake ko ilo jetōb raar en̄jaki ke kwar katakin er. Renaaj erom rioktak ilo aer en̄jake kajoor im kareel eo an Jetōb Kwojarjar.

Kwaļo̧k Iakwe

Jekjek eo an oktak ej pād ioļapļap in iakwe eo āinwōt an Kraist (lale 4 Nipai 1:15). Kappukōt menin letok eo an iakwe-em̧ool. Kwaļo̧k m̧ool in iakwe emaron̄ jipan̄ armej ro en̄jake Jetōb eo ilo mour ko aer. Am̧ kwaļo̧k iakwe emaron̄ barāinwōt jipan̄ er bōk kūr ko im kōjparok kallim̧ur ko me rej tōlļo̧k n̄an oktak.

Ilo am̧ iakwe im katakin ro jet, oktak eo am̧ make n̄an Irooj enaaj m̧wilaļļo̧k.

Jipan̄ kōn oktak eo an bar juon armej ej juon jerbal ekwojarjar. Kwonaaj lo lan̄lōn̄ eo aitok kitien ilo am̧ wujlepļo̧k eok make n̄an jerbal in im n̄an jerbal n̄an ro jet (lale Matu 10:39; Mosaia 2:17; Alma 27:17–18; Katak im Bujen Kok 18:10–16).

Ekkatak Am̧ Make ak Ippān Kampānien Eo M̧ōttam̧

Ļo̧o̧ke ilo Kwaļo̧k Gospel eo Aō app eo karōk in loļo̧k ko am̧ raan otemjej ippān kajjojo armej ro kwoj katakin. Karōk ilo jejjo raan ko m̧oktaļo̧k ta eo kwonaaj kōm̧m̧ane n̄an etale ļo̧kanļo̧k ippān kajjojo armej.

Kāālet juon kūr kwonaaj leļo̧k n̄e kwoj katakin kajjojo armej. Innām kile n̄ūrbōktak ko rooktak jān doon me emaron̄ in dāpij juon jān bōk ak kōm̧m̧ane kallim̧ur jab eo. Ekōnono im kōmālmel ekōjkan an maron̄ em̧m̧an tata am̧ jipan̄ armej ro ilo aer jerbal n̄an ņa mejļan n̄ūrbōktak ko aer.

Irooj ej Kōņaan Armej ro n̄an Itok im Pād Wōt

Jerbal in mijenede ewōr a jelet eo eļap tata ilo an armej ro kōm̧m̧an im kōjparok kallim̧ur eo n̄an mour kōn gospel eo im pād wōt ilo niknik ilo Kabun̄ in ilo aolepān mour ko aer. Ejjab bwe n̄an er n̄an baj itok n̄an Kabun̄ in. Irooj ej kōņaan bwe ren itok n̄an pād wōt (lale Jon 15:16). Tōl aolep am̧ katakin im kūr ko m̧aanļo̧k n̄an jem̧ļo̧kin. N̄an bōk aolep kōjeraam̧m̧an ko me ewōr ippan Jemedwōj Ilan̄ n̄an er, membōr ro rej aikuj wōnm̧aanļo̧k wōt n̄an mour kōn gospel eo kōn kōjparok kallim̧ur ko im bujenko raar kōm̧m̧ani ilo aer pād wōt ilo niknik ilo Kabun̄ in.

Nipai ekar katakin, “Ālkin ami pād ilo iaļ in erānin̄ im eaidik, ikōņaan kajjitōk eļan̄n̄e aolep dedeļo̧k ke? Lo, ij ba n̄an kom̧, Jab; … kom̧ aikuj bun̄ m̧aanļo̧k kōn dim ilo Kraist, … im [eļan̄n̄e kom̧ij] niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo” (2 Nipai 31:19–20).

Leļo̧k kijejeto ko am̧ rem̧m̧an tata n̄an jipan̄ armej karbōb n̄an “bōk mour indeeo, eo ej mennin letok eo eļaptata ian mennin letok ko an Anij” (Katak im Bujen Ko 14:7).

