Iesu E Angareirei ni Iteran te Aonaaba are i Maeao (Iesu Kristo E Kawara Amerika), iroun John Scott

Mwakoro 5

Kabongana Mwaakan ana Boki Moomon

Iangoa Aio

• E kanga n riki ana Boki Moomon bwa kiingin aan ara ekaretia?

• Bukin tera ngkai e rangi ni mwaakaroiroi ana Boki Moomon ni waakin te rairaki?

• Tera ae reiakinaki n ana Boki Moomon ibukin Iesu Kristo?

• N na kanga ni kabongana ana Boki Moomon ni buokai ao tabeman ni kaaniaki ma te Atua?

• E kanga ana Boki Moomon ni kaekai titiraki ibukin te tamnei?

• N na kanga ni buokiia aomata ni wareware ao ni karekea aia koaua n ana Boki Moomon?

Ana Boki Moomon, n raonaki ma te Tamnei, bon am bwai ni mwakuri ae moan te mwaakaroioi i nanon te rairaki. Aei te boki ni kawai, te rekooti ae tabu ae koreaki ibukin anaakin nanoia aomata ni kabane ae Iesu bon te Kristo (taraa te iteraniba ibukin atuun ana Boki Moomon). N aron ae taekinaki n te kabwarabwara, ana Boki Moomon bon kakoauan taekan Iesu Kristo.” Bon te kakoaua ae anainano bwa te Atua e wetea Iotebwa Timiti bwa e na riki bwa te burabeti ao e kaoka ana euangkerio Iesu rinanona.

te mataroa ma kamatoaana te atiibu are i nuuka

Ana Boki Moomon Bon Kingin Aan ara Ekaretia

E taku te Burabeti ae Iotebwa Timiti bwa ana Boki Moomon bon “kiingin aan ara ekaretia” (kabwarabwaraan ana Boki Moomon). N te tai teuana e taku: “Ngkana akea ana Boki Moomon ao taian kaotioti, ao e nga ara aro? Bon akea ae na reke” (Aia Reirei Burabeti n te Ekaretia: Iotebwa Timiti [2007], 196).

Te aati bon te bwa ae kateaki ae karaoaki man mwakoro ni buriki ae katokatokaaki teuana iaon are teuana. Te mwakoro are mai nuuka, ke te atiibu, e bon bubura nakon mwakoro ake tabeua ao e karika matoana. .

E taku Beretitenti Ezra Taft Benson bwa ana Boki Moomon bon kiingin aan ara ekaretia n aanga aika teniua:

Te Tia Kakoaua ibukin Kristo. “Ana Boki Moomon bon kiingin aan ara kakoaua ibukin Iesu Kristo, are boni Ngaia kiingin aan bwaai ni kabane ake ti karaoi. E kaotiota koauana ma te mwaaka ao te itiaki.”

Bwaninin te reirei. “E taku te Uea bwa ana Boki Moomon iai inanona ‘bwaninin ana euangkerio Iesu Kristo’ [Reirei ao Berita aika Tabu 20:9; 27:5]. … N ana Boki Moomon ti na kona ni kunea bwaninin [te reirei] are e kainnanoaki ibukin kamaiuara. Ao [e bon] reiakinaki n ae mataata ma ni bebete n te aro are ataei a na kona riki n reiakini taian kawai ibukin te kamaiuaki ao te karietataaki.”

Aan te kakoaua. “N aron ae e na bwaka te aati ngkana e kamwaingaki te atiibu are mai i nuuka, ao ai aron naba te Ekaretia e tei ke e bwaka ma koauan ana Boki Moomon. … Ngkana e koaua ana Boki Moomon … temanna e na butimwaea te kakao nakon te Euangkerio ae kaokaki.” (Aia Reirei Beretitenti n te Ekaretia: Ezra Taft Benson [2014], 129, 131, 128.)

Man karekean am koaua bwa ana Boki Moomon bon ana taeka te Atua, ao ti a kona ngkanne n ataia bwa Iotebwa Timiti bon te burabeti. Rinanona, e kaokaki ana kariaia te Atua ibukin te nakoanibonga irouia taan uarongorongo mai i karawa. Te Atua e angan naba Iotebwa te kariaiakaki bwa e na barongaa ana Ekaretia Iesu Kristo. E reitinako te kaotioti ni boong aikai rinanoia burabeti aika a maiu.

te ataeinimwaane ae wareware ni koroboki aika tabu

Ana Boki Moomon e Kakawaki ibukin Oin Rairakim

Te mwakoro ae kakawaki ibukin te rairaki bon karekean te kakoaua man mwaakan te Tamnei ae Raoiroi bwa ana Boki Moomon e bon koaua. Ngkai ko warekia ao ni kamatebwaia ma nanom ni koaua, ko na namakina ana taeka bwa e na rikirake inanom. A na riki ana taeka bwa kaotaan am atatai ibukin te maiu, n ana babaire te Atua, ao Iesu Kristo (taraa Aramwa 32:28). Tataro ibukin te boki ma te nano ae koaua ao te onimaki iroun Kristo. Ngkai ko karaoa anne, ko na karekea te kakoaua rinanon te Tamnei ae Raoiroi bwa aei ana taeka te Atua (taraa Moronaai 10:4–5).

