Valaauga o le Misiona
Mataupu 1: Faataunuu Lou Faamoemoega o se Faifeautalai

“Mataupu 1: Faataunuu Lou Faamoemoega o se Faifeautalai,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 1,” Tala’i La’u Talalelei

Dan Jones o loo tala’i atu

O Dan Jones, o se tasi o faifeautalai maoae i lenei tisipenisione, sa talaiina le talalelei i Uelese.

© 1993 Clark Kelley Price. Aua ne’i kopiina.

Mataupu 1

Faataunuu Lou Faamoemoega o se Faifeautalai

O Lou Faamoemoega: Valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.

Manatunatu i le Mea Lenei

  • O le a lo’u faamoemoega i le avea ai ma se faifeautalai?

  • O le a le pule ma le mana e o mai faatasi ma lo’u valaauga?

  • E faapefea ona ou faalagolago, iloa, ma aoao atu e ala i le Agaga?

  • O le a le Talalelei a Iesu Keriso?

  • O le a le savali o le Toefuataiga? Aisea e taua tele ai?

  • O le a lo’u tiutetauave e faavae ma fausia le Ekalesia a Iesu Keriso?

  • O le a faapefea ona ou iloa pe o a’u o se faifeautalai faamanuiaina?

O Lou Tofiga le Aoao Atu le Talalelei Toefuataiina a Iesu Keriso

O loo siomia oe e tagata. E te pasia i latou i le auala ma malaga faatasi ma i latou. E te asiasi atu ia i latou i o latou fale ma fesootai ma i latou i luga o le initoneti. O i latou uma o fanau a le Atua—o ou uso ma tuafafine. E alofa le Atua ia i latou e pei foi ona alofa o Ia ia te oe.

O le toatele o nei tagata o loo sailia le faamoemoega o le olaga. Latou te popole mo lo latou lumanai ma o latou aiga. Latou te manaomia le lagona o le fia avea ma se itutino, lea e maua mai i le malamalama o i latou o fanau a le Atua, o sui o Lona aiga faavavau. Latou te fia lagonaina le malupuipuia i totonu o se lalolagi ua fesuisuia’i ai mea e faatauaina. Latou te mananao i le “filemu i le lalolagi lenei, ma le ola e faavavau i le lalolagi a sau” (Mataupu Faavae ma Feagaiga 59:23).

E toatele o loo “taofia i latou mai le upumoni ona ua latou le iloa le mea e maua mai ai“ (Mataupu Faavae ma Feagaiga 123:12). O Le Talalelei a Iesu Keriso, e pei ona toefuataiina mai e ala i le Perofeta o Iosefa Samita, e tuuina mai upumoni e faavavau. O lenei upumoni e talanoaina ai manaoga faaleagaga o tagata ma fesoasoani ia i latou e faataunuu o latou manaoga loloto.

I le avea ai ma se sui faatagaina o Iesu Keriso, ua e aoao atu e faapea o le “togiola e oo mai ma ala mai i le Mesia Paia” (2 Nifae 2:6). E te valaaulia tagata e o mai ia Keriso ina ia liua ia te Ia ma Lana talalelei toefuataiina. A o latou taliaina lau valaaulia, o le a latou maua le fiafia sili atu, faamoemoe, filemu, ma le faamoemoega.

Ina ia o mai i le Faaola, e manaomia e tagata ona faatuatua ia te Ia. E mafai ona e fesoasoani ia i latou e atiina a’e lenei faatuatua a o e:

  • Aoao i latou i le talalelei toefuataiina a Iesu Keriso ma molimau atu i lona moni.

  • Valaaulia i latou e tautino atu e ola e tusa ai ma ona aoaoga.

  • Tulitatao ma fesoasoani ia i latou e faatino ia tautinoga latou te faia.

  • Fesoasoani ia i latou ia maua ni aafiaga latou te lagona ai le uunaiga a le Agaga Paia (tagai i le 1 Nifae 10:17–19).

O le faatuatua ia Iesu Keriso e mafai ona taitai atu ai tagata e salamo. E ala i le togiola mo a tatou agasala, ua mafai ai e Iesu ona faia le salamo. A salamo tagata, o le a faamamaina i latou mai le agasala ma ola latalata atili atu i le Tama Faalelagi ma Iesu Keriso. O le a latou lagonaina le olioli ma le filemu o le mauaina o le faamagaloga.

O le salamo e saunia ai tagata mo le feagaiga o le papatisoga ma le meaalofa o le Agaga Paia. “O mai ia te a’u,” ua fetalai mai ai le Faaola, “ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i o’u luma i le aso gataaga” (3 Nifae 27:20).

A o faatupula’ia lou malamalama ma lau molimau i le Togiola a Iesu Keriso, o le a faateleina lou manao e fetufaa’i atu le talalelei. O le a e lagonaina e pei ona lagona e Liae, le “aoga sili … o le faailoa atu o ia mea i tagata o le lalolagi” (2 Nifae 2:8).

o le faaaliga o le Laau o le Ola

O Le Laau o le Ola, saunia e Damir Krivenko.

Suesuega a le Tagata Lava Ia po o le Faalesoa

Iloilo le ata o loo i ai a o e suesue i le faaaliga o le laau o le ola i le 1 Nifae 8 ma le11.

  • O le a le mea o faatusa i ai le laau o le ola i lenei faaaliga? (Tagai i le 1 Nifae 11:21–23.)

  • O le a le mea na manao i ai Liae ina ua uma ona ia ‘ai i le fua o le laau? (Tagai i le 1 Nifae 8:10–18.)

  • I le faaaliga, o le a le mea na moomia ona faia e tagata ina ia aai ai i le fua o le laau? O le a se mea e moomia ona tatou faia ina ia maua ai faamanuiaga uma o le Togiola a le Faaola? O a ni auala e fesoasoani ai tautinoga ma feagaiga ia i tatou ina ia tatou tofo i nei faamanuiaga?

