Shapita 3: Dilongesha 2—Dilongolola dia Lupandu dia Tatu wa mu Diûlu
“Shapita 3: Dilongesha 2—Dilongolola dia Lupandu dia Tatu wa mu Diûlu,” Longesha Lumu Luimpa Luanyi: Buludiki bua Ditangalaja dia Lumu Luimpa lua Yezu Kilisto (2023)
Lumu luimpa lupinguluja lua Yezu Kilisto ludi lutuambuluisha bua kuandamuna ku nkonku eyi ya mushinga ya anyima. Kupitshila ku lumu luimpa, tudi tulonga pa ngikalu wetu wa tshimanyinu tshia bunzambi ne buikadi buetu bua tshiendelela bu bana ba Nzambi. Lumu luimpa ludi lutupesha ditekemena ne lutuambuluisha bua kupeta ditalala, diakalenga, ne ngumvuilu. Kuteka lumu luimpa mu tshienzedi kudi kutuambuluisha bua kukola ne kupeta dikankamana patudi tuluangana ne ntatu.
Nzambi mmusua bilenga bia bana benda ne mmujinga kutupesha mabenesha manena, adi mikala kubenga kufua ne moyo wa tshiendelela (tangila Mose 1:39; Dilongesha ne Bipungidi 14:7). Bualu udi mutunanga, uvua mulongolola dilongolola bua ne tuetu tupeta mabenesha â. Mu mifundu, dilongolola edi didi dibikibua ne dilongolola dia lupandu, dilongolola dinena dia disanka, ne dilongolola dia bupikudi (tangila Alama 42:5, 8, 11, 13, 15, 16, 31).
Mu dilongolola dia Nzambi, yonsu wa kutudi udi wenza luendu kupitshila ku moyo kumpala kua diledibua, diledibua, moyo wa tshifuaka, lufu, ne moyo kunyima kua lufu. Nzambi uvua mulongolola tshitudi natshi dijinga mu luendu elu bua kunyima kua lufu luetu, tudi mua kupingana kumpala kuenda ne kupeta tshiuwidi tshia disanka.
Yezu Kilisto udi munkatshi mua dilongolola dia Nzambi. Kupitshila ku Bupikudi buenda ne Kubika ku Lufu, Yezu wakatupepejila bua yonsu wa kutudi apeta kubenga kufua ne moyo wa tshiendelela.
Mu moyo wetu pa buloba, katuena tuvuluka moyo wetu kumpala kua diledibua to. Katuena nansha tumvua menamena moyo kunyima kua lufu. Nansha nanku, Nzambi uvua mubuluila malelela a bungi pa bitupa ebi bia luendu lua tshiendelela. MMalMMalelela â adi atupesha dimanya dikumbana bua tuetu kumvua kipatshila ka moyo, kumanya disanka, ne kuikala ne ditekemena mu bintu bimpa bialua. Dimanya edi didi bubanji bua tshijila budi butuludika patudi pa buloba.
Pawudi udilongolola bua kulongesha, tangila mu disambila ngikadilu wa muntu yonsu ne majinga enda a mu nyuma. Pangadika tshidi mua kuikala ne diambuluisha dikola bua kulongesha. Dilongolola bua kumvuija miaku idi bantu kabayi mua kumvua. Longolola bilondeshila bungi bua diba diwikala nadi, vuluka bua kulama malongesha a bikosu.
Sungula mifundu iwenzela pawudi ulongesha. “Tshishimikidi tshia Dilongesha” Tshitupa dia dilongesha didi ne mifundu miambuluishI ya bungi.
Tangila nkonku iwudi mua kuela pawudi ulongesha. Longolola mabikila awudi mua kutuala adi mua kukankamika bantu bua kuteka mu tshienzedi.
Imanyina pa mabenesha adi Nzambi mulaya, ne tangalaja bujadiki bueba bua biwudi ulongesha.
Image
bena bukenji balongesha dîku
Tshiwudi Mua Kulongesha Bantu mu Minuta 15–25
Sungula nshindamenu umua anyi ya bungi pa dilongolola dia lupandu bua kulongesha. Tshishimikidi tshia dilongesha dia nshindamenu yonsu ntshifidibua kunyima kua tshikepeshilu etshi.
Moyo Kumpala kua Kuledibua: Kipatshila ka Nzambi ne Dilongolola Buetu
Tudi bonsu bana ba nyuma ba Nzambi. Wakatufuka mu tshimfuanyi tshienda.
Tuvua basomba nenda kumpala kua tuetu kuledibua pa buloba. Tudi bidimba bia dîku dienda. Udi mutumanya ne munanga yonsu wa kutudi.
Nzambi uvua mufila dilongolola bua disanka dietu ne diya kumpala mu moyo ewu ne mu tshiendelela.
Mu moyo kumpala kua diledibua dietu, tuakasungula bua kulonda dilongolola dia Nzambi. Tshidi tshiumvuija dilua pa buloba bua tuangata tshidia tshidi tshilonda mu diya dia kumpala dietu mu tshiendelela.
Yezu Kilisto udi munkatshi mua dilongolola dia Nzambi. Udi utupepejilatshi bua tuikala ne kubenga kufua ne moyo wa tshiendelela.
Bufuki
Ku buludiki bua Nzambi, Yezu Kilisto wakafuka buloba.
