Jebta 3: Katak 2

Karōk in Lo̧mo̧o̧r eo an Jemedwōj Ilan̄

Armej Remaron̄ Ļōmņak

• Ta jibadbad eo an mour in?

• Ia eo iaar itok jān e?

• Ewōr ke juon Anij eo ej kear kōn n̄a? Ekōjkan aō en̄jake bwe E ej kea?

• Ekōjkan aō tōmak ilo Anij n̄e ekanooj lōn̄ men ko renana rej waļo̧k?

• Etke mour in ekanooj in pen jet iien? Ekōjkan aō maron̄ lo kajoor ilo iien kein reppen?

• Ekōjkan aō maron̄ erom juon armej em̧m̧anļo̧k?

• Ta eo ewaļo̧k ālkin aō mej?

Gospel eo an Jisōs Kraist kar kōjepļaaktok ej jipan̄ kōj uwaake kajjitōk ko raorōk an jetōb. Kōn gospel eo, jej katak bwe kadkad eo ad ekwojarjar im kōjatdikdik eo ad indeeo āinwōt ajri ro nejin Anij. Gospel eo ej letok n̄an kōj kōjatdikdik eo im ej jipan̄ kōj lo aenōm̧m̧an, m̧ōņōņō, im meļeļe eo. Mour kōn gospel eo ej jipan̄ kōj eddōkļo̧k im lo kajoor eo ilo ad jelm̧ae apan̄ eo an mour.

Anij ej kōņaan ijo em̧m̧an tata n̄an ajri ro Nejin im ej ikdeelel n̄an letok n̄an kōj kōjeraam̧m̧an ko An reļļap, ko rej mour jab wabanban im mour indeeo (lale Moses 1:39; Katak im Bujen Ko 14:7). Kōnke E ej iakwe kōj, E ekr letok juon karōk n̄an kōj n̄an bōk kōjeraam̧m̧an kein. Ilo jeje ko rekwojarjar, karōk in ej ņa etan karōk in lo̧mo̧o̧r, karōk in m̧ōņōņō eo eļap, im karōk in pinmuur (lale Alma 42:5, 8, 11, 13, 15, 16, 31).

Ilo karōk eo an Anj, kajjojo iaad ej kōm̧m̧ane juon em̧m̧akūt ilo mour eo m̧okta, ļotak, mour wabanban, mej, im mour ālkin mej. Anij ekar letok ta eo jej aikuji ilo em̧m̧akūt in bwe ālkin ad mej, jemaron̄ ilo jem̧ļo̧kin bar ro̧o̧l n̄an im̧aan Mejān im bōk tarlep in lan̄lōn̄ eo.

Jisōs Kraist ej dilepān karōk eo an Anij. Kōn Pinmuur eo im Jerkakpeje eo An, Jisōs ekar kōm̧m̧an bwe en pidodo n̄an kajjojo iaad n̄an bōk mour jab wabanban im mour indeeo.

Ilo tōre in mour in ad ioon laļ in, jejjab keememej mour eo ad m̧okta. Barāinwōt jejjab lukkuun meļeļe mour eo ālkin mej. Ijoke, Anij ekar kwaļo̧k elōn̄ m̧ool ko kōn m̧ōttan kein ilo em̧m̧akūt in ad indeeo. M̧ool kein rej letok ebwe jeļā n̄an kōj n̄an meļeļe jibadbad eo an mour, n̄an en̄jake lan̄lōn̄, im n̄an bōk kōjatdikdik eo an men ko rem̧m̧an rej itok. Jeļā in ej juon aorōk ekwojarjar n̄an tōl kōj ilo ad pād ioon laļ in.

Elmakot ko n̄an Katakin

Jekjōn in ej letok juon jon̄an in kōllaajrak n̄an jipan̄ eok kōppopo n̄an katakin. Ej barāinwōt koba waanjon̄ak in kajjitōk ko im kūr ko kwomaron̄ kōjerbali.

Ilo am̧ kōppopo n̄an katakin, jar ilo ļōmņak kōn kajjojo jekjek an armej eo im aikuj ko ilo jetōb. Jokāālet ta eo ejipan̄ tata n̄an katakin. Kōppopo n̄an kōmeļeļeik naan ko me armej ro remaron̄ jab meļeļe. Karōk ekkar n̄an ewi jon̄an iien eo enaaj wōr ippam̧, keememej n̄an kōkaduki katak ko.

Kāālet eoon ko n̄an kōjerbali ilo am̧ katakin. Jekjōn eo an “Pedped an Katak” eo ej koba elōn̄ eoon ko rejipan̄.

Ļōmņak ewi wōt kajjitōk ko n̄an kajjitōk ilo am̧ katakin. Karōk kūr ko n̄an liļo̧k me renaaj kōketak kajjojo armej n̄an jerbale.

Kōmejajaik kōjeraam̧m̧an ko kar kallim̧ur kaki an Anij, im kwaļo̧k naan in kam̧ool eo am̧ kōn ta eo kwoj katakin.

Kwomaron̄ Katakin Armej ro ilo 15–25 Minit ko

Kāālet juon ak lōn̄ļo̧k pedped in katak kein kōn karōk in lo̧mo̧o̧r n̄an katakin. Pedped in katak eo n̄an kajjojo pedped in katak ej leļo̧k ālkin laajrak in.

Mour eo M̧okta: Kōttōpar eo im Karōk eo an Anij n̄an Kōj

• Jej aolep ajri in jetōb ro nejin Anij. E ekar kōm̧anm̧an kōj ilo nememe eo An.

• Jekar mour ippān Anij m̧okta jān ad kar ļotak tok n̄an laļ in. Jej uwaan baam̧le eo An. E ejeļā im iakwe kōj kajjojo.

• Anij ekar letok juon karōk n̄an m̧ōņōņō im eddōkļo̧k eo ad ilo mour in im mour indeeo.

• Ilo mour eo ad m̧okta, jaar kāālet n̄an ļoor karōk eo an Anij. Menin ej meļeļe in itok n̄an laļ in bwe jen maron̄ bōk bun̄tōn eo tok juon ilo eddōkļo̧k indeoo eo ad.

• Jisōs Kraist ej dilepān karōk eo an Anij. E ej kōm̧m̧an bwe en pidodo n̄an kōj n̄an bōk mour jab wabanban im mour indeeo.

Kōm̧anm̧an Eo

• Ium̧win tōl eo an Anij, Jisōs Kraist ekar kōm̧anm̧an laļ in.

Wōtlo̧k eo an Adam im Iv

• Adam im Iv raar ajri in jetōb ko jinointata nejin Anij n̄an itok n̄an laļ in. Anij ekar kōm̧anm̧an ānbwinier im likūt er ilo Jikin Kallūb Eden.

• Adam im Iv raar bōd, kar kadiwōjļo̧k er jān jikin kallib eo, im raar jepeļļo̧k jān im̧aan mejān Anij. Iien in ej ņa etan Wōtlo̧k eo.

