“Wase 9: Kunei Ira Mai na Tamata mera Vakavulici,” Vunautaka na Noqu Kosipeli: E Dua na iDusidusi ki na Wasei ni Kosipeli i Jisu Karisito (2023)

“Wase 9,” Vunautaka na Noqu Kosipeli

Wase 9

Kunei Ira Mai na Tamata mera Vakavulici

Vakasamataka Oqo

Au na cakacakataka beka vakacava na vakabauti Karisito meu kunei ira kina na tamata me vakavulici?
Eda na vakalevutaka beka vakacava na noda rai ka vakavinakataka na noda ituvatuva me baleta na nodra kunei na tamata me vakavulici?
Au na tubu beka vakacava ena noqu rawaka kei na yalodei meu vosa vei ira na tamata au sotava e veisiga yadua?
Eda na rawa ni duavata beka vakacava kei ira na lewenilotu ena wasei ni kosipeli?
Na cava e dodonu meda cakava ni da ciqoma na yacasoli eso?
Na cava eso na vakanananu ka se bera ni da se tovolea me baleta na kunei ni tamata me ra vakavulici?

A tukuna na iVakabula vakaturicaketale vei iratou na Nona tisaipeli, “O koya mo dou qai lako ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu” (Maciu 28:19; raica talega na Marika 16:15). A tokaruataka na Turaga na ilesilesi oqo ena noda siga edaidai, ni kaya, “Dou lako yani ki vuravura taucoko ka vunautaka na kosipeli” (Vunau kei na Veiyalayalati 68:8; raica talega na 50:14).

Na cakacaka ni kaulotu sa ikoya na nodra kunei na tamata, me ra vakavulici ka vukei ena nodra vakavakarau ki na papitaiso. Ko sa na vakayacora tiko na ilesilesi ni Turaga mo vakavulica na Nona kosipeli ka papitaisotaki ira na saumaki mai ni o “kunei ira ga era vakabauti [iko]” (Vunau kei na Veiyalayalati 42:8). E sega ni dua na ka ena yaco ena cakacaka ni kaulotu me yacova na gauna o sa kunea kina e dua mo vakavulica. Mo yadrayadravaki e veigauna kece me baleta na veimadigi me wasei kina na kosipeli. Vulica mo vakayagataka na sala eso ena yaga ena nomu iwasewase.

E sa bibi sara mo cakacaka kei ira na lewenilotu ena kunekunei. Cakacaka vakaukauwa mo rawata na nodra veivakabauti. Ni ra sa veivakabauti rawa kei ira na daukaulotu na lewenilotu, ena rawarawa cake nodra sureti ira nodra itokani kei na lewe ni matavuvale me ra sotavi iko. O ira na tamata oqo ena rawarawa cake me ra saumaki kivua na Turaga, ra papitaiso, ka toso ki liu ena salatu ni kosipeli.

Na nodra kunei ena vakatau ena nona vakavakarau tu e dua na tamata me rogoca na kosipeli. Ia na kena gauna ena dau duidui ki na tamata yadua. Na nodra kunei ena rawa ni yaco mai na dua na imatai ga ni veisotari se mai na vuqa na veisotari ena loma ni dua na gauna balavu. E vuqa na tamata era na veisotari vakavica kei ira na daukaulotu se lewe ni Lotu ni bera ni ra qai tekivu taura vakabibi na vulici ni kosipeli. Kakua ni lomalomarua mo veitaratara tikoga kei ira.

Na nomu sasaga eso mo kunei ira ena rawa ni qai vakavuana ni o sa tokitaki oti se sa oti sara mada ga na nomu kaulotu. Se vakacava ga na kena gauna se na kena icavacava, na Turaga e vakavinavinakataka na nomu sasaga eso.

Na iwase oqo e vakarautaka na ivakavuvuli kei na vakasama eso me vukei iko ena kunekunei. Na ivakavuvuli eso oqo era sa baleti vuravura raraba. Ia, era na rairai gadreva na daukaulotu kei na iliuliu ni kaulotu me ra moica me veiraurau kei na nodra ituvaki.

Cakacakataka na Vakabauta mo Kunei Ira na Tamata mo Vakavulica

Na vanua cava ga o veiqaravi kina, na Turaga e sa kacivi iko mo cakacaka “me ra vakabulai kina na yalodra” (Vunau kei na Veiyalayalati 100:4). Mo cakava oqo, o na gadreva mo cakacakataka na vakabauti Karisito mo kunei ira kina na tamata mo vakavulica me rawa ni ra digitaka me ra muri Koya ka papitaiso.

Na vakabauta e sa dua na ivakavuvuli ni cakacaka kei na kaukauwa. Mo vakabauta ni sa vakarautaki ira tiko na tamata na Turaga me ra ciqoma na kosipeli vakalesuimai. Mo yalodei ena vosota ni na liutaki iko o Koya kivei ira, se o ira kivei iko. Cakacakataka nomu vakabauta ena tuvanaki ni takete, caka ituvatuva, kei na vakayacori ni nomu ituvatuva mo kunei ira na tamata mo vakavulica (raica na wase 8).

Masu ena vakabauta ni o vakasaqara na veivuke ni Kalou mo kunei ira kina na tamata mo vakavulica. Ni a liutaka o Alama e dua na kaulotu kivei ira na Soramaiti, a masu okoya: “Oi kemuni Turaga, mo ni vakalougatataki keimami me keimami gumatua ka kauti ira lesu vei kemuni, ena vuku i Karisito. Oi kemuni na Turaga, raica sa ka talei na yalodra … ; okoya, mo ni solia vei keimami, oi kemuni na Turaga, na kaukauwa kei na yalomatua, me keimami vakalesui ira tale yani vei kemuni” (Alama 31:34–35).

O ira na tamata o sotava e vakavuqa era sega tu ni kila ni ra vaqara tiko na kosipeli vakalesuimai me yacova ni ra sa kunea. Me ivakaraitaki, a kaya e dua na saumaki mai, “Na gauna au a rogoca kina na kosipeli, a vakasinaita e dua na qara e yaloqu ka’u sega ni kila ni a tu e kea.” E dua tale a kaya, “Au sa vakacavara na vakasaqaqara au sega tu ni kila ni’u a tiko kina.” Eso tale era vaqara tiko vagumatua na dina ia era sega ni kila rawa na vanua me ra kunea kina (raica na Vunau kei na Veiyalayalati 123:12).

Vakasaqara na veidusimaki ni Yalotabu ni ko vaqarai ira na tamata mo vakavulica. Na kunekunei ena Yalotabu e sa ka bibi me vaka ga na veivakavulici ena Yalotabu. Mo vakabauta ni ko na kila na sala mo kunei ira kina o ira era na ciqomi iko.

Vuli Vata Vakaitokani

Era na rairai tiko beka na lewenilotu ena nomu iwasewase era a saumaki mai ki na Lotu. Vakataroga se ra a veitaratara beka vakacava kei na Lotu. Na nodra isaunitaro ena rawa ni solia vei iko na vakasama eso ena sala mo kunekunei kina. Taroga talega se ra kila vakacava ni rau vakavulica tiko vei ira na dina na daukaulotu. Vola vakalekaleka na veika era sotava ena nomu ivolaniveisiga ni vuli.

Vulici ni iVolanikalou

Era sa vakarautaki ka tuberi vakacava na luve ni Kalou ki na kosipeli vakalesuimai?

Vakarabailevutaka Nomu Rai ni Tuvatuva mo Kunea

Ni ko vakasaqara mo kunei ira na tamata me ra vakavulici, mo kila tiko na duidui ni ituvatuva vagauna kei na ituvatuva vakainaki. iTuvatuva Vagauna sa ikoya na vakaleweni ni nomu ituvatuva ni gauna kei na siga. iTuvatuva Vakainaki sa ikoya na caka ni dua na sasaga ena masumasu, ka vakainaki me vakanamata vei ira na tamata kei na sala vinaka duadua me ra kunei kina.

Na itaviqaravi donu, ena gauna donu kei na vanua donu, ena rawa ni vukei iko mo kunei ira na tamata me ra vakavulici. Tarogi iko ena veitaro oqo:

Evei beka eda na sotavi ira kina na tamata e sa vakarautaka tiko na Turaga?
Na vanua cava soti kei na mataqali itaviqaravi vinaka duadua me ra kunei kina na tamata ena veigauna eso vakatabakidua ni siga se macawa?
Eda na vakaraitaka beka vakacava na loloma, qaravi ira, se vakatorocaketaka me yaga na nodra bula ena gauna sara ga oqo?
Eda na vakayagataka beka vakacava na noda kaukauwa, kilaka maqosa, kei na taledi me da laveti ira cake kina?
Na cava na noda ituvatuva veitokoni kevaka e dua na ka e sega ni lako vinaka?

Tovolea mo kila na sala e vakarautaki ira tiko kina na tamata na Turaga. Era sa tuvakarau beka me ra veivosaki kei iko? Era vakasaqara tiko beka na veivuke se vakacegu?

