Kapitulo 3: Adalen 4

Panagbalin a Disipulo ni Jesucristo iti Tungpal-Biag

Panangisuro iti Daytoy nga Adalen

Ti panagbuniag ket maysa a naragsak nga ordinansa ti namnama. No mabuniagantayo, ipakitatayo ti tarigagaytayo a sumurot iti Dios ken sumrek iti dana nga agturong iti agnanayon a biag. Ipakitatayo pay ti panagkumittayo iti panagbalin a tungpal-biag a disipulo ni Jesucristo.

Naurnos daytoy nga adalen segun kadagiti katulagan nga aramidentayo iti panagbuniag. Iramanna dagiti sumaganad a kangrunaan a benneg, addaan kadagiti subseksion ti tunggal maysa kadagitoy:

• Ti Katulagantayo nga Agbalin a Natallugod nga Awaten iti Bagitayo ti Nagan ni Jesucristo

• Ti Katulagantayo nga Agtungpal kadagiti Bilin ti Dios

• Ti Katulagantayo nga Agserbi iti Dios ken iti Dadduma

• Ti Katulagantayo nga Agibtur agingga iti Panungpalan

Tulonganyo dagiti tao a makaawat a dagiti pagbatayan ken bilin nga isursuroyo ket paset ti katulagan nga aramidendanto iti panagbuniag. Ipakitayo kadakuada no kasano a makatulongto kadakuada ti tunggal paset daytoy nga adalen ti “yaasidegda ken ni Cristo … ken makiranudda iti pannakaisalakanna” (Omni 1:26; kitaen met iti 1 Nephi 15:14).

Kayatmo nga isuro daytoy nga adalen iti sumagmamano nga isasarungkar. Manmano a nasurok a 30 a minuto ti isasarungkar a panangisuro. Gagangay a nasaysayaat a maaddaan iti ababa, nasansansan nga isasarungkar a mangsakup iti babbabassit a paset ti material.

Planuen no anianto ti isuroyo, no kaanonto nga isuroyo, ken no kasano ti kaadu ti oras a bubosenyonto. Ibilangyo dagiti kasapulan dagiti tao nga isursuroyo, ket kiddawenyo ti pannarabay ti Espiritu. Addaankayo iti kabaelan a mangibagay iti panangisuro segun iti anianto ti kasayaatan a makatulong kadagiti tao nga agsagana para iti panagbuniag ken kumpirmasion.

Sumagmamano a benneg iti daytoy nga adalen ti mangiraman kadagiti masinunuo nga awis. Agkiddaw iti pammaregta iti panangikeddeng no kasano ken kaano nga ited dagiti awis. Agbalinkayo a maseknan iti lebel ti pannakaawat ti tunggal tao. Tulonganyo nga agbiag iti ebanghelio iti tunggal addang iti maminsan.

Ti Katulagantayo nga Agbalin a Natallugod nga Awaten iti Bagitayo ti Nagan ni Jesucristo

No mabuniagantayo, makitulagtayo a sumurot ken ni Jesucristo “nga addaan iti puso a napnuan tarigagay.” Saksiantayo pay a “siaayat nga awatentayo iti [bagbagitayo] ti nagan ni Jesucristo” (2 Nephi 31:13; kitaen met iti Doktrina ken Katulagan 20:37).

Ti panangawat iti bagbagitayo ti nagan ni Jesucristo ket kaipapananna a laglagipentayo Isuna ken agkagumaantayo nga agbiag kas tungpal-biag a disipulona. Pagsilnagentayo koma ti silawna iti dadduma babaen kadatayo. Makitatayo ti bagbagitayo a kas Kenkuana ken Isu ti ipangpangrunatayo iti biagtayo.

Iladawan dagiti sumaganad a benneg ti dua a wagas a pananglagip ken panangsurottayo ken ni Jesucristo.

Agkararag a Masansan

Ti kararag mabalin a simple a pannakisarita iti Nailangitan nga Ama nga aggapu iti puso. Iti kararag, makisaritatayo Kenkuana a siwayawaya ken sipupudno. Yebkastayo ti ayattayo para Kenkuana ken ti panagyamantayo kadagiti paraburtayo. Agkiddawtayo pay iti tulong, pannakasalaknib, ken panangiturong. Bayat ti panangigibustayo kadagiti kararagtayo, nasken a maaddaantayo iti kanito nga agsardeng ken dumgneg.

Insuro ni Jesus, “Masapul nga agkararagkayo iti Ama iti naganko” (3 Nephi 18:19, nainayon ti panangyunay-unay; kitaen met iti Moises 5:8). Bayat ti panagkararagtayo iti nagan ni Jesucristo, laglagipentayo nga agpada Isuna ken ti Nailangitan nga Ama.

Impakita ni Jesus ti pagwadan a surotentayo no agkararagtayo. Adu ti masursurotayo maipapan iti kararag babaen ti panangadal kadagiti kararag ti Mangisalakan kadagiti nasantuan a kasuratan (kitaen iti Mateo 6:9–13; Juan 17).

Mabalin nga iraman kadagiti kararagtayo dagiti sumaganad a paset:

• Rugian babaen ti pannakisao iti Nailangitan nga Ama.

• Yebkas dagiti rikna ti pusotayo, kas iti panagyaman kadagiti bendision a naawattayo.

• Agsaludsod, agkiddaw iti pannarabay, ken agdawat kadagiti bendision.

• Gibusan babaen iti panangisao iti, “Iti nagan ni Jesucristo, amen.”

Balakadannatayo dagiti nasantuan a kasuratan nga agkararagtayo iti bigat ken iti rabii. Nupay kasta, makapagkararagtayo iti ania man nga oras ken iti ania man a kasasaad. Para kadagiti bukod ken sangapamiliaan a panagkararagtayo, mabalin a napnuan kaipapanan ti panagparintumeng no agkararagtayo. Nasken a kanayon nga adda kararagtayo iti puspusotayo. (Kitaen iti Alma 34:27; 37:36–37; 3 Nephi 17:13; 19:16.)

Nasken a napnuan panunot ken aggapu iti puso dagiti kararagtayo. No agkararagtayo, nasken a liklikantayo ti panangisao kadagiti agpapada a banag iti agpapada a wagas.

Agkararagtayo nga addaan pammati, kinapudno, ken pudno a panggep nga agtignay kadagiti sungbat a maawattayo. No aramidentayo daytoy, tarabayennatayonto ti Dios nga agaramid kadagiti nasayaat a pangeddeng. Mariknatayonto nga as-asidegtayo Kenkuana. Ikkannatayonto iti pannakaawat ken kinapudno. Bendisionannatayonto iti liwliwa, talna, ken pigsa.

Panagadal iti Nasantuan a Kasuratan

• 2 Nephi 32:8–9

• Enos 1:1–12

• Alma 6:6; 13:28; 34:17–28; 37:36–37

• 3 Nephi 18:20

• Moroni 10:3–5

• Doktrina ken Katulagan 6:22–23; 8:2–3; 9:7–9; 10:5; 19:28; 42:14

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan, “Kararag”

• Bible Dictionary: “Prayer”

• Gospel Topics: “Prayer”

Awis

Inaldawkanto kadi nga agkararag iti Nailangitan nga Ama?

Adalenyo dagiti Nasantuan a Kasuratan

Insuro ni Nephi, “Agpennekkayo kadagiti balikas ni Cristo; ta adtoy, ibaga kadakayo dagiti balikas ni Cristo amin a banag a rumbeng nga aramidenyo” (2 Nephi 32:3; kitaen met iti 31:20).

Ti panagadal kadagiti nasantuan a kasuratan ket kasapulan a wagas iti pananglagip ken panangsurottayo ken ni Jesucristo. Kadagiti nasantuan a kasuratan masursurotayo maipapan iti biag, panagministro, ken dagiti pannursurona. Masursurotayo pay maipapan kadagiti karina. Bayat ti panagbasatayo kadagiti nasantuan a kasuratan, mapadasantayo ti ayatna. Dumakkel dagiti kararuatayo, pumigsa ti pammatitayo Kenkuana, ken malawlawagan dagiti panunottayo. Pumigpigsa dagiti pammaneknektayo iti nadiosan a misionna.

Laglagipen ken surotentayo ni Jesus bayat ti panangyaplikartayo kadagiti balikasna iti biagtayo. Nasken nga inaldaw nga adalentayo dagiti nasantuan a kasuratan, nangnangruna ti Libro ni Mormon.

Dagiti nasantuan a kasuratan ti Ti Simbaan ni Jesucristo dagiti Santo iti Ud-udina nga Aldaw ket ti Nasantuan a Biblia, ti Libro ni Mormon, ti Doktrina ken Katulagan, ken ti Perlas a Kapatgan. Maawagan pay dagitoy iti “dagiti pagrukodan nga aramid (standard works).”

Panagadal iti Nasantuan a Kasuratan

• 1 Nephi 19:22–23

• 2 Nephi 9:50–51; 25:26; 29:1–13; 31:19–20; 32:3

• Alma 32:28–30

• Doktrina ken Katulagan 1:37–38; 18:34–36

• Juan 20:31

• 2 Timoteo 3:14–17

• 2 Pedro 1:20–21

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan, “Nasantuan a Kasuratan”

• Gospel Topics: “Scriptures”

Awis

Basaemto kadi dagiti nasantuan a kasuratan iti inaldaw? (Ibilangyo ti panangawis kadagiti tao a mangbasa kadagiti masinunuo a kapitulo.)

