“Jebta 3: Katak 4—Erom Rikaļoor ro an Jisōs Kraist To̧o̧n Wōt Ad Mour,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)
“Jebta 3: Katak 4,” Kwaļo̧k Gospel eo Aō
Jebta 3: Katak 4
Erom Rikaļoor ro an Jisōs Kraist To̧o̧n Wōt Ad Mour
Katakin katak In
Peptaij ej juon kain̄i ekōlan̄lōn̄ an kōjatdikdik. N̄e jej peptaij, jej kwaļo̧k ikdeelel eo ad n̄an ļoor Anij im deļo̧n̄e iaļ eo ej tōlļo̧k n̄an mour indeeo. Jej barāinwōt kwaļo̧k ad kallim̧ur n̄an erom rikaļoor ro an Jisōs Kraist to̧o̧n wōt ad mour.
Katak in ej ejaak ekkar n̄an bujen ko jej kōm̧m̧ani ilo peptaij. Ej koba jekjōn kein raorōk, kajjojo iaer rej subjekjōn ko:
Jipan̄ armej meļeļe bwe pedped in katak ko im kien ko kwoj katakin rej m̧ōttan bujen eo renaaj kōm̧m̧ane ilo peptaij. Kwaļo̧k n̄an er ekōjkan an kajjojo m̧ōttan in katak in naaj jipan̄ er “itok n̄an Kraist … bōk leen lo̧mo̧o̧r eo an” (Omnai 1:26; lale barāinwōt 1 Nipai 15:14).
Kwonaaj kōņaan katakin katak in ilo jejjo loļo̧k ko. Ejjab aolep iien juon loļo̧k in katakin aikuj ļe jān 30 minit ko. Ekkā an em̧m̧anļo̧k n̄e ekadu, ikutkutļo̧k loļo̧k ko me rej kōbare m̧ōttan ko reddik an kein katakin eo.
Karōk ta eo kwonaaj katakin, n̄āāt eo kwonaaj katakin kake, im ewi lōn̄ in am̧ naaj bōke. Ļōmņak kōn aikuj ko an armej ro kwoj katakin, im kappukōt tōl eo an Jetōb. Epidodo am̧ okoktak n̄an katakin ekkar n̄an ta eo enaaj em̧m̧an tata jipan̄ armej ro m̧aanjabpopo n̄an peptaij im kapene.
Jet jekjōn ko ilo katak in ekoba kūr ko rejenolo̧k. Kappukōt im̧we eo ilo jokāālet ekōjkan im n̄āāt eo n̄an leļo̧k kūr ko. Kwon kea kōn jon̄an meļeļe eo an kajjojo armej. Jipan̄ e mour kōn gospel eo jidik kōn jidik.
Bujen eo Ad n̄an M̧ōņōņō n̄an Bōk Iood Etan Jisōs Kraist.
N̄e jej peptaij, jej kallim̧ur n̄an ļoor Jisōs Kraist “kōn aolepān m̧wilaļ in buruō.” Jej barāinwōt kam̧ool bwe jej “m̧ōņōņō in bok [iood] etan Kraist” (2 Nipai 31:13; lale barāinwōt Katak im Bujen Ko 20:37).
Bōk iood make etan Jisōs Kraist ej meļeļe in bwe jej keememej E im kajjieon̄ n̄an mour āinwōt rikaļoor ro An to̧o̧n wōt ad mour. Jej kōtļo̧k an meram eo An eromaak ilo kōj n̄an ro jet. Jej lo kōj make āinwōt An im likūt E m̧okta ilo mour ko ad.
Jekjōn kein rej kōmeļeļeik ruo wāween ko jej keememej im ļoor Jisōs Kraist.
Kōmakijkij Jar
Jar emaron̄ juon bwebwenato eļem waan ippān Jemedwōj Ilan̄ me ej itok jān bōro. Ilo jar, jej kōnono Ippān ilo wujlepļo̧k im m̧ool. Jej kwaļo̧k iakwe n̄an E im kam̧m̧oolol kōn kōjeraam̧m̧an ko ad. Jej barāinwōt kajjitōk kōn jipan̄, kōjparok, im tōl. Ilo ad kiil jar ko ad, jej aikuj bōk iien n̄an bōjrak im ron̄jake.
Jisōs ekar katakin, “Kom̧ aikuj iien otemjej jar n̄an Jema ilo eta” (3 Nipai 18:19, kakobaba in katak; lale barāinwōt Moses 5:8). Ilo ad jar ilo etan Jisōs Kraist, jej keememej E im Jemedwōj Ilan̄ jim̧or.
Jisōs ej kōm̧m̧ane waanjon̄ak in n̄an kōj n̄an ļoore ilo ad jar. Jemaron̄ katak eļap kōn jar jān ekkatak jar ko an Rilo̧mo̧o̧r ilo eoon kein (lale Matu 6:9–13; Jon 17).
Jar ko ad remaron̄ koba m̧ōttan kein:
-
Jino kōn ba etan Jemedwōj Ilan̄.
-
Kwaļo̧k en̄jake ko an būruōd, eo āinwōt kam̧m̧oolol kōn kōjeraam̧m̧an ko jaar būki.
-
Kajjitōk kajjitōk ko, kappukōt tōl, im kajjitōk kōn kōjeraam̧m̧an ko.
-
Kōjem̧ļo̧ke kōn ba, “Ilo etan Jisōs Kraist, amen.”
Jeje ko rekwojarjar rej kakien kōj n̄an jar ilo jibbon̄ im ilo jota. Ijo ke, jemaron̄ jar ilo jabdewōt iien im ilo jabdewōt jekjek. N̄an jar ko ad make im baam̧le eo, emaron̄ in ļap meļeļe in n̄an bukwelōlō n̄e jej jar. Jej aikuj iien otemjej wōr juon jar ilo būruōd. (Lale Alma 34:27; 37:36–37; 3 Nipai 17:13; 19:16.)
Jar ko ad rej aikuj in ļōmņak kaki im jān bōro. N̄e jej jar, jej aikuj joļo̧k ba ejja men ko wōt ilo ejja wāween ko wōt.
Jej jar kōn tōmak, m̧ool, im lukkuun kōttōpar n̄an jerbali uwaak ko jej būki. Ilo ad kōm̧m̧ane menin, Anij enaaj tōl kōj im jipan̄ kōj kōm̧m̧ani jokāālet ko rem̧m̧an. Jenaaj en̄jake n̄an epakeļo̧k E. E enaaj letok n̄an kōj meļeļe im m̧ool. E enaaj kōjeraam̧m̧an kōj kōn ineenōm̧m̧an, aenōm̧m̧an, im kōkajoor.
Ekkatak Jeje ko Rekwojarjar
Katak Eļapļo̧k kōn Pedped in Katak In
Ekkatak Jeje Ko Rekwojarjar
Nipai ekar katakin, “Kwōjkwōj ioon naan ko an Kraist; bwe renaaj jiron̄ [er] aolep men ko kom̧ij aikuj kōm̧m̧an” (2 Nipai 32:3; lale barāinwōt 31:20).
Ekkatak jeje ko rekwojarjar ej juon wāween aorōk n̄an keememej im ļoor Jisōs Kraist. Ilo jeje ko rekwojarjar jej katak kōn mour eo, jerbal in karejar eo, im katak ko An. Jej barāinwōt katak kōn kallim̧ur ko An. Ilo ad riiti jeje ko rekwojarjar, jej en̄jake An iakwe. Jetōb ko ad rej ererakļo̧k, ad tōmak ilo E ej ļapļo̧k, im ļōmņak ko ad rej eromaakļo̧k. Naan in kam̧o̧ol ko ad kōn mijen kwojarjar eo An rej jino kajoorļo̧k.