  • E mafai faapefea ona e fesoasoani i isi ia aai i fua o le talalelei?

O Le Pule ma le Mana o Lou Valaauga

Ua valaauina ma vaetofia outou e “[talai] atu tala fiafia o le olioli tele, o le talalelei tumau-faavavau lea” (Mataupu Faavae ma Feagaiga 79:1). E pei lava o atalii o Mosaea, e ao ona e aoao atu ma le pule ma le mana a le Atua (tagai i le Alema 17:2–3).

I lalo o le taitaiga a Keriso, na toefuatai mai ai le pule e talai atu ai le talalelei e ala i le perofeta o Iosefa Samita. Ina ua vaetofiaina oe o se faifeautalai, sa e mauaina lenei pule. Faatasi ai ma lena mea ua oo mai ai le aia tatau, avanoa, ma le tiutetauave e fai ma sui o le Alii ma aoao atu Lana talalelei.

O le pule ua ia te oe ua oo mai ai ma se tiutetauave ina ia ola agavaa mo lou valaauga. Ia vaetofiaina moni oe. Aloese mai le agasala ma mai soo se mea e matagā pe masoā. Aloese mai auala ma mafaufauga o le lalolagi. Mulimulitai i tulaga faatonuina i totonu o le: Tulaga Faatonuina Faafaifeautalai mo So’o o Iesu Keriso. I le avea ai ma sui o le Alii, e ao ona avea oe ma se “faaaoao i e ua faatuatua” (1 Timoteo 4:12). Faamamalu le suafa o Iesu Keriso e ala i au amioga ma upu.

E faaopoopo atu i le pule, e te manaomia le mana faaleagaga e faataunuu ai lou valaauga. E tuuina mai e le Atua le mana faaleagaga a o e galue pea lava pea e faamalosia ai lau molimau ia te Ia, Iesu Keriso, ma upumoni o le talalelei e te aoaoina atu. Na te faaee mai le mana faaleagaga a o e tatalo, suesue i tusitusiga paia, ma saili e faataunuu lou faamoemoega faafaifeautalai. Na te tuuina mai le mana faaleagaga a o e taumafai e tausi Ana poloaiga ma feagaiga na e osia ina ua e mauaina sauniga o le faaolataga (tagai i le Mataupu Faavae ma Feagaiga 35:24).

E mafai ona faaalia le mana faaleagaga a o e:

Suesuega o Tusitusiga Paia

E faapefea ona e maua ma faamalosia se molimau?

E faapefea ona e maua le mana faaleagaga?

Suesuega Faaletagata Lava Ia

Iloilo ma mafaufau loloto i feagaiga nei na e osia ma le Atua. Suesue i faamanuiaga ua folafola mai e le Atua ia i latou o e tausia nei feagaiga. Mafaufau i faamanuiaga ua e maua e ala i le tausia o na feagaiga. Ia faamaumau i lalo ou lagona i totonu o lau tusi talaaga o suesuega.

Papatisoga ma le Faamauga

Faauuga i le Perisitua (mo toeaina)

Faaeega Paia o le Malumalu

  • Ola i le tulafono o le usiusitai.

  • Usitai i le tulafono o le taulaga.

  • Usitai i le tulafono o le talalelei a Iesu Keriso.

  • Tausia le Tulafono o le ola mama.

  • Tausi le tulafono o le faapaiaga.

  • (Tagai i le Tusitaulima Aoao, 27.2.)

Suesuega a le Tagata Lava Ia po o le Faalesoa

Faitau le Ioane 15:1–16. O le a le auala ua avea ai Keriso ma vine? E faapefea ona avea oe ma se lala o lena vine? E faapefea ona faatatau le vaetofiaina o oe i lenei sootaga?

Toe faitau lou tusi faamaonia faafaifeau. Tusitusi i lalo ou lagona ma manatu e uiga i le mea na e faitauina. O taimi uma lava e te suesueina ai le mataupu lenei, ia faia pea le faiga lea. Ia matauina le suia o ou lagona mai lea taimi i lea taimi.

Suesuega Faaletagata Lava Ia

Suesue le Mataupu Faavae ma Feagaiga 109:13–15, 21–30, 38–39, 55–57. O nei fuaiupu o ni vaega mai le tatalo musuia o le faapaiaga mo le Malumalu o Katelani e Iosefa Samita.

Tusi se lisi o faamanuiaga na talosagaina e Iosefa Samita mo e faamaoni o e ua maua faaeega paia i le maota paia o le Alii. O a ni ou lagona e uiga i nei faamanuiaga?

Saili ina ia i ai le Agaga Paia ma Oe.

Sa e mauaina le meaalofa o le Agaga Paia ina ua faamauina oe o se tagata o le Ekalesia. I le avea ai ma se faifeautalai—ma i lou olaga atoa—o se tasi o ou manaoga silisili o le i ai lea o le Agaga Paia e faatasi ma oe (tagai i le 1 Nifae 10:17; 3 Nifae 19:9). O le Agaga Paia o le sui lona tolu o le Aiga Atua.

O le Agaga Paia e taialaina, aoao atu, ma faamafanafanaina oe. Na te faamamaina ma faapaiaina oe. E molimau mai o Ia i upumoni ma molimau mai i le Tama ma le Alo. Na te aumaia lou liua ma le liua o i latou e te aoaoina. (Tagai i le 3 Nifae 27:20; 28:11; Eteru 12:41; Moronae 8:26; 10:5; Ioane 15:26.)

O le Agaga Paia “o le a faaali mai e ia ia te outou mea uma e tatau ona outou faia” (2 Nifae 32:5). O le a Ia faalauteleina ou tomai ma auaunaga e sili atu nai lo mea e mafai ona e faia na o oe.

O le saili ia maua le Agaga Paia e faatasi ma oe e tatau ona avea ma se tasi o ou manaoga sili ona faamaoni. O le a e lagonaina Lana mafutaga a o e:

Peresitene Russell M. Nelson

“Ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomia e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga” (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 96).

