Mwakoro 8: “Kakoroan nanon te Mwakuri rinanon Kouru and Babaire,” Tataekina Au Euangkerio: Te Kairi nakon Tibwaan ana Euangkerio Iesu Kristoairi nakon tibwauaakin ana Euangkerio Iesu Kristo (2023)

“Mwakoro 8,” Tataekina Au Euangkerio

Mwakoro 8

Kakoroan Bukin te Mwakuri rinanon Kouru ao Babaire

Iangoa Aio

Bukin tera I riaiainnanoia ni katea au kouru?
E na kanga bwaai ni buoka ibukin te rairannano e buokai ni kabotoa au iango iaon rikiraken tamneia aomata n tatabemaniia nako?
N na kangaa ni katea au kouru, karaoi au babaire ao ni kakoroi nanoia, ao ni waakina kanoan au babaire?
N na kanga ni kaira bairean te reirei ni katoa wiiki ao nbong koraki?
N na kanga ni kabonga te app iaon Tataekina Au Euangkerio ni buokai ni kakoroa nanon te mwakuri?
Tera te tua ibukin te mwiokoaki? E na kangaa ni kakabwaiaa au kekeiaki?

Ko katabeaki bwa ko na ibuobuoki ma ana mwakuri te Uea n aono aika a onoti. E tangiriko bwa ko na kakabwaiaia aomata n tatabemaniia nako ma Ana tangira ao te koaua. E tangiriko bwa ko na kaoiia ao ni buokiia bwa a na Nakoina.

E kainnanoiko te Uea bwa ko na “rangin n tabetabe [n te] mwakuri ae e tamaroa aei.” E bubuti bwa ko na, “karaoi bwaai n [oin] am kantaninga, ao ni karaoia ma te kokoaua” (Reirei ao Berita aika Tabu 58:27; taraa kiibu 26–29). Karaoa am kabanea ni konaa ni kakorakorako riki n uoote ke mwaanga are ko beku iai nakon are ko waaki iai ni moan rokom.

Te mwakoro aei e na buokiko n reiakina arom ni katea am kouru, karaoi babaire ni kakoroa nanoia, ao ni waakina am babaire ma te wanawana. E kabwarabwarai aron bwaai ni buobuoki ni koaua ibukin te rairannano, are e na kaira am kekeiaki ni buokiia natin te Atua n aia kekeiaki n tamneia. E bon kaota naba te kawai ae e rangi ni bebete ibukin katean kouru are ko konaa ni kabonganaa n aanga nako n am tai ni mwakuri ni mitinare, i nanon katean kouru i nanon maeum ao ma toam. E kamataata naba bwa kona kangaa ni karaoi babaire ni katoa wiiki ao ni katoabong ma toam.

Reiakinam ni katea te kouru ao ni karaoi babaire e na kakabwaiako i nanon maium. E konaa naba ni buokiko ni karaoi ao ni kawakin berita aika tabu ma te Atua, mwakuri ma te onimaki ni koaua n te Ekaretia, karekea te reirei, rikirake i nanon te mwakuri, ao katean te utu ae korakora.

Kamatebwaian Koroboki aika Tabu

Tera ae ko reiakinna man booki aika tabu aikai i aon kakoroan nanon ana mwakuri te Atua?

Buokiia Tabeman n Raira nanoia nakon te Tia Kamaiu

Kabanea Nanom Bukin Rokom ni Mitinare

Tao kona bon bae n iangoia bwa engaa mai buakon tabem ni mitinare aika a rangi ni kakawaki riki. Aio te titiraki ae e rangi ni tamaroa bwa kona iangoia ngkai ko a katea am kouru ao babaire ni katoa wiiki ao ni katoabong. Ni buokiko ni kaekaa, iangoa te kantaninga ibukim ngkai ko mitinare:

“Kaoiia aomata bwa a na nakon Kristo ni buokiia ni karekea te euangkerio are e kaokaki rinanon onimakinan Iesu Kristo ao Ana Mwakuri ni Kamaiu, rairannano, bwabetito, karekean te Tamnei ae Raoiroi, ao n teimatoa ni karokoa te toki.”

Kariaia bukin ae ko mitinare bwa e na kaira am kouru ao babaire. Iangoia raoi bwa ko na kangaa ni buokiia aomata n tatabemaniia nako bwa ana kamwakuri inaomataia n rinerine ao ni konaa n raira nanoia nakon te Tia Kamaiu ao ni karekea te euangkerio.

Ukoukokora ana kairi te Tamnei ao maroro ma toam ngkai ko katea am kouru ao ni kakaraoi am babaire. Ngkanne rinanon am babaire ao kabongana raoi am tai.

“Tiaki tataekina ao n reirei bwa ti aonga ni uotiia aomata nakon te Ekaretia ke ni karikirakea mwaitia kaain te Ekaretia. Tiaki teataekina ao n reirei bwa ti na imanonoia aomata bwa a na maiiuakina te maiu ae raoiroi. … Ti kaoiia aomata bwa a na nakon Kristo man te rairannano ao te bwabetito ao te kamatoaaki bwa aonga ni kauka mataroan abanuean te tiretio nakoia natin te Atua aika mwaane ao aine. Akea temanna riki ae kona ni karaoa aei” (Dallin H. Oaks, “The Purpose of Missionary Work,” missionary satellite broadcast, Eberi. 1995).

Kamatebwaian Koroboki aika Tabu

A kangaa mitinare aikai ao burabeti ni kakoroa nanon aia babaire ma ana ibuobuoki te Atua?

Kaetiko ma Kanikinaa aika a ibuobuoki ibukin te Rairaki

A tia mataniwiin te Ekaretia ni kunea onoua mwaitin kanikina aika a riai ibukin te rairaki. Bwaai ni ibuobuoki aika kanikinaa a buokiko bwa ko na kabanea nanom i aon aia kekeiaki n tamnei natin te Atua. A tauraoi bwa bokam ni kaineta am kekeiaki ni katoabong ma am kaantaninga ni mitinare.

Waaki ni ibuobuoki nakon te rairaki a oti inano ikai.

