kuikala ne ditabuija mu Yezu Kilisto kudi kumvuija tshinyi? Mushindu kayi mudi kuikala ne ditabuija muyeya kubenesha moyo wanyi?
Kukudimuna mutshima kudi kumvuija tshinyi?
Mushindu kayi undi mua kumvua ditalala dia Nzambi ne dibuikidila panyima pa mema muenza masungula mabi?
Kipatshila ka ditambula tshinyi?
Dipa dia Nyuma wa Tshijila tshinyi?
Kunanukila tô ne ku ndekelu kudi kumvuija tshinyi?
Lumu luimpa lua Yezu Kilisto ludi mushindu utudi tuya kudi Kilisto. Bidi bitamba kupela nansha muana muteketa mua kubiumvua. Dilongesha edi didi dishindamena pa lumu luimpa ne dilongesha dia Kilisto, bumudi ditabuija mu Yezu Kilisto, dikudimuna mutshima, ditambula, dipa dia Nyuma wa Tshijila, ne kunanukila tô ne kundekelu. Didi dishidamina kabidi pa mushindu udi lumu luimpa lubenesha bana bonsu ba Nzambi.
Muaku Lumu luimpa udi umvuija “mikenji milenga.” Lumu luimpa lua Yezu Kilisto ludi mikenji milenga bualu idi ifila dilongesha—bulelela bua tshiedelela—tudi dijinga ne kulua kudiye ne kuikala bapandishibua (tangila 1 Nefi 15:14). Lumu luimpa ludi lutulongesha mushindu wa kusomba bimpa, kusomba kua kipatshila. Mikenji milenga ya lumu luimpa idi itupesha mushindu utudi mua kuikala babuikidibua ku mibi, kulua bajidibua, ne kupingana kumpala kua Nzambi.
Muwudi udilongolola bua kulongesha, mu kusambila anyisha ngikadilu wa muntu yonsu ne majinga a nyuma. Pangadika tshinyi tshikila tshia mushinga mukole tshia kulongesha. Dilongola bua kumvuija miaku idi bantu kabayi ne mushindu wa kumvua. Enza ndongamu kupitshila ku bungi bua meba awikala nawu, vuluka bua kuenza malongesha mu tshikosu.
Sungula mifundu ya kuenzela pawudi ulongesha. “Tshishimikidi tshia Dilongesha” Tshitupa dia dilongesha didi ne mifundu miambuluishI ya bungi.
Ela meji pa nkonku ya kuebeja pawudi ulongesha. Longolola mabikila adi atantshisha ne adi mua kukamika muntu yonsu bua kuangatayi dipangadika.
Umvuija ne Nzambi mulaya mabenesha, ne tangalaja bujadiki bueba bua tshidi ulongesha.
Image
bena bukenji balongesha dîku
Tshinyi Tshidi Mua Kulongesha Bantu mu Minita 15-25
Sungula dilongesha dimua anyi a bungi adi alonda â bua kulongesha. Tshishimikidi tshia dilongesha tshia nshindamenu yonso tshidi tshifiidibua panyima pa ndongamu ewu.
Bukenji bua Bunzambi bua Yezu Kilisto
Nzambi wa katuma Muamenda Munangibua, Yezu Kilisto pa buloba bua kutusungila ku bubi ne ku lufu.
Kupitshila ku mulambu wa bupikudi wa Yezu Kilisto, tudi mua kutokeshibua ku mibi yetu ne bajidila patudi tukudimuna mutshima.
Panyima pa Yezu mupopela pa mutshi mutshiamakana, Uvua mukiba ku lufu. Bualu bua kubika kuenda ku lufu, netubika bonsu ku lufu patudi tufua. Etshi tshidi tshiumvuija ne nyuma ne mubidi bia muntu yonsu nebisangishibua kabidi, muntu yonsu ne ikala ne moyo bua tshiendelela mu mubidi muakana, ne mubika ku lufu.
Ditabuija mu Yezu Kilisto
Ditabuija didi nshindamenu wa kumpala wa Lumu Luimpa lua Yezu Kilisto.
Ditabuija mu Kilisto didi ne, kuikala mutuishibua ne udi Muana wa Nzambi kumueyemena bu Mupandishi ne Musungidi wetu.
Ditabuija mu Yezu Kilisto didi nshindamenu wa tshienzeji ne bukola.
Tudi tukolesha ditabuija dietu mu kusambila, kulonga mifundu ne kutumikila mikenji.
Dikudimuna Mutshima
Ditabuija mu Kilisto didi ditulombola kudi kudimuna mutshima. Dikudimuna mutshima didi mushindu wa kupingana kudi Nzambi ne kulekela mibi. Patudi tukudimuna mutshima, bienzedi bietu, majinga, ne meji bidi bikudimuka bua kutamba kuikala mu bobumua ne disua dia Nzambi.
