“Mwakoro 4: Ukora ao Katan iroun te Tamnei,” Tataekina Au Euangkerio: Te Kairi nakon Tibwaan Ana Euangkerio Iesu Kristo (2023)

“Mwakoro 4: Ukora ao Katan iroun te Tamnei,” Tataekina Au Euangkerio

Mwakoro 4

Ukora ao Katan iroun te Tamnei

Iangoa Aio

Tera ae I kona ni karaoia ni karekea te Tamnei ae Raoiroi i nanon maiu ao ana beku te mitinare?
Tera taben te Tamnei aei ae Raoiroi n te rairaki?
N na kanga ni buokiia aomata ake ti reireiniia n namakina ana kakairi te Tamnei ae Raoiroi?
N na kanga ni karika au tataro bwa e na uaana?
N na kanga n reiakinna ni kinaa ana wirikiriki te Tamnei ae Raoiroi?

Ukora Ana Kairi te Tamnei ae Raoiroi

Ana bwaintangira te Tamnei ae Raoiroi bon teuana ana bwaintituaraoi te Atua ae korakora are e anganiia Natina. E bon kakawaki i nanon am mwakuri ngkai te mitinare. Ko kainanoa te kairi, te kaotioti man mwaakan te Tamnei are e Raoiroi ngkai ko buokiia aomata bwa ana bwabetitoaki, kamatoaki, ao n rairaki.

Karekean ana kairi te Tamnei ae Raoiroi i nanon maium e kainanoa te mwakuri n tamnei. Te mwakuri aei e ikota te nanomwaaka n tataro ao kateimatoan kamatebwaian booki aika tabu. E reitaki naba ma kawakinan am berita aika tabu ao ana tua te Atua (taraa Motiaea 18:8–10, 13). E reitaki ma taum n anaa te toa ni katoa wiiki (taraa Reirei ao Berita aika Tabu 20:77, 79).

Ti kaaitarai kainnanora aika kakaokoro ao aroaro ni katoa bong. Te wirikiriki mairoun te Tamnei e na buokiko n ataia bwa tera ko na karaoia ao n taekinna. Ngkana ko ukoria ao ni mwakuri iaon wirikiriki aikai, te Tamnei ae Raoiroi e na kaotaa am konabwai ao mwakuri n ibuobuoki nakon are e riaon are ko konaa ni karaoia i bon iroum. E na buokiko n aro nako i nanon am beku ni mitinare ao i nanon maium. (Taraa 2 Nibwaai 32:2–5; Aramwa 17:3; Ereman 5:17–19; Reirei ao Berita aika Tabu 43:15–16; 84:85.)

“Ni boong aika i mwaiira, e na bon aki kona ni kamaiuaki tamneira n akean te kawakinaki, kairaki, karaunano, ao reitinakon ana kakairi te Tamnei ae Raoiroi (“Revelation for the Church, Revelation for Our Lives,” Riaona, Meei 2018, 96).

Ootan Kristo

Ootan Kristo “a bane n anganaki aomata bwa aonga n ataa te raoiroi ma n te buakaka” (Moronaai 7:16; taraa kiibu 14–19; taraa naba Ioane 1:9). Ootan Kristo bon te kakukurei, te ataibwai, ao kaikairi are e anga rinanon Iesu Kristo. Te kakairi aei bon te katauraoi ae kakawaki ni butimwaea ana bwaintituaraoi te Tamnei ae Raoiroi. E na kairiia koraki ake a karekea n reiakinna ao ni maiuakina ana euangkerio Iesu Kristo ae kaokaki.

Te Tamnei ae Raoiroi

Rabwatan te Tamnei ae Raoiroi

Te Tamnei ae Raoiroi bon te kateniman n Aro n Atua. Ngaia bon te rabwata n tamnei ao akea rabwatana ae te iriko ao te rii. (taraa Reirei ao Berita aika Tabu 130:22). Bon ngaia te tia Karaunano, are e beita te Tia Kamaiu e na reireiniia taan Iriiria bwaai ni kabane ao ni kaurgiia bwa tera e reireiia Iesu. (taraa Ioane 14:26).

Mwaakan te Tamnei ae Raoiroi

Te kakoaua are e roko nakoia taan ukoukora te koaua i mwain te bwabetito e roko rinanon mwakaan te Tamanei ae Raoiroi. Ni kabane aomata a kona ni karekea te kakoaua iroun Iesu Kristo ao Ana euangkrio ae kaokaki rinanon mwaakan te Tamnei ae Raoiroi. “Man mwaakan te Tamnei are e Raoiroi [ti] na kona n atai koauan bwaai ni kabne” (Moronai 10:5).

Te Bwaintiuaraoi ae te Tamnei ae Raoiroi

Ana bwaintituaraoi te Tamnei ae Raoiroi e bon riai n teimatoa raoraonakira iroun te Tamnei ae Raoiroi ngkana ti bon tau. Ti karekea ana bwaintuaraoi te Tamnei ae Raoiroi i mwin are ti bwabetitoaki n te ran. E bon anganakii rinanon te otenanti ni kamatoaaki.