	Aomata aika a Boou a Reireinaki. Aomata ni kabane (aki bwabetitoaki) ake e karekea te reirei i nanon te wiiki (ma e tuai reiakinaki i nanon teniua namwakaina n nako) ao ni kariaia manga kawarana ae e onoti. Te reirei e raonaki n te tataro (ngkana e riai), reireia teuana te tua n te euangkerio, ao n kanakoa te kakao.
	Reirei ma n Iraki Iroun te Membwa. Mwaitin te reirei n te wiiki are e reireinaki te aomata (tuai bwabetitoaki) e reiakinaki ao n iraki iroun te membwa.
	Aomata Aika A Reiakinaki Ake A Ira te Bootaki n Toa. Aomata n tatabemaniia (tuai bwabetitoaki) ake ko reireiniia ao n iira te bootaki n toa i nanon te wiiki anne.
	Aomata ma Aia Bong ni Bwabetito. Aomata n tatabeman a na kariaia bwabetitoakiia ao ni kamatoaaki n te bong ae e onoti.
	Naake a tia ni Bwabetitoaki ao ni Kamatoaaki. Membwa ake a boou n tatabemaniia ake a tia ni karekea te otenanti ni bwabetito ao ni kamatoaaki ao ake a kanakoaki aia booma iaon te kombuita i nanon te wiiki anne. (Taraa mwakoro 12 ibukin kabwarabwaraan nanon bwabetitoan ae rairaki ao ibukin te rongorongo ni karaoan bwaai aika tauaki mwiina.)
	Membwa aika A Boou a Ira te Bootaki n Taromauri. Membwa aika boou n tatabemaniia ake aia booma ni bwabetito ao ni kamatoaaki a kanakoaki i nanon 12 te namwakaina n nako ake a iriira te bootaki n taromauri i nanon te wiiki ae baireaki.

Ni kakimototoana, moanibwaia buokaia aomata bwa ana rineia ni irii waaki aikai. Kabotoa korakoram iaon waaki aika inano:

Naake a buokiko ni kuneia aomata aika boou bwa kona reireiniia
Naake a buokiia aomata ni kekeiaki nakon karaoan ao kawakinan berita aika tabu
Naake a buokiia aomata ake a tia ni bwabetitoaki ao ni kamatoaaki i nanon ririki aika a nako

Ngkana koaki konaa n noora korakoram bwa e buoka te aomata n rikirake n te aro are e kaotaki n am bwai ake ko kateia bwa bwaai ni ibuobuoki, baireia ngkana te waaki anne e materaoi karaoana n am tai.

Ibukiia aomata are e uarereke am tai ma ngaiia, teimatoa buotokaa nanoia ae raoiroi i nanon te euangkerio. Ko konaa ni kaoia membwa bwa ana nako n karoko irouia. Ko kona naba ni kabongana bwaai n reitaki n aron tareboon ni kaungaiia ao n reitaanako am mwakuri ni ibuobuoki nakoia. Taraa “Use Technology” i nanon mwakoro 9 ibukin iango riki tabeua.

“Oin te kaantaninga ni baairean ao katean te kouru ae e rangi ni korakora bon karekeaia reirei—anne, ni katabuia aika a rairaki ake a karaoi ao ni kawakin berita aika tabu, ni moanaki ma te berita ae tabu n te bwabetito ni karokoa karaoan berita aika tabu n te tembora” (Quentin L.Cook, “Purpose and Planning,” mission leadership seminar, June 25, 2019).

Katei Kouru ao Karaoi Babaire Aika A Kona n Manga Rinanoaki

I nanon te babaire ni katoa wiiki, ngke ma toam katei kouru ibukin manga rinanoakina ni kabane ibukin bwaai ni ibuobuoki. Am kouru nako ae ko na rinanona e na riai ni kaota nanom ni buokia riki aomata n rinanon kakabwaia man te rairaki.

Katei kouru ao karaoi babaire ni karaoi bwaai i nanon am tararua are e na kanakoraoa otinakon mwiin tuoakina. Ibukin te katooto:

Ko kona ni katea te kouru ae na manga rinanoaki ni moana ma reiakinaia aomata ae bon tau mwaitiia i nanon te wiiki. Bwa ko roko n am kouru ke koaki e bon nako man aia rinerine tabeman aomata. Ma karaoa are bon am konaa ni kakoroa nanona. Teuana te kawai bon katean te kouru n taetae ma tabeman aomata aika boou ni katoabong. Imwiina baireia bwa ko na kanga ni karaoia. Taraa te iango i nanon Abentekiti 2 n te mwakoro aei ao i nanon mwakoro 9.
Ko na riai ni katei kouru ibukin am kainibaire ni karekea mwaitiia membwa aika boou ao aomata ake ko reireiniia ni iira te bootaki n toa. Tao a roko ke aaki e bon nako anne man aia rinerine. Ma karaoa are ko konaa i bon iroum ni kanakoraoa mwiin bwaai n ibuobuoki n noora mwiina. Baireia bwa ningai ae ko na kaoiia iai ao ko na kangaa ni manga reitaki nakoia.
Ko kona ni katea te kouru ae na manga rinanoaki ni karekeia membwa ba ana ira am reirei ae e onoti i nanon te wiiki. Bwa tao e koro nanon am kouru anne ke eaki e bon nako mairouia membwa ao aomata are ko reireiniia. Ma karaoa are ko konaa ni karekea n kanakoraoa te bwai n tutuo aei. Katea te kouru ni mwakuri ma taan kairiiri n te uoote ni karekeia aomata bwa a na roko. Ngkanne ko na baireia bwa ko na kanga ni baronga raoi iriia.

Ngke ma toam, katea am kouru ae na tuoaki ibukin am aono. Kabotoa iaon (1) aia kekeiaki naake ko reireiniia ao (2) kainanoan kakaeaia aomata aika boou bwa a na reiakinaki. Karekeaia aomata aika a boou n reiakiniia bon te kainano ae e reitinako.

Kouru ake a kateaki n mition ni kabuta a boboto iaon kouru ake a kateaki iroun temanna ma toana.D.

