Kadkad in Kwaļo̧k Gospel eo Aō

Irooj ej jiron̄ ro Rikarejeran “n̄an kwaļo̧k naan kōn gospel eo Aō jān Jetōb, em̧ool Rikaenōm̧m̧an eo kar jilkinļo̧k n̄an katakin m̧ool eo” (Katak im Bujen Ko 50:14).

Kwaļo̧k Gospel eo Aō ej kōm̧m̧an n̄an jipan̄ eok kakūrm̧ool jibadbad eo am̧ āinwōt juon mijenede. Ej kalimjōk wōt men ko raorōk an jerbal in mijenede. Ejjab uwaake aolep kajjitōk ko ak letok tōl eo n̄an aolep jekjek kwonaaj iooni. Ijoke, ej juon kein jipan̄ eaorōk n̄an kwe n̄an eddōkļo̧k ilo kajoor in jetōb im maron̄. Ekkatak im kōjerbal katak eo im pedped in katak ko an gospel eo loi ilo jeje ko rekwojarjar im ilo bok in.

Kwaļo̧k Gospel eo Aō kar ejake n̄an jipan̄ eok ilo wāween kein:

• Meļeļe jibadbad eo am̧ āinwōt juon mijenede

  • Jebta 1: Kakūrm̧ool Jibadbad in Mijenede eo Am̧

• Ekkatak im katak katak eo

  • Jebta 3: Ekkatak im Katakin Gospel eo an Jisōs Kraist

• Eddōk ilo eddōkļo̧k in jetōb eo am̧ im oktak eo am̧ make

  • Jebta 2: Pukot Jeje ko Rekwojarjar im Kōņak Kein Tariņae an Anij

  • Jebta 4: Kappukōt im Pedped ioon Jetōb eo

  • Jebta 5: Kōjerbal Kajoor eo an Bok in Mormon

  • Jebta 6: Kappukōt M̧wil ko M̧wilin Kraist

• Kōkōm̧anm̧anļo̧k maron̄ eo am̧ n̄an kūr im jipan̄ armej ro bōk gospel eo kōjepļaaktok

  • Jebta 7: Katak Kajin eo an Mijen eo Am̧

  • Jebta 8: Kadedeļo̧k Jerbal eo kōn Kōttōpar ko im Karōk ko

  • Jebta 9: Pukōt Armej ro n̄an Katakin

  • Jebta 10: Katakin n̄an Kalōk Tōmak ilo Jisōs Kraist

  • Jebta 11: Jipan̄ Armej ro Kōm̧m̧an im Kōjparok Kallim̧ur ko

  • Jebta 12: Jipan̄ Armej ro M̧aanjabpopo n̄an Peptaij im Kapen

  • Jebta 13: Koba ippān Ritōl ro im Membōr ro n̄an Kajutak Kabun̄ in

Ekkatak im bar ekkatak jebta kein ilo aolepān mijen eo am̧. Etale jerbal eo am̧. Kōm̧m̧ani kōttōpar ko im kōm̧m̧ani karōk ko n̄an kadedeļo̧ki. Mijenede ro me rej kōpooj er make raan otemjeļo̧k im em̧m̧anļo̧k iien otemjej naaj kōjeraam̧m̧an mour ko an ro rej katakin im jerbal n̄an er. Renaaj barāinwōt bōk kōjeraam̧m̧an ko ilo mour ko aer make.

Iien ko Rem̧m̧an n̄an Ekkatak im Katak

Ekkatak eo ewejepedik ilo mijen eo am̧ enaaj jipan̄ eok kōkajoorļo̧k naan in kam̧ool eo am̧ kōn gospel in im erom juon rikaļoor etiljekļo̧k an Jisōs Kraist.

Ekkatak jeje ko rekwojarjar im Kwaļo̧k Gospel eo Aō enaaj jipan̄ eok katakin kōn kajoor ilo jetōb. Enaaj barāinwōt jipan̄ eok kōm̧m̧ane katakin eo am̧ ejetjet n̄an aikuj ko an kajjojo armej ro.

Iien ko rem̧m̧an raorōk an ekkatak in katak ekoba:

• Am make ekkatak.

• Ekkatak ippān eo m̧ōttam̧.

• Ejānijnij ko an Kampānien.

• Kweilo̧k ko an district ko̧o̧njeļ.

• Kweilo̧k ko an zone.

• Ko̧o̧njeļ an ritōl an mijen (n̄an mijenede ritōl ro reddik).

Enan̄in aolep raan, mijenede jikejuuļ eo am̧ ekoba iien n̄an ekkatak am̧ make im ippān eo m̧ōttam̧. Lale Jon̄ak ko an Mijenede n̄an Rikaļoor ro an Jisōs Kraist, 2.4, n̄an meļeļe ko kōn jikejuuļ eo am̧ raan otemjeļo̧k.

Ta eo kwoj katak ilo iien ekkatak eo am̧ make enaaj jipan̄ eok ilo ekkatak eo ippān eo m̧ōttam̧ im iien ko ekkatak ko jet ilo an elaajrak itulōn̄ Ilo jekjek kein kom̧iro ej “katakin doon pedped in katak ko an aelōn̄ in kiin̄ eo” (Katak im Bujen Ko 88:77).

Aitia ko n̄an Kōkōm̧anm̧anļo̧k Ekkatak eo Am̧ kōn Kwaļo̧k Gospel eo Aō

Kwaļo̧k Gospel eo Aō ej kōllaajrak jeje ko rekwojarjar im pedped in katak ko an gospel eo ippān doon n̄an jipan̄ eok itok n̄an jeļā Rilo̧mo̧o̧r im gospel eo An. Jibadbad eo an ej n̄an jipan̄ kūrōōrļo̧k eok n̄an jeje ko rekwojarjar im kōjeraam̧m̧an ekkatak eo am̧ kōn er. Ekkatak eoon in jipan̄ ko an jeje ko rekwojarjar ilo kajjojo jebta ilo aolepān mijen eo am̧.

