“Jebta 3: Ekkatak im Katakin Gospel eo an Jisōs Kraist,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)
“Kūr eo n̄an Peptaij im Kapen,” Kwaļo̧k Gospel eo Aō
Jebta 3
Kūr eo n̄an Peptaij im Kapen
Pedped in Katak eo
Jej aolep ajri ro nejin Jemedwōj Ilan̄. Jaar itok n̄an laļ in n̄an bōk iien em̧m̧an n̄an katak, eddōkļo̧k, im erom āinwōt E bwe jen maron̄ bar ro̧o̧l n̄an im̧aan Mejān (lale Moses 1:39). Jejjab maron̄ erom āinwōt E ak bar ro̧o̧l n̄an E ilo an ejjeļo̧k jipan̄ ekwojarjar. Jemedwōj Ilan̄ ekar jilkintok Nejin, Jisōs Kraist, n̄an pinmuur kōn kōj im rupe to ko an mej (lale 3 Nipai 27:13–22).
Jej bōk kajoor in pinmuur eo an Kraist kōn kōjerbal tōmak ilo E n̄an ukweļo̧k, peptaij, bōk menin letok eo an Jetōb Kwojarjar kōn kapene, im niknik n̄an jem̧ļo̧kin. Kōjparok bujen peptaij eo ej bun̄tōn eo im̧aan tata lukōj kōj make n̄an Anij bwe Jetōb Kwojarjar en maron̄ karreoik, kōkajoorļo̧k, im ukōt paotokid n̄an em̧m̧anļo̧k. En̄jake kareel in kōkkwojarjar in ej ņa etan bar ļotak ilo jetōb. (Lale 2 Nipai 31:7, 13–14, 20–21; Mosaia 5:1–7; 18; 27:24; 3 Nipai 27:20; Jon 3:5.)
Bar ļotak ilo jetōb ej ijjino n̄e jej peptaij kōn dān im kōn Jetōb. Peptaij ej juon kain̄i ekalem̧ōņōņō im kōjatdikdik. N̄e jej peptaij kōn juon bōro erup im jetōb ettā, jej jino mour kāāl kōn kajoor in rejtake eo an Anij. Ālkin ad peptaij im kapene, jemaron̄ wōnm̧aanļo̧k wōt ilokajoorļo̧k n̄an bōk m̧ōttan kwojkwoj eo ilo erreo. (Lale 2 Nipai 31:13; Mosaia 18:7–16; Moronai 6:2; Katak im Bujen Ko 20:37.)
Ļeļo̧k Kūr eo
Ilo am̧ en̄jake tōl ann Jetōb, kūr armej ro n̄an peptaij im kapen. Menin emaron̄ waļo̧k ilo jabdewōt katak.
Katakin katak eo an peptaij im jipan̄ armej ro meļeļe katak eo an Kraist (lale katak 3). Katakin kōn aorōk eo im lan̄lōn̄ eo an bujen peptaij, n̄an bōk juon jeorļo̧k bōd in jerawiwi ko, im n̄an bōk menin letok an Jetōb Kwojarjar kōn kapene.
Kōpooj armej ro n̄an kūr eo an peptaij im kanooj lale bwe ren meļeļe ta eo kwar katakin im bujen eo renaaj kōm̧m̧ane. Bujen peptaij eo ej āinwōt kein:
-
M̧ōņōņō in bōk iood etan Jisōs Kraist.
-
Kōjparok kien ko an Anij.
-
Jerbal n̄an Anij im ro jet.
-
Niknik n̄an jem̧ļo̧kin. (Lale katak 4.)
Kwomaron̄ kwaļo̧k menin:
N̄e jej peptaij, jej ‘rikam̧ool im̧aan mejān [Anij] ke em̧ōj [ad] kar deļo̧n̄e juon bujen Ippān, bwe [jej] naaj jerbal n̄an E im kōjparok kien ko an.’ Ilo ad kōm̧m̧ane bujen in, E ej kallim̧ur bwe E enaaj ‘lutōkleplep eļapļo̧k Jetōb eo An [iood]’ (Mosaia 18:10).”
Kūr eo am̧ n̄an peptaij aikuj in alikkar im kajju. Kwomaron̄ ba:
“Kwonaaj ke ļoor waanjon̄ak eo an Jisōs Kraist kōn am̧ peptaij jān juon eo me kar kapiti n̄an kōm̧m̧ane kain̄i in? Kōm naaj jipan̄ eok m̧aanjabpopo n̄an peptaij. Kōmij tōmak kwomaron̄ pojak n̄an [iien eo]. Kwonaaj ke m̧aanjabpopo n̄an am̧ peptaij ilo iien jab in?”
Ikkijien jabdewōt kūr kwoj leļo̧k, kallim̧uri armej ro kōn kōjeraam̧m̧an ko reļļap renaaj būki ilo aer bōk kūr eo n̄an peptaij im kōjparok bujen ko rej ekkejeļ ippān. Kwaļo̧k naan in kam̧ool eo am̧ kōn kōjeraam̧m̧an kein.
Katakin bwe peptaij im kapene rejjab jem̧ļo̧k eo. Ijello̧kin, rej juon jikin ilo iaļ in oktak eo me ej bōktok kōjatdikdik, lan̄lōn̄, im kajoor an Anij eļapļo̧k n̄an mour an juon armej (lale Mosaia 27:25–26). Ālkin an armej ro peptaij im kapen, remaron̄ reim̧aanļo̧k n̄an aer kōkkwojarjar jān Jetōb ilo aer eddōkļo̧k ilo iaļ in bujen eo.
Eļan̄n̄e emaron̄, kūr ro kwoj katakin n̄an juon iien peptaij im juon kweilo̧k in kwojkwoj ilo iien eo rej kapen juon armej.
Ļōmņak ko kōn Kūr eo n̄an Peptaij
Ļōmņak in riiti bwebwenato jen jeje ko rekwojarjar kōn an Jisōs kar petpaij (lale Matu 3:13–17). Kwomaron̄ barāinwōt kwaļo̧k Bible video peptaij eo an Rilo̧mo̧o̧r ak Book of Mormon video kōn an rikaļoor ro an Rilo̧mo̧o̧r peptaij.
Kwomaron̄ barāinwōt riiti bwebwenato eo an Nipai kōn peptaij eo an Jisōs (lale 2 Nipai 31:4–12). Riiti bwebwenato eo kōn peptaij eo an Jisōs Kraist emaron̄ kōkajoorļo̧k ro kar katakin.
Ekkatak Jeje ko Rekwojarjar
Ekkatak eoon kein:
Je juon kōkadudu in ta eo kwar katak.