“Jebta 6: Kappukōt M̧wiļ ko M̧wiļin Kraist,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 6,” Kwaļo̧k Gospel eo Aō

Jebta 6

Kappukōt M̧wiļ ko M̧wiļin Kraist

Ļōmņak kōn Menin

Ekōjkan n̄an kappukōt m̧wil ko m̧wilin Kraist naaj jipan̄ eō kakūrm̧ool jibadbad eo aō āinwōt juon mijenede?
Ekōjkan aō maron̄ jim̧or kappukōt im bōk m̧wil ko m̧wilin Kraist?
Ewi wōt m̧wil eo ak m̧wil ko ij aikuj pedped ioon kiiō?

Kadkad In

Ilo jinoin jerbal in karejar eo An ilo mour in, Jisōs ekar etetal ļo̧k ioon parijet in Lom̧aļo in Galilee im kar ikkūrļo̧k n̄an ruo rieo̧n̄ad ro, Piter im Andrew. “Ļoor eō,” E ekar ba, “im Inaaj likūt kom̧ro ri eo̧n̄ad armej ” (Matu 4:19; lale barāinwōt Mark 1:17).

Irooj ekar barāinwōt kūr eok n̄an jerbal eo An, im E ej barāinwōt kajjitōk ippam̧ n̄an ļoor E. “Armej rot kom̧ij aikuj in āinwōt?” Eaar kajjitōk. “Em̧ool ij ba n̄an kom̧, em̧ool āinwōt N̄aij” (3 Nipai 27:27).

Jet jebta ko ilo Kwaļo̧k Gospel eo Aō rej pedped ioon ta eo kwoj aikuj in kōm̧m̧ane āinwōt juon mijenede, ko āinwōt ekōjkan ekkatak, ekōjkan katakin, im ekōjkan kōm̧m̧ani kōttōpar ko. Ejja wōt an kanooj aorōk ta eo kwoj kōm̧m̧ane ej wōn kwe im wōn eo kwoj erom. En̄in ej pedped eo an jebta in.

Jeje ko rekwojarjar rej kōmeļeļeik m̧wil ko m̧wilin Kraist me rej menin aikuj n̄an kwe n̄an kappukōti āinwōt juon mijenede im ilo aolepān mour eo am̧. Juon m̧wil āinwōt m̧wilin Kraist ej juon paoktok ak bōnja an piktok im m̧wil an Rilo̧mo̧o̧r eo. Jebta in ej kōmeļeļeik jet iaan m̧wil kein. Ekkatak men kein im eoon in jipan̄ ko rej koba ippāer. Pukōt m̧wil ko jet m̧wilin Kraist ilo am̧ ekkatak eoon in jipan̄ ko jet.

Ekkatak an Juon Make

Ekkatak Katak im Bujen Ko 4. Ta m̧wil ko me Irooj ej kwaļo̧k ke raorōk n̄an mijenede ro? Ekōjkan n̄an kappukōt m̧wil kein jipan̄ eok kakūrm̧ool jibadbad in mijenede eo am̧?

“Kappukōt Jisōs In”

Rikanaan Moronai ekar kōketak kōj: “Ikōņaan kōketak kom̧ n̄an kappukōt Jisōs in eo rikanaan ro im rijjilōk ro rekar jeje kake” (Ether 12:41). Juon wāween aorōk n̄an kappukōt Jisōs ej n̄an kōm̧m̧ane juon kijejeto ejejjet n̄an ekkatak kōn E im eromļo̧k āinwōt E. Mijen eo am̧ ej juon iien epoļōmen n̄an kalimjōk menin.

Ilo am̧ kajjieon̄ eromļo̧k āinwōt Kraist, enaaj em̧m̧anļo̧k am̧ kōttōprak jibadbad eo am̧ āinwōt juon mijenede. Kwonaaj en̄jake lan̄lōn̄, aenōm̧m̧an, im eddōkļo̧k ilo jetōb ilo an m̧wil ko An erom m̧ōttan m̧wil eo m̧wilūm̧. Kwonaaj barāinwōt ejake juon pedped n̄an wōnm̧aanļo̧k wōt n̄an ļoor E ilo aolepān am̧ mour.

Menin Letok ko jān Anij

M̧wil ko m̧wilin Kraist rej menin letok ko jān Anij. Āinwōt aolep men ko rem̧m̧an, menin letok ko rej itok kōn “jouj eo an Anij Jemān, im barāinwōt Irooj Jisōs Kraist, im Jetōb Kwojarjar” (Ether 12:41).

Kalimjōk Kraist ilo am̧ kappukōt n̄an kōjerbal m̧wil ko An (lale Katak im Bujen Ko 6:36). M̧wil kein rejjab aitam ko ilo juon laajrak kwoj kakōļļeiki. Rejjab kōl ko kwoj ejaki ilo juon būrookraam̧ in kōkōm̧anm̧an-juon make. Rejjab būki kōn wōt kije an juon make. Ijello̧kin, kwoj maron̄ būki ilo am̧ kajjieon̄ in erom juon rikaļoor ekūtarre an Jisōs Kraist.

Jar n̄an Anij n̄an kōjeraam̧m̧an eok kōn m̧wil kein. Ettā ilo kile m̧ōjņo eo am̧ im aikuj eo am̧ kōn kajoor eo An ilo mour eo am̧. Ilo am̧ kōm̧m̧ane, E enaaj “kōm̧m̧an mennin m̧ōjņo̧ ko ren erom kajoor n̄an [kwe]” (Ether 12:27).

Juon Jerbal Jidik kōn Jidik

Eromļo̧k āinwōt Rilo̧mo̧o̧r eo ej juon jerbal jikdik kōn jidik, to̧o̧n wōt am̧ mour. Kōn juon ikdeelel n̄an kam̧ōņōņōik Anij, kōkōm̧anm̧anļo̧k juon jokāālet ilo juon iien.

Kijenmej ippam̧ make. Anij ejeļā bwe oktak im eddōkļo̧k ebōk iien. E ej m̧ōņōņō kōn ikdeelel ko am̧ rem̧ool im naaj kōjeraam̧man eok kōn aolep kijejeto kwoj kōm̧m̧ani.

Ilo am̧ kappukōt n̄an eromļo̧k āinwōt Kraist, ikdeelel ko am̧, ļōmņak ko, im jerbal ko renaaj oktak. Kōn Pinmuur eo an Jisōs Kraist im kajoor eo an Jetōb Kwojarjar, lukkuun armej ilo piktokin eo am̧ naaj karreoiki (lale Mosaia 3:19).