Am kakoaua n ana Boki Moomon e na kananoa ao ni kamatoatoa am onimaki i nanon mwaakana ni buokiia aomata bwa aonga n rairaki. Buokiia aomata ake ko reireiniia n ataia bwa iai te atatai are a namakinna ngkai a warekia ma nanoia ni koaua. Katuruturua mwaakaroiroin ana kakoaua ibukin Iesu Kristo. Kaungaia bwa a na tataro ni karekea oin aia kakoaua ae e koaua te boki anne.

Kaungakiia aomata n ukora te kakoaua mairoun te Tamnei ae Raoiroi ibukin ana Boki Moomon e na bon riki bwa oin te taratara n am tai n anga reirei. Ana Boki Moomon e kona ni bitii maiuia n aki toki.

Kabongana Ana Boki Moomon n reireia ana Euangkerio Iesu Kristo

E taku te Burabeti ae Iotebwa Timiti, “Ana Boki Moomon [bon] te boki ae te kabanea n eti mai buakon boki nako i aon te aonaba” (kabwarabwaraan ana Boki Moomon). E kaota koauan Kristo ao e anga te reirei iaon Ana reirei aika a bebete (taraa 2 Nibwaa 31; 32:1–6; 3 Nibwaa 11:31–39; 27:13–22). E reireia bwaninin Ana euangkerio. Moan reirei ao otenanti n te euangkerio ake a reiakinaki inanon ana Boki Moomon bon te kawai nakon te maiu ae kaonaki n te kakabwaia.

Kabongana ana Boki Moomon bwa oin buokam ibukin reiakinan ana euangkerio ae e a tia ni kaokaki. Te tiata aei e karinanaki iai tabeua koaua ibukin ana Boki Moomon are ko na anga rerei iaona.

Aia Reirei Mitinare inanon Mwakoro 3	Reirei	Bwaai n Ibuobuki
Aia Reirei Mitinare inanon Mwakoro 3 Te Rongorongo ni Kaokan Bwaninin Ana Euangkerio Iesu Kristo	Reirei Aron te Atua, ana mwakuri te Tia Kamaiu iaon te aba ao ana Mwakuri ni Kamaiu, kitanan te koaua, Kaokan te Euangkerio, Iotebwa Timiti, te kariaiakaki ibukin te nakoanibonga	Bwaai n Ibuobuki 1 Nibwaai 12–14 2 Nibwaai 3; 26–29 Motiaea 2–5
Aia Reirei Mitinare inanon Mwakoro 3 Ana Babaire ni Kamaiu Tamara are i Karawa	Reirei Ana “babaire ae moan te korakora te Atua ae akea tokina,” n ikotaki ma Bwakan Atam ao Ewa, ana Mwakuri ni Kamaiu Kristo, te Mangauti, ao te Motikitaeka	Bwaai n Ibuobuki 2 Nibwaai 2; 9 Motiaea 3; 15–16 Aramwa 12; 34:9; 40–42
Aia Reirei Mitinare inanon Mwakoro 3 Ana Euangkerio Iesu Kristo	Reirei Te Onimaki iroun Kristo,rairannano, bwabetito, ana bwaintituaraoi te Tamnei ae Raoiroi, ao te teimatoa ni uaa te toki	Bwaai n Ibuobuki 2 Nibwaai 31–32 3 Nibwaai 11; 27:13–22
Aia Reirei Mitinare inanon Mwakoro 3 N Riki bwa Ana Reirei Iesu Kristo ni Karokoa Tokin Maiura	Reirei Otenanti n aron te bwabetito, katabuakin te nakoanibonga, ao te toa	Bwaai n Ibuobuki 3 Nibwaai 11:22–28; 18 Moronaai 2:6

Kamatebwaian Koroboki aika Tabu

Tera ana taeka te Tia Kamaiu ibukin ana Boki Moomon?

• Reirei ao Berita aika Tabu 1:29; 3:19–20; 19:26–27; 20:5–16; 33:16; 42:12

• Mote 7:62

Ana Boki Moomon e Kaota Koauan Kristo

Oin te kantaninga ibukin Ana Boki Moomon bwa e na kaota koauan Iesu Kristo. E kamatoa koauan Maiuna, ana mition, mangautina, ao mwaakana. E anga te reirei aika a koaua ibukin Kristo ao Ana Mwakuri ni Kamaiu.