Ti Katulagantayo nga Agtungpal kadagiti Bilin ti Dios

Note: Adu dagiti wagas a pakaisuruan dagiti bilin a masarakan iti daytoy a benneg. Kas pagarigan, mabalinyo nga isuro ida iti sumagmamano nga isasarungkar. Wenno mabalinyo nga isuro ti sumagmamano kadagitoy kas paset ti umuna a tallo nga adalen. No mangisursuro kadagiti bilin, siguraduen nga ikonekta ida iti katulagan iti panagbuniag ken iti plano ti pannakaisalakan.

No mabuniagantayo, makitulagtayo iti Dios a “salimetmetantayo dagiti bilinna” (Mosiah 18:10; Alma 7:15).

Inikkannatayo ti Dios kadagiti bilin gapu ta ay-ayatennatayo. Kayatna ti kasayaatan para kadatayo, nga agpada ita ken iti kinaagnanayon. Kas Nailangitan nga Amatayo, ammona no ania ti kasapulantayo para iti naespirituan ken pisikal a pagimbagantayo. Ammona pay no anianto ti mangisangbay kadatayo iti kaindaklan a ragsak. Maysa a nadiosan a sagut ti tunggal bilin, a naited a mangiwanwan kadagiti pangngeddengtayo, mangsalaknib kadatayo, ken tumulong kadatayo a dumur-as.

Maysa a gapu nga immaytayo ditoy daga ket tapno agsursuro ken dumur-as babaen ti panangusar iti kinawayatayo nga agpili a nainsiriban (kitaen iti Abraham 3:25). Ti panangpili nga agtungpal kadagiti bilin ti Dios—ken agbabawi no agbasoltayo—ket matulongannatayo a manglayag iti daytoy masansan a makakarit a panagdaliasat iti biag.

Dagiti bilin ti Dios ti pagtaudan ti pigsa ken bendision (kitaen iti Doktrina ken Katulagan 82:8–9). Babaen ti panangtungpal kadagiti bilin, masursurotayo a saanda a makapadagsen nga annuroten a manglapped iti wayawayatayo. Aggapu ti pudno a wayawaya iti panagtungpal kadagiti bilin. Ti panagtungpal ti paggapuan ti pigsa a mangisangbay kadatayo iti lawag ken pannakaammo babaen ti Espiritu Santo. Daytoy ti mangisangbay iti dakdakkel a ragsak ken mangtulong kadatayo a mangragpat iti nadiosan a potensialtayo kas annak ti Dios.

Ikari ti Dios a bendisionannatayo bayat ti panagtungpaltayo kadagiti bilinna. Masinunuo dagiti dadduma a bendision iti sumagmamano a bilin. Dagiti kangrunaan a bendisionna ket kappia ditoy a biag ken iti agnanayon a biag iti umay a lubong. (Kitaen iti Mosiah 2:41; Alma 7:16; Doktrina ken Katulagan 14:7; 59:23; 93:28; 130:20–21.)

Agpada a naespirituan ken temporal dagiti bendision ti Dios. No dadduma, nasken nga agan-anustayo nga agur-uray kadagitoy, nga agtaltalek a sumangbaydanto a mayannurot iti pagayatan ken panawenna (kitaen iti Mosiah 7:33; Doktrina ken Katulagan 88:68). Tapno mailasintayo ti sumagmamano a bendision, masapul nga agbalintayo a napasnek ken naespirituan a managpaliiw. Nangnangruna a pudno daytoy kadagiti bendision a sumangbay iti simple ken kasla gagangay a wagas.

Mabalin a makita laeng ti sumagmamano a bendision iti panangpanunot iti napalabas. Mabalin a saan a sumangbay dagiti dadduma agingga a kalpasan daytoy a biag. Ania man ti panawen wenno kasasaad dagiti bendision ti Dios, maisigurado kadatayo a sumangbaydanto bayat ti panangkagumaantayo nga agbiag iti ebanghelio ni Jesucristo (kitaen iti Doktrina ken Katulagan 82:10).

Naan-anay nga ay-ayaten ti Dios ti amin nga annakna. Naanus iti kinakapuytayo, ken mamakawan no agbabawitayo.

Dagiti Dua a Dadakkel a Bilin

Idi nagdamaganda ni Jesus, “Ania ti dakkel a bilin?” Insungbatna, “Ayatem ti Apo a Diosmo iti amin a pusom, ken iti amin a kararuam, ken iti amin nga isipmo.”

Kalpasanna kinuna ni Jesus ti maikadua a dakkel a bilin ket umasping iti umuna: “Ayatem ti padam a tao a kas iti bagim” (Mateo 22:36–39). “Awan ti sabali a bilin a dakdakkel ngem dagitoy” (Marcos 12:31).

Kas espiritu nga annak ti Dios, addaantayo iti dakkel a kapasidad para iti ayat. Paset daytoy ti naespirituan a tawidtayo. Ti panagbiag iti dua a dakkel a bilin—nga ayaten nga umuna ti Dios ken ayaten ti kaarrubatayo—ket maysa a pangilawlawag a kababalin dagiti disipulo ni Jesucristo.

Ayat ti Dios

Adu dagiti wagas a pakaipakitaantayo iti panagayattayo iti Dios. Matungpaltayo dagiti bilinna (kitaen iti Juan 14:15, 21). Maipangpangrunatayo Isuna iti biagtayo, a mangipaspasakup iti pagayatantayo iti pagayatanna. Maisentrotayo dagiti tarigagay, pampanunot, ken puspusotayo Kenkuana (kitaen iti Alma 37:36). Mabalintayo ti agbiag iti panagyaman kadagiti bendision nga intedna kadatayo—ken agbalintayo a naparabur a mangibinglay kadagita a bendision (kitaen iti Mosiah 2:21–24; 4:16–21). Babaen ti kararag ken panagserbi kadagiti dadduma, mayebkas ken mapaunegtayo ti ayattayo Kenkuana.

Kas kadagiti dadduma pay a bilin, ti bilin nga ayaten ti Dios ket agpaay iti pagimbagantayo. No ania ti ayatentayo ket mangikeddeng no ania ti sapulentayo. No ania ti sapulentayo ket mangikeddeng no ania ti panunoten ken aramidentayo. Ket no ania ti panunoten ken aramidentayo ket mangikeddeng no asinotayo—ken no asinonto ti pagbalinantayo.

Ayat ti Dadduma

Ti panagayattayo iti dadduma ket maysa a kasilpo ti panagayattayo iti Dios. Insuro kadatayo ti Mangisalakan ti adu a wagas iti panagayattayo iti dadduma (kitaen, kas pagarigan, iti Lucas 10:25–37 ken Mateo 25:31–46). Asitgan ken pasangbayentayo ida iti puspuso ken biagtayo. Agayattayo babaen ti panagserbi—babaen ti panangted iti bagbagitayo uray iti babassit a wagas. Ayatentayo dagiti dadduma babaen ti panagusartayo kadagiti sagut nga inted ti Dios kadatayo a mangbendision kadakuada.

Ti panagayat iti dadduma iramanna ti panagbalin a naanus, naasi, ken napudno. Iramanna ti panangpakawan a siwayawaya. Kaipapananna ti panangtrato iti amin a tao nga addaan panagraem wenno respeto.

No ayatentayo ti maysa a tao, datayo ken dayta a tao ket agpada a mabendisionan. Dumakkel ti puspusotayo, ad-adda a napnuan iti kaipapanan ti biagtayo, ken naragrag-otayo.

Dagiti Bendision

Ti dua a dakkel a bilin—nga ayaten ti Dios ken ayaten ti kaarrubatayo—ket ti pundasion ti amin a bilin ti Dios (kitaen iti Mateo 22:40). No ayatentayo nga umuna ti Dios, ken ayatentayo pay dagiti dadduma, amin a banag iti biagtayo ket maikabilto iti umno a lugarna. Daytoy nga ayat ti mangapektonto ti pannirigantayo, ti panangusar iti panawentayo, dagiti pagesman a surotentayo, ken ti urnos dagiti ipangpangrunatayo.

Panagadal iti Nasantuan a Kasuratan

• 2 Nephi 31:20

• Mosiah 2–5

• Moroni 7:45–48; 10:32

• Mateo 22:36–40; 25:31–46

• Marcos 12:28–33

• Lucas 10:25–37

• Juan 13:34–35; 14:15, 21

• 1 Juan 4:7–8, 20–21; 5:3

• Josue 22:5

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Kaasi, “Ayat”

• Gospel Topics: “Charity,” “Love”

Surotenyo ti Propeta

Awagan ti Dios dagiti propeta nga agbalin a pannakabagina iti daga. Babaen kadagiti propetana, ipalgakna ti kinapudno ken mangipaay iti pannarabay ken pakdaar.

Inawagan ti Dios ni Joseph Smith nga agbalin nga umuna a propeta kadagiti ud-udina nga aldaw (kitaen iti adalen 1). Inawagan met ti Dios dagiti simmaruno ken Joseph Smith tapno mangidaulo iti Simbaanna, agraman ti propeta a mangidaulo iti daytoy iti agdama. Nasken a magun-odtayo ti kombiksion ti nadiosan a calling ti sibibiag a propeta ken surotentayo dagiti pannursurona.