E taku te Burabeti Iotebwa Timiti: “Iai te kaokoro i marenan te Tamnei ae Raoiroi ao te bwaintituaraoi te Tamnei ae Raoiroi. Korenerio e karekea te Tamnei ae Raoiroi i mwain ae bwabetitoaki, are bon mwaakan te Atua nakoina man koauan te Euangkerio, ma e aki karekea ana bwaintituaraoi te Tamnei ae Raoiroi ni karokoa e tia ni bwabetitoaki” (Ana Reirei te Beretitenti n te Ekaretia: Iotebwa Timiti [2007], 97).

Bon man mwaakan ana bwaintituaraoi te Tamnei ae Raoiroi are ti bon katabuaki—karaoaki ni mimitong, bwanin riki, tabwanin riki, ai aron te Atua. Bon rinanon kabooara iroun Kristo ao mwaakan te Tamnei ae Raoiroi ae tabu are ti kona ni bungiaki kaua ngkana ti kawakin berita aika tabu are ti karaoi ma te Atua (taraa Motiaea 27:25–26).

Te Tamnei ae Tabu n te Berita

Te Tamnei ae Raoiroi e bon taekinaki naba bwa te Tamnei ae Tabu n te Berita (taraa Reirei ao Berita aika Tabu 88:3). I nanon te konabwai aei, e kamatoaa te Tamnei ae Raoiroi bwa te otenanti n te nakoanibonga are ti karekea ao berita aika tabu ake ti karaoi a butimwaeaki iroun te Atua. Koraki ake a kabaeaki iroun te Tamnei ae Tabu n te Berita a na bane ni karekea are iai iroun te Atua (taraa Reirei ao Berita aika Tabu 76:51–60; Ebera 1:13–14; Bwai ni Kairi nakon Koroboki aika Tabu, “Tamnei ae Tabu n te Berita”).

Ni kabane otenanti ao berita aika tabu a riai ni kabaeaki iroun te Tamnei ae Tabu n te Berita n akea taina i mwin te maiu aei (taraa Reirei ao Berita aika Tabu 132:7, 18–19, 26). Te kabaeaki anne e nakon ara kakaomaki ae reitinako.

Ana Bwaintituaraoi te Tamnei

Te Uea e anganiira ana bwaintituaraoi te Tamnei ni kakabwaiaira ao ni kabongana ni kakabwaiaia tabeman (taraa Reirei ao Berita aika Tabu 46:8–9, 26). Te katooto, mitinare ake a reiakina te taetae ae boou a na karekea te bwaintangira n te newe n anganiia te buoka mai ieta n reireiniia tabeman n oin aia taetae n abaia.

Tabeua ana bwaintituaraoi te Tamnei a kabwarabwaraaki i nanon Moronaai 10:8–18, Reirei ao Berita aika Tabu 46:11–33, ao 1 I Korinto 12:1–12. Aikai bon tii tabeua man mwaitin ana bwaintituaraoi te Tamnei. E na kakabwaiaiira te Uea ma tabeua bwaintituaraoi n ara kakaonimaki, kainanora, ao kainanoia tabeman.

E kaoira te Te Tia Kamaiu bwa ti na ukoukora te bwaintituaraoi n tamnei (taraa Reirei ao Berita aika Tabu 46:8; 1 I Korinto 14:1, 12). Bwaintituaraoi aikai a roko man te tataro, te onimaki, ao te kekeiaki—ao ni kaineti nakon ana kaantaninga te Atua.

Am Kamatebwai ke Ibukim ma Toam

I nanon te Bible Dictionary, warekaki “Holy Ghost,” “Light of Christ,” ao “Spirit, the Holy.” Koroi kabwarabwaraan aron ao ana mwakuri te Tamnei ae Raoiroi.

Wareka Mwakuri 4:1–33.

A kanga Betero ao Ioane ni ukorii ana bwaintituaraoi te tamnei?
E kanga te Atua ni kaekai aia tataro?
Tera ae ti kona n reiakinna man te taneiai aei n ibukin am mwakuri?

Mwaakan te Tamnei n te Rairaki

Te rairaki e riki rinanon mwaakan te Tamnei ae Raoiroi. Am mwakuri bon buokan uotakin mwaakan te Tamnei i nanon maiun te aomata. Kawai tabeua are ko konaa iai ni karaoa aei a taekinaki i nano.

Ukoria ni karekea te Tamnei iroum rinanon te tataro, warewarei ni koroboki aika tabu, ao kawakinan am berita aika tabu.
Reirei mairoun te Tamnei i aon te Tia Kamaiu ao rongorongon Kaokanbwaai. Iriira ana kairiiri te Tamnei ni kanakoraoa am rongorongo nakon kainanoia aomata n tatabemania.
Anga am kakoaua ngkai ko ataia man mwaakan te Tamnei ae Raoiroi bwa bwaai are ko reireiia e bon koaua. Ngkana ko kakoaua, te Tamnei ae Raoiroi e konaa ni kaota te kakoaua nakoia tabeman.
Kaoiia aomata ni beku, ao boutokaiia ni kawakin aia motinnano. Ngkai aomata a kawakin aia motinnanop, a na namakina mwaakan te Tamnei ae Raoiroi riki ni korakora. Taraa mwakoro 11.
Ririmwiina man titirakinaia aomata taekan aia taneiai ngkai a mwakuriia te kakao. Aia onimaki e na rikirake ngkana a rairinanoia, ongeaaba nakon tuua, ao ni kawakin aia motinnano. Buokiia bwa a na kinaa te Tamnei ni mwakuri ma ngaiia.

