“Jebta 3: Ekkatak im Katakin Gospel eo an Jisōs Kraist,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Ekkatak im Katakin Gospel eo an Jisōs Kraist,” Kwaļo̧k Gospel eo Aō

Jebta 3

Ekkatak im Katakin Gospel eo an Jisōs Kraist

Katak ko ilo jebta in epād ie katak eo aorōk, pedped in katak ko, im kien ko an gospel eo an Jisōs Kriast. Katak kein rej ta eo rikanaan ro remour im rijilōk raar jiron̄ eok n̄an ekkatak im katakin. Rej letok ijin bwe kwon maron̄ jipan̄ ro jet alikkar aer meļeļe katak eo an Kraist.

Jekjōn eo im̧aan tata ilo jebta in ej kūr eo n̄an peptaij. Aolepān jebta eo ej kitbuuj katak kein rej ellaajrak:

Ekkatak eoon ko im kaorōk katak eo ilo kajjojo katak. Ilo am̧ kōm̧m̧ane, Jetōb enaaj kwaļok kam̧ool kōn m̧ool ko kwoj ekkatak. E enaaj jipan̄ eok jeļā ta eo n̄an ba im kōm̧m̧ane n̄an jipan̄ ro jet bōk juon kam̧ool kōn m̧ool in. (Lale Katak im Bujen Ko 84:45.)

Armej ro enaaj itok n̄an jeļā eļapļo̧k kōn Rilo̧mo̧o̧r eo ilo aer kōm̧m̧ane ta eo E ekar kūr er n̄an kōm̧m̧ane. Leļo̧k kūr ko ilo kajjojo katak, im jipan̄ armej ro kōjparok kallim̧ur ko aer. Ilo an armej ro kōjparok kallim̧ur ko, rej jino mour kōn gospel eo an Jisōs Kraist im kōppopo n̄an kōm̧m̧ani bujen ko ippān Anij.

Katakin aolep katak ko m̧okta im ālkin petpaij. Mijenede ro rej jerbal aolep raan rej bōk m̧aan ilo katakin katak ko ilo iien ko jim̧or. Mijenede ro an ward ak membōr ro jet rej bōk koņaer n̄e ekkar. Lale jebta ko 10 im 13 kōn meļeļe ko kōn kobaik membōr ro ilo katak ko.

Pojak n̄an Katakin

Ilo am̧ kōppopo n̄an katakin, etale meļeļe ko an kajjojo armej ilo Preach My Gospel (Kwaļo̧ Gospel eo Aō) app eo. Kōm̧m̧ane juon karōk in katak pedped ioon aikuj ko an armej eo. Ļōmņak kōn ta eo ej aikuj jeļā im en̄jake ilo iien loļo̧k in katakin eo am̧. Jetōb enaaj kōļapļo̧k kijejeto ko am̧, ilo am̧ bōk iien n̄an kōppopo im karōk.

Erkein jet iaan kajjitōk ko kwe ak kampānien eo m̧ōttam̧ en jar ilo ļōmņak kaki ilo amiro kōppopo n̄an katakin.