Jetōb Kwojarjar eo ej kōdepakpakļo̧k im kakilepļo̧k maron̄ ko ad. E “ej im̧we wānōk, jouj, em̧m̧an, meoeo, meanwōd, im iakwe em̧ool. … Ilo kōkaduki, ej, āinwōt ekar, ņoņņonmej n̄an di, lan̄lōn̄ n̄an bōro, meram n̄an mej ko, al n̄an lo̧jilin̄i ko, im mour n̄an aolepān ānbwin eo” (Parley P. Pratt, Key to the Science of Theology [1855], 98–99).

Ekkatak Jeje ko Rekwojarjar

Ta eo eoon kein rej katakin kōn ļoor waanjon̄ak eo an Jisōs Kraist?

Ta eo kwomaron̄ ekkatak jān eoon kein n̄an kappukōt m̧wil ko m̧wilin Kraist?

Tōmak ilo Jisōs Kraist

Bwe tōmak en tōlļo̧k n̄an lo̧mo̧o̧r, kwoj aikuj mije wōt Jisōs Kraist (lale Jerbal 4:10–12; Mosaia 3:17; Moronai 7:24–26). N̄e ewōr am̧ tōmak ilo Kraist, kwoj lōke ilo E āinwōt E Wōt Nejin Anij ekar Keotak. Kwoj lōke bwe ilo am̧ ukweļo̧k, naaj meļo̧kļo̧k jerawiwi ko am̧ kōn en̄taan in pinmuur eo An im kar kōkwojarjar jān Jetōb Kwojarjar eo (lale 3 Nipai 27:16, 20).

Tōmak ejjab aikuj wōr juon jeļā eweppān. Ijello̧kin, ej juon kam̧ool jān Jetōb kōn men ko kwoj jab loi bōtaab rej m̧ool. (Lale Alma 32:21.)

Kwoj kwaļo̧k am̧ tōmak kōn jerbal. Jerbal kein ekoba ļoor katak ko im waanjon̄ak eo an Rilo̧mo̧o̧r. Rej kitbuuj jerbal n̄an ro jet im jipan̄ er kāālet n̄an ļoor Kraist. Kwoj barāinwōt kwaļo̧k am̧ tōmak kōn niknik, ukweļo̧k, im iakwe.

Tōmak ej juon pedped in kajoor. Ilo am̧ kōjerbal tōmak ilo Jisōs Kraist, kwonaaj jeraam̧m̧an kōn kajoor eo An ejetjet n̄an jekjek eo am̧. Kwonaaj maron̄ in en̄jake mennin bwilōn̄ ko ekkar n̄an ankilaan Irooj. (Lale Jekab 4:4–7; Moronai 7:33; 10:7.)

Am̧ tōmak ilo Jisōs Kraist enaaj eddōkļo̧k ilo an em̧m̧anļo̧k am̧ jeļā kōn E im katak ko An. Enaaj ļapļo̧k ilo am̧ etale jeje ko rekwojarjar, jar ilo m̧ool, im pokake kien ko. Pere im jerawiwi rej kōmakunļo̧k tōmak.

“Tōmak ejjab wōt juon en̄jake; ej juon jokāālet. Kōn jar, ekkatak, pokake, im bujen ko, jej kalōk im kōkajoorļo̧k tōmak eo ad. Tōmak eo ad kōn Rilo̧mo̧o̧r eo im jerbal eo An ilo raan-ko āliktata rej erom māj ko rekajoor me jej ekajete aolep ko jet. Innām, ilo ad lo kōj make ilo jekjek in mour in, … ewōr ippād kajoor eo n̄an bōk iaļ eo ejim̧we” (Neil L. Andersen, “It’s True, Isn’t It? Then What Else Matters?” Liahona, Māe 2007, 74).

Ekkatak Jeje ko Rekwojarjar

Ta in Tōmak?

Alma 32:21
Ether 12:6
Hibru 11:1; lale footnote b
Bible Dictionary: “Faith”
Topical Guide: “Faith”

Ekōjkan am̧ bōk tōmak, im ta eo kwomaron̄ kōm̧m̧ane kōn tōmak?

Ta kōjeraam̧m̧an ko rej itok kōn tōmak?

Kōjatdikdik

Kōjatdikdik ejjab baj juon ļōmņak kōņaan. Ijello̧kin, ej juon lōke ej pād, dāpij tōmak eo am̧ ilo Kraist, bwe Anij enaaj kakūrm̧ool kallim̧ur ko An n̄an kwe (lale Moronai 7:42). Ej juon kōtmene “kōn men ko rem̧m̧an renaaj itok” kōn Kraist (Hibru 9:11).

Unjen kōjatdikdik eo am̧ eļaptata ej Jisōs Kraist. Rikanaan Mormon ekar kajjitōk: “Im ta eo kom̧ naaj kōjatdikdik kake?” Innān ekar uwaak, “Kom̧ naaj kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke ami tōmak ilo E ekkar n̄an kallim̧ur eo” (Moronai 7:41; lale eoon 40–43).

Ilo am̧ mije wōt kōjatdikdik eo am̧ ilo Kraist, ewōr ippam̧ kam̧ool eo bwe aolep men ko renaaj jerbal ippān doon n̄an em̧m̧an eo am̧ (lale Katak im Bujen Ko 90:24). Kam̧ool in ej jipan̄ eo kōjparok kōn tōmak n̄e kwoj jelm̧ae mālijjon̄ ko. Emaron̄ barāinwōt jipan̄ eok eddōkļo̧k jān mālijjon̄ ko im kōļapļo̧k kijin̄en̄e im kajoor ilo jetōb. Kōjatdikdik ilo Kraist ej letok juon emjak n̄an jetōb eo am̧ (lale Ether 12:4).

Kōjatdikdik ej lewaj n̄an eok lōke bwe Anij enaaj kōļapļo̧k niknik, kijejeto ko rejim̧we am̧ (lale Katak im Bujen Ko 123:17).

Juon wāween n̄an kōļapļo̧k kōjatdikdik ej kōn ukweļo̧k. Erom erreo im jeorļo̧k bōd kōn en̄taan in pinmuur eo an Jisōs Kraist ej kōļapļo̧k im ej kemour kōjatdikdik (lale Alma 22:16).

Nipai ekar kōmeļeļeik, “Bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k” (2 Nipai 31:20). Ilo am̧ mour kōn gospel eo, kwonaaj eddōkļo̧k ilo maron̄ eo am̧ n̄an “ļapļo̧k ami kōjatdikdik” (Rom 15:13).

“Ilo iien būrom̧ōj eļļap, jemaron̄ lukkuun kōdāpdep n̄an kōjatdikdik eo bwe men ko renaaj ‘jerbal ippān doon n̄an em̧m̧an eo [ad]’ ilo ad ļoor kapilōk eo an rikanaan ro an Anij. Kain kōjatdikdik in ilo Anij, An em̧m̧an, im An kajoor ej kōkāāl kōj kōn peran eo ilo iien apan̄ ko reppen im ej leļo̧k kajoor n̄an ro me rej en̄jake kamijak jān jekjek ko am mijak, pere, im ebbweer” (Dieter F. Uchtdorf, “The Infinite Power of Hope,” Liahona, Nob. 2008, 23).