Aoao ina ia Iloa le Agaga

O le a sili atu ona e faataunuuina lou faamoemoega faafaifeautalai a o e aoao ia iloa ma mulimuli i le taitaiga mai le Agaga Paia. E masani lava ona fesootai filemu mai le Agaga, e ala i ou lagona ma mafaufauga. Tuuto atu oe lava i le sailia, iloaina, ma le mulimuli i nei uunaiga maaleale. E tele auala latou te o mai ai (tagai i le mataupu 4; tagai foi i le Mataupu Faavae ma Feagaiga 8:2–3; 11:12–14; Kalatia 5:22–23).

Aoao Atu e ala i le Agaga

O le talalelei a Iesu Keriso “o le mana lea o le Atua e ola ai i latou uma o e faatuatua” (Roma 1:16). Mo lena mafuaaga, e manaomia ai ona aoao atu le sāvali o le Toefuataiga o le talalelei e ala i le mana paia—o le mana o le Agaga Paia.

Sa fetalai mai le Alii, “Ma o le a tuu atu ia te outou le Agaga e ala i le tatalo o le faatuatua; ma afai tou te lē maua le Agaga aua tou te aoao atu” (Mataupu Faavae ma Feagaiga 42:14; tagai foi i le 50:13–14, 17–22). A o e aoao atu e ala i le mana o le Agaga Paia, o le a Ia:

O le a faamanuiaina tele oe e le Alii a o e saili, faalagolago, ma aoao atu e ala i le Agaga Paia (tagai i le mataupu 4 ma le 10).

Ta’i Toatasi, saunia e Walter Rane

O le Talalelei a Iesu Keriso ma le Aoaoga Faavae a Keriso

Ua faauigaina e le talalelei a Iesu Keriso lau sāvali ma lou faamoemoega. Na te tuuina atu uma le “o le a” ma le “aisea” o lau auaunaga faafaifeautalai. O Lana talalelei e aofia ai aoaoga faavae uma, mataupu faavae, tulafono, poloaiga, sauniga, ma feagaiga e manaomia mo le faaolataga ma le faaeaga.

O le savali o le talalelei e faapea, e mafai ona tatou maua le mana faaola o Iesu Keriso e ala i le faatinoina o le faatuatua ia te Ia, salamo, papatisoina, mauaina o le meaalofa o le Agaga Paia, ma tumau e oo i le iuga (tagai i le 3 Nifae 27:13–22).

Ua ta’ua foi lenei mea o le aoaoga faavae a Keriso. O le ola ai i lenei aoaoga faavae o le ala lea tatou te o mai ai ia Keriso ma faaolaina ai (tagai i le 1 Nifae 15:14). E mamana le aoaoina o lenei mea i le Tusi a Mamona (tagai i le 2 Nifae 31; 32:1–6; 3 Nifae 11:31–40). O lou faamoemoega o le fesoasoani lea i tagata ia o mai ia Keriso e ala i le fesoasoani ia i latou ia ola i Ana aoaoga faavae.

Ailama Samita

“Ia talai atu ia uluai mataupu faavae o le Talalelei—ia talai atu pea lava pea: o le a outou iloaina ai mai lea aso i lea aso o le faaalia mai ia te outou ni manatu fou ma le malamalama faaopoopo e faatatau i ai. E mafai ona outou faalauteleina ina ia matuai malamalama lelei i ai. Ona mafai lea ona e faia ia malamalama atili ia i latou o loo e aoaoina” (Ailama Samita, i le History, 1838–1856, volume E-1 [1 July 1843–30 April 1844], 1994, josephsmithpapers.org).

Suesuega o Tusitusiga Paia

O le a se mea o aoao mai e mau nei ma le folafolaga e uiga i le talalelei a Iesu Keriso ma le aoaoga faavae a Keriso? Tusi ni faamatalaga i lau api talaaga o suesuega e fesoasoani e te malamalama ai ma manatua.

O Le Mana Faaliliu o le Tusi a Mamona, saunia e Ben Sowards

Faatuatua ia Iesu Keriso

O le faatuatua o le faavae lea mo isi mataupu faavae uma o le talalelei. O le faatuatua o se mataupu faavae o faatinoga ma le mana.

E manaomia ona faatotonugalemu lo tatou faatuatua ia Iesu Keriso mo lena mea e taitai atu ai i tatou i le faaolataga. Ua aoao mai le Faaola, “Aua ua faapea lava ona alofa mai o le Atua i le lalolagi, na Ia aumai ai Lona Atalii pele e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).

O le faatuatua ia Iesu Keriso e aofia ai le talitonu o Ia o le Alo e Toatasi na Fanaua o le Atua. O le faalagolago ia te Ia o lo tatou Faaola ma le Togiola (tagai i le Mosaea 3:17; 4:6–10; Alema 5:7–15). O le i ai o le talitonuga atoa ia te Ia ma Lana upu, aoaoga, ma folafolaga. E tuputupu a’e lo tatou faatuatua ia Keriso a o tatou mulimuli i Ana aoaoga ma faataitaiga ma le faamoemoega atoa o le loto (tagai i le 2 Nifae 31:6–13; 3 Nifae 27:21–22).

I le avea ai ma se faifeautalai, fesoasoani i tagata e faia ma tausia tautinoga e fausia ai lo latou faatuatua ia Iesu Keriso. . O nei tautinoga e saunia ai i latou e maua sauniga ma osia ma tausia feagaiga paia ma le Atua.

Salamo

O le faatuatua ia Iesu Keriso e taitai atu ai i tatou ia salamo (tagai i le Helamana 14:13). O le salamo o le faagasologa o le liliu atu i le Atua ma liliu ese mai le agasala. A o tatou salamo, e suia a tatou faatinoga, manaoga, ma mafaufauga ina ia ogatusa atili ma le finagalo o le Atua.