Tabeman burabeti ake a kawakinaki aia koroboki i nanon ana Boki Moomon a noora Kristo n tii ngaia. Tarin Iareta, Nibwaai, ao Iakobwa a noora Kristo n rabwatana n tamnei. A roko aomata aika a rangi ni mwaiti n tain ana mwakuri te Tia Kamaiu ibuakoia Nibwaite (taraa 3 Nibwaai 11–28). Imwiina, Moomon ao Moronaai a noora Kristo n rabwatana ae e a tia ni manga kautaki (taraa Moomon 1:15; Ita 12:39).

Ngkai aomata a waware ao a tataro ibukin ana Boki Moomon, a nang moanna ni kinaa raoi te Tia Kamaiu ao n namakina Ana tangira. E na rikirake aia koaua Ibukina. A na ataia bwa a na kanga n nakoina ao ni kamaiuaki. (Taraa 1 Nibwaai 15:14–15.)

Beretitenti Russell M. Nelson

“Ana Boki Moomon e katauraoi atatai aika bwanin ao ni koaua n ana Mwakuri ni Kamaiu Iesu Kristo ae e reke n taabo nako. E reireia bwa tera raoi ae e nanonaki n te manga bungiaki. … Ti a ataa bukin rokora ikai iaon te aba. Koaua aikai ao ake tabeua a korakora riki kan reiakinaia n ana Boki Moomon nakon booki riki tabeua. Bwaninin mwaakan ana euangkerio Iesu Kristo iai i nanon ana Boki Moomonf Mormon” (Russell M. Nelson, “The Book of Mormon: What Would Your Life Be Like without It?” Riaona, Nobembwa 2017, 62).

Am Kamatebwai

Ni moan am mition ni karokoa banena, korei am kaeka nakon titiraki aikai i nanon am tienoo ni kamatebwai:

• Tera ae ko a tia n reiakinna ibukin Iesu Kristo man am kamatebwai n ana Boki Moomon?

• E kanga am kamatebwai n ana Boki Moomon n roota am koaua ibukin Iesu Kristo?

• Ko na kanga ni kabongana ana Boki Moomon bwa e na buokiia aomata ni kakorakora aia koaua?

Kamatebwaian Koroboki aika Tabu

Tera bukina ngkai burabeti n ana Boki Moomon a korei mwiin rongorongoia?

• 1 Nibwaai 6:4–6; 9:3–5

• 2 Nibwaai 4:15–16; 25:23–29; 26:15–16; 29:11–14; 33:13–15

• Iakobwa 1:4–8; 4:1–6, 12

• Enoti 1:13

• Iarom 1:2

• Ominai 1:25–26

• Ana Taeka Moomon 1:3–8

• Aramwa 37:2, 14

• 3 Nibwaai 5:14–15

• Moomon 8:35

Am Kamatebwai ke Ibukim ma Toam

E koreaki ana Boki Moomon “ibukin anaakin nanaoia [aomata nako] bwa Iesu bon te Kristo” (Iteraniba ibukin atuun ana Boki Moomon). Te taibora ma kanoana aika a karinanaki ikai bon tabeua mwakoro man ana Boki Moomon are a kakoaua maiuna, ana reirei, ao ana mwakuri Iesu Kriso iaon te aba. Rinei tabeua ikota ni kibuntaeka ni karokoa banen am mition.

N raonaki ma anne, iangoi kainnanoia aomata ake ko reireiniia. Baireia bwa ko na wareki tabeua ikota ni kibuntaeka aikai mangaiia ni kakorakora aia atatai ao aia koaua ibukin te Tia Kamaiu.

Iteraniba ibukin atuuna ao kabwarabwaraana	E kamataata raoi oin bukin te boki.
1 Nibwaai 10–11	Riaai ao Nibwaai a kakoaua te Tia Kamaiu.
2 Nibwaai 2; 9	Riaai ao Iakobwa a kakaouaa Iesu Kriso ao Ana Mwakuri ni Kamaiu.
2 Nibwaai 31–33	Nibwaai e reireia taekan ana reirei Kristo.
Motiaea 2–5	Te Uea ae Beniamina e kakoaua iroun Kristo.
Aramwa 5; 7	E kaota ana kakoaua Aramwa iroun te tia Kamaiu.
Aramwa 36	Aramwa e namakina mwaakan ana mwakuri ni kamaiu Kristo.
3 Nibwaai 9–10	E kaoia aomata te tia Kamaiu bwa a na Nakoina.
3 Nibwaai 11–18	E reireiniia Nibwaaite te Tia Kamaiu taekan te Tama ao Ana reirei.
3 Nibwaai 27	Te Tia Kamaiu e reireia Ana euangkerio.
Ita 12	A reirei Ita ao Moomon bwa te onimaki iroun Iesu Kristo bon te reirei ae karaoaki n te mwakuri ao te mwaaka.
Moronaai 7–8	Moomon e reirei iaon ana tangira ae kororaoi Kristo ao Ana Mwakuri ni Kamaiu.
Moronaai 10	E kaokia aomata ni kabane Moronaai bwa a na nakon Kristo ao ni kakororaoaki Irouna.