E reirei Beretitenti M. Russell Ballard: “Te rairaki ni koaua e roko man mwaakan te Tamnei. Ngkana te Tamnei e riinga te nano, a bitaki naano. N tatabemaniia ngkana … a namakina te Tamnei ni mwakuri ma ngaiia, ke ngkana a noori kakoaua n ana tangira ao nanoanga te Uea i nanon maiuia, a kairaki ao ni kakorakoraki n te maiu n tamnei ao aia onimaki Irouna e rikirake. Taneiai aikai ma te Tamnei e iriira te aomata ngkana e bon kukurei ni kakatai iaon te taeka [taraa Aramwa 32:27]. Aio arona bwa ti kanga n namakina koauan te euangkerio” (“Now Is the Time,” Ensign, Nobembwa 2000, 75).

Am Kamatebwai ke Ibukim ma Toam

Kamatebwaia teuana ke raka man rongorongo aika i mwiina. Ngkana ko warekia, ukoria bwa ko na oota bwa tera ana namakin te aomata ni waakin te rairaki. Koroi am namakin i nanon am tienero. Maroroakin am noonori i aona ma tabeman mitinare ao membwa.

2 Nibwaai 4:16–35; Enoti 1; Motiaea 4–5; 18:7–14; 27–28; Aramwa 5; 17–22; 32; 36; 38
Kamatebwaia teuana ke raka man rongorongo aika i mwiina. Ngkana ko warekia, iangoia bwa ko na kanga ni katamaroa am reirei ma mwaakan te rairaki iroun te Tamnei. Korei mwiin am namakin i nanon am tienero ni kamatebwai. Maroroakin am iango ma tabeman mitinare ao membwa.

1 Nibwaai 8:11–12; Motiaea 28:1–4; Aramwa 26; 29; 31:26–38; 32; Moronaai 7:43–48; Reirei ao Berita aika Tabu 4; 18:10–16; 50:21–22.

Kamatebwaian Koroboki aika Tabu

Tera ae a reireiia koroboki aika tabu aikai i aon mwaakan te Tamnei i nanon am mwakuri?

Tera ae ko kona ni karaoia ni karekea mwaakan te Tamnei i nanon am mwakuri?

Tataro ma te Onimaki iroun Iesu Kristo

Ni buokiia tabeman n rairaki, ko kainanoia n reirei man mwaakan te Tamnei (taraa Reirei ao Berita aika Tabu 50:13–14, 17–22). E taku te Uea, “Ao kam na anganaki te Tamnei man te tataro n onimaki ao ngkana kam aki karekea te Tamnei kam na aki anga reirei” (Reirei ao Berita aika Tabu 42:14).

Ngkana ko tataro ibukin te buoka n am angareirei, mwaakan te Tamnei ae Raoiroi e na uota am angareirei “nako nanoia natiia aomata” (2 Nibwaai 33:1). Ngkana ko reirei man te Tamnei ao tabeman a na butimwaaia iroun te Tamnei, ko na “oota imarenaia” ao n riki “ni uaia ni karikirakeia ao a uaia ni kimwareirei” (Reirei ao Berita aika Tabu 50: 22).

Aron te Tataro

E reireiniira Iesu arora n tataro (taraa Mataio 6:9–13; 3 Nibwaai 18:19). Tataro ni koaua ao ma te nano ni koaua n mwakuri i aon te wirikiriki are ko karekea mairoun te Tamnei ae Raoiroi. Waekoan te tataro e kainanoa te nanorinao, raonaki me te kekeiaki (taraa Moronaai 10:3–4; Reirei ao Berita aika Tabu 8:10).

Kabonganai taetae are e kaota te tatangira, tataromwaaka n reitaki ma te Atua. N te taetae ni Imatang, kabonga taetae i nanon koroboki aika tabu n aron Thee, Thou, Thy, ao Thine nakon riki taekinakina ae tabangaki ngkoe, am, ao ami.

Kakaota te kakaitau n taainako. Te kakaitau n te kekeiaki ae teimatoa e na buokiko ni kinaa bwa e kanga ana nanoanga te Atua n tia riki i nanon maium. E na kauka nanom ao am iango nakon te kairi mai ieta.

Tataro “ma korakoran nanomi ni kabane” ibukin te tangira ae kororaoi ni kaonaki i aomi (Moronaai 7:48). Tataro ibukia tabeman ni manewei araia. Tataro ibukiia koraki ake ko reireiniia. Ukora te kairi mai ieta bwa ko na kanga ni kaoiia ao ni buokiia n roko nakon Kristo.