Jej keememej im ļoor Jisōs Kraist ilo ad kōjerbal naan ko An ilo mour ko ad. Jej aikuj ekatak jeje ko rekwojarjar raan otemjeļo̧k, eļap tata Bok in Mormon.
Jeje ko rekwojarjar an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej Baibōļ Kwojarjar eo, Bok in Mormon, Katak im Bujen Ko, im Bōōr eo Eļap Wōņāān. Men kein rej barāinwōt ņa etaer “bok in jeje ko rekwojarjar.”
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje ko Rekwojarjar: “Jeje Ko Rekwōjarjar”
-
Gospel Topics: “Scriptures”
Bujen eo Ad n̄an Kōjparok Kien ko an Anij
Kakeememej: Elōn̄ wāween ko n̄an katakin kien ko ilo jekjōn in. N̄an waanjon̄ak, kwomaron̄ katakin er ilo jejjo iien loļo̧k ko. Ak kwoaron̄ katakin jet iaer āinwōt m̧ōttan katak ko jilu im̧aan. N̄e katakin kōn kien ko, kanooj lale n̄an kobaik er n̄an bujen peptaij eo im karōk in lo̧mo̧o̧r eo.
N̄e jej peptaij, jej bujen ippān Anij bwe jenaaj “kōjparok kien ko an” (Mosaia 18:10; Alma 7:15).
Anij ekar letok n̄an kōj kien ko kōnke E ej iakwe kōj. E ej kōņaan ijo em̧m̧an tata n̄an kōj, jim̧or kiiō im ilo mour indeeo. Āinwōt Jemedwōj Ilan̄, E ejeļā ta eo jej aikuji n̄an jeraam̧m̧an eo ad ilo jetōb im kanniōk. E ebarāinwōt jeļā ta eo enaaj bōktok n̄an kōj m̧ōņōņō eo eļap tata. Kajjojo kien ej juon menin letok ekwojarjar, kar letok n̄an tōl jokāālet ko ad, bōbrae kōj, im jipan̄ kōj eddōkļo̧k.
Juon un jaar itok n̄an laļ in ej n̄an katak im eddōkļo̧k kōn kōjerbal anemkwoj in kāālet eo ad ilo māletlet (lale Ebream 3:25). Kāālet n̄an pokake kien ko an Anij—im n̄an ukweļo̧k n̄e jej likjab—ej jipan̄ kōj kōjbwebwe iaļ in ilo mour in emakijkij an pen.
Kien ko an Anij rej juon kein jipan̄ an kōkajoorļo̧k im kōjeraam̧m̧an (lale Katak im Bujen Ko 82:8–9). N̄an kōjparok kien ko, jej katak bwe rejjab kakien ko reddo me rej kapan̄ anemkwoj eo ad. Anemkwoj eo em̧ool ej itok jān pokake kien ko. Pokake ej juon kein jipan̄ n̄an kōkajoorļo̧k me ej bōktok n̄an kōj meram̧ im jeļā eo kōn Jetōb Kwojarjar. Ej bōktok n̄an kōj lem̧ōņōņō eo eļap tata im ej jipan̄ kōj tōpar kōjatdikdik eo ad ekwojarjar āinwōt ajri ro nejin Anij.
Anij ej kallim̧ur n̄an kōjeraam̧m̧an kōj ilo ad kōjparok kien ko An. Jet iaan kōjeraam̧m̧an ko rejenolo̧k n̄an jejjo kien ko. Kōjeraam̧m̧an ko An reļļap tata rej aenōm̧m̧an ilo mour in im mour indeeo ilo laļ eo ej itok. (Lale Mosaia 2:41; Alma 7:16; Katak im Bujen Ko 14:7; 59:23; 93:28; 130:20–21.)
Kōjeraam̧m̧an ko an Anij rej jim̧or ilo jetōb im kanniōk. Ilo iien ko, jej aikuj in kijenmej ilo kōttari, lōke bwe renaaj itok ekkar n̄an Ankilan im iien eo an (lale Mosaia 7:33; Katak im Bujen Ko 88:68). N̄an jeļā jet kōjeraam̧m̧an ko, jej aikuj in mejān iruj im mejmejkaruo ilo jetōb. Eļap an menin m̧ool eļap tata kōn kōjeraam̧m̧an ko me rej itok ilo wāween ko reļem waan im āinwōt rejeja.
Jet iaan kōjeraam̧m̧an ko remaron̄ in kein kam̧ool wōt ilo ālkin an waļo̧k. Ko jet remaron̄ jab itok m̧ae ālkin mour in. Jekdo̧o̧n ta iien eo ak piktok in kōjeraam̧m̧an eo an Anij, jemaron̄ jeļā bwe renaaj itok ilo ad kajjieon̄ n̄an mour kōn gospel eo an Jisōs Kraist (lale Katak im Bujen Ko 82:10).
Anij eweppān an iakwe aolep armej ro Nejin. E ej kijenmej ippān m̧ōjņo̧ eo ad, im E ej jeorļo̧k bōd n̄e jej ukweļo̧k.
Kien ko Ruo Reļļap
Ke kar kajjitōk ippān Jisōs, “Ewi kien eo eļap ilo kien ko?” E ekar uwaak, “Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.”
Innām Jisōs ekar ba kien eo kein karuo eļap ej āinwōt eo kein kajuon: “Kwōn yokwe ri turum̧ im āinwōt kwe” (Matu 22:36–39). “Ejjeļo̧k bar juon kien eļap jān kein” (Mark 12:31).
Āinwōt ajri in jetōb ro nejin Anij, ewōr juon ad iakwe eļap. Ej m̧ōttan jolet eo ad ilo jetōb. Mour kōn kien ko ruo reļļap—n̄an iakwe Anij im n̄an iakwe ro rūturid—ej juon piktok eļap an rikaļoor ro an Jisōs Kraist.
Iakwe an Anij
Elōn̄ wāween ko jemaron̄ kwaļo̧k ad iakwe n̄an Anij. Jemaron̄ kōjparok kien ko An (lale Jon 14:15, 21). Jemaron̄ door E m̧okta ilo mour ko ad, ajeļo̧k ankilad n̄an Ankilan. Jemaron̄ kaioļapļap ikdeelel ko ad, ļōmņak ko, im būruōd n̄an E (lale Alma 37:36). Jemaron̄ mour ilo kam̧m̧oolol kōn kōjeraam̧m̧an ko E ekar litok n̄an kōj—im tenkwadik ilo leto letak kōjeraam̧m̧an ko (lale Mosaia 2:21–24; 4:16–21). Kōn jar im jerbal n̄an ro jet, jemaron̄ kwaļo̧k im kam̧wilaļļo̧k iakwe eo ad n̄an E.
Āinwōt kein ko jet, kien eo n̄an iakwe Anij ej n̄an jeram̧m̧an eo ad. Ta eo jej iakwe ej kōmlet ta eo jej kappukōte. Ta eo jej kappukōt ej kōmlet ta eo jej ļōmņake im kōm̧m̧ane. Im ta eo jej ļōmņake im kōm̧m̧ane ej kōmlet wōn kōj—im wōņ eo jenaaj erom.
Iakwe ro Jet
Iakwe ro jet ej juon eddōkļo̧k in ad iakwe n̄an Anij. Rilo̧mo̧o̧r eo ekar katakin kōj elōn̄ wāween ko n̄an iakwe ro jet (lale, n̄an waanjon̄ak, Luk 10:25–37 im Matu 25:31–46). Jej pukōtļo̧k im karuwaineneik er n̄an būruōd im mour ko ad. Jej iakwe kōn jerbal—kōn leļo̧k kōj maek jekdo̧o̧n ilo wāween ko reddik. Jej iakwe ro jet kōn kōjerbal menin letok me Anij ekar litok n̄an kōj n̄an kōjeraam̧m̧an er.