E ala i Lana taulaga togiola, na totogi ai e le Faaola le tau mo a tatou agasala (tagai i le Mosaea15:9; Alema 34:15–17). A tatou salamo, e mafai ona faamagaloina i tatou ona o Iesu Keriso ma Lana taulaga, auā ua Ia tautino mai Ana aiā tatau o le alofa mutimutivale mo e ua salamo (tagai i le Moronae 7:27–28). I upu a le perofeta o Liae, o lo tatou “togiola e oo mai … e ala i galuega, ma le alofa mutimutivale, ma le alofa tunoa o le Mesia Paia” (2 Nifae 2:6, 8).

O le salamo e sili atu nai lo le faaaogaina o le naunautaiga e suia ai se amioga pe faatoilalo ai se vaivaiga. O le salamo o le liliu atu ma le faamaoni ia Keriso, o lē e tuuina mai ia i tatou le mana e iloa ai se “liuga tele” i o tatou loto (tagai i le Alema 5:12–14). E aofia ai le gauai atu ma le faamaualalo i le Agaga ma usiusitai i le finagalo o le Atua. A o tatou salamo, tatou te faateleina la tatou tautinoga e auauna atu i le Atua ma usitai i Ana poloaiga. Ua toefanauina i tatou faaleagaga ia Keriso.

O le salamo o se aafiaga lelei lea e aumaia ai le olioli ma le filemu. Na te aumaia i tatou “i le mana o le Togiola, mo le faaolataga o [o tatou] agaga” (Helamana 5:11).

Ia lototele ma fiafia i le fesoasoani i tagata ia malamalama i mea e tatau ona latou fai ina ia salamo ai. E ala i le valaauliaina o tagata o loo e aoaoina e faia ni tautinoga, e te valaaulia i latou ia salamo ma ofo atu ia i latou le faamoemoe.

Suesuega o Tusitusiga Paia

O le a se mea e mafai ona e aoao mai i mau nei e uiga i le folafola atu o le salamo?

Papatisoga

O le faatuatua ia Iesu Keriso ma le salamo e saunia ai i tatou mo sauniga o le papatisoga. “Ma o fua muamua o le salamo o le papatisoga” (Moronae 8:25). Tatou te ulu atu i le faitotoa i le ola e faavavau pe a papatisoina i tatou e ala i le faatofuina e se tasi ua i ai le pule mai le Atua.

Pe a papatiso i tatou, tatou te osia se feagaiga ma le Atua. A o tatou tausia lenei feagaiga, ua folafola mai e le Atua e tuuina mai ia i tatou le mafutaga a le Agaga Paia, faamagalo a tatou agasala, ma tuuina mai ia i tatou le auai i le Ekalesia a Iesu Keriso (tagai i le Mataupu Faavae ma Feagaiga 20:77, 79; Moronae 6:4). Ua tatou potopoto i le Alii ma toefanauina faaleagaga e ala i lenei sauniga olioli ma le faamoemoe.

O le papatisoina ma le faamauina o tagata e te aoaoina o le autu lea o lou faamoemoega. Fesoasoani ia latou malamalama ina ia agavaa mo le papatisoga, e manaomia ona latou ausia tulaga o loo i le Mataupu Faavae ma Feagaiga 20:37.

Suesuega Faalesoa

Mafaufau i mau nei:

E faavae i lau suesuega o tusitusiga paia o loo i luga, fai ni lisi tusitusia se lua:

  1. O agavaa mo le papatisoga

  2. O feagaiga e osia i le papatisoga

Ia talanoaina ma lau soa pe faapefea ona aoao atu nei tulaga manaomia i isi.

Faamauga ma le Meaalofa o le Agaga Paia

E lua vaega e oo mai ai le papatisoga: papatisoga i le vai ma le papatisoga a le Agaga. A uma ona papatisoina i tatou i le vai, e maea le papatisoga pe a faamauina i tatou e ala i le faaee atu o lima e se tasi ua i ai le pule mai le Atua. E ala i le faamauga e mafai ai ona tatou maua le meaalofa o le Agaga Paia ma se faamagaloga o a tatou agasala.

Sa aoao mai le perofeta o Iosefa Samita, “O le papatisoga i le vai o se afa papatisoga, ma e leai se uiga e aunoa ma le isi afa—o lona uiga, o le papatisoga a le Agaga Paia” (Aoaoga a Peresitene o le Ekalesia: Iosefa Samita [2007],95).

Sa aoao atu Alema “e ao i tagata uma … ona toe fanauina; ioe, fanauina i le Atua, ma suia mai lo latou tulaga faaletino ma le pau, i se tulaga o le amiotonu, ua togiolaina e le Atua, ma avea ma ona atalii ma afafine; ma faapea ona avea ai i latou ma tagata fou” (Mosaea 27:24–26).

Mo e ua salamo, o le papatisoga i le vai ma le Agaga o le toefanauina faaleagaga.

Suesuega o Tusitusiga Paia

O a nisi o faamanuiaga e aumaia e ala i le meaalofa o le Agaga Paia?

Aisea tatou te mananqo ai i le meaalofa o le Agaga Paia?

Tumau e oo i le Iuga

O le mulimuli ia Iesu Keriso o se tautinoga lea o le olaga atoa. Tatou te tumau e oo i le iuga a o tatou faaauau pea i o tatou olaga atoa e faatino le faatuatua ia Keriso, salamo i aso taitasi, maua sauniga ma feagaiga uma o le talalelei, tausia na feagaiga, ma maua le mafutaga a le Agaga Paia. E aofia ai le faafouina o feagaiga na tatou osia e ala i le aai ma feinu i le faamanatuga.

O le Alii O Lo’u LeoLeo Mamoe, saunia e Yongsung Kim

O le Alii o Lo’u LeoLeo Mamoe, saunia e Yongsung Kim. Ata mai faaaloaloga a Havenlight.