Dipona dia Adama ne Eva
Adama ne Eva bavua bana ba nyuma ba Nzambi ba kumpala bua kulua pa buloba. Nzambi wakafuka mibidi yabu ne wakabateka mu Budimi bua Edene.
Adama ne Eva bakasambuka mukenji, bakipatshibua mu budimi, ne bakatapuluka kumpala kua Nzambi. Bualu ebu budi bubikidibua ne Dipona.
Kunyima kua Dipona Adama ne Eva bakalua ba tshifuaka. Bu batshifuaka, bakakumbana bua kulonga, kuya kumpala, ne kuikala ne bana. Bakamanya kabidi kanyinganyinga, bubi, ne lufu.
Dipona divua njila wa bukua bantu. Dipona diakatupepejela bua tuetu tuledibua pa buloba ne tuya kumpala mu dilongolola dia Tatu wa mu Diûlu.
Moyo Wetu pa Buloba
Mu dilongolola dia Nzambi, tuvua bajinga bua kulua pa buloba bua kupeta mibidi ya mipimbu, kulonga ne kukola.
Pa buloba, tudi tulonga bua kuenda ku ditabuija. Nansha nanku, Tatu wa mu Diûlu ke mutulekela nkayetu to. Uvua mulongolola mapa a bungi ne maludiki bua kutuambuluisha kumpala kuenda.
Bupikudi bua Yezu Kilisto
Yonsu wa kutudi udi wenza bubi, ne yonsu wa kutudi neafua. Bualu Nzambi udi mutunanga, uvua mutuma, Muanenda, Yezu Kilisto, pa buloba bua kutusungila ku bubi ne ku lufu.
Kupitshila ku mulambu wa bupikudi wa Yezu Kilisto, tudi mua kubuikidibua ne kutokeshibua ku mibi yetu. Mitshima yetu idi mua kushintuluka bua buimpa patudi tukudimuna mutshima. Tshidi tshitupepejila bua tuetu kupingana kumpala kua Nzambi ne kupeta tshiuwidi tshia disanka.
Kupitshila ku Dibika ku Lufu dia Yezu, netubishibua ku lufu kunyima kua difua dietu. Tshidi tshiumvuija ne nyuma ne mubidi bia muntu yonsu nebisangishibua, ne yonsu wa kutudi neikala ne moyo bua kashidi mu mubidi mujalama ne mubishibua ku lufu.
Yezu Kilisto udi ufila busambi, ditekemena, ne londapu. Mulambu wa bupikudi wenda uvua diumvuija dinena dia dinanga dienda. Bionsu bidi kabiyi biakana mu moyo bidi mua kulua bimpa kupitshila ku Bupikudi bua Yezu Kilisto.
Muaba wa Nyuma
Padi mubidi wetu wa mupimbu ufua, nyuma wetu udi utungunuka ne kuikala ne moyo mu muaba wa nyuma. Etshi tshidi dikala dia tshitupa tshipi dia dilonga ne didilongolola kumpala kua Dibika ku Lufu.
Lumu luimpa lua Yezu Kilisto ludi lulongeshibua mu muaba wa nyuma, ne tudi mua kutunguluka ne kukola ne kuya kumpala.
Dibika ku Lufu, Lupandu, ne Dizanjikibua
Kunyima kua disomba dietu mu muaba wa nyuma, Dibika ku Lufu tshidi tshitupa tshidi tshilonda mu luendu luetu lua tshiendelela.
Dibika ku Lufu tshidi disangisha dia nyuma ne mubidi bietu. Yonsu wa kutudi neabika ku lufu ne neikala ne mubidi wa mupimbu mujalama. Netuikala ne moyo bua kashidi. Etshi tshidi tshipepeja kudi Bupikudi ne Kubika ku Lufu bia Mupandishi.
Tshilumbuluilu ne Makalenga a Butumbi
Patudi tubika ku lufu, Yezu Kilisto neikala mulumbuluishi wetu. Pa kumbusha bantu bakesa, bana bonsu ba Nzambi nebapeta muaba mu bukalenga bua butumbi.
Nansha tuetu bonsu babika ku lufu, katuakupeta butumbi bua tshiendelela bua momumua to. Yezu neatulumbuluisha bilondeshila ditabuija dietu, midimu, ne dikudimuna mutshima dietu mu tshifuaka emu ne mu muaba wa nyuma. Tudi mua kupingana bua kusomba kumpala kua Nzambi patuikala ne lulamatu.
Nkonku Iwudi Mua Kukonkesha Bantu
Nkonku idi ilonda idi mikala bilejilu bia iwudi mua kukonkesha bantu. Nkonku eyi idi mua kukuambuluisha bua kuikala ne miyuki ya ngumvuilu ne kumvua majinga ne muenenu wa muntu.
Bueba wewa, kipatshila ka moyo kadi tshinyi?
Tshinyi tshidi tshikutuadila disanka?
Ntatu kayi iwudi dijinga ne diambuluisha dia Nzambi?
tshinyi tshiwudi mulonga ku ntatu iwuvua muluangana nayi?
Tshiwudi mumanya ntshiyi pa Yezu Kilisto? Mushindu kayi udi moyo ne bukenji buenda bilenga moyo weba?
Mabikila Awudi Mua Kutuala
Neukonka Nzambi mu disambila bua akuambuluisha bua umanya ne bitudi balongesha mbilelela anyi? (Tangila “Muenenu wa Malongesha: Disambila” mu tshitupa tshia ndekelu tshia dilongesha 1.)