Dagiti pannursuro dagiti sibibiag a propeta ket mangipaay iti angkla iti agnanayon a kinapudno iti maysa a lubong nga addaan kadagiti agbaliwbaliw nga ik-ikkan pateg. Bayat ti panangsurottayo kadagiti propeta ti Dios, saannatayo a malapunos ti pannakatikaw ken riribuk ti lubong. Masarakantayto ti nain-indaklan a ragsak ditoy a biag ken umawattayo iti pannarabay para iti daytoy a paset ti agnanayon a panagdaliasattayo.

Panagadal iti Nasantuan a Kasuratan

• Mosiah 15:11–12

• 3 Nephi 12:1–2

• Doktrina ken Katulagan 1:4, 37–38; 21:1–7; 136:37–38

• Dagiti Aramid 10:34–43

• Taga Efeso 2:19–20; 4:11–14

• Amos 3:7

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Propeta,” “Propeta a Babai” “Padto, Agipadto”

• Gospel Topics: “Prophets,” “Prophecy”

Awis

Surotemto kadi ti balakad ti sibibag a propeta?

Dagiti Saludsod a Mayannatup iti Interbyu iti Panagbuniag

Mamatika kadi a maysa a propeta ti Dios ni [agdama a Presidente ti Simbaan]? Ania ti kayat a sawen daytoy kenka?

Agtungpal kadagiti Sangapulo a Bilin

Impalgak ti Dios iti nagkauna a propeta nga agnagan iti Moises dagiti Sangapulo a Bilin a mangtarabay kadagiti taona. Mayaplikar met laeng dagitoy a bilin iti aldawtayo. Isurodatayo nga agrukbab ken ipakitatayo ti panagraem iti Dios. Isurodatayo pay no kasano a tratuen ti tunggal maysa.

• “Awan ti sabali a diosmo iti sangok” (Exodo 20:3). Dagiti dadduma pay a “dios” ket mabalin nga iramanna ti adu a banag kas kadagiti sanikua, bileg, wenno kinalatak.

• “Dika mangaramid iti maipaay kenka a ladawan a kinitikitan” (Exodo 20:4).

• “Dika aramaten iti barengbareng ti nagan ni Jehova a Diosmo” (Exodo 20:7).

• “Laglagipem ti aldaw a panaginana, tapno santificarem” (Exodo 20:8).

• “Dayawem ni amam ken ni inam” (Exodo 20:12).

• “Dika mamapatay” (Exodo 20:13).

• “Dika makiabig iti dika asawa” (Exodo 20:14).

• “Dika agtakaw” (Exodo 20:15).

• “Dika agsaksi ti ulbod a maibusor iti padam a tao” (Exodo 20:16).

• “Dika agagum” (Exodo 20:17).

Nalawag a pannakaammo ken pannakaawat iti Panangisuro: Awan ti Sabali a Diosmo iti Sangok

Dagiti tao iti adu a kultura agdaydayawda kadagiti banag a mangipalagip kadakuada maipapan iti Dios wenno kapuonanda. No dadduma dagita a banag, kas kadagiti estatua, tanda ti relihion, wenno babassit nga altar, ket mabalin pay a pangipamaysaanda iti panagrukbabda. Tulonganyo dagiti sursuruanyo a mangipamaysa iti pammati ken panagrukbabda iti Nailangaitan nga Ama ken ni Jesucristo.

Panagadal iti Nasantuan a Kasuratan

• Mosiah 13:11–24

• Doktrina ken Katulagan 35:24; 59:5–6

• Exodo 20:1–17

• Deuteronomio 5:6–21

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Bilin, Dagiti Sangapulo a”

• Gospel Topics: “Ten Commandments”

Awis

Tungpalemto kadi dagiti Sangapulo a Bilin?

Agtungpal iti Linteg ti Kinadalus ti Dayaw

Ti linteg ti kinadalus ti dayaw ket napateg a paset ti plano ti Dios para iti pannakaisalakan ken pannakaitan-oktayo. Ti seksual nga intimasia iti nagbaetan ti agassawa ket inordenan ti Dios para iti panagparsua kadagiti annak ken para iti pakaipeksaan ti ayat dagiti agassawa. Daytoy nga intimasia ken ti bileg nga agparsua iti biag ti tao ket naisangrat nga agbalin a napintas ken sagrado.

Ti linteg ti Dios iti kinadalus ti dayaw ket panangliklik iti seksual a pannakinaig iti ruar ti legal a kallaysa ti maysa a lalaki ken maysa a babai. Kaipapanan pay daytoy a linteg ti kaadda ti naan-anay a pidelidad ken loyalidad iti asawa ti maysa a tao kalpasan ti kallaysa.

Tapno matulongannatayo a mangtungpal iti linteg ti kinadalus ti dayaw, binalakadannatayo dagiti propeta nga agbalintayo a nadalus iti pampanunot ken sasaotayo. Nasken a liklikantayo ti pornograpia iti ania man a kita. Iti panagtungpal iti linteg ti kinadalus ti dayaw, nasken a disentetayo iti panagtignay ken panaglangatayo.

Nasken a tungpalen dagiti kandidato iti panagbuniag ti linteg ti kinadalus ti dayaw.

Panagbabawi ken Pannakapakawan

Iti imatang ti Dios, nadagsen unay ti panaglabsing iti linteg ti kinadalus ti dayaw (kitaen iti Exodo 20:14; Taga Efeso 5:3). Daytoy ti saan nga umisu ti panangusar iti sagrado a bileg nga inted ti Dios a mangparsua iti biag. Ngem itultuloynatayo nga ayaten uray no sinalungasingtayo daytoy a linteg. Awisennatayo nga agbabawi ken agbalin a nadalus babaen ti pangsubbot a sakripisio ni Jesucristo. Ti pannakapaay gapu iti basol ket masukatan iti nasam-it a talna ti pannakapakawan ti Dios.(kitaen iti Doktrina ken Katulagan 58:42–43).

Dagiti Bendision

Inted ti Dios ti linteg ti kinadalus ti dayaw a mangbendision kadatayo ken dagiti espiritu nga annak nga ibaonna ditoy daga. Ti panagtungpal iti daytoy a linteg ket kasapulan unay iti bukod a talna ken iti kaadda ti ayat, panagtalek, ken panagkaykaysa iti relasiontayo iti pamilia.

Bayat ti panagbiagtayo iti linteg ti kinadalus ti dayaw, masalaknibantayto manipud iti naespirituan a pannakadangran nga aggapu iti seksual nga intimasia iti ruar ti kallaysa. Maliklikantayo pay dagiti problema a mainaig iti rikna ken bagi a masansan a maikadua iti kakasta a relasion. Dumur-astayto iti panagtalektayo iti sanguanan ti Dios (kitaen iti Doktrina ken Katulagan 121:45). Ad-adda a nakasaganatayonto iti impluensia ti Espiritu Santo. Nasaysayaatto ti pannakaisaganatayo nga agaramid kadagiti sagrado a katulagan iti templo a mamagkaykaysa kadagiti pamiliatayo para iti kinaagnanayon.

Dagiti Agdendenna a Babbai ken Lallaki

Ti agdendenna a couple iti ruar ti legal a kallaysa iti nagbaetan ti lalaki ken babai ket mabalin a saanda a mabuniagan agingga a dida agbibiag iti linteg ti kinadalus ti dayaw. Kaipapanan daytoy a saandan nga agdendenna pay—kas heteroseksual couple wenno same-sex couple—wenno, para iti maysa a lalaki ken maysa a babai, kaipapanan daytoy ti panagkallaysa. Iramanna pay ti panangaramat iti pammati agingga iti panagbabawi kas nailadawan iti Doktrina ken Katulagan 20:37. Ti kallaysa iti nagbaetan ti maysa a lalaki ken maysa a babai ket napateg a paset iti agnanayon a plano ti Dios.

Ti awis nga agbiag iti linteg ti kinadalus ti dayaw ket mabalin a mangted kadagiti narigat unay a karit iti sumagmamano a tattao nga isursuroyo. Agbalin a managkararag ken sensitibo iti kasasaad ti tunggal tao. Suroten dagiti pannignay ti Espiritu no mangisuro. Agusar iti panagannad ken saan a pagsasaritaan dagiti masinunuo a detalye. Kas kasapulan, agkiddaw iti balakad manipud iti mission president-yo para kadagiti masinunuo a situasion.

Panagadal iti Nasantuan a Kasuratan

• 3 Nephi 12:27–30

• Doktrina ken Katulagan 42:22; 59:6; 63:16

• Mateo 5:27–28

• Taga Efeso 5:3–5

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan, “Kinadalus ti Dayaw”

• Gospel Topics: “Chastity”

Dagiti Awis

Ikarkarigatamto kadi nga aramiden a nadalus ti panunot ken galadmo? Tungpalemto kadi ti linteg ti kinadalus ti dayaw?

Dagiti Saludsod a Mayannatup iti Interbyu iti Panagbuniag

• Ania ti maawatam maipapan iti linteg ti kinadalus ti dayaw, a mangiparit iti ania man a seksual a pannakinaig iti ruar ti begkes ti legal a kallaysa iti nagbaetan ti maysa a lalaki ken maysa a babai? Sitatallugodka kadi nga agtungpal iti daytoy a linteg sakbay ken kalpasan ti panagbuniagmo?

• Nakiramanka kadin iti panagparegreg iti sikog wenno aborsion? [Note: Ti maysa a tao a mangsungbat iti wen iti daytoy a saludsod ket nasken a kauman ti mission president wenno maysa a nadutokan a mamagbaga sakbay a maipalubos ti panagbuniag.]