Ļōmņak ko n̄an Ekkatak im Kōjerbali

Ekkatak Am̧ Make

Kile juon kien jān katak 4. Pukōt im ļo̧o̧ke eoon in jipan̄ ko im kout ko jān rikanaan ro ilo raan-ko āliktata me rej kōmeļeļeik kōjeraam̧m̧an ko kar kallim̧ur kaki rej koba ippān kallim̧ur in. Ļōmņak kōn kōjeraam̧m̧an ko kwar būki jān pokake kien in, im jei ilo jōnōļ in ekkatak eo am̧.
N̄e kwoj kōnono ippān baam̧le eo am̧ ak ro jet, kajjitōk ekōjkan aer kar jeraam̧m̧an jān pokake juon kien ejenolo̧k (n̄an waanjon̄ak, kōjparok im kōkwojarjar raan in Jabōt, pokake kien juon m̧ōttan jon̄oul, ak kōjparok juon kien me epen n̄an juon eo kwoj katakin).
Uwaaki kajjitōk kein n̄an jipan̄ eok kile eria ko me kwomaron̄ em̧m̧anļo̧k ie n̄an leļo̧k kūr ko. Kōm̧m̧ani karōk ko n̄an kōkōm̧anm̧anļo̧k.
- Armej ro rejeļā ke bwe ij iakwe er?
- Ij ke lōke bwe renaaj jeraam̧m̧an kōn jerbali kūr ko?
- Ij ke leļo̧k ebwe iien im aō n̄an kōm̧m̧ani iien loļo̧k ko raan otemjeļo̧k ippān armej ro n̄an jipan̄ er kōjparok kallim̧ur ko aer?
- Karōk in katak ko am rej ko kitbuuj kūr ko rejenolo̧k n̄an jerbali?

Ekkatak Ippān Eo Kampānien M̧ōttam̧ im Jānij Kampānien

Etale kūr ko ilo juon iaan katak ko an mijenede. N̄an kajjojo kūr, uwaaki kajjitōk kein:
- Ta kōjeraam̧m̧an ko Irooj ekar kallim̧ur kaki n̄an ro me rej kōjparok kallim̧ur in?
- Ekōjkan an pokake pedped in katak in naaj jipan̄ armej ro kōļapļo̧k tōmak eo im naan in kam̧ool eo aer?
- Ekōjkan an kallim̧ur in naaj jipan̄ armej ro ukweļo̧k im pidodoļo̧k aer en̄jake Jetōb eo?
Jān planning tool ko am̧, kōm̧m̧ane juon laajrak in armej ro kwar loļo̧k er ilo raan ko remootļo̧k. Ekoba ro kwoj katakin im membōr ro.
- ̄N̄an kajjojo armej, je kūr ko kwar leļo̧k im kallim̧ur ko raar kōm̧m̧ani.
- Ļōmņak kōn ta kūr ko jet kwomaron̄ kar liļo̧k.
- Ekōnono kōn etke kwar maron̄ in bōk kallim̧ur ko jān jet iaan armej ro bōtaab ejjab jān ro jet.
- Ta eo kwonaaj kōm̧m̧ane n̄an etale ļo̧kanļo̧k kūr kein?

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Ekōnono kōn aitia ko ilo jetjet im lo̧ļe n̄an iien loļo̧k ko raan otemjeļo̧k ippān armej ro kwoj katakin. Ekōjkan an kar jetjet an mijenede ro jerbal ippān membōr ro? Ta media eo eļap tokjān kar būriin ak pād ilo digital? Ta eo kwomaron̄ kōm̧m̧ane n̄e armej ro rejjab pād m̧weo ak relukkuun poub n̄an lo kom̧?
Ekōnono kōn wāween ko me mijenede ro ekar jetjet aer katakin kien ko ilo katak 4.

Ritōl ro an Mijen im Rikakpilōklōk ro an Mijen

N̄e emaron̄, etal ippān mijenede ro ilo aer katakin. Jipan̄ er kalimjōk wōt jipan̄ armej ro kōm̧m̧an im kōjparok kallim̧ur ko.
Kōketak ritōl ro an priesthood eo an ward eo, ritōl ro an doulul, membōr ro n̄an kōm̧m̧ani iien loļo̧k ko raan otemjeļo̧k ippān armej ro mijenede ro rej katakin—eļan̄n̄e armej ro raar errā n̄an iien loļo̧k in.