“Mataupu 10: Aoao Atu e Fausia le Faatuatua ia Iesu Keriso,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 10,” Tala’i La’u Talalelei

Mataupu 10

Aoao Atu e Fausia le Faatuatua ia Iesu Keriso

Manatunatu i le Mea Lenei

E mafai faapefea ona ou aoao atu e ala i le Agaga?
E faapefea ona ou aoao atu mai tusitusiga paia?
E faapefea ona ou faasoa atu la’u molimau pe a aoao atu?
E mafai faapefea ona ou fuafuaina ma fetuunai a’u aoaoga e taulima ai manaoga o tagata?
E mafai faapefea ona ou faia ni fesili e sili atu ona lelei ma avea ma se tagata faalogo e sili atu?
E mafai faapefea ona ou fesoasoani i tagata ia maua tali i a latou fesili ma maua le taitaiga ma le malosi?

Ua valaauina oe e talai atu le talalelei toefuataiina i le toatele o tagata o le a taliaina oe. O le aoao atu o le totonugalemu lea o mea uma e te faia. A o e faalagolago i le Alii mo se fesoasoani, ua Ia folafola mai:

“Ma ai se tasi na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).

Tatalo, suesue, ma faataitai ina ia faaleleia ai lou tomai faafaiaoga. Faaaoga mataupu faavae o i lenei mataupu ma i isi mataupu o lenei tusi. Saili ma le naunautai le meaalofa o le aoao atu ina ia mafai ona e faamanuiaina isi ma vivii atu i le Atua. O le a fesoasoani le Alii ia te oe e aoao atu ma le mana ma le pule a o e saili atu ma le filiga ia te Ia ma aoao i Lana afioga.

Saili e aoao atu e pei ona aoao atu le Faaola.

I le taimi o Lana galuega i le lalolagi, sa “femaliuai ai Iesu … aoao atu … , talai atu … , ma le faamalologa” (Mataio 4:23). Sa ia aoao atu i le tele o nofoaga—i sunako, i fale, ma luga o le auala. Sa ia aoao atu i faatasiga tetele ma i talanoaga faalilolilo. O nisi o Ana fegalegaleaiga sili ona mamana sa matua pupuu lava pe i ni faatulagaga e le masani ai. Sa Ia aoao atu e ala i Ana faatinoga faapea foi Ana afioga.

Na aoao e le Faaola tagata taitoatasi e tusa ai ma ona manaoga tulaga ese. Mo se faataitaiga, ina ua auauna atu i se tagata pipili, sa Ia faamagaloina ana agasala ma faamalolo ia te ia (tagai Mareko 2:1–12). Ina ua auauna atu i se fafine sa mulilua, sa Ia puipuia o ia ma valaaulia o ia e aua nei toe agasala (tagai Ioane 8:2–11). Ina ua talanoa ma se tagata mauoa sa manao i le ola e faavavau, sa Ia “alofa ia te ia” e ui i le musu o le taulealea e talia Lana valaaulia e mulimuli ia te Ia (Mareko10:21; tagai fuaiupu 17–21).

E mafai ona e faaleleia atili lau aoao atu e ala i le aoaoina o le ala na aoao ai le Faaola. Mo se faataitaiga, sa alofa o Ia i le Tama ma i latou sa Ia aoaoina. Sa tatalo soo o Ia. Sa Ia aoao atu mai tusitusiga paia. Sa ia saunia faaleagaga. Sa ia faia ni fesili musuia. Sa Ia valaaulia tagata e galulue i le faatuatua. Sa ia faatatauina mataupu faavae o le talalelei i le olaga i aso uma.

O le saili e aoao atu e pei ona aoao mai le Faaola o se sailiga i le olaga atoa. O le a oo mai ia te oe i lea fuaitau i luga o lea fuaitau a o e mulimuli ia te Ia (tagai i le 2 Nifae 28:30; Eteru 12:41).

“Saili ia Maua La’u Upu”

Ina ia aoao atu le talalelei a Iesu Keriso, e tatau ona e iloa ona aoaoga faavae ma mataupu faavae autu. E te manaomia foi le malamalama faaleagaga ma le faamautinoaga o upumoni o le talalelei. Sa fetalai atu le Alii, “Aua le saili e talai atu la’u upu, a e muai saili ia maua la’u upu.”

Ina ia “maua” le afioga a le Alii o lona uiga ia suesue i ai ma ia goto ifo i le taele o lou loto. Ao e faia lea taumafaiga, ua Ia folafola mai, “Ona matala ai lea o lou laulaufaiva; ona oo lea, afai e te manao i ai, o le a e maua lo’u Agaga ma la’u upu, ioe, le mana o le Atua i le faatalitonuina o tagata” (Mataupu Faavae ma Feagaiga 11:21).

Na fetalai mai foi le Alii e “teu i o outou mafaufau e le aunoa afioga o le ola” (Mataupu Faavae ma Feagaiga 84:85). O le teuina o afioga a le Alii o le a faateleina ai lou malamalama ma faamalosia ai lau molimau. O lou manao ma le tomai e aoao atu ai le talalelei o le a faapena foi ona faateleina. (Tagai Iakopo 4:6–7; Alema 32:27–42; 36:26; 37:8–9.)

Ia maua ma teufatu ma le agaga tatalo le afioga a le Alii e ala i le suesue i tusitusiga paia, upu a perofeta soifua, ma lesona i le mataupu e 3.

Aoao Atu e ala i le Agaga

O le talalelei a Iesu Keriso o “le mana lea o le Atua e ola ai i latou uma o e faatuatua” (Roma 1:16). Mo lena mafuaaga, e manaomia ai ona aoao atu le savali o le Toefuataiga o le talalelei e ala i le mana paia—o le mana o le Agaga Paia.

E taua lou atiina ae o tomai faafaiaoga. E taua foi lou aoaoina o aoaoga faavae ma mataupu faavae e te aoao atu. Peitai, pe a aoao atu upumoni faaleagaga, e te le faalagolago muamua i ou lava tomai ma le malamalama.

O upumoni faaleagaga e aoaoina atu e ala i le mana o le Agaga Paia. Na fetalai mai le Alii, “Ma o le a tuu atu ia te outou le Agaga e ala i le tatalo o le faatuatua; ma afai tou te lē maua le Agaga aua tou te aoao atu” (Mataupu Faavae ma Feagaiga 42:14; tagai foi Mataupu Faavae ma Feagaiga 50:13–14, 17–22).

O Le Uiga o le Aoao Atu e ala i le Agaga

Pe a e aoao atu e ala i le Agaga, e te tatalo ia maua le mana o le Agaga Paia i lau aoaoga. E te tatalo foi ina ia maua e tagata upumoni e ala i le Agaga. E mafai ona faatauanauina tagata i nisi o upumoni, ae ina ia liua, e manaomia ona latou maua ni aafiaga ma le Agaga (tagai i le Mataupu Faavae ma Feagaiga 8:2–3).

Saunia oe lava e avea ma se meafaigaluega e mafai ai e le Agaga ona aoao atu. Mafaufau i le Agaga Paia e fai ma au soa i le aoao atu.

Faalagolago i le Agaga e fesoasoani ia e iloa mea e te fai atu. O le a Ia aumaia le aoaoga faavae ua e suesueina e manatua ai. O le a Ia fesoasoani ia te oe e fuafua ma fetuunai mea e te aoao atu e tusa ai ma manaoga o se tagata.

Pe a e aoao atu e ala i le Agaga, o le a Ia molioo atu lau savali i loto o tagata. O le a Ia faamautuina lau savali pe a tuuina atu lau molimau. O oe ma i latou o e mauaina mea e te aoao atu e ala i le Agaga o le a faagaeetia, malamalama le tasi i le isi, ma olioli faatasi. Tagai i le 2 Nifae 33:1; Mataupu Faavae ma Feagaiga 50:13--22.)

