“Jebta 3: Katak 3—Gospel eo an Jisōs Kraist,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 3: Katak 3,” Kwaļo̧k Gospel eo Aō

Jebta 3: Katak 3

Gospel eo an Jisōs Kraist

Armej Remaron̄ Ļōmņak

Wōn in Jisōs Kraist? Ekōjkan An maron̄ jipan̄ n̄a im baam̧le eo aō?
Ta meļeļe in n̄an tōmak ilo Jisōs Kraist? Ekōjkan an wōrr tōmak ilo E maron̄ kōjeraam̧m̧an mour eo aō?
Ta meļeļe in n̄an ukweļo̧k?
Ekōjkan aō maron̄ en̄jake aenōm̧m̧an im jeorļo̧k bōd eo an Anij ālik aō kar kōm̧mani kāālet ko renana?
Ta jibadbad eo an peptaij?
Ta in menin letok eo an Jetōb Kwojarjar?
Ta meļeļe in niknik n̄an jem̧ļo̧kin?

Gospel eo an Jisōs Kraist ej wāween eo n̄an ad itok n̄an Kraist. Bwe an ļam waan juon ajri emaron̄ meļeļe kake. Katakin in ej pedped ioon gospel eo im katak eo an Jisōs Kraist, ekoba tōmak ilo Jisōs Kraist, ukweļo̧k, peptaij, menin letok eo an Jetōb Kwojarjar, im niknik n̄an jem̧ļo̧kin. Ej barāinwōt pedped ioon ekōjkan an gospel eo kōjeraam̧m̧an aolep ajri ro nejin Anij.

Naan eo gospel ej meļeļe in “naan em̧m̧an.” Gospel eo an Jisōs Kraist ej naan eo em̧m̧an kōnke ej letok katak eo—m̧ool eo indeeo—jej aikuji n̄an itok n̄an E im mour (lale 1 Nipai 15:14). Gospel eo ej katakin kōj ekōjkan mour juon mour em̧m̧an, mour ko eļap meļeļeier. Naan eo em̧m̧an kōn gospel eo ej letok wāween eo n̄an kōj n̄an jeorļo̧k jerawiwi ko ad, kōkwojarjar, im bar ro̧o̧l n̄an im̧aan mejān Anij.

Katakin Kōlmenļo̧kjeņ eo: Gospel eo an Kraist im Katak eo an Kraist

Gospel eo An ej koba aolep katak ko, pedped in katak eo, kakien ko, kien ko, kain̄i ko, im bujen ko remenin aikuj n̄an lo̧mo̧o̧r im mour ijo eutiej tata.

Ennaan eo an gospel eo ej bwe jemaron̄ tōpar lo̧mo̧o̧r eo, kajoor in pinmuur eo an Jisōs Kraist. Jej kōm̧m̧ane menin kōjerbal tōmak e ilo E, peptaij, bōk menin letok eo an Jetōb Kwojarjar, im niknik n̄an jem̧ļo̧kin (lale Ļaajrak in Tōmak ko 1:4).

Menin ej barāinwōt jeļā kake āinwōt katak eo an Kraist. Mour kōn katakin in ej wāween ad itok n̄an Kraist im mour (lale 1 Nipai 15:14). En̄in kajoor kar katakin ilo Bok in Mormon (lale 2 Nipai 31; 32:1–6; 3 Nipai 11:31–40; 27:13–22). Jibadbad eo am̧ ej n̄an jipan̄ armej itok n̄an Kraist kōn jipan̄ er mour kōn katak eo An.

Lale Unin Tōl ko n̄an Jeje Ko Rekwōjarjar, “Gospel,” “Katak an Kraist”; Gospel Topics, “Gospel.”

Elmakot ko n̄an Katakin

Jekjōn in ej letok juon jon̄an in kōllaajrak n̄an jipan̄ eok kōppopo n̄an katakin. Ej barāinwōt koba waanjon̄ak in kajjitōk ko im kūr ko kwomaron̄ kōjerbali.

Ilo am̧ kōppopo n̄an katakin, jar ilo ļōmņak kōn kajjojo jekjek an armej eo im aikuj ko ilo jetōb. Kāālet ta eo ejipan̄ tata n̄an katakin. Kōppopo n̄an kōmeļeļeik tōōm̧ ko me armej ro remaron̄ jab meļeļe. Karōk ekkar n̄an ewi jon̄an iien eo enaaj wōr ippam̧, keememej n̄an kōkaduki katak ko.

Kāālet eoon ko n̄an kōjerbali ilo am̧ katakin. Jekjōn eo an “Pedped in Katak eo” an katak eo ekoba elōn̄ eoon ko n̄an jipan̄.

Ļōmņak ewi wōt kajjitōk ko n̄an kajjitōk ilo am̧ katakin. Karōk kūr ko n̄an liļo̧k me renaaj kōketak kajjojo armej n̄an jerbale.

Kōmejajaik kōjeraam̧m̧an ko kar kallim̧ur kaki an Anij, im kwaļo̧k naan in kam̧ool eo am̧ kōn ta eo kwoj katakin.

Ta eo Kwomaron̄ Katakin Armej ro ilo 15–25 minit ko.

Kāālet juon ak elōn̄ļo̧k pedped in katak kein n̄an katakin. Pedped in katak eo n̄an kajjojo pedped in katak ej leļo̧k ālkin laajrak in.

Mijen eo Ekwojarjar an Jisōs Kraist

Anij ekar jilkintok Nejin Ejitōnbōro, Jisōs Kraist, n̄an laļ in n̄an lo̧mo̧o̧ren kōj jān jerawiwi eo ad im mej.
Kōn wōt en̄taan in pinmuur eo an Jisōs, jemaron̄ erreo jān jerawiwi ko ad im kōkwojarjar ilo ad uwekļo̧k.
Ālkin an Jisōs kar debwāāl, E ekar jerkakpeje. Kōn wōt Jerkakpeje eo An, jenaaj aolep maron̄ jerkakpeje ālkin ad mej. Menin ej meļeļe in bwe kajjojo jetōb im ānbwin an armej renaaj bar koba, im kajjojo iaad enaaj mour indeeo ilo juon ānbwin eweppān, jerkakjepe.