• Ālkin Wōtlo̧k eo, Adam im Iv raar erom wabanban. Āinwōt riwabanba ro, raar maron̄ in katak, eddōkļo̧k, im neji ajri ro. Raar barāinwōt būrom̧ōj, jerawiwi, im mej.

• Wōtlo̧k eo ekar juon bun̄tōn m̧aanļo̧k n̄an aolep armej. Wōtlo̧k eo ekar kōm̧m̧an bwe en pidodo n̄an kōj n̄an ļotak ioon laļ in im eddōkļo̧k ilo karōk eo an Jemedwōj Ilan̄.

Mour eo Ad ioon Laļ in

• Ilo karōk eo an Anij, jaar aikuj itok n̄an laļ in n̄an bōk ānbwinin kanniōk ko, katak, im eddōļo̧k.

• Ilo laļ in, jej katak n̄an etetal kōn tōmak. Ijoke, Jemedwōj Ilan̄ ekar jab kōmakeļo̧k kōj. E ekar letok elōn̄ menin letok ko im tōl ko n̄an jipan̄ kōj bar ro̧o̧l n̄an im̧aan Mejān.

Pinmuur eo an Jisōs Kraist

• Kajjojo iaad ej jerawiwi, im kajjojo iaad renaaj mej. Kōnke Anij ej iakwe kōj, E ekar jilkintok Nejin, Jisōs Kraist, n̄an laļ in an lo̧mo̧o̧ren kōj jān jerawiwi im mej.

• Kōn wōt en̄taan in pinmuur eo an Jisōs, maron̄ jeorļo̧k ad bōd im erreo jān jerawiwi ko ad. Būruōd emaron̄ oktak n̄an em̧m̧anļo̧k ilo ad ukweļo̧k. Menin ej kōm̧m̧an an pidodo n̄an ad bar ro̧o̧l n̄an im̧aan mejān Anij im bōk tarlep in lan̄lōn̄ eo.

• Kōn wōt Jerkakpeje eo an Jisōs, jenaaj maron̄ jerkakpeje ālkin ad mej. Menin ej meļeļe in bwe kajjojo jetōb im ānbwin an armej renaaj bar koba ippān doon, im kajjojo iaad enaaj mour indeeo ilo juon jerkakpeje in ānbwin eweppān.

• Jisōs Kraist ej letok kaenōm̧m̧an, kōjatdikdik, im kemour. En̄taan in pinmuur eo An ej kakōļļe in iakwe eo An eļap tata. Aolepān men kein rejjab jim̧we ilo mour in emaron̄ kajim̧we kōn Pinmuur eo an Jisōs Kraist.

Laļ eo an Jetōb

• N̄e ānbwin eo ad ej mej, jetōb eo ad ej wōnm̧aanļo̧k wōt in mour ilo laļ eo an Jetōb. Menin ej juon jekjek in katak ekadu kitien an katak im kōppopo m̧okta jān Jerkakpeje.

• Gospel eo an Jisōs Kraist ej katakin ilo laļ eo an jetōb, im jemaron̄ wōnm̧aanļo̧k wōt n̄an eddōkļo̧k im wōnm̧aanļo̧k.

Jerkakpeje, Lo̧mo̧o̧r, im Mour Ijo Ilōn̄tata

• Ālkin iien eo ad ilo laļ eo an jetōb, Jerkakpeje eo ej bun̄tōn eo tok juon ilo em̧m̧akūt eo ad indeeo.

• Jerkakpeje ej bar koba in jetōb im ānbwin eo ad. Kajjojo iaad enaaj jerkakpeje im bōk juon ānbwin in kanniōk eweppān. Jenaaj aolep mour n̄an indeeo. Menin ekar kapidodoik kōn Pinmuur im Jerkakpeje eo an Rilo̧mo̧o̧r.

Ekajet im Aiboojoj an Laļ ko

• N̄e jej jerkakpeje, Jisōs Kraist enaaj riekajet eo ad. Kōn aolep ijello̧kin jejjo̧ men ko kōtļo̧k, aolep ajri ro nejin Anij renaaj bōk juon jikin ilo juon aiboojoj an laļ.

• Men̄e jenaaj aolep jerkakpeje, jejjamin naaj aolep bōk juon wōt aiboojoj indeeo. Jisōs enaaj ekajete kōj ekkar n̄an tōmak eo ad, jerbal ko, im ukweļo̧k ilo mour in im ilo laļ eo an jetōb. Jemaron̄ bar ro̧o̧l im mour im̧aan mejān Anij eļan̄n̄e jej tiljek.

Kajjitōk ko Kwoj Maron̄ Kajjitōk Ippān Armej ro

Kajjitōk kein rej waanjon̄ak ko kōn ta eo kwomaron̄ kajjitōk ippān armej ro. Kajjitōk kein remaron̄ jipan̄ eok bōk bwebwenato ko im meļeļe ko eļap meļeļeier kōn aikuj ko an juon armej im kōļmenļo̧kjeņ.

• Ta eo kwoj en̄jake ej jibadbad eo an mour?

• Ta eo ej bōkwaj n̄an eok m̧ōņōņō?

• Ta apan̄ ko kwoj aikuji Anij n̄an jipan̄ eok kaki?

• Ta eo kwar katak jān apan̄ ko kwar jelm̧ai?

• Ta eo kwojeļā kake kōn Jisōs Kraist? Ekōjan an mour eo im mijen eo An kar jelet mour eo am̧?

Kūr ko Kwoj Maron̄ Liļo̧k

• Kwonaaj ke kajjitōk ippān Anij ilo jar n̄an jipan̄ eok jeļā bwe ta eo kōm kar katakin ej m̧ool? (Lale “Kōļmenļo̧kjeņ in Katak ko: Jar” ilo jākjōn eo āliktata an katak 1.)

• Kwonaaj ke etal n̄an jar ippām ilo Jabōt in n̄an katak eļapļo̧k kōn ta eo jaar katakin?

• Kwonaaj ke riiti Bok in Mormon im jar n̄an jeļā bwe ej naan in Anij? (Kwomaron̄ elmakote jebta ko ak eoon ko rejenolo̧k.)

• Kwonaaj ke ļoor waanjon̄ak eo an Jisōs im peptaij? (Lale “Kūr eo n̄an Peptaij im Kapene,” eo em̧ōkaj an jino katak 1.)

• Jemaron̄ ke karōk juōn iien n̄an am bar lotok?

Pedped in Katak eo

Jekjōn in ej letok katak eo im eoon ko n̄an am̧ ekkatak n̄an kōkajoorļo̧k jeļā im naan in kam̧ool eo am̧ kōn gospel eo im n̄an jipan̄ eok katakin.