“O le Agaga o le elemene aupito taua e tasi i lenei galuega. Faatasi ai ma le faalauteleina e le Agaga o lou valaauga, e mafai ona e faia vavega mo le Alii i totonu o le misiona. A aunoa ma le Agaga, e le mafai lava ona e manuia tusa lava po o a au taleni ma [mea e te] mafaia ona fai” (Ezra Taft Benson, seminar for new Mission Presidents, 25 Iuni 1986).

O Le Folafolaga o Lou Valaauga

Ua valaauina ma vaetofia oe, “Ina ia talai atu lau talalelei i le Agaga, o le Fesoasoani lava lea na auina atu e aoao atu le upu moni” (Matautpu Faavae ma Feagaiga 50:14). E i ai taimi atonu e te lagona ai le popole po o le le atoatoa. Atonu e te popole e le lava lou iloa po o le le lava o lou poto masani.

Ae o lou Tama Faalelagi, e Na te silafia lelei oe, na valaauina oe e aoao atu ona o mea e mafai ona e ofoina atu i le avea ai o se tagata mulimuli tuuto a Iesu Keriso. O le a Ia le tuulafoai lava oe. Talitonu o le a faalauteleina e le Agaga ou tomai ma o le a aoao atu le upumoni ia i latou o e taliaina.

Na saunoa Elder Neil L. Andersen: “A o ou mafaufau i le luitau o se misiona, na ou lagona lava lou matuai le agavaa ma le le saunia. Ou te manatua na ou tatalo, “Le Tama Faalelagi e, e mafai faapefea ona ou faia se misiona ae e matua itiiti se mea ua ou iloa?’ Na ou talitonu i le Ekalesia, ae na ou lagonaina na matuai le lava lou malamalama faaleagaga. A o ou tatalo, na oo mai se lagona: ‘E te le iloa mea uma, ae ua lava mea ua e iloa!’ O lena faamautinoaga na ou maua ai le lototele e fai ai le isi laasaga i le galuega faamisiona” (“Ua Lava Mea Ua E Iloa,” Liahona, Nov. 2008, 13).

Valaaulia le Agaga a o Amata Ona E Aoao Atu

E matua taua tele nai taimi muamua faatasi ma tagata. Ia faaaloalo ma migao. Faaali atu le naunau ma le alofa faamaoni. Saili ia maua lo latou faatuatuaga. O se tasi o auala e maua ai le faatuatuaina o le taimi e lagona ai e tagata le Agaga e faatasi ma oe.

Fai ni nai fesili faigofie e fesoasoani e te malamalama ai i o latou olaga ma o latou faamoemoega e uiga i a outou talanoaga. Faalogo ma le toto’a.

Ae e te le i amata, ia talosagaina i latou uma o i ai ina ia outou auai faatasi i le lesona. Fautuaina i latou e aveese mea faalavefau ina ia mafai ona lagonaina le Agaga o le Alii.

Ia faamalamalama atu i ai, e te manao e amata ma faaiu ia lesona taitasi i se tatalo. Ofo atu e tuuina atu le tatalo amata. Tatalo faigofie ma le faamaoni ina ia faamanuia e le Atua tagata o loo e aoaoina i vaega uma o o latou olaga. Tatalo ina ia mafai ona latou lagonaina le moni o mea o le a e aoao atu. Manatua o le “tatalo faatauanau a se [tagata] amiotonu e tele lona aoga” (Iakopo 5:16).

Ia faatuatua i le mana liua o le Agaga Paia. Pe a taialaina ai e le Agaga, e mafai ona e faailoa atu manatu e pei ona ta’ua i lalo ao e amata ona aoao atu:

O le Atua o lo tatou Tama Faalelagi agaalofa O i tatou uma o uso ma tuafafine. E finagalo o Ia ia tatou oo i le olioli.
E tofu i tatou uma ma malosiaga ma vaivaiga. Po o le a lava le mea o loo e feagai ai, o Iesu Keriso ma Ana aoaoga e mafai ona fesoasoani ia te oe. E mafai ona Ia fesoasoani ia te oe ia maua le filemu, faamoemoe, faamalologa, ma le fiafia. E mafai ona fesoasoani Iesu ia te oe ia maua le malosi sili atu mo luitau o le olaga.
Tatou te faia uma lava ni mea sese, lea e mafai ona faatupuina ai lagona o le tausalaina, maasiasi, ma le faanoanoa. O nei lagona o le a faatoa o ese atu pe a tatou salamo ma sailia le faamagaloga a le Atua. Ua na o le Togiola a Iesu Keriso e mafai ai ona faamaloloina atoatoa i tatou mai a tatou agasala.
O le a avea i ma’ua ma taiala ina ia mafai ona outou iloa mo outou lava le moni o le ma savali. O le a ma valaaulia outou e faia nisi o mea, e pei o le faitau, tatalo, ma le auai i le lotu. O la matou matafaioi o le fesoasoani lea ia te oe e faatino nei valaaulia ma faamalamalama atu faamanuiaga e mafai ona e maua. Faamolemole fai ni fesili.
Ua valaauina i ma’ua e se perofeta a le Atua, e fetufaai atu mea ua ma iloa. Ma te iloa e moni le ma savali.
O le a ma aoaoina outou i le ala e osia ai feagaiga, po o folafolaga faapitoa, ma le Atua. O nei feagaiga o le a faafesootaia ai oe i le Atua ma mafai ai ona e maua le olioli, malosi, ma folafolaga faapitoa mai ia te Ia.
O le a e aoao i le auala e faia ai suiga i lou olaga ma mulimuli ia Iesu Keriso ma Ana aoaoga. O se tasi o aoaoga taua a Iesu Keriso, ma le feagaiga muamua tatou te osia, o le mulimuli lea i Lana faataitaiga ma ia papatisoina i le pule tatau (tagai Ioane 3:5; Mataupu Faavae ma Feagaiga 22).

A o lei aoaoina atu se lesona, tuu atu se vaaiga aoao faigofie o mea o le a oulua aoaoina atu. Fesoasoani i tagata ia latou iloa o le a patino ona taua ia i latou lava. Mo se faataitaiga, e mafai ona e faapea atu, “Ua matou i ai iinei e faasoa atu le savali faapea ua faatuina e Iesu Keriso Lana Ekalesia i le lalolagi i aso nei ma ua valaauina perofeta soifua e taialaina i tatou.” Pe e mafai foi ona e faapea atu, “Ua ma i ai iinei e fesoasoani ia te oe ia iloa e alofa le Atua ia te oe ma o loo i ai Sana fuafuaga mo lou fiafia.”

O le a manuia tagata uma pe a latou taliaina ma ola i le talalelei a Iesu Keriso. Atonu na faamanuiaina e le Tama Faalelagi tagata e te maua i sauniuniga taua faaleagaga (tagai Alema 16:16–17).

O le valaauliaina o le Agaga ma le faasoaina atu o le upumoni i le feiloaiga muamua o le a fesoasoani i tagata ia iloa o oulua o ni auauna a le Alii.

Suesuega a le Tagata Lava Ia pe Faalesoa

Faaaoga fautuaga i lenei vaega e faataitai ai ni auala eseese e amata ai se lesona.

Faaaoga ia Tusitusiga Paia

O tusi faavae a le Ekalesia o au punaoa autu ia mo le aoaoina atu o le talalelei toefuataiina a Iesu Keriso. E tele mafuaaga e taua ai ona e faaaogaina tusitusiga paia o ni tusi autu mo lau aoaoga. Mo se faataitaiga:

E valaaulia e tusitusiga paia le Agaga Paia i lau aoaoga (tagai Luka 24:13–32).
Ua i ai i tusitusiga paia se aafiaga sili atu ona mamana i mafaufau o tagata nai lo se isi lava mea (tagai Alema 31:5).
E taliina e tusitusiga paia ia fesili e tele o le loto (tagai mataupu 5; tagai foi 2 Nifae 32:3; Iakopo 2:8).
Ua tuuina mai e tusitusiga paia le pule ma le aoga i au aoaoga.
Ua poloaiina mai le Alii ma Ana perofeta ina ia faia o lea (tagai Mataupu Faavae ma Feagaiga 42:12, 56–58; 71:1).