O Le Talalelei—O Le Ala a lo Tatou Tama Faalelagi e Toe Foi Atu ai ia te Ia

E mafai e le talalelei a Iesu Keriso ona suia le ala tatou te ola ai ma tagata e avea ai i tatou. O ona mataupu faavae e le na o ni laasaga tatou te oo i ai i o tatou olaga. Pe a tatou toe faia i le olaga atoa, latou te aumaia i tatou ia latalata atili atu i le Atua ma avea ma se mamanu tauia faateleina o le olaga. Latou te aumaia le filemu, faamalologa, ma le faamagaloga. Ua latou faauigaina foi le ala ua tuuina mai e lo tatou Tama Faalelagi mo i tatou ina ia maua ai le ola e faavavau faatasi ma Ia.

O le talalelei a Iesu Keriso e taialaina le auala e te galue ai o se faifeautalai. E taulai atu ai foi au taumafaiga. Fesoasoani i tagata ia maua le faatuatua ia Iesu Keriso e oo i le salamo (tagai i le Alema 34:15–17). Aoao atu ma molimau atu ua toefuatai mai le atoaga o le talalelei a Iesu Keriso ma le pule o le perisitua. Valaaulia tagata ina ia papatisoina ma ola i aoaoga a le Faaola.

O le Talalelei a Iesu Keriso e Faamanuiaina ai Fanau Uma a le Atua.

O le talalelei a Iesu Keriso e mo fanau uma a le Atua. O loo aoao mai tusitusiga paia e “tutusa tagata uma” i le Atua. Ua Ia valaauina “i latou uma ia o mai uma ia te ia, ma taumamafa i lona agalelei; ma e le teena e ia se tasi e sau ia te ia” (2 Nifae 26:33).

E faamanuiaina i tatou e le talalelei i o tatou olaga faaletino ma i le faavavau atoa. O le a sili ona tatou fiafia—o ni tagata taitoatasi ma o ni aiga—pe a tatou ola i aoaoga a Iesu Keriso (tagai i le Mosaea 2:41; “O Le Aiga: O Se Folafolaga i le Lalolagi,” ChurchofJesusChrist.org). O le ola ai i le talalelei e faalolotoina ai lo tatou olioli, musuia ai a tatou faatinoga, ma faatamaoaigaina ai a tatou sootaga.

O se tasi o sāvali maoa’e o le talalelei toefuataiina o le, o i tatou uma o se vaega o le aiga o le Atua. O i tatou o Ona atalii ma afafine faapelepele. Po o le a lava le tulaga o lo tatou aiga i le lalolagi, o i tatou taitoatasi o se tasi o le aiga o le Atua.

O le isi vaega sili o la tatou savali o le, e mafai ona faatasia aiga mo le faavavau. O le aiga ua faauuina e le Atua. Ua aoao mai perofeta o Aso e Gata Ai:

“O le fuafuaga paia o le fiafia a le [Tama Faalelagi], ua mafai ai ona faaauau fegalegaleaiga faaleaiga i tala atu o le tuugamau. O sauniga paia ma feagaiga e maua i malumalu paia e mafai ona toe foi atu ai tagata taitoatasi i le afioaga o le Atua ma toe faatasia aiga e faavavau” (“O Le Aiga: O se Folafolaga i le Lalolagi”).

E toatele tagata e utiuti avanoa mo faaipoipoga pe mo sootaga alofa faaleaiga. E toatele ua aafia i le tatalaina o faaipoipoga ma isi tulaga faigata faaleaiga. Peitai, e faamanuiaina i tatou taitoatasi e le talalelei e tusa lava po o a o tatou tulaga faaleaiga. A tatou faamaoni, o le a saunia e le Atua se ala mo i tatou e maua ai faamanuiaga o aiga alolofa, pe i lenei olaga po o le olaga a sau (tagai i le Mosaea 2:41).

O Le Savali o le Toefuataiga: O Le Faavae o le Faatuatua

E le afaina po o fea e te auauna ai ae po o ai foi o loo e aoaoina, ia faaautu lau aoao atu ia Iesu Keriso ma Lana talalelei Toefuataiga. A o e suesue i le aoaoga faavae i lesona a faifeautalai, o le a e iloa ai e tasi le tatou savali: O Iesu o le Keriso, o lo tatou Faaola ma le Togiola. E ala mai i se perofeta o aso nei, ua toefuatai mai ai e le Tama Faalelagi le malamalama e uiga i Lana fuafuaga mo lo tatou faaolataga. O lenei fuafuaga e faatotonugalemu ia Iesu Keriso. E ala i Lana taulaga togiola, o le Faaola ua mafai ai e i tatou uma ona faaolaina mai le agasala ma le oti ma toe foi atu ai i le Tama Faalelagi.

Fesoasoani i tagata o loo e aoaoina ia malamalama i mea nei:

  • O le Atua o lo tatou Tama moni lava o loo i le Lagi. E alofa atoatoa o Ia ia i tatou. O tagata uma lava o loo i le lalolagi o se atalii po o se afafine o le Atua ma o se tasi o Lona aiga.

  • Na saunia e le Tama Faalelagi se fuafuaga mo i tatou e maua ai le tino ola pea ma le ola e faavavau, o Ana faamanuiaga silisili ia (tagai i le Mose 1:39). Ua tatou o mai i le lalolagi e aoao, tuputupu a’e, ma saunia mo le atoaga o Ana faamanuiaga.

  • I le avea ai ma se vaega o Lana fuafuaga, ua tuuina mai ai e le Tama Faalelagi poloaiga e taiala ai i tatou i lenei olaga ma fesoasoani ia i tatou e toe foi atu ia te Ia (tagai, mo se faataitaiga, i le Esoto 20:3–17).

  • I lenei olaga, tatou te agasala uma lava, ma e tatou te feoti uma lava. Ona o le alofa o le Tama Faalelagi mo i tatou, na Ia auina mai ai Lona Alo, o Iesu Keriso, e togiola i tatou mai le agasala ma le oti.