Te app iaon Tataekina Au Euangkerio e kona ni buokiko ni kabanea am iaongo iaoia aomata ngkai ko katea am kouru ae na mwakuri raoi. Te app aio e na buokiko naba n reiakinaki man am kouru ake nikawai ao ni kaota am kekeiaki iaon am kouru aika ngkai.

Kouru ake ko na mwakuriia ao mwiia ana bon ribotinaki naba n te tai ae e waekoa nakoia am taan kairiiri n te mition ao taan kairiiri ibukiia mitinare aika kairake rinanon te app are Tataekina au Euangkerio.

Taratara raoi n aki katuruturua teuana te kouru i aon ake tabeua. Te taratara ae e reitinako iaon kainibaire aikai e na buokiko ni kaoiia tabeman nakon Kristo ao ni karaoi aia berita aika tabu.

“Ngkana e tauaki raoi mwiin te mwakuri, te mwakuri e na bon rikirake n tamaroa. Ngkana e tauaki raoi mwiin te mwakuri ao n ribotinaki, e na keerake mwaitin te tamaroa” (mairoun Thomas S.Monson, “Thou Art a Teacher Come from God,” Improvement Era, Rit., 1970.,101).

Mwakuri ma te taratara raoi

E taetae ma nanona te Uea bwa kona “mwakuri … n te nanomatoa ni kabane” inanon am tai ni beku bwa te mitinare (Reirei ao Berita aika Tabu 107:99). Te nanomatoa bon te nano mwaaka, ae reitinako.

Mwakuri ma te nanomatoa n am kouru n am kainibaire ae na kanakoraoaki. Kaoiia aomata bwa a na karaoi aia motinnano are e kairiia nakon te rairaki. Korakoram nanomatoam e konaa ni kaungaiia nakon karaoan mwakuri ake e na buokiia nakon Kristo (taraa 2 Nibwaai 2:14-16).

Reiakina te euangkerio n aanga kaitaraa kainanon te aomata. Te reirei, ngkana e oota raoi mairoun te Tamnei, kanga ai aron ae e riaon riki bwaai tabeua ni kaungaiia bwa a na mwakuri.

N te tai naba anne, kinaa bwa kouru ake a na rinanoaki a bon nakon aia rinerine tabeman. Karinea inaomataia n rinerine aomata n taainako.

Uringnga are kouru ake a kateaki bwa tuoan nakoraoin te kouru bon tiaki kouru are e kantaningaaki. Ma, a onea mwiin ana kekeiaki n tamnei te aomata nakon te bwabetito, kamatoa, ao te teimatoa i nanon te rairaki. Aia kekeiaki raoi aomata e nakon aia rinerine. Ko boutoka aia kekeiaki man kamwakuran te onimaki iroun Kristo ibukiia ngkai ko katea am kouru, babaire, mwakuri ma te nanomatoa, ao ni ibuobuoki nakoia n te anga ae e rangi ni katekenano.

Ko kangaa ni Katei Kouru ao ni Karaoi Babaaire ni Kakoroi Bukiia

Katean kouru ao babaire bon mwakuri n onimaki. Kouru a kaota te bwai ae tangiria nanom ao am kataratara ni buokiko ao tabeman riki nakon te Tia Kamaiu.

Iangoan kouru ao babaire ma te taratara raoi e na anganiko te kairaki ae itiaki. A kona ni buokiko ni kuneia riki aomata ake ko na reireiniia. A kona ni kairiko nakon buokaia naake ko reireiniia bwa a na korakora n aia onimaki ao ni kekeiaki nakon te rairaki.

Karaoa katean am kouru ao bairea te waaki ae kairaki mai karawa. Tataro mwaaka, kamwakura te onimaki, marooro ma toam, ao irii ana wirikiriki te Tamnei. Ngkana ko babaire n te kawai aei, kona namakina ana mwakuri te Uea rinanom ni kakabwaiaia tabeman.

“Te kouru bon te tabo are e na toki iai kawaim ke te toki, ao te babaire bon te kawai are kona toua bwa ko aonga n roko ikekei. … Katean kouru e bon moanaki ma te toki n te iango. Ao te babaire bon karaoan te kawai n roko n te toki arei” (M. Russell Ballard, “Kaokia ao Karekea.” Riaona, Meei 2017, 62-63).

Tuua ibukin Katean ao Kakoroan Nanon Kouru

Te kawai ae imwiina e na buokiko ni katei ao ni kakoroi nanon kouru.

Tataromwaaka ni katei kouru ao ni karaoi babaire. Katei kouru ake a bon kona ni mwakuriaki ma ko na rangi ni kainano n anne ao e tangira te onimaki. Totokoi katean kouru aika a rangi n rietaata ao ni mwaarara. Baireia bwa ko na kanga ni kakoroi nanoia.
Taua Mwiia ao katea taina. Korei mwiin am kouru ao babaire taina ae e bwarabwara raoi.
Mwakuri are ko baireia. Mwakuri ma te taratara raoi ni kakoroi nanon am kouru. Kamwakura am onimaki iroun te Uea bwa e na buokiko.
Manga rinanona ao ririmwiina. Tuoa te kekeiaki ao taua mwiin korakoram n taainako. Iangoia bwa tera ae kona karaoia ae kaokoro ao kona kangaa ni katamaroa. Kaeta riki am babaire ngkana e kainanoaki.

Ngkai ko kabongana te kawai aio ni katean kouru, e na karikirakea am kekeiaki te Atua. Ko na rikirake i nanon am konabwai anne bwa te tia mwakuri ni Baina. Kona uota riki te raoiroi ni kakabwaiaia natin Tamara are i Karawa.