O le faaaogaina lelei o mau i au aoaoga, e mafai ai ona e fesoasoani i isi e amata ona suesueina e i latou lava ia tusitusiga paia. A o manino lou fiafia i tusitusiga paia, o le a uunaia i latou e suesue. Faaali atu pe faapefea e le suesueina o tusitusiga paia ona fesoasoani ia i latou e aoao le talalelei ma lagonaina le alofa o le Atua. Tuu atu ni faataitaiga o le auala e mafai ai e tusitusiga paia ona fesoasoani ia i latou e saili tali i a latou fesili ma maua ai le taitaiga ma le malosi.

Tuuto atu oe lava i le suesueina o tusitusiga paia ina ia mafai ona e aoao atu mai ai ma le mataalia (tagai i le mataupu e 2). O lou tomai e aoao atu mai tusitusiga paia o le a faaleleia a o e suesue i ai i aso uma, e le tagata lava ia ma faatasi ma lau soa.

Fesoasoani i tagata e atiina ae le faatuatua ia Iesu Keriso e ala i le suesueina o tusitusiga paia, aemaise lava le Tusi a Mamona. E mafai ona fesoasoani fautuaga nei.

Folasia atu le Mau.

Faamatala puupuu atu le talaaga o le fuaitau. O faataitaiga nei o loo faaalia ai nisi o auala e faailoa atu ai se mau:

“I le talafaasolopito a Iosefa Samita, ua ta’u mai ai e Iosefa ia i tatou i ana lava upu le mea na tupu a o alu atu o ia i le togavao e tatalo. Sa ia faapea mai, ‘Sa ou vaai ai i se malamalama faaniutu …’”
“O le fuaitau lenei o loo aoao atu ai le perofeta o Alema i tagata o e sa vaivai i le faaaogaina o o latou faatuatua i le afioga a le Atua. Sa ia faatusatusaina le afioga a le Atua i se fatu e mafai ona totoina i o tatou loto. E mafai ona e faitau e amata mai i le fuaiupu e … ?

Faitau le Mau

Faitau leotele ia fuaiupu pe fai atu i le tagata o loo e aoaoina e faitau leotele. Ia nofouta mo i latou e lē lelei le faitau. Afai e faigata ona latou malamalama i se fuaitau, faitau faatasi ma i latou ma faamalamalama pe a manaomia. Faamatala ni upu po o fuaitau faigata Pe tuu atu foi ia i latou se fuaitau faigofie e faitauina. Ia valaaulia i latou e vaavaai mo ni manatu faapitoa o le fuaitau.

Faaaoga ia Tusitusiga Paia

Na faapea mai Nifae “sa ou faatatauina tusitusiga paia uma ia te i matou, ina ia avea ma o matou manuia ma aoaoga” (1 Nifae 19:23). O le “faatatau” o lona uiga ia faaaoga tusitusiga paia i lou olaga.

Faatatau tusitusiga paia ia i latou e te aoaoina e ala i le faaali atu pe faapefea ona talafeagai ia tala ma mataupu faavae ia i latou lava ia. Mo se faataitaiga:

“E pei o oe, sa i ai i le nuu o Alema ni avega mamafa, toetoe lava a sili atu nai lo le mea e mafai ona latou tauaveina. Ae a o latou faatinoina le faatuatua ma tatalo, sa faamalosia i latou e le Atua ina ia mafai ona latou onosaia luitau. Ona Ia laveaiina lea o i latou mai o latou tofotofoga. E pei lava ona Ia faia i nei tagata, ou te iloa o le a fesoasoani foi le Atua ia te oe i ou tofotofoga a o e …” Mosaea 24.)
“O faatonuga a Alema i tagata i le vai o Mamona, e aoga foi ia i tatou i le taimi nei. Ioane, e te naunau e … ?” (Tagai Mosaea 18.)

Aoao tagata i le auala e “faatatau” ai e i latou lava ia tusitusiga paia. O le iloaina o faaaogaaga patino o le a fesoasoani ia i latou e faaaoga ma iloa ai le mana o le afioga a le Atua.

Valaaulia ma Fesoasoani i Tagata e Faitau e i Latou Lava

O tagata o loo e aoaoina e manaomia ona faitau i tusitusiga paia, aemaise lava le Tusi a Mamona, ina ia maua se molimau o le upumoni. O le faaaogaina lelei o mau i au aoaoga, e mafai ai ona e fesoasoani i tagata e amata ona suesueina e i latou lava ia tusitusiga paia.

A mavae asiasiga taitasi, ia ta’u atu i ai ni mataupu faapitoa po o ni fuaiupu latou te faitauina. Fautua atu ni fesili mo i latou e mafaufau i ai a o latou faitau. Uunaia i latou e suesue tusitusiga paia na o i latou ma faatasi ma o latou aiga. E mafai foi ona e fai atu i tagata o le ekalesia e faitau faatasi ma i latou i le va o lesona.

A o lei amataina le lesona e sosoo ai, tulitatao e ala i le talanoaina o mea na e valaauliaina tagata e faitau. Pe a manaomia, fesoasoani ia latou malamalama ma “faatatau” nei mau. Fautuaina i latou e tusifaamaumau o latou manatu ma fesili.

Pe a e fesoasoani i tagata e faitau, malamalama, ma faaaoga tusitusiga paia—aemaise lava le Tusi a Mamona—o le a latou maua ni aafiaga faaleagaga i le afioga a le Atua. O le a sili atu ona latou faitau na o i latou lava ma avea tusitusiga paia o se vaega taua o o latou olaga.

Fesoasoani i Tagata ia Maua Tusitusiga Paia

O tusitusiga paia ma upu a perofeta soifua o loo maua i le tele o auala ma isi gagana nai lo se isi lava taimi muamua. Aoao po o a filifiliga lolomi ma faatekinolosi o loo avanoa mo tagata o loo e aoaoina. Fesoasoani i tagata ia maua tusitusiga paia i auala e fetaui ma o latou manaoga ma mea e fiafia i ai. Mafaufau i tulaga nei:

Fesili atu i tagata po o le fea gagana latou te mananao e faitau pe faalogologo ai i tusitusiga paia.
O i latou o e tauivi e faitau, pe o loo tauivi ia malamalama i mea na latou faitauina, e mafai ona faamanuiaina mai le faitauina leotele faatasi po o le faalogologo i le pueina o leo. O loo maua nei mea e ala i polokalama ma uepisaite mauafua a le Ekalesia.
Afai e i ai se masini tekinolosi a se tagata, fesoasoani ia te ia ia maua tusitusiga paia, aemaise lava le Tusi a Mamona. O le polokalama o le Tusi a Mamona ma le Potutusi o le Talalelei e maua fua ma faigofie ona faasoa atu.
Afai e faaaoga tesi, talanoaga, po o imeli, auina atu sootaga po o ata o tusitusiga paia. Pe a aoao atu i talanoaga faavitio, mafaufau e faasoa atu lau lau ina ia mafai ona outou faitau faatasi i fuaiupu.
Fesoasoani i tagata ia maua upu a perofeta soifua.

Suesuega a le Tagata Lava Ia pe Faalesoa

Ia mautinoa o loo ia te oe ma lau soa ia punaoa o mau ua faafouina i lau telefoni, e aofia ai le polokalama o le Tusi a Mamona ma le Gospel Library.

Filifili se tasi o nei mau: Itulau Autu o le Tusi a Mamona; 3 Nifae 11; Moronae 10:3–8; Ioane 17:3; Roman 8:16–17; 1 Korinito15:29; Iakopo 1:5; 1 Peteru 3:19–20; Amo sa 3:7.

Ia mafaufau pe faapefea ona e:

Folasia atu le fuaitau.
Tuuina atu ni faamatalaga e uiga i le mau ma ona faaupuga.
Faitau le mau ma faamalamalama lona uiga.
Faamalamalama ia upu faigata.
Fesoasoani ia i latou e te aoaoina e faaaoga i o latou olaga.

Suesuega o Tusitusiga Paia

Aisea e taua ai le aoao atu mai tusitusiga paia?