Vakasamataka mada na sasaga ni kunekunei eso ka ra sa rawa vinaka. A yaco beka evei na imatai ni veisotari? Era a vakaitavi beka na lewenilotu ena sasaga oqori? A vakayagataki beka na tekinolaji?

Tekivuna na nomu tuvanaka ena nomu vakanamata ki na sala mo vakalougatataki ira kina na tamata, ka na qai matata mai na nomu ituvatuva vagauna.

Vuli Vata Vakaitokani

Vakayagataka vata kei nomu itokani na ituvatuva e ra mo dikeva kina na nomu sasaga ena nodra kunei na tamata mera vakavulici. Tuvanaka mo tovolea eso na vakasama vou vei iko.

Sasaga Eso ni Kunekunei	Eso na gauna	Vakawasoma	Voleka ni Veigauna Kecega
Eda na kilai ira na lewenilotu ka tokoni ira ena nodra sasaga me wasea na kosipeli, oka kina na lewenilotu vou, itabagone, o ira era vakavakarau tiko me ra kaulotu, kaulotu oti, matavuvale lewenilotu-vakatikina, kei ira na italatala qase namaki.
Eda na cakacakataka meda rawata na nodra veivakabauti na lewenilotu me rawa ni ra logavinaka kina ena nodra sureti ira na lewe ni nodra matavuvale kei na itokani me ra sota vata kei keda.
Eda na cakacaka vata kei ira na iliuliu ni tabanalevu ena bose ni veivakacokotaki vakamacawa me tokona na noda sasaga ni kunekunei ka raica kevaka era tiko eso na tamata e rawa ni da veitaratara kaya.
Eda na cakacaka vata kei ira na tamata era vakavulici tiko ena gauna oqo, o ira era vakavulici e liu, kei ira era soli na yacadra ena itukutuku raraba me ra kunei.
Eda na veivosaki kei ira na tamata ena veisiga yadua, na kena levu na kena vinaka.
Eda na vakavakarau vakayalo ka masuta na veivuke ni Kalou ni da tuvanaka me da kunei ira na tamata me da vakavulica.
Eda na vakabauta ni sa vakarautaki ira tiko na tamata na Turaga me da vakavulica.
Eda na vakasamataka na sala me da vukei ira kina e da sotava me ra vakila na veivakayarayarataki ni Yalo Tabu.
Eda na tuvanaka na takete vakatabakidua ni nodra kunei na tamata e na veimacawa kei na veisiga (raica na wase 8).
Eda na dau vaqarai ira tikoga na tamata me da vakavulica.
Eda na dau vakasamataka ka vakayagataka na sala duidui eso me da kunei ira kina na tamata. Eda na vakatovolea na sala vou eso me da kua kina ni tao tu ga ena dua na ivakarau tudei.
Eda na navuca vakatabakidua me da kunei ira na tamata. Eda na tuvanaka na gauna, vanua, kei na sala eda na vakanamata kina.
Eda na vakasamataka na vanua vinaka duadua kei na gauna vinaka duadua ni siga me da kunei ira kina na tamata me ra vakavulici.
Eda na vakasamataka na itaviqaravi eso ni kunekunei ka mana sara ena veigauna sa oti.
Eda na moica na noda ituvatuva ni kunekunei ke gadrevi ka me tiko na ituvatuva ni veitokoni ke lutu cala na veika sa tuvanaki tu.
Edana vakayagataka na app ni Vunautaka na Noqu Kosipeli me da kunea ka, me tuvanaki kina na takete ka caka ituvatuva, ka railesuva ka vakavouya na nodaru ivolatukutuku e veisiga.
Edana vakayagataka na noda taledi kei na kaukauwa yadua me da veivuke ka kunekunei kina.
Eda na tuvanaka na gauna kei na sala e da na vakayagataka kina na itukutuku raraba kei na tekinolaji tale eso me daru kunei ira kina na tamata me ra vakavulici.
Eda na vakayagataka na kacivaki ni itukutuku vakaraitaki kei na isolisoli vakaitaukei eso e sotava na veika era taleitaka kei na nodra gagadre na tamata ena noda iwasewase.
Eda na sauma vakatotolo na kerekere kei na itukutuku ena initaneti mai vei ira na tamata era na rairai taleitaka.
Eda na tuvanaka taumada na noda itukutuku raraba ka cakacaka vata kei ira na lewenilotu me da kunekunei ena initaneti.

Gumatua ena Kunekunei

Cakava na Kunekunei me Dua na Sasaga Tudei

Ena gauna taumada ni Lotu vakalesuimai, a vakasalataki ira vakawasoma na Turaga e dua na ilawalawa veitacini vakalotu me ra vakavulica na Nona kosipeli “ena nodra ilakolako” ni ra lako voli. A vinakata o Koya me ra vakayagataka na veimadigi kece sara me ra wasea kina na kosipeli. (Raica na Vunau kei na Veiyalayalati 52:9–10, 22–23, 25–27.)

Vakayagataka na ivakasala oqo ena nomu kunekunei. Saga vagumatua mo kunea rawa ena siga taucoko. Tuvanaka na nomu sasaga ni kunekunei—ka vakaraica talega na madigi eso sega ni tuvanaki tu. Na kunei ni tamata vou me vakavulici e sa dua na gagadre tudei.

Vakasaqara na veivakauqeti ka tuvakarau mo vakayagataka na sala duidui eso. Vakanamata ki na sala e mana vakalevu duadua ena nomu iwasewase.

Balata Tikoga na Wanisiwa e Wai

Me baleta na nodra cakacaka na daukaulotu, a kaya kina o Peresitedi Dallin H. Oaks:

“E sega ni dodonu me dua vei keda me vaka na gonedau ka nanuma ni sa qoli tiko ena siga taucoko ia ni laurai dina a vakayagataka kina o koya e vuqa na nona gauna me lako yani ka lesu mai wai, kana vakasigalevu, ka vakayanaka voli na nona iyaya ni siwa. Na katoa ni qoli e semati ki na balavu ni kena bala na nomu wanisiwa e wai, sega ni balavu ni nomu tu tani mai na vale. Eso na gonedau era tu tani mai vale me tinikarua na auwa ka bala tu na nodra wanisiwa me tini na auwa. Eso tale na gonedau era tu tani mai vale me tinikarua na auwa ka rua ga na auwa na bala tu ni nodra wanisiwa e wai. Na mataqali gonedau vaka oqo ena rairai vakataroga se cava era sega ni katoa vinaka kina me vakai ira tale eso.

“Na ivakavuvuli vata ga oqo e sa baleti ira na daukaulotu, ka vakatoka na iVakavuvuli me ra ‘gonedau ni tamata’ [Maciu 4:19]. Na wanisiwa ni daukaulotu e dodonu me bala yani ki na iqoliqoli ena gauna ga e biubiu kina mai vale” (semina me baleti ira na peresitedi vou ni kaulotu, 20 ni Jiune, 2000).

A vakuria o Elder Quentin L. Cook ena ivakatautauvata oqo. Me ikuri ni nomu balata tikoga na nomu “wanisiwa e wai” me dua na gauna balavu cake, a vakavulica o koya ni o ira na daukaulotu era kunei ira na tamata me ra vakavulici era “dau balata tikoga e vuqa na wanisiwa e wai. …

“Era vakaraica ka veitaratara kei ira na vuvale lewenilotu-vakatikina.

“Era vakasaqara ena nodra [App ni Vunautaka na Noqu Kosipeli] me baleti ira na tamata era sa vakavulici e liu me ra veitaratara kaya ena talevoni kei na teks.

“Era dau veiqaravi vei ira na lewenilotu, o ira era sa vakavulici oti e liu, o ira era sa veivakavulici tiko ena gauna oqo, kei na itikotiko raraba. …

“Era vukei ira na lewenilotu me ra bulia na itukutuku ni kosipeli me ra wasea vakai ira ena nodra … vatavata ni vakauitukutuku raraba.

“Era tauri yacasoli mai vei ira era sikova ka vakavulica” (“Be Spiritual Pathfinders and Influencers,” sokalou ni daukaulotu, 10 ni Sepi. 2020; vakabibitaki).

Vuli Vata Vakaitokani

Veivosakitaka na taro eso oqo:

Na cava eso na sala e rawa ni o balata tu ga kina na nomu “wanisiwa e wai” vakabalavu cake ena loma ni dua na siga?
Na cava eso na sala e rawa ni o balata tu ga kina e vuqa na wanisiwa e wai ni ko kunei ira na tamata me ra vakavulici?
Na veika cava ena app ni Vunautaka na Noqu Kosipeli ena rawa ni vukei iko?
O na vakayagataka vakacava na tekinolaji me vukei iko mo balata tu ga kina e vuqa na wanisiwa e wai?

Veivosaki kei na Tamata Kece

Tara cake e dua na gagadre titobu me kauti ira mai na yalo vei Karisito (raica na Mosaia 28:3). Ni o vakila na gagadre oqo, ena vakavotui na nomu loloma kei na kauwai ena nomu sasaga mo kunea. Ena laurai talega na nomu loloma ena nomu veivosaki.