Neuya netu mu ekelezia mu Dialumingu edi bua kulonga biabunyi pa bitudi balongesha anyi?
Neubala Mukanda wa Molomo ne neusambila bua kumanya ne udi dîyi dia Nzambi anyi? (Udi mua kufilaku shapita anyi kanungu misunguluka.)
Tudi mua kuangata diba bua dikumbula dietu dialua anyi?
Image
Dizola dia dilongolola dia lupandu
Tshishikaminu tshia Dilongesha
Tshitupa etshi tshidi tshifila dilongesha ne mifundu biwudi mua kulongesha ne kukankamika dimanya dieba ne bujadiki bua lumu luimpa ne kuambuluisha bua kulongesha.
Image
nkalakashi
Moyo Kumpala kua Kuledibua: Kipatshila ka Nzambi ne Dilongolola Buetu
Tudi bana ba Nzambi, ne tudi Tuvua Basomba Nenda kumpala kua Diledibua Dietu.
Nzambi udi Tatu wa nyuma yetu. Tudi bana benda mu miaku, wakatufuka mu tshimfuanyi tshienda. Yonsu wa kutudi udi ne ngikadilu wa bunzambi bu muana wa Nzambi. Dimanya edi didi mua kutuambuluisha mu bikondu bikola ne didi mua kutupesha lungenyi bua kulua balenga.
Tuvua basomba ne Nzambi bu bana benda ba nyuma kumpala kua tuetu kuledibua pa buloba. Tudi bidimba bia dîku dienda.
Image
Mulombodi Mukulu M. Russell Ballard
“Kudi tshimanyinu tshimua tshia mushinga tshitudi tuabanyangana mpindiewu ne kashidi, tshimua tshitudi katuyi mua kujimija, ne tshitudi ne tshia kuelela tuasakidila. Tshidi ne udi ne uvua amu muana wa baluma anyi wa bakaji wa Nzambi ne miji ya mu nyuma mu tshiendelela.
“… Diumvua dia bulelela ebu—dibumvua bushuwa ne dibupukila—tshidi tshishintulula moyo. Tshidi tshikupesha buikadi bua dikema budi muntu nansha umua kayi mua kukumbusha. Kadi tshitamba etshi, tshidi tshikupesha ngumvuilu munena wa mushinga ne lumvu bia mushinga weba bidi kabiyi ne ndekelu. Ndekelu, tshidi tshikupesha bunzambi, bunema, ne kipatshila ka mushinga mu moyo” (M. Russell Ballard, “Children of Heavenly Father” [Malu a ntedelelu Université wa Brigham Young, 3 Ngondu Muisatu 2020], 2, speeches.byu.edu).
Tuakasungula bua Kulua pa Buloba
Tatu Wetu wa mu Diûlu udi mutunanga ne udi musua ne tulua bu yeya. Udi muntu muzanjikibua ne mubidi wa mupimbu mutumbishibua.
Mu moyo kumpala kua kuledibua kuetu, tuvua balonga ne Nzambi udi ne dilongolola bua tuetu tulua bu yeya. Tshitupa tshia ku dilongolola tshivua tshia ne tumbuka ku nzubu wetu wa ku diûlu ne tulua pa buloba bua kupeta mibidi ya mupimbu. Tuvua bajinga kabidi kupeta dimanya ne ditanta dia ditabuija mu mutantshi utudi ntanta ne kumpala kua Nzambi. Katuena tuvuluka mutuvua basomba ne Nzambi to. Nansha nanku, mmutupesha tshitudi natshi dijinga bua tuetu kupingana bua kusomba nenda.
Budienzedi, anyi budishikaminyi ne dikumbana bua kusungula, tshidi tshitupa tshia mushinga mu dilongolola dia Nzambi buetu. Mu moyo kumpala kua diledibua dietu, yonsu wa kutudi uvua musungula bua kulonda dilongolola dia Nzambi ne kulua pa buloba bua kuangata tshitupa tshidi tshilonda mu diya kumpala dietu dia tshiendelela. Tuvua bumvua ne patudi anuapa, tudi ne mishindu ya bungi mipiamipia bua kukola ne kumanya disanka. Tuvua bumvua kabidi ne tuvua ne bua kuluangana ne dipangakana. Tuvua mua kumanya matêtshibua, ntatu, kanyinganyinga, ne lufu.
Mu disungula bua kulua pa buloba tuvua beyemena mu dinanga dia Nzambi ne mu diambuluisha dienda. Tuvua beyemena mu dilongolola dienda bua lupandu luetu.
Tatu wa mu Diûlu Wakasungula Yezu Kilisto bua Kutusungila
Yezu Kilisto udi munkatshi mua dilongolola dia Nzambi. Kumpala kua kulua pa buloba, tuvua bamanya ne katuakupingana kumpala kua Nzambi ku tuetu nkayetu to. Tatu wa mu Diûlu wakasungula Yezu Kilisto, Muanenda wa kumpala, bua kutupepejela bua kupingana kumpala kuenda ne kuikala ne moyo wa tshiendelela.
Yezu wakitaba mu budisuila. Wakanyisha bua kulua pa buloba ne kutusungila kupitshila ku mulambu wenda wa bupikudi. Bupikudi buenda ne Dibika ku Lufu bivua bianyishila kipatshila ka Nzambi buetu bua kukumbana.