Patudi tukudimuna mutshima ne bulelela, Nzambi udi utubuikidila. Dibuikidila didi dikubana bualu Yezu Kilisto mutupikula ku mibi yetu.
Patudi tukudimuna mutshima, tudi tumvua ditalala bu dipîla dietu ne kanyinganyinga bidi biondopibua.
Dikudimuna Mutshima didi ngezelu wa kashidi wa moyo. Nzambi udi utuakidila patudi tukudimuna mutshima misangu yonsu. Kakutulekela nansha.
Ditambula: Tshipungidi Tshietu tshia Kumpala ne Nzambi
Ditambula didi mushindu utudi tubuela wa kumpala mu tshipungidi tshietu tshia bulunda ne Nzambi.
Ditambula didi ne bitupa bibidi: ditambula dia mâyi ne dia Nyuma. Patudi tutambuishibua ne tujadikibua, tudi batokeshibua ku mibi yetu, ne bidi bitupesha luendu lupia-lupia.
Tudi batambuishibua ku dinyishibua, bua kulonda tshilejelu tshia Yezu.
Bana kabena batambuishibua to anu padibu bakumbaja bidimu muanda mukulu. Bana badi bafua muinshi mua tshidimu ebi badi basungidibua kupitshila ku Bupikudi bua Yezu Kilisto.
Tudi tuabanyangana biadidia bia tshijila lumingu lonsu mu tshivulukilu tshia mulambu wa Yezu ne tuenza kabidi bipungidi bietu ne Nzambi.
Dipa dia Nyuma wa Tshijila
Nyuma wa Tshijila udi tshidimba tshisatu tshia Bunzambi.
Kunyima kua tuetu batambushibua, tudi tupeta dipa dia Nyuma wa Tshijila kupitshila ku mululu wa dijadikibua.
Patudi tupeta dipa dia Nyuma wa Tshijila, tudi mua kupeta bulunda buenda kupitshila ku didituala dietu teutu bikala ne lulamatu.
Nyuma wa Tshijila udi utujidila, utulombola, utusamba, ne utuambuluisha bua kumanya bulelela.
Kunanukila tô ne Kundekelu
Kunanukila kudi ditungunuka kuibidija ditabuija mu Kilisto matuku onsu. Tudi tutungunuka kulama bipungidi bietu ne Nzambi, tukudimuna mutshima, tukeba bulunda bua Nyuma wa Tshijila, ne tuabanyangana biakudia bia Tshijila.
Patudi tukeba ne lulamatu bua kulonda Yezu Kilisto, Nzambi udi utulaya ne netupeta moyo wa tshiedelela.
Lumu luimpa lua Yezu Kilisto ludi Lubenesha Bana Bonsu ba Nzambi
Diteka lumu luimpa mu tshienzedi didi dishindika disanka dietu, ditupa meji a nyuma bua malu etu, ne ditantshisha malanda etu.
Tudi batamba kuikala basangala—bubidi pa nkaya ne mu dîku—patudi ne moyo bua malongesha a Yezu Kilisto.
Kupitshila ku Lumu luimpa lua Yezu Kilisto, mêku adi mabeneshibua mu moyo emu ne adi mua kuikala masangishibua bua tshiendelela ne bikala ne moyo kumpala kua Nzambi.
Nkonku Iwudi Mua Kukonkesha Bantu
Nkonku idi ilonda eyi idi bilejelu biwudi mua kukonka bantu. Nkonku eyi idi mua kukuambuluisha bua kuikala ne miyuki mijalama bua kumvua majinga a bantu ne lumuanu luabu.
Ntshiyi tshiuwudi mumanya pa Yezu?
Ntshiyi tshidi kuikala ne ditabuija mu Yezu Kilisto tshiumvuija bueba?
Ntshiyi tshiwudi mua kuenza bua kukudimuka mu moyo weba?
Ntshiyi tshidi ngumvuilu weba wa dikudimuna mutshima?
Tudi mua kuangata diba bua dikumbula dietu dialua anyi?
Tshishimikidi tshia Dilongesha
Tshitupa etshi tshidi tshifila dilongesha ne mifundu iwudi bua kulonga bua kukolesha dimanya dieba ne bujadiki bua lumu luimpa ne kukuambuluisha bua kulongesha.
Image
Batumibua Dikumi ne Babidi kudi Yezu, Kudi Walter Rane
Bukenji bua Bunzambi bua Yezu Kilisto
Tatu wa mu Dîulu wakatuma Muanenda Munangibua, Yezu Kilisto, pa buloba bua kubikumbaja bua bonsu buetu tuibidila ne disanka mu buloba emu ne moyo wa tshiendelela mu buloba bualua. “Etshi tshidi lumu luimpa, lumu lua disanga, … ludi ne[Yezu Kilisto] mulua pa buloba … bua kuambula mibi ya ba pa buloba, ne kujidila buloba, ne kubatokesha ku bubi bonsu; bua kupitshila kudiye bonsu basungidibua” (Dilongesha ne Bipungidi 76:40–42).