Katei Kouru ao Karaoi Babaire inanon Taabo ni Mwakuri ni Kabane

Tataromwaaka ni ukora ana kairiiri te Tamnei ngkai ko karaoi kanoan katean kouru nakon bwaai ni kabane n te mwakuri ni mitinare. Tabeua bitaki aikai bon:

Buokiia aomata ake ko reireiniia ni karaoi kekeiaki (taraa Abentikiti 1 n te mwakoro aei).
Kakaeia aomata aika boou n reireiniia (taraa Abentikiti 2 i nanon te mwakoro aei).
Mwakuri ma membwa ao buokiia aomata n te komuniti ao uoote (taraa mwakoro 9 ao 13).
Mwakuri ni inanoi ma toam (taraa item 6 i nanon “Weekly Planning Session”).
Kakorakora am onimaki iroun Iesu Kristo.
Katamaroaa rabakaum ao konabwai, n raonaki ma reiakinan taetae (taraa mwakoro 7).

Katei Kouru Aika Riai

Totokoa katean aia kouru mitinare ake tabeman. E ngae n anne, ko konaa ni kairiia ao ni kaungaiia ni kamwakurii tuan katean te kouru ngkai a bon katea oin aia kouru.

Taratara raoi bwa ko na aki karaoa te kataunaari ma ake tabeman.

Tai kabonganaa te bwai ae e tamaroa are ko karekea man am kouru bwa mwakoron, kinakim irouia te botannaomata, ke ni bobota ke ni kamamaea temanna.

“Ti kakoaua ni katean kouru. Ti maeka man te kouru. … [Teuana] bonganan te kouru bon uotakin te euangkerio nakoia aomata ni kabane. … Ara kouru bon karekean te maiu are akea tokina. Anne bon te kabanea ni korakora ni kouru n te aonaaba” (Spencer W Kimball, regional representative’s seminar, Ebe. 3, 1975, 6).

Kaira Bairean te Reirei ni Katoa Wiiki ao ni Katoabong

Te babaire ni katoa wiiki e buokiko n noora te tamnei ae bubura ao ni kabotoa iaoia aomata. E boni buokiko naba ni iangoi bwaai ake a rangi ni kakawaki. Te babaire ni katoa bong e buokiko ni karekei ao ni katauraoiko nakon karaoan mwakuri aika a onoti ni katoa bong. Ko tangiria bwa e na iai mwiin am mwakuri, tiaki ti te tai n tabetabe.

Inanon tain taian reirei iaon te babaire, titirakiniko titiraki aika bebete bwa bukin tera ngkai e tangiria te Uea bwa ko na karaoi. Ukora te kaungaunga ni kaekai titiraki aikai ni kawai ake a riai ibukin aroaro n tatabeua nako ao te aomata. Te kaeka e na riai ni ngkanne ni mwakuriaki i nanon am babaire.

Bairean te Reirei n te Wiiki

Karaoa bairean te reirei ni katoa wiiki ma toam n te bong ao te tai are e baireaki mairoun am beretitenti n te mition. Irii kawai aika i nano.

Tataro ao ukora te kaunganano. Butia te Tama are i Karawa bwa e na kairiko ni karaoi babaire are e na buoka ni kakoroi bukin Ana kantaninga. Butia bwa E na kakabwaia korakoram ni buokia aomata bwa ana kekeiaki ao n roko nakon Kristo.
Katei kouru ao karaoi babaire ni kabongana te app are Tataekina Au Euangkerio. Kabongana te kawai ni katean kouru ake a kabwarabwaraaki imwaina n te mwakoro aei. Moanna ma:
- Aomata ake a bwabetitoaki ao ni kamatoaaki i nanon ririki aika a nako.
- Aomata ake a tia n reke aia bong ni bwabetitoaki.
- Aomata ake ko reireiniia ake a ira te bootaki n toa.
- Aomata aika a boou ake a reireinaki.
- Membwa ake a oki, utu ake aki tabwanin ni kaina te Ekaretia, ao unimwaane aika tauraoi.
- Aomata a tia n reireinaki.
Taraa Abentikiti 1 i nanon te mwakoro aei ibukin iango ni kabonganaa te kawai nakon katean kouru ni mwakuri ma aomata ake ko reireiniia.
Kabonganaa aron katean kouru ni kakaeia aomata ake ko na reireiniia (taraa Abentikiti 2 n te mwakoro aei ao mwakoro 9 ibukin te ibuobuoki ni kakae).
Kabonganaa te kawai ibukin katean kouru ni karaoa te reitaki ma taan kairiiri n te uoote ao taian membwa. Katea am kouru ao karaoi babaire bwa ko na kangaa ni boutokaia i nanon aia kekeiaki n tibwaa te euangkerio (taraa iango inanon mwakoro 9 ao13). Katauraoi ibukin te bowi n te uoote (taraa mwakoro 13).
Manga tuoi riki am babaire ao kouru i nanon te app are Tataekina Au Eungakerio. Kamatoaa am tai ao bowi.
Karaoa te marooro ma toam. Aio e raonaki n tainako ma bwaai aikai:
- Ngkana e tangiraki, tibwai kouru ibukiia aomata n tatabemaniia ake a bon riai ao butiia toam ibukin ana ibuobuoki ni kakoroi nanoia.
- Maroroakina matoan am reitaki. Marorokin kangaanga ni irekereke ma te ongotaeka ao te mwakuri n inanoi. Buoka te itaberaaraa man (1) kariaia te aomata ni kabwarabwara ana iango, (2) oota ao butimwaea ana raraoma te aomata, (3) katei katokan kangaanga n ikotaki kawai are e buoka te kangaanga are e nai buoka riki te raraoma are e rangi ni kakawaki.
- Tibwaia ma toam bwaai ake ko iangoia bwa korakoran neienne ke teuanne. Butia ibukin ana iango ni katamaroa bwa ko aonga n nakoraoi riki.
- Katei kouru are e na katamaroa reitakimi.
Te marooro ni kaitoatoa e na konaa ni buokiko ni karikirakei rabakau aika kakawaki are ko na konaa ni kabonganaa ma am utu ni maiumi, te mwakuri ni ibuobuoki man te Ekaretia, te mwakuri, ao tabeua riki botaki.
Kainna ma te tataro.

Baairean te Reirei ni Katoabong

Katea am kouru ao karaoi am babaire ma toam ibukin 30 te miniti ni katoa ingabong. Irii kawai aika i nano.