Tōmak ilo Jisōs Kraist

Tōmak ej pedped in katak eo kein kajuon an gospel eo an Jisōs Kraist.
Tōmak ilo Jisōs Kraist ekoba wōr lōke bwe E ej Nejin Anij im lōke ilo E āinwōt ad Rilo̧mo̧o̧r im Ripinmuur.
Tōmak ilo Jisōs Kraist ej juon pedped in katak an jerbal im kajoor.
Jej kōkajoorļo̧k tōmak eo ad ilo jar, ekkatak jeje ko rekwojarjar, im pokake kien ko.

Ukweļo̧k

Tōmak ilo Jisōs Kraist ej tōlļo̧k kōj n̄an ukwelo̧k. Ukweļo̧k ej jekjek eo an oktakļo̧k n̄an Anij im oktakļo̧k jān jerawiwi. Ilo ad ukweļo̧k, jerbal ko ad, ikdeelel ko, im ļōmņak ko rej oktak n̄an lukkuun jokkun wōt juon ippān ankilan Anij.
N̄e jej m̧ool in ukweļo̧k, Anij ej jeorļo̧k ad bōd. Jeorļo̧k bōd ej pidodo kōnke Jisōs Kraist ekar en̄taan kōn jerawiwi ko ad.
Ilo ad ukweļo̧k, jej en̄jake aenōm̧m̧an ilo an bōd eo ad im būrom̧ōj eo jako.
Ukweļo̧k ej juon jekjek to̧o̧n wōt ad mour. Anij ej karuwaineneikļo̧k kōj aolep iien jej ukweļo̧k. E ejjamin naaj ebbwer jān kōj.

Peptaij: Bujen eo Ad Kein Kajuon ippān Anij

Peptaij ej wāween eo jej m̧okta deļo̧n̄e juon bujen jemjerā ippān Anij.
Peptaij ewōr ruo m̧ōttan: Peptaij kōn dān im kōn Jetōb. N̄e jej peptaij im kapene, jej erreo jān jerawiwi ko ad, letok n̄an kōj jino juon mour ekāālr.
Jej peptaij kōn tulo̧k, ļoor waanjon̄ak eo an Jisōs.
Ajri ro rejjab peptaij m̧ae iien eo rej ruwalitōk iiō dettaer. Ajri ro me rej mej m̧okta jān iiō jab in rej lo̧mo̧or kōn Pinmuur eo an Jisōs Kraist.
Jej bōk m̧ōttan kwojkwoj eo kajjojo wiik n̄an keememej en̄taan eo an Jisōs im n̄an bar kōkāāl bujen ko ad ippān Anij.

Menin Letok eo an Jetōb Kwojarjar

Jetōb Kwojarjar ej membōr eo kein kajilu an Doulul in Anij.
Ālkin ad peptaij, jej bōk menin letok eo an Jetōb Kwojarjar kain̄i eo an kapene.
N̄e jej bōk menin letok eo an Jetōb Kwojarjar, jemaron̄ bōk jemjerā eo An ilo aolepān mour ko ad eļan̄n̄e jej tiljek.
Jetōb Kwojarjar eo ej kōkkwojarjar kōj, tōl kōj, kaenōm̧m̧an kōj, im ej jipan̄ kōj jeļā m̧ool eo.

Niknik n̄an Jem̧ļo̧kin

Niknik ekoba wōnm̧aanļo̧k wōt n̄an kōjerbal tōmak ilo Kraist kajjojo raan. Jej wōnm̧aanļo̧k wōt n̄an kōjparok bujen ko ad ippān Anij, ukweļo̧k, kappukōt jemjerā eo an Jetōb Kwojarjar, im bōk m̧ōttan kwojkwoj eo.
Ilo ad tiljek kappukōt n̄an ļoor Jisōs Kraist, Anij ej kallim̧ur bwe jenaaj bōk mour indeeo.

Gospel eo an Jisōs Kraist ej Kōjeraam̧m̧an Aolep Ajri ro Nejin Anij

Mour kōn gospel eo ej kam̧wilaļļo̧k lan̄lōn̄ ko ad, im̧we jerbal ko ad, im kōkōm̧anm̧an jemjerā ko ad.
Jej lukkuun āinwōt m̧ōņōņō—jim̧or āinwōt kajjojo armej im āinwōt baam̧le ko—n̄e jej mour kōn katak ko an Jisōs Kraist.
Kōn gospel eo an Jisōs Kraist, baam̧le ko rej jeraam̧m̧an ilo mour in im maron̄ koba ippān doon n̄an indeeo im mour ilo m̧aan mejān Anij.

Kajjitōk ko Kwomaron̄ Kajjitōk Ippān Armej ro

Kajjitōk kein rej waanjon̄ak ko kōn ta eo kwomaron̄ kajjitōk ippān armej ro. Kajjitōk kein remaron̄ jipan̄ eok bōk bwebwenato ko im meļeļe ko eļap meļeļeier kōn aikuj ko an juon armej im kōļmenļo̧kjeņ.

Ta eo kwojeļā kōn Jisōs Kraist?
Ta meļeļe in n̄an kwe n̄an wōr tōmak ilo Jisōs Kraist?
Ta oktak ko kwoj kōņaan n̄an kōm̧m̧ani ilo mour eo am̧?
Ta meļeļe eo am̧ kōn uwekļo̧k?
Ta meļeļe eo am̧ kōn peptaij? Ta eo kwomaron̄ kōm̧m̧ane kiiō n̄an m̧aanjabpopo n̄an peptaij?
Ekōjkan an Jetōb Kwojarjar eo maron̄ jipan̄ eok ilo iaļ eo am̧ n̄an bar ro̧o̧l n̄an im̧aan mejān Anij?
Ta apan̄ eo me kwe ak baam̧le eo am̧ ej jelm̧ae? Jemaron̄ ke kwaļo̧k jet iaan wāween ko gospel eo an Jisōs Kraist emaron̄ jipan̄?

Kūr ko Kwomaron̄ Liļo̧k

Kwonaaj ke kajjitōk ippān Anij ilo jar n̄an jipan̄ eok jeļā bwe ta eo kōm kar katakin ej m̧ool? (Lale “Kōļmenļo̧kjeņ ko kōn Katakin; Jar” ilo jekjōk eo āliktata an katak 1.)
Kwonaaj ke etal n̄an jar Jabōt in n̄an ekkatak eļapļo̧k kōn ta eo kōm kar katakin?
Kwonaaj ke riiti Bok in Mormon im jar n̄an jeļā bwe ej naan an Anij? (Kwomaron̄ elmakote jepta ko ak eoon ko rejenolo̧k.)
Kwonaaj ke ļoor waanjon̄ak eo an Jisōs im peptaij? (Lale “Kūr eo n̄an Peptaij im Kapene,” eo em̧ōkaj an waļo̧k ilo katak 1.)
Jemaron̄ ke karōk juōn iien n̄an am bar lotok?