Iakwe ro jet eitbuuj kijenmen, jouj, im m̧ool. Ej kitbuuj jeorļo̧k bōd ilo ejjeļo̧k dāpij jidik. Ej meļeļe kōm̧m̧an em̧m̧an n̄an aolep kōn kautiej.
N̄e jej iakwe juon, kōm im armej jab eo jej jim̧or jeraam̧m̧an. Būruōd ej eddōkļo̧k, mour ko ad eļapļo̧k meļeļeier, im lan̄lōn̄ eo ad ej eddōkļo̧k.
Kōjeraam̧m̧an ko
Kien ko ruo reļļap—n̄an iakwe Anij im iakwe eo rūturid—rej pedped eo an aolep kien ko an Anij (lale Matu 22:40). N̄e jej iakwe Anij m̧okta, jej barāinwōt iakwe ro jet, aolep men ilo mour ko ad renaaj wōnm̧aanļo̧k n̄an jikin ko aer rejetjet. Iakwe in enaaj jelet m̧wil eo ad, kōjerbal iien eo ad, itok limo ko jej pukūti,im laajrak in kōttōpar ko ad raorōk.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar “Iakwe-em̧ool,” “Iakwe”
-
Gospel Topics: “Charity,” “Love”
Ļoor Rikanaan eo
Anij ej kūr rikanaan ro bwe ren An ribōk jikin ro ioon laļ in. Kōn rikanaan ro an, E ej kwaļo̧k m̧ool eo im ej letok tōl eo im kakkōl ko.
Anij ekar kūr Jospe Smith bwe en rikanaan eo m̧oktata an raan ko āliktata (lale Katak 1). Ro raar bōk jikin Josep Smith raar barāinwōt kar kūr jān Anij n̄an tōl Kabun̄ eo An, ekoba rikanaan eo me ej tōle rainin. Jej aikuj bōk juon tōmak kōn kūr kwojarjar eo an rikanaan eo emour im ļoor katak ko an.
Katak ko an rikanaan ro remour im rijilōk ro rej letok juon emjak an m̧ool eo indeeo ilo juon laļ eo aorōk ko an rokoktaktak. Ilo ad ļoor rikanaan ro an Anij, tarpok im akweel eo an laļ rejjamin naaj kalbubuik kōj. Jenaaj lo m̧ōņōņō eo eļapļok ilo mour in im bōk tōl n̄an m̧ōttan in an iaļ eo ad n̄an mour indeeo.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar: “Rikanaan,” “Kōrā Rikanaan,” “Kanaan, Rikanij”
-
Gospel Topics: “Prophets,” “Prophecy”
Kōjparok Kien ko Jon̄oul
Anij ekar kwaļo̧k Kien ko Jon̄oul n̄an juon rikanaan etto kar etan Moses n̄an tōl armej ro doon. Kien kein rej jerbal ejjeļo̧k oktak ilo tōre in ad. Rej katakin kōj n̄an kabun̄-jar im kwaļo̧k kautiej n̄an Anij. Rej barāinwōt katakin kōj kōn ekōjkan ad kōm̧m̧an n̄an doon.
-
“En ejjeļo̧k bar anij raņ ippam̧ ijello̧kō” (Exodus 20:3). “anij” ko jet emaron̄ koba elōn̄ men ko, ko āinwōt m̧weiuk ko, kajoor, ak bun̄bun̄.
-
“Kwōn jab kōm̧anm̧an im jekjek ekjab n̄an eok” (Exodus 20:4).
-
“Kwōn jab ba pata etan Jeova am̧ Anij” (Exodus 20:7).
-
“Kwōn keememej ran in Jabōt, bwe kwōn kokwōjarjar e” (Exodus 20:8).
-
“Kwōn koutiej jemam̧ im jinōm̧” (Exodus 20:12).
-
“Kwōn jab uror” (Exodus 20:13).
-
“Kwōn jab ļōn̄” (Exodus 20:14).
-
“Kwōn jab ko̧o̧t” (Exodus 20:15).
-
“Kwōn jab kōnnaan naan in riab ņae ri turum̧” (Exodus 20:16).
-
“Kwōn jab aņoņak” (Exodus 20:17).
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar: “Kien ko Jon̄oul”
-
Gospel Topics: “Ten Commandments”
Mour kōn Kien Erreeo
Kien erreo ej juon m̧ōttan eaorōk kōn karōk eo an Anij n̄an lo̧mo̧o̧r eo ad im mour ijo eutiej tata. Mour in kanniōk ikōtaan ļeo im lio pālele ej ekkapit in Anij n̄an ejaak an ajri ro im n̄an kwaļo̧k iakwe ilowaan m̧are eo. Mour in kanniōk in im kajoor eo n̄an ejake mour an armej kar kōm̧m̧an n̄an aiboojoj im kwojarjar eo.
Kien erreo eo an Anij ej bōjrak jān kadkad ko an m̧ōm̧ an kanniōk itulikin juon m̧are kōmālim ikōtaan juon em̧m̧aan im juon kōrā. Kien in ej barāinwōt meļeļe in lukkuun m̧ool im tiljek n̄an armej eo pāleen ālkin m̧are.
N̄an jipan̄ kōj kōjparok kien erreo, rikanaan ro raar kakkōl kōj n̄an erreo ilo ļōmņak ko im naan ko ad. Jej aikuj jab lali pija im bok ko renana ilo jabdewōt jekjek. N̄an kōjparok kien erreo, jej aikuj karbōb ilo m̧wilid im pāktokid.
Ro rej pojān peptaij rej aikuj mour kōn kien erreo
Ukweļo̧k im Jeorļo̧k Bōd
Ilo mejān Anij, kakkure kien erreo ej juon men elukkuun ļap (lale Exodus 20:14; Epesōs 5:3). Ej kabōd kōjerbal kajoor in ekwojarjar me E ekar letok n̄an ejake mour. Bōtaab E ej wōnm̧aanļo̧k wōt im iakwe kōj jekdo̧o̧n eļan̄n̄e jaar rupe kien in. E ej kūr kōj n̄an ukweļo̧k im erom erreo kōn en̄taan in pinmuur eo an Jisōs Kraist. Kabweer eo an jerawiwi emaron̄ in bōk jikin kōn aenōm̧m̧an eo em̧m̧an an jeorļo̧k bōd eo an Anij (lale Katak im Bujen Ko 58:42–43).
Kōjeraam̧m̧an ko
Anij ekar letok kien erreo n̄an kōjeraam̧m̧an kōj im ajri in jetōb ro E ej jilkintok n̄an laļ in. Pokake kien in eaorōk n̄an aenōm̧m̧an an juon make im n̄an bōk iakwe, lōke im bōro kuk ilo jemjerā ko an baam̧le ko ad.
Ilo ad mour kōn kien erreo, enaaj bōbrae kōj jān kakkure jetōb eo me ej itok jān mour in kanniōk itulikin m̧are eo. Jenaaj barāinwōt joļo̧k en̄jake ko im jorrāān ko an ānbwin me emakijkij aer itok ippān kain jemjerā rōt in. Jenaaj eddōkļo̧k ilo lōke eo ad im̧aan mejān Anij (lale Katak im Bujen Ko 121:45). Enaaj ļapļo̧k peļļo̧k n̄an kareel eo an Jetōb Kwojarjar. Enaaj em̧m̧anļo̧k ad m̧aanjabpopo n̄an kōm̧m̧ani bujen ko rekwojarjar ilo tampeļ me rej kobaik baam̧le ko ad n̄an indeeo.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje ko Rekwojarjar, “M̧wil Erreo
-
Gospel Topics: “Chastity”
Kōjparok Kien Juon M̧ōttan Jon̄oul
Juon jeraam̧m̧an eļap an uwaan ilo Kabun̄ in ej iien eo em̧m̧an n̄an kōļļā juon m̧ōttan jon̄oul. Ilo ad kōļļā m̧ōttan jon̄oul, jej jipan̄ kererakļo̧k jerbal eo an Anij im kōjeraam̧m̧an ajri ro Nejin.