Ekkatak Jeje ko Rekwojarjar

Ta in kōjatdikdik, im ta eo jej kōjatdikdik kake?

Iakwe-Em̧ool, im Iakwe

Juon iien juon em̧m̧aan ekar kajjitōk ippān Jisōs, “Kakien ta eo em̧m̧an iaan aolep kakien?” Jisōs ekar uwaak, “Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej. En̄in ej kien eo eļap im m̧oktata. “Im eo kein karuo āinwōt in, Kwōn yokwe ri turum̧ im āinwōt kwe” (Matu 22:36–39).

Iakwe-em̧ool ej “iakwe eo erreo an Kraist” (Moronai 7:47). Ej kitbuuj iakwe indeeo an Anij n̄an aolep ajri ro Nejin.

Rikanaan Mormon ekar katakin, “Kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An” (Moronai 7:48). Ilo am̧ jar n̄an bōk iakwe em̧ool n̄an kobrak būruōm̧, kwonaaj nemak iakwe eo an Anij. Iakwe eo am̧ n̄an armej ro enaaj ļapļo̧k, im kwonaaj itok n̄an en̄jake juon n̄ūrbōktak em̧ool kōn m̧ōņōņō eo aer indeeo. Kwonaaj lo er āinwōt ajri ro nejin Anij kōn juon kōjatdikdik n̄an erom āinwōt E, im kwonaaj jerbal ilo etaer.

Ilo am̧ jar kōn menin letok eo an iakwe-em̧ool, enaaj dikļo̧k am̧ aepādpād n̄an pād ilo en̄jake ko renana ko āinwōt illu ak ebanban. Enaaj dikļo̧k am̧ ekajet ak kōraate ro jet. Enaaj ļapļo̧k am̧ ikdeelel n̄an kajjieon̄ in meļeļe er im ta ko rej loi. Enaaj ļapļo̧k am̧ erom kijenmej, im kajjieon̄ n̄an jipan̄ armej ro n̄e rej kakkōk ak ebbwer. (Lale Moronai 7:45).

Iakwe-em̧ool, āinwōt tōmak, ej tōlļo̧k n̄an jerbal. Kwoj kōkajoorļo̧k e ilo am̧ jerbal n̄an ro jet im leļok eok make.

Iakwe-em̧ool ej kōm̧m̧an oktak. Jemādwōj Ilan̄ ej letok e “ioon aolep ro rej rikaļoor ro an rem̧ool an Nejin, Jisōs Kraist; … bwe n̄e enaaj waļo̧k jenaaj āinwōt e, … bwe jān maron̄ karreo em̧ool āinwōt e erreo” (Moroni 7:48).

Ekkatak Jeje ko Rekwojarjar

Ta in iakwe-em̧ool?

Moronai 7:45–48
1 Korint 13
Bible Dictionary: “Charity”

Ekōjkan an Jisōs Kraist kar kwaļo̧k iakwe-em̧ool?

Ta eo kwomaron̄ ekkatak kōn iakwe-em̧ool jān eoon kein?

Wānōk

“Kōmij tōmak ilo … wānōk,” Laajrak in Tōmak ko ej ba (1:13). Wānōk ej juon jon̄ak an ļōmņak im m̧wil pedped wōt ioon jon̄ak ko reutiej. Ej m̧ool eo n̄an Anij im ro jet. Ej juon m̧ōttan aorōk an wānōk ej kajjeion̄ n̄an karbōb im erreeo ilo jetōb im in kanniōk.

Wānōk ej ijjino ilo ļōmņak ko im ikdeelel ko am̧. “Erreo en kainōknōk ļōmņak ko am,” Irooj ekar ba (Katak im Bujen Ko 121:45). Pedped ioon jim̧we, ļōmņak ko rōkōbōkakkak. Joļo̧k ļōmņak ko retoon jān ļōmņak eo am̧ ijello̧kin pād ilo er.

Ļōmņak eo am̧ ej āinwōt juon jikin (stage) ilo juon theater. Eļan̄n̄e kwoj kōtļo̧k an ļōmņak ko renana pād ilo kōļmenļo̧kjeņ eo am̧, eļapļo̧k am̧ naaj maron̄ kōm̧m̧an jerawiwi. Eļan̄n̄e kwoj niknik kobrak ļōmņak eo am̧ kōn men ko rem̧m̧an, eļapļo̧k am̧ naaj maron̄ kaorōk ta eo ej wānōk im joļo̧k ta eo ej nana. Kwon lo̧ļe ta eo kwoj kōtļo̧k an deļo̧n̄ im pād wōt ilo jikin (stage) eo ilo ļōmņak eo am̧.

Ilo am̧ jibadbad n̄an mour wānōk, am̧ “peran [enaaj] kanooj kajoor ilo im̧aan mejān Anij; im … Jetōb Kwōjarjar enaaj m̧ōttam iien otemjeļo̧k” (Katak im Bujen Ko 121:45–46).

Ekkatak Jeje ko Rekwojarjar

Ta meļeļe in n̄an wānōk?

Katak im Bujen Ko 25:2; 46:33; 121:45–46
2 Piter 1:3–8
Unin Tōl eo n̄an Jeje ko Rekwōjarjar, “Wānōk
Topical Guide: “Virtue, Virtuous”

M̧ool

M̧ool ej jiōbtok jān kien eo eļap m̧oktata n̄an iakwe Anij (lale Matu 22:37). Kōnke kwoj iakwe Anij, kwoj m̧ool n̄an E ilo aolep iien. Āinwōt ļōm̧aro nejin Hilamōn, kwoj “etetal jim̧we im̧aan mejān” (Alma 53:21).

N̄e ewōr ippam̧ m̧ool, kwoj meļeļe bwe ewōr jim̧we im bōd im bwe ewōt lukkuun m̧ool—m̧ool eo an Anij. Kwoj kōjerbal anemkwoj in kāālet eo am̧ n̄an kāālet ekkar n̄an m̧ool eo an Anij, im kwoj m̧ōkaj in ukweļo̧k n̄e kwoj jab. N̄e kwoj kāālet n̄an ļōmņak—im ta eo kwoj kōm̧m̧ane n̄e kwoj tōmak ejjelo̧k juon ej lale—ej juon jon̄an ekajoor kōn m̧ool eo am̧.