Mour eo M̧okta: Kōttōpar eo im Karōk eo an Anij n̄an Kōj

Jej Ajri ro Nejin Anij, im Jaar Mour Ippān M̧okta jān Ad Ļotak

Anij ej Jemen jetōb ko ad. Kōj jej lukkuun ajri ro Nejin, kar kōm̧anm̧an ilo nememe eo An. Kajjojo iaad ewōr juon an paotok ekwojarjar āinwōt juon nejin Anij. Jeļā in emaron̄ jipan̄ kōj dipuk iien ko reppen im maron̄ im̧we kōj n̄an erom ijo em̧m̧an tata ippād.

Jaar mour ippān Anij āinwōt ajri in jetōb ro Nejin m̧okta jān ad kar ļotak ioon laļ in. Jej uwaan baam̧le eo An.

“Ewōr juon kile aorōk jej aolep bōke kiiō im indeeo, juon eo me jej aikuj jab bōk mejād jāne, im juon men jej aikuj in kam̧m̧oolol kake. En̄in ej bwe kwoj im kar aolep iien juon nejin ļaddik im leddik nejin Anij kōn okar in jetōb ko an rej indeeo.

“… Meļeļe m̧ool in—lukkuun meļeļe im kaorōke—ej ukōt mour. Ej lewaj n̄an eok juon kile ejej uwaan me ejjeļo̧k juon emaron̄ bōke jān kwe. Bōtaab eļapļo̧k jān in, ej aikuj lewaj n̄an eok elōn̄ en̄jake ko raorōk im juon en̄jake kōn aorōk eo am̧ ejjeļo̧k jem̧ļo̧kin. Āliktata, ej lewaj n̄an eok juon jibadbad ekwojarjar, aorōk, im wōr tokjān ilo mour” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).

Jaar Kāālet n̄an Itok n̄an Laļ in

Jemedwōj Ilan̄ ej iakwe kōj im kōņaan bwe jen erom āinwōt E. E ej juon armej eutiej tata kōn juon ānbwin in kanniōk aiboojoj.

Ilo mour eo ad m̧okta, jaar katak bwe Anij ekar wōr juon an karōk n̄an kōj n̄an erom āinwōt E. Juon m̧ōttan in karōk eo an ekar bwe jenaaj kar em̧m̧akūt jān kapijuknen eo ad ilo lan̄ im itok n̄an laļ in n̄an bōk ānbwin in kanniōk. Jej barāinwōt kar aikuj in bōk en̄jake im kalōk tōmak ilo iien eo jej ettoļo̧k jān im̧aan mejān Anij. Jejjamin naaj kar keememej mour ippān Anij. Ijoke, E enaaj kar letok ta eo jaar aikuji bwe jen maron̄ bar ro̧o̧l n̄an mour Ippān.

Anemkwoj in kāālet, ak anemkwoj eo im maron̄ eo n̄an kāālet, ej juon m̧ōttan aorōk an karōk eo an Anij n̄an kōj. Ilo mour eo ad m̧okta, kajjojo iaad ekar kāālet n̄an ļoor karōk eo an Anij im itok n̄an laļ in bwe jen maron̄ bōk bun̄tōn eo tok juon ilo eddōkļo̧k in ad indeeo. Jaar meļeļe bwe ilo ad kar pād ijin, jenaaj kar bōk elōn̄ iien ko rem̧m̧an n̄an eddōkļo̧k im en̄jake lan̄lōn̄. Jej barāinwōt kar meļeļe bwe jenaaj kar jelm̧ae jum̧ae. Jenaaj kar en̄jake kapo, mālijjon̄ ko, būrom̧ōj, im mej.

Ilo kāālet n̄an itok n̄an laļ in, jaar lōke ilo iakwe im jipan̄ eo an Anij. Jaar lōke ilo karōk in lo̧mo̧o̧r eo An.

Jemedwōj Ilan̄ ekar Kāālet Jisōs Kraist n̄an Lo̧mo̧o̧ren Kōj

Jisōs Kraist ej dilepān karōk eo an Anij. M̧okta jān itok n̄an laļ in, jaar jeļā bwe jemaron̄ kar jab maron̄ bar ro̧o̧l n̄an im̧aan mejān Anij kōn kōj make. Jemedwōj Ilan̄ ekar kāālet Jisōs Kraist, m̧aanje eo Nejin, n̄an kōm̧m̧an bwe en pidodo n̄an ad bar ro̧o̧l n̄an E im bōk mour indeeo.

Jisōs ekar m̧ōņōņō in bōke. E ekar errā n̄an itok n̄an laļ in im lo̧mo̧o̧ren kōj kōn en̄taan in pinmuur eo An. Pinmuur im Jerkakpeje eo An renaaj kar kōmaron̄ jibadbad ko an Anij n̄an kōj n̄an aer kūrm̧ool.

Ekkatak Jeje ko Rekwojarjar

Ajri ro Nejin Anij

• Jerbal 17:28–29

• Hibru 12:9

Kōttōpar eo an Anij

• Moses 1:39

• Ebream 3:25–26

• Jon 17:3

Mour eo M̧okta

• Katak im Bujen Ko 138:53–56

• Ebream 3:22–28

• Epesōs 1:3–4

• Job 38:4–7

• Jeremaia 1:5

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Mour eo M̧okta,” “Karōk in Lo̧mo̧o̧ren”

• Bok in Bōk Meļeļe Eļap, 1.1: “Karōk in M̧ōņōņō an Anij”

• Gospel Topics: “Premortality,” “Plan of Salvation”

Kōm̧anm̧an Eo

Karōk eo an Jemedwōj Ilan̄ kar letok n̄an kōm̧anm̧an eo an laļ, ijo jetōb eo an ajri ro Nejin renaaj kar bōk ānbwin in kanniōk im bōk en̄jake. Mour eo ad ioon laļ in ej menin aikuj n̄an kōj n̄an eddōkļo̧k im erom āinwōt Anij.

Ium̧win tōl eo an Jemedwōj Ilan̄, Jisōs Kraist ekar kōm̧anm̧an laļ in im aolep menin mour ko ie. Innām Jemedwōj Ilan̄ ekar kōm̧anm̧an m̧aan im kōrā ilo nemāme eo An. Kōm̧anm̧an eo ej juon kakōļļe in iakwe eo an Anij im ikdeelel eo An n̄an kōj n̄an bōk iien eo em̧m̧an n̄an eddōkļo̧k.

Ekkatak Jeje ko Rekwojarjar

• 1 Nipai 17:36

• Alma 30:44

• Katak im Bujen Ko 88:41–47

• Moses 2; 6:63

• Jenesis 1:27

• Josep Smith Ukok, Jon 1:1–3

• 2 Korint 5:6–7

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Kōm̧anm̧an, Kōm̧anm̧an eo”

• Gospel Topics: “Creation”

Wōtlo̧k eo an Adam im Iv

M̧okta jān Wōtlo̧k eo

Adam im Iv raar ajri in jetōb ro jinoin tata nejin Jemedwōj Ilan̄ n̄an itok n̄an laļ in. Anij ekar kōm̧anm̧an ānbwin in kanniōk ko aer ilo nemāme eo An make im kar likūt er ilo Jikin Kallib Eden. Ilo jikin kallib eo ijo ekar ejjeļo̧k ruweer ie, im Anij ekar kake aikuj ko aer.