Tataro ao ukora te kaunganano.
Rinanon am kekeiaki ni kaineti ma am kouru ni katoa wiiki.
Rinanon am babaire ni buokiia aomata ake ko reireiniia. Moanibwaia moa korakoram ni buokiia naake a karaoa te kabanea ni mwaiti n aia kekeiaki. Kaetii am kouru ao babaire ni katoabong ngkana e kainanoaki.
Karaoi taian mwakurii are ko na karaoia n te bong anne ni kakaeia aomata aika boou n reireiniia ao ni buokiia aomata ake ko reireiniia.
Baireia bwa kona kangaa ni mwakuri ma taan kairiiri ao taian membwa n te tabo.
Kainna ma te tataro.

Kamatebwai ma Toam

Manga rinanon Abentikiti 1 ao Abentikiti 2 n tokin te mwakoro aei ibukin iango bwa ko na kangaa ni kabonganaa te kawai ibukin katean kouru n reirei ao ni kakae. Rineia bwa ko na kangaa ni kabonganai tabeua ma ibuakon iango aikai.

Kabonganaa te app are Tataekina Au Euangkerio

Ni kaineti ma naake a bwabetitoaki n ana bong, e taku Moronaai, “A tauaki araia, bwa aonga n ururingaki ma ni kamwarakeaki n ana taeka te Atua ae e raoiroi, ni kateimatoaia iaon te kawai ae e eti” (Moronaai 6:4). Kawakinan tauan mwiin bwaai bon teuana te kawai ae ko konaa ni kabonganaa iai te tua aei.

Taua Mwiin Am Kekeiaki

Kawakinan tauanimwii bwaai bon mwakoron te nanomatoa n taraa am aono ma te tangira ao te tabeaianga. Tararuaa tauan mwiin rongorongo bwa ena eti raoi ao n aki iremwe. Aio e buokiko n uringnga bwa tera ae ko na ni karaoia ibukin buokaia aomata.

Te app are Tataekina Au Euangkerio e anganiko bwa kona taraa raoi ao n tibwai rongorongo aika kakawaki ma taan kairiiri ao membwa n am tabo n aia kekeiaki aomata ao te mwakuri.

Irii tauan mwiin waare ao kainibaire ake aki kaotinakoaki rongorongoia

Kawakina te kainibaire ni kamatoan tuan kamanoan rongorongo ibukin temanna ngkana te kouru n rawerawe ao babaire n te app ae Tataekina Au Euangkerio ao ni bwaai ni mwakuri ake a kaotinakoaki. Ibukin rongorongona, taraa Kainibaire ibukiia Mitinare ibukia Ana Reirei Iesu Kristo, 7.5.

Titirakiniko titiraki aikai imwaain ae ko rawea ke n tibwai rongorongo i nanon te app are Tataekina Au Euangkerio, imeeri, bwaai ni kaongora ibukiia aomata, koroboki, ke bwaai n reitaki tabeua:

Tera ana namakin aomata aio te bwai ae I raweia?
E na kangaa aron au namakin ngkana temanna e tibwaa te aekaki n rongorongon aei ibukiu ma tabeman?
I kawakina ana kainibaire te Ekaretia ao tuua ibukin kamanoan rongorongo ibukin au aono ngkana I rawea ke n tibwaa te rongorongo aei?

Bukinaki

Te tua ibukin te bukinaki e rangi ni bongana n ana babaire te Atua are akea tokina (taraa Aramwa 5:15-19; Reirei ao Berita aika Tabu, 104:13, 137:9). Te tua aei e kairoroiko bwa e na kanga am iango ao namakin i aon tabun te tibwanga are e a tia n anganiko te Uea. Te bukinaki bon te kairoro bwa ko na kangaa ni karaoa am mwakuri.

I nanon ana tai ni mwakuri iaon te aba, te Tia Kamaiu e anganiia taan iriiria tabeia ni buokiia ni karikirakeia, ao ni kakoroa nanon aia mwakuri. E anganiia naba aia tai ni bukinaki ibukin te mwakuri ake a anganaki bwa a na karaoi (taraa Ruka 9:10; 3 Nibwaai 23:6–13). Ngke te mitinare, ko bukinaki naba ibukin ana mwakuri are e a tia n anganiko te Uea bwa kona karaoia.

Nakon am kouru ao babaire ma te iango are ko na karaoia nakon te Uea rinanon te tataro ni katoabong. Ko na karaoia naba boni ibukim ao nakoia am taan kairiiri n te mition.

Kaotan mwiiin am mwakuri e na bon riai ni karaoaki ma tangiran, bwaai ake ko rinanona aika a tamaroa ike korakoram akinaaki ao ko kunei kawai ibukin katamaroaan am beku.

Kamatebwaian Koroboki aika Tabu

Tera nanon te bukinaki?

Reirei ao Berita aika Tabu 58:26–33; 101:78

Bukin tera ngkai e kakawaki te rinerine inanon tibwangam?

Ana kanga mitinare ao taan kairiiri n te mitition ni kaai ni mwakuri?

Tera ae e beritanna te Uea nakoia naake a kakaonimaki n tibwangaia?

Reirei ao Berita aika Tabu 51:19; 78:22

Iango ibukin te Kamatebwai ao Karaoana

Oin am Kamatebwai

Iangoi kibuntaeka aikai aika man beeban te wewete nakoim: “Ngkai ko kabanea am tai ao kakauongo nakon te mwakuri ibukin te Uea, ni katikuia i akuum arom bon i iroum, e na kakabwaiako te Uea ni karikirakea rabakaum ao am koaua iroun Iesu Kristo ao ana euangkerio are e kaokaki.” Titirakiniko titraki aikai, ao rawea am namakin ae kakukurei.
- I uara ni karaoan kabanen au tai ma au tatauraoi ni beku ibukin te Uea?
- Tera taian kakabwaia aika I a tia n rinanona?
- E kangaa au koaua ni kakorakoraaki?
- N na kanga n rikirake?
Anaa te tai teutana ni iango ibukin am kabanea ni bong n te mition. E na roko ningai te bong anne:
- Tera te bwai ae ko tangiria n reitakim ma te Tama are i Karawa ao Iesu Kristo ao e na kangaa arona?
- Tera ae ko tangiria bwa ko na riki n ai arona?
I nanon am tieno ni kamatebwai, korei kaekaan titiraki aikai n tatabeua. Kabongana kawain katean te kouru ni baireia bwa tera ae ko na konaa ni karaoia ngkai ni mwakuri nakon kouru aikai. Taua mwiim am babaire.