Mukanda Munena wa Maludiki, 1.1: “Dilongolola dia Disanka dia Nzambi”
Gospel Topics: [Biena bualu bia Lumu luimpa]: “Premortality [Kumpala kua Diledibua],” “Plan of Salvation [Dilongolola dia Lupandu]”
Image
dibuela dia diba ku mbuwa munena
Bufuki
Dilongolola dia Tatu wa mu Diûlu divua difila difuka dia buloba buvua bana benda ba nyuma mua kupetela mibidi ya mupimbu ne kupeta dimanya. Moyo wetu pa buloba udi ne mushinga buetu bua tukola ne tulua bu yeya.
Ku bulombodi bua Tatu wa mu Diûlu, Yezu Kilisto wakafuka buloba ne bionsu bidi ne moyo. Pashisha Tatu wa mu Diûlu wakafuka muntu muluma ne mukaji mu tshimfuanyi tshienda. Bufuki budi dileja dia dinanga dia Nzambi ne dijinga dienda buetu bua tuikala ne mushindu wa kukola.
Leaving the Garden of Eden [Diumbuka mu Budimi bua Edene], kudi Joseph Brickey
Dipona dia Adama ne Eva
Kumpala kua Dipona
Adama ne Eva bavua bana ba nyuma ba Tatu wa mu Diûlu ba kumpala bua kulua pa buloba. Nzambi wakafuka mibidi yabu ya mupimbu mu tshimfuanyi tshienda ne kubatekaye mu Budimi bua Edene. Mu budimi emu bavua bapeluka, ne Nzambi uvua ukumbaja majinga abu.
Pavua Adama ne Eva bikala mu budimi, Nzambi wakabelela mukenji bua kabadi tshimuma tshia mutshi wa dimanya dia buimpa ne bubi to, Bu bobu batumikila mukenji ewu, bavua mua kushala mu budimi. Kadi, kabavua mua kukumbana bua kuya kumpala ku dilonga dia dipangakana ne ku ntatu ya tshifuaka. Kabavua mua kukumbana bua kumanya disanka bualu kabavua bamanya kanyinganyinga anyi busami to.
Satana wakatêta Adama ne Eva bua badia tshimuma tshikandikibua, ne bakasungula bua kudia. Bua bualu bua disungula edi, bakipatshibua mu budimi ne bakatapuluka ku mesu kua Nzambi. Bualu ebu budi bubikidibua ne Dipona.
Kunyima kua Dipona
Kunyima kua Dipona, Adama ne Eva bakalua ba tshifuaka. Ntantamula kabayi bamanya bualu to, bakumvua ne bakamanya bubidi buimpa ne bubi. Bavua mua kuezela budienzedi buabu bua kusungula pankatshi pabi. Bualu Adama ne Eva bakaluangana ne dipangilangana ne ntatu, bavua bakumbana bua kulonga ne kuya kumpala. Bualu bavua bamanya kanyinganyinga, bavua mua kumanya kabidi disanka. (Tangila 2 Nefi 2:22–25.)
Kumbusha makenga abu, Adama ne Eva bakumvua ne, kuikala batshifuaka tshivua dibenesha dinena. Dimua dia ku mabenesha divua ne bavua mua kupeta bana. Etshi tshivua tshifila njila bua bana ba nyuma bakuabu ba Nzambi bua kulua pa buloba ne kupeta mibidi ya mupimbu.
Pa bidi bitangila mabenesha a Dipona, bubidi Adama ne Eva bakasanka. Eva wakamba ne, “Kabuyi bua disambuka dietu dia mukenji, katuvua mua kuikala ne ndelanganyi, ne katuvua mua kumanya buimpa ne bubi ne nansha disanka dia bupikudi buetu, ne moyo wa tshiendelela bidi Nzambi ufila kudi badi bamutumikila” (Mose 5:11; tangila kabidi kanungu 10).
Gospel Topics:[Biena bualu bia Lumu luimpa]: “Fall of Adam and Eve [Dipona dia Adama ne Eva],” “Agency and Accountability [Budienzedi ne Didiambuila Bujitu]”
Moyo Wetu pa Buloba
Bantu ba bungi badi badikonka, “buatshinyi ndi muikala pa buloba apa?” Moyo wetu pa buloba udi ne mushinga mu dilongolola dia lupandu lua Nzambi bua diya kumpala dietu dia tshiendelela. Kipatshila ketu ka ndekelu kadi kikala bua ne tupingana kumpala kua Nzambi ne kupeta tshiuwidi tshia disanka. Mu tshikepeshilu kuinshi eku kudi mishindu kampanda idi moyo wa pa buloba utulongolola ku etshi.
Image
nsongaluma utua mimuemua
Kupeta Mubidi wa Mupimbu
Kipatshila kamua ka dilua pa buloba kadi ka kupeta mubidi wa mupimbu muwowu ke muasombela nyuma wetu. Mibidi yetu idi ya tshijila, bifukibua bia tshishima bia Nzambi. Ne mibidi ya mupimbu, tudi mua kuenza, kulonga, ne kumanya bintu bia bungi bidi nyuma kayi mua kuenza. Tudi mua kuya kumpala mu mushindu udi nyuma kayi mua kuenza.
Bualu mibidi yetu idi ya tshifuaka, tudi tumanya dikenga, disama, ne mateta makuabu. Mamanya â adi mua kutuambuluisha bua kulonga ditukija, moyo wa lusa, ne ngikadilu mikuabu ya bunzambi. Bidi mua kuikala tshitupa tshia njila wetu bua disanka. Disungula dia buimpa padibi bikola bua kuenza tshidi nangananga mushindu udi ditabuija, ditekemena, ne bunangi bilua bitupa bia ngikadilu wetu.