Agtungpal iti Linteg ti Apagkapullo

Maysa a dakkel a pribilehio ti kinamiembro ti Simbaan ket ti gundaway nga agbayad iti apagkapullo. No agbayadtayo iti apagkapullo, tumulongtayo a mangpadur-as iti aramid ti Dios ken mangbendision kadagiti annakna.

Ti linteg ti apagkapullo ket nagtaud idi panawen ti Daan a Tulag. Kas pagarigan, ti propeta iti Daan a Tulag a ni Abraham ket nagbayad iti apagkapullo ti amin a sanikuana (kitaen iti Alma 13:15; Genesis 14:18–20).

Ti balikas nga apagkapullo literal a kayatna a sawen ti maysa nga apagkapullo. No agbayadtayo iti apagkapullo, idonartayo iti maysa nga apagkapullo ti matgedantayo iti Simbaan (kitaen iti Doktrina ken Katulagan 119:3–4; ti interes ket maawatan a kaipapananna ti matgedan). Sagut a naggapu iti Dios ti amin nga adda kadatayo. No agbayadtayo iti apagkapullo, ipakitatayo ti panagyaman Kenkuana babaen ti panangisubli iti sangkapaset ti intedna kadatayo.

Ti panagbayad iti apagkapullo ket maysa a panangipeksa iti pammati. Daytoy pay ti maysa a wagas a panangdayaw iti Dios. Insuro ni Jesus a nasken a “sapulentayo nga umuna ti pagarian ti Dios (Mateo 6:33), ket ti apagkapullo ket maysa a wagas a pakaaramidan iti dayta.

Pannakausar dagiti Pondo ti Apagkapullo

Sagrado dagiti pondo ti apagkapullo. Itedtayo ti apagkapullotayo iti maysa a miembro ti bishopric, wenno iti adu a lugar mabalintayo ti agbayad iti online. No umawat ti bishopric iti apagkapullo, ipatulodda daytoy kadagiti headquarter ti Simbaan.

Ti maysa a konseho (council) a buklen ti Umuna a Panguluen, Korum dagiti Sangapulo-ket-dua nga Apostol, ken Presiding Bishopric ket mangikeddeng no kasano a mausar dagiti pondo ti apagkapullo iti aramid ti Dios (kitaen iti Doktrina ken Katulagan 120:1). Iraman dagitoy a pangusaran:

• Pangbangon ken panangpatalinaed a nasayaat kadagiti templo ken meetinghouse.

• Panangipatarus ken panangipablaak kadagiti nasantuan a kasuratan.

• Pangsuporta kadagiti aktibidad ken operasion dagiti lokal a kongregasion ti Simbaan.

• Pangsuporta iti aramid ti misionario iti sangalubongan.

• Pangsuporta iti aramid iti family history.

• Pangpondo kadagiti pagadalan ken edukasion.

Saan a mausar ti apagkapullo a pangbayad kadagiti lokal a lider ti Simbaan. Agserbida a boluntario nga awan ti ania man a bayadda.

Dagiti Bendision

No agbayadtayo iti apagkapullo, ikari ti Dios dagiti bendision a dakdakkel nga amang ngem iti itedtayo. Isu “luktannanto … dagiti tawtawa ti langit, ket ibuyatnanto … ti bendision, nga awanto ti lugar a makalaon nga umawat” (Malakias 3:10; kitaen dagiti bersikulo 7–12). Mabalin nga agpada a naespirituan ken temporal dagitoy a bendision.

Panagadal iti Nasantuan a Kasuratan

• Doktrina ken Katulagan 119; 120

• Mateo 6:33 .

• Hebreo 7:1–2

• Genesis 14:18–20

• Levitico 27:30–33

• Malakias 3:7–12

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Apagkapullo, Panagbayad iti Apagkapullo”

• Gospel Topics: “Tithing”

Awis

Tungpalemto kadi ti linteg ti apagkapullo kalpasan a nabuniaganka?

Dagiti Saludsod a Mayannatup iti Interbyu iti Panagbuniag

Ania ti maawatam maipapan iti linteg ti apagkapullo? Sitatallugodka kadi nga agtungpal iti daytoy a linteg?

Panangidonar kadagiti Apagkapullo ken Dadduma Pay a Daton

Ipakita kadagiti baro a miembro no kasano ti agidonar iti apagkapullo ken daton iti maysa a miembro ti bishopric (nga agusar iti porma ti donasion) wenno online (kitaen iti donations.ChurchofJesusChrist.org).

Ilawlawag a ti bishopric ken maysa a klerk ti mangpatalinaed iti naannad a pannakakuenta dagiti apagkapullo ken dadduma pay a daton. Amin nga impormasion maipapan iti pakaseknan iti kuarta ket agtalinaed a siiiget a kumpidensial.

Dumar-ay dagiti miembro iti deklarasion ti apagkapullo iti bishop iti asideg ti gibus ti tunggal tawen. Iti daytoy pribado a miting, ideklarada ti kinapudnoda iti apagkapulloda ken maawatda ti report dagiti donasionda.

Agtungpal iti Word of Wisdom

Ti Linteg ti Salun-at ti Apo

Sagrado a sagut manipud iti Dios dagiti bagitayo. Agkasapulan ti tunggal maysa kadatayo iti pisikal a bagi tapno agbalintayo nga ad-adda a kas Kenkuana. Napateg unay dagti bagitayo ta idilig dagiti nasantuan a kasuratan dagitoy kadagiti templo (kitaen iti 1 Taga Corinto 6:19–20).

Kayat ti Apo a tratuentayo dagiti bagitayo iti panagraem. Tapno matulongannatayo a mangaramid iti daytoy, impalgakna ti maysa a paglintegan ti salun-at a maawagan iti Nainsiriban a Balikas (Word of Wisdom). Isuronatayo daytoy a paltiing maipapan iti pannangan kadagiti makapasalun-at a taraon ken saan nga agusar kadagiti sustansia a mangdangran iti bagitayo—nangnangruna ti arak, tabako, ken napudot nga inumen (kaipapananna ti tsa ken kape).

Iti espiritu ti Nainsiriban a Balikas, impakdaar dagiti agdama a propeta maibusor iti panagusar iti dadduma pay a sustansia a makadangran, illegal, wenno makairuam. Impakdaar pay dagiti propeta maibusor iti panangabuso kadagiti naireseta nga agas. (Sungbatanto ti mission president-yo dagiti saludsod maipapan no saan koma nga usaren dagiti dadduma a substansia iti lugaryo iti heograpiko.)

Dagiti Bendision

Nangipaay ti Apo iti Nainsiriban a Balikas (Word of Wisdom) para iti pagimbagan ti bagi ken espiritutayo. Ikarina dagiti naindaklan a bendision bayat ti panagtungpaltayo iti daytoy a bilin. Mairaman kadagitoy a bilin ti salun-at, sirib, kinabaknang ti pannakaammo, ken pannakasalaknib (kitaen iti Doktrina ken Katulagan 89:18–21).

Ti panagtungpal iti Nainsiriban a Balikas (Word of Wisdom) ket matulongannatayto nga ad-adda nga umawat kadagiti pannignay ti Espiritu Santo. Nupay mapasarantayo amin dagiti karit iti salun-at, ti panagtulnog iti daytoy a linteg ket makatulong kadatayo nga agbalin a nasalun-at iti bagi, panunot, ken espiritu.

Nasken a tungpalen dagiti kandidato iti panagbuniag ti Nainsiriban a Balikas (Word of Wisdom).

Para iti panangiwanwan maipapan iti panangtulong kadagiti tao nga agkarkarigatan kadagiti adiksion wenno pannakairuam, kitaen iti kapitulo 10.

Panagadal iti Nasantuan a Kasuratan

• Doktrina ken Katulagan 59:15–20; 88:124; 89

• 1 Taga Corinto 6:19–20

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Nainsiriban a Balikas”

• Gospel Topics: “Health,” “Word of Wisdom”

• Life Help: “Addiction”

Awis

Tungpalemto kadi ti Word of Wisdom?

Dagiti Saludsod a Mayannatup iti Interbyu iti Panagbuniag

Ania ti maawatam maipapan iti Word of Wisdom? Sitatallugodka kadi nga agtungpal iti Word of Wisdom sakbay ken kalpasan ti panagbuniagmo?

Ngilinen a Nasantuan ti Aldaw ti Sabbath

Maysa nga Aldaw a Panaginana ken Panagdaydayaw

Ti Sabbath ket maysa a nasantuan nga aldaw nga intuding ti Dios para kadatayo iti tunggal lawas tapno aginanatayo kadagiti inaldaw a panagbannogtayo ken agdaydayaw Kenkuana. Maysa kadagiti Sangapulo a Bilin a naited ken ni Moises ket laglagipen ti aldaw a panaginana, a pagtalinaeden a nasantuan” (Exodo 20:8; kitaen met dagiti bersikulo 9–11).

Iti agdama a paltiing, impatalged manen ti Apo a ti Sabbath “ti aldaw a naituding a panaginanayo kadagiti trabahoyo, ken ti panagdaydayawyo iti Kangatuan” (Doktrina ken Katulagan 59:10). Kinunana pay a ti Sabbath ti nasken nga aldaw a panagrag-o, panagkararag, ken panagyaman (kitaen dagiti bersikulo 14–15).