Veivosaki kei ira na levu ga ni tamata o rawata e veisiga yadua. Veivosaki kei ira e veivanua cava ga o lako kina. Ke veiganiti, lako ki na veivalevale. A vakasalataki ira eso na italatala qase taumada ni Lotu na Turaga, “Mo dolava na gusumu ka vunautaka na noqu kosipeli.” A qai yalataka ni “na qai vakasinaiti” na gusudra ena veika me ra vakavulica (Vunau kei na Veiyalayalati 30:5; raica talega na 33:7–10).

Sa vakakina, a kaya na Turaga vei Josefa Simici kei Sidini Rikitoni, “Drau tabalaka cake na domomudrau vei ira na tamata oqo; drau tukuna yani na ka au sa vakatakila ki lomamudrau.” A qai yalataka o Koya, “Ena soli vei kemudrau … ena gauna sara ga ko ya, na veika mo drau tukuna” (Vunau kei na Veiyalayalati 100:5–6).

Ni ko sotavi ira na tamata, e vakavuqa o na vakila na Yalotabu ni vukei iko mo kila na ka mo tukuna. Ia, kevaka o sega ni vakila e dua na veivakauqeti, tekivu ga ena dua na vanua—de dua ena nomu taroga e dua na taro ka vakarogoca na nodra isaunitaro (raica na “Kunei Ira na Tamata ena Vanua Era Tiko Kina” ena iwase oqo). Se rairai tukuna baleta na Turaga o Jisu Karisito se na veikacivi nei Josefa Simici me parofita ni Kalou.

Na vakasama eso oqo ena rawa ni veivuke ni ko veivosaki kei ira o sotava:

Mo lomavinaka, dau dina, ka veiciqomi. Vakasaqara na sala mo sema kina vua ka tekivuna sara e dua na veivosaki.
Vakarorogo vinaka ki na ka era tukuna na tamata. Vakasaqara mo kila na nodra gagadre kei na veika era taleitaka na tamata yadua. Solia na veivuke yadua kevaka e ganita.
Vakasamataka na sala e rawa ni veivuke kina na kosipeli me sotava na nodra gagadre. Qai vakavulica e dua na dina taumada ni kosipeli ka sureti ira me ra vulica vakalevu cake. Wasea na sala e rawa ni kauta mai kina na kosipeli vakalesuimai na inuinui kei na inaki levu cake ki na nodra bula.
Taroga me baleta na nodra matavuvale. Vukei ira me ra raica na sala e rawa ni vakalougatataka kina na nodra matavuvale na kosipeli vakalesuimai. Lomasoli mo vukei ira me ra kunea na yacadra na tubudra era sa mate.
Sureti ira me ra lako mai ki na soqoni ni sakaramede.
Vakarautaka na ivolalailai se so tale na ivola ni Lotu, na kena ruarua e tabaki ka vakalivaliva.
Wasea vei ira na nomu inaki vakadaukaulotu kei na vuna o a nanuma kina mo kaulotu.

Na ivakavuvuli oqo e yaga talega ki na nomu veimaliwai kei ira na lewenilotu.

E sa matau tu meda dau lomaleqataka na noda veivosaki kei ira na tamata. Masulaka na vakabauta kei na yaloqaqa mo vakavulica na kosipeli vakalesuimai. O ira kece o sotava era sa tacimu se ganemu ena matavuvale ni Kalou. Nanuma tiko ni o Koya “sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa; … era sa tautauvata na tamata kecega vua na Kalou” (2 Nifai 26:33).

Vuli Yadua se Vuli Vata Vakaitokani

Wilika na itukutuku mai vei Victor Manuel Cabrera ena “Thirsting for the Living Water,” Ensign, Aug. 2001, 60–61. Ni o cakava qori, vakaraica na sala a vakarau tu kina o koya me ciqomi rau na daukaulotu kei na sala erau a vakayagataka kina na daukaulotu e dua na madigi sega ni tuvanaki me vakavulici koya kina ena kosipeli.

A vakarautaki vakacava tu na turaga oqo me baleta na kosipeli vakalesuimai?
Na cava beka ena yaco ke rau a sega ni wasea na italatala qase e dua na itukutuku ni kosipeli?
Railesuva na ka o a cakava ena noa. O a veivosaki beka kei ira na levu ga ni tamata o rawata? Ke sega, tuvanaka na takete ka nakita mo veivosaki kina kei ira e levu cake na tamata nikua.

Vulici ni iVolanikalou

Na cava o rawa ni vulica mai na ivolanikalou oqo me baleta na kunei ni tamata me ra vakavulici? Na cava o rawa ni vulica mai na ivolanikalou oqo me baleta na veika mo vakavulica? Na cava e sa yalataka tu na Turaga?

Vunau kei na Veiyalayalati 24:12; 28:16; 33:7–15; 60:2–3, 7

Duavata kei ira na Lewenilotu

“Na nodra sureti na tamata kecega me ra ciqoma na kosipeli e tiki ni cakacaka ni veivakabulai kei na bula vakacerecerei” (iVoladusidusi Raraba, 23.0). Cakacaka vata kei ira na lewe ni Lotu me kunei ira na tamata me ra vakavulici. Ni ra vagolea e dua vei iko na lewenilotu ka ra qai vakaitavi ena lesoni, ena rawa ni papitaiso ka bulabula tikoga ena Lotu na tamata oya.

Taracake na Veiwekani Kaukauwa kei Ira na iLiuliu Vakaitaukei

Taracake na veimaliwai kaukauwa kei na matabisopi kei ira na iliuliu tale eso ni tabanalevu. Na iliuliu ni kaulotu ni tabanalevu (kevaka e sa kacivi e dua) kei na mataveiliutaki ni kuoramu ni italatala qase kei na iSoqosoqo ni Veivukei era sa nomu sala ni veitaratara taumada. Vakasaqara na nodra veidusimaki, ka tokoni ira ena bose ni veivakacokotaki vakamacawa (raica na wase 13).

Ena bose ni veivakacokotaki vakamacawa, cakacaka vata kei na ivukevuke ni kuoramu ni bete kei na peresitedi ni kalasi ni Goneyalewa ena kalasi qasecake duadua. O ira na itabagone oqo e tiko na nodra itavi bibi ena wasei ni kosipeli. Vukei ira me ra vakayaloqaqataki ira na lewe ni kuoramu kei na kalasi me ra wasea na kosipeli. Dua na sala oya me ra sureti ira na itokani na itabagone ki na itaviqaravi.

Tarogi iko wasoma, “Au sa veivakalougatataki tiko beka vei ira na iliuliu vakaitaukei?” Taracake e dua na ivakarau ni “Au na veivuke beka vakacava?” Me vakataki Amoni ena iVola i Momani, mo torovi ira na iliuliu vakaitaukei ena ivakarau ni veiqaravi (raica na Alama 17:23–25).

Kivei ira na iliuliu ni kaulotu, a vakavulica o Peresitedi Russell M. Nelson: “Au nuitaka ni ko na vulica mo lomani ira na iliuliu kei na lewenilotu vakaitaukei. Laveti ira cake ka vakauqeti ira. Na nomu rawata mo semata na nodra gugumatua na daukaulotu kei na nodra loloma tudei kei na sasaga veivukei na lewenilotu e sega ni rawa meda vakameleya rawa. Ena vakalevutaki vakatotolo na nomu rawa-ka” (“Hopes of My Heart,” semina me baleti ira na iliuliu vou ni kaulotu, Jiune 23, 2019).

Tokoni Ira na Lewenilotu ena Nodra Sasaga me ra Wasea na Kosipeli

E vuqa tu na sala me ra tokoni ka vakayaloqaqataki kina na lewenilotu ena wasei ni kosipeli. Vukei ira me ra vakasamataka na sala sa vakalougatataka kina na nodra bula na kosipeli. Vakayaloqaqataki ira me ra “dulaka cake na [nodra] rarama me cilavi vuravura” (3 Nifai 18:24).

Vukei ira na lewenilotu me ra vakayagataka na ivakavuvuli ni loloma, wasea, kei na sureta. Solia na ivakaraitaki eso ni sala dodonu ka matau e rawa ni ra vakayagataka kina na ivakavuvuli oqo.

Loloma. E dua na sala eda vakaraitaka kina na noda lomana na Kalou oya ena noda lomana ka qaravi ira na Luvena. Vakauqeti ira na lewenilotu me ra dolele yani ena loloma vei ira na lewe ni matavuvale, itokani, weka, kei ira tale eso. Na sasaga kecega me vakaraitaka na loloma sa sala bibi ni kena maroroi na veiyalayalati era sa cakava kei na Kalou (raica na Mosaia 18:9–10).