Am Kamatebwai

Kamatebwaia ana tataro te Uea i nanon Mataio 6:9–13. Iangoia n titirakiniko titiraki aikai, ao korei am kaeka n te bokinikoroboki ke n te tienoo ni kamatebwai.

E kanga katabeam ni mitinare ae ngkai n roota aron am tataro?
N te kawai raa ae am tataro e ukori kakabwaiakin maiuia tabeman?
Ko na kanga n tataroakinna bwa ko na n tokanikai iaon taian kariirii?
Ko na kanga n tataro ibukin te buoka ni kakoroa kainanom n te maiun rabwata ao tamnei?
Ko kanga ni kamimitonga te Atua ngkana ko tataro?

Ningai te Tai n Tataro

Ningai ae ko riai n tataro iai? E taku te Uea, “Ukeuke ma te nanomwaaka, n tataro n taainako, ao n onimaki, ao ngkanne bwaai ni kabane a na kaai ni mwakuri ibukin ae raoiroi” (Reirei ao Berita aika Tabu 90:24).

E taku Aramwa, “Reitaki ma te Uea n am waaki ni kabane, ao e na kairiko nakon ae raoiroi; eng, ngkana ko wene n te bong wene i nanon te Uea, bwa e na tararuaiko n am tai ni matu; ao ngkana ko teirake n te ingabong taraia bwa e na onrake nanom ni karabwarabwa nakon te Atua; ao ngkana ko karaoi bwaai aikai, ko na uotaki rake n te kabanea ni bong” (Aramwa 37:37; taraa naba 34:17–27).

E kaoiko te Uea bwa kona kawakina te rau, karekea am tai n tataro ae onoti: “Riin n am ruu, ao … tataro nakon Tamam ae raba” (3 Nibwaai 13:6; taraa naba kiibu 7–13).

E reirei Beretitenti Gordon B. Hinckley: “Ni katoa moaningabong … , mitinare a riai ni katorobubua ni bubutia te Uea ni kabwarai neweia ao taetae n rinanoia ni kakabwaia koraki ake a reireiniia. Ngkana a karaoa aei, te oota ae boou e na roko i nanon maiuia. Ikanne e na korakoraa te ungannano ibukin te mwakuri. A na bon ataia bwa ni koauan aia namakin, ngaiia bon ana toro te Uea n taetaei Ibukina” (“Mwakuri ni Mitinare,” First Worldwide Leadership Training Meeting, Tianuare 11, 2003, 20).

Onimakina te Atua Ngkana Ti Tataro

Onimakinan te Atua nanona onimaki Irouna. Aei e reitaki ma onimakinan Ana kaantaninga ao Ana tai ni kaekaan am tataro (taraa Itaia 55:8–9). E reirei Beretitenti Dallin H. Oaks:

“E aki taraaki bwa matoara ara onimaki, e aki kona ni reke mwiina ae kaitaraaki ma Ana kaantaninga iroun are ti onimakinna. Uringnga bwa ngkana a aki kaekaaki am tataro n te kawai ke nakon taina are ko tangira. Kamwakuran te onimaki iroun te Uea Iesu Kristo e bon tauaki nakon te baaire mai karawa, nakon te raoiroi ao kaantaninga ao wanawanan ao ana tai te Uea. Ngkana ti karekea te aeka n onimaki ao onimakinan te Uea, ti na karekea te tararua ao te rau i nanon maiura” (“Te Mwakuri ni Kamaiu ao te Onimaki,” Ensign, Eberi 2010, 30).

Ibukin tataro ake a taraa n aki kaekaaki, e taku Beretitenti Russell M. Nelson:

“I ataa te namakin anne! I ataa te maaku ao rannimata n taai n aron akanne. Ma I ataia naba bwa ara tataro a bon aki mwanuokinaki. Ara onimaki e bon aki konaa n ae e na aki butimwaeaki. I ataia bwa ana nonoori te Atua i aon wanawana ni kabane e rang raababa nakon are iroura. Ngkai ti atai ara kangaanga n te maiu aei ao maraki, E atai rikirakera ae e aki mamate ao konabwaira. Ngkana ti tataro ni kan ataa Ana kantaninga ao n anga ngaira nakon te taotaonannano ao te ninikoria, te kamarurung mai karawa e konaa n roko i nanon oin Ana kawai ao ana tai” (“Iesu Kristo—Mataniwi n te Kamarurung,” Riaona, Nob. 2005, 86).

Reiakinna ni Kinaa Ana Wirikiriki te Tamnei

E rang kakawaki ibukim ao aomata ake ko reireiniia n reiakinna bwa kam na kinaa te reitaki ma te Tamnei. Te Tamnei e teimatoa e reitaki n ae beebete, rinanon am namakin, iango ao nanom. Te burabeti Eria e kunea bwa bwanaan te Uea bon aki mena n te ang, te maiei, ke te ai—ma bon te bwanaa ae “maraara n rau” (1 Uea 19:12). Bon ti aki “te bwanaa ae kanga te baa,” ma bon “te bwanaa ae rau ae kororaoi beebetena,” ao e ninianako te tamnei” (Ereman 5:30).