Faasoa Atu Lau Molimau

O le molimau o se mau faaleagaga lea e tuuina mai e le Agaga Paia. O le faasoa atu o lau molimau o le tuuina atu lea o se tautinoga faigofie, tuusao o le malamalama po o le talitonuga e uiga i se upumoni o le talalelei. O le faasoa atu o lau molimau ua faaopoopo atu ai se molimau a oe lava ia, i upumoni na e aoao atu mai tusitusiga paia.

O le faasoa atu o lau molimau o se auala mamana lea e valaaulia ai le Agaga ma fesoasoani ai i isi ia lagonaina Lana uunaiga. O se tasi o misiona a le Agaga Paia o le molimau atu lea i le Tama Faalelagi ma Iesu Keriso. E masani ona Ia faataunuuina lenei mea faatasi ma oe a o e tuuina atu lau molimau.

O se molimau mamana e le faalagolago i le faamemelo po o le leotele o lou leo—ae i le talitonuga maumaututu ma le faamaoni o lou loto. Ia faaeteete e aua le faanatinatia pe faatino lau molimau. Tuu atu i tagata se avanoa e lagona ai le molimau atu o le Agaga Paia ia i latou e moni mea sa e aoaoina atu.

O lau molimau e mafai ona faigofie e pei o le “o Iesu Keriso o lo tatou Faaola ma le Laveai” po o le “Ua ou iloa mo au lava e moni le Tusi a Mamona.” E mafai foi ona e faamatala faapuupuu atu se mea na tupu e uiga i le ala na e maua ai lenei molimau.

A e aoao atu, faasoa atu lau molimau a o e lagona le uunaiga, ae le na o le faaiuga. A o aoao atu lau soa, faasoa atu lau molimau e tuuina atu se molimau lona lua o mea sa ia aoaoina atu.

Faasoa atu lau molimau o le mataupu faavae o loo e aoaoina o le a faamanuiaina ai le olaga o le tagata pe afai o le a mulimuli i ai. Ia talanoa i le auala ua faamanuiaina ai lou olaga ona o le ola ai i se mataupu faavae. O lau molimau faamaoni o le a fesoasoani e fausia se siosiomaga mo tagata ia lagona ai le faamautuina mai e le Agaga Paia o le upumoni.

Suesuega Faaletagata Lava Ia

O fuaitau o loo i lalo o ni faataitaiga o le tuuina atu o se molimau. Mafaufau i fesili a o e faitauina mau taitasi. Tusifaamaumau au tali i totonu o lau api faamaumau mo suesuega.

I nei fuaiupu, o le a le mea o loo molimau mai ai Iesu ma Ana aposetolo ma perofeta?
E mafai faapefea ona e iloa ua faatalitonuina i latou i le moni o mea o loo latou fai mai ai?
Pe a e fai atu, “Ou te iloa e moni,” o le a le uiga o lau faamatalaga? O a nisi upu e mafai ona e faaaogaina e faailoa atu ai lou mautinoa?

Suesuega o Tusitusiga Paia

O a mea o aoao mai e mau nei e uiga i mataupu faavae ma folafolaga o le tuuina atu o molimau?

Fuafua ma Fetuuna’i La Oulua Aoaoga ina ia Fetaui ma Mea e Manaomia

E tulaga ese lava tagata taitoatasi tou te aoaoina. Saili ia malamalama i ona manaoga faaleagaga, manaoga, ma atugaluga. Fai fesili ma faalogo ma le toto‘a. E ui atonu e te le malamalama atoatoa i manaoga o le tagata, ia manatua e silafia e le Tama Faalelagi. O le a Ia taialaina oulua e ala i le Agaga Paia.

Tuu atu i le Agaga e Taitaia le Faasologa o Lesona

Tuu atu i le Agaga e taitaia le faatulagaga lea e te aoao atu ai lesona. Ua ia te oe le fetuunaiga e aoao atu ai lesona i le faasologa e sili ona lelei mo manaoga, fesili, ma tulaga o i latou e te aoaoina.

E i ai taimi e mafai ona e tuufaatasia ai mataupu faavae mai lesona eseese e taulima ai manaoga ma mea e fiafia i ai se tagata. Tagai i faataitaiga nei e tolu.

Sa maua oe e Yuki i le initoneti ma o loo fesili mai pe aisea e le ulaula ai pe inu ai ana uo i le Ekalesia. E mafai ona e aoaoina o ia e uiga i faamanuiaga o poloaiga e ala i le faaaogaina o vaega nei mai le mataupu 3:

E le lagona e Samuelu e pei o loo i ai o ia i soo se mea. E mafai ona e aoaoina o ia e uiga i lona faasinomaga ma lona tulaga i le aiga o le Atua e ala i le faaaogaina o vaega nei mai le mataupu 3:

Ua suesue Tatyana i le tele o tapuaiga ma e manao ia iloa po o le a le mea e ese ai le Ekalesia. E mafai ona e aoaoina o ia e uiga i le Toefuataiga o le talalelei a Iesu Keriso e ala i le faaaogaina o vaega nei mai le mataupu 3:

O loo silafia e le Tama Faalelagi Ana fanau, o lea la, ia saili i musumusuga e faia ai nei faaiuga a o e saunia e aoao atu. Tatalo mo le meaalofa o le iloatino a o e filifili po o le a le mea e aoao atu. Tusifaamaumau manatu ma lagona e oo mai ia te oe.

Tuu atu se Taimi mo Tagata e Faaaoga ai Mea Ua Latou Aoaoina

A e aoao atu, tuu atu se taimi mo tagata e faaaoga ai mea ua latou aoaoina (tagai i le 3 Nifae 17:2–3). Vaavaai mo ni auala talafeagai e lagolago ai i latou i le tausia o a latou tautinoga. Taulai atu i le fesoasoani ia i latou i faatinoga o le a fausia ai se faavae o le faatuatua, e pei o le tatalo, faitau, ma le auai i le lotu. O lenei mea o le a mafai ai e i latou ona tausia ni tautinoga faaopoopo.

A o e fuafua e aoao atu, ia faaeteete pe o le a le tele o faamatalaga fou e te fetufaai atu. O se faamoemoega autu o lau aoaoga o le fesoasoani lea i se tagata e fausia le faatuatua ia Iesu Keriso ina ia taitai atu ai i le salamo. O lou faamoemoega e le o le vaai po o le a le tele o faamatalaga e mafai ona e tuuina atu.

Ia aoao atu i se televave e talafeagai lelei mo le tagata. Fai fesili ma faalogo ma le toto’a ina ia e malamalama po o le a le lelei o lona aoaoina ma le faaaogaina o mea o loo e aoaoina atu.

O upumoni e te aoaoina atu, faatasi ai ma le mana o le Agaga Paia, e mafai ona uunaia ai tagata e faaaoga lo latou faitalia i auala e fausia ai lo latou faatuatua ia Keriso. A o latou faatinoina le faatuatua i le Alii e ala i le faaaogaina o mea ua latou aoaoina, o le a latou iloa e ala i le Agaga e moni le talalelei.

Faaaoga ni Avanoa Eseese o le Aoao Atu

O avanoa faafaiaoga e tele ituaiga, e pei o asiasiga i le tagata lava ia, talanoaga faavitio, valaau i telefoni, feau tusitusia, ma ala o faasalalauga faaagafesootai.

Faaaloalo i Taimi o Tagata

Ia faafaigofie ma puupuu lau aoao atu. O le a sili atu ona fia feiloai tagata ma oe pe a e faaaloalo i o latou taimi ma talosaga. Fesili atu pe fia se taimi o ia i latou mo le asiasiga. Amata ma faaiu soo se talanoaga i le taimi na malie i ai, pe aoao atu faaletagata pe i luga o le initoneti. Ia nofouta i nisi o nofoaga, o valaau i telefoni po o talanoaga i vitio e mafai ona taugata.

O le a e manaomia ni fonotaga se tele e aoao atu ai mataupu faavae i se lesona se tasi. E masani lava o se asiasiga faafaiaoga e le tatau ona sili atu ma le 30 minute, ma e mafai ona e aoaoina se tagata i le itiiti ifo ma le 5 minute. Fetuunai au aoaoga e tusa ai ma taimi o tagata.