Kajjojo jebta ilo Kwaļo̧k Gospel eo Aō ekitbuuj aitia ko im m̧akūtkūt ko n̄an jipan̄ eok ekkatak im kōjerbal ta eo kwoj katak. Kōjerbal men kein ilo ekkatak eo am̧ make im ippān eo m̧ōttam̧ (lale Jon̄ak ko an Mijenede, 2.4). Kwomaron̄ barāinwōt kōjerbali ilo iien kweilo̧k ko an district ko̧o̧njeļ im kweilo̧k ko an zone. Ekkatak eo am̧ enaaj ļapļo̧k an wejepedik n̄e kwoj lo wāween ko n̄an kōjerbal ta eo kwoj katak.

Ej jipan̄ n̄an an wōr juon karōk n̄an ekkatak eo am̧ make. Kwomaron̄ ejake karōk eo am̧ make me ej leļo̧k men ko raorōk tata n̄an pedped in katak ko an gospel eo me kwonaaj kōņaan bwe en em̧m̧anļo̧k am̧ meļeļe kaki. Kwomaron̄ barāinwōt ļam ekkatak eo am̧ ippān jebta ko ilo Kwaļo̧k Gospel eo Aō. N̄an waanjon̄ak, kwomaron̄ kōjerbal katak ko ilo jepta 3 n̄an tōl ekkatak eo am̧ kōn katak eo im pedped in katak ko kwonaaj katakin. Ej aikuj em̧m̧an am̧ jeļā katakin kein bwe kwon maron̄ katakin kōn Jetōb eo ilo naan ko am̧ make.

Je kakeememej ko ilo am̧ ekkatak. Kōjerbal juon peba ak electronic study journal (eo āinwōt Gospel Library) eo n̄an jipan̄ eok meļeļe, kalikkar, im keememej ta eo kwoj katak.

Jino ekkatak eo am̧ kōn jar bwe Jetōb Kwojarjar eo jipan̄ eok katak. E enaaj bōktok jeļā, meļeļe, im lōke eo me enaaj kōjeraam̧m̧an mour eo am̧ im kōtļo̧k bwe kwon kōjeraam̧m̧an ro jet. Kōpeļļo̧k ļōmņak eo am̧ im būruōm̧ n̄an im̧we ko im kōļmenļo̧kjeņ ko kwoj būki jān E. Ekoba kōļmenļo̧kjeņ kein ilo kakeememej ko am̧.

Etale jōnōļ in ekkatak eo am̧ iien otemjej n̄an bar keememej en̄jake ko ilo jetōb, lo kōļmenļo̧kjeņ ko rekāāl, im kile eddōkļo̧k eo am̧.

Jerbal n̄an Kwaļo̧k Gospel eo Aō

Kōjerbal Kwaļo̧k Gospel eo Aō app eo n̄an jipan̄ eok kōjerbal pedped in katak ko kwoj katak. App in ewōr ilo mobile device eo nejūm̧. Ewōr ie men ko n̄an jipan̄ eok kōkōm̧anm̧anļo̧k am̧ kakūrm̧ool jibadbad in mijenede eo am̧. Men kein ekitbuuj:

• Meļeļe eo kōn aikuj ko im eddōkļo̧k eo an armej ro kwoj katakin.

• Juon jikin n̄an ļo̧o̧ke eddōkļo̧k eo am̧ n̄an kakōļļe aorōk eo an kōttōpar.

• Juon kōļōnta n̄an ļo̧o̧ke karōk ko am̧ im jikejuuļi m̧akūtkūt ko.

• Juon mab in eria eo am̧ im meļeļe ko jet raorōk n̄an jipan̄ eok kadedeļo̧k kōttōpar ko am̧.

Kwaļo̧k Gospel eo Aō ekitbuuj elōn̄ aitia ko n̄an kōjerbal app eo n̄an jipan̄ eok lo, katakin, im peptaij armej.

Kōjerbal Kwaļo̧k Gospel eo Aō jān Membōr ro an Kabun̄ in

Kwaļo̧k Gospel eo Aō ej juon kein jipan̄ eaorōk ejjab wōt n̄an mijenede ro ak n̄an aolep membōr ro an Kabun̄ in. N̄an waanjon̄ak, ekkatak kake enaaj jipan̄ memebōr ro:

• Katak im katakin gospel eo an Jisōs Kraist (ekkatak jebta ko 1, 2, 3, im 10).

• Uwaaki kajjitōk ko kōn gospel eo (ekkatak jebta ko 3 im 5).

• Meļeļe eļapļo̧k kōn kappukōt im pedped ioon Jetōb Kwojarjar (ekkatak jebta 4).

• Meļeļe kajoor eo an Bok in Mormon (ekkatak jebta 5).

• Kappukot m̧wil ko m̧wilin Kraist (ekkatak jebta 6).

• Kakūrm̧ool bujen eddo eo aer n̄an leto letak gospel eo kōn mour kōn pedped in katak ko an iakwe, kwaļo̧k, im kūr jebta ko 9 im 13).

• Kalōk bōro kuk ippān mijenede ro rej jerbal aolep raan (ekkatak jepta 13).

Ekkatak Kwaļo̧k Gospel eo Aō—eļap tata jebta 3—enaaj lukkuun jipan̄ n̄an jim̧or jodikdik ro im rūtto ro me rej m̧aanjabpopo n̄an jerbal in mijenede.