Pedped in Katak eo

Jekjōn in ej letok katak eo im eoon ko n̄an am̧ ekkatak n̄an kōkajoorļo̧k jeļā im naan in kam̧ool eo am̧ kōn gospel eo im n̄an jipan̄ eok katakin.

Mijen eo Ekwojarjar an Jisōs Kraist

Jemedwōj Ilan̄ ekar jilkintok Nejin Ejitōnbōro, Jisōs Kraist, n̄an laļ in n̄an kōm̧m̧an bwe en pidodo n̄an aolepedwōj n̄an en̄jake lan̄lōn̄ ilo laļ in im mour indeeo ilo laļ eo ej itok. “Im en̄in ej gospel eo, im naan ko rem̧m̧an, … bwe [Jisōs Kraist] eaar itok ilo laļ in … n̄an ineeki jero̧wiwi ko an laļ in, im n̄an kokwōjarjare laļ in, im n̄an karreoik e jān aolep jab weeppān; Bwe kōn E aolep ren maron̄ mour” (Katak im Bujen Ko 76:40–42).

Āinwōt riwabanban ro, jej aolep jerawiwi, im jej aolep mej. Jerawiwi im mej renaaj bōbrae kōj jān bōk mour indeeo ippān Anij ijello̧kin n̄e ewōr juon ad Ripinmuur (lale 2 Nipai 9). M̧okta jān an laļ in kar kōm̧anm̧an, Jemedwōj Ilan̄ ekar kāālet Jisōs Kraist n̄an ļomo̧o̧ren kōj. Ilo juon kakōļļe kileplep an iakwe, Jisōs ekar itok n̄an laļ n̄an kakūrm̧ool mijen in ekwojarjar. E ekar kapidodoik n̄an kōj n̄an lo̧mo̧o̧ren jān jerawiwi ko ad, im E ekar kanooj lale bwe jenaaj aolep jerkakpeje ālkin ad mej.

Jisōs ekar mour juon mour ejjeļo̧k jerawiwi ie. Ilo jem̧ļo̧kin jerbal in karejar eo An ilo mour in, E ekar bōk ioon Make jerawiwi ko ad kōn An en̄taan ilo Gethsemane im ke kar debwāāl E (lale 1 Nipai 11:33). En̄taan eo an Jisōs ekar kanooj in ļap jon̄an ekar kōm̧man bwe E en “n̄an wūdiddid kōnke metak eo, im n̄an bōtōktōk ilo aolepān ānbwinnū” (Katka im Bujen Ko 19:18). Ālkin Debwāāl eo An, Jisōs ekar jerkakpeje, bōk anjo̧ ioon mej. Ippān doon, iien kein rej Pinmuur eo an Jisōs Kraist.

Jerawiwi ko ad rej kōm̧m̧an bwe jen jab erreo ilo jetōb, im “ejjeļo̧k juon men ettoon emaron̄ pād ippān Anij” (1 Nipai 10:21) Ilo kakobaba, kien jim̧we ej aikuji juon kaje n̄an jerawiwi ko ad.

En̄taan in pinmuur eo an Jisōs ej letok iaļ eo n̄an kōj n̄an erom erreo jān jerawiwi im kōkkwojarjar ilo ad ukweļo̧k. Ej barāinwōt letok wāween eo n̄an kakūrm̧ool aikuj ko an jim̧we (lale Alma 42:15, 23-24). Rilo̧mo̧o̧r ekar ba, “Iaar … en̄taan kōn men kein n̄an aolep, bwe ren maron̄ jab en̄taan eļan̄n̄e renaaj ukeļo̧k; Ak eļan̄n̄e reban ukeļo̧k renaaj aikuj en̄taan em̧ool āinwōt N̄a” (Katak im Bujen Ko 19:16–17). Eļan̄n̄e en kar jab Jisōs Kraist, jerawiwi enaaj kar kōjem̧ļo̧k aolep kōjatdikdik n̄an juon mour eo ilju jekļaj ippān Jemedwōj Ilan̄.

N̄an ajeļo̧k E Make āinwōt juon katok n̄an kōj, Jisōs ekar jab joļo̧k eddo eo ad make. Ej aikuj wōr ad tōmak ilo E, ukweļo̧k, im kajjieon̄ kōjparok kien ko. Ilo ad ukwelo̧k, Jisōs enaaj bōk ilo etad jim̧we ko An kōn meanwōd an Jemen (lale Moronai 7:25–28). Kōn wōt jojomar eo an Rilo̧mo̧o̧r, Jemedwōj Ilan̄ ej jeorļo̧k ad bōd, karjeer kōj jān eddo eo im būrom̧ōj kōn jerawiwi ko ad (lale Mosaia 15:7–9). Jej erreo ilo jetōb im maron̄ āliktata ruwainene n̄an im̧aan mejān Anij.

Mijen eo ekwojarjar an Jisōs ekar barāinwōt lo̧mo̧o̧ren kōj jān mej. Kōnke E ekar jerkakjepe, jenaaj aolep jerkakpeje ālkin ad mej. Menin ej meļeļe in bwe kajjojo jetōb im ānbwin an armej renaaj bar koba, im kajjojo iaad enaaj mour indeeo ilo juon ānbwin jerkakpeje eweppān . Eļan̄n̄e ekar jab Jisōs Kraist, mej enaaj kar jem̧ļo̧k eo an aolep kōjatdikdik kōn juon mour ilju im jekļaj ippān Jemedwōj Ilan̄.

Ekkatak Jeje Ko Rekwojarjar

Anij Eaar Jilkintok Nejin

Lo̧mo̧o̧r kōn Jisōs Kraist

Ekkatak Eļapļo̧k kōn Pedped in Katak In

“Kraist Eo Emour”
Unin Tōl eo n̄an Jeje Ko Rekwōjarjar: “Jisōs Kraist”
Gospel Topics: “Jesus Christ”

Tōmak ilo Jisōs Kraist

Pedped eo m̧okta ilo gospel in ej tōmak ilo Irooj Jisōs Kraist. Tōmak ej pedped eo n̄an aolep pedped in katak ko jet an gospel eo.