Longa bua Kuenzela Budienzedi ne Lungenyi
Kipatshila kakuabu ka tshifuaka kadi ka kuenzela budienzedi buetu ne lungenyi—kusungula tshidi tshimpa. Kulonga bua kuenzela budienzedi buetu ne lungenyi tshidi ne mushinga bua kulua bu Nzambi.
Tatu wa mu Diûlu ne Yezu Kilisto badi batulongesha tshidi tshimpa ne batupesha mikenji bua kutuludika ku diakalenga. Satana udi ututeta bua tuenza bubi, musua bua tuikala bakengi bu mudiye. Tudi tuluangana pankatshi pa buimpa ne bubi, tshidi ne mushinga bua kulonga bua kuenzela budienzedi (tangila 2 Nefi 2:11).
Patudi tutumikila Nzambi, tudi tukola ne tupeta mabenesha enda adiye mulaya. Patudi katuyi tutumikila, tudi tushala ntanta nenda ne tupeta tshipeta tshia bubi. Nansha mudibi bitumuenekela bishilangana, bubi budi amu bulombola ku dibungama. Misangu mivula mabenesha a ditumikila—ne bipeta bia mibi—kabitu bizanzamika katataka anyi mimueneka pa mbelu. Kadi bidi bia bushuwa, bualu Nzambi udi muakana.
Nansha mutudi tuenza muetu monsu, tudi bonsu tuenza bubi ne “tudi tupanga kupeta butumbi kudi Nzambi” (Lomo 3:23). Bualu Tatu wa mu Diûlu uvua mutshimanya, mmutupesha mushindu bua kukudimuna mutshima bua kupingana kudiye.
Dikudimuna mutshima didi dituala bukola bua Musungidi, Yezu Kilisto mu nsombelu wetu (tangila Helamana 5:11). Patudi tukudimuna mutshima, tudi tulua batokeshibua ku bubi kupitshila ku mulambu wa bupikudi wa Yezu Kilisto ne dipa dia Nyuma wa Tshijila (tangila 3 Nefi 27:16–20). Tudi tumanya disanka, kupitshila ku dikudimuna mutshima. Mushindu wa tuetu kupingana kua Tatu wetu wa mu Diûlu udiku, bualu yeye muena lusa. (Tangila “Dikudimuna Mutshima” mu dilongesha 3.)
Longa bua Kuenda ku Ditabuija
Kipatshila kakuabu ka moyo ewu kadi ka kupeta dimanya didi mua kulua amu kupitshila ku ditapuluka ne Tatu wa mu Diûlu. Bualu katuena tumumona, tudi tujinga bua kulonga bua kuenda ku ditabuija (tangila 2 Kolinto 5:6–7).
Nzambi kena mutulekela nkayetu mu luendu elu to. Mutupesha Nyuma wa Tshijila bua atulombola, atukankamika, ne atujidila. Mutupesha kabidi mifundu, bambi, masambila, ne lumu luimpa lua Yezu Kilisto.
Tshitupa tshionsu tshia dimanya dietu mu tshifuaka—disanka ne kanyinganyinga, dipeta ne dipangila—bidi mua kutuambuluisha bua kukola patudi tudilongolola bua kupingana kudi Nzambi.
Bualu bua Dipona dia Adama ne Eva, tudi bonsu bena bubi ne lufu. Katuena mua kutshimuna bipeta bia bubi ne bia lufu nkayetu to. Mu dilongolola dia lupandu dia Tatu wetu wa mu Diûlu, mmutupesha mushindu bua kutshimuna bipeta bia Dipona bua ne tupingana kudiye. Kumpala kua buloba kufukibua, yeya wakasungula Yezu Kilisto bua kuikala Mupandishi ne Musungidi wetu.
Amu Yezu Kilisto ke uvua mua kutusungila ku bubi ne ku lufu. Udi Muana wa Nzambi mu miaku. Wakasomba kayi ne moyo wa mibi, mutumikila ne bujima bonsu kudi Tatuenda. Uvua mulongolodibua ne muitaba bua kuenza disua dia Tatu wenda wa mu Diûlu.
Bupikudi bua Mupandishi budi buangata kukenga kuenda mu Getesemane, kukenga ne kufua kuenda pa mutshi mutshiamakana, ne Dibika ku Lufu dienda. Wakakenga bipitshila lumvu—biakafika ne wakapueka mashi mu kasosu konsu (tangila Dilongesha ne Bipungidi 19:18).
Bupikudi bua Yezu Kilisto budi tshikuma tshia butumbi bua miyuki ya bukua bantu. Kupitshila ku mulambu wenda wa bupikudi, Yezu wakenza bua dilongolola dia Tatu dienzeka. Katuvua mua kuikala ne diambuluisha kakuyi Dipikula dia Yezu Kilisto bualu katuvua mua kudipandisha nkayetu ku bubi ne ku lufu (tangila Alama 22:12–15).
Mulambu wa Mupandishi uvua dileja dia ku mutu dia dinanga dia Tatu wenda ne buetu. “Butshiama, ne bule, ne ndondo, ne mulu” bua dinanga dia Kilisto bidi bipitshila lumvu luetu (Efeso 3:18; tangila kabidi kanungu 19).