Ke Adam im Iv raar pād ilo jikin kallib eo, Anij ekar kakien er n̄an jab m̧ōn̄ā leen wōjke in jeļā em̧m̧an im nana eo. Eļan̄n̄e raar pokake kien in, remaron̄ kar pād wōt ilo jikin kallib eo. Ijoke, renaaj kar jab maron̄ in eddōkļo̧k im katak jān jum̧ae im apan̄ ko an mour in. Rejjamin naaj kar maron̄ jeļā lan̄lōn̄ kōnke reban kar maron̄ en̄jake būromōj im metak.

Setan ekar kapo Adam im Iv n̄an m̧ōn̄ā leen eo kamo, im raar kāālet n̄an kan̄e. Kōn wōt kāālet in, kar kadiwōjļo̧k erro jān jikin kallib eo im kar kōjepeļļo̧k erro jān im̧aan mejān Anij. Iien in ej ņa etan Wōtlo̧k eo.

Ālkin Wōtlo̧k eo

Ālkin Wōtlo̧k eo, Adam im Iv raar erom wabanban. Ejako aerro pād ilo juon jekjek in ejjeļo̧k ruwier, raar meļeļe im en̄jake em̧m̧an im nana jim̧or. Remaron̄ kōjerbal anemkwoj in kāālet eo aer n̄an kāālet ikōtaer. Kōnke Adam im Iv raar jelm̧ae jum̧ae im apan̄ ko, raar maron̄ in katak im eddōkļo̧k. Kōnke raar en̄jake būromōj, remaron̄ barainwōt en̄jake lan̄lōn̄. (Lale 2 Nipai 2:22–25.)

Kōjekdo̧o̧n apan̄ ko aerro, Adam im Iv raar en̄jake bwe aer wabanban ekar juon kōjeraam̧m̧an ļapļap. Juon kōjeraam̧m̧an ekar bwe remaron̄ in lōn̄ nejierro ajri. Menin ekar letok juon iaļ n̄an an ajri in jetōb ko nejin Anij itok n̄an laļ in im bōk ānbwin in kanniōk.

Ikkijien kōjeraam̧m̧an ko an Wōtlo̧k eo, Adam im Iv raar jim̧or lan̄lōn̄. Iv ekar ba, “Eļan̄n̄e ar jab kōn bōd eo ad ejamin naaj kar wōr [nejid ajri ro], im jamin naaj kar jeļā em̧m̧an im nana, im lan̄lōn̄ kōn lo̧mo̧o̧ren eo ad, im mour indeeo eo me Anij ej leļo̧k n̄an aolep ro rej pokake” (Moses 5:11; lale barāinwōt eoon 10).

Kōļmenļo̧kjeņ an Katak eo: Wōtlo̧k Eo

Wōtlo̧k eo ekar juon m̧ōttan eaorōk ilo karōk in lo̧mo̧o̧r eo an Anij Wōtlo̧k eo ekar kōm̧m̧an an pidodo n̄an kōj n̄an itok n̄an laļ in im eddōk m̧aanļo̧k n̄an erom āinwōt Anij (lale 2 Nipai 2:25).

Jokāālet eo an Iv innām Adam n̄an bōk m̧ōttan leen eo im em̧m̧akūt jān Jikin Kallib Eden ekar juon kāālet in jetōb kar kanooj ļōmņak kake. Ilo m̧ool, jeje ko rekwojarjar im rikanaan ro rej kōnono kake kāālet in āinwōt juon bōd, ejjab juon jerawiwi (lale Laajrak in Tōmak ko 1:2; 2 Nipai 9:6).

Jet armej rej bōd ilo aer tōmak bwe aolepādwōj ej jolete jorrāān in bōd eo an Adam im Iv (kōnono kake jān juon āinwōt “jerawiwi eo m̧oktata”). Ijoke, Irooj ekar kwaļo̧k bwe Eaar “pinmuur kōn bōd eo m̧oktata, eo jān e jero̧wiwi ko an ro jemād im jined rejjab maron̄ uwaak kaki ioon bōran ro nejier” (Moses 6:54).

N̄e ej kab kein kajuon katakin kōn Wōtlo̧k eo, lukkuun kōmeļeļeik ilo pidodo in.

Ekkatak Jeje ko Rekwojarjar

Ilo Jikin Kallib eo

• 2 Nipai 2

• Moses 2:26–31; 3:15–17; 4:6–12; 7:32

• Jenesis 1:26–31; 2:15–17

Wōtlo̧k Eo

• 2 Nipai 2:15–16, 22–27; 9:6–10

• Alma 12:22–34

• Moses 4; 5:8–12

• Jenesis 2:16–17; 3

• Katak im Bujen Ko 29:36, 39; 101:78

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Wōtlo̧k eo an Adam im Iv,” “Anemkwōj in Kāālet”

• Gospel Topics: “Fall of Adam and Eve,” “Agency and Accountability”

Mour eo Ad ioon Laļ in

Elōn̄ armej rej ļōmņak, “Etke ij pād ijin ioon laļ in?” Mour eo ad ioon laļ in ej juon m̧ōttan karōk eo an Anij aorōk n̄an eddōkļo̧k eo ad indeeo. Jibadbad eo ad eļap tata ej n̄an m̧aanjabpopo n̄an bar ro̧o̧l n̄an im̧aan mejān Anij im bōk juon tarlep in lan̄lōn̄. Kar kōllaajrake itulaļ rej jet iaan wāween ko me mour ilo laļ in ej kōpooj kōj n̄an menin.

Bōk juon Ānbwin in Kanniōk

Juon jibadbad an itok n̄an laļ in ej n̄an bōk juon ānbwin in kanniōk eo me jetōb eo ad emaron̄ jokwe ie. Ānbwin ko ad rej ekwojarjar, menin kōm̧anm̧an ekabwilōn̄lōn̄ an Anij. Kōn ānbwin in kanniōk kein, jemaron̄ kōm̧m̧an, katak, im en̄jake elōn̄ men ko me jetōb ko ad rejjab maron̄i. Jemaron̄ eddōkļo̧k ilo wāween ko me jejjab maron̄ in kar āinwōt jetōb ko.

Kōnke ānbwin ko ad rej wabanban, jej en̄jake metak, nan̄inmej, im mālijjon̄ ko jet. En̄jake kein remaron̄ jipan̄ kōj katak kijenmej, meanwōd, im bōnja ko jet rekwojarjar. Remaron̄ in m̧ōttan iaļ eo ad n̄an lan̄lōn̄. Kāālet jim̧we eo n̄e ej pen n̄an kōm̧m̧ane ej emakijkij ekōjkan an tōmak, kōjatdikdik, im iakwe-em̧ool erom m̧ōttan m̧wil eo ad.