Kas paset ti panagdaydayawtayo iti Sabbath, dumar-aytayo iti miting ti sakramento iti tunggal lawas. Iti daytoy a miting, agdaydayawtayo iti Dios ken makiranudtayo iti sakramento a manglaglagip ken ni Jesucristo ken ti Pannubbotna. No makiranudtayo iti sakramento, pabaruentayo dagiti katulagantayo iti Dios ken ipakitatayo a natallugodtayo nga agbabawi kadagiti basoltayo. Ti pannakiranud iti sakramento ket ti sentro ti panangngilintayo iti aldaw ti Sabbath.

Iti simbaan makiramantayo pay kadagiti klase a pagsursuruantayo iti ad-adu pay maipapan iti ebanghelio ni Jesucristo. Dumakkel ti pammatitayo bayat ti sangkamaysa a panagadaltayo kadagiti nasantuan a kasuratan. Dumakkel ti ayattayo bayat ti panagserbi ken panangpapigsatayo iti tunggal maysa.

Malaksid iti panaginana manipud iti panagbannogtayo iti Sabbath, nasken a liklikantayo iti panaggatang ken dadduma pay nga aktibidad a mangiparikna a kasla maysa daytoy a gagangay nga aldaw. Ipaknitayo dagiti aktibidad ti lubong ket ipamaysatayo dagiti kapanunotan ken aramidtayo kadagiti naespirituan a banag.

Maysa nga Aldaw a Panagaramid iti Naimbag

Ti panagaramid iti naimbag iti aldaw ti Sabbath ket kasta met laeng ti kinapategna ti no ania ti liklikantayo nga aramiden tapno mapagtalinaed daytoy a nasantuan. Masursurotayo ti ebanghelio, mapapigsatayo ti pammati, mabangon dagiti relasion, mangted iti serbisio, ken makipaset kadagiti dadduma pay a makaitag-ay nga aktibidad a kadua ti pamilia ken gagayyem.

Dagiti Bendision

Ti panangngilin iti aldaw ti Sabbath a nasantuan ket maysa a panangipeksa iti debosiontayo iti Nailangitan nga Ama ken ni Jesucristo. Bayat ti panangaramidtayo kadagiti aktibidadtayo iti Sabbath a maitunos iti panggep ti Dios para iti aldaw, mariknatayo ti rag-o ken talna. Naespirituan a mataraonantayo ken mabang-aran ti bagitayo. Mariknatayto pay a nasingsingedtayo iti Dios ken umuneg ti relasiontayo iti Mangisalakantayo. Ad-adda a naan-anay a pagtalinaedentayo ti bagbagitayo nga “awanan mulit iti lubong” (Doktrina ken Katulagan 59:9). Agbalinto ti Sabbath “a makaay-ayo” (Isaias 58:13; kitaen met iti bersikulo 14).

Panagadal iti Nasantuan a Kasuratan

• 3 Nephi 18:1–12

• Doktrina ken Katulagan 59:9–19

• Moises 3:1–3

• Mateo 12:10–13

• Exodo 20:8–11; 31:12–13, 16–17

• Isaias 58:13–14

Ammuem ti Ad-adu pay maipapan iti Daytoy a Pagbatayan

• Gospel Topics: “Sabbath Day”

• Pangiwanwan iti Nasantuan a Kasuratan: “Aldaw a Panaginana”

Dagiti Awis

• Ngilinemto kadi a nasantuan ti aldaw ti Sabbath ken dumar-ayka iti Simbaan iti linawas?

• Ikagumaamto kadi ti makiranud iti sakramento a sipupudno kalpasan ti panagbuniagmo?

• Kumuyogkanto kadi kadakami a makipagkita iti bishop (wenno branch president) ti lokal a kongregasionmi?

Dagiti Saludsod a Mayannatup iti Interbyu iti Panagbuniag

Ania ti maawatam maipapan iti panangngilin a nasantuan ti aldaw ti Sabbath, agraman ti pannakiranud iti sakramento iti linawas ken panagserbi iti dadduma? Sitatallugodka kadi nga agtungpal kadagitoy a pagrukodan sakbay ken kalpasan ti panagbuniagmo?

Panagtrabaho iti Sabbath

No dadduma idawat dagiti amoda nga agtrabaho dagiti miembro ti Simbaan iti Sabbath wenno tapno mangipaay kadagiti kasapulanda wenno kasapulan ti komunidad. Kadagitoy a situasion, pagtalinaeden dagiti miembro ti espiritu ti Sabbath agingga a mabalin. Mabalin a kauman dagiti miembro dagiti liderda maipapan iti situasion.

Agtungpal ken Agdayaw iti Linteg

Mamati dagiti Santo iti Ud-udina nga Aldaw iti panagtungpal iti linteg ken iti panagbalin a nasayaat nga umili (kitaen iti Doktrina ken Katulagan 134; Pagannurotan ti Pammati 1:12). Maallukoy dagiti miembro ti Simbaan nga agserbi tapno mapasayaat dagiti komunidad ken nasionda. Maallukoyda pay nga agbalin nga impluensia para iti natalged nga ik-ikkan-pateg a nasayaat a kababalin iti kagimongan ken gobierno.

Maawis dagiti miembro ti Simbaan a makipaset iti gobierno ken iti proseso ti politika a maitunos iti linteg. Dagiti miembro nga addaan iti puesto iti gobierno ket agtignayda kadagiti kapasidad a kas maseknan nga umili, saan a kas pannakabagi ti Simbaan.

Panagadal iti Nasantuan a Kasuratan

• Doktrina ken Katulagan 58:21; 134

• Pagannurotan ti Pammati 1:12

Ammuem ti Ad-adu pay maipapan iti Daytoy a Pagbatayan

• “Aktibidad iti Politika ken Sibiko” iti benneg 38.8 ti Sapasap a Handbook

• Gospel Topics: “Citizenship”

Awis

Tungpalemto kadi dagiti paglintegan ti pagilian a pagnanaedam?

Dagiti Saludsod a Mayannatup iti Interbyu iti Panagbuniag

Nakaaramidka kadin iti nadagsen a krimen? No wen, addaka kadi itan iti pannakapadas (probation) wenno parole? [Note: Ti maysa a tao a mangsungbat iti wen iti daytoy a saludsod ket nasken a kauman ti mission president wenno maysa a nadutokan a mamagbaga sakbay a maipalubos ti panagbuniag.]

Ti Katulagantayo nga Agserbi iti Dios ken iti Dadduma

Panagserbi

No mabuniagantayo, makitulagtayo nga agserbi iti Dios ken agserbi iti dadduma. Ti panagserbi iti dadduma ket maysa kadagiti kangrunaan a wagas a makapagserbitayo iti Dios (kitaen iti Mosiah 2:17). Insuro ni propeta Alma kadagiti agtarigagay a mabuniagan a nasken a “siaayat a makipagbaklay iti imet ti tunggal maysa, … makipagladingit kadagiti agladladingit … , ken manglinglingay kadagiti makasapul iti pannakalinglingay” (Mosiah 18:8–9).

Kalpasan ti panagbuniag, gagangay nga umawat dagiti baro a miembro iti maysa a calling nga agserbi iti Simbaan. Boluntario ken saan a mabayadan dagitoy a calling. Bayat ti panangawattayo kadagitoy ken agserbitayo a sipapasnek, dumakkel ti pammatitayo, mapadur-as dagiti talentotayo, ken mabendisionantayo dagiti dadduma.

Sabali pay a paset ti serbisiotayo iti Simbaan ket ti panagbalin a “ministering brother” wenno “ministering sister.” Iti daytoy a pagrebbengan, agserbitayo kadagiti naidutok nga indibidual ken pamilia.

Kas disipulo ni Jesucristo, agsapultayo kadagiti gundaway a makapagserbi iti tunggal aldaw. Kas Kenkuana, mapantayo nga ”agar-aramid iti kinaimbag” (Dagiti Aramid 10:38). Agserbitayo kadagiti kaarrubatayo ken dadduma pay iti komunidadtayo. Mabalintayo ti makiraman kadagiti gundaway iti panagserbi babaen ti JustServe iti lugar nga adda a magun-od daytoy. Mabalintayo ti sumuporta kadagiti panagkagumaan ti Simbaan a panangtulong iti tattao ken makiraman iti panangsaranay iti didigra.

Panagadal iti Nasantuan a Kasuratan

• Mosiah 2:17; 4:15–16, 26; 18:8–10; 23:18

• Doktrina ken Katulagan 42:38

• Mateo 25:31–46

• Lucas 10:25–37

• Santiago 1:27; 2:17

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Serbisio”

• Gospel Topics: “Service”

Awis

Awatemto kadi ti maysa a calling wenno assignment no maited kenka (agraman ti maysa nga assignment kas ministering brother wenno ministering sister)?

Panangibinglay iti Ebanghelio

Kas paset ti katulagantayo iti panagbuniag, ikaritayo ti “agtakder a saksi ti Dios” (Mosiah 18:9). Maysa a wagas a makapagtakdertayo kas saksi ket babaen ti panangibinglay iti ebanghelio ni Jesucristo. Ti panangtulong kadagiti dadduma nga umawat iti ebanghelio ket maysa kadagiti kararagsakan a kita ti panagserbi a mabalintayo nga ited (kitaen iti Doktrina ken Katulagan 18:15–16). Daytoy ti nabileg a pangipeksaan iti ayattayo.

No mapadasantayo dagiti bendision ti panagbiag iti ebanghelio, gagangay a kayattayo nga ibinglay dagita a bendision. Masansan nga agbalin nga interesado dagiti miembro ti pamilia, gagayyem, ken am-ammo no ipakitatayo ti napudno a pagwadan ken makitada no kasano a bendisionan ti ebanghelio ti biagtayo. Maibinglaytayo ti ebanghelio kadagiti gagangay ken natural a wagas (kitaen iti Sapasap a Handbook, kapitulo 23).