Daniel ilo Ron̄ in Ļaiōn eo, jān Clark Kelley Price

M̧ool ej meļeļe in kwoj jab door laļ tak jon̄ak ko am̧ ak m̧wilūm̧ bwe kwon maron̄ kabwilōn̄ ak nōbar jān ro jet. Kwon kōm̧m̧ane ta eo ejim̧we jekdo̧o̧n n̄e ro jet rej kajirere kōn ikdeelel eo am̧ n̄an m̧ool n̄an Anij (lale 1 Nipai 8:24–28). Kwon mour kōn utiej ilo aolep mejatoto ko, ekoba ekōjkan am̧ jutak kōn eok make ilo online.

N̄e ewōr ippam̧ m̧ool, kwoj kōjparok bujen ko am̧ ippān Anij barāinwōt kallim̧ur ko am̧ rejim̧we n̄an ro jet.

M̧ool ej kitbuuj kwon m̧ool n̄an Anij, kwe make, ritōl ro am̧, im ro jet. Kwojjab riab, ko̧o̧t, ajej in kabwebwe, ak m̧oņ N̄e kwoj kōm̧m̧ane juon men ebōd, kwoj bōk eddo in im ukweļo̧k ijello̧kin kajjieon̄ kajim̧we ak jojomare.

Ilo am̧ mour kōn m̧ool, enaaj wōr ippam̧ aenōm̧m̧an itulowa im kautiej-eok make. Irooj im ro jet renaaj lōke eok.

Ekkatak Jeje ko Rekwojarjar

Ekōjkan an kar Jisōs kwaļo̧k m̧ool jekdo̧o̧n ilo iien ko An reppen?

Matu 4:1–11

Ekōjkan an ritariņae ro reddik ilo jarin tariņae eo an Hilamōn kar kwaļo̧k m̧ool?

Alma 53:19–21

Ekōjkan an Daniel kar kwaļo̧k m̧ool? Ekōjkan an Anij kar kōjeraam̧m̧an Daniel kōn m̧ool eo an?

Daniel 6

Etke Irooj ekar iakwe ļeo jein Josep Smith Hyrum?

Katak im Bujen Ko 124:15

Jeļāļo̧kjeņ

Irooj ekar kapilōk, “kappukot jeļā, em̧ool jān katak im barāinwōt jān tōmak” (Katak im Bujen Ko 88:118). Ilo tōre in mijen eo am̧ im aolepān mour eo am̧, kappukōt jeļā, eļap tata jeļāļo̧kjeņ ilo jetōb.

Ekkatak jeje ko rekwojarjar aolep raan, barāinwōt naan ko an rikanaan ro remour. Kōn ekkatak jeje ko rekwojarjar, kappukōt jipan̄ kōn kajjitōk ko rein juon, apan̄ ko, im iien ko rem̧m̧an. Pukōt eoon in jeje ko rekwojarjar kwomaron̄ kōjerbali ilo katakin im ilo uwaaki kajjitōk ko kōn gospel eo.

Ilo am̧ niknik ekkatak im jar, Jetōb Kwojarjar eo enaaj kōmeramļo̧k kōļmenļo̧kjeņ eo am̧. E enaaj katakin eok im lewaj n̄an eok meļeļe. E enaaj jipan̄ eok kōjerbal katak ko an jeje ko rekwojarjar im rikanaan ro ilo raan-ko āliktata ilo mour eo am̧. Āinwōt Nipai, kwomaron̄ ba:

“Bwe aō ej lan̄lōn̄ ilo jeje ko rekwojarjar, im buruō ej kōļmānļo̧kijeņ kaki. … Lo, aō ej lan̄lōn̄ ilo men ko an Irooj; im buruō ejjab jem̧ļo̧k an lin̄ōri men kein ko iaar loi im ron̄” (2 Nipai 4:15–16).

Ekkatak Jeje ko Rekwojarjar

Ekōjkan an jeļāļo̧kjeņ maron̄ jipan̄ eok kōm̧m̧ane jerbal eo an Irooj?

Ekōjkan am̧ maron̄ bōk jeļāļo̧kjeņ?

2 Nipai 32:1–5
Moronai 10:5
Katak im Bujen Ko 42:61; 76:5–10; 88:118
Bible Dictionary: “Knowledge”
Topical Guide: “Knowledge”

Kijenmej

Kijenmej ej juon maron̄ n̄an lōke Anij ilo am̧ jelm̧ae aepādpād, jum̧ae, ak en̄taan. Kōn am̧ tōmak, kwoj lōke iien eo an Anij kōn kōjeraam̧m̧an ko An kar kallim̧ur kaki bwe ren kūrm̧ool.

N̄e kwoj kijenmej, kwoj lale mour jān juon kōļmenļo̧kjeņ indeeo. Kwojjab kōtmene ilo iien eo em̧ōkaj tata kōjeraam̧m̧an ko ak tōprak ko. Ikdeelel ko am̧ rejim̧we ekkā naaj kili “lain im bar lain, … ijin jidik im ijjuweo jidik” (2 Nipai 28:30). Jet ikdeelel jim̧we remaron̄ jab kili m̧ae iien ālkin mour in.

Kijenmej ejjab juon kakkije jowan ak bajjōk. Ej “[kōm̧m̧ani] aolep men kein ilo m̧ōņōņō ko im rej pād ilo [am̧] kajoor” ilo am̧ jerbal n̄an Anij (Katak im Bujen Ko 123:17). Kwoj katōk, wutdikdik, im kōņe ine eo, im Anij ej letok ļapļo̧k eo “jidik wōt iien” (Alma 32:42; lale barāinwōt 1 Korint 3:6–8). Kwoj jerbal ilo m̧ōtta ippān Anij, lōke bwe n̄e kwoj kōm̧m̧ane ijo kuņaam̧, E enaaj kadedeļo̧k jerbal eo An ilo iien eo An im ekkar n̄an anemkwoj in kāālet eo an kajjojo.

Kijenmej ej barāinwōt meļeļe in bwe n̄e juon men ejjab maron̄ oktak, kwonaaj bōke kōn peran, jouj, im tōmak.

Kōļapļo̧k kijenmej ippān ro jet, ekoba eo m̧ōttam̧ im ro kwoj jerbal n̄an er. Kwon kijenmej ippam̧ make barāinwōt. Kajjieon̄ ijo em̧m̧an tata ilo kwe make n̄an kile bwe kwonaaj eddōkļo̧k jidik kōn jidik.

Kōn m̧wil ko m̧wilin Kraist jet, eddōkļo̧k ilo kijenmej ej juon jerbal to̧o̧n wōt ad mour. Kōjerbal kijenmej emaron̄ wōr juon kareel in kemour ilo am̧ im ilo ippān ro jet ipeļakūm̧.