Te reitaki mairoun te Tamnei e kona n namakinaki kaokorona nakoia aomata aika kakaokoro. N aki taraaki bwa e kanga namakin n reitaki aikai, koroboki aika tabu e reirei bwa ti na kanga ni kinaiia. Te katooto, te Tamnei e na reireiniko ao ni kairiko ni karaoa te raoiroi. E na kaotaa am iango. E na kairiko n nakonako n nanorinano ao motikitaeka n ae etieti. (Taraa Reirei ao Berita aika Tabu 11:12–14 ao te “Kamatebwai I Bon Iroum” baoki i mwina n te mwakoro aei.)

I nanon kaekaan te titiraki “Ti na kangaa ni kinaa ana wirikiriki te Tamnei?” Beretitenti Gordon B. Hinckley Moronaai 7:13, 16–17. Imwiina e taekinna:

“Anne bon te tutuo, ngkana a taekinaki ni kabane ao a tia. Tao e kairoroa temanna ni karaoa ae e raoiroi, n rikirake, n tei n rietaata, ni karaoa te bwai ae eti, n akoi, ni moaaomata? Ngkanne bon Tamnein te Atua. …

“… Ngkana te kakao ni karaoan ae raoiroi, bon mairoun te Atua. Ngkana e kakao ni karaoan ae buakaka, bon mairoun te riaboro. … Ao ngkana ko karaoi bwaai aika eti ao ngkana ko maiuakina te kawai ae eti, ko na bon ataia i nanom bwa tera ae taekinna nakoim te Tamnei.

“Ko na kinaa ana wirikiriki te Tamnei man uaan te Tamnei—are e kaotaia, are e kateia rake, are e raoiroi ao ni kamatoaira raoi ao ni kakorakoraira ao ni kairiira nakon iango aika raraoi riki ao taeka aika raraoi riki ao mwakuri aika raraoi bon mairoun Tamnein te Atua” (Ana Reirei Beretitenti Gordon B. Hinckley [1997], 260–61).

Ngkai ko ukora ao n ira ana kairiiri te Tamnei ae Raoiroi, am konabwai ni karekea te atatai ao te mataata n Ana wirikiriki te tamnei e na rikirake n tainako (taraa 2 Nibwaai 28:30). I nanon kawai tabeua, te toma riki nakon ana taetae te Tamnei bon titebo ma reiakinan te taetae teuana. Bon te waaki ae karaurau are e kainanoa te nanomwaaka, te mwakuri n taotaonakinanno.

Ukoukora ana kairiiri te Tamnei ae Raoiroi ma te nano ae on n te kaantaninga. Ngkana ko katabeko ma bwaai tabeua, ko bon aki konaa n namakina ana wirikiriki ae aamarau te Tamnei. Ke E na bon tataninga ni reitaki ni karokoa ko ukora Ana kakairi ma kukurein nanom ae nanorinano ni mwakuri i aon Ana wirikiriki.

Taian bwanaa n te aonaaba a tabwanin ibukin ataakina iroumi. A konaa ni kaotinakoi namakin n tamnei ni karokoa ko karekea nnen te Tamnei i nanom. Uringnga te reirei aei mairoun te Uea: “Tei moa, ao kam na ataai bwa te Atua Ngai” (Taian Areru 46:10; see also Reirei ao Berita aika Tabu 101:16).

“Te Atua e kabonganai baeten aika mwaiti ni kanakoi kaotioti nakoia Natina mwaane ao aine, n aron taian iango nakon te iango ao namakin n te nano, mii, … ao kairi mai ieta. Tabeua kaotioti a karekeaki ni waekoa ao ni kaingainga, tabeua a bon kinaaki ni karaurau ao ni burenibwai noorana. Karekeana, kinaakina, ao kaeka nakon te kaotioti mairoun te Atua bon bwaintituaraoi n tamnei are ngaira ni kabane ti riai ni ingainga ao n ukoria raoi” (David A. Bednar, “Tamnein te Kaotioti inanon te Mwakuri,” 2018 te tiemina irouia taan kairiiri n te mition).

Am Kamatebwai

Kamatebwaii koroboki aika tabu i nanon te taibora ae i mwiina. Iangoi taai ngkana ko a tia n taneiai man taian namakin, iango, ke namakin ake a kabwarabwaraaki i nanon kiibu aikai. Ngkana ko kamatebwai ao ko karekea te taneiai, ikotii ma tabeua koroboki aika tabu nakon te rinan aei. Iangoia bwa kona kanga ni kona ni kabonganai moan tuua ni buokiia tabeman n namakina ao ni kinaa te Tamnei.