Kamatebwai ma Toam ao te Kaibibiti Toa

Kabonganaa te app iaon Tataekina Au Euangkerio, kaekai titiraki aika i naon aikai:
- A riai n raweaki ake ngkai ao a na eti raoi?
- E na konaa te mitinare ae e boou n am tabo n nakoraoi man am mwakuri n tauan mwiin am kekeiaki ni karekeaia aomata aika a boou n reiakinaki?
- Ngkana kona manga rinanon riki am app ngkai, e na konaa ni buokiko n ataia bwa a mena iaa aomata? E na buokiko n ataa aia kekeiaki?

Kauntira n te Aono, Maungatabu n te Tioun, ao Marooro ni Kauntira ibukiia Taan Kairiiri n te Mition

Kaoiia mitinare n tibwaa are a rinanona ma kouru are a tia ni kateia ao babaire ake a tia ni karaoi ni buokiia aomata n aia kekeiaki. Katooto a kona n raonaki ni kouru ao babaire ni buokiia aomata:
- Karikirakea Aia Onimaki iroun te Tia Kamaiu.
- Raira nanom ao karaoi bitaki ni kaniiko riki ma te Uea.
- Iangoia bwa ko na bwabetitoaki ao ni kamatoaaki.
- Oki nakon te Ekaretia ao kabooua aia berita ae e tabu n te bwabetito.
Wareka teuana maibuakon bwaai aika riki nakoia mitinare. Kamaenakoia mitinare i nanon kurubu aika uarereke. Anganiia kurubu n tatabeua bwa a na kabonganaa mwaneka 1 ao 2 i nanon kawain katean te kouru ni buokia aomata i nanon katooto aikai ni kekeiaki nakon te bwabetito ao te kamatoaaki. Anganiia kurubu bwa a na tibwaa aia iango.
- Te aomata are ko reireinna e a tia ni kariaia te kakao nakon iran te taromauri n te wiiki aei.
- Te aomata are e a tia ni kariaia te kakao nakon te bwabetito ao n tia ni katea ana kouru ma ngke bwa e na bwabetitoaki.
- Te aomata e a tia ni kariaia am kakao ni wareka ana Boki Momoon ao e a tia ni karaoa kabaeana ni wareware 1 Nibwaai 1.
Kaoiia mitinre bwa a na kabonganaa te app are Tataekina Au Euangkerio ni buokiia ni katei kouru aika a bon riai ao ni kakawaki man:
- Rinanoan kanikinaa ake iai rongorongoia ni kawai ao am kekeiaki.
- Katei kouru ibukin te bong, wiiki ao te namwakaina.
- Ikotiia aomata nakon karaoan kouru.
Maroroakinna bwa a kangaa mwaneka aikai ni kona ni buokiia mitinare ni babaire ma te nanomwaaka ngkai a buokiia aomata ni kekeiaki. Butiia mitinare bwa a na iangoi baikai:
- Kona kangaa ni kabonganaa te app are Tataekina Au Euangkerio ibukin taai aika a na roko ngkai ko babaire?
- Tera kawai riki tabeua ae koa tia ni kunea ni kabonganaa te app aei ma te nanomwaaka?

Taan Kairiiri n te Mition ao Kauntira n te Mition

Rinanon te app Tataekina Au Euangkerio.ni katoatai ibukia mitinare. Kaoia bwa a na tibwaia bwa a kangaa n kabonganaa n noonori aia kouru ao aia babaire ao ni buokiia aomata ni kekeiaki.
N taai tabetai ao rooko n noora aia reirei mitinare iaon te babaire ni katoa wiiki ao ni katoabong.

Abentekiti 1

Kabongana kawain katean te kouru ni mwakuri ma aomata ake ko reireiniia

Te mwakoro aei e katauraoi katooto ibukin arom ni karaoa kawain katean te kouru ni buokiia aomata ake ko reireiniia.

1. Katei Kouru ao Karaoi Babaaire

Tataromwaaka n iangoa kainanon tamneia aomata ake ko reireiniia. Katei kouru ao ni karaoi babaaire ni kakoroi nanon kainano aikai. Kabonganaa te app are Tataekina Au Euangkerio ni manga rinanon aia kekeiaki aomata n tatabemaniia. Kabonganai kingin kanikina ibukin te rairaki ni kakaei mwakuri ake ana buoka te aomata n karekea te mwaneka are imwiina nakon Kristo.

Ngkai ko katea am kouru ao karaoi babaaire, titirakiniko titiraki aikai n aron:

Tera te rinerine ae e karaoia te aomata are e na kaota rikiraken ana onimaki iroun Iesu Kristo?
Tera namakin aika iai iroun te aomata ma te Tamnei?
Tera te kakaewenako ae teuarei ke neierei ana kaitara ma ngaai?
Tera riki ae ti kona n reiakin mairoun te aomata aei ni buoka teuarei ke neierei?
Tera ae kainanoaki bwa e na riki ni buoka te aomata aei ni karikirakea ana onimaki iroun Iesu Kristo, namakina ao ni kinaa te Tamnei, ao ni bwabetitoaki?
Tina kanga n tauraoi ibukin te bowi n te uoote ni katoa wiiki n raoniia taan kairiiri nte uoote ao membwa ni buoka te aomata aei? (Taraa mwakoro 13.)
Tera kouru ake tina kona ni katei ni kaota ara onimaki iroun te Uea?