Ta kūr eo kwonaaj leļo̧k n̄an jipan̄ armej eo kalōk tōmak ilo Kraist im kōm̧m̧an wōnm̧aanļo̧k? Kūr ko rej ekōjkan am̧ jipan̄ armej ro ukweļo̧k im en̄jake “kajoor in Ripinmuur eo” (Hilamōn 5:11). Ļōmņak kōn eddōkļo̧k eo, jekjek eo, im aikuj ko an armej eo. Innām kōjem̧ļo̧k kōn juon ak elōn̄ļo̧k kūr ko ilo karōk in katakin eo am̧.
Ta Katak im pedped in katak ko renaaj jipan̄ armej eo kōjparok kallim̧ur eo jaar kūr e bwe en kōm̧m̧ane? Jar ilo am̧ kāālet ta katak im pedped in katak ko renaaj jipan̄ armej ro meļeļe etke kōjparok kallim̧ur eo aer ej aorōk n̄an er im n̄an Irooj.
Ekōjkan ad naaj jipan̄ armej eo katak katak eo? N̄an kōppopo n̄an katakin katak eo, ejake im kōmeļeļeik ta eo kwonaaj katakin kōjerbal katak 1–4. Kile kajjitōk ko, eoon ko, waanjon̄ak ko, im media ko rekkar me renaaj jipan̄ armej eo meļeļe ta eo kwoj katakin. Lale jebta 10 kōn meļeļe ko kōn ekōjkan kōkōm̧anm̧anļo̧k am̧ katakin.
Ta kōjeraam̧m̧an ko Anij ekar kallim̧ur kaki n̄an bōk im kōjparok kallim̧ur ko? Ilo am̧ ekkatak katak eo, kile kōjeraam̧m̧an ko kar kallim̧ur kaki an Anij? Ilo am̧ katakin, kōjeraam̧m̧an ko kallim̧ur kaki im kwaļo̧k naan in kam̧ool n̄an er.
Ewi wōt membōr ro remaron̄ bōk koņaer? Ilo kweilo̧k in kōtōbalbal eo wiik otemjeļo̧k, kāālet ewi wōt membōr ro remaron̄ jipan̄ eok katakin n̄an jipan̄ armej eo. M̧ōkta jān katak eo, ekōnono kōn kōppopo eo aer. Lale jebta 10.
Ta eo jemaron̄ kōm̧m̧ane n̄an jipan̄ armej ro kōjparok kallim̧ur ko aer ālkin ad em̧m̧akūt? Etale ļo̧kanļo̧k kōn kōm̧m̧ane juon loļo̧k ekadu raan otemjeļo̧k n̄an jpan̄ armej ro kōjparok kallim̧ur ko aer. Pukōt wāween ko n̄an kobaik membōr ro n̄an jipan̄ ro kwoj katakin kōjparok kallim̧ur ko aer. Loļo̧k in emaron̄ kitbuuj riiti juon jebta jān Bok in Mormon ak jeje ko rekwojarjar jet. Eļan̄n̄e juon ejjab kōjparok juon kar kallim̧ur m̧otakļo̧k, emaron̄ in em̧m̧anļo̧k n̄an jipan̄ e m̧okta jān leļo̧k bar juon. Lale jebta 11.
Ekōjkan ad maron̄ kōkōm̧anm̧anļo̧k ad jipan̄ er iien eo tok juon? Ālkin aolep jekjek in katakin, etale en̄jake eo an armej eo kwoj katakin. Tōmak eo aer ilo Kraist ej ke eddōkļo̧k? Rej ke en̄jake Jetōb? Rej ke ukweļo̧k im kōm̧m̧an im kōjparok kallim̧ur ko? Rej ke jar, ekkatak Bok in Mormon, im etal n̄an jar? Kōm̧m̧ani karōk ko n̄an jipan̄ er.

Katak in jān Būruōm̧ āinwōt Tōl jān Jetōb

Kōnono n̄an aolep elder ro im sister ro, Būreejtōnji eo Kein Kajuon im Doulul eo an Jon̄oulruo Rijilōk ro raar ba:

“Jibadbad eo ad ej n̄an katakin ennaan eo an gospel eo kar kōjepļaaktok ilo juon jekjek eo me ej kōtļo̧k an Jetōb eo tōl jim̧or mijenede ro im ro rej katakin. Ej aorōk n̄an katak katak ko an [katak ko], bōtaab men kein rej aikuj jab ālijin men n̄an katakin. Mijenede eo ej aikuj en̄jake anemkwoj n̄an kōjerbal naan ko an make āinwōt tōl jān Jetōb. E ejjab aikuj kakilōklōki naan ko, ak en kōnono jān bōro ilo naan ko an make. E emaron̄ ilo̧k jān laajrak eo an katak ko , leļo̧k ta eo me ej im̧we n̄an kōm̧m̧ane, ekkar n̄an itok limo im aikuj ko an [armej] eo. Ekōnono jān kareel eo an make im ilo naan ko an make, ej aikuj kwaļo̧k naan in kam̧ool kōn m̧ool eo kōn katak ko an.”