Awisentayo dagiti dadduma a makiraman kadatayo iti serbisio, komunidad, paglinglingayan, ken dagiti aktibidad iti Simbaan. Mabalintayo nga awisen ida iti miting ti Simbaan wenno iti maysa a serbisio ti panagbuniag. Mabalintayo nga awisen ida a mangbuya iti video iti online a mangilawlawag iti ebanghelio ni Jesucristo, mangbasa iti Libro ni Mormon, wenno mangbisita iti open house ti maysa a templo. Ginasgasut dagiti awis a maitedtayo. Masansan a ti panangawis kaipapananna laeng ti panangiraman iti pamilia, gagayyem, ken kaarrubatayo iti ar-aramidentayon.

No agkiddawtayo, tulongannatayto ti Dios a mangbigbig kadagiti gundaway a mangibinglay iti ebanghelio ken mangibaga kadagiti dadduma maipapan iti no kasano a bendisionan daytoy ti biagtayo.

Para iti ad-adu pay nga impormasion maipapan iti panangyaplikar kadagiti pagbatayan ti panagayat, panangibinglay, ken panagawis, kitaen iti “Pannakikaykaysa kadagiti Miembro” iti kapitulo 9.

Panagadal iti Nasantuan a Kasuratan

• Doktrina ken Katulagan 88:81

• Mateo 28:19–20

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Aramid ti Misionario”

• Gospel Topics: “Missionary Work”

Dagiti Awis

• Ikararagamto kadi dagiti misionario ken dagiti gundaway a mangibinglay iti ebanghelio?

• Kalikagumamto kadi nga aramiden dagiti pagbatayan ti panagayat, panangibinglay, ken panangawis kadagiti gagayyemmo, kakabagiam, ken dadduma pay?

Panagayuno ken dagiti Daton iti Panagayuno

Impasdek ti Dios ti linteg ti panagayuno kas maysa a wagas tapno mapadur-astayo ti naespirituan a pigsa ken tapno matulongan dagiti agkasapulan.

Ti panagayuno ket kaipapananna ti saan a pannangan ken panaginum iti uneg ti maysa a panawen. Gagangay nga ilatang ti Simbaan ti umuna a Domingo ti tunggal bulan, kas maysa nga aldaw ti panagayuno. Ti maysa nga aldaw ti panagayuno ket kadawyan a pananglangan a mangan ken uminum iti uneg ti 24-oras no kabaelan ti bagitayo. Dagiti dadduma pay a napateg a paset ti Domingo ti panagayuno ket karaman ti panagkararag ken panangiburay iti pammaneknek. Maallukoytayo pay nga agayuno iti dadduma pay a gundaway no mariknatayo ti panagkasapulan.

Panangbangon iti Naespirituan a Pigsa

Ti panagayuno ket makatulong kadatayo nga agbalin a napakumbaba, umas-asideg iti Dios, ken makarikna iti naespirituan a pannakapabaro. Sakbay ti rugi ti panangministrona, nagayuno ni Jesucristo (kitaen iti Mateo 4:1–2). Nairekord kadagiti nasantuan a kasuratan ti adu a pakaammuan maipapan kadagiti propeta ken dadduma pay a nagay-ayuno tapno mapadakkel ti naespirituan a pigsada ken makapagkiddaw kadagiti naisangsangayan a bendision para iti bagbagida wenno iti dadduma.

Agkadua ti panagayuno ken panagkararag. No agayuno ken agkararagtayo nga addaan pammati, ad-adda a maitunostayo iti panangawat iti personal a paltiing. Ad-adda pay nga umawattayo iti panangbigbig iti kinapudno ken pannakaawat iti pagayatan ti Dios.

Sumarungkar Kadagiti Agkasapulan

No agayunotayo, mangidonartayo iti kuarta iti Simbaan a makatulong iti pannakaaywan dagiti tao nga agkasapulan. Maawagan daytoy iti daton iti panagayuno. Maawistayo a mangted iti maysa a daton a saan a kumurang a kapada ti pateg dagiti taraon a saan a kinnan. Maallukoytayo nga agbalin a managparabur ken mangtedtayo iti ad-adu pay ngem iti pateg dagitoy a taraon no kabaelantayo. Ti panangted iti daton iti panangayuno ket maysa a wagas a makapagserbitayo kadagiti dadduma.

Dagiti daton iti panagayuno ket maaramat tapno maipaayan iti taraon ken dadduma pay a kasapulan dagiti tao nga agkasapulan, iti agpada a lokal ken sangalubongan. Para iti impormasion maipapan no kasano ti mangted ti kontribusion kadagiti daton iti panagayuno, kitaen iti “Panangidonar kadagiti Apagkapullo ken Dadduma Pay a Daton” iti daytoy nga adalen.

Panagadal iti Nasantuan a Kasuratan

Panagayuno

• Alma 5:45–46; 6:6; 17:2–3

• Moroni 6:5

• Doktrina ken Katulagan 59:12–16; 88:76

• Isaias 58:6–11

Panangaywan Kadagiti Agkasapulan

• Mosiah 4:16–27

• Alma 4:12–13

• Mateo 25:31–46

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Ayuno, Panagayuno”

• Sapasap a Handbook: 22.2.2

• Gospel Topics: “Fasting and Fast Offerings”

Dagiti Awis

• Agayuno ken agkararagkanto kadi iti sumaruno a Domingo a panagayuno para iti maysa a masinunuo a panagkasapulan?

• Mangidonarkanto kadi iti daton ti panagayuno (kalpasan a nabuniaganka)?

Ti Katulagantayo nga Agibtur agingga iti Panungpalan

No mabuniagantayo, makitulagtayo iti Dios nga “agibtur agingga iti panungpalan” iti panagbiag iti ebanghelio ni Jesucristo (2 Nephi 31:20; kitaen met iti Mosiah 18:13). Ikarigatantayo ti agbalin a disipulo ni Jesucristo iti tungpal biag.

Inladawan ti propeta ti Libro ni Mormon a ni Nephi ti panagbuniag a kas ti ruangan a pagserkantayo iti dana ti ebanghelio (kitaen iti 2 Nephi 31:17). Kalpasan ti panagbuniag, “agtultuloy[tayo] a sitatalingenngen ken ni Cristo” (2 Nephi 31:20).

No “agtultuloytayo” iti dana ti kinadisipulo, agsaganatayo a mapan iti templo. Idiay nga agaramidtayonto kadagiti katulagan iti Dios bayat ti panangawattayo kadagiti ordinansa iti templo. Iti templo, matalugadingantayto iti bileg ken mapaglantip kas pamilia iti kinaagnanayon. Ti panagtungpal kadagiti katulagan nga aramidentayo iti templo ti manglukatto iti ruangan iti tunggal naespirituan a pribilehio ken bendision nga adda iti Dios para kadatayo.

Bayat ti panagtultuloytayo a sipupudno iti dana ti ebanghelio, iti agangay awatentayto ti kaindaklan a sagut ti Dios—ti sagut ti agnanayon a biag (kitaen iti 2 Nephi 31:20; Doktrina ken Katulagan 14:7).

Ilawlawag dagiti sumaganad a benneg ti sumagmamano nga aspeto ti no ania ti impaay ti Dios a tumulong kadatayo nga agibtur agingga iti panungpalan ti panagdaliasattayo iti biag—ken makasarak iti rag-o iti daytoy.

Ti Priesthood ken dagiti Organisasion ti Simbaan

Ti priesthood isu ti turay ken bileg ti Dios. Babaen ti priesthood, ileppas ti Nailangitan nga Ama ti aramidna a “mangipatungpal iti saan nga ipapatay ken agnanayon a biag” dagiti annakna (Moises 1:39). Mangted ti Dios iti turay ken bileg kadagiti annakna a lallaki ken babbai iti daga tapno makatulong a mangipatungpal iti daytoy nga aramid.

Bendisionannatayo amin ti priesthood. Maawat dagiti ordinansa a kas iti panagbuniag ken sakramento babaen kadagiti addaan iti saad ti priesthood. Awatentayo pay dagiti bendision iti pannakaagas, pannakaliwliwa, ken panangbalakad.

Ti Priesthood ken Panangidaulo iti Simbaan ken dagiti Calling

Idauluan ni Jesucristo ti Simbaan babaen kadagiti propeta ken apostol. Dagitoy a lider ket inawagan ti Dios, naordenan, ken naikkan iti turay ti priesthood nga agtignay iti nagan ti Mangisalakan.

Idi un-unana, inted ni Cristo kadagiti Apostolna daytoy met laeng a turay ti priesthood, a nangipalubos kadakuada a mangidaulo iti Simbaanna kalpasan ti yuulina idiay langit. Idi agangay napukaw dayta a turay idi saan nga inawat dagiti tao ti ebanghelio ken natay dagiti Apostol.

Insubli dagiti Nailangitan a mensahero ti priesthood idi 1829 babaen ken ni Propeta Joseph Smith, ket impasdek manen ti Apo ti Simbaanna nga addaan kadagiti apostol ken propeta. (Kitaen iti adalen 1.)

Iti lokal a lebel, addaan iti turay ti priesthood dagiti bishop ken stake president a mangidaulo kadagiti kongregasion ti Simbaan.