Wasea Ena vuku ni nodra lomana na Kalou kei ira na Luvena, sa lomadra sara me ra wasea na veivakalougatataki sa solia vei ira o Koya (raica na Joni 13:34–35). Vakayaloqaqataki ira na lewenilotu me ra tukuna vei ira tale eso na sala e sa vakalougatataka kina na nodra bula na kosipeli. Vakayaloqaqataki ira me ra tukuna me baleta na iVakabula kei na Nona veivakayarayarataki. Vukei ira me ra vakila na reki ni nodra wasea na nodra loloma, gauna, kei na veika yaco ena nodra bula. Vukei ira me ra vulica me wasea ena sala dodonu ka matau—me tiki ga ni veika era sa cakava tiko ena nodra bula.

“Eda na dau veiwaseitaka kece na ka kei ira na tani. Eda na dau cakava vakawasoma. Eda na dau wasea nai yaloyalo yavala kei na kakana eda taleitaka, na veika lasa eda raica, na veivanua eda sikova, na cakacaka ni liga eda marautaka, kei na vosa cavuti eda vakauqeti kina.

“Eda na vakuria vakacava na veika eda sa wasea oti ki na veika eda taleitaka kina na kosipeli i Jisu Karisito? … Ena noda wasea vei ira na tani na veika vinaka eda sotava ena kosipeli, eda sa vakaitavi tiko kina ena ilesilesi cecere ni iVakabulataki na veika vinaka eda sotava ena kosipeli, eda sa vakaitavi tiko kina ena ilesilesi cecere ni iVakabula” (Gary E. Stevenson, “Loloma, Wasea, Sureta,” Liaona, Me 2022, 86).

Sureta. Sa sureti ira na tamata kecega na iVakabula me ra ciqoma na Nona kosipeli ka vakavakarau ki na bula tawamudu (raica na Alama 5:33–34). E vakavuqa, na veisureti sa kena ibalebale me okati kina na noda matavuvale, itokani, kei ira na tiko tikivi keda ena veika eda sa cakava tiko. Vakauqeti ira na lewenilotu me ra masulaka na nodra sureti na tamata ena sala oqo:

Lako mai ka raica. Sureti ira na tamata me ra “lako mai ka raica” na veivakalougatataki era rawa ni ciqoma mai vei Jisu Karisito, Nona kosipeli, kei na Nona Lotu.

1:17
Lako mai ka veiqaravi. Sureti ira na tamata me ra “lako mai ka veiqaravi” vei ira era vakaleqai tu.
Lako mai ka okati. Sureti ira na tamata me ra “lako mai ka okati” vaka lewe ni Lotu i Jisu Karisito sa vakalesuimai.

E kaya o Elder Gary E. Stevenson: “E drau na veisureti eda rawa ni vakatetea vei ira na tani. E rawa ni da sureti ira na tani me ra ‘lako mai ka raica’ e dua na soqoni ni sakaramede, nai taviqaravi ni tabanalevu, e dua na vidio ena initaneti ka vakamacalataka na kosipeli i Jisu Karisito. ‘Lako mai ka raica’ e rawa ni dua na veisureti me wiliki na iVola i Momani se sikova e dua na valetabu vou ena gauna ni kena dolavi raraba ni bera ni vakatabui. Ena so na gauna na veisureti e dua na ka eda na vakatetea ki lomada—e dua na veisureti vei keda, meda vakila ka raica na veimadigi e wavoliti keda tu meda cakacakataka” (“Loloma, Wasea, Sureta,” 86).

Raica mo vukei ira na itabagone me ra loloma, wasea, ka sureta. Era sa vakalougatataki vakalevu na itabagone ena nodra lomani ira na nodra itokani, wasea na veika e tu e yalodra, ka sureti ira ki na itaviqaravi.

Vukei ira na lewenilotu me ra kila deivaki ni sasaga cava ga me bulataki kina na ivakavuvuli ni loloma, wasea, kei na sureta e sa dodonu, kevaka madaga era sebera ni ra se sotavi ira na daukaulotu se me ra sa lewena na Lotu.

Vukei ira na lewenilotu me ra vakayagataka na kaukauwa e tu vei ira ena wasei ni kosipeli. Eso era maqosa ena kunei ira na tamata me ra vakavulici, ka so era qasenivuli vinaka sara. Eso era matau ena veitaratara kei ira na itokani, eso tale era dau taleitaka me ra masulaki ira na nodra icaba. Vukei ira me ra raica ni tiko na sala me ra vakaitavi kina na tamata kecega.

Ni ko sikovi ira na lewenilotu, cakava ena dua na inaki. Vakaraitaka ni o sa vakaitavi vagumatua tiko ena cakacaka ni kunekunei kei na veivakavulici. Rokova na nodra gauna kei na nodra ituvatuva.

Eso na lewenilotu era na marautaka beka mo vakavulica e dua na itukutuku mai na dua na lesoni. Na dina eso ni kosipeli era sa dau veisautaki bula. Na vaqaqacotaki ni nodra kila vakavinaka na lewenilotu na kosipeli ena vakalevutaka na nodra nuitaki iko ka taracake na nodra taleitaka me ra wasea. Vukei ira me ra vakila na Yalotabu ka cakacakataka na veivakauqeti.

Vakasaqara me ra kunei na tamata me ra vakavulici mai na matavuvale lewenilotu vakatikina, italatala qase namaki, lewenilotu lesu mai, kei ira na lewenilotu vou. Ena rawa beka ni levu na lewe ni nodra matavuvale kei na itokani mai na veimatalotu tale eso.

Ena veika kece o cakava kei ira na lewenilotu, muria na Yalotabu ka segata mo taracake na nodra vakabauta na iVakabula, o Jisu Karisito.

Me baleta na ikuri ni vakasama kei na ivurevure ni sala mo tokoni ira kina na lewenilotu ena wasei ni kosipeli, raica na:

share.ChurchofJesusChrist.org.
“Wasei ni Kosipeli” ena Valenivola Vakosipeli.
Vunautaka na Noqu Kosipeli, wase 13.
iVoladusidusi Raraba, wase 23.

Veivakalougatataki Yalataki ni Wasei ni Kosipeli

Vukei ira na lewenilotu me ra kila vakavinaka na veivakalougatataki vakasakiti ni wasei ni kosipeli. Oqo era oka kina na:

Reki kei na vakacegu (raica na Vunau kei na Veiyalayalati 18:10–16; Alama 26:11, 13, 35; Alama 36:24–28).
Kaukauwa veitokoni mai vua na Kalou (raica na Mosaia 18:8–13; Joni 15:4–5).
Taqomaki mai na veitemaki (raica na 3 Nifai 18:24–25).
Veivosoti ni ivalavala ca (raica na Vunau kei na Veiyalayalati 62:3).

Vuli Vata Vakaitokani

Railesuva na nomu bose ni veivakacokotaki vakamacawa sa oti. O a rawa vakacava beka ni vakavinakataka cake? Railesuva na nodra kerekere na iliuliu ni tabanalevu ka tuvanaka na sala kei na gauna mo saumi kina.
Tuvanaka na sala mo na raica kina na nomu sasaga ni kaulotu ena bose ni veivakacokotaki e tarava.
Mo kila tiko na yacadra na iliuliu ni tabanalevu (tagane kei na yalewa). Tuvanaka na veika o na cakava ena vula mai oqo mo taracake kina na veimaliwai kaukauwa cake kei ira ka tokoni ira ena nodra sasaga ni kaulotu.

Kunea ena App ni Vunautaka na Noqu Kosipeli

Na app ni Vunautaka na Noqu Kosipeli sa ivurevure cecere ni nodra kunei na tamata me ra vakavulici. O ira na daukaulotu era dau vakayagataka wasoma na veika ena app oqo era rawaka vakalevu cake ena kunekunei. Me kilai vakavinaka na veika oqo, raica na veituberi e vakarautaki tu ena loma ni app. Mo dau kila na veivakauqeti vakayalo o na ciqoma ni ko railesuva na yacadra na tamata.

E oka ena app na itukutuku me baleti ira na tamata era a vagolei taumada mai, veitaratara, se vakavulici oti. Eso vei ira oqo era na vinakata beka me ra sota tale kei ira na daukaulotu. Era na rairai kila talega eso tale na tamata era na taleitaka beka me ra vulica na kosipeli.

Ena nomu tuvanaka, vakayagataka na mape kei na ivuloni ena app mo vakaliuca kina na tamata me ra sikovi. Raica na kedra itukutuku ka vulica na sala era kunei kina. Raica kevaka e tiko e dua na itukutuku me baleti ira na lewenilotu era a vukei ira. Vakayagataka na itukutuku oqo mo kila kina na sala vinaka duadua mo dolele tale kina vei ira.

Vakayagataka na ivakaraitaki ni ivuloni ena app mo kilai ira kece era:

A dua na tikinisiga ni papitaiso sa tuvanaki oti tu ia a qai sega ni papitaiso.
A tiko ena soqoni ni sakaramede vakadua mada ga ia a sega ni papitaiso.
A taura oti e sivia e tolu na lesoni.
Se bera mada ni veitaratara walega qo.