Tōmak ilo Jisōs Kraist ekoba bōk lōke eo bwe E ej Nejin Jitōnbōro Emake Wōt Nejin Anij. Ej koba lōke ilo E āinwōt ad Rilo̧mo̧o̧r im Ripinmuur—bwe E ej make wōt ad iaļ n̄an jepļaakļo̧k n̄an im̧aan mejān Anij Jerbal 4:10–12; Mosaia 3:17; 4:6–8). Kar karuwaineneik kōj n̄an kōjerbal “tōmak edim ilo E, atartar wōt ioon tōllo̧ke ko an Eo ekajoor n̄an lo̧mo̧o̧ren” (2 Nipai 31:19).

Tōmak ilo Jisōs Kraist ekoba tōmak bwe E ekar en̄taan kōn jerawiwi ko ad ilo en̄taan in pinmuur eo An. Kōn wōt en̄taan eo An, jemaron̄ erreo im lo̧mo̧o̧ren ilo ad ukweļo̧k. Karreo in ej jipan̄ kōj lo aenōm̧m̧an eo im kōjatdikdik eo ilo mour in. Ej barāinwōt kōtļo̧k kōj n̄an bōk juon lan̄lōn̄ ilo tarlep in ālkin ad mej.

Tōmak ilo Jisōs Kraist ekoba lōke bwe kōn E, jenaaj aolep jerkakpeje ālkin ad mej. Tōmak in emaron̄ rie im kaenōm̧m̧an kōj ilo iien mej ko. Būromōj eo kōn mej emaron̄ in joļo̧k kōn kallim̧ur eo an Jerkakpeje eo.

Tōmak ilo Jisōs Kraist ekoba tōmak im lōke bwe E ekar bōk ioon E make en̄taan ko im m̧ōjņo ko ad (lale Aiseia 53:3–5). E ejeļā kōn en̄jake eo An ekōjkan jipan̄ kōj ilo apan̄ ko an mour in (lale Alma 7:11–12; Katak im Bujen Ko 122:8). Ilo ad kōjerbal tōmak, E ej jipan̄ kōj bun̄ m̧aanļo̧k ilo apan̄ ko.

Kōn tōmak eo ad ilo E, Jisōs emaron̄ kemour kōj ilo kanniōk im jetōb. E ej aolep iien pojak n̄an jipan̄ kōj ilo ad keememej kūr eo An n̄an “Reitok n̄an Eō ilo ļōmņak otemjeļo̧k; jab pere, jab mijak” (Katak im Bujen Ko 6:36).

Juon Pedped in Katak an Jerbal im Kajoor

Tōmak ilo Jisōs Kraist ej tōlļo̧k n̄an jerbal. Jej kwaļo̧k ad tōmak kōn pokake kien ko im kōm̧m̧an em̧m̧an kajjojo raan. Jej ukweļo̧k jān jerawiwi ko ad. Jej ettā n̄an E. Jej kajjieon̄ n̄an eromļo̧k āinwōt E.

Ilo ad kōjerbal tōmak, jemaron̄ en̄jake kajoor eo an Jisōs ilo mour ko ad kajjojo raan. E enaaj kōļapļo̧k kijejeto ko ad rem̧m̧an tata. E enaaj jipan̄ kōj eddōkļo̧k im jum̧ae kapo.

Kōkajoorļo̧k Ad Tōmak

Rikanaan Alma ekar katakin bwe kalōk tōmak emaron̄ jino kōn juon “kōņaan wōt tōmak” (Alma 32:27). Innām, kōn tōmak eo ad ilo Jisōs Kraist n̄an an eddōkļo̧k, jej aikuj in naajdiki kōn ekkatak naan ko An, kōjerbal katak ko An, im pokake kien ko An. Almam ekar katakin bwe ilo ad kijenmej, niknik naajdik naan eo an Anij ilo būruōd “enaaj le okran [im jino āinwōt] juon wōjke ej eddekļo̧k n̄an mour ejjeļo̧k jem̧ļo̧kin”—kōn menin ej kōkajoorļo̧k ad tōmak (Alma 32:41; lale eoon 26–43).

Ekkatak Jeje Ko Rekwojarjar

Tōmak, Kajoor, im Lo̧mo̧o̧r

Katak eo an Tōm̧ak

Waanjon̄ak ko kōn Tōmak

Jerbal ko im Pokake

Tōmak n̄an Ukweļo̧k

Alma 34

Katak Eļapļo̧k kōn Pedped in Katak in

Unin Tōl ko n̄an Jeje Ko Rekwōjarjar: “Jisōs Kraist,” “Kōllajrak, Pinmuur,” “Tōmak”
Bible Dictionary: “Faith”
Gospel Topics: “Jesus Christ,” “Atonement of Jesus Christ,” “Faith in Jesus Christ”

Ukweļo̧k

Ta In Ukweļo̧k?

Ukweļo̧k ej pedped in katak eo kein karuo an gospel eol Tōmak ilo Jisōs Kraist im ad iakwe n̄an E ej tōlļo̧k kōj n̄an ukweļo̧k (lale Hilamōn 14;13). Ukweļo̧k ej jekjek eo an oktakļo̧k n̄an Anij im oktakļo̧k jān jerawiwi. Ilo ad ukweļo̧k, jerbal ko ad, ikdeelel ko, im ļōmņak ko rej oktak n̄an lukkuun jokkun wōt juon ippān ankilan Anij. Jeorļo̧k bōd in jerawiwi ekar kōm̧m̧an bwe en pidodo kōn Jisōs Kraist im en̄taan in pinmuur eo An.

Ukweļo̧k eļapļo̧k jān kōjerbal kajoor in kōņaan eo n̄an ukōt juon m̧wil ak anjo̧ ioon juon m̧ōjņo̧. Ukweļo̧k ej juon oktak m̧ool n̄an Kraist, eo ej letok n̄an kōj kajoor eo n̄an en̄jake juon “oktak ekajoor” ilo būruōd (Alma 5:12–14). Ilo ad en̄jake oktak in bōro in, jej bar ļotak ilo jetōb (lale Mosaia 27:24–26).

Kōn ukweļo̧k, jej ejake juon erreilo̧k kāāl n̄an Anij, kōj make, im laļ in. Jej en̄jake iakwe eo an Anij an kāāl n̄an kōj āinwōt ajri ro Nejin—im iakwe eo an Rilo̧mo̧o̧r n̄an kōj. Iien eo em̧m̧an n̄an ukweļo̧k ej juon iaan kōjeraam̧m̧an ko reļļap tata Anij ekar letok n̄an kōj kōn Nejin.