Kien juon m̧ōttan jon̄oul ekar ijjino ilo tōre ko an Kallim̧ur M̧okta. N̄an waanjon̄ak, rikanaan Ebream ekar kōļļā juon m̧ōttan jon̄oul ko an aolep men ko ekar būki (lale Alma 13:15; Jenesis 14:18–20).
Naan eo m̧ōttan jon̄oul lukkuun meļeļe in juon m̧ōttan-jon̄oul. Ilo ad kōļļā juon m̧ōttan, jej leļo̧k juon m̧ōttan-jon̄oul in kōļļā eo ad n̄an Kabun̄ in (lale Katak im Bujen Ko 119:3–4; orļo̧k ej meļeļe wōn̄āād). Aolep men ko ewōr ippād ej juon menin letok jān Anij. N̄e jej kōļļā juon m̧ōttan jon̄oul, jej kwaļo̧k kam̧m̧oolol n̄an E kōn kōro̧o̧lļo̧k jidik in ta eo Ekar letok n̄an kōj.
Kōļļā juon m̧ōttan jon̄oul ej juon kakōļļe in tōmak. Ej barāinwōt juon wāween n̄an kautiej Anij. Jisōs ekar katakin bwe jej aikuj “pukōt … m̧okta aelōn̄ in Anij” (Matu 6:33), im juon m̧ōttan jon̄oul ej juon wāween kōm̧m̧ane men jab in.
An Jāān in Juon M̧ōttan Jon̄oul ko Jerbal
Jāān ko an joun m̧ōttan jon̄oul reekwojarjar. Jej leļo̧k juon m̧ōttan jon̄oul eo ad n̄an juon membōr in bisoprik eo, ak ilo elōn̄ eria ko jemaron̄ kōļļā ilo online. N̄e bisoprik eo ej bōk juon m̧ōttan jon̄oul eo, rej jilkinļo̧k n̄an opiij ko reļļap an Kabun̄ in.
Juon ko̧o̧ņjeļ ejake in Būreejtōnji eo Kein Kajuon, Doulul eo an Jon̄oulruo Rijilōk ro, im Bisoprik eo ej Tōl ej kōmlet ekōjkan kōjerbal jāān ko an juon m̧ōttan jon̄oul eo ilo jerbal eo an Anij (lale Katak im Bujen Ko 120:1). Jerbal kein ekoba:
-
Ekkal im kōkāāl tampeļ ko im im̧ōn jar ko.
-
Ukōt im kōm̧m̧ani jeje ko rekwojarjar.
-
Jipan̄ m̧akūtkūt ko im jerbal ko an jarlepju ko an Kabun̄ ilo ijo jokwe ie.
-
Jipan̄ jerbal in mijenede ilo aolepān laļ in.
-
Jipan̄ jerbal in menmenbwij an baam̧le.
-
Leļo̧k jāān n̄an jikuuļ ko im jikin jeļāļo̧kjeņ.
Juon m̧ōttan jon̄oul eo ejjab jerbal n̄an kōļļāik ritōl ro an Kabun̄ in ijo jokwe ie. Rej jerbal ilo aer baļiniter ilo aer jab kōļļā.
Kōjeraam̧m̧an ko
N̄e jej kōļļā juon m̧ōttan jon̄oul, Anij ej kallim̧ur kōn kōjeraam̧m̧an ko reļļapļo̧k jān ta eo jej leļo̧k. E enaaj “kapeļļo̧k … wūntō ko an lan̄ im lutōkḷọk … jeraaṃṃan n̄an koṃ ṃae iien enaaj ejjeḷọk aikuj.” (Malakai 3:10; lale eoon 7–12). Kōjeraam̧m̧an kein remaron̄ jim̧or ilo jetōb im kanniōk.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar: “Juon M̧ōttan Jon̄oul, M̧ōttan Jon̄oul”
-
Gospel Topics: “Tithing”
Pokake Naan in Mālōtlōt
Kien eo an Irooj kōn Ājmour
Ānbwin ko ad rej menin letok ekwojarjar jān Anij. Kōj kajjojo jej aikuj juon ānbwinin kanniōk n̄an eromļo̧k āinwōt E. Ānbwin ko ad rej kanooj in aorōk jon̄an jeje ko rekwojarjar rej keidi er n̄an tampeļ ko (lale 1 Korint 6:19–20).
Irooj ej kōņaan bwe jen kōjparok ānbwinnid. N̄an jipan̄ kōj kōm̧m̧ane menin, E ekar kwaļo̧k juon kien ājmour ņa etan Naan in Mālōtlōt. Revelesōn in ej katakin kōj kōn m̧ōn̄ā m̧ōn̄ā ko rāājmour im jab kōjerbal men ko me rej kakkure ānbwin ko ad—eļap tata kadōk, jikka, im dān ko rebwil (meļeļe in tii im ko̧be).
Ilo jetōb eo an Naan in Mālōtlōt, rikanaan ro raan kein raar kakkōl ņae kōjerbal men ko jet me rej kakkure, illegal, ak kan̄urlep. Rikanaan ro raar barāinwōt kakkōl ņae kabōd kōjerbal uno ko prescription. (Mijen būreejtōn eo am̧ enaaj uwaake kajjitōk ko kōn men ko jet eļan̄n̄e ilo eria eo kwoj pād ie rej aikuj jab kōjerbali.)
Kōjeraam̧m̧an ko
Irooj ekar letok Naan in Mālōtlōt n̄an ājmour eo ad ilo kanniōk im jetōb. E ej kallim̧uri kōjeraam̧m̧an ko reļlap ilo ad kōjparok kien in. Kōjeraam̧m̧an kein ekoba ājmour, māletlet, aorōk ko an jeļāļo̧kjeņ, im kōjparok (lale Katak im Bujen Ko 89:18–21).
Pokake Naan in Mālōtlōt enaaj jipan̄ kōj ļapļo̧k ad bōk im̧we ko an Jetōb Kwojarjar. Men̄e jej aolep ioon apan̄ ko ājmour, pokake kien in enaaj jipan̄ kōj ājmourļo̧k ilo ānbwin, ļōmņak, im jetōb.
Ro rej pojān peptaij rej aikuj pokake Naan in Mālōtlōt
Kōn unin tōl eo kōn jipan̄ armej ro me rej ļon̄tak kōn an̄ūrlep ko, lale jepta 10.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar: “Naan in Mālōtlōt”
-
Gospel Topics: “Health,” “Word of Wisdom”
-
Life Help: “Addiction”
Kōjparok Raan in Jabōt im Kōkwojarjare
Juon Raan in Kakkūje im Kabun̄-jar
Jabōt ej juon raan ekwojarjar me Anij ekar kōjenolo̧ke n̄an kōj kajjojo wiik n̄an kakkūje jān jerbal ko ad raan otemjeļo̧k im kabun̄-jar n̄an E. Juon iaan Kien ko Jon̄oul kar leļo̧k n̄an Moses ej n̄an “keememej raan in jabōt, bwe kwōn kokwōjarjar e” (Exodus 20:8; lale barāinwōt eoon 9–11).
Ilo juon revelesōn raan kein, Irooj ekar bar kapenļo̧k bwe Jabōt “ ej juon raan eo in jitōn̄ n̄an kwe n̄an kakkije jān jerbal ko am, im liļo̧k nebar ko am n̄an eo Eo Eutiejtata” (Katak im Bujen Ko 59:10). E ekar barāinwōt ba Jabōt ej aikuj in juon raan in lan̄lōn̄, jar, im kam̧m̧oolol ( lale eoon 14–15).