Image
Ditshiamakajibua, kudi Harry Anderson
Yezu Kilisto Wakatshimuna Lufu bua Bonsu
Pa kafua Yezu Kilisto pa mutshi mutshiamakana, nyuma wenda uvua mutapuluka mu mubidi wenda. Mu dituku disatu, nyuma wenda ne mubidi wenda biakasangishibua bua kabitapuluki kabidi nansha. Wakamuenekela bantu ba bungi ubaleja ne uvua ne mubidi wa misunyi ne mifuba udi kawuyi ufua. Disangisha dia nyuma ne mubidi edi didi dibikidibua ne Dibika ku Lufu.
Bu batshifuaka, yonsu wa kutudi neafua. Nansha nanku, bualu Yezu wakatshiumuna lufu, muntu yonsu udi mulela pa buloba neabika ku lufu. Dibika ku lufu didi dipa dia bunzambi bua bonsu, difidibua kupitshila ku lusa lua Mupandishi ne ngasa wa bupikudi. Nyuma ne mubidi bia muntu yonsu nebisangishibua, ne yonsu wa kutudi neikala ne moyo bua kashidi mu mubidi mujalama ne mubishibua ku lufu. Bu kabuyi bua Yezu Kilisto, lufu luvua lukupula ditekemena dia buikadi bulualua ne Tatu wa mu Diûlu (tangila 2 Nefi 9:8–12).
Yezu watupepejila bua Tuikala Batokeshibua ku Mibi Yetu
Bua kumvua ditekemena ditudi tupeta kupitshila kudi Kilisto, tudi dijinga ne kumvua mukenji wa bululama. Etshi tshidi mukenji udi kawuyi wandamuka udi utuala bipeta bua bienzedi bietu. Ditumikila kudi Nzambi didi dituala bipeta bimpa ne dibenga kutumikila didi dituala bibi. (Tangila Alama 42:14–18.) Patudi tuenza bubi, tudi tulua bakoya mu nyuma, ne tshintu tshia bukoya nansha tshimua katshiena mua kusomba kumpala kua Nzambi (tangila 3 Nefi 27:19).
Image
Yezu Usambila mu Getesemane, kudi Harry Anderson
Mu mulambu wa bupikudi wa Yezu Kilisto, wakaditeka pa muaba wetu, wakakenga ne wakafuta dibanza dia tshibawu bua mibi yetu (tangila 3 Nefi 27:16–20). Dilongolola dia Nzambi didi dipesha Yezu Kilisto bukola bua kutulombela—bua kuimana pankatshi petu ne pa bululama (tangila Mosiya 15:9). Kupitshila ku mulambu wa bupikudi wa Yezu, Yeye udi mua kulomba ku manema enda a lusa patudi tuteka mu tshienzedi ditabuija ku dikudimuna mutshima (tangila Moloni 7:27; Dilongesha ne Bipungidi 45:3–5). “Nunku lusa ludi mua kukumbaja malomba a bululama, ne kuela [tuetu] mu maboko a bukubi” (Alma 34:16).
Amu kupitshila ku dipa dia Bupikudi bua Mupandishi ne ku dikudimuna mutshima dietu, tudi mua kupingana bua kusomba ne Nzambi. Patudi tukudimuna mutshima, tudi tubuikidibua ne tutokeshibua mu nyuma. Tudi tupepeshibua ku bujitu bua dipila dia mibi yetu. Anyima yetu ivua mitapika idi yondopibua. Tudi buwujibua ne disanka (tangila Alama 36:24).
Nansha tuetu katuyi bakana ne bapona kabidi, kudi ngasa wa bungi, dinanga ne lusa mu Yezu Kilisto mudi kamuyi dibula, dipanga anyi bubi mu tuetu. Misangu yonsu Nzambi udi pabuipi ne kuteleja dinanga dienda, patudi tupingana kudiye ne tukudimuna mutshima (tangila Luka 15:11–32). Kakuena tshintu nansha muntu “udi mua kutupandulula ku dinanga dia Nzambi, didi mu Kilisto Mukalenga wetu” (Lomo 8:39).
Yezu Kilisto Wakambula pa Mutu penda Makenga, Ntatu ne Mateketa Bietu
Mu mulambu wenda wa bupikudi, Yezu Kilisto wakambula pa mutu penda makenga, ntatu, ne mateketa bietu. Bua bualu ebu, mmumanya “bilondeshila ku musunyi mushindu wa kuambuluisha bantu benda bilondeshila ku mateketa abu” (Alama 7:12; tangila kabidi verse 11). Udi utubikila, “Luayi kundi,”ne patudi tutshienza, udi utupesha dikisha, ditekemena, dikankamana, tshimuenenu ne londopu (Matayo 11:28; tangila kabidi kanungu 29–30).
Patudi tueyemena kudi Yezu Kilisto ne ku bupikudi buenda, yeya udi mua kutuambuluisha bua kunanukila mu makenga, masama, ne busami bietu. Tudi mua kûjibua ne disanka, ditalala, ne dikumbula. Bionsu bidi kabiyi biakana mu moyo bidi mua kuanyishibua kupitshila ku Bupikudi bua Yezu Kilisto.
Gospel Topics:[Biena bualu bia Lumu luimpa]: “Jesus Christ[Yezu Kilisto],” “Atonement of Jesus Christ [Bupikudi bua Yezu Kilisto],” “Grace [Ngâsa]”
Image
dîku dikamona lukita
Muaba wa Nyuma
Bantu ba bungi badi badikonka, “Tshidi tshifika kunyima kua pa ndi mfua tshinyi?” Dilongolola dia lupandu didi difila mandamuna a mushinga ku lukonku elu.