Jekjek eo an Ukweļo̧k

N̄e jej ukweļo̧k, jej kile jerawiwi ko ad im en̄jake būrom̧ōj em̧ool. Jej kwaļo̧k jerawiwi ko ad n̄an Anij im kajjitōk kōn An jeorļo̧k bōd. Jej barāinwōt kwaļo̧k jerawiwi ko reļļap n̄an ritōl ro an Kabun̄ in kar kōmālim, eo enaaj jipan̄ kōj ilo ad ukweļo̧k. Jej kōm̧m̧ane ta eo jemaron̄e n̄an kōm̧m̧an kōro̧o̧l, eo ej meļeļe in kajjieon̄ kajim̧we jorrāān ko jerbal ko ad remaron̄ in kar kōm̧m̧ani. Ukweļo̧k m̧ool em̧m̧an tata kwaļo̧ke kōn jerbal ko rejim̧we ilo juon tōre in iien.

Ukweļo̧k ej juon jekjek raan otemjej ilo aolepān mour ko ad. “Bwe otemjej raar jero̧wiwi, im rej likjab jān aiboojoj an Anij” (Rom 3:23). Jej aikuj wōnm̧aanļo̧k wōt in ukweļo̧k, keememej bwe “jemaron̄ in kōm̧m̧an men otemjej ilo Eo ej kakajoor” kōj (Pilippai 4:13). Irooj ekar kam̧ool n̄an kōj bwe “jon̄an emmakijkij in wōt an armej ro aō ukeļo̧k Inaaj jeorļo̧k aer bōd” (Mosaia 26:30).

Kōjeraam̧m̧an ko an Ukweļo̧k

Ukweļo̧k ej juon pedped in katak em̧m̧an me ej bōktok lan̄lōn̄ im aeōm̧m̧an. Ej bōktok n̄an kōj “kajoor in Ripinmuur eo, n̄an lo̧mo̧o̧r eo an armej ro [ad]” (Hilamōn 5:11).

N̄e jej ukweļo̧k, bōd eo ad im būrom̧ōj eo rej kemour ilo wōnm̧aanļo̧k in iien. Jej lem̧ōņōņō kōn kareel eo an Jetōb Kwojarjar ilo eļapļo̧k kōjeraam̧m̧an. Ad ikdeelel n̄an ļoor Anij ej eddōkļo̧k ilo an kajoorļo̧k.

“Ebooļ armej ro rej ļōmņak ukweļo̧k ej āinwōt kaje—juon men eo kajekdo̧o̧ne. … Ak en̄jake in kōn kaje ej kōm̧m̧an jān Setan. Ej kajjieon̄ kabōjrak kōj jān ad reilo̧k n̄an Jisōs Kraist, eo ej jutak kōn pā ko reppeļļo̧k, kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare kōj” (Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67).

Ekkatak Jeje ko Rekwojarjar

Ukweļo̧k

Lo̧mo̧o̧r im Jeorļo̧k Bōd

Hilamōn 5:10–11

Tūriam̧o Kake Ro Rej Ukweļo̧k

Alma 12:32–34; 42:13, 21–24

Katak Eļapļo̧k kōn Pedped in Katak in

Unin Tōl eo n̄an Jeje Ko Rekwōjarjar: “Ukeļo̧k,” “Kōllaajrak, Pinmuur”
Bible Dictionary: “Repentance”
Bok in Bōk Meļeļe, 32.1
Gospel Topics: “Repentance,” “Atonement of Jesus Christ”

Peptaij: Bujen eo Ad Kein Kajuon ippān Anij

Tōmak ilo Jisōs Kraist im ukweļo̧k ej kōpooj kōj n̄an kain̄i ko an peptaij im kapene. Peptaij ej kain̄i in lo̧mo̧o̧r eo kein kajuon an gospel eo an Jisōs Kraist. Ilo ad bōk kain̄i in elan̄lōn̄ an kōjatdikdik, jej kōm̧m̧ane bujen eo ad kein kajuon ippān Anij.

Kain̄i ej juon jerbal ekwojarjar ak iien kōm̧man jān mālim eo an priesthood eo. Jet kain̄i ko, āinwōt peptaij, rej aorōk n̄an lo̧mo̧o̧r eo ad.

Kōn kain̄i ko, jej kōm̧m̧ani bujen ko ippān Anij. Kaini kein rej kallim̧ur ko rekwojarjar ikōtaad im Anij. E ej kallim̧ur n̄an kōjeraam̧m̧an kōj ilo ad kōjparok kallim̧ur ko ad Ippān. Ej aikuj wōr juon ad kallim̧ur ekajoor n̄an kōjparok kallim̧ur ko ad ippān Anij.

Anij ekar letok kain̄i ko im bujen ko n̄an jipan̄ kōj itok n̄an E im bōk mour indeeo. Ilo ad bōk kain̄i ko an priesthood eo im kōjparok bujen ko rej ekkeijak ippān, jemaron̄ en̄jake “kajoor in āinwōt anij” ilo mour ko ad (Katak im Bujen Ko 84:20).

Bujen Peptaij Eo

Rilo̧mo̧o̧r eo ekar katakin bwe peptaij ej menin aikuj n̄an kōj n̄an deļo̧n̄e aelōn̄ in kiin̄ eo an lan̄ (lale Jon 3:5). Ej barāinwōt menin aikuj n̄an kōj n̄an erom ro uwaan Kabun̄ eo an Jisōs Kraist. Ad Rilo̧mo̧o̧r ej kōm̧m̧ane juon waanjon̄ak kōn An kar peptaij (lale Matu 3:13–17).

N̄e jej peptaij im kōjparok bujen eo ad, Anij ej kallim̧ur n̄an jeorļo̧k ad jerawiwi (lale Jerbal 22:16; 3 Nipai 12:1–2). Kōjeraam̧m̧an in ekar kōm̧m̧an bwe en pidodo kōn pinmuur in en̄taan eo an Jisōs Kraist, eo “ear yokwe kōj, im kōtļo̧k kōj jān jero̧wiwi ko ad kōn bōtōktōkin” (Revelesōn 1:5). Anij ej barāinwōt kallim̧ur n̄an kōjeraam̧m̧an kōj kōn jemjerā eo an Jetōb Kwojarjar bwe jen maron̄ kōkkwojarjar, tōl, im kaenōm̧m̧an.