Katak n̄an Kōjerbal Anemkwoj in Kāālet eo ilo Mālōtlōt

Bar juon jibadbad in mour wabanban in ej n̄an katak n̄an kōjerbal anemkwoj in kāālet eo ad ilo mālōtlōt—n̄an kāālet ta eo ejim̧we. Katak n̄an kōjebral anemkwoj in kāālet eo ad ilo mālōtlōt ej aorōk n̄an erom āinwōt Anij.

Jemedwōj Ilan̄ im Jisōs Kraist rej katakin kōj ta eo ejim̧we im letok kien ko n̄an tōl kōj n̄an m̧ōņōņō. Setan ej kapo kōj n̄an kōm̧m̧an bōd, kōņaan bwe jen en̄taan āinwōt e. Jej jelm̧ae jum̧ae ikōtaan em̧m̧an im nana, eo ej aorōk ilo katak n̄an kōjerbal anemkwoj in kāālet eo ad (lale 2 Nipai 2: 11).

Ilo ad pokake Anij, jej eddōkļo̧k im bōk kōjeraam̧m̧an ko An kar kallim̧ur kaki. N̄e jej jab pokake, jej kōttoļo̧k kōj make jān E im bōk kaje ko an jerawiwi. Men̄e jet iien ej waļo̧k āinwōt juon, āliktata jerawiwi ej tōlļo̧k n̄an jab m̧ōņōņō. Emakijkij an kōjeraam̧m̧an ko an pokake—im jelet ko an jerawiwi—rejjab m̧ōkaj aer kein kam̧ool ak alikkar itulik. Bōtaab rej ilo m̧ool, n̄an Anij jim̧we.

Jekdo̧o̧n n̄e jej kōm̧m̧ane ijo em̧m̧an tata ippād, jej aolep jerawiwi “likjab jān aiboojoj an Anij” (Rom 3:23). Jeļā menin, Jemedwōj Ilan̄ ekar letok juon wāween n̄an ad ukweļo̧k bwe jen maron̄ bar ro̧o̧l n̄an Ippān.

Ukweļo̧k ej bōktok kajoor eo an ad Ripinmuur, Jisōs Kraist, n̄an mour ko ad (lale Hilamōn 5:11). Ilo ad ukweļo̧k, jej erom erreo jān jerawiwi kōn en̄taan in pinmuur eo an Jisōs Kraist im menin letok eo an Jetōb Kwojarjar (lale 3 Nipai 27:16–20). Kōn ukweļo̧k, jej en̄jake lan̄lōn̄ Wāween eo ļo̧k n̄an ippān Jemedwōj Ilan̄ ej peļļo̧k n̄an kōj, bwe E ej tūriam̧o kake. (Lale “Ukweļo̧k” ilo katak 3.)

Katak n̄an Etetal kōn Tōmak

Bar juon jibadbad an mour in ej n̄an bōk en̄jake eo me emaron̄ itok wōt kōn jepeļļo̧k eo jān Jemedwōj Ilan̄. Kōnke jejjab lo E, jej aikuj in katak n̄an etetal kōn tōmak (lale 2 Korint 5:6–7).

Anij ekar jab kōmakeiļo̧k kōj ilo em̧m̧akūt in. E ekar letok Jetōb Kwojarjar n̄an tōl, kōkajoorļo̧k, im kōkkwojarjar kōj. E ekar barāinwōt letok jeje ko rekwojarjar, rikanaan ro, jar, im gospel eo an Jisōs Kraist.

Aolep m̧ōttan ko n̄an en̄jake eo ad ilo mour in—lan̄lōn̄ ko im būrom̧ōj ko, wejepedik ko im jorrāān ko—remaron̄ jipan̄ kōj eddōkļo̧k ilo ad m̧aanjabpopo n̄an bar ro̧o̧l n̄an Anij.

Ekkatak Jeje ko Rekwojarjar

Juon Iien n̄an Eddōkļo̧k im Wōnm̧aanļo̧k

• 2 Nipai 2:21; 9:27

• Mosaia 3:19

• Alma 12:21–24; 34:31–35; 42:2–10

• Ebream 3:25–26

Kāālet

• 2 Nipai 2:26–29

• Joshua 24:15

Em̧m̧an im Nana

• Moronai 7:12–19

Jerawiwi

• Hilamōn 5:11

• Rom 3:23

• 1 Jon 1:8–10

Jej Aikuj in Erreo n̄an Ad pād ippān Anij

• 3 Nipai 27:19

• Moses 6:57

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Mour in, Wabanban,” “Men Ko Reppen”

• Gospel Topics: “Mortality,” “Adversity”

Pinmuur eo an Jisōs Kraist

Kōn wōt Wōtlo̧k eo an Adam im Iv, jej aolep ioon jerawiwi im mej. Jejjab maron̄ anjo̧ ioon jekjek ko an jerawiwi im mej kōn kōj make. Ilo karōk in lo̧mo̧o̧r eo an Jemedwōj Ilan̄, E ekar letok juon wāween n̄an anjo̧ ioon jekjek ko an Wōtlo̧k eo bwe jen maron̄ bar ro̧o̧l n̄an E. M̧okta jān kōm̧anm̧an laļin, Anij ekar kāālet Jisōs Kraist bwe en ad Rilo̧mo̧o̧r im Ripinmuur.

Jisōs Kraist wōt emaron̄ lo̧mo̧o̧ren kōj jān jerawiwi im mej. E ej lukkuun Nejin Anij. E ekar mour juon mour ejjeļo̧k jerawiwi, lukkuun pokake Jemen. E ekar pojak im m̧ōņōņō n̄an kōm̧m̧ane ankilan Jemedwōj Ilan̄.

Pinmuur eo an Rilo̧mo̧o̧r ekitbuuj en̄taan eo An ilo Gethsemane, en̄taan eo An im mej eo ioon debwāāl, im Jerkakpeje eo An. E ekar en̄taan eļap jān maron̄ meļeļe kake—lukkuun in ļap jon̄an E ekar to̧o̧r bōtōktōk jān aolep ron̄ in ānbwinin (lale Katak im Bujen Ko 19:18).

Pinmuur eo an Jisōs Kraist ej iien eo aiboojoj tata ilo bwebwento an armej. Kōn en̄taan in pinmuur eo An, Jisōs ekar kōm̧m̧an bwe karōk eo an Jemen en jerbal. Enaaj kar ejjeļo̧k tokjād ļo̧k wōt n̄an jidik ilo an jako Pinmuur eo an Jisōs Kraist kōnke jejjab maron̄ lo̧mo̧o̧ren kōj make jān jerawiwi im mej (lale Alma 22:12–15).

En̄taan eo an ad Rilo̧mo̧o̧r ekar juon kakōļļe ļapļap in iakwe eo n̄an Jemen im n̄an kōj. “Depakpakin, im aetokan, im m̧wilaļin, im utiejen” an iakwe eo an Kraist eļļāļo̧k jān meļeļe eo ad (Epesōs 3:18; lale barāinwōt eoon 19).