Lufu ludi tshitupa tshia “dilongolola dia lusa” dia Nzambi buetu (2 Nefi 9:6). Katshiena ndekelu wa buikadi buetu, lufu ludi tshidia tshidi tshilonda mu diya dia kumpala dietu mu tshiendelela. Bua kulua bu Nzambi, tudi ne tshia kumanya lufu ne pashisha kupeta mibidi miakana ne mibika ku lufu.
Padi mubidi wetu wa mupimbu ufua, nyuma wetu udi utungunuka ne kuikala ne moyo mu muaba wa nyuma. Etshi tshidi dikala dia tshitupa tshipi dia dilonga ne didilongolola kumpala kua Dibika ku Lufu ne Dilumbuluisha dia Ndekelu. Dimanya dietu dia ku moyo wa tshifuaka didi dishala netu.
Mu muaba wa nyuma, bantu badi bitaba ne bateka lumu luimpa lua Yezu Kilisto mu tshienzedi “badi bakidibua mu ngikadilu wa disanka, udi ubikidibua ne mpaladiso” (Alama 40:12). Bana bateketa badi bakidibua pabu mu mpaladiso pabidu bafua.
Nyuma mu mpaladiso neikala mu ditalala ku ntatu ne tunyinganyinga biabu. Nebatungunuka ne dikola diabu dia mu nyuma, benza mudimu wa Nzambi ne batangila bakuabu. Nebalongesha lumu luimpa kudi aba bavua kabayi balupeta mu moyo wabu wa tshifuaka (tangila Dilongesha ne Bipungidi 138:32–37, 57–59).
Mu muaba wa nyuma, bantu bavua kabayi bapeta lumu luimpa pa buloba, anyi bavua kabayi basungula bua kulonda mikenji, ne bamanya mikalu kampanda (tangila Dilongesha ne Bipungidi 138:6–37; Alama 40:6–14). Nansha nanku, bualu Nzambi udi mululama ne wa lusa, nebikala ne mushindu wa kulongeshibua lumu luimpa lua Yezu Kilisto. Padibu baluitaba ne bakudimuna mutshima, nebasungibua ku mibi yabu (tangila Dilongesha ne Bipungidi 138:58; tangila kabidi 138:31–35; 128:22). Nebikala bakidibua mu ditalala dia mu mpaladiso. Ndekelu nebapeta muaba mu bukalenga bua butumbi bushindamena pa masungula avuabu benza pavuabu mu tshifuaka ne mu muaba wa nyuma.
Tudi tushala mu muaba wa nyuma tô ne patudi tubika ku lufu.
Dilongolola dia Nzambi didi ditupepejila bua tukola ne tupeta moyo wa tshiendelela. Kunyima kua disomba dietu mu muaba wa nyuma, Dibika ku Lufu didi tshitupa tshidi tshilonda mu dikola edi.
Dibika ku Lufu tshidi disangisha dia mubidi wetu ne nyuma. Yonsu wa kutudi neabika ku lufu. Etshi tshidi tshipepeja kudi Bupikudi ne Kubika ku Lufu kua Mupandishi. (Tangila Alama 11:42–44.)
Patudi tubika ku lufu, netuikala muntu yonsu ne mubidi wa mupimbu mujalama, kawuyi ntatu ne mabedi. Katuakufua to, netuikala ne moyo bua kashidi.
Lupandu
Bualu netubika ku lufu, netusungidibua ku lufu lua mubidi wa mupimbu. Dipa edi ndifidibua kutudi kupitshila ku ngâsa wa Yezu Kilisto.
Tudi kabidi mua kusungidibua ku bipeta bidi dîyi dia bululama dilomba bua mibi yetu. Dipa edi didi dipepeja kupitshila ku makumbanyinyi ne lusa bia Yezu Kilisto patudi tukudimuna mutshima. (Tangila Alama 42:13–15, 21–25.)
Dizanjikibua
Dizanjikibua, anyi moyo wa tshiendelela, tshidi buikadi bua diakalenga ne butumbi mu bukalenga bua selestiya. Dizanjikibua didi dipa didi ne mukenji. Mulombodi Mukulu Russell M. Nelson wakalongesha ne, “mikenji ya dikumbana eyi idi yangata ditabuija mu Mukalenga, kukudimuna mutshima, kutambula, kupeta Nyuma wa Tshijila, ne kushala mulamata ku milulu ne bipungidi bia ntempelo (“Salvation and Exaltation,” Liahona, May 2008, 9).
Dizanjikibua didi diumvuija kuikala ne moyo pamua ne Nzambi bua kashidi mu mêku. Tshidi kumanya Nzambi ne Yezu Kilisto, kulua bu bobu ne kuikala ne moyo udibu nawu.
Biakumanya: Pawudi ulongesha pa makalenga a butumbi bua musangu wa kumpala, longesha mu tshipidi tshia tshipuekela bilondeshila majinga ne lumvu bia muntu.
Patudi tubika ku lufu, Yezu Kilisto neikala mulumbuluishi wetu mululama ne wa lusa. Pakumusha bantu bakesa, yonsu wa kutudi neapeta muaba mu bukalenga bua butumbi. Nansha tuetu bonsu babika ku lufu, katuakupeta butumbi bua tshiendelela bua momumua to (tangila Dilongesha ne Bipungidi 88:22–24, 29–34; 130:20–21; 132:5).