Ilo m̧ōttan eo ad an bujen peptaij eo, jej kam̧ool bwe jenaaj m̧ōņōņō in bōk iood make etan Jisōs Kraist. Jej barāinwōt kallim̧ur n̄an iien otemjej keememej E im kōjparok kien ko An. Jej kallim̧ur n̄an iakwe im jerbal n̄an ro jet, “n̄an m̧ōņōņō in jan̄ ippān ro rej jan̄; … kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9; lale eoon 8–10, 13). Jej kwaļo̧k juon kije eo n̄an jerbal n̄an Jisōs Kraist n̄an jem̧ļo̧kin mour ko ad (lale Katak im Bujen Ko 20:37; Mosaia 2:17).

Bujen kallim̧ur eo ad ej koba ippān peptaij eo rej juon eddo ļapļap. Rej barāinwōt im̧we im lan̄lōn̄. Rej ejake jon jemjerā eaorōk ikōtaad im Jemedwōj Ilan̄ kōn An letok iakwe eo An ejjeļo̧k jem̧ļo̧kin.

Peptaij kōn Tulōk

Jisōs ekar katakin bwe jej aikouj in peptaij kōn tulo̧k n̄an jeorļo̧k jerawiwi ko ad (lale Katak im Bujen Ko 20:72–74). Peptaij kōn tulo̧k ej kakkōļe in mej, kallib, im Jerkakpeje eo an Jisōs Kraist (lale Rom 6:3–6).

Peptaij kōn tulo̧k ebarāinwōt wōr juon an kakōļļe ekajoor n̄an kōj. Ej jutak kōn mej eo an mour eo ad m̧okta, kallūb eo an mour jab eo, im waļo̧ktok eo ad ilo bar ļotak ilo jetōb. N̄e jej peptaij, jej jino jekjek eo an bar ļotak im erom ļaddik ro im leddik ro nejin Kraist ilo jetōb (lale Mosaia 5:7–8; Rom 8:14–17).

Ajri ro

Ajri ro rejjab peptaij m̧ae iien rej tōpar dettan eo an bōk eddo, eo ej ruwalitōk iiō dettan (lale Katak im Bujen Ko 68:27). Ajri ro me rej mej m̧okta jān iiō jab eo rej lo̧mo̧o̧ren kōn Pinmuur eo an Jisōs Kraist (lale Moronai 8:4–24; Katak im Bujen Ko 137:10). M̧okta jān an ajri ro peptaij, rej aikuj in katakin kōn gospel eo bwe ren pojak n̄an bun̄tōn in aorōk ilo mour ko aer n̄an kōm̧m̧ane juon bujen ippān Anij.

Kwojkwoj eo

Jemedwōj Ilan̄ ej kōņaan bwe jen tiljek n̄an bujen ko jej kōm̧m̧ani Ippān. N̄an jipan̄ kōj kōm̧m̧ane menin, E ej kakiene kōj n̄an kweilo̧k emakijkij n̄an bōk m̧ōttan kwojkwoj eo. Kwojkwoj eo ej juon kain̄i an priesthood eo me Jisōs ekar kwaļo̧k kadkad in n̄an Rijilōk ro An m̧oktak wōt jān Pinmuur eo An.

Bōk m̧ōttan kwojkwoj eo ej dilepān jibadbad eo an kweilo̧k in kwojkwoj eo kajjojo wiik. Pilawā eo im dān eo rej kōjeraam̧m̧ani im lito litak n̄an jarlepju eo. Pilawā eo ej jutak kōn katok eo an Rilo̧mo̧o̧r an Āinbwinin n̄an kōj. Dān eo ej jutak kōn bōtōktōk eo An, eo E ekar kōto̧o̧rļo̧k kōn kōj.

Jej bōk m̧ōttan kakōļļe kein ilo ememej katok eo an Rilo̧mo̧o̧r im n̄an bar kōkāāl bujen ko ad ippān Anij. Jej bōk kōkāāl in kallim̧ur eo bwe Jetōb eo enaaj pād ippād.

Ekkatak Jeje ko Rekwojarjar

Waanjon̄ak eo an Kraist

Bujen Peptaij Eo

Men ko Aikuj n̄an Peptaij

Kōjeraam̧m̧an ko kar Kallim̧ur Kaki an Peptaij

Aikuj eo kōn Mālim

Jisōs ekar Kōjeraam̧m̧an Kwojkwoj eo

Jar ko an Kwojkwoj eo

Moronai 4 im 5
Katak im Bujen Ko 20:75–79

Bōk M̧ōttan Kwojkwoj eo

Katak Eļapļo̧k kōn Pedped in Katak in

Unin Tōl eo n̄an Jeje Ko Rekwōjarjar: “Peptaij, Peptaiji,” “Kwojkwoj”
Gospel Topics: “Baptism,” “Sacrament”

Menin Letok eo an Jetōb Kwojarjar

Bōk Menin Letok eo an Jetōb Kwojarjar

Peptaij ewōr ruo m̧ōttan. Jisōs ekar katakin bwe jej aikuj in “ļotak jān dān im im Jetōb” n̄an deļo̧n̄ ilo aelōn̄ in kiin̄ eo an Anij (Jon 3:5; kakobaba in katak Josep Smith ekar katakin, “Peptaij kōn dān ej door jimettan in peptaij eo, im ejjab em̧m̧an ilo an jako jimettan eo juon—eo ej, petpaij kōn Jetōb Kwojarjar” (Teachings of Presidents of the Church: Joseph Smith [2007], 95).

Peptaij kōn dān aikuj in itok ālkin kōn peptaij kōn Jetōb n̄an an dedeļo̧k. N̄e jej bōk peptaij kein jim̧or, jej erreo jān jerawiwi ko ad im bar ļotak ilo jetōb. Innām jej jino juon mour in jetōb kāāl āinwōt rikaļoor ro an Kraist.

Jej bōk peptaij eo an Jetōb kōn juon kain̄i ņa etan kapene. Kain̄i ej kōm̧m̧an jān juon ak elōn̄ļo̧k rikabwijer ro an priesthood eo kōn likūt peier ioon bōrad. M̧okta rej kapen kōj āinwōt juon membōr in Kabun̄ in, innām rej letok menin letok eo an Jetōb Kwojarjar iood. En̄in ejja kain̄i eo wōt me ej kōnono kake ilo Kallim̧ur Ekāāl im Bok in Mormon (lale Jerbal 8:14–17; 3 Nipai 18:36–37).