“Kijenmej ej meļeļe in niknik kōttar im niknik. Ej meļeļein pād wōt ilo men eo im aolep men eo jemaron̄ kōm̧m̧ane—jerbal, kōjatdikdik, n̄an kōjerbal tōmak; ineek edodo kōn peran, men̄e ikidelel ko an būruwōd rerūm̧wij. Kijenmej ej jab baj niknik; ej lukkuun niknik!” (Dieter F. Uchtdorf, “Continue in Patience,” Liahona, Māe 2010, 57).

Ekkatak an Juon Make

Ekkatak Mosaia 28:1–9.

Kar ta ikdeelel ko an ļōm̧aro nejin Mosaia?
Kar ta kapilōk eo an Irooj n̄an mijenede ro? (Lale Alma 17:10–11; 26:27.)
Kar ta jet tōprak ko jān kijenmej im niknik eo aer? (Lale Alma 26.)

Je uwaak ko am̧ ilo jōnōļ in ekkatak eo am̧.

Ekkatak Jeje ko Rekwojarjar

Etke kijenmej eaorōk? Ekōjkan an kijenmej im tōmak ekkejel ippān doon?

Mosaia 24:9–16
Alma 31:31; 32:41–43; 34:40–41
Rom 5:3–5; 8:24–25
2 Korint 6:1–10
Jemes 5:10–11
Topical Guide: “Patience, Patient, Patiently”

Ettā Bōro

Ettā bōro ej m̧ōņōņō n̄an ajeļo̧k n̄an ankilan Irooj. Ej m̧ōņōņō n̄an leļo̧k n̄an E utiej kōn ta eo kōtōprake. Ej pidodo katakin (lale Katak im Bujen Ko 136:32). Ettā bōro ekitbuuj kam̧m̧oolol kōn kōjeraam̧m̧an ko an Anij im kile eo kōn aikuj eo am̧ ejjab jem̧ļo̧k kōn An jipan̄. E ej jipan̄ ro rej ettā.

Ettā bōro ej juon kakōļļe in kajoor ilo jetōb, ejjab m̧ōjņo̧. Ettā bōro ej juon jekjek aorōk n̄an eddōkļo̧k ilo jetōb (lale Ether 12:27).

N̄e kwoj lōke Irooj ilo ettā, emaron̄ wōr ippam̧ kam̧ool eo bwe kien ko An rej n̄an em̧m̧an eo am̧. Kwoj lōke bwe kwomaron̄ kōm̧m̧an jabdewōt men E ej aikuji jān kwe eļan̄n̄e kwoj pedped ilo E. Kwoj barāinwōt m̧ōņōņō n̄an lōke ro Rikarejeran im ļoor kapilōk eo aer. Ettā bōro enaaj jipan̄ eok pokake, buuļ jerbal, im jerbal.

Naan eo juon an ettā ej utiej bōro. N̄an utiej bōro ej meļeļe in likūt eļap lōke ilo juon make ijello̧kin in Anij. Ej barāinwōt meļeļe likūt men ko an laļ in ilōn̄ in men ko an Anij. Utiej bōro ej lāj; ro me eutiej būruier rej kappukōt n̄an bōk eļapļo̧k im kōtmene rej em̧m̧anļo̧k jān ro jet Utiej bōro ej juon kabbōjrak eļap.

Ekkatak Jeje ko Rekwojarjar

Ta meļeļe in n̄an erom ettā?

Ta kōjeraam̧m̧an ko kwoj būki n̄e kwoj kōttāik eok make?

Ekōjkan am̧ maron̄ kile utiej bōro ilo kwe make?

Niknik

Niknik ej kijejeto ejjab bōjrak, em̧ool. Ilo jerbal in mijenede, niknik ej juon kakōļļe in am̧ iakwe n̄an Irooj. N̄e kwoj niknik, kwoj lo lan̄lōn̄ im bun̄ bōro ilo jerbal eo an Irooj (lale Alma 26:16).

Niknik ej kitbuuj kōm̧m̧ani men ko rem̧m̧an kōn ankilam̧ make ijello̧kin kōttar an ritōl ro jiron̄ eo ta eo kwon kōm̧m̧ane (lale Katak im Bujen Ko 58:27–29).

Wōnm̧aanļo̧k wōt n̄an kōm̧m̧an em̧m̧an jekdo̧o̧n n̄e epen bōtaab kwoj kajjieon̄. Kōn menin kile aikuj eo n̄an kōjepaane im kakkūje bwe kwon jab “ettōr m̧ōkajļo̧k jān kajoor eo [am̧]” (Mosaia 4:27).

Pedpede būruōm̧ im itok limo ko am̧ ilo Irooj im jerbal eo An. Joļo̧k men ko me rej kōm̧ad eok jān menin kōttōpar ko am̧. Pedpede iien eo am̧ im kijejeto ko ilo m̧akūtkūt ko me renaaj kanooj wejepedik ilo eria eo am̧ im ļap tata aer jipan̄ n̄an armej ro kwoj katakin er.

“En̄in ej Kabun̄ eo an Irooj. E ekar kūr im lōke kōj jekdo̧o̧n ilo m̧ōjņo̧ ko E ekar jeļā ewōr ad. E ekar jeļā mālijjon̄ ko jenaaj kar jelm̧ai. Kōn jebral in jipan̄ tiljek im kōn Pinmuur eo An, jemaron̄ itok n̄an kōņaan ta eo E ej kōņaan im erom ta eo jej aikuj erom n̄an kōjeraam̧m̧an ro jej jerbal n̄an er n̄an E. Ilo an bwe an aitok ad jerbal n̄an E im kōn niknik, jenaaj oktak. Emaron̄ ļapļo̧k wōt ad eromļo̧k āinwōt E” (Henry B. Eyring, “Act in All Diligence,” Liahona, Māe 2010, 62–63).

Ekkatak Jeje ko Rekwojarjar

Ta meļeļe in niknik?

Moronai 9:6
Katak im Bujen Ko 10:4; 107:99–100
Topical Guide: “Diligence, Diligent, Diligently”

Etke Irooj ej kōtmene bwe kwon niknik?

Ekōjkan an niknik ekkejel n̄an anemkwoj in kāālet?

Katak im Bujen Ko 58:26–29

Pokake

Jerbal in jipan̄ eo am̧ āinwōt juon mijenede ej juon ļapļo̧k in bujen ko kwar kōm̧m̧ani ippān Anij ilo peptaij im ilo tampeļ. Ke kwar būki kain̄i ko an peptaij im menin letok kwojarjar eo, kwar kallim̧ur bwe kwonaaj kōjparok kien ko An.

Kiin̄ Benjamin ekar katakin: “Ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb; im eļan̄n̄e renaaj dāpdep wōt ilo niknik n̄an jem̧ļo̧kin naaj bōk er ilo lan̄, bwe ren maron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin” (Mosaia 2:41).