Faaaoga Tatau Le Tekinolosi

E tele ou avanoa e aoao ai tagata e faaaoga ai tekinolosi. O nisi tagata e fiafia i le faafaigofieina po o le le faalauaiteleina o fegalegaleaiga e ala i auala faaeletonika. E oo lava i tagata e te asia e mafai ona manuia mai le lagolago faaopoopo e ala i tekinolosi. Talanoa i punaoa o loo maua e fesootai ai. Ona toe tulitatao lea ma tumau le fesootai. Faataga mea e fiafia i ai tagata taitoatasi e taiala ai au fegalegaleaiga.

O tekinolosi e pei o valaauga i vitio e mafai ona faapitoa le aoga mo le aoaoina o tagata o e pisi i taimi faatulagaina pe nonofo mamao ese. O nisi taimi e faigofie atu mo tagata o le ekalesia ona auai i se lesona e ala i tekinolosi.

Fesoasoani i Tagata Aoao Laiti

I le taimi o le galuega a le Faaola, na Ia tau atu i Ona soo, ‘Ina tuu mai ia o tama iti e o mai ia te au, aua le vavao ia te i latou: aua e faapei o i latou nei o e o i le malo o le Atua.’ (Mareko 10:14). A e aoaoina tamaiti, fetuunai lau auala ma le savali e taulima ai o latou manaoga. Fesoasoani ia i latou e aoao le talalelei e ala i le talanoaina o mea e masani ai i latou. Ia mautinoa ua latou malamalama i mea o loo e aoaoina atu.

Suesuega o Tusitusiga Paia

Faitau le Mataupu Faavae ma Feagaiga 84:85. O le a le uiga o le tuuina atu o “le vaega lena o le a fua atu i tagata taitoatasi”? E mafai faapefea ona e faaaogaina lenei mea i lau aoaoga?

O le a le mea ua folafola mai e le Alii i faifeautalai faamaoni e uiga i le iloaina o le mea e fai atu?

Ia Oulua Aoao Atu ma Lau Soa i le Lotogatasi

Na poloai mai le Alii, “Ia outou o atu i le mana o lou Agaga, ma talai atu la’u talalelei, taitoalua” (Mataupu Faavae ma Feagaiga 42:6). Ua Ia poloaiina foi oe ma lau soa ia “tasi” (Mataupu Faavae ma Feagaiga 38:27). O le a sili atu ona mamana ma manaia la oulua talaiga, pe afai lua te galulue faatasi ma lau soa i le lotogatasi. Fesuiai i le tuuina atu o ni vaega pupuu o lesona.

I le taimi o suesuega faalesoa, talanoa ma faataitai pe faapefea ona oulua aoao atu ina ia mafai ona oulua lotogatasi. Saunia pe faapefea ona outou galulue faatasi pe a aoaoina tagata i luga o le initoneti. Mulimuli i malupuipuiga mo le faaaogaina o tekinolosi, o loo otooto atu i le mataupu e 2.

A aoao atu lau soa, tatalo mo, faalogo, ma vaai atu ia te ia. Lagolago lau soa e ala i le ofoina atu o se molimau lona lua i upumoni na ia aoaoina (tagai Alema 12:1). Mulimuli i ou lagona pe a musuia ai oe e le Agaga e fai atu se faamatalaga.

Ia naunau ma le faamaoni i tagata o loo e aoaoina. Faalogo ia i latou. Faatumauina le fesootaiga o mata pe a latou tautatala pe o e tautala foi. Ia matauina ma le faaeteete a latou tali, ma faalogo mo uunaiga faaleagaga.

Valaaulia Tagata Lotu e Auai

Valaaulia tagata o le ekalesia e fesoasoani ia te oe oulua e aoao atu ma lagolago tagata o loo outou galulue faatasi. O lenei mea e ono tupu faaletagata pe faatekinolosi. I le taimi o le fonotaga faamaopoopo faalevaiaso, fefautuaai ma taitai o le uarota po o ai e mafai ona fesoasoani.

A auai tagata o le ekalesia i le aoaoina atu ma le faaaumeaina, e mafai ona latou faaopoopo ni malamalamaaga ma faia ni fesootaiga o ni uo. O le a latou lagonaina le olioli o le galuega faafaifeautalai.

Ia Valaaulia Tagata o le Ekalesia e Fesoasoani ia te Oulua e Aoao Atu

A o lei amataina lesona, fuafua ma tagata le auala e galulue faatasi ai. E mafai ona e faaaogaina se feau tusitusia po o se valaau puupuu i le telefoni e faamaonia ai mea o le a e aoaoina atu, o ai o le a tatalo, o ai o le a taitaia le talanoaga, ma isi faamatalaga.

O le matafaioi autu a tagata o le ekalesia i lesona o le tuuina atu lea o se molimau faamaoni, faasoa atu ni aafiaga patino pupuu, ma atiina ae se sootaga ma i latou o loo aoaoina. E mafai ona e tuu atu i tagata o le Ekalesia e faamatala pe na faapefea ona latou aoao, talia, ma ola i se mataupu faavae faapitoa o le lesona. Afai o i latou o ni tagata liliu mai, valaaulia i latou e faasoa mai pe na faapefea ona latou filifili e auai i le Ekalesia.

A faasino mai e tagata se tasi, fai atu ia i latou e auai i le aoaoga. E mafai ona sili atu le aafia o tagata o le ekalesia i nei tulaga. Fefautuaai ma i latou e uiga i le auala latou te mananao e auai ai.

Mafaufau pe faapefea ona talafeagai le faaaogaina o tekinolosi e aoao atu ai ma tagata o le ekalesia. O tekinolosi e mafai ai e tagata o le ekalesia ona auai faatasi ma oe e aunoa ma le taimi e tautino mai ai e manaomia e se asiasiga faaletagata lava ia.

I le fonotaga faamaopoopo faalevaiaso, fuafua ma taitai o le uarota ia auai se tagata o le ekalesia i le tele o lesona e mafai ai (tagai i le mataupu 13). Mafaufau e fai atu i tagata fou e fesoasoani ia te oe e aoao atu.

Suesuega a le Tagata Lava Ia pe Faalesoa

Mafaufau ua i ai sou taimi faatulagaina e aoaoina atu se lesona i se aiga i le fale o se tagata o le ekalesia. Mafaufau pe faapefea ona e faaaofia ia tagata nei o le Ekalesia e fesoasoani atu i lau aoaoga:

O se faifeautalai a le uarota faatoa foi mai le misiona
O se ositaulaga
O se tagata fou
O le peresitene o le korama a toeaina po o le Peresitene o le Aualofa

Valaaulia Tagata o le Ekalesia e Tuuina Atu le Lagolago

E mafai foi e tagata o le ekalesia ona tuuina atu le lagolago taua i tagata i le va o asiasiga faafaiaoga. E mafai ona latou tesi, faitau faatasi tusitusiga paia, valaaulia tagata i o latou fale po o gaoioiga, pe valaaulia i latou e nonofo faatasi i le lotu. E mafai ona latou taliina fesili ma faaali atu pe faapei o latou olaga o ni tagata o le Ekalesia. O o latou aafiaga i le olaga ma le vaaiga e mafai ona fesoasoani ia i latou e fesootai ai ma tagata i ni auala e matua ese lava mai le auala e fesootai ai faifeautalai.

Fefautuaai ma tagata o le ekalesia e uiga i auala e mafai ona outou galulue faatasi ai e lagolago tagata i fafo atu o asiasiga faafaiaoga.

Aoao Atu mo se Malamalamaaga

Aoao atu le talalelei a Iesu Keriso ina ia malamalama i ai tagata. Suesue i tusitusiga paia ma lesona ina ia mafai ona e aoao atu ma le manino mai ai. O le manino atili o lou aoao atu, o le lelei foi lena o le avanoa mo le Agaga Paia e molimau atu ai i le upumoni.

Fai fesili e fesoasoani ai i tagata e mafaufau e uiga i mea sa e aoaoina atu. Ona faalogologo lea e vaai pe latou te malamalama ma taliaina.