Āinwōt m̧ōttan Jabōt in kabun̄-jar eo ad, jej etal n̄an kweilo̧k in kwojkwoj eo kajjojo wiik. Ilo kweilo̧k in, jej kabun̄-jar n̄an Anij im bōk m̧ōttan kwojkwoj eo n̄an keememej Jisōs Kraist im Pinmuur eo An. N̄e jej bōk m̧ōttan kwojkwoj eo, jej kōkāāl bujen ko ad ippān Anij im kwaļo̧k bwe jej m̧ōņōņō in ukweļo̧k jān jerawiwi ko ad. Kain̄i eo an kwojkwoj eo ej ioļapļap ilo ad kōjparok raan in Jabōt.
Ilo m̧ōn jar eo jej barāinwōt bōk koņaad ilo kūlaaj ko ijo me jej katak eļapļo̧k kōn gospel eo an Jisōs Kraist. Ad tōmak ej eddōkļo̧k ilo ad ekkatak jeje ko rekwojarjar ippān doon. Ad iakwe ej eddōkļo̧k ilo ad jerbal im kōkajoorļok doon.
Ilo kakobaba n̄an kakkūje jān jerbal ko ad ilo raan in Jabōt, jej aikuj bōjrak jān wia im m̧akūtkūt ko jet me renaaj kōm̧m̧an ad en̄jake āinwōt raan ko jet. Jej door iturejet m̧akūtkūt ko an laļ in im pedped e ļōmņak ko ad im jerbal ko ioon men ko an jetōb.
Juon Raan n̄an Kōm̧m̧an Em̧m̧an
Kōm̧m̧an em̧man ilo raan in Jabōt ej aorōk in wōt ta eo jej bōjrak jān kōm̧m̧ane bwe en ekwojarjar. Jej katak gosepl eo, kōkajoorļo̧k tōmak, kalōk jemjerā ko, leļo̧k jerbal in jipan̄, im bōk koņaad ilo m̧akūtkūt ko rej ļōn̄aj ippān baam̧le im ro m̧ōttad.
Kōjeraam̧m̧an ko
Kōjparok raan in Jabōt im kōkwojarjare ej juon kakōļļe ilo ad wujlepļo̧k n̄an Jemedwōj Ilan̄ im Jisōs Kraist. Ilo ad kōm̧m̧an bwe m̧akūtkūt ko ad ilo Jabōt ren jokkun wōt juon ippān kōņaan eo an Anij n̄an raan in, jej en̄jake lan̄lōn̄ im aenōm̧m̧an. Jenaaj naajdik ilo jetōb bar kōkajoor ilo kanniōk. Jenaaj barāinwōt en̄jake epakeļo̧k Anij im kam̧wilaļļo̧k jemjerā eo ad ippān ad Rilo̧mo̧o̧r. Enaaj lukkuun ļapļo̧k ad naaj kōjparok kōj “jān libbijinjin jān laļ” (Katak im Bujen Ko 59:9). Jabōt enaaj erom “men in lan̄lōn̄” (Aiseia 58:13; lale barāinwōt eoon 14).
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Gospel Topics: “Sabbath Day”
-
Unin Tōl eo n̄an Jeje Ko Rekwōjarjar: “Raan in Jabōt”
Pokake im Kautiej Kakien eo
Armej ro Rekwojarjar ilo Raan-ko Āliktata rej tōmak ilo pokake kien eo im citizen ro rem̧m̧an (lale Katak im Bujen Ko 134; Laajrak in Tōmak ko 1:12). Membōr ro an Kabun̄ in rej kōketak er n̄an kōm̧m̧an jerbal in jipan̄ n̄an kōkōm̧anm̧anļo̧k jukjuk in pād ko im laļ ko aer. Rej barāinwōt kōketak er n̄an juon rikareel n̄an aorōk ko rem̧man an mour ilo jukjuk in pād im kien.
Ro uwaan Kabun̄ in rej kajjitōk n̄an bōk koņaer ilo kien im jekjek in political ekkar n̄an kien. Membōr ro rej bōk jerbal ko ilo kien rej jerbal ilo kain jon̄ak kein āinwōt citizen ro rej n̄ūrbōktak, ejjab āinwōt ribōk jikin ro an Kabun̄ in.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
“Kakien ko kōn Wāween Jerbal in Tōl” ilo jekjōn 38.8 in Bok in Bōk Meļeļe Eļap
-
Gospel Topics: “Citizenship”
Bujen eo Ad n̄an Jerbal n̄an Anij im Ro Jet
Jerbal in Jipan̄
N̄e jej peptaij, jej bujen n̄an jerbal n̄an Anij im jerbal n̄an ro jet. Jerbal n̄an ro jet ej juon iaan wāween ko raorōk jej jerbal n̄an Anij (lale Mosaia 2:17). Rikanaan Alma ekar katakin ro me raar ikdeelel n̄an peptaij bwe rej aikuj “m̧ōņōņō n̄an ineek eddo ko an ro jet, … m̧ōņōņō in jan̄ ippān ro rej jan̄ … , kaenōm̧m̧an ro rej pād ilo aikuj in aenōm̧m̧an” (Mosaia 18:8–9).
Ālkin wōt peptaij, membōr ro rekāāl ekkā aer bōk juon kūr n̄an jerbal ilo Kabun̄ in. Kūr kein rej baļintier im jab kōļļā. Ilo ad bōk er im jerbal ilo niknik, jej eddōkļo̧k ilo tōmak, ejaki tōļan ko, n̄an kōjeraam̧m̧an ro jet.
Bar juon m̧ōttan ad jerbal in jipan̄ ilo Kabun̄ in ej erom juon “rikarejar m̧aan” ak juon “rikarejar kōrā.” Ilo eddo in, jej jerbal n̄an kajjojo armej ro im baam̧le ko kar kappeik
Āinwōt rikaļoor ro an Jisōs Kraist, jej pukōt iien ko rem̧m̧an n̄an jerbal kajjojo raan. Āinwōt E, jej ilo̧k n̄an “kōm̧anm̧an em̧m̧an” (Jerbal 10:38). Jej jerbal n̄an ro rūturid im ro jet ilo jukjuk in pād eo. Jemaron̄ bōk koņad ilo iien ko rem̧m̧an an jerbal in jipan̄ ko ilo JustServe ijo ewōr ie. Jemaron̄ rejtake kijejeto ko an humanitarian eo an Kabun̄ in im bōk koņaad ilo uwaake jorrāān ko reļļap.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje ko Rekwōjarjar, “Jerbal in Jipan̄”
-
Gospel Topics: “Service”
Kwaļo̧k Gospel eo
Āinwōt m̧ōttan bujen peptaij eo ad, jej kallim̧ur n̄an “jutak āinwōt rikam̧ool ro an Anij” (Mosaia 18:9). Juon wāween jej jutak āinwōt rikam̧ool ro ej n̄anleto letak gospel eo an Jisōs Kraist. Jipan̄ ro jet bōk gosepl eo ej juon iaan kain jerbal in jipan̄ ko relem̧ōņōņō tata jemaron̄ leļo̧k (lale Katak im Bujen Ko 18:15–16). E juon kakōļļe ekajoor kōn ad iakwe.
N̄e jej en̄jake kōjeraam̧m̧an ko an mour kōn gospel eo, ekka ad kōņaan leto letak kōjeraam̧m̧an ko. Ro uwaan baam̧le eo, ro m̧ōttad, im ro jejeļā kajier emakijkij aer kaitoktok limo ilo ad kōm̧m̧ane juon waanjon̄ak etiljek im rej lo ekōjkan an gospel eo kōjeraam̧m̧an mour ko ad. Jemaron̄ leto letak gosepl eo ilo wāween ko iminene kaki im make waļo̧k (lale Bok in Bōk Meļeļe, jebta 23).