Kevaka era sega ni taleitaka na tamata o sikova me ra vakavulici se digitaka me sa muduki na veisiko, vola na itukutuku oqori ena app. Vola na sala mo na veitaratara tiko kina kei ira era susugi cake me yacova ni ra sa vakarau tu me vulica e levu tale na ka. Me ivakaraitaki, vakasamataka mo sureti ira me ra sainitaka e dua na isoqoni ni imeli me ra dau ciqoma kina na itukutuku me baleti Jisu Karisito se so tale na ulutaga vakosipeli. E rawa talega ni o semati ira ki na dua na lewenilotu ka rawa ni sauma na taro ka bucina cake na nodra taleitaka kei na veitokani vinaka. Vakarautaka e dua na ivakananumi ena app mo talemuri ira kina. Tarogi ira kevaka era kila e dua ena rairai taleitaka.

E rawa talega ni o kunei ira na tamata me ra vakavulici ena app ni Vunautaka na Noqu Kosipeli ena nomu vakayagataka na ivuloni se ilawalawa me vakau kina na itukutuku vakailawalawa. Oqo e rawa ni dua na sala vinaka me da vakatakila kina vei ira na tamata na veika yaco me vaka na itaviqaravi ni tabanalevu kei na lotu ni papitaiso. Talemuria na veisureti yadua ki na veika yaco oqo.

Vuli Vata Vakaitokani

Mo rawa ni raica kina na vinaka ni ivurevure ni app na Vunautaka na Noqu Kosipeli ena kunekunei, tovolea na itaviqaravi eso oqo. Ni o cakava vakakina, vakarorogo ki na veivakauqeti o ciqoma.

Ni o vakayagataka tiko e dua na ivuloni, vakatakilai ira kece na tamata era sa vakavulici oti ena tolu se sivia na lesoni. Sureti ira yadua me ra lako mai ki lotu ena Sigatabu oqo.
Bulia e dua na ivuloni ka vakaraici ira kece era a tuvanaki oti tu na nodra siga ni papitaiso ka ra sa lako vakarua ki lotu ke lailai.
Tuvanaka mo vakauitukutukutaki ira yadua na tamata me ra veitomani ena dua na itaviqaravi ni tabanalevu se cakacaka ni veiqaravi. O na vinakata beka mo vakauta vagauna e dua na itukutuku ni ilawalawa ka talemuria yani kivei ira yadua na tamata.
Veivosakitaka kei nomu itokani o ira o vakila ni o sa vakauqeti kina. Tuvanaka mo sikovi ira se veitaratara kei ira ena dua na gauna lekaleka mai oqo.

Kunea ena Veiqaravi

Vakarautaka na Madigi vei Ira na Tamata Mera Lako Mai ka Veiqaravi

E rawa ni ra sotava na tamata na veika vinaka ka sema vei ira na daukaulotu kei ira na lewenilotu vakaitaukei ena itaviqaravi eso ni veiqaravi. E vuqa na tamata era na marautaka me ra wasea na nodra taledi, kila, se veiqaravi ka sa gadrevi ga kina mera sureti.

Sureti ira na tamata me ra vakaitavi ena itaviqaravi eso ni veiqaravi e dau tuvanaka na tabanalevu. E rawa talega ni o semati ira na tamata ki na madigi eso ni veiqaravi me vakataka ena JustServe.org na vanua e tu kina. Ni ko veiqaravi vata kei ira na tani, o ni na toro vata mai ena dua na sala kaukauwa.

Solia na Veiqaravi

Me vaka na iVakabula, “[mo] lako voli ka daucaka vinaka” (Cakacaka 10:38; raica talega na “Lako voli ka Daucaka Vinaka” ena wase 1). Masulaka mo kila na madigi mo daucaka vinaka ena veisiga yadua. So na gauna ena tuvanaki na nomu veiqaravi, ia e vakavuqa ena sega ni tuvanaki. Vakaraica na sala rawarawa ka totolo mo qaravi, vukei, ka laveti ira kina na tamata. Nanuma tiko ni Turaga a taura na madigi eso e sega ni namaki me dolele yani ka vakalougatataki ira na tani.

Veiqaravi ena gagadre dina mo vukei ira na tamata. Kevaka e veimuataki na veiqaravi ki na dua na madigi ni veivakavulici, mo vakavinavinaka. Ke sega, vakavinavinakataka na nomu caka vinaka vua e dua. Dau sauma na taro ke ra taroga mai na tamata. Kevaka e dua e vakaraitaka na nona taleitaka, sauma vakalekaleka ka lokuca e dua tale na gauna ni sota mo wasea kina e dua na itukutuku.

Raica mo muria na idusidusi ni veiqaravi ena iVakatagedegede ni Kaulotu me baleti ira na Tisaipeli i Jisu Karisito, 2.7 kei na 7.2.

Kunei Ira Mai na Tamata ena Vanua Era Tiko Kina

Na kunei ni tamata ena vanua era tiko kina e tekivu ena kena tovolei me ra raici ira me vaka e dau raici ira na Kalou. Mo raica ga me vaka o a muataki mo veivosaki kei na tamata oqo, se a muataki beka mai o koya vei iko. Vakasaqara mo kila vinaka na nodra gagadre vakayalo na tamata. Vakaraica na veika e bibi duadua vei ira, vakabibi ena nodra veimaliwai kei na nodra matavuvale kei na Kalou. O na taroga beka na taro me vaka qo e ra—ka qai vakarorogo vagumatua:

Na cava o vakamareqeta vakalevu duadua?
Na cava e dau solia vei iko na reki?
Na cava o vinakata me baleta na nomu veisiga ni mataka kei ira o lomana?
Na bolebole cava o sotava ena nomu yacova yani na nomu vakanuinui kei na tadra?
Na veitiki cava soti ni nomu bula o na via vakavinakataka?

Vakasaqara na veivakauqeti ni o vakasamataka na veika o vulica me baleta na nona vakanuinui kei na gagadre e dua. Na dina cava so ni kosipeli e semati vakamatau ki na veika e vinakata o koya?

Vakasamataka na nomu veitorovi yani mai na nona rai na tamata o ya. Na cava e kila tu o koya me baleti iko? Na cava o rawa ni solia ka na rawa beka ni veivuke? E nanuma beka o koya ni na yaga na nona veimaliwai kei iko?

Vakasamataka na duidui ni vuna era na vinakata beka kina na tamata me ra kilai iko, lewenilotu tale eso, se na Lotu. Eso na ivakaraitaki ni veika o rawa ni vakarautaka era sa tuvai koto e ra.

Solia na Veika Sotavi se iTukutuku Era na Vakamareqeta

Vakayagataka na ivurevure eso ni Lotu kei na nomu taledi kei na kaukauwa mo semati kina ki na nona gagadre e dua. Vakasaqara na veivuke ni Tamada Vakalomalagi ena soli ni itukutuku se veika sotavi ka na vakamareqeta na tamata oya.

Mo ciqoma na veivakauqeti ka vakavurea na vakasama ni veimataqali veika sotavi se itukutuku duidui eso e rawa ni o vakarautaka. Sa volai koto e ra eso na vakasama:

Wasea e dua na isema ki na dua na ivurevure ni Lotu ka vakarautaka tu na itukutuku me baleta e dua na ka era na taleitaka.
Vakayacora e dua na soqo me vaka e dua na lotu (e matana votu se kakaburaki bula).
Solia e dua na ka ena dua na soqoni se soqo vakaitaukei (me kena ivakaraitaki, tauyavutaka na vunikau ni tuvakawa sega ni saumi ena dua na makete vakaitaukei).
Lomasoli mo vakavulica e dua na kalasi.
Tuvanaka e dua na kalasi ni vuli ivolanikalou, se okata mo wilika vata kei ira na iVolatabu kei na ivolanikalou tale eso.
Vakavulica na vosa Vakavalagi me ikarua ni vosa.
Vakaraitaki raraba yani na itaviqaravi eso ni Lotu me vaka e dua na soqo ni vakacagicagi se kalasi ni bula rawati koya. Vakayagataka na tikidua veisoliyaki se itukutuku raraba.
Sureti ira ki na dua na lotu ni papitaiso.
Sureti ira ki na dua na veisiko ki na valenilotu voleka.

E dua na ka talei duadua o rawa ni vukei ira kina na tamata oya me ra tiko ena dua na soqoni ni Lotu. Sureti ira ka vakamacalataka se na vakacava tu beka. Tukuna vei ira na sala ena vakalougatataka kina na nodra bula na tiko ena dua na soqoni ni sakaramede.

Vakarautaka na Veimaliwai Dina

E vuqa na tamata era dau vinakata me ra sotavi ira na tani ena nodra itikotiko se me ra kilai ira vakavinaka cake. Eso na tamata era galili tu. Eso na vakasama me baleta na vukei ni veimaliwai dina era sa volai koto e ra.