Bu bantu ba tshifuaka, tudi tuenza mibi bonsu, ne tuetu bonsu ne tufua. Bubi ne lufu bidi mua kutupangisha bua kupeta moyo wa tshiendelela ne Nzambi amu tuetu ne Musungidi (tangila 2 Nefi 9). Kumpala kua buloba kufukibua, Tatu wa mu Diûlu wakasungula Yezu Kilisto bua kutusungila. Mu dileja dinena dia dinanga, Yezu wakalua pa buloba bua kukumbaja bukenji buenda bua bunzambi. Wakenza bua bikumbana buetu bua tuikala basungidibua ku mibi yetu, ne wakatujadikila ne tuikala bonsu babishibua ku lufu panyima pa lufu.
Yezu ki muenza mibi mu matuku enda a moyo. Kudekelu kua disadila dienda mu mubidi wa tshifuaka, wakambula mibi yetu ku dikenga dienda mu Getesemane pa kamupopelabo ku mutshi mutshiamakana (tangila 1 Nefi11:33). Dikenga dia Yezu divua dikola ne divua “dimujakeja bua disâma, ne mashi avua apatuka mu kasosu konsu (Dilongesha ne Bipungidi 19:18). Kunyima kua dimupopela ku mutshi mutshiamakana, Yezu wakabika ku lufu, kupeta butshimunyi pa lufu. Pamua, Mianda yonsu eyi idi Bupikudi bua Yezu Kilisto.
Mibi yetu idi ituenza bakoya mu nyuma, ne “tshintu tshikoya katshiena mua kusomba ne Nzambi” (1 Nefi 10:21). Mudikumbaja, mukenji wa bululama udi ulomba bipeta bia mibi yetu.
Mulambu wa bupikudi wa Yezu udi utupesha mushindu wakulua batokeshibua ku mibi ne bajidibua patudi tukudimuna mutshima. Udi kabidi ufila mushindu wa kukumbaja milombu ya bululama (tangila Alama 42:15, 23–24). Mupandishi wakamba ne, “Mema… ndi mukenga bintu ebi bua bonsu, bua bobu kabakengi nansha padibu bakudimuna mutshima; kadi bobo kabayi bakudimuna mutshima badi ne mua kukenga bu Mema” (Dilongesha ne Bipungidi 19:16–17). Bu kabuyi bua Yezu Kilisto, bubi buvua bukupula ditekemena dia buikadi bulualua ne Tatu wa mu Diûlu.
Mu kudifila kuenda bu mulambu buetu, Yezu kena mumbusha bujitu buetu nkayetu to. Tudi dijinga ne kuikala ne ditabuija muyeya, kukudimuna mutshima, ne kudienzeja bua kutumikila mikenji yenda. Patudi tukudimuna mutshima, Yezu neatulombela manema eda a lusa a kudi Tatuenda (tangila Moloni 7:27–28). Kupitshila ku dilomba dia Mupandishi, Tatu wa mu Diûlu udi utubuikidila, ne utupepeja ku bujitu ne dipîla bua mibi yetu (tangila Mosiya 15:7–9). Tudi batokeshibua mu nyuma ne bikala bakadila kumpala kua Nzambi.
Bukenji bua bunzambi bua Yezu buvua kabidi bua kutusungila ku lufu. Bualu bua uvua mubika ku lufu, tuetu bonsu ne tuikala babishibua ku lufu panyima pa tuetu bafua. Etshi tshidi tshiumvuija ne nyuma ne mubidi bia muntu yonsu ne bikala bisangishibua, ne umua yonso wetu ne ikala ne moyo bua tshiendelela mu mubidi wa buakana, mubika ku lufu. Bu kabuyi bua Yezu Kilisto, lufu luvua lukupula ditekemena dia buikadi bulualua ne Tatu wa mu Diûlu.
Nshindamenu wa kumpala wa Lumu luimpa udi ditabuija mu Mukalenga Yezu Kilisto. Ditabuija didi tshishimikidi tshia nshindamenu yonsu mikuabo ya lumu luimpa.
Ditabuija mu Kilisto didi kuikala mutuishibua ne udi Muana Umuepela Munangibua wa Nzambi. Didi kueyemena muyeya bu Mupandishi ne Musungidi wetu—ne Udi njila wetu umua wa kupingana kumpala kua Nzambi (tangila Bienzedi 4:10–12; Mosiya3:17; 4:6–8). Tudi babikidibua bua kuibidija “ditabuija didi kadiyi dinyungana kudiye, beyemena monsu ku makumbanyi a udi ne bukitu bua kupandisha” (2 Nefi 31:19).
Ditabuija mu Yezu Kilisto didi kuitabuija ne wakakenga bua mibi yetu mu mulambu wenda wa bupikudi. Kupitshila ku mulambu wenda, tudi mua kuikala batokeshibua ne basungidibua patudi tukudimuna mutshima. Ditokeshibua edi didi dituambuluisha bua kupeta ditalala ne ditekemena mu moyo emu. Didi kabidi dianyisha bua tuetu kupeta tshiwidi tshia disanka panyima pa tuetu bafua.