Ana Boki Moomon e buokiira ni kaniira riki nakon te Atua

Ni kaineti ma ana Boki Moomon, e taku te Burabeti ae Iotebwa Timiti bwa “e na kaan riki te mwaane [ke te aine] nakon te Atua man irirakin nanon reirei ake i nanona, nakon taian boki riki tabeua” (kabwarabwaraan ana Boki Moomon). Man te teimatoa n reirei ao ni kaoiia aomata bwa a na maiuakin reirei i nanon ana Boki Moomon, ko buokiia ni karikirakea aia onimaki iroun Iesu Kristo ao ni kaaniaki riki ma te Atua.

Ana Boki Moomon e karikirakea te kakoaua ao ni kaoa am kaotioti i bon iroum. Kabongana ana Boki Moomon bwa e na buokiia aomata bwa aonga n reke aia taneiai n te maiu n tamnei, ai moarara riki te kakoaua mairoun te Tamnei ae Raoiroi bwa e koaua te boki bwa bon ana taeka te Atua.

Moanbwaia moa koroboki man ana Boki Moomon ngkana ko anga reirei. Iai mwaakaia ni karekea te rairaki rinanon te Tamnei ae Raoiroi. Ngkana ko reireia te euangkerio ni kabongana ana Boki Moomon, e na bootau am anga reirei ma te mwaaka ao te mataata raoi n te nano ao n te iango.

E reirei Beretitenti Gordon B. Hinckley bwa “naake a tia ni wareka [ana Boki Moomon] ma te tataromwaaka, ngkana a kaubwai ke a kainnano, a reirei ke a aki reirei, a na rikirake iaan mwaakana.” E anga ana reirei imwiina:

“N akean te nanououa I berita nakoim bwa ngkana ko wareka ana Boki Moomon ma te tataromwaaka, n aki tabe bwa mwaitira te tai ae ko a tia ni warekia iai, e na kamwaitaki riki Tamnein te Uea ni memena i nanom. E na reke kakorakorakim n nakonako n ongotaeka nakon ana tua, ao e na rang korakora am koaua n koauan maiun Natin te Atua” (“The Power of the Book of Mormon,” Ensign, June 1988, 6).

mitinare a wareware ni koroboki aika tabu

Ana Boki Moomon e Kaekai Titiraki ibukin te Tamnei

Warekan ana Boki Moomon ma ana kairiiri te Tamnei e koni ni buokiia aomata ni karekei aia kaeka ke aia atatai nakon oin aia titiraki—ke titiraki ibukin te tamnei. Buokiia aomata n nooria bwa a na kanga reirei ake inanon ana Boki Moomon ni kaekai titiraki ibukin te maiu.

Tabeua mai buakon titiraki aikai a karinanaki i nano, n raonaki ma bwaai n ibuobuoki ibukin okiran rongorongo n ana Boki Moomon are e maroroakin.

• Iai te Atua? Antai te Atua? (Motiaea 4:9; Aramwa 18:24–40; 22:4–23; 30:44)

• E kinaai te Atua ao e mwannanoai? N na kanga n namakina Ana tangira? N na kanga ni kaan riki ma Ngaia? (2 Nibwaai 26:24; Motiaea 4:9–12; Enoti 1:1–12; Alma 18:32; Moroni 10:32–33)

• Tera bukin te maiu aei? (2 Nibwaai 2:25; Aramwa 34:32)

• Bukin tera n tabetai e rangi ni kangaanga te maiu? N na kanga ni karekea te korakora i nanon taai ni kangaanga? (1 Nibwaai 17:3; 2 Nibwaai 4:20–21; Aramwa 36:3; Ita 12:27)

• N na kanga ni kunea te rau i nanon taai ni kamagaongao? (Motiaea 24:13–15; Ereman 5:47)

• N na Kanga ni Kukurei riki? (Motiaea 2:41; Aramwa 22:15–16)

• N na Kanga n Riki bwa te aomata ae tamaroa? (Motiaea 26:30–31; Aramwa 5:12–13; 7:23–24; Ita 12:27)

• N na kanga n namakina ana kabwarabure te Atua? (Enoti 1:2–8; Aramwa 36:17–21)