Jej karuwaineneik ro jet n̄an bōk koņaer ippād ilo jerbal in jipan̄, jukjuk in pād, ikkure ko, im m̧akūtkūt ko an Kabun̄ in. Jemaron̄ kūr er n̄an juon kweilo̧k an Kabun̄ in ak juon iien petpaij. Jemaron̄ kūr er n̄an alooje juon pija in alooj ilo online me ej kōmeļeļeik gospel eo an Jisōs Kraist, n̄an riiti Bok in Mormon, ak n̄an etal n̄an juon iien kōppeļo̧k in kaloojoj an tampeļ. Ewōr buki kūr ko jemaron̄ liļo̧k. Enan̄in aolep iien, karuwainene ej āinwōt meļeļe in kobaik baam̧le eo ad, ro m̧ōttad, im ro ruturid ilo ta eo emōj ad kōm̧m̧ane.
Eļan̄n̄e jej kajjitōk, Anij enaaj jipan̄ kōj kile iien ko rem̧m̧an n̄an leto letak gospel eo im jiron̄ ro jet kōn ekōjkan an kōjeraam̧m̧an mour ko ad.
Kōn elōn̄ļo̧k meļeļe kōn kōjerbal pedped in katak ko an iakwe, kwaļo̧k, im karuwainene, lale “Koba ippān Membōr ro” ilo jebta 9.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Unin Tōl eo n̄an Jeje Ko Rekwōjarjar: “Jerbal in Mijenede”
-
Gospel Topics: “Missionary Work”
Jitlo̧k im Joortak in Jitlo̧k ko
Anij ekar kajutak kien eo an jitlo̧k āinwōt juon wāween n̄an ad kōļapļo̧k kajoor in jetōb im n̄an jipan̄ ro rej pād ilo aikuj.
Jitlo̧k ej meļeļe in etal kōn ejjeļo̧k m̧ōn̄ā im idaak ium̧win juon tōre. Kabun̄ in ekkā an kōjenolo̧k Jabōt juon ilo aolep allōn̄ āinwōt juon raan in jitlo̧k. Raan in jitlo̧k ekkā an koba jab m̧ōn̄ā im idaak ium̧win 24-awa eļan̄n̄e ānbwinid ej maron̄e. M̧ōttan eo juon eaorōk an Jabōt in jitlo̧k ekoba jar im kwaļo̧k naan in kam̧ool. Jej barāinwōt kōketak n̄an jitlo̧k ilo iien ko jet n̄e jej en̄jake aikuj eo.
Kalōk Kōkajoorļo̧k in Jetōb
Jitlo̧k emaron̄ jipan̄ kōj erom ettā bōro, epaakeļo̧k Anij, im en̄jake kōkāāl in jetōb. M̧okta jān jinoin jerbal in karejar eo An, Jisōs Kraist ekar jitlo̧k (lale Matu 4:1–2). Jeje ko rekwojarjar rej rekoote elōn̄ bwebwenato ko an rikanaan ro im ro jet jitlo̧k bwe ren maron̄ kōļapļo̧k kajoor in jetōb eo aer im kappukōt kōjeraam̧m̧an ko rein juon n̄an er make ak ro jet.
Jitlo̧k im jar rej etal ippān doon. N̄e jej jitlo̧k im jar kōn tōmak, eļapļo̧k ad ekkejel n̄an bōk revelesōn eo an juon make. Ej barāinwōt ļapļo̧k ad peļļo̧k n̄an kile m̧ool eo im meļeļe ankilan Anij.
Jipan̄ Ro Rej Pād ilo Aikuj
N̄e jej jitlo̧k, jej leļo̧k jāān n̄an Kabun̄ in n̄an jipan̄ kea kōn armej ro rej pād ilo aikuj. Menin ej ņa etan joortak in jitlo̧k. Rej karuwainenik kōj n̄an leļo̧k juon joortak eo me ej dettan wōt aorōk eo an m̧ōn̄ā ko kar jab kan̄i. Jej kōketak n̄an ad jouj im leļo̧k eļapļo̧k jān aorōk eo an m̧ōn̄ā kein eļan̄n̄e jemaron̄. Leļo̧k juon joortak in jitlo̧k ej juon wāween jemaron̄ jerbal n̄an ro jet.
Jortak in jitlo̧k ko rej jerbal n̄an leļo̧k m̧ōn̄ā im menin aikuj ko jet n̄an armej ro rej pād io aikuj, jim̧or ijo jokwe ie im aolepān laļ in. Kōn meļeļe ko kōn ekōjkan leļo̧k n̄an joortak in jitlo̧k ko, lale “Leļo̧k Juon M̧ōttan Jon̄oul ko im Joortak ko Jet” ilo katak in.
Ekkatak Jeje ko Rekwojarjar
Jitlo̧k
Kea kōn Ro Rej Pād ilo Aikuj
Katak Eļapļo̧k kōn Pedped in Katak in
Bujen eo Ad n̄an Niknik n̄an Jem̧ļo̧kin
N̄e jej peptaij, jej bujen ippān Anij n̄an “niknik n̄an jem̧ļo̧kin” ilo mour kōn gospel eo an Jisōs Kraist (2 Nipai 31:20; lale barāinwōt Mosaia 18:13). Jej kajjjieon̄ n̄an erom rikaļoor ro an Jisōs Kraist to̧o̧n wōt ad mour.
Bok in Mormon rikanaan eo Nipai ekar kōmeļeļeik peptaij āinwōt orok eo me jej deļo̧n̄e iaļ in gospel eo (lale 2 Nipai 31:17 Ālkin petpaij, jej wōnm̧aanļo̧k wōt n̄an “bun̄ m̧aanļo̧k kōn dim ilo Kraist” (2 Nipai 31:20).
Ilo ad “bun̄ m̧aanļo̧k” ilo iaļ in rikaļoor eo, jej kōppopo n̄an etal n̄an tampeļ eo. Ijo jenaaj kōm̧mani bujen ko ippān Anij ilo ad bōk kain̄i ko an tampeļ. Ilo tampeļ, naaj kōpāpāl kōj kōn kajoor eo im jemaron̄ liāp āinwōt baam̧le ko n̄an indeeo. Kōjparok bujen ko jej kōm̧m̧ani ilo tampeļ eo enaaj kōpeļļo̧k kōjām eo n̄an aolep maron̄ in jetōb im kōjeraam̧m̧an eo me ewōr ippān Anij n̄an kōj.
Ilo ad wōnm̧aanļo̧k wōt in tiljek ilo iaļ in gospel eo, jenaaj āliktata bōk menin letok eo eļap tata an Anij—menin letok eo an mour indeeo (lale 2 Nipai 31:20; Katak im Bujen Ko 14:7).
Jekjōn kein rej kōmeļeļeik jet men ko kōn ta eo Anij ekar letok n̄an jipan̄ kōj niknik n̄an jem̧ļo̧kin ilo iaļ eo ad ilo mour in—im lo lan̄lōn̄ eo ie.
Priesthood eo im Doulul ko an Kabun̄ in
Priesthood ej mālim eo im kajoor eo an Anij. Kōn priesthood eo, Jemedwōj Ilan̄ ej kadedeļo̧k jerbal eo An “n̄an kakūrm̧ool jab wabanban im mour indeeo” an ajri ro Nejin (Moses 1:39). Anij ej leļo̧k mālim im kajoor eo n̄an ļaddik im leddik ro Nejin ioon laļ in n̄an jipan̄ kōm̧m̧m̧ane jerbal in.
Priesthood eo ej kōjeraam̧m̧an kōj aolep. Kain̄i ko āinwōt ko an peptaij im kwokwoj eo rej bōk kōn ro me rej kabwijer opiij ko an priesthood eo. Jej barāinwōt bōk kōjeraam̧m̧an ko an kemour, kaenōm̧m̧an, im kapilōk.