Ditabuija mu Yezu Kilisto didi kumueyemena ne kupitshila kuyeya, netuikala bonsu babika ku lufu panyima pa tuetu bafua. Ditabuija edi didi mua kututua mpanda ne kutusamba mu tshikondo tshia dijimija. Kanyinganyinga ka lufu ne bakumbusha kudi milayi ya Dibika ku lufu.
Ditabuija mu Yezu Kilisto didi ne kuitabuija ne kueyemena ne uvuamuangata pa muntu penda ntatu ne mateketa bietu (tangila Yeshaya 53:3–5). Mumanya ku dibidila dienda mushindu wa kututua mpanda ne lusa mu ntatu mikola ya mu moyo (tangila Alama 7:11–12; Dilongesha ne Bipungidi 122:8). Patudi tuibidija ditabuija, Udi utuambuluisha bua tuetu kusesa kumpala mu malu makola.
Kupitshila ku ditabuija dietu muyeya, Yezu udi mua kutondapa mu mubidi ne mu nyuma. Udi pabuipi bua kutuambuluisha patudi tuvuluka dibikila dienda “tangila kundi mu meji onsu; kanuedi mpata, kanutshinyi to ”(Dilongesha ne Bipungid 6:38).
Nshindamenu wa Tshienzedi ne Bukola
Ditabuija mu Kilisto didi ditutuma ku tshienzedi. Tudi tuleja ditabuija dietu mu ditumikila dia mikenji ne dienza dia malu mimpa matuku onsu. Tudi tukudimuna mutshima ku mibi yetu. Tudi ne lulamatu kudiye Tudi tuditatshisha bua kulua bu yeya.
Patudi tuibidija ditabuija, tudi mua kupeta dibidila dia bukola bua nzambi nsombelu wetu wa dituku dionsu. Nealeja buimpa bua didienzeja dietu. Neatuambuluisha bua kukola ne kutamba mateya.
Dikolesha Ditabuija Dietu
Muambi Alama wakalongesha ne kuibaka ditabuija kudi mua kubanga ne “dijinga dia kuitabuija” (Alama 32:27). Kadi, bua ditabuija dietu mu Yezu Kilisto kusasa, tudi dijinga ne kudidisha mu kulonga meyi enda, kuteka malongesha enda mu tshienzedi, ne kutumikila mikenji yenda. Alama wakalongesha patudi ne ditukija, tunanukila mu kudisha dîyi dia Nzambi mu moyo wetu, “nediela miji; [ne dilua bu] mutshi udi ukola tô ne ku moyo wa kashidi ”—kitshidi tshikolesha ditabuija dietu (Alama 32:41; tangila kanungu 26–43).
Dikudimuna Mutshima didi nshindamenu muibidi wa lumu luimpa. Ditabuija mu Yezu Kilisto ne dinanga dietu buenda bidi bitulombola ku dikudimuna mutshima (tangila Helamana 14:13). Dikudimuna mutshima didi mushindu wa kupingana kudi Nzambi ne kulekela mibi. Patudi tukudimuana mutshima, bienzedi bietu, majinga, ne meji bidi bikudimuka bua kuikala mu bobumua ne disua dia Nzambi. Dibuikidila dia bubi didi dikumbajibua kupitshila kudi Yezu Kilisto ne mulambu wenda wa bupikudi.
Dikudimuna mutshima didi ditamba kutamba kuikala ne dijinga dia kukudimuna ngikadilu anyi kutantamena buteketa. Dikudimuna mutshima didi kupingana ne bulelela kudi Kilisto, udi mutupesha bukola bua kuibidila “dishintuluka dikola” mu moyo wetu (Alama 5:12–14). Patudi tuibidila pa dishintuluka dia moyo, tudi tuledibua tshiakabidi mu nyuma (tangila Mosiya 27:24–26).
Kupitshila ku dikudimuna mutshima, tudi tutantshisha lumonu lupia-lupia lua Nzambi, luetu nkayetu, ne lua buloba bujima. Tudi tumvua dinanga dipiadipia dia Nzambi buetu bu bana benda—ne dinanga dia Mupandishi buetu. Tshipolu tshia kutonda tshidi tshimua tshia mabenesha manena adi Nzambi mutupa kupitshila ku Muanenda.
Bitupa bia Dikudimuna Mutshima
Patudi tukudimuna mutshima, tudi tuitaba mibi yetu ne tumvua kanyinganyinga kalelela. Tudi tutonda mibi yetu kudi Nzambi ne tulomba dibuikidibua diende. Tudi kabidi tutonda mibi ya mikola kudi Balombodi banyisha ba Ekelezia, badi bua kututua mpanda patudi tukudimuna mutshima. Tudi tuenza mushindu onsu wetu bua kupingaja, tshidi tshimvuija kuteta bua kulongola malu adi bienzedi bietu mua kala bienza. Dikudimuna musthima dilelela didi dimueneka mu bienzedi biakana mu tshikondo tshilepa.