2. Rawea ao Karaoa raoi tain am Babaaire

Kabonganaa te app are Tataekina Au Euangkerio n rawea ao bairea tain am kouru ao babaire ae tabwanin raoi rongorongona. Aio are e na buokiia ni barongaa te mwakuri ao n kakaei kouru are kona karaoi ni katoabong. Kawakina tuan tabun tibwaan rongorongo aika a kamanoaki n am aono.

Ngkai ko rawea ao bairea tain am babaire, titirakiniko titiraki n aron aikai:

Tera bwaai aika onoti ae ti kona ni karaoi n te bong aei ao ni katoa wiiki ni boutoka te aomata aei n ana kekeiaki?
Tera te (reirei) ae e na buoka te aomata ni karikirakea korakoran ana onimaki iroun Kristo ao ni maeka ma te euangkerio? Ti na kangaa n reiakina te reirei aei bwa e aonga n oota iai ao ni katamaroaaki iroun te Tamnei ae Raoiroi?
Ni kangaa ao nningai are ti na kamatoaa iai taai?
Baikara kakao aika ti na kanakoi ao n ruamwiina? Ni kangaa ao ningai ae kona ruruamwiina?
Nikangaa ao ningai ae kona buoka iai te aomata ni iira te taromauri, wareki koroboki aika tabu, tataro, ao ni kawakin kabaeakira are e kairiira nakon karaoan berita aika tabu ma te Atua?
Ana kanga membwa ni iri?
Tera taian bwai n reirei iaon raain ae ti konaa n tibwaia ma te aomata?
Tera ara babaire riki teuana irarikin aei ae ti na karaoia ngkana e aki nakoraoi n aron are e a tia ni baireaki?

3. Mwakuri iaon are Ko Baireia

Tataro inanom inanon te bong ni kabane ngkana ko mwakuriia kanoan am babaire. E na buokiko te Tamnei n ataia bwa ko na nakea, tera ae ko na karaoia, tera ae ko na taekinna, ao teraa kanakoraoan bwaai ae ko na karaoia.

I nanon te bong, titirakiniko titiraki n aron aikai:

Ti na kangaa ni mwakuri ma te onimaki, kakoauaa bwa te Atua e na buokiira ao ni karabaaba korakorara ni beku ibukiia natina?
Ti na kanga n rangi ni kakauiango ni karaoan bwaai ao ninikoria ngkana ti mwakuriia ara babaire?
Ti na kangaa ni kangaraoa ara babaire nakon kainanoia aomata ao aroia?

Babaire aki konaa n nakoraoi n aron are ko kantaningaia. Ko na tatauraoi nakon bitaki ao ni mwakuri babaaire riki tabeua ngkana e kainanoaki.

4. Rinanon Kekeiaki ao Ruamwiina

Ma toam, rinanon kekeiaki nakon te kouru are kam tia ni kateia n reireiniia aomata ao buokiia ni kekeiaki. Bairei kawai ao ruamwiina. Kaeta am babaire ngkana e kainanoaki ngkai ko teboakina rokom n am kouru.

Titirakiniko titiraki n aron aikai:

Iai te kakamwakuri irouia aomata ake ti reireiniia nakon karaoan berita aika tabu ma te Atua?
Teraa taian kakaewenako aika a kaitarai? Tera tabeaiangaia?
Tera ae ti kona ni karaoia n te bong aei ni buokiia ao ni kaungaia nakon te mwakuri—bon irouia ao rinanon rabakau aika boou?
A tia n rinanon waaki ma namakinan te Tamnei?
A reireitaki ma taan kairiiri n te Ekaretia ao membwa ao ni karikirakea aia itangiritangiri? Antai ae kona n iri nakon te tai ae e na roko ngkana ti anga reirei?
Tera ae ti kona n reiakinna man kangaanga aikai?
Aekakira arora ni karokoira n ara kouru? Iai riki te bwai teuana ae ti na riai ni kaetia ke ni karaoia n te anga ae e kaokoro?
Aio tain kauarerekean te reitaki ae okioki?

Taraa mwakoro 11 ibukin tuua ao iango riki bwa ko na kangaa ni ruamwiina ao ni buoka aia kekeiaki aomata.

Abentekiti 2

Karaoa Waakin Mwakurian te Kouru ni Karekeaia Aomata n Reireiniia

Te mwakoro aei e katauraoi katooto bwa ko na kangaa ni mwakuria bairean katean kouru ni kakaeia aomata aika boou n reireiniia. Kabonganaa te kawai aei n am babaire ni katoa wiiki ao ni katoabong.

1. Katei Kouru ao Karaoi Babaaire

Ma toam, tataromwaaka ni iangoia bwa tera ae tangiria bwa kam na karaoiaTamami are i Karawa ni karekeaia riki aomata bwa kam na reireiniia. Karaoa aei ni katoa wiiki ao ni katoabong. Onimakinna bwa E katauraoia aomata ibukim (taraa Reirei ao Berita aika Tabu 100:3–8).

Katea te kouru ibukin te kakae ni katoabong. Karaoi babaire ibukin te mwakuri ni bon karaoana iroum are e na buoka mwiin te bwai ae baireaki. Katooto a raonaki ma:

Iraman aomata aika boou ae ko na taetae ma ngaiia ibukin te euangkerioa ni katoabong.
Iraua te tai ae ko na titirakiniia membwa, aomata ake ko reireiniia, ao aomata ake ko reitaki ma ngaiia ngkana a ataa temanna ae e na tangira te reirei.
Waekoara ngkoe ni kaeka nakoia aomata ake ko anganaki araia ke ni kaeka iaon taian katokatoka iaon bwaai n reitaki.