• Tera ae na riki imwin mateu? (2 Nibwaai 9:3–6, 11–13; Aramwa 11:42–44; 40:11)

Ana Boki Moomon e katauraoi bwai ni kairi ibukin tabeua titiraki aika a kakawaki, n aron:

• N na kanga n anganano ibukin mweeraoin tamneia au utu? (1 Nibwaai 1:1; 8:36–38; Motiaea 2:5–6; 4:14–15; 3 Nibwaai 18:21)

• N na kanga ni buokiia natiu ni kakorakoraia n totokoa te kariiri? (1 Nibwaai 15:23–25; Ereman 5:12; 3 Nibwaai 18:15, 18–21, 24–25)

• E kanga te ongotaeka nakon ana tua te Atua ni buokai ni karekea maiu ae kakukurei, ao ni kaonaki n te kakabwaia? (2 Nibwaai 2:25–28; 4:35; Motiaea 2:41; 4 Nibwaai 1:15–18)

Beretitenti Dallin H. Oaks

“A riai mitinare n ataia bwa a na kanga ni kabongana ana Boki Moomon ni kaekai aia titiraki n te aro are a na kona ni kabongana n kanakoraoa riki ni buokiia aomata bwa a na karaoa naba aekakin anne. … A riai ni butimwaea mwaakan ana Boki Moomon i nanon reiakinan te euangkerio ae kaokaki, te moan ni maiuakinna i nanon maiuia ao imwiina a tibwauaia nakoia naake a reireiniia” (Dallin H. Oaks, “Counsel for Mission Leaders,” seminar for new mission leaders, Tuun 25, 2022).

Am Kamatebwai ke Ibukim ma Toam

Korei rinanin titiraki ibukin te tamnei ake iroum ke ake ko a tia n ongo mairouia tabeman. Kakaei kiibu i nanon ana Boki Moomon ake e buoki ni kaekai titiraki aikai. Korei nonoori ao bwaai n ibuobuoki n ana Boki Moomon i nanon am tienoo ni kamatebwai. Kabonganai ngkana ko anga reirei.

Ana Boki Moomon ao te Baibwara a Boutoka Imarenaia

“E taku te Uea “anga reirei i aon tuan au euangkerio, ake i nanon te Baibara ao Ana Boki Moomon, are i nanona bon bwaninin te euangkerio” (Reirei ao Berita aika Tabu 42:12). Aika Itiaki ni Boong aika Kaitira “a kakoaua te Baibara ae ana taeka te Atua ngkana e eti rairana” (Taekan te Onimaki 1:8; taraa naba 1 Nibwaai 13:29). Te Baibara bon te koroboki ae tabu. Ana Boki Moomon bon te koroboki ae tabu are iai i nanona bwaninin ana euangkerio Iesu Kristo.

Te Baibara ao ana boki Moomon a uaia ni bwanin ao ni katamaroaia i bon imarenaia (taraa Etekiera 37:16–17; 1 Nibwaai 13:40; Moomon 7:8–9). Kanoan koroboki aika a tabu ni kauoua bon ikotakin reirei ake a koreaki irouia burabeti ake ngkoa. Te Baibara e karakina aron ana reitaki te Atua ma aomata ake a maeka i Mainikun te Aonaaba i nanon tengaa n ririki. Ana Boki Moomon e karakina aron ana reitaki te Atua ma aomata ake iaon Amerika n taai ake ngkoa ae riaon tengaa n ririki.

te aomata ae mwaakena ana boki aika tabu

Ma ae kakawaki riki, te Baibara ao ana Boki Moomon a uaia ni bwanin ni kaotan aia kakoaua ibukin Iesu Kristo. Te Baibara e katauraoa rongorongon bungiakin te Tia Kamaiu, ana mwakuri n te maiu ae mamate, ao ana Mwakuri ni Kamaiu—n ikotaki ma Matena ao Mangautina. Ana Boki Moomon e kaairaki ma taetae ni burabeti ibukin bungiakin te Tia Kamaiu ao ana mition, reirei ibukin Ana Mwakuri ni Kamaiu, ao rongorongon Ana mwakuri iaon te aba ae Amerika. Ana Boki Moomon e kamatoa ao ni karababa ana kakoaua te Baibara bwa Iesu bon Natin te Atua ae ana Rikitemanna ao te Tia Kamaiua te aonaaba.

Te Baibara ao ana Boki Moomon ni kauoua a reireia te tua ni kakoaua: “A kamatoaki ni kabane ni wia taan kaotioti aika uoman ke teniman” (2 I-Korinto 13:1; taraa naba 2 Nibwaai 11:2-3). N teimatoa ma te tua aei, booki aika tabu aika uoua aikai a kakoaua Iesu Kristo (taraa 2 Nibwaai 29:8).