Bantu bavua kabayi ne mushindu wa kumvua ne kutumikila mikenji ya Nzambi mu bujima buayi mu moyo wa tshifuaka nebapeshibua mushindu ewu mu muaba wa nyuma. Yezu nealumbuluisha muntu yonsu bilondeshila ditabuija dietu, midimu, majinga, ne dikudimuna mutshima mu tshifuaka ne mu muaba wa nyuma (tangila Dilongesha ne Bipungidi 138:32–34, 57–59).
Mifundu idi ilongesha makalenga a butumbi bua selestiya, terestiya ne bua telestiya. Yonsu wa kudibu udi dileja dia dinanga dia Nzambi, bululama ne lusa.
Aba badi benzela ditabuija mu Kilisto, bakudimuna mutshima bua mibi yabu, bapeta milulu ya lumu luimpa, banemeka bipungidi, bapeta Nyuma wa Tshijila, ne bananukila tô ne ku ndekelu nebapandishibua mu bukalenga bua selestiya. Bukalenga ebu nabuangata kabidi bantu bavua kabayi ne mushindu wa kupeta lumu luimpa mu moyo wabu wa tshifuaka kadi “bavua bua kulupeta ne moyo wabu mujima” ne benza nunku mu muaba wa nyuma (Dilongesha ne Bipungidi 137:8; tangila kabidi kanungu 7). Bana badi bafua kumpala kua tshikondu tshia kudiambuila bujitu (bidimu muanda mukula) nebapandishibua pabu mu bukalenga bua selestiya (tangila Dilongesha ne Bipungidi 137:10).
Bantu badi basomba nsombelu wa kunemekibua “kabayi bapeta bujadiki bua Yezu Kilisto mu musunyi, kadi bawupeta pashisha” nebapeta muaba mu bukalenga bua terestiya (Dilongesha ne Bipungidi 76:74). Bidi kabidi bia momumua bua aba badi kabayi ne bukitu mu dijadika diabu dia Yezu. Bukalenga ebu budi bufuanyikijibua ne butumbi bua ngondu. (Tangila Dilongesha ne Bipungidi 76:71–80.)
Aba bavua batungunuka mu mibi yabu ne kabayi bakudimuna mutshima mu moyo ewu anyi kabayi bitaba lumu luimpa lua Yezu Kilisto mu muaba wa nyuma nebapeta difutu mu bukalenga bua telestiya. Bukalenga ebu budi bufuanyikijibua ne butumbi bua mitoto. (Tangila Dilongesha ne Bipungidi 76:81–86.)
Ndejelu udi ulonda udi tshilejilu tshipepela tshia tshiwudi mua kulongesha muntu pawudi muikala amu ne diba dikesa. Pawudi wenzela ndongamu ewu, sungula nshindamenu umua anyi ya bungi bua kulongesha. Tshishimikidi tshia dilongesha dia nshindamenu yonsu ntshifidibua kumpala mu dilongesha.
Pawudi ulongesha, ela nkonku ne teleja. Tuala mabikila ikala mua kuambuluisha bantu bua balonga mushindu udibu mua kusemena pabuipi ne Nzambi. Dibikila dimua dia mushinga didi bua muntu atutakena neba kabidi. Bula bua dilongesha budi bulondeshila nkonku iwudi wela ne ntema iwenza.
Tshiwudi Mua Kulongesha Bantu mu Minuta 3–10
Tudi bonsu bana ba nyuma ba Nzambi. Tudi bidimba bia dîku dienda. Udi mutumanya ne munanga yonsu wa kutudi.
Nzambi wakafila dilongolola bua disanka dietu ne diya kumpala mu moyo ewu ne mu tshiendelela.
Mu dilongolola dia Nzambi, tuakajinga bua kulua pa buloba bua kupeta mibidi ya mipimbu, kulonga ne kukola.
Yezu Kilisto udi munkatshi mua dilongolola dia Nzambi. Udi utupepejilatshi bua tuikala ne moyo wa tshiendelela.
Ku buludiki bua Nzambi, Yezu wakafuka buloba.
Mamanya etu pa buloba adi bua kutuambuluisha bua tudilongolola bua kupingana kumpala kua Nzambi.
Yonsu wa kutudi udi wenza bubi, ne yonsu wa kutudi neafua. Bualu Nzambi udi mutunanga, uvua mutuma, Muanenda, Yezu Kilisto, pa buloba bua kutusungila ku bubi ne ku lufu.
Bionsu bidi kabiyi biakana mu moyo bidi mua kulua bimpa kupitshila ku Bupikudi bua Yezu Kilisto.
Padi mubidi wetu wa mupimbu ufua, nyuma wetu udi utungunuka ne kuikala ne moyo. Ku ndekelu netubika bonsu ku lufu. Tshidi tshiumvuija ne nyuma ne mubidi bia muntu yonsu nebisangishibua, ne yonsu wa kutudi neikala ne moyo bua kashidi mu mubidi muakana ne mubishibua ku lufu.
Patudi tubika ku lufu, Yezu Kilisto neikala mulumbuluishi wetu. Pa kumbusha bantu bakesa, bana bonsu ba Nzambi nebapeta muaba mu bukalenga bua butumbi. Tudi mua kupingana bua kusomba kumpala kua Nzambi patuikala ne lulamatu.