Rinanon te app are Tataekina Au Euangkerio ao titirakiniko titiraki n aron aikai:

Tera ae tangiria Tamara are i Karawa bwa ti na karaoia n te bong aei ao n te wiiki aei ni kakaeia aomata n reireiniia?
Tera kouru aika a na mwakuriaki ni katoabong ao ni katoa wiiki ae ti konaa ni kateia ibukin kakaeaia aomata are ti na reireiniia?
Engaa te waaki bukin te kakae ae e tikiraoi riki ibukin tain te bong aei ao n te tabo aei?
Ti na kangaa ni kaungaa ao ni boutokaia membwa n te uoote n aia kekeiaki n tibwaia te euangkerio rinanon te tua ibukin te tangira, tibwatibwa, ao kakao?
Enga maibuakoia membwa aika boou ake ti na konaa n reitaki nakoia ibukin irakin te bootaki n toa? Iai raoraoia ae a na konaa ni kaoiia?
Ti na kanga ni mwakuri ma te kauntira n te uoote ke n iraa bowin te uoote ni katoa wiiki ni kakaeia utu ake aki tabwanin kaain aia utu ni kaaina te ekaretia, membwa ake a manga oki, ao n reitaki ma unimwaane aika tauraoi?
Antai aomata aika reireinaki ngkai, aomata ake a reireinaki ngkoa, ao aomata ake ti anganaki ae ti kona n reitaki nakoia? Ti na kanga n reitaki nakoia? (Bon iroum, rinanon rabakau aika boou, man tareboon, ke ni kawai riki tabeua)
Tera tabeua kawai aika boou aika ti na konaa ni kakaeia aomata iai?
Tera ara tarena i bon iroura ao te kakorakora ae ti na kona ni kabongana?
Ti na kanga ni katamaroaa ara kekeiaki ni kakaeia aomata n reireiniia?
Ti na kangaa ni buokiia naake ti reitaki ma ngaia n namakina ana kairoro te Tamnei ae Raoiroi?

Ibukin katooto ni kakaean waaki ni kakukurei, taraa mwakoro 9, 10, and 13.

Kabonganaa te app are Tataekina Au Euangkerio ni buokiko ni kakaei waaki ni kakukurei ake a tia n rangi ni mwakuri raoi i nanon taai aika nako. Te katooto, ko kona n nooria bwa a kanga ni kuneaki aika a tibwa rairaki.

Ukora te kaungaunga ao tatauraoi n taainako nakon bwaai aika kakukurei ao iango. Totokoa ae e na aki tiitia am beku ae ko kakaraoia. Mitinare ake a teimatoa ni karekeia aomata aika boou n reireiniia a teimatoa ni kabonganaa te kawai ae e mwaiti ni katoa wiiki. A mwakuriia n taainako.

2. Rawea ao Karaoa raoi tain am Babaaire

Ma toam, kabonganaa te app are Tataekina Au Euangkerio n rawea ao ni karaoa tain am kouru ao am babaire ae bwarabwara raoi. Rawean ao karaoa tain am babaire e na kona ni buokiko ni kunei mwakuri are ko na anai ao ningai are ko na mwakuriiaiai.

Titirakiniko titiraki n aron aikai:

Ningai ao ena kangaa arora n reitaki ma aomata? Tera te anga ae te kabanea n tamaroa? Enga taabo aika a rangi n nakoraoi? Tera taai n te bong ae e rangi n tikiraoi ibukin kawai aika kakaokoro ni kakaeia aomata?
Ti na kanga ni karaoa te marooro ae e raoiroi ma aomata ake ti kaitibo ma ngajja?
Ti na kanga ao ningai ae ti na kona ni kakaeia iaonrain ni kabonganaa te bwai n reitaki ao rabakau aika boou?
Ningai ae ti na konaa n reitaki iai ma aomata ake ti anganaki araia?
Tera te babaire riki tabeua ae ti na karaoia ngkana a aki mwakuri raoi babaire ake tabeua?

3. Mwakuri iaon are Ko Baireia

Kekeiakimwaaka ni kakoroa nanon am kouru ni kakaeia aomata n reireiniia. Tataro i nanom i nanon te bong anne. Tatauraoi ni akmauriia ao taetae ma aomata are ko kaitibo ma ngaiia. E na buokiko te Tamnei n ataia bwa ko na nakea, tera ae ko na karaoia, tera ae ko na taekinna, ao teraa kanakoraoan bwaai ae ko na karaoia.

I nanon te bong, titirakiniko titiraki n aron aikai:

Ti na kangaa ni mwakuri ma te onimaki, kakoauaa bwa te Atua e na buokiira ao ni karabaaba korakorara ni beku ibukiia natina?
Ti na kanga n rangi ni kakauiango ni karaoan bwaai ao ninikoria ngkana ti mwakuriia ara babaire?
Ti na kangaa ni kangaraoa ara babaire nakon kainanoia aomata ao aroia?
Ti na kangaa ni buokiia aomata n namakina ana ibuobuoki te Tamnei ae Raoiroi?

Babaire aki konaa n nakoraoi n aron are ko kantaningaia. Ko na tatauraoi nakon bitaki ao ni mwakuri babaaire riki tabeua ngkana e kainanoaki.

4. Rinanon Kekeiaki ao Ruamwiina

I nanon te bong ma te wiiki, tataromwaaka ni manga rinanon riki am kekeiaki ni kakoroa nanon am kouru ni kakaeia aomata ake ko na reireiniia. Titirakiniko titiraki n aron aikai:

Tamaroara are ti a tia ni karaoia ni kakoroan nanon ara kouru ao n ruruamwiin ara babaire?
Tera kaetana ae ti riai ni karaoi ni kakoroa nanon ara kouru ni kakaeia aomata?
Ti na kangaa n totokoa manga karaoan waaki aika aki nakoraoi ni karekeaia aomata ake ti na anga reirei nakoia?
Tera te bwai ae e boou ae ti konaa ni kataia n te tai aei inanon te bong aei?
Baikara iango tabeua ae ko konaa ni maroroakin n tain bowin te uoote ni katoa wiiki ni buokiira ni karekeia aomata ake ti na reireiniia? (Taraa mwakoro 13.)

Ngkai kam itoatoa, kabongana te tiaata“Finding Efforts” i nanon mwakoro 9 n tuoa korakoram n kakaae n te wiiki ao ni katoabong. Kinai baika ko karaoi raoi, ao iangoia bwa ko na kangaa ni katamaroaa.

I nanon te bong ae bwanin, teei moa tabeua te miniti ao kinaa bain te Atua i nanon am mwakuri.