Pokake kien ko ej juon kakōļļe in iakwe n̄an Jemādwōj Ilan̄ im Jisōs Kraist (lale Jon 14:15). Jisōs ekar ba, “Eļan̄n̄e kom̧ij kōjparok kien ko Aō, kom̧ naaj pād ilo Aō yokwe; im āinwōt Iar kōjparok kien ko an Jema, im Ij pād ilo An yokwe” (Jon 15:10).

Unin tōl kein ilo Jon̄ak ko an Mijenede n̄an Erom̧ Rikaļoor ro an Jisōs Kraist. Barāinwōt ļoor kapilōk eo an mijen būreejtōn eo am̧ im lio pāleen ilo aer kapilōk eok ilo jim̧we.

“Pokake ej ad kāālet. Rilo̧mo̧o̧r ekar kalikkar menin. Āinwōt kar kwaļo̧k ilo Josep Smith Ukok eo an Luk 14:28, Jisōs ekar kalikkare, ‘Kōn menin, jōk menin ilo būruōmi, bwe kom̧ naaj kōm̧m̧ane men ko me Inaaj katakin, im kakiene kom̧.’ Epidodo ke. … Ilo ad kōm̧m̧ane menin, tōt eo ad ilo jetōb enaaj kanooj in ļapļo̧k. Jejjamin naaj kajejtokjān kein jipan̄ ko elletok in Anij im kakōļļik iaļ ko rejjab kob bā n̄an kakkure ilo mour ko ad ” (Dale G. Renlund, “Constructing Spiritual Stability” [Brigham Young University devotional, Sept. 16, 2014], 2, speeches.byu.edu).

Ekkatak Jeje ko Rekwojarjar

Ta eo kwomaron̄ ekatak kake kōn pokake jān eoon kein?

Juon Jon̄ak n̄an Eromļo̧k Āinwōt Kraist

Ļoor jon̄an eo emaron̄ jipan̄ eok kōļapļo̧k im bōk m̧wil ko kar kōmeļeļeik ilo jebta in im m̧wil ko jet kar kōmeļeļeik ilo eoon ko:

Kile m̧wil eo kwomaron̄ kōņaan kappukōte.
Je juon kōmeļeļe kōn m̧wil eo.
Kōllaajrake im ekkatak eoon ko an jeje ko rekwojarjar me ej kwaļo̧k kōn m̧wil eo ak eo ej katakin kake.
Ļo̧o̧ke en̄jake ko im im̧we ko am̧.
Kōm̧m̧ani kōttōparr ko im kōm̧m̧ani karōk ko n̄an eddōkļo̧k ilo m̧wil eo.
Jar n̄an Anij n̄an jipan̄ eok kōļapļo̧k im bōk m̧wil eo.
Etale eddōkļo̧k eo am̧ jān iien n̄an iien.

“Irooj ej kōjeraam̧m̧an ro me rej kōņaan em̧m̧anļo̧k, eo ej bōk im aikuji kien ko im kajjieon̄ n̄an kōjparoki, eo ej kautiej wānōk ko āinwōt an Kraist im kajjieon̄ n̄an kōm̧m̧an ijo em̧m̧an tata remaron̄ n̄an būki. Eļan̄n̄e kwoj likjab ilo kijejeto in, āinwōt kōj aolep, kūr n̄an Rilo̧mo̧o̧r eo n̄an jipan̄ eok kajjieon̄ wōt wōnm̧aanļo̧k. … Ejjab to kwonaaj wejepedik eo kwoj kappukōt” (Jeffrey R. Holland, “Tomorrow the Lord Will Do Wonders among You,” Liahona, May 2016, 126).

Ekkatak an Juon Make

Kile juon m̧wil jān jebta in ak jān jeje ko rekwojarjar. Ļoor jon̄ak eo ej kab m̧ōj kōmeļeļeik n̄an meļeļe im kappukōt m̧wil eo.

Lale tāāk in āt in mijenede eo am̧. Ekōjkan an oktak jān ko kōņaki jān rijerbal ro an juon kom̧bani? Kile bwe ruo m̧ōttan ko raorōk tata rej etam̧ im etan Rilo̧mo̧o̧r eo.

Ekōjkan am̧ maron̄ juon ripinej jenkwan Rilo̧mo̧o̧r eo em̧m̧anļo̧k āinwōt juon iaan rikaļoor ro An?
Etke eaorōk n̄an armej ro n̄an kobaik etam̧ ippān etan Rilo̧mo̧o̧r ilo juon wāween em̧m̧an?

Je ļōmņak ko am̧ ilo jōnōļ in ekkatak eo am̧.

Ekkatak Jeje ko Rekwojarjar

Bar etale m̧wil ko kar kōllaajraki ilo eoon kein. Ļo̧o̧ke jabdewōt im̧we ilo jōnōļ in ekkatak eo am̧.

Ļōmņak ko n̄an Ekkatak im Kōjerbali

Ekkatak an Juon Make

Jān iien n̄an iien kadedeļo̧k “M̧akūtkūt in M̧wil” eo ilo jemļo̧kin jebta in.
Kile juon m̧wil eo ilo jebta in. Kajjitōk ippam̧ make:
- Ekōjkan aō maron̄ ekkatak eļapļo̧k kōn m̧wil in?
- Ekōjkan an kappukōt m̧wil in naaj jipan̄ eō erom juon rikwaļo̧k em̧m̧anļo̧k an gospel eo an Jisōs Kraist?
Pukōt waanjon̄ak in m̧wil ko āinwōt m̧wilin Kraist ilo mour ko an em̧m̧aan ro im kōrā ro ilo jeje ko rekwojarjar. Ļo̧o̧ke ļōmņak ko am̧ ilo jōnōļ in ekkatak eo am̧.
Pukōt waanjon̄ak ko an m̧wil ko āinwōt m̧wilin Kraist ilo al ko rekwojarjar an Kabun̄ in. Ilo am̧ kappukōt juon m̧wil, kakilōklōk naan ko an al in jar eo ak al ko n̄an pukōt kōkajoor im kajoor. Āliji ak al naan ko n̄an kwe make n̄an im̧we im n̄an karuwaineneitok kareel eo an Jetōb.