Sikovi ira na tamata era se qai toki vou mai ki na vanua oya mo kidavaki ira.
Vakatakilai ira na tamata ena itikotiko raraba vei ira na lewenilotu era dau taleitaka na veika era taleitaka.
Sureti ira na tamata ki na soqoni ni tabanalevu, itaviqaravi, kei na dolavi vale raraba.
Lomasoli mo vukei ira me ra sema vua na iliuliu ni valetabu kei na tuvakawa, o koya ena rawa ni vukei ira me ra vulica eso tale na ka me baleti ira nodra lewe ni matavuvale sa mate.
Lomasoli mo vakavulici ira na tamata ena ivakarau ni lotu vakamatavuvale se na wiliki vakamatavuvale ni ivolanikalou. (Raica na iVoladusidusi Raraba, 2.2.4, me baleta na ivakavuvuli veivukei ka rawa ni moici ki na kedra ituvaki na tamata.)
Sureti ira na tamata ena yabaki ni bula veiganiti me ra tiko ena semineri, tiko ena inisitute, se vakaitavi ena BYU–Pathway e Vuravura Raraba.

E vuqa tu na sala dokai me ra kunei kina o ira era sa vakavakarau tu ki na kosipeli vakalesuimai. Cakava na veika o rawata mo tu kina ena nodra sala o ira era sa vakarau tu.

Vuli Vata Vakaitokani

Raica eso na vakasama ena iwasewase oqo o se bera ni tovolea. Tuvanaka mo tovolea eso na vakasama ena loma ni macawa ka tarava.

Veitaratara kei Ira na Tamata era Vagolei Yani Vei Iko

O ira na tamata era vagolei yani vei iko era sa rairai vakarau tu me ciqoma na kosipeli i Jisu Karisito. Na veivagolei e rawa ni lako mai vei ira na lewe ni Lotu, daukaulotu tale eso, itikotiko liu ni Lotu, kei na sasaga eso ni itukutuku raraba vakaitaukei.

Dolele Yani Vakatotolo

Ni vagolei yani vei iko e dua na tamata mai na itikotiko liu se na itukutuku raraba vakaitaukei, railesuva na itukutuku ena App ni Vunautaka na Noqu Kosipeli me baleta na veika e taleitaka. Tovolea mo veitaratara kei ira ena kena gauna totolo duadua.

Vakayagataka na idusidusi oqo ni o cakacaka vata kei ira era vagolei yani vei iko:

Kevaka a vagolei koya yani e dua na lewenilotu se so tale na daukaulotu, veitaratara kei koya se o ira mo vulica eso tale na ka. Kevaka era vagolei koya yani na daukaulotu, sa rawa me ra veivakavulici vata kei iko ena initaneti kevaka e vakadonuya na nodra iliuliu ni kaulotu. Sa rawa me ra tomani iko na lewenilotu me vakaitavi ena veivakavulici ena matana votu se ena initaneti.
Tovolea vakatotolo mo veitaratara kei koya ena dua na veisiko, qiri, teks, imeli, se dua tale na sala ni veitaratara. Ke sega ni sauma mai o koya, tovolea mo veitaratara kei koya ena duatani tale na gauna ena siga.
Kevaka e imatai ni nomu veitaratara ena talefoni, teks, se imeli, lokuca e dua na gauna ni sota ena matana votu se ena tekinolaji.
Vaka itokani, railesuva na nona kerekere na tamata oya ka raica na nona gagadre eso kei na veika e taleitaka. Vakadeitaka na sala e rawa ni veivuke kina na kosipeli me sotava na gagadre oqori.
Ni dou sota, kauta mai na iyaya cava ga a kerei, me vaka na iVola i Momani. Wasea na dina ni kosipeli mai na lesoni ni daukaulotu e sotava na veika e taleitaka se gadreva tu o koya.

E so na gauna era na rawa ni liutaki iko o ira era vagolei yani, kivei ira tale eso sa vakarautaki ira tiko na Kalou. Kevaka era sega ni taleitaka na tamata o veitaratara kaya, taroga ke ra kilai ira eso tale era na taleitaka se gadreva tu na inuinui ena nodra bula. De dua o a muataki yani vua na tamata oqo baleta ni dua tale e tiko ena vale se itikotiko raraba oya sa vakarau tu me baleta na kosipeli.

Kevaka e dua na iloku kei na dua e mani lutucala, vakasamataka na sala mo cakava kina eso tale na cakacaka ni kaulotu ena vanua oya. Na app ni Vunautaka na Noqu Kosipeli ena rawa ni vukei iko mo kunei ira na tamata tu voleka era a sikovi se vakavulici taumada.

Vagolei Ira na Tamata vei Ira na Daukaulotu ena Dua Tale na iWasewase

Ni o sotavi ira na tamata era taleitaka me ra vulica vakalevu cake na kosipeli ia era tiko ena taudaku ni vanua o lesi kina, vakaveikilaitaki ira ki na kosipeli. Ka qai vukei ira me ra vakavakarau me sotavi ira na daukaulotu kei na lewenilotu ena vanua era vakaitikotiko kina.

Ena veivakadonui ni nomu peresitedi ni kaulotu, sa rawa mo tomana tikoga na nomu tokoni ira me vukei ira me ra ciqoma na kosipeli (raica na iVakatagedegede ni Kaulotu, 7.5.4).

Vuli Vata Vakaitokani

Railesuva na tamata kece era a vagolei ena nomu iwasewase ena loma ni vula sa oti. Raici ira na tamata o a sega ni rawa ni veitaratara kaya, ka tovolea mo veitaratara tale kei ira. Vakadeitaka se o cei vei ira o sa veitaratara kaya me na sikovi tale. Vakavouiya na itukutuku oqo ena app ni Vunautaka na Noqu Kosipeli.

Vakayagataka na Tekinolaji

E vuqa tu na sala e rawa ni o vakayagataka kina na tekinolaji mo kunei ira na tamata me ra vakavulici. Eso na ivakaraitaki era sa volai koto e ra:

Vakayagataka na itukutuku raraba mo cakacaka vata kina kei ira na lewenilotu me kunei ira na tamata.
Taracake na veimaliwai ena nomu dolele yani ena imeli kei na itukutuku raraba.
Wasea na ivolanikalou veilaveti, vosacavuti, kei na itukutuku ni kosipeli.
Vukei ira na tamata me ra vakayagataka na FamilySearch.org me ra vulica kina e levu tale na ka me baleti ira nodra lewe ni matavuvale era sa mate.
Vakarautaka na kalasi ena initaneti mo vakavulica kina na kilaka maqosa eso.
Cakava na isema veiganiti ena veimatailawalawa taleitaki ena initaneti.
Vakauta e dua na itukutuku me baleta na soqo ni tabanalevu eso ka tarava.

Na vakayagataki ni tekinolaji sa dua na sala bibi me bala tikoga kina “e vuqa na wanisiwa e wai” ena siga taucoko. Me ikuri ni nomu sasaga ni kunekunei tale eso, balata tikoga e wai e vuqa na wanisiwa ni Initaneti.

A vakavulica o Elder David A. Bednar: “Na tekinolaji e vakarautaka e vuqa na sala kaukauwa me rawa ni da kacivaki ‘Jisu Karisito duaduaga, kei na nona lauvako ki na kauveilatai’ ka ‘vunautaka na veivutuni vei ira na tamata’ [1 Korinica 2:2; Vunau kei na Veiyalayalati 44:3]. Era sa vakarau tu vakavinaka na itabagone tubucake tiko mai me ra rogoca ka vulica na kosipeli vakalesui mai ena sala ni veitaratara oqo” (“They Should Proclaim These Things unto the World,” semina me baleti ira na peresitedi ni kaulotu vou, Jiune 24, 2016).

Vuli Vata Vakaitokani

Vakaraica na ka e cakava tiko na nomu tabana ni kaulotu ena itukutuku raraba. Veivosakitaka kei nomu itokani na sala mo vola kina na itukutuku raraba ka salavata kei na ka oqo. Na nomu itukutuku e dodonu me salavata kei na lawatu ni initaneti ni Lotu (raica na “Initaneti” ena wase 38.8 ni iVoladusidusi Raraba).

Kevaka e tiko e dua na kenadau ni itukutuku raraba ni nomu tabana ni kaulotu, vakayagataka na nona kila ni ko caka itukutuku raraba eso.

Vakayagataka na Tuva Kawa

Na tuvakawa sa dua tale na sala mo kunei ira kina na tamata me ra vakavulici. E vuravura raraba, sa vakauqeti ira tiko e milioni na tamata na Yalotabu me ra kilai ira na tubudra era sa mate. E vuqa era vinakata me ra semati dei cake kei na nodra vuvale raraba. Oqo ena rawa ni vakavuna na gagadre me kunei e dua na isema kei na ivakatakilakila vaka tiki ni matavuvale ni Kalou.

Na veika eda dau vakatoka ena so na gauna me yalo i Ilaija sa ikoya na veivakayarayarataki ni Yalo Tabu ka vagolei ira mai na tamata me ra kila, volaitukutukutaka, ka vakamareqeta na nodra lewe ni matavuvale—ruarua ena gauna sa oti kei na gauna oqo (raica na Malakai 4:5–6).