Am Kamatebwai ke Ibukim ma Toam

Kakaei bwaai n ibuobuoki iaon atuu n rongorongo aikai n ana Boki Moomon ao te Baibara. A kanakoaki katooto aikai i nanon taian barentetiti imwiin atuu n rongorongo n tatabeua. Karin oin am atuu n rongorongo ao ikota ni kibuntaeka.

• Burabeti (Iakobwa 4:4–6; Amoti 3:7)

• Kitanan te Koaua (2 Nibwaai 28; 2 Timoteo 4:3–4)

• Kaokan Bwaai (1 Nibwaai 13:34–42; Makuri 3:19–21)

• Ngaira ni kabane bon natin te Atua (1 Nibwaai 17:36; Makuri 17:29)

Buokiia Aomata ni Wareware ao ni Mataata n ana Boki Moomon

Naake aki wareware ke ni mataata n ana Boki Moomon e na bon kangaanga reken aia kakoaua iaona ae e bon koaua. Ko kona ni buokiia ni kamatataia n te boki aei ni warekia ma ngaiia. Wareware inanon am tai ni kaitibo n anga reirei, n am tai ni kakawari n tuoia am aomata, ke iaon bwaai n reitaki. Ko kona ni baronga am tai ni wareware ma membwa. Ni mataku n tamnein ana Boki Moomon ao ni wareki mwakoro aika a ai rekereke a kona n rangi n ibuobuoki.

Tataro ibukin buokam ngkai ko rinei kibuntakea are a na kaekai raoraomaia ao kainnanoia aomata. Wareware ao maroroakin kiibu, n aron 1 Nibwaai 3:7 ke Motiaea 2:17. Wareware ao maroroakin ikota ni kibuntaeka ke mwakoro aika a bwanin, n aron 2 Nibwaai 31, Aramwa 7, ke 3 Nibwaai 18. Kaungaia aomata bwa a na wareka ana Boki Moomon mai moana, n ikotaki ma aia koaua taan kakoaua ake Teniman ao Taan Kakoaua ake Waniman ao ana kakoaua te Burabeti Iotebwa Timiti.

te kiraati n te reirei n tabati

Iangoi kaoti aikai ngkai ko wareka ana Boki Moomon ma aomata:

• Tataro imwaain am wareware. Bubuti buokam bwa ko na mataata raoi. Tataro bwa te Tamnei ae Raoiroi e na kakoaua nakoia bwa e bon koaua.

• Ikaruoruo ni wareware. Waaki nakon aia tai ae a mwengaraoi iai. Kabwarabwarai taeka ao kibuntaeka are a boou iai.

• Tooki imarentai ni maroroakin baike kam warekia.

• Kabwarabwara tein ao taekan ma nanon kibuntaeka, n aron antai ae taetae, aekakira te aomata anne, ao tera te kangaanga. Ngkana iai te birim ae Ana Boki Moomon, ao iangoia ni kaotia nakoia.

• Katerea oin te rongorongo ke te reirei ae ko kakaea.

• Tibwaua am koaua ao nonoori aika riai, namakin, ao am taneiai are ko a tia n rinanona.

• Reireia te reirei ae nako man aia taeka burabeti n ana Boki Moomon. Aei e na buokiia aomata n namakina te tamnei ae korakora ni mwaakan te boki.

• Buokiia aomata ni “kabotaua” te bwai are a warekia ma oin maiuia (1 Nibwaai 19:23). Buokiia n nooria bwa a kanga koroboki aika tabu ni kaineti nakoia n tatabemaniia.

Ngkai ko maiuakin reirei aikai, ko na buokiia aomata ni karikirakea aia konabwai ao nanoia ni wareka ana Boki Moomon i bon irouia. Katuruturua bwa warekan te boki ni katoa bong bon kiingin te rikirake nakon te bwabetito ao te rairaki ae teimaan.

Onimakina te berita are i nanon Moronaai 10:3-5. Kaungaiia aomata bwa a na wareka ana Boki Moomon ma te nano ae koaua ao n tataro ma nanoia raoi n ataia bwa e koaua. Kabwarabwara ae ma nanom raoi nanona a tauraoi ni mwakuri iaon te kaeka are a karekea rinanon te Tamnei ae Raoiroi. Aomata nako ake a wareware ma te nano ae koaua ao n tataro ma nanoia raoi ibukin ana Boki Moomon a kona n ataa koauana man mwaakan te Tamnei ae Raoiroi.

Ko riai naba ni maiuakina te berita aei ni katoa tai ni kakorakora oin am koaua n ana Boki Moomon. N am koaua ao ko na karekea te onimaki bwa naake a maiuakina te berita aei a na karekea aia kakoaua bwa te boki aei bon ana taeka te Atua.