  • Ona o le taulaga togiola a Iesu, ua mafai ai ona faamamaina i tatou mai a tatou agasala pe a tatou salamo ma papatisoina ma faamauina. O lenei mea e aumaia ia i tatou le filemu ma mafai ai ona tatou toe foi atu i le afioaga o le Atua ma maua ai se atoaga o le olioli.

  • Ona sa Toetu Iesu, o le a tatou toetutu uma ai pe a mavae le oti. O lona uiga o le a toe faatasia le agaga ma le tino o tagata taitoatasi ma ola e faavavau.

  • I le talafaasolopito atoa o le tusi paia, sa faaali mai ai e le Alii Lana talalelei ma faatulagaina Lana Ekalesia e ala i perofeta. O le tele lava o taimi, o le toatele o tagata na teenaina. O se mamanu o le pa’ū ese mai le talalelei ma le manaomia ona toefuatai na amata i taimi o le Feagaiga Tuai.

  • Ina ua mavae le maliu ma le Toetu o le Faaola, sa taitaia e Ana Aposetolo le Ekalesia mo se taimi. Mulimuli ane, na maliliu i latou, na leiloa le pule o le perisitua, ma sa i ai se isi pa’ū ese mai aoaoga a le Faaola. Na suia e tagata le aoaoga faavae ma sauniga.

  • Na toefuataiina mai le Talalelei a Iesu Keriso e le Tama Faalelagi e ala i le Perofeta o Iosefa Samita Na faaali mai le Tama Faalelagi ma Iesu Keriso ia Iosefa i le tautotogo o le 1820. I se taimi mulimuli ane sa maua ai e Iosefa Samita le pule o le perisitua ma sa taitaia ina ia toe faatulagaina le Ekalesia a Iesu Keriso i le lalolagi.

Aoao atu o le Ekalesia a Iesu Keriso e le na o se isi lotu. E le o se lotu Amerika foi. Ae, o se toefuataiga o le “atoatoaga [o le] talalelei” a Iesu Keriso (Mataupu Faavae ma Feagaiga 1:23). O le a lē toe aveesea lava mai le lalolagi.

O Le Tusi a Mamona: O Se Tasi Molimau ia Iesu Keriso o loo molimau mai ia Iesu Keriso ma Lana misiona paia o le Faaola o le lalolagi. O se molimau mamana foi na toefuatai mai e Iesu Keriso Lana talalelei ma le Ekalesia e ala mai i le Perofeta o Iosefa Samita. Valaaulia ma fesoasoani i tagata e faitau le Tusi a Mamona ma tatalo e uiga i lana svali.

Ia talitonuina le folafolaga maoa’e o loo i le Moronae 10:3–5. Fautuaina tagata e ole atu ma le faamaoni i le Atua ma le manatu moni i ai pe o le Tusi a Mamona o le afioga a le Atua. O le tatalo ma le manatu moni i ai o lona uiga o le naunau e faatino le tali lea e sau mai le molimau a le Agaga Paia. O lena molimau e avea ma faavae o le faatuatua o se tagata ua toefuatai mai e Keriso Lana Ekalesia. Fesoasoani ia i latou o loo e aoaoina ina ia mauaina lena faamautinoaga faaleagaga.

Suesuega o Tusitusiga Paia

E tatau faapefea ona e faaaogaina le Tusi a Mamona i lau galuega faafaifeautalai?

Suesuega Faaletagata Lava Ia

Manatu faapea o le a e tusia se palakalafa e uiga i le sāvali o le Toefuataiga i luga o ala o faasalalauga faaagafesootai po o se palakalafa o talafou i le lotoifale. Ia totonu o lau tusi talaaga o suesuega, tusi se ulutala e faamatalaina ai le sāvali autu. Ona tusi lea o ou manatu ma lagona e uiga i lenei sāvali. Ia aofia ai pe na faapefea e le malamalama lelei i ai ona suia le ala o loo e ola ai ma le ala e te vaai atu ai i le lalolagi o siomia ai oe.

Faatuina ma Fausia le Ekalesia

Ina ua toefuatai mai e Iesu Keriso Lana Ekalesia, sa Ia faatonuina le Perofeta o Iosefa Samita ma isi e “faatuina” ma “atiae [i] luga” (Mataupu Faavae ma Feagaiga 31:7; 39:13). E faavaeina ma fausia le Ekalesia a o papatisoina ma faamauina ia tagata ua i ai molimau, tausia a latou feagaiga, ma saunia ma le atoatoa e o atu i le malumalu, ma fesoasoani e faamalosia le uarota po o le paranesi.

tamaloa o loo tatalo

I le avea ai ma se faifeautalai, e te fesoasoani e faatuina ma fausia le Ekalesia a le Faaola. E anoanoai auala e mafai ona e faia ai lenei mea. E mafai ona e lagolagoina tagata o le ekalesia a o latou faasoa atu le talalelei e ala i mataupu faavae o le alofa, faasoa atu, ma le valaaulia (tagai i le Tusitaulima Aoao, 23.1). E mafai ona e fesoasoani i tagata ia maua le papatisoga ma tuputupu a’e i lo latou faatuatua. E mafai ona e fesoasoani i tagata fou e fetuunai i o latou olaga fou ma faaauau pea ona tuputupu a’e faaleagaga. E mafai foi ona e fesoasoani i tagata o le ekalesia ua toe foi mai e faamalosia la latou faatuatua ia Iesu Keriso.

O tagata fou ma tagata ua toe foi mai e tuputupu a’e i le molimau ma le faatuatua pe a latou lagonaina le galue ai o le talalelei i o latou olaga. Ina ia fesoasoani e faataunuu lenei mea, e taua lo latou:

  • Maua ni uo o ni tagata o le Ekalesia.

  • Ia ave i ai se tiutetauave i totonu o le Ekalesia.

  • Ia fafagaina i le afioga a le Atua.

Tagai i le Gordon B. Hinckley, “Tagata Liliu Mai ma Alii Talavou,” Liahona, Me 1997, 47.)