Ena nomu kunei ira tiko, sa rawa mo vakaveikilaitaki ira na tamata ki na FamilySearch.org se sureti ira me ra lavetaka na app ni Vunikawa ni FamilySearch se na familySearch Memories app. E rawa talega ni o solia vei ira e dua na ilavelave ni ivolalailai My Family: Stories That Bring Us Together. Na ivurevure eso oqo ena vukei ira na tamata me ra kunei ira na wekadra kei ira na tubudra ka vakasoqona vata na nodra italanoa.

Vakadeitaka na ivurevure cava so ni tuvakawa sa tu ena nomu iwasewase kei na sala me ra vukei ira kina na tamata o veitaratara kaya tiko. Sa rawa vua na iliuliu ni valetabu kei na tuvakawa me vukei ira na tamata me ra kilai ira na tubudra era sa mate.

Sureti ira na tamata me ra wasea vei iko na nodra vakanananu eso me baleti ira na nodra daulomani. Ni ra cakava oqori, era na vakila beka ni vakadinadinataka vei ira na Yalo Tabu na bibi ni matavuvale ena ituvatuva ni Kalou. Na veigauna oqo ena rawa ni veimuataki ki na veivosaki matau me baleta na inaki ni bula, na ituvatuva ni marau ni Kalou, kei na itavi ni iVakabula ena ituvatuva oqori.

Ni veiganiti, vakavulica vei ira na tamata na ivunau me baleta na vuna era dau cakava kina na lewe ni Lotu na cakacaka ni tuvakawa kei na kena semati ki na valetabu.

Masulaka mo kila na madigi mo vakayagataka kina na tuvakawa ena nomu sasaga ni vaqaqara. Mo dau vakasama, ka kila vakavinaka na ivurevure sa tu rawa.

Vulici ni iVolanikalou

Vulica na ivolanikalou eso oqo me baleta na tuvakawa. Vola na veika o vulica.

Vakalesui mai na Kaukauwa ni Veivauci mai vei Ilaija

Cakacaka baleti Ira na Mate

Vuli Yadua se Vuli Vata Vakaitokani

Tovolea e dua se sivia na itaviqaravi oqo me vukei iko mo kunekunei kina ena tuvakawa.

Lokuca mo sikova e dua na lewenilotu ka sa matai tu ena tuvakawa. Vulica na veiqaravi cava so e tu vua na iliuliu ni valetabu kei na tuvakawa ni nomu tabanalevu.
Vakatovotovotaka na sala mo na vukei ira kina ena tuvakawa o ira o sotava. Tuvanaka mo vakarautaka na tuvakawa ena nomu sasaga eso ni kunekunei.
Wilika ka veivosakitaka na ivolalailai ni Matavuvale kei na Valetabu mo kila vakalevu cake kina me baleta na cakacaka ni tuvakawa. Vola na veika o vulica ena nomu ivolaniveisiga ni vuli.
Vakayagataka na ivurevure ena ivolalailai ni Noqu Matavuvale se FamilySearch.org ni ko kunei ira tiko na tamata me ra vakavulici.
Kevaka e rawa, cakava e dua na dolavi vale, vakavulica e dua na kalasi ni tuvakawa ena dua na vanua raraba, se soli vakasala.

Kunea Ni Ko Veivakavulici Voli

Na kunekunei kei na veivakavulici erau itaviqaravi veiwekani. O ira o vakavulica e vakavuqa era dau tiko na nodra itokani se wekadra era sa vakarau tu me ra ciqoma na kosipeli vakalesuimai. Ni ra sa sotava na tamata o vakavulica na veivakalougatataki ni kosipeli, ena tubucake na nodra gagadre me ra wasea (raica na 1 Nifai 8:12). Ena ituvaki kece sara—me vaka na kunekunei, veivakavulici, kei na cakacaka vata kei ira na lewenilotu—taroga, “O cei o kila ena yaga vua na itukutuku oqo?”

Ni ra vakavakarau tiko o ira o vakavulica ki na nodra lotu ni papitaiso, tarogi ira me baleta na matavuvale kei na itokani era na vinakata me ra sureta ki na nodra papitaiso. Tuvanaka mo sureti ira ka vakayaloqaqataki ira kece me ra lako mai. E rawa ni dau vakilai vakaukauwa na Yalotabu ena gauna ni lotu ni papitaiso.

Vuli Vata Vakaitokani

Railesuva e dua na lisi ni tamata o vakavulica tiko. Cakava e dua na lisi baleti ira o a kerea me ra veisureti mai kei ira o a sega ni kerei ira. Vakatovotovotaka na sala mo na veisureti kina ni veivagolei vei ira ena ilawalawa yadua. Ena nomu ituvatuva, vola kina e dua na ivakananumi mo solia yani na veisureti ena nomu veisiko e tarava.

Veivakavulici Ni O Kunea

Ni o sotavi ira na tamata ka raica rawa na veika era taleitaka ka gadreva, taracake na itovo mo tekivu veivakavulici ka wasea na nomu ivakadinadina. Ko na kunea e vuqa tale na tamata mo vakavulica ni o vakadinadinataka na iVakabula kei na Nona kosipeli ka vakatarai ira me ra vakila na kaukauwa ni Yalo Tabu.

Vakasamataka mo vakavulica na ulutaga eso me vaka na marau, na dredre, na inaki ni bula, se na mate. Se vakacava ga na nomu veitorovi taumada, vagolei iko totolo ka vakarawarawa vua na iVakabula, na Nona kosipeli, kei na Nona veikacivi vua na Parofita o Josefa Simici. Oqo na noda itukutuku duatani duadua ki vuravura.

Na iwase eso oqo e vakarautaka na ivakaraitaki ni sala mo vakavulica vakalekaleka kina na Vakalesuimai ni kosipeli i Jisu Karisito kei na bibi ni matavuvale.

Vakavulica ka Vakadinadinataka na Vakalesuimai ni Kosipeli i Jisu Karisito

Vakadinadinataki Jisu Karisito ka vakavulica na ivakaleka eso ni dina vakalesuimai. Me ivakaraitaki, sa rawa mo vakadinadinataka na kosipeli vakalesuimai i Jisu Karisito ena rua se tolu ga na iyatuvosa:

Ni oti e vica na senitiuri ni kena yali tu, sa vakalesuimai na dina mai vua e dua na Kalou dauloloma mai vua e dua na parofita bula. Sa tu vei keirau na ivakadinadina oqo ni rawa ni o taura e ligamu, wilika, ka vakasamataka vakatitobu e yalomu. Keirau sureti iko mo wilika ka masulaka mo vulica vakai iko na kena dina. O na vakatara beka me keirau …

Kevaka e tiko tale eso na nomu gauna, o na rawa ni kaya eso tale na ka:

Na neirau itukutuku e rawarawa walega. Na Kalou e Tamada. Oi keda na Luvena. Eda sa tiki ni Nona matavuvale. E kilai keda vakavinaka o Koya ka lomani keda. E gadreva o Koya meda sotava na reki. Mai na ivakatekivu kei vuravura, sa muria o Koya e dua na ivakarau ni dolele yani ena loloma me vakatakila na kosipeli i Jisu Karisito me rawa ni ra kila na Luvena na sala me ra lesu tale kina Vua. A sa vakatakila oti o Koya na kosipeli vei ira na parofita me vakataki Atama, Noa, Eparaama, kei Mosese. Ia e vuqa na tamata era digitaka tikoga me ra cata na kosipeli kei ira na parofita era vakavulica voli. Ena rua na udolu na yabaki sa oti, a vakavulica kina vakai Koya o Jisu Karisito na Nona kosipeli. Era a besetaki Jisu sara mada ga o ira na tamata. Ni oti na nodra mate na iApositolo i Jisu, era a vakatanitaka na tamata na ivunau dina, me vakataka na Lewe Tolu Vakalou. Era a veisautaka talega na cakacaka vakalotu, me vaka na papitaiso.

Na neirau veisureti vei iko o ya me vakuria na dina o sa vakamareqeta rawa tiko. Vakasamataka mada na ivakadinadina ni sa dolele tale yani na Tamada Vakalomalagi vei ira na Luvena ena loloma ka vakatakila na ivunau dina kei na cakacaka vakalotu vua e dua na parofita. Na yaca ni parofita oqo o Josefa Simici. Na ivakadinadina ni dina oqo e kunei ena dua na ivola—na iVola i Momani. E rawa ni o taura e ligamu, wilika, ka vakasamataka vakatitobu na kena dina ena nomu vakasama kei na yalomu. Keirau sureti iko mo lako mai ka tko kina ena lotu mo vulica kina eso tale na ka.