Kabongana ana Boki Moomon i nanon Waakin Nako Am Mwakuri

Ana Boki Moomon bon te bwai n ibuobuoki ae mwakaroiroi n te rairaki. Kabongana bwa buokam ibukin reiakinan te koaua n te euangkerio ae kaokaki. E taku Beretitenti Russell M. Nelson:

“Te bwai ae mwaakaroiroi ae riki ngke natin te Atua e ukeuke ni kan ataa riki rongorongona ao Natina te Tatangiraki. Akea riki te tabo ae reiakinaki iai koaua akanne n ae rangin mataata nakon are i nanon ana Boki Moomon. …

“Ngkana I iangoa ana Boki Moomon, I iangoa te taeka ae mwaaka. Koaua n ana Boki Moomon iai te mwaaka ni kamarurung, ni karaunano, ibuobuoki, kakorakora, kabebetea te nano, ao ni kakukureia tamneira” (The Book of Mormon: What Would Your Life Be Like without It?” 61, 62).

Ngkana ko wareka ana Boki Moomon ma aomata, tibwaa am koaua ma mwaakan te tamnei are ko namakinna ngkai ko warekia. Katuruturua kakawakin ana kakoaua ibukin Iesu Kristo ao Ana Mwakuri ni Kamaiu. Tibwai kibuntaeka are a na kona ni buokiia aomata n namakina ana tangira te Tia Kamaiu. Buokiia bwa a na nooria bwa a na kanga ni karekea ataakin raoi te Tia Kamaiu rinanon iteranibaana.

Wareki kibuntaeka are a na tabekiarake ao ni kakorakoraia aomata. Kabotoa am iango iaon kainnanoia. Tibwai katooto bwa e kanga ana reirei aika i nanon ana Boki Moomon ni kaineti nakon maiura ni boong aikai.

Uringa Aei

• Ana Boki Moomon bon kiingin ara kakoaua ibukin Iesu Kristo, ara reirei, ao ara koaua.

• Ana Boki Moomon e anga te reirei aika a bebete inanon aia reirei mitinare.

• Ana Boki Moomon e kaekai titiraki ake a mena inanora.

• Teimatoa wareka ana Boki Moomon ma aomata ake ko reireiniia. Buokiia bwa a na wareware i bon irouia ni katoa bong ao ni maiuakin baike a reiakin.

• Onimakina ana berita te Uea bwa aomata nako ake a wareware ma te nano ae koaua ao n tatarokina taekan ana Boki Moomon a na ataa koauana mairoun te Tamnei ae Raoiroi.

---

Iango ibukin te Kamatebwai ao Karaoana

Am Kamatebwai

• Wareka 2 Nibwaai 2; 9; 30; 31; 32. Mwaakeni rongorongo are a kaineti ma Iesu Kristo. Korei karinani aara aika a kakaokoro ao nakoan Iesu Kristo i nanon taian mwakoro aikai. Mwaakeni Ana taeka ake e taekini. Kanikinaei Anuana ao ana mwakuri.

• Ngkai ko wareka ana Boki Moomon ni katoa bong, korei i nanon am tienoo kibuntaeka ake iai nanoia aika a kakawaki ibukim. Koreia bwa ko na kanga ni maiuakin i nanon maium.

• Koreia i nanon am tienoo ni kamatebwai aron am namakin ngke ko moan karekea am kakoaua n tamnei ae ana Boki Moomon e bon koaua.

• Korei teniua titiraki aikai i nanon am tienoo ni kamatebwai. Ni moan am mition ni karokoa banena, karini kaeka nakon titiraki aikai.

  • Aekakira tein maium ngkana akea ana Boki Moomon?

  • Tera ae N na aki ataia ngkana akea ana Boki Moomon?

  • Tera ae N na aki karekea ngkana akea ana Boki Moomon?

• Wareka te Kabwarabwara iaon te Maunga inanon Mataio 5–7 ao ana kabwarabwara Kristo n te tembora i nanon 3 Nibwaai 12–14. E kanga warekan aikai ni kabane ni buokiko bwa ko na mataata raoi n ana reirei te Tia Kamaiu?

• Kamatebwai katooto n tatabeua nako i nanon ana Boki Moomon are e kaineti ma temanna ae tataro. N am tienoo ni kamatebwa, korei baike ko reiakin man ana Boki Moomon n taekan te tataro.

• Man atuun te mwakoro n Motiaea 11–16, korea am tiamwarii iaon baike e anga reirei iai Abinataai. Ngkanne wareki mwakoro aikai ao karababa am tiamwarii.