O faifeautalai, taitai i le lotoifale, ma isi tagata o le Ekalesia e tatau ona talia ma le fiafia le avanoa e faafailele ai ma faamalolosia tagata fou ma tagata ua toe foi mai. O lenei auaunaga e fesoasoani e “faatumauina i latou i le ala sa’o” (Moronae 6:4).

Ia o Atu Ma Faia Mea Lelei

I le taimi o Lana galuega i le olaga nei, sa auauna atu ai le Faaola i isi. O ia sa femaliuai “ma faia mea lelei” ma “talai atu le talalelei” (Galuega 10:38; Mataio 4:23). A o e mulimuli i Lana faataitaiga, o le a e maua ai tagata e mafai ona e auauna atu i ai ma ē o le a taliaina oe.

E ala i le auauna atu, ua e faataunuuina ai poloaiga sili e lua ia alofa atu i le Atua ma alofa i lou tuaoi (tagai i le Mataio 22:36–40; 25:40; Mosaea 2:17). E ala i le auauna atu, e mafai ai e oe ma isi ona o mai faatasi i se auala mamana ma musuia.

I le avea ai ma se faifeautalai, e te tuuina atu auaunaga fuafuaina i vaiaso taitasi (tagai i le Tulaga Faatonuina Faafaifeautalai, 2.7 ma le 7.2, mo faamatalaga ma taiala). I lalo o le taitaiga a lau peresitene o le misiona, e mafai ona e maua ai avanoa e auauna atu ai i le alalafaga e ala i le JustServe (i nofoaga e faamaonia ai) ma taumafaiga a le Ekalesia mo le tali atu mo fesoasoaniga alofa ma faalavelave.

I aso taitasi, tatalo ma vaavaai mo avanoa e le’i fuafuaina e fai ai mea lelei. Faalogo i le Agaga ia iloa taimi mo nai faatinoga laiti o le agalelei e mafai ona e ofoina atu.

Peresitene Gordon B. Hinckley

“E te manao e te maua le fiafia? Faagalo oe lava ma e leiloa i lenei galuega tele. Tuu atu au taumafaiga e fesoasoani ai i tagata. … Ia tu maualuga atu, siitia i latou ua vaivai tuli vae, sisii a’e i luga lima o i latou ua tautau i lalo [lima]. Ola i le talalelei a Iesu Keriso” (Gordon B. Hinckley, Aoaoga a Peresitene o le Ekalesia: Gordon B. Hinckley [2016], 209).

Suesuega o Tusitusiga Paia

O le a le matafaioi o le auauna atu i le soifuaga o le Faaola?

O le a le matafaioi o le auauna atu i misiona a Amona ma Arona?

O le a le mea ua poloaiina oe e le Alii e fai?

O Se Faifeautalai Faamanuiaina

O lou manuia i le avea ai ma se faifeautalai e fua muamua lava e ala i lou manao ma le tautinoga e saili, aoao atu, papatiso, ma faamau tagata liliu mai ma fesoasoani ia i latou ia avea ma soo faamaoni o Keriso ma tagata o Lana Ekalesia (tagai i le Alema 41:3).

O lou manuia e le fuafuaina pe toafia ni tagata e te aoaoina pe fesoasoani e aumai i le papatisoga. E lē fuafuaina foi e ala i le umiaina o tofiga faaleautaitai.

O lou manuia e lē faalagolago i le auala e filifili ai isi e tali atu ia te oe, i au valaaulia, po o au galuega faamaoni o le agalelei. E i ai i tagata le faitalia e filifili ai pe talia le savali o le talalelei pe leai. O lou tiutetauave, o le aoao atu lea ma le manino ma le mamana ina ia mafai ona latou faia se filifiliga atamai e faamanuiaina ai i latou.

Mafaufau i le faataoto a le Faaola i taleni o i le Mataio 25:14–28. O le matai, lea e fai ma sui o le Alii, na viia Ana auauna faamaoni e ui ina eseese le tele o a latou taulaga (tagai i le Mataio 25:21, 23). Na Ia tuuina atu foi ia i latou le taui lava e tasi, ma valaaulia i latou e ulu atu “i le olioli o lou alii” aua sa latou faalauteleina mea na tuuina atu ia i latou.

Ua tuuina atu e le Atua ia te oe taleni ma meaalofa e faaaoga i Lana auaunaga. O au taleni ma meaalofa e ese mai taleni a isi. Ia iloa e taua nei mea uma, e aofia ai ma mea e tau le iloa. A o e faapaiaina au taleni ma meaalofa ia te Ia, o le a Ia faalauteleina i latou ma faia vavega i mea e te ofoina atu.

Aloese mai le faatusatusaina o oe i isi faifeautalai ma fuatia taunuuga vaaia o au galuega i a latou foi taumafaiga. O le faatusatusa e masani ona taitai atu ai i taunuuga le lelei, e pei o le lotovaivai po o le faamaualuga. O le faatusatusa e masani foi ona taitaiseseina ai. O le mea e finagalo ai le Alii o lau lava taumafaiga sili lea—mo oe e “auauna atu ia te ia ma lou loto atoa, manatu atoa, mafaufau, ma le malosi atoa” (Mataupu Faavae ma Feagaiga 4:2; faaopoopo le faamamafa).

Atonu e te faanoanoa pe afai e le talia lava e tagata le talalelei. O nisi taimi atonu e te lagona ai le lotovaivai. E oo lava i faifeautalai maoae ma perofeta i tusitusiga paia na lagonaina i nisi taimi le lotovaivai (tagai i le 2 Nifae 4:17–19; Alema 26:27). I taimi faapena, mulimuli i le faataitaiga a Nifae e ala i le liliu atu i le Alii, tuu atu lou faalagolago ia te Ia, tatalo mo le malosi, ma le manatuaina o mea lelei sa Ia faia mo oe (tagai i le 2 Nifae 4:16–35).

tamaitai faifeautalai e toalua o loo tatalo

A o e liliu atu i le Alii i taimi faigata, ua Ia folafola mai, “O le a Ou faamalosia oe; ioe, o le a Ou fesoasoani ia te oe; ioe, ou te lagolagoina oe” (Isaia 41:10). E ala i le faatinoina o le faatuatua ia Keriso, e mafai ai ona e maua le filemu ma le faamautinoaga e uiga i au taumafaiga. O le a fesoasoani le faatuatua ia te oe e fetaomi atu ai i luma ma faaauau pea i manaoga amiotonu.