Priesthood eo im Ritōl an Kabun̄ in im Kūr ko
Kabun̄ in ej tōl jān Jisōs Kraist kōn rikanaan ro im rijilōk ro. Ritōl rein rej kūr jān Anij, kar ekkapit, im kar leļo̧k mālim an priesthood eo n̄an jerbal ilo etan Rilo̧mo̧o̧r.
Etto, Kraist ekar leļo̧k n̄an Rijilōk ro An ejja mālim in priesthood in wōt, eo ej kōtļo̧k bwe ren tōl Kabun̄ eo An ālkin An kar walōn̄ļo̧k n̄an lan̄. Āliktata mālim jab in kar jarko ke armej ro raar jab bōk gospel eo im Rijilōk ro raar mej.
Rikwōj meļan in lan̄ ro raar kōjepļaaktok priesthood eo ilo 1829 eo kōn Rikanaan Josep Smith, im Irooj ekar bar juon alen kajutak Kabun̄ eo An kōn rijilōk ro im rikanaan ro. (Lale katak 1.)
Ilo jon̄ak eo an ijo jokwe ie, bisop ro im stake būreejtōn ro ewōr ippāer mālim an priesthood eo n̄an tōl jarlepju ko an Kabun̄ in.
N̄e em̧m̧aan ro im kōrā ro rej kūr im kōjenolo̧k n̄an jerbal ilo Kabun̄ in, rej leļo̧k n̄an er mālim eo jān Anij n̄an jerbal ilo kūr jab eo. Mālim in ej leļo̧k n̄an mijenede ro, ritōl ro, rūkaki ro, im ro jet m̧ae iien rej kōtļo̧k jān kūr ko aer. Ej leļo̧k ium̧win tōl eoa n ro me rej kabwijer kii ko an priesthood eo.
Mālim eo an priesthood eo maron̄ kōjerbale wōt ilo jim̧we (lale Katak im Bujen Ko 121:34–46). Mālim in ej juon lōke ekwojarjar n̄an bōk jikin Rilo̧mo̧o̧r eo im jerbal ilo Etan. Kōttōpar eo an ej aolep iien n̄an kōjeraam̧m̧an im jerbal n̄an ro jet.
Priesthood eo an Aron im Pristhood eo an Melkesidek
Ilo Kabun̄ in, priesthood eo ekitbuuj Priesthood eo an Aron im Priesthood eo an Melkesidek. Ium̧win tōl eo an ro me rej kabwijer ki ko an priesthood eo, Priesthood eo an Aron im Melkesidek rej leļo̧k n̄an membōr em̧m̧aan ro rōrreo an Kabun̄ in. Ālkin leļo̧k priesthood eo ejetjet, armej eo ej ekkapit n̄an juon opij ilo priesthood jab eo, eo āinwōt tikōn ak elder. Ej aikuj in ekkapit jān juon eo me ewōr ippān mālim eo emenin aikuj.
N̄e juon em̧m̧aan ak likao ej bōk priesthood eo, ej kōm̧m̧ane juon bujen ippān Anij n̄an kakūrm̧ool eddo ko rekwojarjar, jerbal n̄an ro jet, im jipan̄ kalōk Kabun̄ in.
Likao ro remaron̄ bōk Priesthood eo an Aron im ren ekkapit n̄an tikōn jino ilo Jānwōde in iiō eo rej tōpar 12. Remaron̄ in ekkapit tūkaki ro ilo iiō eo rej tōpar 14 im pris ro ilo iiō eo rej tōpar 16. Em̧m̧aan ro rej oktak ro me rōrūtto remaron̄ bōk Priesthood eo an Aron ālkin wōt aer petpaij im kapene. Rikabwijer ro an Priesthood eo an Aron rej kōm̧m̧ane kain̄i ko ko āinwōt kwojkwoj eo im peptaij.
Ālkin jerbal ium̧win juon iien āinwōt juon pris ilo Priesthood eo an Aron, em̧m̧aan eo erreo me dik tata 18 maron̄ bōk Priesthood eo an Melkesidek im ekkapit n̄an elder. Em̧m̧aan ro me rej bōk Melkesidek Priesthood eo remaron̄ kōm̧m̧ani kain̄i ko an priesthood eo ko āinwōt leļo̧k kōjeraam̧m̧an ko an kemour im kaenōm̧m̧an n̄an ro uwaan baam̧le ko im ro jet.
Lale Bok in Bōk Meļeļe Eļap, 38.2.9.1, n̄an meļeļe ko kōn membōr ro rekāāl n̄an bōk priesthood eo.
Doulul ko im Doulul ko an Kabun̄ in
Doulul ko an Priesthood. Juon doulul ej juon kurup kar ejaak an rikabwijer priesthood eo. Kajjojo ward ewōr juon an doulul an elder ro n̄an em̧m̧aan ro rōrūtto. Doulul ko an tikōn ro, tūkaki ro, im pris ro rej n̄an likao ro.
Doulul eo an Kōrā ro. Doulul eo an Kōrā ro ekitbuuj kōrā ro 18 iiō im rūttoļo̧k Membōr ro an Doulul eo an Kōrā ro rej kōkajoorļo̧k baam̧le ko, kajjojo armej, im jukjuk in pād.
Doulul eo an Jiron̄ ro. Jiron̄ ro rej kobaļo̧k ilo doulul eo an Jiron̄ ro jino ilo Jānwōde in iiō eo rej tōpar 12.
Būraimere. Ajri ro 3 n̄an 11 iiō rej m̧ōttan doulul eo an Būraimere.
Jabōt Jikuuļ Aolep rūtto ro im jodikdik ro rej pād n̄an Jabōt Jikuuļ, ijo rej ioon doon n̄an ekkatak jeje ko rekwojarjar ippān doon.
Kōn meļeļe ko kōn priesthood eo, lale Bok in Bōk Meļeļe Eļap, jebta 3.
Kōn meļeļe ko kōn doulul ko an priesthood eo im doulul ko an Kabun̄ in, lale Bok in Bōk Meļeļe Eļap, jebta 8–13.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Bok Bōk Meļeļe, jepta 3: “Pedped ko an Priesthood eo”
-
Gospel Topics: “Aaronic Priesthood,” “Melchizedek Priesthood,” “Priesthood”
M̧are im Baam̧le ko
M̧are
M̧are eo ikōtaan juon em̧m̧aan im juon kōrā ej ekkapit jān Anij. Ej dilepān in karōk eo an n̄an eddōkļo̧k indeeo eo an ajri ro Nejin.
Pād eo an juon em̧m̧aan im juon kōrā ilo m̧are aikuj in jemjerā eo ekam̧ōņōņō tata aer ioon laļ in. Ewōr ippāer juon eddo ekwojarjar n̄an m̧ool n̄an doon im tiljek n̄an bujen m̧are eo aer.
Ļeo im lio pālele rej jon̄an wōt juon im̧aan mejān Anij. Juon ej aikuj jab kabojooj n̄an eo juon. Kāālet ko aer rej aikuj kōm̧m̧an wōt kōn bōro kuk im iakwe, kōn aolepān aer jim̧or maron̄.
Ilo an ļeo pālele im lio pālele iakwe doon im jerbal ippān doon, m̧are eo aer emaron̄ kein jipan̄ eo an m̧ōņōņō eo aer eļap tata. Remaron̄ jipan̄ doon im ajri ro nejier eddōkļo̧k n̄an mour indeeo.
Baam̧le Eo
Āinwōt m̧are, baam̧le eo ej ekkapit in Anij im ej dilepān karōk eo An n̄an m̧ōņōņō indeeo eo ad. Baam̧le ko ad remaron̄ in m̧ōņōņō n̄e jej mour kōn katak ko an Jisōs Kraist. Ro jinen im jemen rej katakin ajri ro nejier gospel eo an Jisōs Kraist im kōm̧m̧ane juon waanjon̄ak n̄an mour kake. Baam̧le ko rej letok iien ko rem̧m̧an n̄an kōj n̄an iakwe im jerbal n̄an doon.