• Man atuun te mwakoro n Motiaea 2–5, korea am tiamwarii iaon baike e anga reirei iai Beniamina. Ngkanne wareki mwakoro aikai ao karababa am tiamwarii.

Kamatebwai ma Toam ao te Kaibibiti Toa

• Wareki kibuntaeka n ana Boki Moomon ni kabane. Tibwaia bwa tera are ko reiakinna ao n namakinna. Maroroakinna bwa ko na kanga ni maiuakin i nanon maium.

• Wareka Aramwa 26 ao 29 ni kabane. Tibwaa aron am namakin ibukin am mition. Korei am namakin i nanon am tienoo ni kamatebwai.

• Wareka Aramwa 37:9 ao maroroakinna bwa ngke arona bwa akea booki aika tabu e na kangaanga iroun Amon ao raona ni mitinare. Kakaei rongorongo are a kabwarabwara bwa a kanga ni kabonganai koroboki aika tabu.

• Wareka Aramwa 11–14, ma temanna mairoumi ae na karaoa taben Aramwa ke Amureki ao are temanna e na karaoa tabeia taan kamamaara. Maroroakinna bwa a kanga mitinare aikai ni kaekai taian titiraki aika a kangaanga.

Marooro ni Kauntira n te Mwakoro, Maungatabu n te Tioun, ao Marooro ni Kauntira ibukiia Taan Kairiiri n te Mition

• Kataneiai kabongana ana Boki Moomon ni kawai nako ake a taekinaki n atuun te mwakoro aei.

• Korei rinanin titiraki ake a tabekaki irouia naake ko reireiniia. Kabwarabwara imarenami bwa kam na kanga ni kaekai titiraki aikai ni kabonganaakin ana Boki Moomon.

• Wareki kibuntaeka n ana Boki Moomon ni kabane. Tibwaa am atatai, namakin, ao am koaua.

• Kataneiai kabongana ana Boki Moomon ni kamatoa rongorongon Kaokan bwai.

• Kaoiia mitinare bwa a na tibwai baike a tia n rinanona ike ana Boki Moomon e buokiia ma naake a tia n reireiniia inanon waakinan aia rairannano.

• Tuangiia mitinare bwa a na tibwai koroboki aika tabu are e mamate nanoia iai are e ibuobuoki ni kaeka te titiraki ibukin te tamnei.

• Kaoa te membwa are e a tia n rairaki bwa e na tibwaua taben ana Boki Moomon inanona ana tai n rairaki teuanne ke neienne.

Taan Kairiiri n te Mition ao Kauntira n te Mition

• Reireiniia mitinare aron kabonganaan ana Boki Moomon bwa e na kamatoa koauan te rongorongo ibukin Kaokan bwai.

• Wareka 1 Nibwaai 1 ma mtinare ao kabotaua ma te baere e rinanona Iotebwa Timiti.

• Katauraoia mitinare ma katooton ana Boki Moomon ae a karaoaki ni beeba aika a maraurau ao a boou. Kaoiia bwa a na wareware ao ni mwaakena te boki i nanon uoua ke teniua te tai ni kabibiti are imwiina.

  • Iaon te moan wareware, tuangiia bwa a mwaakeni bwaai are a katerea ke ni kakoaua ibukin Iesu Kristo.

  • Iaon te kauoua ni wareware, tuangiia bwa a na mwaakena tuan ao reirein te euangkerio.

  Tuangiia mitinare bwa a na tibwaa te bwai are a reiakinna ao n namakinna. E kabwarabwara arona ni wareka ana Boki Moomon Unimwaane Ronald A. Rasband n te aro are e rootaki iai ana namakin ngke te mitinare ngaia:

Unimwaane Ronald A. Rasband

E mwaiti riki ae I karaoia n au wareware nakon ti mwakenan koroboki aika tabu. Ni katoa au wareware n ana Boki Moomon, mai moana nako buki, I kaonaki n te tangira ae bati ibukin te Uea. I namakinna bwa e a nene au kakoaua ni koauan Ana reirei ao aroia ni kaineti ma ‘te bong aei.’ Te boki aei e bootau ma atuna, “Kakoauan Taekan Iesu Kristo.’ Ma te kamatebwai anne ao te kakoaua n tamnei ake I karekei, I a riki bwa te mitinare ibukin ana Boki Moomon ao ana reirei Iesu Kristo” (“Te Bong Aei,” Riaona, Nob. 2022, 25).

• Kaoiia mitinare bwa a na tibwauai koroboki aika tabu n ana Boki Moomon ake a rangi ni kakawaki inanon maiuia.

• Kinai titiraki ibukin te tamnei ibukiia aomata i nanon am mition. Kaoiia mitinare bwa a na kakaei kiibu inanon ana Boki Moomon are e buoki ni kaekai titiraki aikai.