O se vaega o le aoao atu mo le malamalama o le faamalamalama atu lea o upu, fasifuaitau, ma manatu. E mafai ona faaleleia lou tomai e aoao atu ai le talalelei e ala i le:

Malamalama i upu e te faaaogaina.
Faamatalaina o upu atonu e le malamalama ai isi.
Fai atu i tagata ni fesili e pei o le “E mafai ona e faasoa mai ia i matou lou malamalamaaga i mea faatoa uma ona matou faamatalaina?” po o le “Pe o le a e naunau e aotele mai mea sa matou talanoaina?”

A o e aoao atu le aoaoga faavae i le mataupu 3, matau soo se upu, fasifuaitau, ma manatu atonu e le malamalama ai tagata. Faamatala nei mea e ala i le faaaogaina o punaoa i le Gospel Library, e pei o le Taiala i Tusitusiga Paia, le Bible Dictionary, ma le Gospel Topics.

Ia faafaigofie ma puupuu lau aoao atu. Ia taulai atu i le talalelei a Iesu Keriso, fausia le malamalama i aoaoga faavae ma mataupu faavae autu. Fesoasoani i tagata e saili le malamalama lea e sau mai le Agaga Paia. A o latou mauaina lenei malamalamaaga, o le a latou talitonu i le savali o le talalelei.

Suesuega o Tusitusiga Paia

Aisea e tatau ai ona tatou faamatala pe faamalamalama atu ma le faaeteete ia aoaoga faavae?

E faapefea ona tatou aoao? Aisea e taua ai le aoao atu malie o aoaoga faavae?

Aisea e taua ai le tuusao atu?

O le a se mea e mafai ona e aoao mai fuaiupu nei e uiga i le ala e fesootai mai ai le Atua i Ana fanau?

Fai ni Fesili

Sa fai e le Faaola fesili na sa valaaulia ai tagata ia loloto le mafaufau ma lagona e uiga i upumoni na Ia aoaoina. O Ana fesili na faaosofia ai manatu, o mafaufauga loloto, ma tautinoga.

E taua foi fesili lelei i lau aoaoga. O le a latou fesoasoani ia te oe ia malamalama i mea e fiafia i ai tagata, atugaluga, ma fesili. O fesili lelei e mafai ona valaaulia ai le Agaga ma fesoasoani ai i tagata e aoao.

Fai Fesili Musuia

Saili le taitaiga a le Agaga i le faia o fesili lelei. O fesili sa’o i taimi sa’o e mafai ona fesoasoani i tagata e aoao ai le talalelei ma lagona ai le Agaga.

O fesili musuia ma le faalogo faamaoni o le a fesoasoani i tagata ina ia sili atu le toafimalie e talanoa fiafia ai ma faasoa atu o latou lagona. E mafai ona fesoasoani lenei mea ia i latou e iloa ai se molimau tuputupu ae. O le a sili atu foi ona latou toafimalie e fesili atu ia te oe ni fesili pe a latou le malamalama i se mea pe i ai foi se popolega.

O le siata lenei o loo faaalia ai nisi o mataupu faavae o le faia o fesili musuia, faatasi ai ma nisi o faataitaiga.

Mataupu Faavae ma Faataitaiga o Fesili Musuia

O Mataupu Faavae	Faataitaiga
Fai fesili e fesoasoani ai i tagata ia lagona le Agaga.	E mafai ona e faasoa atu se aafiaga ina ua e lagonaina le faatosinaga a le Atua i lou olaga? Na faapefea ona e lagonaina le alofa o le Atua mo oe?
Fai fesili e faigofie ma faigofie ona malamalama i ai.	O le a se mea ua e aoaoina mai lenei mau e uiga ia Iesu Keriso?
Fai fesili e fesoasoani i tagata e mafaufau ai i mea o loo e aoaoina atu.	E faapefea ona tutusa lenei mea ma mea ua uma ona e talitonu i ai? E faapefea ona eseese?
Fai fesili e fesoasoani ia te oe e iloa ai po o le a le lelei o le malamalama o tagata i mea o loo e aoaoina atu.	E i ai ni au fesili e uiga i mea sa ma aoao atu ananei? E faapefea ona e aoteleina la tatou talanoaga i le asō?
Fai fesili e fesoasoani ai i tagata e faasoa mai mea o loo latou lagonaina.	Na faapefea ona fesoasoani Iesu Keriso ia te oe i lou olaga? O le a se mea na sili ona taua ia te oe mai mea sa tatou talanoa i ai i le asō?
Fai fesili e faaalia ai le alofa ma le popole.	E mafai faapefea ona ma fesoasoani ia te oe?
Fai fesili e fesoasoani ai i tagata e faaaoga mea ua latou aoaoina.	O le a se mea e mafai ona tatou aoaoina mai lenei mau? E mafai faapefea e lenei mau ona fesoasoani ia te oe i lou olaga? A o tatou talanoa, o le a se mea ua uunaia oe e fai mai mea ua e aoaoina?

Suesuega Faalesoa

Toe iloilo le fuafuaga o lau lesona mai se lesona talu ai na e aoaoina atu. Ia tusi se fesili se tasi mo mataupu faavae autu taitasi o loo otootoina i lau fuafuaga.

Toe iloilo au fesili e iloa ai pe o tutusa ma mataupu faavae i lenei vaega.

Ona sosoo ai lea, ma le taliina o fesili taitasi, e pei o oe le tagata sailiili.

Ia fetufaai atu au fesili i lau soa. Iloilo faatasi, faavasega ma faaleleia au fesili.

Suesuega a le Tagata Lava Ia pe Faalesoa

O tagata o loo e aoaoina e ono fetaiai ma aafiaga nei:

E i ai so latou aafiaga faaleagaga a o faitauina le Tusi a Mamona.
O tagata latou te faigaluega faatasi e masani ona ula i mea faaleagaga.
Tagata o aiga e malolosi i se isi lotu.
E talitonu uo o “Mamona” e le o ni Kerisiano.

Mafaufau i se fesili e mafai ona e fesili atu ai, ina ia iloa atili ai e uiga i tulaga nei. Ia faamaumau nei fesili i totonu o lau tusi talaaga o suesuega. Talanoa ma lau soa pe faapefea ona oulua faaleleia ia fesili na oulua tusia.

Aloese mai Fesili e Le Aoga pe ua Ova foi

Taumafai e aua le faia fesili e:

Ia i ai ni tali manino.
Atonu e faamaasiasia se tasi pe afai na te le iloa le tali.
E sili atu i le tasi se manatu o i ai.
E faatatau i aoaoga faavae e te le i aoaoina atu.
E le manino se faamoemoega.
E tele na’uā.
E taufaasee pe faatiga pe inoino ai tagata .

O loo i lalo ia ni faataitaiga o fesili e lē lelei:

O ai le uluai perofeta? (Atonu e le iloa e le tagata le tali.)
E faapefea ona fesoasoani le tausia o o tatou tino ia mama, ina ia tatou maua ai le Agaga ma faaalia ai o loo tatou naunau e mulimuli i le perofeta a le Atua? (E sili atu ma le tasi se manatu.)
Pe taua le iloa o poloaiga a le Atua? (O se fesili ioe-leai lenei, ma e manino lava le tali.)
O le a se mea tatou te faia i aso taitasi e mafai ona fesoasoani tatou te latalata atu ai i le Atua? (O se fesili faalēmanino lenei o loo manao i se tali patino: tatalo.)
O ai le perofeta na sosoo ma Noa? (Atonu e le iloa e le tagata le tali, ma e le taua le fesili mo lau savali.)
E te malamalama i la’u tala? (Atonu e lagona e le tagata e pei o loo e talanoa maualalo ia te ia.)

Suesuega a le Tagata Lava Ia pe Faalesoa

Ia mafaufau i manaoga o se tagata o loo e aoaoina. Ia talanoa pe o le a faapefea ona ia taliina au fesili. Fuafua ni fesili e fai atu e mulimuli ai i taiala o loo i lenei vaega. Ia talanoaina pe mafai faapefea e nei fesili ona valaaulia le Agaga ma fesoasoani i le tagata e aoao le talalelei.