Ekkatak ippān Kampānien eo im Iien Jānij Kampānien

Ekkatak eoon in jipan̄ ko n̄an m̧wil ko āinwōt m̧wilin Kraist ilo Gospel Library eo ak kein jipan̄ ko jet kar kōmālim. Ekōnono kōn ekōjkan am̧ kōjerbal ta eo kwoj ekkatak. Kwomaron̄ barāinwōt ekōnono Kōn ta eo kwar ekkatak ilo kijejeto ko am̧ make n̄an erom āinwōt Kraist.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl an Mijen

Jejjo raan m̧oktak jān ko̧o̧njeļ ak kweilo̧k eo eļap, kajjitōk ippān kajjojo mijenede n̄an kōpooj juon kōnono ļalem minit kōn juon m̧wil āinwōt m̧wilin Kraist. Kōtļo̧k iien ilo kweilo̧k eo n̄an jejjo mijenede ro n̄an kwaļo̧k kōnono ko aer.
Ajije mijenede ro n̄an emen kumi im leļo̧k n̄an er ennaan kein:

Kumi 1: Riiti 1 Nipai 17:7–16 im uwaake kajjitōk kein:
- Ekōjkan an Nipai kar kōjerbal tōmak eo an?
- Ta eo Nipai ekar kōm̧m̧ane me ekar āinwōt Kraist?
- Ta kallim̧ur ko Irooj ekar kōm̧m̧ani n̄an Nipai?
- Ekōjkan an bwebwenato in jebral n̄an jerbal in mijenede?
Kumi 2: Riiti Mark 5:24–34 im uwaake kajjitōk kein:
- Ekōjkan an kōrā in kar kōjerbal tōmak ilo Jisōs Kraist?
- Etke liin ekar mour?
- Ekōjkan ad maron̄ ļoor waanjon̄ak eo an liin ilo kijejeto ko ad an mijenede?
Kumi 3: Riiti Jekab 7:1–15 im uwaake kajjitōk kein:
- Etke tōmak eo an Jekab ekar bwe an kajoor n̄an jum̧ae luko̧rko̧r eo an Sherem?
- Ekōjkan an Jekab kar kōjerbal tōmak ke ekar kōnono ippān Sherem?
- Ekōjkan an jerbal ko an Jekab kar āinwōt Kraist?
Kumi 4: Riiti Josep Smith—Bwebwenato 1:8–18 im uwaake kajjitōk kein:
- Ilo wāween ta Josep Smith ekar kōjerbal tōmak eo an ilo Jisōs Kraist?
- Ekōjkan an tōmak eo an kar idajon̄jon̄?
- Ta eo ekar kōm̧m̧ane me ekar āinwōt Kraist?
- Ekōjkan ad maron̄ ļoor waanjon̄ak eo an Josep Smith?
Ālkin an kumi ko dedeļo̧k, kobaiktok mijenede ro ippān doon im kajjitōk ippāer n̄an kwaļo̧k ta eo raar ekōnono kake.

Ritōl ro an Mijen im Rikakpilōklōk ro an Mijen

Kajjitōk ippān mijenede ro n̄an riiti juon iaan Gospel ko emen ilo Kallim̧ur Ekāāl ak 3 Nipai 11–28. Kōm̧m̧an bwe ren kakōļļeik ta eo Rilo̧mo̧o̧r eo ekar kōm̧m̧ane me remaron̄ barāinwōt kōm̧m̧ane.
Kōjerbal kein kōm̧m̧an kōttōpar im karōk eo n̄an katakin mijenede ro kōn niknik. Kwaļo̧k ekōjkan an niknik ilo kalimjōk armej ro juon kakkōļļe an iakwe.
Ilo iien intōrpiu ko ak ilo bwebwenato kok, kajjitōk ippān mijenede ro n̄an kōnono kōn juon m̧wil āinwōt m̧wilin Kraist rej kappukōte.

M̧akūtkūt in M̧wil

Jibadbad eo an m̧akūtkūt in ej n̄an jipan̄ eok kile iien ko rem̧m̧an kōn eddōk ilo jetōb. Riiti kajjojo aitōm ko itulaļ. Jokāālet ewi m̧ool in ennaan eo me ej kōn kwe, im kāālet uwaak eo ejetjet. Je uwaak ko am̧ ilo jōnōļ in ekkatak eo am̧.

En ejjeļo̧k juon en uwaak “iien otemjej” n̄an aolep ennaan. Eddōkļo̧k ilo jetōb ej juon jekjek to̧o̧n wōt ad mour. Ej juon un ej kaitoktok limo im kōjeraam̧m̧an—kōnke ewōr iien ko rem̧m̧an ejjeļo̧k jon̄aer n̄an eddōkļo̧k im n̄an en̄jaki kōjeraam̧m̧an ko an eddōkļo̧k,

Aenōm̧m̧an kōn ijjino eo ijo kwoj pād ie. Wujlepļo̧k eok make n̄an kōm̧m̧ane jerbal in jetōb eo aikuji n̄an eddōkļo̧k. Kappukōt Jipan̄ eo an Anij N̄e ewōr am̧ kabbōjrak ko, wōr lōke bwe E enaaj jipan̄ eok. Ilo am̧ jar, kappukōt tōl eo kōn ewi wōt m̧wil ko n̄an pedped ioer ilo iien ko rokktak jān doon ilo iien mijen eo am̧.

Uwaak ko Raorōk

1 = lale kwar n̄an jidik
2 = jet iien
3 = emakijkij
4 = enan̄in aolep iien
5 = iien otemjej

Tōmak

Ij tōmak ilo Kraist im bōk E āinwōt aō Rilo̧mo̧o̧r. (2 Nipai 25:29)
Ij en̄jake lōke bwe Anij ej iakwe eō. (1 Nipai 11:17)
Ij lōke Rilo̧mo̧o̧r eo n̄an bōk Ankilan im kōm̧m̧ane ta eo E ej kajjitōk. (1 Nipai 3:7).
Ij tōmak bwe kōn Pinmuur eo an Jisōs Kraist im kajoor eo an Jetōb Kwojarjar, maron̄ jeorļo̧k jerawiwi ko aō im kōkwojarjar ilo aō ukweļo̧k. (Inos 1:2–8)
Ewōr aō tōmak bwe Anij ej ron̄ im uwaaki jar ko aō. (Mosaia 27:14)
Ij ļōmņak kōn Rilo̧mo̧o̧r eo ilo raan im keememej ta eo E ekar kōm̧m̧ane n̄an eō. (Katak im Bujen Ko 20:77, 79)
Ewōr aō tōmak bwe Anij enaaj bōktok men ko rem̧m̧an ilo mour eo aō im mour ko an ro jet ilo am wujlepļo̧k kōm make n̄an E im Nejin. (Ether 12:12)
Ijeļā bwe kōn kajoor eo an Jetōb Kwojarjar Bok in Mormon eo ej m̧ool. (Moronai 10:3–5)
Ewōr aō tōmak n̄an kadedeļo̧k ta eo Kraist ej kōņaan bwe in kōm̧m̧ane. (Moronai 7:33).

