“Shapita 3: Dibikila bua Kutambuishibua ne Kujadikibua,” Longesha Lumu Luimpa Luanyi: Buludiki bua Kutangalaja Lumu Luimpa lua Yezu Kilisto (2023)
“Dibikila bua Kutambuishibua ne Kujadikibua,” Longesha Lumu Luimpa Luanyi
Shapita 3
Dibikila bua Kutambuishibua ne Kujadikibua
Tshishikaminu tshia Dilongesha
Tudi bonsu bana ba Tatu wa mu Diûlu. Tudi balua pa buloba bua kupeta mushindu wa kulonga, kukola ne kulua buyeya bua ne tudi mua kupingana kumpala Kuenda (tangila Mose 1:39). Katuena mua kuikala bu Yeya anyi kupingana Kudiye kakuyi diambuluisha dia bunzambi. Tatu wa mu Diûlu wakatuma Muanenda, Yezu Kilisto, bua kutupikula ne kukosa mionji ya lufu (tangila 3 Nefi 27:13–22).
Tudi tupeta bukola bua bupikudi bua Kilisto kupitshila ku diteka dia ditabuija mu Yeya mu dikudimuna mutshima, ditambuishibua, dipeta dipa dia Nyuma wa Tshijila kupitshila ku dijadikibua, ne dinanukila tô ne ku ndekelu. Dilama tshipungidi tshia ditambula tshidi tshitupa tshia kumpala bua tuetu kusuikibua kudi Nzambi bua Nyuma wa Tshijila atokesha, akolesha, ne akudimuna ngikadilu yetu bua buimpa. Dimanya dia buenzeji ebu bua tshijila didi dibikidibua ne diledibua tshiakabidi mu nyuma. (Tangila 2 Nefi 31:7, 13–14, 20–21; Mosiya 5:1–7; 18; 27:24; 3 Nefi 27:20; Yone 3:5.)
Diledibua tshiakabidi mu nyuma didi dibanga patudi tutambuishibua ku mayi ne ku Nyuma. Ditambula didi mululu wa disanka ne wa ditekemena. Patudi tutambuishibua ne mutshima mutshibuluka ne nyuma munyingala, tudi tubangulula moyo ne bukola bua Nzambi budi bututua mpanda. Kunyima kua tuetu batambuishibua ne bajadikibua, tudi mua kutungunuka ne kuikala bakankamikibua ku diangata mu buakana biadidia bia tshijila. (Tangila 2 Nefi 31:13; Mosiya 18:7–16; Moloni 6:2; Dilongesha ne Bipungidi 20:37.)
Dituala dia Dibikila
Pawudi udiumvua mulombodibua kudi Nyuma, bikila bantu bua kuikala batambuishibua ne bajajadikibua. Etshi tshidi mua kufika mu dilongesha dionsu.
Longesha dilongesha dia ditambula ne ambuluisha bantu bua bumvua dilongesha dia Kilisto (tangila dilongesha 3). Longesha pa mushinga ne disanka bia tshipungidi tshia ditambula, bua dipeta dilekedibua dia mibi, ne dipeta dia dipa dia Nyuma wa Tshijila kupitshila ku dijadikibua.
Longolola bantu bua dibikila dia ditambula mu dituishibua ne mbumvua biwudi mubalongesha ne tshipungidi tshienzabu. Tshipungidi tshia ditambula tshidi bu mudibi bilonda:
-
Kuikala pabuipi bua kuangata pa mutu wetu dina dia Yezu Kilisto.
-
Kulama mikenji ya Nzambi.
-
Kusadila Nzambi ne bakuabu.
-
Kunanukila tô ne ku ndekelu. (Tangila dilongesha 4.)
Udi mua kutangalaja bibi bilonda:
“Patudi tutambushibua, tudi ‘tujadika kumpala kua [Nzambi] ne [tudi] benza nenda tshipungidi, ne [tuetu] netumusadila ne netulama mikenji yenda.’ Patudi tuenza tshipungidi etshi, Udi utulaya ne neapumuina Nyuma wenda mu tshibungi pa [tuetu] ’ (Mosiya 18:10).”
Dibikila dieba bua Kutambuishibua didi ne bua kuikala disunguluka ne dilulama. Udi mua kuamba ne:
“Neulonda tshilejilu tshia Yezu Kilisto ku ditambuishibua kudi muntu udi mujidibua bua kukumbaja mululu ewu anyi? Netukuambuluisha bua kudilongolola bua ditambula. Tudi tuitabuijane udi mua kuikala pabuipi mu [dituku]. Neudilongolola bua kutambuishibua mu dituku adi anyi?
Bu mu dibikila dionsu dinudi nutuala, layayi mabenesha manena adi bantu mua kupeta padibu bitaba dibikilla dia kutambuishibua ne kulama bipungidi bidi bidilamata. Fila bujadiki bueba bua mabenesha â.
Longesha ne ditambula ne dijadika kabiena difika dia ndekelu to. Kadi, tshidi tshikala tshitudilu mu njila wa dikudimuna moyo tshidi tshituala ditekemena, disanka, ne bukola bia Nzambi bia bungi mu moyo wa muntu (tangila Mosiya 27:25–26). Kunyima kua bantu batambuishibua ne bajadikibua, badi mua kutekemena kuikala bajidibua kudi Nyuma padibu baya kumpala mu njila wa tshipungidi.
Padibi bikumbana, bikila aba bawudi ulongesha bua kubuela mu tshisangilu tshia ditambula ne tshia biakudia bia tshijila mudi muntu ujadikibua.
Ngenyi bua Dibikila bua Kutambuishibua
Tangila dibala dia mifundu ya mulubu wa ditambuishibua dia Yezu (tangila Matayo 3:13–17). Udi kabidi mua kuleja Bindidimbi bia mu Bibilia bidi bileja ditambula dia Mupandishi anyi Bindidimbi bia mu Mukanda wa Molomo bidi bileja bayidi ba Mupandishi batambuisha.
Udi mua kubala kabidi mulubu wa Nefi pa ditambula dia Yezu (tangila 2 Nefi 31:4–12). Dibala dia milubu ya ditambula dia Yezu Kilisto didi mua kukankamika aba badi balongeshibua.
Dilonga dia Mifundu
Longa mifundu idi ilonda:
Funda tshikosu tshia biwudi mulonga