Jetōb Kwojarjar ej membōr eo kein kajilu an Doulul in Anij. E ej jerbal ilo bōro kuk ippān Jemedwōj Ilan̄ im Jisōs Kraist. N̄e jej bōk menin letok eo an Jetōb Kwojarjar, jemaron̄ bōk jemjerā eo An ilo aolepān mour ko ad ilo ad tiljek.

Ekōjkan an Jetōb Kwojarjar eo Kōjeraam̧m̧an Kōj

Menin letok eo an Jetōb Kwojarjar ej juon iaan menin letok ko an Jemedwōj Ilan̄ reļļap tata. Jetōb Kwojarjar eo ej karreoik im kōkkowjarjar kōj, kōm̧m̧an bwe en ļapļo̧k ad kwojarjar, ļapļo̧k ad dedeļo̧k, ļapļo̧k ad āinwōt Anij (lale 3 Nipai 27:20). E ej jipan̄ kōj oktak im eddōkļo̧k ilo jetōb ilo ad kappukōt n̄an ļoor katak ko an Anij.

Jetōb Kwojarjar eo ej jipan̄ kōj ekkatak im kile m̧ool eo (lale Moronai 10:5). E ej barāinwōt kapen m̧ool eo n̄an būruōd im ļōmņak ko ad. Ilo kakobaba, Jetōb Kwojarjar eo ej jipan̄ kōj katakin m̧ool eo (lale Katak im Bujen Ko 42:14). N̄e jej ekatak im katakin m̧ool eo kōn kajoor eo an Jetōb Kwojarjar, E ej bōkļo̧k n̄an būruōd (lale 2 Nipai 33:1).

Ilo ad kappukōt tōl eo jān Jetōb Kwojarjar eo ilo ettā bōro, E enaaj tōl kōj (lale 2 Nipai 32:5). Menin ej koba im̧we kōj kōn ekōjkan ad maron̄ jerbal n̄an ro jet.

Jetōb Kwojarjar eo ej letok kajoor in jetōb eo n̄an jipan̄ kōj anjo̧ ioon m̧ōjņo̧. E ej jipan̄ kōj jum̧ae kapo. E emaron̄ kakkōl kōj kōn kauwōtata ilo jetōb im kanniōk.

Jetōb Kwojarjar eo enaaj jipan̄ kōj ilo apan̄ ko an mour. E enaaj kaenōm̧m̧an kōj ilo iien mālijjon̄ ko ak būrom̧ōj, kaobrak kōj kōn kōjatdikdik (lale Moronai 8:26). Kōn Jetōb Kwojarjar eo, jemaron̄ en̄jake iakwe eo an Anij n̄an kōj.

Ekkatak Jeje ko Rekwojarjar

Kadkad eo an Jetōb Kwojarjar

Kōjeram̧m̧an ko im Kareel eo jān Jetōb Kwojarjar

Aorōk eo an Menin Letok eo an Jetōb Kwojarjar

Katak Eļapļo̧k kōn Pedped in Katak in

Unin Tōl eo n̄an Jej Ko Rekwōjarjar: “Jetōb Kwojrajar,” “Menin Letok eo an Jetōb Kwojarjar”
Bible Dictionary: “Holy Ghost”
Gospel Topics: “Holy Ghost,” “Spiritual Gifts”

Niknik n̄an Jem̧ļo̧kin

N̄e jej peptaij im kapen, jej deļo̧n̄e juon bujen ippān Anij. Ibwilijin men ko jet, jej kallim̧ur n̄an kōjparok kien ko An im jerbal n̄an E n̄an jem̧ļo̧k in mour ko ad (lale Mosaia 18:8–10, 13; Katak im Bujen Ko 20:37).

Ālkin ad kar deļo̧n̄e iaļ in gospel eo kōn peptaij im kapene, jej kōm̧m̧ane aolep kijejeto n̄an pād wōt. N̄e jej ilo̧k jān iaļ eo jekdo̧o̧n n̄e jidik wōt, jej kōjerbal tōmak ilo Kraist n̄an ukweļo̧k. Kōjeraam̧m̧an eo an ukweļo̧k ej kōtļo̧k ad bar ro̧o̧lļo̧k n̄an iaļ in gospel eo im bar bōk kōjeraam̧m̧an ko an bujen eo ad ippān Anij. Ilo ad m̧ool in ukweļo̧k, Anij ej iien otemjej m̧ōņōņō in jeorļo̧k ad bōd im karuwaineneikļo̧k kōj.

Niknik n̄an jem̧ļo̧kin ej meļeļe in pād wōt ilo tiljek n̄an Anij n̄an jem̧ļo̧k in mour ko ad—ilo iien ko rem̧m̧an im iien ko reppen, ilo iien jeraam̧m̧an im apan̄. Jej kōtļo̧k an Kraist ļōme kōj ilo ettā im kōm̧m̧ane kōj n̄an āinwōt E. Jej reiļo̧k n̄an Kraist kōn tōmak, lōke, im kōjatdikdik jekdo̧o̧n ta eo ej waļo̧k n̄an mour ko ad.

Niknik n̄an jem̧ļo̧kin ejjab baj meļeļe in dāpdep wōt m̧ae iien jej mej. Ijello̧kin, ej meļeļe in kalimjōk mour ko ad, ļōmņak ko, im jerbal ko ilo Jisōs Kraist. Ej koba wōnm̧aanļo̧k wōt n̄an kōjerbal tōmak ilo Kraist kajjojo raan. Jej barāinwōt wōnm̧aanļo̧k wōt n̄an ukweļo̧k, kōjparok bujen ko ad ippān Anij, im kappukōt jemjerā eo an Jetōb Kwojarjar.

Niknik n̄an jem̧ļo̧kin ej ekoba “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k.” Jemedwōj Ilan̄ ej kallim̧ur bwe ilo ad niknik n̄an jem̧ļo̧kin, jej “naaj bōk mour indeeo” (2 Nephi 31:20).

Ekkatak Eoon ko

Niknik n̄an Jemļo̧kin

Kōjeram̧m̧an ko n̄an Ro Me rej Niknik

Katak Eļapļo̧k kōn Pedped in Katak in

Gospel Topics: “Adversity”
Unin Tōl eo n̄an Jeje Ko Rekwōjarjar: “Niknik,” “Men Ko Reppen”

Gospel eo an Jisōs Kraist ej Kōjeraam̧m̧an Aolep Ajri ro Nejin Anij

Gospel eo an Jisōs Kraist ej aolep aolep ajri ro nejin Anij. Jeje ko rekwojarjar ej katakin bwe “aolep rej āinwōt juon n̄an Anij” jekdo̧o̧n ta bwebwenato in mour ko ad ak jekjek eo. E ej kūr “aolep n̄an itok n̄an Ippān im bōk leen em̧m̧an eo An; im e ejjeļo̧k ej kabbōjrak e jān an itok ippān” (2 Nipai 26:33).