Ro jinen im jemen rej aikuj kōm̧m̧an bwe baam̧le eo aer en kōttōpar eo eutiej tata. Ej juon jeraam̧m̧an ekwojarjar im eddo eo n̄an ro jinen im jemen n̄an kea kōn ajri ro nejier rej maron̄ keotak ak kōkkajriri.
Aolep baam̧le ko ewōr aer apan̄ ko. Ilo ad kappukōt jipan̄ eo an Anij im kōjparok kien ko An, apan̄ ko an baam̧le remaron̄ jipan̄ kōj ekkatak im eddōkļo̧k. Jet iien apan̄ kein rej jipan̄ kōj katak n̄an ukweļo̧k im jeorļo̧k bōd.
Ritōl ro an Kabun̄ in raar kōketak membōr ro n̄an kōm̧m̧ane juon nokon in jota wiik otemjeļo̧k. Ro jinen im jemen rej kōjerbal iien in n̄an katakin ajri ro nejier gospel eo, kōkajoorļo̧k kadkad ko an baam̧le eo, im lem̧ōņōņō ippān doon. Ritōl ro an Kabun̄ raar barāinwōt je juon naan in kean̄ me ej katakin m̧ool ko raorōk kōn baam̧le (lale “Baam̧le Eo: Juon Naan in Kean̄ n̄an Laļ in,” ChurchofJesusChrist.org).
Wāween ko jet n̄an kōkajoorļo̧k baam̧le eo ekitbuuj jar an baam̧le, ekkatak jeje ko rekowjarjar, im kabun̄-jar ippān doon ilo m̧ōn jar eo. Jemaron̄ barāinwōt kappukōt menmenbwij an baam̧le, bwebwenato ko an baam̧le ippān doon, im jerbal n̄an doon.
Elōn̄ armej ro ewōr aer iien ko rem̧m̧an ewōr jon̄aer n̄an m̧are ak jemjerā ko rem̧m̧an an baam̧le. Elōn̄ raar ioon jepel im jekjek ko jet reppen an baam̧le. Ijoke, gospel eo ej kōjeraam̧m̧an kōj kajjojo jekdo̧o̧n ta jekjek eo an baam̧le eo ad. Ilo ad tiljek, Anij enaaj letok juon iaļ n̄an kōj n̄an bōk kōjeraam̧m̧an ko an baam̧le ko rem̧m̧an, men̄e ilo mour in ak ilo mour eo ej itok.
Ekkatak Jeje ko Rekwojarjar
M̧are
Baam̧le
Katak Eļapļo̧k kōn Pedped in Katak in
-
Bok in Bōk Meļeļe, jebta 2: “Jipan̄ Kajjojo Armej im Baam̧le ko ilo Jerbal in Lo̧mo̧o̧r im Mour ijo ilōn̄tata”
-
Gospel Topics: “Marriage,” “Family,” “Parenting”
Jerbal in Tampeļ im Menmenbwij an Baan̄le n̄an Rūtto ro Remej
Jemedwōj Ilan̄ ej iakwe aolep ajri ro Nejin im ej kōņaan lo̧mo̧o̧r im mour ijo eutiej tata aer. Mekarta pilien armej ro raar mej ilo aer jab ron̄jake gospel eo an Jisōs Kraist ak bōk kain̄i in lo̧mo̧o̧r ko an gospel eo. Kain̄i kein ekoba peptaij, kapen, ekkapit an priesthood eo n̄an em̧m̧aan ro, menin letok kwojarjar an tampeļ, im m̧are indeeo.
Men̄e An jouj im meanwōd, Irooj ekar bar letok juon wāween n̄an armej rein n̄an bōk gospel eo im kain̄i ko an. Ilo laļ eo an jetōb, gospel eo ej kwaļo̧k n̄an ro me raar mej me rekar jab bōke (lale Katak im Bujen Ko 138). Ilo tampeļ ko, jemaron̄ kōm̧m̧ani kain̄i ko ilo etan rūtto ro ad raar mej im ro jet Armej rein raar mej ilo laļ eo an jetōb remaron̄ bōke ak jab bōke gospel eo im kain̄i ko kar kōm̧m̧ani n̄an er.
M̧okta jen ad maron̄ kōm̧m̧ani kain̄i kein, jej aikuj kile rūtto ro ad me rejjan̄in kar būki. Kile membōr ro an baam̧le eo ad bwe ren maron̄ bōk kain̄i ko ej juon dilepān jibadbad eo an jerbal in menmenbwij in baam̧le eo ad. N̄e jej lo meļeļe ko kōn er, jej kobaikļo̧k n̄an database eo an Kabun̄ in ilo FamilySearch.org. Innām jej (ak ro jet) maron̄ kōm̧m̧ani kain̄i ko n̄an bōk jikirt ilo tampeļ.
Ilo ad kile rūtto ro ad im kōm̧m̧ani kaini ko n̄an er, baam̧le ko ad remaron̄ erom ippān doon n̄an indeeo.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Bok in Bōk Meļeļe, jepta 28: “Kain̄i ko an Tampeļ n̄an eo Emej”
-
Gospel Topics: “Baptisms for the Dead,” “Family History”
Tampeļ ko, Menin Letok Kwojarjar eo (endowment), M̧are Indeeo, im Baam̧le ko n̄an Indeeo
Tampeļ ko
Tampeļ eo ej m̧weo im̧ōn Irooj. Ej juon jikin ekwojarjar ijo jemaron̄ kōm̧m̧ani kain̄i ko ippān Anij ilo ad bōk kain̄i ko An rekwojarjar. Ilo ad kōjparok bujen kein, jenaaj bōk kajoor in anij eo ej waļo̧k ilo mour ko ad (lale Katak im Bujen Ko 84:19–22; 109:22–23).
Menin Letok Kwojarjar eo (endowment)
Juon iaan kain̄i ko jej būki ilo tampeļ ej ņan etan menin letok kwojarjar. Naan eo menin letok kwojarjar (endowment) ej meļeļe in “juon menin letok.” Menin letok in n̄an jeļā im kajoor ej itok jān Anij Ilo iien menin letok kwojarjar (endowment) in, jej kōm̧m̧ani bujen ko ippān Anij me ej lukōj kōj Ippān im Nejin, Jisōs Kraist (lale jebta 1).
Rūtto ro remaron̄ karbōb n̄an bōk menin letok kwojarjar eo (endowment) an tampeļ eo aer make ālikin diktata juon iiō in aer membōr in Kabun̄ in. Kōn meļeļe ko kōn menin letok kwojarjar eo (endowment), lale Bok in Bōk Meļeļe, 27.2.
M̧are Indeeo im Baam̧le ko Indeeo
Karōk in m̧ōņōņō eo an Anij ej kōmaron̄ jemjerā ko an baam̧le n̄an pād ālkin mej. Ilo tampeļ eo jemaron̄ m̧are n̄an iien im indeeo. Menin ej kōm̧m̧an an pidodo n̄an baam̧le ko n̄an aer pād ippān doon n̄an indeeo.
Ālkin an ripālele ro m̧are kar bōk menin letok kwojarjar eo an tampeļ aer, remaron̄ liap ak m̧are n̄an indeeo. Ajri ro nejier remaron̄ liāp n̄an er.
Ļeo im lio pālele me raar liāp ilo tampeļ rej aikuj kōjparok bujen ko raar kōm̧m̧ani n̄an kōjeraam̧m̧an ko an m̧are indeeo.
Ekkatak Jeje ko Rekwojarjar
Katak Eļapļo̧k kōn Pedped in Katak in
-
Bok in Bōk Meļeļe Eļap, jebta 27: “Kain̄i ko an Tampeļ n̄an eo Emour”
-
Gospel Topics: “Temples,” “Endowment,” “Marriage”