Reirei ao Berita aika Tabu 6:23; 11:12–14; 88:3; Ioane 14:26–27; I Rom 15:13; I Karatia 5:22–23	Anga namakinan te tangira, kimwareirei, rau, mweeraoi, nanorinano, nimamannei, onimaki, ao kaantaninga.
Aramwa 32:28; Reirei ao Berita aika Tabu 6:14–15; 8:2–3; 1 I Korinto 2:9–11	E kamataata ao e anga taian iango nakon te kantaninga ao te namakin n te nano.
Rongorongon—Iotebwa Timiti 1:11–12	E buokii koroboki aika tabu ni karekea mwiina ae matoa.
Aramwa 19:6	Onea mwiin te rotongitong ma te oota.
Motiaea 5:2–5	Kakorakoraa te nano n totokoa te buakaka ao n ongeaaba nakon tuua.
Moronaai 10:5; Reirei ao Berita aika Tabu 21:9; 100:8; Ioane 14:26; 15:26; 16:13	Reirei koaua ao uotii nakon kaururingaia.
Reirei ao Berita aika Tabu 45:57	Kairiira ao kamanoira man te mwamwanaaki.
2 Nibwaai 31:18; Reirei ao Berita aika Tabu 20:27; Ioane 16:13–14	Kamimitonga ao kaotiota taekan te Atua ao Iesu Kristo.
Reirei ao Berita aika Tabu 42:16; 84:85; 100:5–8; Ruka 12:11–12	Kairii aia taeka taan reirei aika nanorinano.
Moronaai 10:8–17; Reirei ao Berita aika Tabu 46:8–26; 1 I Korinto 12	Anga ana bwaintituaraoi te tamnei.
Reirei ao Berita aika Tabu 46:30; 50:29–30	Taekinna bwa tera ko tataro ibukina.
2 Nibwaai 32:1–5; Reirei ao Berita aika Tabu 28:15	Taekinna bwa tera ko na karaoia.
1 Nibwaai 10:22; Aramwa 18:35	Buokiia ake a raoiroi n taetae ma te mwaaka ao te kariaiakaki.
2 Nibwaai 31:17; Aramwa 13:12; 3 Nibwaai 27:20	Katabuaki ao uotii kamaunaan buure.
1 Nibwaai 2:16–17; 2 Nibwaai 33:1; Aramwa 24:8	Uotii koaua nako nanoia taan ongora.
1 Nibwaai 18:1–3; Te Otinako 31:3–5	Karikirakei rabwakau ao konabwai.
1 Nibwaai 7:15; 2 Nibwaai 28:1; 32:7; Aramwa 14:11; Moomon 3:16; Ita 12:2	Kairoroia waaki rake ke taua rikaaki.
Reirei ao Berita aika Tabu 50:13–22	Kaai n reireiniia te tia reirei ao ataein te reirei.

Katan iroum te Tamnei

Ngkai ana toro te Uea, ko na karaoa Ana mwakuri n Ana kawai ao man Mwaakana. E reirei te Burabeti Iotebwa Timiti bwa, “ akea te aomata ae kona n taetaekina te Euangkerio n akea te Tamnei ae Raoiroi (Ana: Iotebwa Timiti, 332).

Onimakina te Tamnei bwa e na kairiko i nanon waakin nako am mwakuri. E na kamataatako ao ni kaungako. E na buokiko ni kuneia aomata ake kona reireiniia ao ni uota te mwaaka nakon am angareirei. E na ibuobuoki ngkai ko buokiia membwa, membwa ake a oki, ao taan rairaki aika boou ni kakorakoraaki aia onimaki.

Tabeman mitinare a namakina te onimakinaki i bon irouia. Tabeman akea onimakinaia i bon irouia. Nanorinano ni katuka am kakoaua ao onimaki iroun Iesu Kristo, ti aki i bon iroum. Katan iroun te Tamnei nakon riki are oin am taarena ao rabakaum. Te Uea e na kaotaa am kekeiaki nakon are e riaon are ko kona ni karaoia iroum.

Kamatebwaian Koroboki aika Tabu

Kamatebwaia koroboki aika tabu aikai ao iangoia bwa a kanga ni kaekai titiraki aika kakawaki are ko riai n titiraki ni katoa bong. Ko na kanga ni kamwakuri angareirei aikai inanon mwakoro ao kiibu nakon am kekeiak ni kunei, babaire n tetere, ao ami kamatebwai i bon iroum ao toam? Ko na kanga ni kamwakurii mwakoro ma kiibu aikai nakon am kekeiaki n reirei, kaoiia aomata ni karaoi aia motinnano, ao tutuoi motinnano?

Iaa ae N na riai n nako iai?

Tera ae I riai ni karaoia?

Tera ae I riai n taekinna?

N na kaanga ni kabonganai koroboki aika tabu i nanon au angareirei?

Tabeua Taeka A na Taraaki Raoi

Kamatoa Am Namakin ma Bwaai aika a na Onimakinaki

Ngkana ko tataro ibukin te kairi mai ieta, kabotaua am namakin n tamnei ma koroboki aika tabu ao aia angareirei burabeti aika maiu. Namakin mairoun te Tamnei a na nakoraoi ma bwaai akanne.