Dikudimuna mutshima tshidi ngikadilu wa matuku onsu etu a moyo. “Bonsu mbenza mibi, ne bapangila butumbi bua Nzambi” (Lomo 3:23). Tudi ne mua kutungunuka dikudimuna mutshima, kumvuluka ne tudi “mua kuenza bintu bionsu kupitshila ku Kilisto udi utukolesha” (Filipoi 4:13 Mukalenga wa katujadikila ne “misangu yonsu idi bantu banyi bakudimuna mutshima neababuikidila mapanga abu.” (Mosiya 26:30).
Patudi tukudimuna mutshima, dipîla dietu ne kanyinganyinga bidi biondopibua mu matuku. Tudi tumvua buenzeji bua Nyuma mu mishindu ya bungi. Dijinga dietu dia kulonda Nzambi didiunda bikola.
Image
Mulombodi Mukulu Russell M. Nelson
Bantu ba bungi badi bamuana dikudimuna mutshima bu dinyoka—tshintu tshia kuepuka. …. Kadi dimvua edi dia kuikala mudikenga didi difuma kudi Satana. Udi uteta kutupangisha bua tuetu kutangila kudi Yezu Kilisto, udi muimana ne bianza biolola, mutekemena ne mujinga bua kutondopa, kutubuikidila, kututokesha, kukolesha, kutukezula, ne kutujidila” (Russell M. Nelson, “We Can Do Better and Be Better [Tudi mua Kuenza Bimpa ne Kulua Bimpa],” Liahona, Ngondo Muitanu 2019, 67).
Ditambula: Tshipungidi Tshietu Tshiakumpala ne Nzambi
Ditabuija mu Yezu Kilisto ne dikudimuna mutshima bidi bitulongolola bua milulu ya ditambula ne dijadikibua. Ditambula didi mululu wa kumapala wa lupandu bua lumu luimpa lua Yezu Kilisto. Patudi tupeta mululu ewu wa disanka ne ditekemena tudi tuenza tshipungidi tshietu tshia kumpala ne Nzambi.
Mululu udi tshienzedi tshia tshijila anyi mushinga mukumbajibua ku bukokeshi bua buakuidi. Milulu mikuabu, bumudi ditambula, idi ne mushinga bua lupandu luetu.
Kupitshila ku milulu, tudi tuenza tshipungidi ne Nzambi. Bipungidi ebi bidi malaya a tshijila pankatshi petu ne Nzambi. Udi mutulaya bua kutubenesha patudi balama milayi yetu nenda. Tudi mua kuikala ne dipangadika dikola bua kulama milayi yetu ne Nzambi.
Nzambi wakafila milulu ne bipungidi bua kutuambuluisha bua tuetu kuya kudiye ne kupeta moyo wa tshiendelela. Patudi tupeta milulu ya buakuidi ne tulama bipungidi bisangisha, tudi mua kuibidila ne “bua bukola bua dinemeka dia Nzambi” mu matuku a moyo (Dilongesha ne Bipungidi 84:20).
Tshipungidi tshia Ditambula
Mupandishi wa kalongesha ne ditambula didi dia mushinga bua tuetu kubuela mu bukalenga bua mu diûlu (tangila Yona 3:5). Tshidi kabidi ne mushinga bua tuetu kulua bidimba bia Ekelezia wa Yezu Kilisto. Mupandishi wa kaleja tshilejelu mu kuikala mutambuishibua (tangila Matayo 3:13–17).
Patudi tutambuishibua ne tulama tshipungidi tshietu, Nzambi udi ulaya dibuikidila dia mibi yetu (tangila Bienzedi 22:16; 3 Nefi 12:1–2). Dibenesha dinena edi didi dikubana kupitshila ku mulambu wa bupikudi wa Yezu Kilisto, udi “mutunanga, ne ututokesha ku mibi yetu mu mashi enda” (Buakabuluibua 1:5). Nzambi mutulaya kabidi bua kutubenesha ne bulunda bua Nyuma wa tshijila mua tuetu tuikala bajidila, baludikibua, ne basambibua.
Mutshidi tshitutangila mu tshipungidi tshia Ditambula, tudi tujadika ne tudi tuangata pa mutu wetu dina dia Yezu Kilisto. Tudi kabidi tulaya bua kumuvuluka misangu yonsu ne kulama mikenji yenda. Tudi tulaya bua kunanga ne kusadila bakuabu, “kudila ne badi badila; … ne kusamba badi ne dijinga dia disamba, ne kuikala bajadiki ba Nzambi diba dionsu, mu bintu bionsu, ne mu miaba yonsu” (Mosiya 18:9; tangila kanungu 8–10, 13). Tudi tuleja dipangadika dia kusadila Yezu Kilisto tô ne ku ndekelu kua matuku etu a moyo (tangila Dilongesha ne Bipungidi 20:8–9); Mosiya 2:17).