Faalogo

A e faalogo faalelei i isi, ona e malamalama atili ai lea ia i latou. A latou iloa e te faatauaina o latou manatu ma lagona, o le a atili ai foi ona latou fia faalogo i au aoaoga, ma fetufaai mai mea na tutupu i le tagata lava ia, ma faia ni tautinoga.

A e faalogo, o le a mafai ona e maua se vaaiga i le ala e fetuuna’i ai lau aoaoga ia talafeagai ma o latou manaoga ma mea e fiafia i ai. O le a e maua se malamalama sili atu po o fea o upumoni o le talalelei o le a sili ona aoga ia i latou.

Ia faapitoa lou faalogo mo musumusuga a le Agaga. A faasoa mai e isi o latou lagona, e mafai e le Agaga Paia ona uunaia oe i mafaufauga po o manatu. E mafai foi e le Agaga ona fesoasoani ia te oe ia malamalama i mea o loo taumafai isi e faailoa atu.

Faalogo ma le Alofa Faamaoni

O le faalogo e manaomia ai se taumafaiga ma le alofa faamaoni. A o talanoa isi, ia mautinoa o loo e taulai atu i mea o loo latou fai mai ai. Aloese mai le naunau e fuafua mea o le a e fai atu ai.

Na aoao mai Elder Jeffrey R. Holland: “E sili atu le taua o le faalogo nai lo le tautala. O nei tagata e le faapea o ni mea e leai ni ola, ma ua na ona faafoliga i le numera o papatisoga. Ia fesili i na uo po o le a le mea e sili ona taua ia te i latou. O le a le mea latou te faapelepele i ai, ma o le a foi le mea latou te manatu e taua? Ona faalogo lea. Afai e sa’o le tulaga o i ai, e mafai ona e fesili atu po o a ni mea o loo latou atuatuvale ai, po o a mea o loo latou naunau i ai, ma mea o latou lagonaina o loo misi i o latou olaga. Ou te folafola atu ia te outou e i ai lava se mea latou te ta’uina mai o le a laualuga mai ai pea se upu moni o le talalelei e mafai ona e tuu atu ai se molimau, ma mafai ai ona tele nisi mea e te ofoina atu… . Afai tatou te faalogo ma le alofa, e le tatau ona tatou tau manatunatu pe o le a le tala e fai. O le a tuuina mai ia i tatou—e ala i le Agaga faapea ma a tatou uo” (“Molimau Ia te Au,” Liahona, Me 2001, 15).

Matau Savali e Le Faaleo maia

E fesootai foi tagata e ala i le gagana a o latou tino. Mataitu le ala latou te saofafai ai, o o latou foliga faaalia, ma mea latou te faia i o latou lima, o o latou leo, ma mea o loo latou vaavaai i ai. O le matau o nei savali lē leoa; e mafai ona fesoasoani ia te oe e malamal ama ai i lagona o tagata o loo e aoaoina.

Ia e mataala foi i gagana a lou lava tino. Auina atu se savali o le fiafia ma le naunautai e ala i lou faalogo ma le faamaoni.

Tuu Atu i Tagata se Taimi e Mafaufau ma Tali Atu Ai

E masani ona faia e le Faaola ni fesili e manaomia ai se taimi mo se tagata e tali mai ai. A e fai atu se fesili, taofi e tuu atu i le tagata se avanoa e mafaufau ma tali mai ai. Aua le popole pe a leai se isi e tautala. E masani ona manaomia e tagata se taimi e mafaufau ai ma tali atu i fesili pe faailoa atu o latou lagona.

E mafai ona e malolo pe a uma ona e tuuina atu se fesili, pe a mae’a ona faamatala atu se mea faaleagaga na tupu, pe afai o fai si faigata i tagata ona faamatala mai o latou lagona. Ia mautinoa e tuu atu ia i latou se taimi e faamaea ai o latou manatu ae e te lei tali atu. Aua le faalavelave a o latou talanoa.

Tali atu ma se Agaga Malamalama

A tali e se tagata se fesili, amata lau tali e ala i le faaalia o le alofa pe a talafeagai ai. O le tigaalofa e faaalia ai lou popole moni lava. Aloese mai le oso atu i faaiuga, vave ona ofoina atu ni vaifofo, po o le foliga mai ua i ai uma tali.

Faamautu atu ua E Malamalama i Mea e Fai Mai ai Tagata

Pe a saili ia malamalama po o le a le tala a se tagata, fesili atu ia mautinoa ua e malamalama. Mo se faataitaiga, e mafai ona e fesili, “O le mea la o loo e fai mai ai o le . E sa’o lena?” po o le “Afai e sa’o a’u, o loo e lagonaina le .” Afai e te le iloa pe ua e malamalama, ia fai i le tagata e faamanino mai.

Faatautaia Fegalegaleaiga Luitauina

E sili atu ona e fesoasoani i tagata pe a e aoaoina atu ia i latou le talalelei a Iesu Keriso. O nisi tagata atonu e mananao e fai le tele o le talanoaga. O nisi taimi e manaomia ai e tagata se tasi e faalogo ma le agaalofa i o latou tauiviga ma lagona. O isi tagata e mafai ona saili e pulea pe finau.

Aoao e pulea ma le faauta lelei ia tulaga faapea ma le alofa. Atonu e mafai ona e fetuunaia lau aoaoga e talanoaina ai se mea na faasoa mai e se tagata. Pe atonu foi e manaomia ona e fai atu ma le faaaloalo e te manao e talanoaina o latou popolega i se isi taimi. E mafai ona fesoasoani le Agaga ia te oe ia iloa le ala e tali atu ai i tulaga faigata.

Fesoasoani i Tagata ia Lagona le Toafimalie e Faasoa Atu Lagona Moni

Ina ia aua nei faalumaina, o nisi tagata o le a latou taliina ia fesili i le auala latou te manatu o loo e manao e tali atu ai nai lo le faasoaina atu o o latou lagona moni. Ia saili e atiina ae se sootaga e mafai ai ona latou faasoa mai o latou lagona moni ia te oe.

O le malamalama ma le fesootai ma tagata o le a mafai ai ona e fesoasoani ia i latou, faafetaiaia mea latou te fiafia i ai ma manaoga, ma faailoa atu le alofa o le Faaola ia i latou. Fatu se sootaga o le faatuatuaina e ala i le faamaoni ia i latou, faatumauina se sootaga talafeagai faafaifeautalai, ma faaalia le faaaloalo.

Suesuega a le Tagata Lava Ia pe Faalesoa

Mafaufau po o le a le lelei o lou faalogo atu i isi. Tusi tali i lau api talaaga o suesuega i fesili nei. Pe talanoaina ma lau soa.

A = E le moni lava ia te au, E = O nisi taimi e moni ia te au, I = E masani lava ona moni ia te au, O = Faamaoni pea ia te au

A talanoa mai nisi ia te au, ou te mafaufau lava i ni mea faapena na tutupu e mafai ona ou fetufaai nai lo lo’u faalogo lelei.
A faamatala mai e isi o latou lagona, ou te taumafai e tuu a’u i o latou tulaga ia iloa ai pe o le a sou faalogona.
Pe a ou aoaoina ia tagata, ou te mafaufau pe o le a le isi a’u tala o le a fai pe aoao atu.
Ou te le fiafia pe a fia tautala soo ia tagata.
E faigata ona ou mulimuli pe malamalama i mea o loo taumafai isi tagata e ta’u mai ia te au.
E masani lava ona alu solo lo’u mafaufau a o fai e la’u soa se lesona.
Ou te le fiafia pe a talanoa mai se tasi ia te au, ae faasalavei mai pe faalavelave mai nisi ia te au.
Ou te mauaina musumusuga faaleagaga ou te tautala atu pe faia foi se mea, ae ou te faagalogalo i latou.