No maawagan ken mai-set apart dagiti lallaki ken babbai nga agserbi iti Simbaan, maikkanda iti turay manipud iti Dios nga agtignay iti dayta a calling. Maited daytoy a turay kadagiti misionario, lider, mannursuro, ken dadduma pay agingga a mai-release-da manipud kadagiti calling-da. Maipakumit daytoy iti babaen ti panangiturong dagiti agiggem kadagiti tulbek ti priesthood.

Mabalin nga usaren laeng daytoy a turay ti priesthood iti kinalinteg (kitaen iti Doktrina ken Katulagan 121:34–36). Daytoy a turay ket sagrado a panagtalek a mangibagi iti Mangisalakan ken agtignay iti naganna. Kanayon a maisangrat daytoy a mangparabur ken agserbi kadagiti dadduma.

Aaronic Priesthood ken Melchizedek Priesthood

Iti Simbaan, iraman ti priesthood ti Aaronic Priesthood ken ti Melchizedek Priesthood. Babaen ti panangiturong dagiti agiggem kadagiti tulbek ti priesthood, maitalek ti Aaronic Priesthood ken ti Melchizedek Priesthood kadagiti maikari a lallaki a miembro ti Simbaan. Kalpasan a maitalek ti maitutop a priesthood, maordenan ti tao iti saad {office} iti dayta a priesthood, a kas iti deacon wenno elder. Masapul isuna nga ordenan ti maysa nga addaan iti kasapulan a turay.

No umawat ti maysa a lalaki wenno agtutubo a lalaki iti priesthood, makitulag iti Dios tapno maipatungpalna dagiti sagrado a pagrebbengan, agserbi kadagiti dadduma, ken tumulong a mangbangon iti Simbaan.

Mabalin nga umawat dagiti agtutubo a lallaki iti Aaronic Priesthood ken maordenan a deacon mangrugi iti Enero ti tawen a panagtawenda iti 12. Mabalinda nga maordenan a teacher iti tawen a panagtawenda iti 14 ken priest iti tawen a panagtawenda iti 16. Mabalin nga umawat dagiti convert a lallaki a nataengan iti Aaronic Priesthood kalpasan laeng ti panagbuniag ken kumpirmasion. Dagiti Aaronic Priesthood holder ti mangannong kadagiti ordinansa a kas iti sakramento ken panagbuniag.

Kalpasan ti panagserbina iti sumagmamano a panawen kas maysa a priest iti Aaronic Priesthood, ti maikari a lalaki nga agtawen iti di kumurang a 18 ket mabalinna ti umawat iti Melchizedek Priesthood ken maordenan a maysa nga elder. Dagiti lallaki nga umawat iti Melchizedek Priesthood ket mabalinda ti mangannong kadagiti ordinansa ti priesthood kas iti panangted kadagiti bendision ti panagagas ken pangliwliwa kadagiti miembro ti pamilia ken dadduma pay.

Kitaen iti Sapasap a Handbook, 38.2.9.1, para iti impormasion maipapan kadagiti baro a miembro nga umaw-awat iti priesthood.

Dagiti Korum ken Organisasion ti Simbaan

Dagiti Korum ti Priesthood. Ti maysa a korum ket nabukel a grupo dagiti priesthood holder. Addaan ti tunggal ward iti korum dagiti elder para kadagiti nataengan a lallaki. Dagiti korum dagiti deacon, teacher, ken priest ket para kadagiti agtutubo a lallaki.

Relief Society. Iraman ti Relief Society dagiti babbai nga agtawen iti 18 ken nasursurok. Dagiti miembro ti Relief Society ti mangpapigsa kadagiti pamilia, indibidual, ken ti komunidad.

Young Women. Kumappeng dagiti agtutubo a babbai iti organisasion ti Young Women mangrugi iti Enero ti tawen a panagtawenda iti 12.

Primary. Dagiti ubbing nga agtawen iti 3 agingga ti 11 ket paset ti organisasion ti Primary.

Sunday School. Dumar-ay ti amin a nataengan ken agtutubo iti Sunday School, a pagmimitinganda tapno agadal kadagiti nasantuan a kasuratan a sangkamaysa.

Para iti ad-adu pay nga impormasion maipapan iti priesthood, kitaen iti Sapasap a Handbook, kapitulo 3.

Para iti ad-adu pay nga impormasion maipapan kadagiti korum ti priesthood ken organisasion ti Simbaan, kitaen iti Sapasap a Handbook, dagiti kapitulo 8–13.

Panagadal iti Nasantuan a Kasuratan

• Mosiah 18:17

• Alma 13:1–19

• Doktrina ken Katulagan 20:38–65; 84:19–20; 107; 121:34–46

• Pagannurotan ti Pammati 1:5

• Lucas 9:1–6

• Juan 15:16

• Santiago 5:14–15

Ammuem ti Ad-adu pay maipapan iti Daytoy a Pagbatayan

• Sapasap a Handbook, kapitulo 3: “Dagiti Pagbatayan ti Priesthood”

• Gospel Topics: “Aaronic Priesthood,” “Melchizedek Priesthood,” “Priesthood”

Dagiti Awis

• Agsaganakanto kadi nga umawat iti Aaronic Priesthood? (Para kadagiti lallaki nga agtawen iti 11 ken natataengan)

• Agsaganakanto kadi nga umawat iti Melchizedek Priesthood? (Para kadagiti nataengan a lallaki)

• Makiramankanto kadi a siaaktibo kadagiti maitutop nga organisasion ti Simbaan?

Kallaysa ken dagiti Pamilia

Kallaysa

Inordenan ti Dios ti kallaysa ti maysa a lalaki ken maysa a babai. Daytoy ti kangrunaan iti planona para iti agnanayon a panagdur-as dagiti annakna.

Ti panagkaykaysa ti asawa a lalaki ken asawa a babai iti kallaysa ti kapatgan a relasionda iti daga. Addaanda iti sagrado a pagrebbengan nga agbalin a napudno iti tunggal maysa ken napudno iti katulaganda iti kallaysa.

Agpadpada dagiti agassawa iti imatang ti Dios. Nasken a saan mangrimbaw ti maysa iti sabali. Nasken a maaramid dagiti pangngeddengda iti kaykaysa ken ayat, a naan-anay ti pannakiramanda nga agpada.

No aginnayat dagiti agassawa ken agtitinnulongda, mabalin a pagtaudan ti kadakkelan a ragsakda ti panagdennada kas agassawa. Mabalinda a tulongan ti tunggal maysa ken dagiti annakda a dumur-as nga agturong iti agnanayon a biag.

Ti Pamilia

Kas iti kallaysa, inordenan ti Dios ti pamilia ken kangrunaan iti planona para iti agnanayon a ragsaktayo. Kaaduanna nga agbalin a naragsak ti pamiliatayo no agbiagtayo babaen kadagiti pannursuro ni Jesucristo. Suruan dagiti nagannak dagiti annakda iti ebanghelio ni Jesucristo ken ipakitada ti pagwadan iti panagbiag iti daytoy. Mangipaay dagiti pamilia kadagiti gundaway nga agayat ken agserbitayo iti tunggal maysa.

Nasken nga aramiden dagiti nagannak ti pamiliada a kangatuan nga ipangpangrunada. Maysa a sagrado a pribilehio ken pagrebbengan kadagiti nagannak a mangaywan kadagiti annak a kabaelanda nga ipasngay wenno taraknen.

Addaan kadagiti karit ti amin a pamilia. No agkiddawtayo iti suporta ti Dios ken agtungpal kadagiti bilinna, makatulong kadatayo dagiti karit iti pamilia iti panagsursuro ken panagdur-astayo. No dadduma dagitoy a karit ti tumulong kadatayo a makasursuro nga agbabawi ken mamakawan.

Inallukoy dagiti lider ti Simbaan dagiti miembro a mangangay iti linawas a sardam iti pagtaengan (home evening). Nasken nga usaren dagiti nagannak daytoy nga oras a mangisuro kadagiti annakda iti ebanghelio, mangpapigsa kadagiti relasion ti pamilia, ken maaddaan iti panagraragsak a sangkamaysa. Nangipaulog pay dagiti lider ti Simbaan iti maysa a waragawag a mangisuro kadagiti napateg a kinapudno maipapan iti pamilia (kitaen iti “Ti Kaamaan: Maysa a Waragawag iti Lubong” (ChurchofJesusChrist.org).

Dagiti dadduma pay a wagas a mangpapigsa iti pamilia ket mairaman ti panagkararag ti pamilia, panagadal iti nasantuan a kasuratan, ken panagdaydayaw a sangsangkamaysa iti simbaan. Mabalintayo pay ti agsukisok iti family history, ummongen dagiti estoria ti pamilia, ken agserbi iti dadduma.

Adu a tattao ti addaan kadagiti limitado a gundaway para iti kallaysa wenno para iti naayat a relasion iti pamilia. Adu ti nakapadas iti diborsio ken dadduma pay a narigat a kasasaad ti pamilia. Nupay kasta, bendisionannatayo ti ebanghelio a saggaysa uray ania ti kasasaad ti pamiliatayo. Ket no napudnotayo, mangipaayto ti Dios iti maysa a wagas a maaddaantayo kadagiti bendision dagiti naayat a pamilia, ditoy man a biag wenno iti umay a biag.