Ia tumau le taulai atu i lau tautinoga ia Keriso ma lou faamoemoega faafaifeautalai—ae le o taunuuga i fafo. O nei taunuuga e masani ona le vave iloa. I le taimi lava e tasi, ia tausisia le maualuga o ou faamoemoega e tusa lava po o a luitau o feagai ma oe. O faamoemoega maualuluga o le a faateleina ai lou mataalia, lou manao, ma lou tomai e mulimuli i le Agaga.

O nisi o auala e mafai ona e iloiloina ai lou tuuto i le Alii ma lau taumafaiga e avea ma se faifeautalai faamanuiaina o loo otooto atu i lalo.

Afai ua e faia le mea sili e te mafaia, atonu e iai lava ni tulaga e te faanoanoa ai, ae o le a e le faanoanoa ai ia te oe lava. E mafai ona e lagonaina ma le mautinoa o loo fiafia le Alii ina ua e lagonaina le galue ai o le Agaga e ala atu ia te oe.

Suesuega o Tusitusiga Paia

O a ni lagona o auauna a le Alii e uiga i le galuega? E faapefea ona faatosina mai e auauna a le Alii i latou o loo latou auauna i ai? O le a sou lagona e uiga i le galuega?

Suesuega Faaletagata Lava Ia

  • Faitau le Helamana 10:1–5 ma le 3 Nifae 7:17–18 O le a se lagona na oo i le Alii i nei faifeautalai ma le latou auaunaga?

  • Mafaufau i taumafaiga faafaifeautalai a Apinati ma Amona (tagai i le Mosaea 11–18; Alema 17–20; 23–24). Aisea na talia ai e le Alii ia faifeautalai e ui lava sa eseese ia taunuuga o a la taumafaiga?

  • Faamaumau i totonu o lau api talaaga o suesuega mea na e aoaoina.

Manatu mo le Suesue ma le Faaaogaina

Suesuega Faaletagata Lava Ia

Suesuega Faalesoa ma le Felafolafoaiga Faalesoa

  • Filifili se tasi o faifeautalai maoae nei, ma faitau mau o loo i lalo. A o e faitauina, ia talanoaina pe na faapefea e lenei faifeau ona (1) malamalama ma tautino atu o ia lava i lona valaauga, (2) faaalia ona uiga ma lona naunautaiga mo le galuega, ma le (3) fesoasoani i isi ina ia talia le talalelei.

  • Filifili ni viiga se lua e uiga i le Toefuataiga o le talalelei. Faitau pe usu ia viiga. Ia talanoaina ia uiga o upu.

Aufono a le Itu, Konafesi Faalesone, ma le Aufono a Taitai o le Misiona

  • Ia valaaulia ni tagata se toalua pe toatolu e le’i leva ona liliu mai e faamatala atu o latou aafiaga ina ua liua. O a ni o latou lagona e uiga i faifeautalai? O a ni o latou lagona e uiga i mea na aoao atu e faifeautalai? O le a se mea na fesoasoani ia i latou e tausia ai tautinoga? O le a se mea na sili ona aafia ai lo latou liuaina?

  • I ni nai aso a o lumanai le fonotaga, ia tofi ni nai faifeautalai e mafaufau loloto i ni fesili e filifilia mai le “Manatunatu i le Mea Lenei” o loo i le amataga o le mataupu. Fai atu i faifeautalai taitoatasi e saunia se tautalaga mo le lua i le tolu minute e uiga i lana fesili ua tofi atu i ai. I le gasologa o le fonotaga faale-it po o le konafesi faale-sone, ia valaaulia faifeautalai e tuuina atu a latou tautalaga. A mae’a ia tautalaga, ona talanoaina lea o mea na latou aoaoina ma le auala e mafai ona latou faaaogaina ai ia latou galuega faafaifeautalai.

  • Vaevae faifeautalai i ni vaega se fa. Fai atu i vaega taitasi e lisi mai ni upumoni, feagaiga, ma sauniga se tele e mafai ona latou lisiina, lea na toefuataiina ma faaalia mai e ala mai i le Perofeta o Iosefa Samita. Ia tuu atu i vaega taitasi e faasoa mai a latou lisi. Ia valaaulia faifeautalai e faasoa atu pe na faapefea e soo se tasi o nei upumoni na faaalia mai e ala i le Toefuataiga, ona aafia ai o latou olaga.

  • Ia talanoaina le uiga o le avea ma se faifeautalai faamanuiaina. Ia valaaulia ia faifeautalai e tuu atu ni faataitaiga patino.

Taitai Misiona ma Fesoasoani o le Misiona

  • I le taimi o faatalanoaga po o talanoaga ma faifeautalai, fai atu ia i latou mai lea taimi i lea taimi e faasoa atu ia te oe:

    • A latou molimau ia Iesu Keriso.

    • A latou molimau i le talalelei toefuataiina ma le misiona a Iosefa Samita.

    • A latou molimau i le Tusi a Mamona.

    • Latou mafaufauga e uiga i o latou faamoemoega i le avea ai ma se faifeautalai.

  • Ia valaaulia faifeautalai e faamaumau i totonu o a latou tusi talaaga o suesuega o latou lagona i le faamoemoega o a latou misiona. I le taimi o se faatalanoaga po o talanoaga, ia fai atu ia i latou e faasoa atu mea na latou tusia.

  • Ia auina atu se tusi faamalo i tagata fou.