Ukora te Kaotioti n karaoan Katabeam

Kakoaua raoi bwa te namakin are ko karekea e bon boraoi ma katabeam. Ti ngkana ko weteaki man te kariaiakaki, taian namakin mairoun te Tamnei ko aki anganaki n reireiia ke ni kaetiia tabeman. Te katooto, ko aki karekea te kaotioti bwa ko na tuanga te bitobi bwa tera ae riai ni karaoia i nanon nakoana.

Kinaa raoi Ana Kakairi ni koaua te Tamnei

E reirei Beretitenti Howard W. Hunter: “N na anganiko au taeka bwa kam na taratara raoi. … I kangai bwa ngkana ti aki taratara raoi … , ti na kona ni moanna ni kauntabaa ana kakairi ni koaua Tamnein te Uea man rongorongo aika a aki taun ao burebureaki. I karekea mutiakinana ngke e roko ni matoa te namakin ke raninimata aika bwaro are e boraoi ma rokon te Tamnei. Ni koauana Tamnein te Uea e konaa ni uotii taian namakin aika korakora, n ikotaki ma rannimata, ma bwaai akana kaotaki ana akea te nanououa iai ma rokon te Tamnei bon ngaia” (Ana Reirei Howard W. Hunter [1997], 184).

Tai Kataia ni Kairoroi Bwaai n Tamnei

Bwaai n tamnei aki kona ni kairoroaki. Ko kona n karikirakea te anua ni maiu ma te otabwanin are e kaoa te Tamnei, ao ko kona ni bon katauraoiko ngkoe, ma ko aki kona ni korea te bwai ae taekinaki bwa e kanga ke ningai rokon te kairi mai ieta. Taotaona nanom ao onimaki bwa ko na bon karekea ae ko kainanoia n taina ae riai.

Kawakina te Taneiai n Tamnei ae Tabu

Ngkai te mitinare, ko riai n tarataraa raoi te taneiai n tamnei are ko a tia ni karekea ni maium mai mwaina. Taneiai aikai a bon tabu ao ae e bon ataaki ibukin kamataatakim, reireiam, ke kaetakim.

Mwaitin taneiai aikai a bon riai ni kawakinaki iroum. Tibwaia tii ngkana te Tamnei e taekinna bwa ko kona ni kakabwaiaia aomata man karaoana (taraa Aramwa 12:9; Reirei ao Berita aika Tabu 63:64; 84:73).

Kabongana Am Motikitaeka n Tabeua Bwaai ni Kakairi

N tabetai ti tangria ni kairaki iroun te Tamnei ni bwaai ni kabane. E ngae n anne, n taainako e tangiriira te Uea bwa ti na mwakuri ni kabonganai oin ara motikitaeka aika tamaroa (taraa Reirei ao Berita aika Tabu 60:5; 61:22; 62:5). E reirei Beretitenti DallinH. Oaks:

“Te nano ae kairaki mai iroun te Uea bon te korakora, ma e riai n raonaki ma te atatai bwa Tamara are i Karawa e katikui babaire aika mwaiti ibukin ara rinerine i bon iroura. Karaoan te babaire i bon iroum bon teuana te buoka ibukin te rikirake ae ti riai n rinanona n te maiu ae mamate. Aomata ake a kataia ni bitii karaoan aia babaire bwa e na karaoi te Uea ao ni bubuti ibukin te kaotioti rinanon te rinerine anne ibukin kairakiia a na waekoa ni kunea bwa a na bon aki karekea kairakiia. Te katooto, e na bon kona n riki aio i nanon taai ake te rinerine e aki rangi ni bongana taraakina ke tao butimwaeaki te rinerine.

“Ti riai ni kamatebwai bwaai n ara iango, ni kabongana te mwaaka n iai bukina are e a tia ni kaaki i nanora ara Tia Karikibwai. Ngkanne ti riai n tataro ibukin te kairiiri ao ni mwakuriia ngkana ti karekea. Ngkana ti aki karekea te kairi, ti riai ni mwakuri nakon ara motikitaeka ae tamaroa. Aomata ake a kamatoai nanoia ni ukori kairaki n te kaotioti i aon bwaai ake e aki rineia te Uea ni kairiira iai ana kona n rengani nakon iango aika aki koaua ke te inanonano, ke a kona ni karekea te kaeka rinanon nukan te kaotioti ae bure” (“Our Strengths Can Become Our Downfall,” Ensign, Okitobwa 1994, 13–14).

Kamatebwaian Koroboki aika Tabu

Te katan iroun te Tamnei e bon kakawaki bwa te Uea e kauringiira n aki kakeaa ke uotarikaaki te Tamnei. Tera ae ko reiakinna man mwakoro n taeka man koroboki aika tabu aikai?