Gospel eo ej kōjeraam̧m̧an kōj ilo aolepān mour ko ad ilo mour in im aolepān mour indeeo. Eļap ad naaj maron̄ m̧ōņōnō—jim̧or āinwōt kajjojo armej im āinwōt baam̧le ko—n̄e jej mour kōn katak ko an Jisōs Kraist (lale Mosaia 2:41; “Baam̧le Eo: Juon Naan in Kean̄ n̄an Laļ in,” ChurchofJesusChrist.org). Mour kōn gospel eo ej kam̧wilaļļo̧k lan̄lōn̄ ko ad, im̧we jerbal ko ad, im kōkōm̧anm̧an jemjerā ko ad.

Mour kōn gospel eo an Jisōs Kraist emaron̄ barainwōt bōbrae kōj jān kōm̧m̧ani kāālet ko me renaaj kakkure kōj ilo kanniōk im jetōb. Ej jipan̄ kōj lo kajoor eo im kaenōm̧m̧an eo ilo iien ko an mālijjon̄ im būrom̧ōj. Ej letok wāween eo n̄an juon mour indeeo elan̄lōn̄.

Juon iaan ennaan ko an gospel eo kōjepļaaktok ej bwe jej aolep m̧ōttan baam̧le eo an Anij. Jej ļaddik ro im leddik ro nejin Anij rejitōnbōro. Jekdo̧o̧n ta jekjek eo an baam̧le eo aō ioon laļ in, kajjojo iaad ej juon membōr in baam̧le eo an Anij.

Bar juon m̧ōttan ennaan eo ad em̧m̧an ej bwe baam̧le ko remaron̄ koba ippān doon n̄an indeeo. Baam̧le eo ej ekkapit jān Anij. Karōk in m̧ōņōņō eo an Jemedwōj Ilan̄ ej kōmaron̄ jemjerā ko an baam̧le n̄an wōnm̧aanļo̧k wōt ālkin mej. Kain̄i ko im bujen ko rekwojarjar an tampeļ rej kapidodoik n̄an baam̧le ko n̄an koba ippān doon n̄an indeeo.

Kōn meram in gospel eo, baam̧le ko remaron̄ ņa mejļan likjab in meļeļe ko, iakwelel ko, im apan̄ ko. Baam̧le ko raar jorrāān kōn tarpok maron̄ in mour kōn ukweļo̧k, jeorļo̧k bōd, im tōmak ilo kajoor in Pinmuur eo an Jisōs Kraist.

Gospel eo an Jisōs Kraist ej jipan̄ kōj kōkajoorļo̧k jemjerā ko an baam̧le. M̧weo ej jikin eo em̧m̧an tata n̄an katakin im ekkatak pedped in katak ko an gospel in. M̧weo kar ejaak ioon pedped in katak ko an gospel eo enaaj juon jikin kone im kōjparok. Enaaj juon jikin ijo Jetōb eo an Irooj emaron̄ jokwe ie.

Ekkatak Jeje ko Rekwojarjar

Katak Eļapļo̧k kōn Pedped in Katak in

Unin Tōl eo n̄an Jeje ko Rekwojarjar, “Gospel”
“Baam̧le Eo: Juon Naan in Kean̄ n̄an Laļ in”
Bok Bōk Meļeļe Eļap, jebta 2 im 16
Gospel Topics: “Gospel,” “Family”

Kōllaajrak an Katak eo Ekadu n̄an Jemettan

Ļoor kōllaajrak eo ej juon jon̄ak kōn ta eo kwomaron̄ katakin juon eļan̄n̄e ewōr wōt jidik am̧ iien. Kōjerbal kōllaajrak in , kāālet juon ak elōn̄ļo̧k pedped in katak ko n̄an katakin. Pedped eo an katak eo n̄an kajjojo pedped in katak kar kwaļo̧k im̧aanļo̧k ilo katak eo.

Ilo am̧ katakin, kajjitōk kajjitōk ko im ron̄jake. Leļo̧k kūr ko me renaaj jipan̄ armej ro ekkatak ekōjkan eddōkļo̧k epake Anij. Juon iaan kūr ko raorōk ej n̄an armej eo n̄an bar ioon kom̧. Aitokan katak eo enaaj pedped ioon kajjitōk ko kwoj kajjitōk im ron̄jake eo kwoj kōm̧m̧ane.

Ta eo Kwomaron̄ Katakin Armej ro ilo 3–10 Minit ko

Anij ekar jilkintok Nejin Ejitōnbōro, Jisōs Kraist, n̄an laļ in n̄an lo̧mo̧o̧ren kōj jān jerawiwi eo ad im mej.
Tōmak ilo Jisōs Kraist ej juon pedped in katak an jerbal im kajoor. Tōmak ej jipan̄ kōj en̄jake kajoor in kōkajoorļo̧k eo an Rilo̧mo̧o̧r ilo mour ko ad.
Tōmak ilo Jisōs Kraist ej tōlļo̧k kōj n̄an ukwelo̧k. Ukweļo̧k ej jekjek eo an oktakļo̧k n̄an Anij im oktakļo̧k jān jerawiwi. Ilo ad ukweļo̧k, jerbal ko ad, ikdeelel ko, im ļōmņak ko rej oktak n̄an lukkuun jokkun wōt juon ippān ankilan Anij.
N̄e jej ukweļo̧k, Anij ej jeorļo̧k ad bōd. Jeorļo̧k bōd ej pidodo kōnke Jisōs Kraist ekar en̄taan kōn jerawiwi ko ad.
Peptaij ewōr ruo m̧ōttan: Peptaij kōn dān im kōn Jetōb. N̄e jej peptaij im kapen, jej karreo jān jerawiwi ko ad, letok n̄an kōj juon ijjino kāāl in mour.
Ālkin ad peptaij kōn dān, jej bōk menin letok eo an Jetōb Kwojarjar kōn kain̄i eo an kapene.
Ilo ad tiljek ļoor iaļ in gospel eo n̄an jem̧ļo̧k in mour ko ad, Anij ej kallim̧ur bwe jenaaj bōk mour indeeo.