Jisōs Kraist ekar Anjo̧ Ioon Mej n̄an Aolep

Ke Jisōs Kraist ekar mej ioon debwāāl eo, jetōb eo An ekar jepeļļo̧k jān Āinbwinin Ilo raan eo kein kajilu, jetōb eo An im ānbwin eo An raar bar koba, jamin naaj bar jepeļļo̧k bar juon alen. E ekar waļo̧kļo̧k n̄an elōn̄ armej ro, kwaļo̧k n̄an er bwe E ekar juon ānbwin jab wabanban an kanniōk im di ko. Koba in an jetōb eo im ānbwin eo ej ņa etan Jerkakpeje.

Āinwōt riwabanban ro, kajjojo iaad enaaj mej. Ijoke, kōn wōt anjo̧ eo an Jisōs ioon mej, aolep armej raar ļotak ioon laļ in naaj jerkakpeje. Jerkakpeje eo ej juon menin letok kwojarjar n̄an aolep, kar letok kōn tūriam̧o kake eo an Rilo̧mo̧o̧r eo im jouj in pinmuur eo. Kajjojo jetōb im ānbwin an juon armej renaaj bar koba, im kajjojo iaad naaj mour n̄an indeeo ilo juon ānbwin eweppān, ekar jerkakpeje. Eļan̄n̄e en kar jab Jisōs Kraist, mej enaaj kar jem̧ļo̧k eo an aolep kōjatdikdik n̄an juon mour ilju im jekļaj ippān Jemedwōj Ilan̄ (lale 2 Nipai 9:8–12).

Jisōs Ekōm̧m̧an An Pidodo n̄an Ad Erreo jān Jerawiwi ko Ad

N̄an meļeļe kōjatdikdik eo jemaron̄ bōke kōn Kraist, jej aikuj in meļeļe kien jim̧we. Menin ej juon kien ejjab oktak me ej bōktok kape ko kōn jerbal ko ad. Pokake Anij ej bōktok kaje ko rem̧m̧an, im jab pokake ej bōktok kaje ko renana. (Lale Alma 42:14–18.) N̄e jej jerawiwi, jej erom jab erreo ilo jetōb, im ejjeļo̧k men etoon emaron̄ mour ilo im̧aan mejān Anij (lale 3 Nipai 27:19).

Ilo iien en̄taan in pinmuur eo an Jisōs Kraist, E ekar jutak ilo ijo jidik, en̄taan, im kōļļāik wōņāān jerawiwi ko ad (lale 3 Nipai 27:16–20). Karōk eo an Anij ej leļo̧k n̄an Jisōs Kraist kajoor eo n̄an kōm̧mane jojomar eo ilo etan—n̄an jutak ikōtaad im im jim̧we (lale Mosaia 15:9). Kōn wōt en̄taan in pinmuur eo an Jisōs, E emaron̄ bōk jim̧we in tūriam̧o kake ko An ilo etad ilo ad kōjerbal tōmak n̄an ukweļo̧k (lale Moronai 7:27; Katak im Bujen Ko 45:3–5). Āindein tūriam̧o emaron̄ kōttōprak akweļap ko an kien eo, im atbo̧kwōji [kōj] ilo pein kōjparok” (Alma 34:16).

Kōn wōt menin letok eo an Pinmuur eo an Rilo̧mo̧o̧r im ad ukweļo̧k jemaron̄ bar ro̧o̧l n̄an mour ippān Anij. Ilo ad ukweļo̧k, em̧ōj jeorļo̧k ad bōd im karreoik kōj ilo jetōb. Jej rōļak jān eddo eo an bōd kōn jerawiwi ko ad. Jetōb ko ad rekinejnej rej mour. Jej obrak kōn lan̄lōn̄ (lale Alma 36:24).

Men̄e jejjab weppān im maron̄ likjab bar juon alen, elōn̄ļo̧k jouj, iakwe, im tūriam̧o kake ilo Jisōs Kraist jān likjab, irļo̧k, ak jerawiwi ilo kōj. Anij ej aolep iien pojak im kijooror n̄an atbo̧kwōj kōj ilo ad oktakļo̧k n̄an E im ukweļo̧k (lale Luk 15:11–32). Ejjeļo̧k im ejjeļo̧k juon “enaaj maron̄ in kōjepel kōj jān yokwe an Anij, eo ilo Kraist Jisōs ad Irooj” (Rom 8:39).

Jisōs ekar Bōk ioon Make Metak ko, En̄taan ko, im M̧ōjņo ko Ad

Ilo en̄taan in pinmuur eo An, Jisōs Kraist ekar bōk ioon Make metak ko, en̄taan ko, im m̧ōjņo̧ ko ad. Kōnke kōn menin, E ejeļā “ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer” (Alma 7:12; lale barāinwōt eoon 11). E ej kūr, “Kom̧win itok,” im ilo ad kōm̧m̧ane, E ej letok n̄an kōj kakkūje, kōjatdikdik, kajoor, ļōmņak, im kemour (Matu 11:28; lale barāinwōt eoon 29–30).

Ilo ad kōjatdikdik ioon Jisōs Kraist im Pinmuur eo An, E emaron̄ jipan̄ kōj niknik ilo mālijjon̄ ko ad, nan̄inmej ko, im metak. Jenaaj obrak kōn lan̄lōn̄, aenōm̧m̧anim, im jokne, Aolep men ko rejjab jokkuun wōt juon ilo mour maron̄ in kajim̧wi kōn Pinmuur eo an Jisōs Kraist.

Ekkatak Jeje ko Rekwojarjar

Pinmuur eo an Rilo̧mo̧o̧r

• 2 Nipai 2:6–8

• Mosaia 3:5–12

• Alma 7:11–13; 11:40; 34:8–10

• Katak im Bujen Ko 18:11–12; 19:15–19; 45:3–5; 76:40–43

• Jon 3:16–17

• 1 Jon 1:7

Jerkakpeje

• 2 Nipai 9:6–7, 13

• Mosaia 15:7–12

• Alma 11:42–45; 40:23

• Hilamōn 14:15–19

• Luk 24:1–10, 36–39

• Jon 11:25–26

• 1 Korint 15:20–22, 41–42

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarar: “Jisōs Kraist,” “Kōllaajrak, Pinmuur,” “Jouj”

• Gospel Topics: “Jesus Christ,” “Atonement of Jesus Christ,” “Grace”

Laļ eo an Jetōb

Elōn̄ armej rej ļōmņak, “Ta ej waļo̧k ālkin aō mej?” Karōk in lo̧mo̧o̧r eo ej letok jet uwaak ko raorōk n̄an kajjitōk in.

Mej ej m̧ōttan “karōk in tūriam̧okake” eo an Anij n̄an kōj (2 Nipai 9:6). Ijello̧kin jem̧ļo̧k in mour eo ad, mej ej bun̄tōn eo tok juon ilo eddōkļo̧k indeeo eo ad. N̄an erom āinwōt Anij, jej aikuj en̄jake mej im tokālik bōk ānbwin ko rōweppān, jerkakpeje.