Mapangadika a Bipungidi bietu bisangisha pamua ne ditambula bidi bujitu bunena. Adi kabidi ne meji a nyuma ne disanga. Bidi bifuka bulunda bua pabuawu pangatshi petu ne Tatu wa mu Diûlu kudibu Udi utuleja dinanga tshiendelela.
Ditambula ku Dinyishibua
Yezu wakalongesha ne tudi dijinga ne kuikala batambiushibua ku dinyishibua bua dilekedibua dia mibi yetu (tangila Dilongesha ne Bipungidi 20:72–74). Ditambula ku dinyishibua didi tshimanyishilu tshia lufu, dijika, ne Dibika dia ku Lufu dia Yezu Kilisto (tangila Lomo 6:3–6).
Ditambula ku dinyishibua didi tshimanyishilu tshikola buetu nkayetu. Tshidi tshileja lufu lua moyo wetu wakala, dijikibua dia moyo awu, ne dilubuluka dietu mu diledibua kabidi munyuma. Patudi tutambuishibua, tudi tubanga luendu lua diledibua tshiakabidi ne kulua bana baluma ne bakaji ba nyuma ba Kilisto (tangila Mosiya 5:7–8; Lomo 8:14–17
Bana
Bana kabena batambuishibua tô ne padibu bakumbaja bidimu bia kuandamuna ku bienzedi biabu, bidi muanda mukulu (tangila Dilongesha ne Bipungidi 68:27. Bana badi bafua muishi mua bidimu ebi badi bapandishibua kupitshila ku bupikudi bua Yezu Kilisto (tangila Moloni 8:4–24); Dilongesha ne Bipungidi 137:10). Kumpala kua bana kutambuishibua, badi ne mua kuikala balongeshibua lumu luimpa bua bikala badilongolola bua tshitupa etshi tshia mushinga bua matuku abu a moyo bua kuenza tshipungidi ne Nzambi.
Biakudia bia Tshijila
Tatu wetu wa mu Diûlu musua bua tuikala ne lulamatu ku bipungidi bitudi benza nenda. Bua kutuambuluisha bua kuenza nunku, Udi utulomba bua kutuilangana misangu yonsu bua kuangata biakudia bia tshijila. Biakudia bia Tshijila bidi mululu wa buakuidi uvua Yezu muleja kudi Bapostolo benda kumpala kua Bupikudi buenda.
Kuangata Biakudia bia Tshijila kudi kipatshila kamushinga ka tshisangilu tshia biakudia bia tshijila lumingu lonsu. Diampa ne mâyi bidi bibeneshibua ne biabanyibua mu tshisangilu. Diampa didi dileja mulambu wa mubidi wa Mupandishi buetu. Mâyi adi aleja mashi enda, avuaye mupuekesha buetu.
Tudi tuanguata bimanyinyu ebi mu tshivulukilu tshia mulambu wa Mupandishi ne bua kuenza kabidi bipungidi bietu ne Nzambi. Tudi tupeta mulayi mupia-mupia ne Nyuma neikala netu.
Ditambula didi ne bitupa bibidi. Yezu wakalongesha ne tudi dijinga ne “kuledibua kudi mâyi ne kudi Nyuma” bua kubuela mu bukalenga bua Nzambi (Yona 3:5; italike mukumbaja). Joseph Smith wa kalongesha, “Ditambuishibua mu mâyi tshidi tshitupa tshia ditambula, ne tshidi tshimpa bua tshianana kakuyi tshitupa tshikuabu—etshi tshidi ditambula dia Nyuma wa Tshijila” (Malongesha a Balombodi ba Ekelezia: Joseph Smith [2007], 95).
Ditambula mu mâyi didi dilondishibua kudi ditambula dia Nyuma bua kuikala bikumbana. Patudi tupeta matambula onsu abidi, tudi batokeshibua ku mibi yetu ne baledibua tshiakabidi mu nyuma. Nanku tudi tubanga moyo mupia-mupia wa nyuma bu bayidi ba Kilisto.
Patudi tupeta ditambula dia Nyuma kupitshila ku mululu mubikidibua dijadika. Mululu ewu udi mukumbaja kudi badi ne buakuidi umua anyi ba bungi badi bateka bianza pa mutu wetu. Kumpala badi batujadika bu tshidimba tshia Ekelezia, ne batupesha dipa dia Nyuma wa Tshijila pa tuetu. Tshidi mululu wa momumua mu Dipungila Dipia-Dipia ne Mukanda wa Molomo (tangila Bienzedi 8:14–17; 3 Nefi 18:36–37).
Nyuma wa Tshijila udi tshidimba tshisatu tshia Bunzambi. Udi wenza mudimu mu bobumua ne Tatu wa mu diûlu ne Yezu Kilisto. Patudi tupeta dipa dia Nyuma wa Tshijila, tudi mua kuikala ne bulunda buenda mu mioyo yetu patudi ne lulamatu.