Vakavulica ka Vakadinadinataka na Bibi ni Matavuvale

Na nomu vosa tiko ena bibi ni matavuvale ena vukei iko mo kunei ira na tamata me ra vakavulici, se ra lotu Vakarisito se sega. E rawa ni o vakamacalataka vakatotolo na veika era kila e vuqa na tamata me baleta na matavuvale ki na ituvatuva ni veivakabulai i Tamada Vakalomalagi. O na rairai kaya beka e dua na ka vakaoqo:

E rawa ni dua vei ira na ka veivakayarayarataki bibi duadua ena noda bula na noda matavuvale. Na noda matavuvale e semati keda vakai keda ka rawa ni vukei keda meda vakila ni da gadrevi ka lomani.

Sa ka bibi duadua vei ira e vuqa na tamata na matavuvale e kaukauwa ka mamarau. Na kaukauwa ni tiko vakawati kei na susugi gone ena vuravura nikua e rawa ni veibolei vakalevu sara.

Sa na qai rawa ni o veisau ki na itukutuku ni Veivakalesuimai:

O a sa tiki tu ni matavuvale ni Kalou mai na gauna o se bera ni sucu kina. Sai Koya na Tamada. E vinakata na Tamada Vakalomalagi meda lesu tale ka laki bula vata kei Koya. O iko na Luvena, ka lomani iko o Koya. E tiko na Nona ituvatuva me vukei iko mo lesu tale Vua.

Na dina oqo kei na so tale era sa vakalesuimai ki vuravura mai vua na Tamada Vakalomalagi dauloloma mai vua e dua na parofita bula. Na dina oqo ena vukei keda meda kila vakavinaka na noda itutu ena matavuvale ni Kalou. E rawa beka ni keirau vakavulici iko vakalevu cake me baleta na dina oqo? O na lako beka mai ki lotu mo rawa ni vulica e levu tale na ka?

Vuli Vata Vakaitokani

Vakarautaka e dua na itukutuku dua-na-miniti ka yavutaki ena dua na lesoni ena wase 3. Vakatovotovotaka na kena wasei vakai kemudrau. Vakasamataka na sala eso o na rawa ni wasea kina na itukutuku oqo ena dua na ituvaki ni kunekunei. Tuvanaka mo wasea ena dua na ituvaki veiganiti mo sureti ira kina eso tale me ra vulica e levu tale na ka me baleti Jisu Karisito.

Sega ni Maumau na Sasaga

Ni ra digitaka na tamata me ra kua ni vulica vakalevu cake na kosipeli vakalesuimai, e sega ni maumau kina na nomu sasaga. De dua o sa tea rawa e dua na sorenikau ena qai tubu ena dua tale na gauna. Ke yaco se sega, na nomu veiqaravi kei na ivakaraitaki ni loloma dina ena vakalougatataki iko kei ira talega.

Kevaka era sega ni vakarau tu na tamata me ra ciqoma na kosipeli, raica na cava tale o rawa ni cakava mo vakavinakataka kina na nodra bula. Na veimaliwai o taracake e se vakaibalebale ka yaga tikoga. Tomana tikoga na nomu veitokani vinaka.

So na gauna era na gadreva na tamata na gauna me ra vakasamataka kina na veisau e kerei vei ira. Vukei ira me ra ciqoma na itukutuku eso ena imeli se mataveilawa ni Lotu. Na itukutuku oqo ena rawa ni vukea na nodra vakarautaki na tamata me ra ciqoma na veisureti mai muri me ra vulica e levu tale na ka.

Ni sega ni ciqoma na kosipeli e dua na tamata, sa matau meda yalolailai. Ia, ni ko gole vua na Turaga ena gauna vakaoqori, sa yalataka o Koya, “Ka’u na vakaukauwataki iko; io, ka’u na vukei iko; io, ka’u na tokoni iko” (Aisea 41:10).

Ena nomu vakabauti Karisito, o na kunea kina na vakacegu kei na veivakadeitaki me baleta na nomu sasaga eso. Taura dei tiko e dua na raivotu me baleta o cei o iko kei na vuna o qarava tiko kina na Turaga vaka dua na daukaulotu. Na vakabauta ena vukei iko mo toso ki liu ka tomana tikoga na gagadre dodonu.

Vakatutu ni Vuli kei na kena Vakayagataki

Vuli Yadudua

Wilika na Joni 15:12, Joni 21:15–17, 1 Cesalonaika 2, kei na Mosaia 18:8–10. O sa vakayacora tiko beka vakacava na nomu itavi mo lomani ira ka qaravi ira na tani? O na vakavinakataka beka vakacava? Vola na nomu isaunitaro ena nomu ivolaniveisiga ni vuli.
Wilika na 3 Nifai 18:31–32, Alama 24:7–8, kei na Alama 32:41. Na cava e vakavulica na veitikina oqo me baleta na cakacaka vata kei ira na tamata era a vakavulici e liu? Vola na veika o vulica ena nomu ivolaniveisiga ni vuli. Vakavulica vua na nomu itokani.

Vuli Vakaitokani kei na Veisau ni iTokani

Tuvanaka mo sotavi ira na lewenilotu vou ena nomu iwasewase. Ke gadrevi, vakayagataka na app ni Vunautaka na Noqu Kosipeli mo kilai ira kina. Taroga na veitaro vakaoqo:
- O a vakarautaki beka vakacava ki na kosipeli?
- Na gauna kei na sala cava o a veitaratara kina kei na Lotu ena imatai ni gauna?
- Na cava a uqeti iko mo sota kei ira na daukaulotu?
- Keirau na tokona beka vakacava na nomu toso tikoga?
Mai na veisotari eso oqo, na cava o a vulica me baleta na nodra kunei na tamata era toso ki liu ki na papitaiso? Tuvanaka mo vakayagataka na veika o vulica ena macawa oqo.
Railesuva na ulutaga yadua oqo. Ni o vakayagataka tiko na lesoni ena wase 3, vakarautaka e dua na iwalewale rawarawa ni kunekunei. Vakatovotovotaka na veivakavulici ena dua na ituvaki ni kunekunei.
- Vakila ni gagadre levu cake me baleta na veidusimaki kei na inaki ni bula
- Vinakata mo vakila ni o sa voleka cake vua na Kalou
- Gadreva na veivuke ena vakatulewa bibi eso

Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu

Wilika ka veivosakitaka na iwasewase ni “Vakarabailevutaka na Nomu Rai me baleta na Tuvatuva mo Kunea”. Me ra vakacavara na veitokani yadua na vakadidike.
- Veivosakitaka na sala sa vukei ira kina na daukaulotu na vakasama eso oqo me ra kunei ira na tamata me ra vakavulici.
- Vola eso tale na vakasama me baleta na nodra kunei o ira me ra vakavulici. Sureti ira na daukaulotu me ra vakaraitaka na nodra vakasama.
- Sureti ira na daukaulotu me ra tuvanaka na nodra takete yadua me vakatorocaketaki kina na nodra sasaga ni kunekunei.
Cakava e dua na lisi ni vica na madigi ni kunekunei.
- Lesia ki na daukaulotu yadua e dua na madigi. Solia ki na daukaulotu yadua e lima na miniti me vakarautaka na sala me vakavulica kina e dua na tiki ni lesoni ena ituvaki sa lesi oqori.
- Vakabibitaka na kena gadrevi me yalani na balavu ni itukutuku me veiganiti kei na kena ituvaki.
- Sureta e vica na daukaulotu me ra vakavulica na lesoni era a tuvanaka ena ituvaki sa lesi vei ira.
Sureti ira na daukaulotu me ra vakatovotovotaka na nodra wasea vakai ira e dua na itukutuku me dua-na-miniti ni kosipeli. O na vinakata beka mo vakarautaka eso na veimataqali ituvaki duidui ni kunekunei, me vaka na veivakavulici ena nona vale e dua na lewenilotu, veivakavulici ena dua na matanikatuba, veivakavulici ena dua na gaunisala, se veitaratara kei na dua a vagolei mai. Me ra vakatovotovotaka na daukaulotu na veivakavulici ena vei ituvaki yadua oqo.

iLiuliu ni Kaulotu kei na Daunivakasala ni Kaulotu

Mo ivakaraitaki ni cakacaka ni kaulotu-ni-lewenilotu ena nomu matavuvale. Wasea na veika o sa sotava vei ira na daukaulotu kei ira na lewenilotu.
Veitalanoa kei ira na iliuliu ni matabete kei na mataisoqosoqo vakaitaukei me baleta na sala vinaka duadua me ra kunei ira kina na tamata me ra vakavulici na daukaulotu ena nomu kaulotu.
Tuvanaka na lotu ni kaulotu mo rawa ni vosa kina vei ira na tamata era vakavulici tiko ena nomu kaulotu. Veitaratara kei ira na iliuliu ni matabete vakaitaukei me rawa ni ra kauti ira mai na nodra itokani na lewenilotu. Sureti ira na lewenilotu vou me ra wasea na nodra ivakadinadina ka tukunikataka na nodra italanoa ni saumaki mai ni bera ni o vosa.
Dau lako vagauna vata kei ira na daukaulotu me vukei ira me ra kunei ira na tamata me ra vakavulici.