N̄e ānbwin eo ad ej mej, jetōb eo ad ej wōnm̧aanļo̧k wōt im mour ilo laļ eo an Jetōb. Menin ej juon jekjek ekadu kitien im ej kōppopo eo m̧okta jān Jerkakpeje eo im Ekajet eo Āliktata. Jeļā eo ad jān mour in ej pād wōt ippād.

Ilo laļ eo an jetōb, armej ro me raar bōk im mour kōn gospel eo an Jisōs Kraist “bōk er ilo juon mejatoto in m̧ōņōņō, eo ņa etan paredais” (Alma 40:12). Ajri ro reddik rej barāinwōt bōk n̄an paredais n̄e rej mej.

Jetōb ko ilo paredais renaaj aenōm̧man jān inepata ko im būrom̧ōj ko aer. Renaaj wōnm̧aanļo̧k wōt ilo eddōkļo̧k in jetōb ko aer, kōm̧m̧ane jerbal eo an Anij im jerbal in karejar n̄an ro jet. Renaaj katakin gospel eo n̄an ro me raar jab bōke ilo tōre in mour eo aer ilo mour in (lale Katak im Bujen Ko 138:32–37, 57–590.

Ilo laļ eo an jetōb, armej ro me raar jab maron̄ bōk gospel eo ioon laļ in, ak ro raar kāālet n̄an jab ļoor kien ko, naaj en̄jake jet jon̄an ko (lale Katak im Bujen Ko 138:6–37; Alma 40:6–14). Ijoke, kōnke Anij ejim̧we im tūriam̧o kake, enaaj wōr juon aer iien em̧m̧an n̄an katakin gospel eo an Jisōs Kraist. Eļan̄n̄e rej bōke im ukweļo̧k, naaj lo̧mo̧o̧ren er jān jerawiwi ko aer (lale Katak im Bujen Ko 138:58; lale barāinwōt 138:31–35; 128:22). Naaj karuwaineneik er n̄an aenōm̧m̧an eo an paredais. Āliktata renaaj bōk juon jikin ilo juon aiboojoj in laļ ko pedped ioon kāālet ko raar kōm̧m̧ani ilo mour in im ilo laļ eo an jetōb.

Jej pād wōt ilo laļ eo an jetōb m̧ae iien jej jerkakpeje.

Ekkatak Jeje ko Rekwojarjar

• Alma 34:34; 40

• Katak im Bujen Ko 138

• 1 Piter 3:18–20; 4:6

• Ekklisiastis 12:7

Katak Eļapļo̧k kōn Pedped in Katak in

• Unin Tōl eo n̄an Jeje ko Rekwōarjar, “Paredais

Jerkakpeje, Lo̧mo̧o̧r, im Mour Ijo Eutiejtata

Jerkakpeje

Karōk eo an Anij ekōm̧m̧an an pidodo n̄an kōj n̄an eddōkļo̧k im bōk mour indeeo. Ālkin iien eo ad ilo laļ eo an jetōb, Jerkakpeje ej bun̄tōn eo tok juon ad ilo eddōkļo̧k jab in.

Jerkakpeje eo ej bar koba eo an ānbwiniid im jetōb eo. Kajjojo iaad enaaj jerkakpeje. Menin ekar kapidodoik kōn Pinmuur im Jerkakpeje eo an Rilo̧mo̧o̧r. (Lale Alma 11:42–44.)

N̄e jej jerkakpeje, kōj kajjojo naaj bōk juon ānbwin in kanniōk eweppān, joor jān metak im nan̄inmej. Jenaaj jab wabanban, mour indeeo.

Lo̧mo̧o̧r

Kōnke jenaaj aolep jerkakpeje, jenaaj aolep mour—ak bōk lo̧mo̧o̧r—jān mej in kanniōk. Menin letok in ej letok n̄an kōj kōn jouj eo an Jisōs Kraist.

Jemaron̄ barāinwōt mour—ak bōk lo̧mo̧o̧r—jān kaje ko me kien jim̧we ej aikuji kōn jerawiwi ko ad. Menin letok in ej barāinwōt kōm̧m̧an bwe en pidodo kōn tōllo̧ke ko, im tūriam̧okake an Jisōs Kraist ilo ad ukweļo̧k. (Lale Alma 42:13–15, 21–25.)

Mour āinwōt Anij

Mour āinwōt Anij, ak mour indeeo, ej jekjek eo eutiej tata an m̧ōņōņō im aiboojoj ilo aelōn̄ in kiin̄ an selestial. Mour āinwōt Anij ej juon menin letok an ekkar. Būreejtōn Russell M. Nelson ekar katakin, “Jekjek ko rekkar ekoba tōmak ilo Irooj, ukweļo̧k, peptaij, bōk menin letok eo an Jetōb Kwojarjar, im tiljek wōt n̄an kain̄i ko im bujen ko an tampeļ” (“Salvation and Exaltation,” Liahona, May 2008, 9).

Mour āinwōt Anij ej meļeļe in mour ippān Anij n̄an indeeo ilo baam̧le ko indeeo. Ej n̄an jeļā Anij im Jisōs Kraist, n̄an erom āinwōt Er, im n̄an en̄jake mour eo Rej m̧ōņōņō kake.

Ekkatak Jeje ko Rekwojarjar

• 2 Nipai 9:6–7, 13

• Alma 11:42–44; 22:14; 42:13–15, 21–25

• 1 Korint 15:20–22

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Jerkakpeje”

• Gospel Topics: “Resurrection,” “Salvation”

Ekajet im Aiboojoj an Aelōn̄ in Kiin̄ ko

Kakeememej: N̄e ej kab kein kajuon katakin kōn aiboojoj laļ ko, katakin ilo jon̄an eo epidodo ekkar n̄an aikuj ko im meļeļe eo an armej eo.

N̄e jej jerkakpeje, Jisōs Kraist enaaj ekajet eo ad ejim̧we im tūriam̧okake. Kōn lukkuun jejjo wōt men ko kōtļo̧k, kajjojo iaad enaaj bōk juon jikin ilo juon aiboojoj in laļ. Men̄e jenaaj aolep jerkakpeje, jejjamin naaj aolep bōk juon wōt aiboojoj indeeo (lale Katak im Bujen Ko 88:22–24, 29–34; 130:20–21; 132:5).

Armej ro kajjojo me raar jab bōk iien eo em̧m̧an n̄an lukkuun meļeļe im pokake kien ko an Anij ilo mour eo aer ioon laļ in naaj leļo̧k iien eo em̧m̧an ilo laļ eo an jetōb. Jisōs enaaj ekajet kajjojo armej ekkar n̄an tōmak, jerbal ko, ikdeelel ko aer im ukweļo̧k ilo mour in im ilo laļ eo an jetōb (lale Katak im Bujen Ko 138:32–34, 57–59).

Jeje ko rekwojarjar rej katakin kōn aibojooj in laļ ko an selestial, terrestrial, im telestial. Kajjojo iaer ej juon kakkōļe in iakwe, jim̧we, im tūriam̧okake eo an Anij.