Mushindu kayi udi Nyuma wa Tshijila Utubenesha
Dipa dia Nyuma wa Tshijila didi tshimua tshia mapa manena a Tatu wetu wa mu Diûlu. Nyuma wa Tshijila udi ututokesha ne utujidila, utuenza batshijila, bakumbana, batamba kufuanangana ne Nzambi (tangila 3 Nefi 27:20). Udi utuambuluisha bua kukudimuka ne kutanta mu nyuma patudi tukeba bua kulonda mabangu a Nzambi.
Nyuma wa Tshijila udi utuambuluisha bua kumanya bulelela (tangila Moloni 10:5). Udi kabidi ujadika bulelela mu mioyo ne mu meji etu. Bua kukumbaja, Nyuma wa Tshijila udi utuambuluisha bua kulongesha bulelela (tangila Dilongesha ne Bipungidi 42:14). Patudi tulonga ne tulongesha bulelela kupisthila ku bukola bua Nyuma wa Tshijila, Udi ubituala mu mioyo yetu (tangila 2 Nefi 33:1).
Nyuma wa Tshijila udi ufila bukola bua nyumua bua kutuambuluisha bua kutamba mateketa. Udi utuambuluisha bua kutantamena mateyi. Udi mua kutudimuisha bua njiwu ya nyuma ne mu mubidi.
Nyuma wa Tshijila neatuambumluisha ku ntatu ya mu moyo. Neatusamba mu tshikondo tshia ditêta anyi kanyinganyinga, kutuwuja ne ditekemena (tangila Moloni 8:26). Kupitshila ku Nyuma wa Tshijila tudi mua kumvua dinanga dia Nzambi buetu.
Biena bualu bia Lumu luimpa: “Nyuma wa Tshijila,” “Mapa a Nyuma”
Image
Yezu mukuata muana
Kunanukila tô ne Kundekelu
Patudi tutambuishibua ne tujadikibua, tudi tubuela mu tshipungidi ne Nzambi. Mukatshi mua bintu bikuabu, tudi tulaya bua kulama mikenji yenda ne kumusadila bua mantuku etu a moyo (tangila Mosiya 18:8–10, 13; Dilongesha ne Bipungidi 20:37).
Panyima pa tuetu bamana kubuela mu njila wa lumu luimpa kupitshila ku ditambula ne dijadikibua, tudi tuenza mushindu onsu bua kushala momu. Patudi tusesuka mu njila kakesa, tudi tuibidija ditabuija mu Kilisto mu kukudimuna kua mutshima. Dibenesha dia dikudimuna mutshima didi dituambuluisha bua kupingana mu njila wa lumu luimpa ne kulama mabenesha a bipungidi bietu ne Nzambi. Patudi tukudimuna mutshima ne bulelela, Nzambi udi misangu yonsu ujinga kutubuikidila ne utuakadila kabidi.
Kunanukila tô ne Kundekelu kudi kumvuija kushala ne lulamatu kudi Nzambi tô ne kundekelu kua moyo wetu—mu bikondo bimpa ne bikondo bikola, nansha mu ditanta anyi mu mvita. Tudi tuanyisha ne kudipuekesha bua Kilisto kutusonga ne kutuenza bu yeya. Tudi tutangila kudi Kilisto ne ditabuija, dieyemena, ne ditekemena nansha bionsu bialua mu mioyo yetu.
Kunanukila tô ne kundekelu kakuena kumvuija anu kukuata tô ne patudi tufua nansha. Kumisangu, Tshidi tshiumvija kushidamija moyo wetu, meji, ne bienzedi pa Yezu Kilisto. Bidi ne kutungunuka ne kuibidija ditabuija mu Kilisto dituku dionsu. Tudi kabidi tutungunuka ne kukudimuna mutshima, kulama bipungidi bietu ne Nzambi ne kukeba bulunda bua Nyuma wa Tshijila.
Kunanukila tô ne Kundekelu kudi ne “ kuse[sa] kumpala ne disuminyina mu Kilisto, kuikala ne dinkenka dijima dia ditekemena, ne dinanga dia Nzambi ne dia bantu bonsu.” Tatu wa mu Diûlu mulaya ne tuetu bananukila tô ne Kundekelu, “netupete moyo wa tshiendelela” (2 Nefi 31:20).
Lumu luimpa lua Yezu Kilisto ludi Lubenesha Bana Bonsu ba Nzambi.
Lumu luimpa lua Yezu Kilisto ludi lua bana bonsu ba Nzambi. Mifundu idi ilongesha ne “bonsu badi momumua kumpala kua Nzambi” nansha mamanya etu anyi mushindu wetu wa kuikala. Udi utubikila “bonsu bua kuya kudiye ne kuangata buimpa buenda, kena uvila nansha umua udi uya kudiye to (2 Nefi 26:33).