Jerbal in Kakkilōklōk

Wujlepļo̧k n̄an kakilōklōk laajrak in katak ko ilo kajjojo katak. Jab kakilōklōke katak ko naan kōn naan.

Eļan̄n̄e kwoj katak kajin eo kein karuo, pedped e ekkatak kajin eo am̧ ilo kōppopo n̄an katakin katak ko. Kakilōklōk naan ko, eoon ko, im jon̄ak ko an jāntōj ko, im enaan ko ilo tukadu in katak eo ilo aer waļo̧k ilo katak ko. Kakilōklōk laajrak ko ilo katak ko 1–3 emaron̄ in barāinwōt jipan̄. Ta eo kwoj kakilōklōke ej aikuj erom am̧ kake im ļap meļeļe in.

Ļōmņak in kakilōklōke eoon ko an katak eo raorōk n̄an kōjerbali ilo katakin eo am̧ im mour eo am̧. Kajoor eļļap emaron̄ itok jān kakkilōklōk eoon ko. Eoon kein remaron̄ kōkajoorļo̧k eok im lewaj n̄an eok im̧we im kaenōm̧m̧an. Remaron̄ im̧we eok n̄an oktak. N̄e kwoj kakilōklōki eoon ko, Jetōb emaron̄ būkwaj n̄an ļōmņak eo am̧ n̄e kwoj aikuji er.

Katakin im Kūr ekkar n̄an Aikuj ko An Kajjojo Armej

Ewōr ippam̧ maron̄ n̄an ukōt am̧ katakin katak ko ilo jabdewōt wāween ej jipan̄ armej ro lukkuun pojak n̄an peptaij im kapene. Ewi wōt katak eo kwoj katakin, n̄āāt eo kwoj katakin, im ewi jon̄an iien eo ewōr ippam̧ n̄an kōm̧m̧an ijo em̧m̧an tata n̄an kāālet aikuj ko an armej eo kwoj katakin kōn tōl eo an Jetōb. N̄an waanjon̄ak, n̄e katakin armej ro me ejjeļo̧k juon jeļā kōn Rikūrijin, kwomaron̄ jino kōn jipan̄ er ejakejuon ekkejel eļapļo̧k ippān Jemedwōj Ilan̄ im juon meļeļe kōn karōk eo An (lale “Teaching People Who Do Not Have a Christian Background” in chapter 10).

Kōtļo̧k bwe Jetōb en tōl eok ilo ta kūr ko n̄an liļo̧k im n̄āāt eo n̄an liļo̧k. Kūr eo ejim̧we ilo iien eo ejim̧we emaron̄ im̧we armej ro n̄an kōm̧m̧ani men ko me renaaj kalōk aer tōmak. Jekjōn kein remaron̄ tōlļo̧k n̄an juon oktak in bōro ekajoor (lale Mosaia 5:2; Alma 5:12–14).

Katakin katak ko me reļem waan, alikkar, im kadu. Ekkā wōt, an juon iien katakin aikuj in jab aitokļo̧k jān 30 minit, im kwomaron̄ katakin armej eo ilowaaan wōt 5 minit.

Ekka am̧ aikuj in naaj kweilo̧k elōn̄ļo̧k jān juon alen n̄an katakin pedped in katak ko ilo juon katak. Emakijkij an armej ro naaj em̧maanļo̧k aer meļeļe ennaan eo am̧ eļan̄n̄e kwoj katakin katak ko rekaddu, emakijkij katakin, im jiddikin kein katak ko.

Ekkatak Jeje ko Rekwojarjar

Ta eo kwoj tōl n̄an katakin?

Etke eaorōk n̄an ekkatak katak eo ilo katak ko?