Ro me rej kōjerbal tōmak ilo Kraist, ukweļo̧k jān jerawiwi ko aer, bōk kain̄i ko an gospel eo, kōjparok bujen ko aer, bōk menin letok eo an Jetōb Kwojarjar, im niknik n̄an jem̧ļo̧kin naaj mour ilo aibojooj in laļ eo an selestial. Aiboojoj in enaaj barāinwōt kitbuuj armej ro me raar jab wōr aer iien em̧m̧an n̄an bōk gospel ilo tōre eo aer ilo mour in bōtaab “renaaj kar bōk e kōn aolepān burueer” im kar kōm̧m̧ane ilo laļ eo an jetōb (Katak im Bujen Ko 137:8; lale barāinwōt eoon 7). Ajri ro me raar mej m̧okta jān iiō in bōk eddo eo (ruwalitōk iiō dettan) naaj barāinwōt mour ilo aibojooj laļ eo an selestial (lale Katak im Bujen Ko 137:10).

Ilo jeje ko rekwojarjar, aelōn̄ in kiin̄ celestial ej keidi n̄an aiboojoj ak meram in aļ. (lale Katak im Bujen Ko 76:50–70).

Armej ro me raar mour mour ko rem̧m̧an “Ro rekar jab bōk naan in kam̧ool kōn Jisōs ilo kanniōk, ak tokālik rekar bōk e” naaj bōk juon jikin ilo aiboojoj eo an terrestrial (Katak im Bujen Ko 76:74). Ejja menin wōt em̧ool n̄an ro me raar jab peran ilo naan in kam̧ool eo aer kōn Jisōs. Aiboojoj in ej keidi n̄an aiboojoj in allōn̄. (Lale Katak im Bujen Ko 76:71–80.)

Ro me raar wōnm̧aanļo̧k wōt ilo jerawiwi ko aer im jab ukweļo̧k ilo mour in ak bōk gospel eo an Jisōs Kraist ilo laļ eo an jetōb naaj bōk jinekjek eo aer ilo aiboojoj eo an telestial. Aiboojoj in ej keidi n̄an aiboojoj eo an iju kaņ. (Lale Katak im Bujen Ko 76:81–86).

Kōļmenļo̧kjeņ an Katak eo: Ekajet

Aolep armej renaaj jutak im̧aan Jisōs Kraist n̄an “ekajet ekkar n̄an jerbal ko” (3 Nipa 27:15; lale eoon 13–15). Irooj enaaj watōk jekjek ko ejej uwaer an kajjojo armej, ekoba jeļā eo an kōn em̧m̧an im nana, meļeļe eo kōn gospel eo, jon̄an bōk eddo eo, im ikdeelel ko (lale Luk 12:47–48; Katak im Bujen Ko 137:9).

Kōnke jejjab lukkuun meļeļe jekjek ko an ro jet, jej aikuj bōjrak jān kōm̧m̧ani ekajet ko kōn aiboojoj in laļ eo renaaj bōke. Ijello̧kin, jej aikuj kepooj kōj make n̄an ioon Irooj im kūr ro jet n̄an kōppopo. (Lale Alma 5:15–19, 33; Moronai 10:32; Dallin H. Oaks, “‘Judge Not’ and Judging,” Ensign, Aug. 1999, 6–13.)

Ekkatak Jeje ko Rekwojarjar

• 2 Nipai 9:15

• Mosaia 3:24

• 3 Nipai 27:14–16

• Katak im Bujen Ko 76:50–113; 88:20–32; 137:7–10

• Jon 14:2

• Rom 14:10

• 1 Korint 15:40–41

• 2 Korint 12:2

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Ekajet, Riekajet,” “Tiikri in Aiboojoj ko”

Unin tōl an Katakin eo Ekadu

Ļoor kōllaajrak eo ej juon jon̄ak kōn ta eo kwomaron̄ katakin juon eļan̄n̄e ewōr wōt jidik am̧ iien. Kōjerbal kōllaajrak in, kāālet juon ak elōn̄ļo̧k pedped in katak ko n̄an katakin. Pedped eo an katak eo n̄an kajjojo pedped in katak kar kwaļo̧k im̧aanļo̧k ilo katak eo.

Ilo am̧ katakin, kajjitōk kajjitōk ko im ron̄jake. Leļo̧k kūr ko me renaaj jipan̄ armej ro ekkatak ekōjkan eddōkļo̧k epake Anij. Juon iaan kūr ko raorōk ej n̄an armej eo n̄an bar ioon kom̧. Aitokan katak eo enaaj pedped ioon kajjitōk ko kwoj kajjitōk im ron̄jake eo kwoj kōm̧m̧ane.

Ta eo Kwomaron̄ Katakin Armej ro ilo 3–10 Minit ko

• Jej aolep ajri in jetōb ro nejin Anij. Jej uwaan baam̧le eo An. E ejeļā im iakwe kōj kajjojo.

• Anij ekar letok juon karōk n̄an m̧ōņōņō im eddōkļo̧k eo ad ilo mour in im mour indeeo.

• Ilo karōk eo an Anij, jaar aikuj itok n̄an laļ in n̄an bōk ānbwinin kanniōk ko, katak, im eddōļo̧k.

• Jisōs Kraist ej dilepān karōk eo an Anij. E ej kōm̧m̧an bwe en pidodo n̄an ad bōk mour indeeo.

• Ium̧win tōl eo an Anij, Jisōs ekar kōm̧anm̧an laļ in.

• En̄jake ko ad ioon laļ in kar jibadbad n̄an jipan̄ kōj kōppopo n̄an bar ro̧o̧l n̄an im̧aan mejān Anij.

• Kajjojo iaad ej jerawiwi, im kajjojo iaad renaaj mej. Kōnke Anij ej iakwe kōj, E ekar jilkintok Nejin, Jisōs Kraist, n̄an laļ in n̄an lo̧mo̧o̧ren kōj jān jerawiwi im mej.

• Aolepān men kein rejjab jim̧we ilo mour in emaron̄ kajim̧we kōn Pinmuur eo an Jisōs Kraist.

• N̄e ānbwin in kanniōk eo ad ej mej, jetōb eo ad ej wōnm̧aanļo̧k wōt n̄an mour. Āliktata jenaaj aolep jerkakpeje. Menin ej meļeļe in bwe kajjojo jetōb im ānbwin an armej renaaj bar koba ippān doon, im kajjojo iaad enaaj mour indeeo ilo juon ānbwin eweppān, jerkakjepe.

• N̄e jej jerkakpeje, Jisōs Kraist enaaj riekajet eo ad. Kōn aolep ijello̧kin jejjo men ko kōtļo̧k, aolep ajri ro nejin Anij renaaj bōk juon jikin ilo juon aiboojoj an juon aelōn̄ in kiin̄. Jemaron̄ bar ro̧o̧l im mour ilo im̧aan mejān Anij eļan̄n̄e jej tiljek.