Kōjatdikdik

Juon iaan ikdeelel ko aō reļļap tata ej n̄an jolete mour indeeo ilo aelōn̄ in kiin̄ an selestial. (Moronai 7:41)
Ij lōke bwe mijen eo aō enaaj juon eo ekam̧ōņōņō im wejepedik. (Katak im Bujen Ko 31:3–5)
Ij en̄jake aenōm̧m̧an im lo̧udin̄din̄ kōn ilju im jekļaj. (Katak im Bujen Ko 59:23)
Ij tōmak bwe juon raan inaaj jokwe ippān Anij im erom āinwōt E. (Ether 12:4)

Iakwe-Em̧ool, im Iakwe

Ij en̄jake juon ikdeelel em̧ool kōn jeraam̧m̧an im m̧ōņōņō eo indeeo an ro jet. (Mosaia 28:3)
N̄e ij jar, ij kajjitōk kōn iakwe-em̧ool, iakwe eo erreo an Kraist. (Moronai 7:47–48)
Ij kajjieon̄ n̄an meļeļe en̄jake ko an ro jet im lo kōļmenļo̧kjeņ eo aer. (Jud 1:22)
Ij jeorļo̧k an ro jet bōd me raar kakkure ak bōd ņae eok. (Epesōs 4:32).
Ij pukōtļo̧k ilo iakwe n̄an jipan̄ ro me rej ajimakeke, apan̄, ak ebbwer. (Mosaia 18:9).
N̄e ejetjet, ij kwaļo̧k aō kakwe im kea kōn ro jet kōn jerbal in karejar n̄an er kōn naan im jerbal. (Luk 7:12–15)
Ij pukōt iien ko rem̧m̧an n̄an jerbal n̄an ro jet. (Mosaia 2:17)
Ij ba men ko rem̧m̧an kōn ro jet. (Katak im Bujen Ko 42:27)
Ij jouj im kijenmej ippān ro jet, jekdo̧o̧n n̄e epen iaio ippāer. (Moronai 7:45)
Ij lo lan̄lōn̄ ilo tōprak ko an ro jet. (Alma 17:2–4)

Wānōk

Ij karbōb im erreo ilo bōro. (Sam Ko 24:3–4)
Ij ikdeelel n̄an kōm̧m̧an em̧m̧an. (Mosaia 5:2)
Ij pedped ioon jim̧we, ļōmņak ko rōkōbōkakkak im joļo̧k ļōmņak ko renana jān ļōmņak eo aō. (Katak im Bujen Ko 121:45)
Ij ukweļo̧k jān jerawiwi ko aō im kajjieon̄ n̄an anjo̧ ioon m̧ōjņo̧ ko aō. (Katak im Bujen Ko 49:26–28; Ether 12:27)
Ij en̄jake kareel eo an Jetōb Kwojarjar ilo mour eo aō. (Katak im Bujen Ko 11:12–13)

M̧ool

Ij m̧ool n̄an Anij ilo aolep iien. (Mosaia 18:9).
Ijjab kōttāik jon̄ak ko aō ak m̧wil bwe in maron̄ kabwilōn̄ ak nōbar jān ro jet. (1 Nipai 8:24–28)
Ij m̧ool ippān Anij, ippa make, ritōl ro aō, im ro jet. (Katak im Bujen Ko 51:9)
Ij jutakļo̧k make iaaō. (Alma 53:20)

Jeļāļo̧kjeņ

Ij en̄jake lōke ilo meļeļe eo aō kōn katak an gospel eo im pedped in katak ko. (Alma 17:2–3)
Ij ekkatak jeje ko rekwojarjar raan otemjej. (2 Timote 3:16–17)
Ij kappukōt n̄an meļeļe m̧ool eo im pukōt uwaak ko n̄an kajjitōk ko aō. (Katak im Bujen Ko 6:7)
Ij kappukōt jeļāļo̧kjeņ im tōl kōn Jetōb. (1 Nipai 4:6)
Ij kaorōk katak eo im pedped in katak ko an gospel eo. (2 Nipai 4:15)

Kijenmej

Ij kōttar ilo kijenmej n̄an kōjeraam̧m̧an ko im kallim̧ur ko an Irooj n̄an kakūrm̧ool. (2 Nipai 10:17)
Ij maron̄ kōttar men ko ilo ejjeļo̧k illu ak inepata. (Rom 8:25)
Ij kijenmej ippān apan̄ ko an juon mijenede. (Alma 17:11)
Ij kijenmej ippān ro jet. (Rom 15:1)
Ij kijenmej ippa make im pedped ioon Irooj ilo aō jerbal n̄an anjo̧ ioon m̧ōjņo̧ ko aō. (Ether 12:27)
Ij jelm̧ae apan̄ kōn kijenmej im tōmak. (Alma 34:40–41)

Ettā Bōro

Ij ettā im ettā ilo bōro. (Matu 11:29)
Ij pedped ioon Anij kōn jipan̄. (Alma 26:12)
Ij kam̧m̧oolol kōn kōjeraam̧m̧an ko ikar būki jān Anij. (Alma 7:23)
Jar ko aō rej lukkuun im m̧ool. (Inōs 1:4)
Ij kam̧m̧oolol kōn tōl eo jān ritōl ro aō ak rūkaki ro. (2 Nipai 9:28–29)
Ij kajjieon̄ in ajeļo̧k n̄an ankilan Anij. (Mosaia 24:15)

Niknik

Ewejepedik aō jerbal, jekdo̧o̧n n̄e ijjab pād ium̧win lale an ro jet. (Katak im Bujen Ko 58:26–27)
Ij pedpede kijejeto ko aō ioon men ko raorōk tata. (Matu 23:23)
Ewōr juon aō make jar dik tata ruo alen juon raan. (Alma 34:17–27)
Ij pedpede ļōmņak ko aō ilo kūr eo aō āinwōt juon mijenede. (Katak im Bujen Ko 4:2, 5)
Ij kōm̧m̧ani kōttōpar ko im karōk aolep iien. (Katak im Bujen Ko 88:119).
Ij buuļ jerbal m̧ae iien jerbal eo ej dedeļo̧k. (Katak im Bujen Ko 10:4).
Ij lo lan̄lōn̄ im bun̄ bōro ilo jerbal eo aō. (Alma 36:24–25)

Pokake

N̄e ij jar, ij kajjitōk kōn kajoor n̄an jum̧ae kapo im n̄an kōm̧m̧ane ta eo ejim̧we. (3 Nipai 18:15)
Ij erreo n̄an bōk juon peba in mālim an tampeļ. (Katak im Bujen Ko 97:8)
Ij m̧ōņōņō in pokake kakien ko an mijen im ļoor kapilōk eo an ritōl ro aō. (Hibru 13:17)
Ij kajjieon̄ n̄an mour ekkar n̄an kien ko im pedped in katak ko an gospel eo. (Katak im Bujen Ko 41:5)