Panagadal iti Nasantuan a Kasuratan

Kallaysa

• Doktrina ken Katulagan 42:22; 49:15

• Taga Efeso 5:25

• Genesis 2:18, 24

Pamilia

• Mosiah 4:14–15

• Alma 56:47; 57:21

• 3 Nephi 18:21

• Doktrina ken Katulagan 68:25–28

• Taga Efeso 6:4

• Dagiti Proverbio 22:6

• “Ti Kaamaan: Maysa a Waragawag iti Lubong”

Ammuem ti Ad-adu pay maipapan iti Daytoy a Pagbatayan

• Pangiwanwan iti Nasantuan a Kasuratan: “Kaamaan, “Panagasawa, Mangasawa”

• Sapasap a Handbook, kapitulo 2: “Panagsuporta kadagiti Indibidual ken Pamilia iti Aramid ti Pannakaisalakan ken Pannakaitan-ok”

• Gospel Topics: “Marriage,” “Family,” “Parenting”

Dagiti Awis

Ibagay dagiti sumaganad nga awis segun iti situasion ti tao.

• Mangangaykayto kadi iti linawas a sardam iti pagtaengan (home evening), inaldaw a sangapamiliaan a panagkararag, inaldaw a sangapamiliaan a panagadal iti nasantuan a kasuratan?

• Agdaydayawkayonto kadi iti Sabbath kas sangapamilia?

Aramid iti Templo ken Family History para kadagiti Pimmusay a Kapuonan

Ay-ayaten ti Nailangitan nga Ama ti amin nga annakna ken tarigagayanna ti pannakaisalakan ken pannakaitan-okda. Ngem binilbilion a tattao ti natay a saan a nakangngeg iti ebanghelio ni Jesucristo wenno saan a nakaawat kadagiti pangisalakan nga ordinansa ti ebanghelio. Mairaman kadagitoy nga ordinansa ti panagbuniag, kumpirmasion, panagorden iti priesthood para kadagiti lallaki, ti endowment iti templo, ken agnanayon a kallaysa.

Babaen ti parabur ken asina, nangipaay ti Apo iti sabali pay a wagas a pangawatan dagitoy a tao iti ebanghelio ken kadagiti ordinansa daytoy. Iti lubong ti espiritu, maikasaba ti ebanghelio kadagiti natay a saan nga immawat iti daytoy (kitaen iti Doktrina ken Katulagan 138). Kadagiti templo, mabalintayo nga annongen dagiti ordinansa para kadagiti pimmusayen nga an-annabotayo ken dadduma pay. Dagitoy a pimmusay a tao iti lubong ti espiritu ket mabalinda nga awaten wenno saan ti ebanghelio ken dagiti ordinansa a naannong para kadakuada.

Sakbay a mabalintayo nga annongen dagitoy nga ordinansa, nasken nga ilasintayo dagiti kapuonantayo a saan a nakaawat kadagitoy. Ti panangilasin kadagiti miembro ti pamiliatayo tapno makaawatda kadagiti ordinansa ket maysa a kangrunaan a panggep ti aramidtayo iti family history. No makasaraktayo iti impormasion maipapan kadakuada, inayontayo daytoy iti database ti Simbaan iti FamilySearch.org. Kalpasanna, mabalintayo (wenno dagiti dadduma) nga annongen dagiti pangisaup (proxy) nga ordinansa para kadakuada iti templo.

Bayat ti panangilasintayo kadagiti kapuonantayo ken panangannongtayo kadagiti ordinansa para kadakuada, mabalin nga agkaykaysa dagiti pamiliatayo iti kinaagnanayon.

Aramid iti Family History ken Idadar-ay iti Templo

Yam-ammoyo dagiti baro a miembro ken dagiti isursuroyo iti ward temple ken family history leader (wenno iti sabali pay a miembro a pamiliar iti aramid iti templo ken family history). Makatulong daytoy a lider kadagiti tao a mangilasin kadagiti pimmusay a kabagianda nga agkasapulan kadagiti ordinansa iti templo. Usarenyo ti linawas a miting ti koordinasion tapno agplano no kasano a matulongan dagiti baro a miembro a mangrugi iti panangaramid iti family history ken temple work.

Mabalin nga umawat dagiti baro a miembro ken dadduma pay a miembro manipud iti bishopda iti maysa a temple recommend tapno mangannong kadagiti pangisaup (proxy) a panagbuniag ken kumpirmasion para kadagiti pimmusay a kapuonanda ken dadduma pay. Maikari ti maysa a miembro nga umawat iti daytoy a recommend mangrugi iti Enero ti tawen a panagtawenna iti 12. Nasken nga addaan iti Aaronic Priesthood dagiti lallaki tapno maikarida. Allukoyenyo dagiti baro a miembro a makagun-od iti maysa a recommend iti kabiitan a panawen no nainkalintegan.

No asideg ti maysa a templo, kuyogenyo dagiti baro a miembro no mabalin. Makiramankayo a kaduayo ida kadagiti ordinansa iti templo.

Panagadal iti Nasantuan a Kasuratan

• Doktirna ken Katulagan 128; 138

• 1 Taga Corinto 15:29

• 1 Pedro 3:18–20; 4:6

Ammuem ti Ad-adu pay maipapan iti Daytoy a Pagbatayan

• Sapasap a Handbook, chapter 28: “Dagiti Ordinansa iti Templo para kadagiti Pimmusay”

• Gospel Topics: “Baptisms for the Dead,” “Family History”

Dagiti Awis

• Agsaganakanto kadi nga umawat kadagiti ordinansa iti templo para kadagiti pimmusay a kapuonan?

• Makiramankanto kadi iti aramid iti family history ket isumitem ti nagnagan dagiti pimmusay a kapuonan nga umawat kadagiti ordinansa iti templo?

Dagiti Templo, ti Endowment, Agnanayon a Kallaysa, ken Agnanayon a Pamilia

Dagiti Templo

Ti templo ket ti balay ti Apo. Daytoy ti maysa a nasantuan a lugar a mabalin a pagaramidantayo kadagiti katulagan iti Dios bayat ti panangawattayo kadagiti sagrado nga ordinansana. Bayat ti panangtungpaltayo kadagitoy a katulagan, maaddaantayto iti bileg ti kinadiosan a maiparangarang iti biagtayo (kitaen iti Doktrina ken Katulagan 84:19–22; 109:22–23).

Ti Endowment

Maysa kadagiti ordinansa nga awatentayo iti templo ket maawagan iti endowment. Ti balikas nga endowment kayatna a sawen ti “maysa a sagut.” Daytoy a sagut ti pannakaammo ken bileg ket aggapu iti Dios. Kabayatan ti endowment, agaramidtayo kadagiti katulagan iti Dios a mangibegkes kadatayo Kenkuana ken iti Anakna, ni Jesucristo (kitaen iti kapitulo 1).

Mabalin a maikari dagiti nataengan nga umawat iti bukodda nga endowment iti templo kalpasan ti saan a kumurang a maysa a tawen a pannakaikameng iti Simbaan. Para iti ad-adu pay nga impormasion maipapan iti endowment, kitaen iti Sapasap a Handbook, 27.2.

Agnanayon a Kallaysa ken Agnanayon a Pamilia

Ti nadiosan a plano ti kinaragsak ket mangpabalin kadagiti relasion ti pamilia nga agibtur iti labes ti tanem. Iti templo mabalintayo ti agkallaysa para iti panawen ken iti kinaagnanayon. Naaramid daytoy a posible a makapagdedenna dagiti pamilia iti agnanayon.

Kalpasan a naawat dagiti nagkallaysa nga agassawa ti endowment-da iti templo, mabalinda a mailantip wenno agkallaysa para iti kinaagnanayon. Mabalin a mailantip dagiti annakda kadakuada.

Nasken a tungpalen dagiti agassawa a nailantip iti templo dagiti katulagan nga inaramidda tapno umawat kadagiti bendision ti agnanayon a kallaysa.

Kinasensitibo No Mangisursuro maipapan kadagiti Agnanayon a Pamilia

Mabalin nga addaan ti sumagmamano a tattao kadagiti kasasaad ti pamilia a mamagbalin a saan a makaay-ayo kadakuada nga agdedenna iti agnanayon. Mabalin nga awan ti asawa wenno annak dagiti dadduma ditoy a biag.

Ipalagipyo kadagiti isursuroyo a maysa a plano ti kinaragsak ti plano ti Dios. Tulongan ida a makakita a ti panagbiag iti ebanghelio ita ket mabalin a mangisagana kadakuada para iti agnanayon a pamilia iti masakbayan, uray no umay dayta kalpasan daytoy a biag.

Ania man ti situasion ti pamilia wenno kasasaad ti panagasawa ti maysa a tao, nasken nga agsagana dagiti nataengan nga umawat iti bukodda nga endowment iti templo. Ti panangawat iti endowment-da ket agbalinto a naindaklan a pigsa kadakuada. Tulonganyo pay ida a makakita nga addaanda iti gundaway a mamagkaykaysa kadagiti pimmusay a kapuonan babaen iti aramid iti templo.

Panagadal iti Nasantuan a Kasuratan

• Doktrina ken Katulagan 43:16; 95:8–9; 97:10–16; 109; 131:1–4

Ammuem ti Ad-adu pay maipapan iti Daytoy a Pagbatayan

• Sapasap a Handbook, kapitulo 27: “Dagiti Ordinansa iti Templo para kadagiti Sibibiag”

• Gospel Topics: “Temples,” “Endowment,” “Marriage”

• temples.ChurchofJesusChrist.org

Awis

Agsaganakanto kadi a dumar-ay iti templo ken umawat kadagiti ordinansa iti templo?