Iango ibukin te Kamatebwai ao Karaoana

Am Kamatebwai

Bwenaua te iteraniba nakon uoua te kaoram. Korei taekan te kaoram ane teuana “Tera Ae Karaoia te Uea” ao te kaoram ane teuana “Tera Ae A Karaoia Riaai ke Nibwaai.” Wareka te karaki i aon te Riaona ao te kainikatebe are e uruaki (1 Nibwaai 16:9–31) ke karakinan Nibwaai ngke e kabwaa te kaibuke (1 Nibwaai 17:7–16; 18:1–6). Karinani bwaai aika a riki man te karaki i nanon kaoram ake riai ni mena iai. Iangoia bwa tera te karaki ae konaa n reiakiniko n aron te kairi mai ieta.
Taraa nanon am tienoro ao kunei taai ake ko a tia ni kairaki iroun te Tamnei ke n tia ni kairaki rinanon ana bwaintituaraoi te Tamnei. Iangoa taekaia bwa ningai, iaa, ao bukin tera taneiai aikai a riki. E kanga te Uea ni kaota baina? Ko kanga n namakinna? Ururingakin taneiai aikai e konaa ni buokiko ni kinaa te Tamnei.
Kamatebwaia Aramwa 33:1–12 ao Aramwa 34:17–31. Tera taian titiraki ake a kaekai Aramwa ao Amureki? (Rinanon Aramwa 33:1–2.) A kanga ni kaekai taian titiraki aikai? Tera aia kakoaua are a anga?
E berita te Uea bwa te Tamnei e na kairiira i nanon kawaira aika kakawaki. Ngkai ko wareki mwakoro n taeka aikai, kinaa oin am mwakuri are e kainanoa ana kairiiri te Tamnei. Tera taian moan tua i nanon koroboki aika tabu aikai ae nanonaki ibukin oin am kamatebwai ao am kamatebwai ma toam? ibukin aia bootakin kauntira n te mwaanga, maungatabu n te tioun, mwakuri n ibuobuoki n te bwabetito, ao bootaki tabeua?
Tataro
- 3 Nibwaai 19:24
- I-Rom 8:26
Kairan te Bootaki
- Moronaai 6:9
- Reirei ao Berita aika Tabu 20:45; 46:2

Kamatebwai ma Toam ao te Kaibibiti Toa

Maroroakin taian tataro ake kam angaanga ma toam. A bon kairaki mairoun te Tamnei? Ko kanga ni karekea taian kaeka nakon ami tataro ngkoe ma toam? Ngkana ko tataro ma toam, ko karaoi:
- Ko onimaki bwa te Atua e na anganiko bwa tera ae ko bubuti ibukina i nanon te etieti ao ni kaineti nakon Ana kantaninga?
- Te kakaitau ao te karabwarabwa ibukin te kaeka nakon am tataro?
- Tataro ibukiia aomata man araia ao iangoi kainanoia?
- Tataro ibukiia n tabemaniia nako ao ibukin te Tamnei ni kairiko?
- Kinakin taian kaeka nakon am tataro?
- Tataro ma te motinnano ni mwakuri i aon wirikiriki n tamnei ake ko karekea?
Maroroakin bwa ko na kanga ni ukora te Tamnei ma nanom ni koaua.
Maroroakin kawai aika kaokoro are aomata a kabwarabwa ana kakairi te Tamnei ae Raoiroi. Kawakin rekooti i nanon am tienoro ni kamatebwai iaon taian tibwatibwa mairouia koraki ake ko reireiniia ake a tia ni karaoi i aon aia taneiai ma te Tamnei. Ti na kanga ni buokiia tabeman ni kinaa te kakairi ae tabu aei?

Marooro ni Kauntira, Maungatabu n te Tioun, ao Marooro ni Kauntira ibukiia Taan Kairiiri n te Mition

Ngkana e riai, tuangiia mitinare ni tibwaua te karaki ke te taneiai are a ongo inanon kaoti koaua n te bootaki, taneiai n angareirei, ke tabeua waaki ake a karaoaki. Karaki n tamnei ao taneiai mairouia tabeman aomata ake a taekin e kona ni buokiko ni karikirakea te onimaki ao n kinaa bwa ana te kakairi te Tamnei e bon rababanako kaotakina.
Tuangiia mitinare n anga aia marooro iaon ana mition ao mwaakan te Tamnei ae Raoiroi.
Maroroakina bwa e kanga kabwarabwaran te kakaitau ni buokiko n taraa uarerekena ma e kakawaki n ana kawai te Uea ni kakabwaiako (taraa Ita 3:5; Reirei ao Berita aika Tabu 59:21). Maroroakin kawai ni kaota te kakaaitau.
Iangoia n tuanga te membwa ae boou ni marooro bwa e kanga teuanne ke neienne n anaaki nanoia ni kakairi mairoun te Tamnei ngkana a reiakina taekan te Ekaretia. Tuanga te aomata n tibwaua tii te taneia are teuanne ke neienne a namakinna ngkana e riai.

Taan Kairiiri n te Mition ao Kauntira n te Mition

Ko riai n tuangiia mitinare bwa a na karina te taneiai n tamnei ae riai i nanon aia reta ni katoa wiki nakoim.
I nanon intawiu ke marooro, n taai tabetai tuangiia mitinare taekan aia tataro n te ingabong ao te tairiki. Ngkana e kainnanoaki, reirei ma ngaiia iaon aron karaoan aia tataro riki bwa e na uaana.
Tuangiia mitinare bwa a kanga ni buokiia ake a reireiniia n namakina ao ni kinaa te Tamnei.