Lumu luimpa ludi lutubenesha mu moyo wetu wa mpindiewu ne kutshiendelela. Tudi batamba kuikala ne disanka—mu bubidi bu muntu nkaya anyi mu dîku—patudi bikala tuteka malongesha a Yezu Kilisto mu tshienzedi (tangila Mosiya 2:41; “Dîku: Dimanyisha kudi ba pa Buloba,” ChurchofJesusChrist.org). Kuteka kua lumu luimpa mu tshienzedi kudi kushindika disanga dietu, kutupesha meji a nyuma mu bienzedi bietu, ne kutantshisha malunda etu.
Kuteka kua lumu luimpa lua Yezu Kilisto mu tshienzedi kudi mua kutukuba ku masungula adi bua kutunyanga mu mubidi anyi mu nyuma. kudi kutuambuluisha bua tuetu kupeta bukola ne busambi mu tshikondo tshia dîteta ne kanyinganyinga. kudi kufila njila wa ku moyo wa tshiendelela wa disanga.
Tshimua tshia ku mikenji minena ya lumu luimpa luibakululula ludi ne tudi bonsu ba mu dîku dia Nzambi. Tudi bana benda banangibua balume ne bakaji Nansha musindu wa dikala dia dîku dietu pa buloba, muntu yonsu waku tuetu udi tshidimba tshia dîku dia Nzambi.
Tshitupa tshikuabu tshinena tshia mukenji wetu tshidi ne mêku adi mua kuikala pamua bua tshiendelela. Dîku didi dijidila kudi Nzambi. Dilongolola dia disanga dia Tatu wa mu Dîulu didi dianyishila malanda a dîku bua kutungunuka tô ne diamuamua dia lukita. Milulu ya tshijila ya mu ntempelo ne bipungidi bidi bikumbaja bua mêku kuikala pamua bua kashidi.
Kupitshila ku bukenka bua lumu luimpa, mêku adi mua kusolakaja dibenga kumvuangana, matandu, ne ntatu. Mêku mapanda kudi matandu adi mua kondopibua kupitshila ku dikudimuna mutshima, dibuikidila, ditabuija mu bukola bua bupikudi bua Yezu Kilisto.
Lumu luimpa lua Yezu Kilisto ludi lutuambuluisha bua tuetu kutantshisha malanda makola a dîku. Nzubu udi muaba muakana wa kulongesha ne kulonga nshindamenu ya lumu luimpa. Nzubu udi muibaka pa nshindamenu ya lumu luimpa, neikala muaba wa tshisokomenu ne bukubi. Neikala muaba udi Nyuma wa Mukalenga mua kusomba.
Ndongamu udi ulonda ewu udi tshilejelu tshia tshiwudi mua kulongesha muntu pawudi ne tusonsa tukessa tua diba. Pawudi wenzela ndongamu ewu, sungula nshindamenu umua anyi ya bungi bua kulongesha. Tshishikaminu tshia dilongesha bua nshindamenu yonsu tshidi tshilejibua mu dilonegsha dia bangilu.
Pawudi ulongesha, ela nkonku ne teleja. Tuala mabikila adi mua kuambuluisha bantu bua kulonga mushindu wa kusemena pabuipi ne Nzambi. Dibikila dia mushinga didi bua muntu kututakena nenu kabidi. Bula bua dilongesha budi bulonda nkonku iwudi ukonka ne diumvua diwudi wenza.
Image
Bena bukenji balongesha muntu mukaji
Tshiwudi Mua Kulongesha Bantu mu Minuta 3-10
Nzambi wa katuma Muamenda Munangibua, Yezu Kilisto, pa buloba bua kutusungila ku bubi ne ku lufu.
Ditabuija mu Yezu Kilisto didi nshindamenu wa dienza ne bukola. Ditabuija didi dituambuluisha bua tuetu kuibidila ne bukola bua dikankamika dia Mupandishi mu matuku etu a moyo.
Ditabuija mu Kilisto didi dilombola ku dikudimuna mutshima. Dikudimuna mutshima didi mushindu wa kupingana kudi Nzambi ne kuela nyima ku bubi. Patudi tukudimuana mutshima, bienzedi bietu, majinga, ne meji bidi bikudimuka bua kuikala mu bobumua ne disua dia Nzambi.
Ditambula didi ne bitupa bibidi: ditambula dia mâyi ne dia Nyuma. Patudi tutambuishibua ne tujadikibua, tudi batokeshibua ku mibi yetu, bidi bitupesha, ntuadijilu mupia-mupia mu moyo.
Panyima pa tuetu batambushibua mu mâyi, tudi tupeta dipa dia Nyuma wa Tshijila kupitshila ku mululu wa dijadikibua.
Patudi tulonda ne lulamatu njila wa lumu luimpa tô ne kundekelu kua matuku etu a moyo, Nzambi udi utulaya ne netuikala ne moyo wa tshiendelela.