Fesoasoani i Tagata ia Maua Tali i a Latou Fesili ma Atugaluga

Fai se taumafaiga faamaoni e taulima ai fesili a tagata ma fesoasoani ia i latou e foia o latou atugaluga. Peitai, e le o lou tiutetauave le taliina o fesili uma. I le iuga, e tatau i tagata ona foia a latou fesili ma atugaluga mo i latou lava.

Ia iloa e le o fesili uma ma atugaluga e mafai ona taliina uma. O nisi tali e oo ina manino atili i se taimi. O isi e lei faaalia mai lava. Taulai atu i le fausiaina o se faavae mautu o upumoni faavae ma taua o le talalelei. O lenei faavae o le a fesoasoani ia te oe ma i latou o loo e aoaoina e fetaomi atu i luma ma le onosai ma le faatuatua pe a i ai ni fesili e le taliina pe faigata.

O nisi o mataupu faavae mo le taliina o fesili ua faataoto atu i le vaega lenei.

Malamalama i le Popolega

O nisi o mea e te aoaoina atu atonu e foliga mai e faigata pe le masani ai foi i latou. Afai e i ai ni fesili po o ni atugaluga a tagata, ia saili muamua ia malamalama manino i ai. O nisi taimi o popolega o tagata e pei o se poloka aisa tele. E na o sina vaega lava e aliali ae i luga. O nei atugaluga e mafai ona lavelave. Tatalo mo le meaalofa o le iloatino, ma mulimuli i le Agaga i le ala e te tali atu ai. E silafia e le Tama Faalelagi loto ma aafiaga o tagata uma (le poloka aisa atoa). O le a Ia fesoasoani ia te oe ia iloa le mea e sili ona lelei m o tagata taitoatasi.

E masani lava, o popolega e mafuli i le vafealoa’i nai lo aoaoga faavae. Mo se faataitaiga, e ono popole ia tagata i le tetee o tagata o o latou aiga pe a latou auai i le Ekalesia. Pe atonu foi latou te popole i le teena o i latou e a latou uo i le galuega.

Saili ia malamalama i le puna o le popolega e ala i le faia o fesili ma le faalogo. Pe na tulai mai le popolega ona e le o i ai i le tagata se faamautinoaga faaleagaga o le moni o le Toefuataiga? Pe na tulai mai ona e le manao le tagata e tautino e ola i se mataupu faavae o le talalelei? O le iloaina o le pogai o lo latou popolega o le a fesoasoani e te iloa ai pe taulai atu i le molimau po o le tautinoga.

Faaaoga Tusitusiga Paia, Aemaise lava le Tusi a Mamona, e Fesoasoani e Tali ai Fesili

Faaali atu i tagata le auala e mafai ai e upumoni i tusitusiga paia ona fesoasoani e tali a latou fesili ma talanoaina o latou atugaluga. (Tagai “O Le Tusi a Mamona o loo Talanoaina ai Fesili o le Agaga” i le mataupu 5.) Pe a sailia e tagata musumusuga e ala i le suesueina ma le faaaogaina o tusitusiga paia, o le a faateleina lo latou gafatia e faalogo ai ma mulimuli i le Alii. O le a faateleina lo latou faatuatua ia te Ia. Faatasi ai ma le faatuatua faateleina o le a oo mai ai le molimau, salamo, ma le sauniga o le papatisoga.

“O ni isi taimi ou te alu ai i tusitusiga paia mo aoaoga faavae. O ni isi taimi ou te alu ai i tusitusiga paia mo faatonuga. Ou te alu ma se fesili, ma o le fesili e masani lava o le “O le a se mea ua finagalo le Atua ou te faia?’ po o le ‘O le a se mea ua finagalo o Ia ia ou lagonaina?’ Ou te maua lava e le aunoa ni manatu fou, mafaufauga ou te lei maua muamua, ma ou te maua musumusuga ma faatonuga ma tali i a’u fesili” (Henry B. Eyring, i le “O Se Talanoaga e uiga i le Suesue o Tusitusiga Paia,,” Liahona, Iulai 2005, 22).

E mafai ona fesoasoani le faamalamalama atu o le tele o lo tatou malamalama i le talalelei a Iesu Keriso e sau mai mea na faaalia mai i le Perofeta o Iosefa Samita ma i latou o e na mulimuli mai ia te ia. O fesili e uiga i le moni o le talalelei e mafai ona foia e ala i le mauaina o se molimau o Iosefa Samita o se perofeta a le Atua. O le faitau ma tatalo e uiga i le Tusi a Mamona o se auala taua lea e maua ai lenei molimau.

Fesoasoani i tagata ia taulai atu i le faamalosia o lo latou faatuatua ia Iesu Keriso. O le faitau ma tatalo e uiga i le Tusi a Mamona o se auala taua lea e faamalosia ai lo latou faatuatua.

Valaaulia Tagata e Faatino i le Faatuatua

A o atiina ae ma faamalosia e tagata a latou molimau o le talalelei toefuataiina, o le a mafai foi ona latou talanoaina a latou fesili ma atugaluga mai se faavae o le faatuatua. A o latou faatino i le faatuatua i upumoni latou te talitonu i ai, o le a mafai ona latou maua ni molimau o isi upumoni o le talalelei.

O nisi o auala e faatino ai i le faatuatua e aofia ai:

Tatalo soo ma le manatu moni i ai mo musumusuga ma le taitaiga.
Suesueina o tusitusiga paia, aemaise lava le Tusi a Mamona.
Auai i le lotu

Suesuega Faalesoa

Filifili se valaaulia se tasi e tuuina atu pe a e aoaoina atu se lesona. Ona faailoa lea o atugaluga e ono taofia ai se tasi mai le taliaina o le valaaulia po o le tausia o le tautinoga. Ia talanoaina ma faataitai pe mafai faapefea ona e fesoasoani i tagata a o latou galulue e foia o latou popolega.

Suesuega a le Tagata Lava Ia pe Faalesoa

I totonu o lau tusi talaaga o suesuega, ia tusi ai pe faapefea ona e faaaoga ia Iosefa Samita ma le Tusi a Mamona e tali atu ai atugaluga nei:

“Ou te le talitonu ua toe fetalai mai le Atua i tagata.”
“Ou te talitonu e mafai ona ou tapuai atu i le Atua i la’u lava auala nai lo le auala atu i se talitonuga faalelotu na faavaeina.”
“Aisea e tatau ai ona ou lē toe inuina se uaina pe a ou ‘ai, pe afai ou te auai i le ekalesia?”
“Aisea ou te moomia ai se lotu?”

Tuu Se Mea e Suesue ma Tatalo e Uiga i ai

I le faaiuga o asiasiga taitasi faafaiaoga, tuu atu i tagata se mea e suesue, mafaufau loloto i ai, ma tatalo e saunia ai mo le isi fonotaga. O le faitau, tatalo, ma le mafaufau loloto i le va o asiasiga faafaiaoga e valaaulia ai le uunaiga a le Agaga Paia i o latou olaga.

E mafai ona e valaaulia tagata e faitau ni mataupu patino i le Tusi a Mamona. Pe e mafai foi ona e uunaia i latou e faaaoga punaoa a le Ekalesia, e pei o le Gospel Library, e sue ai tali i fesili, aoao e uiga i se autu, pe matamata se vitio. O lenei mea e mafai ona avea o se autu mo se talanoaga faasamasamanoa i le isi taimi tou te feiloai ai.

Aloese mai le tuuina atu o le tele o mea e fai e tagata, aemaise lava pe afai e i ai ni au fegalegaleaiga faafaiaoga pupuu ma i latou.

Suesuega a le Tagata Lava Ia pe Faalesoa

Ia mafaufau i tagata taitasi ua fuafua e te aoaoina i lenei vaiaso. O a mataupu o le Tusi a Mamona o le a sili ona fesoasoani ia i latou? O a isi punaoa o le a aoga ia i latou? Tusifaamaumau mea ua e faamoemoe e tuuina atu mo tagata taitoatasi. Ia faamaumau foi mea o le a e faia e tulitatao ai i le taimi o lau asiasiga e sosoo ai.

Fesoasoani i Tagata e i ai Vaisū

E mafai ona e fesoasoani i tagata o loo tauivi e faatoilalo mea ua fai ma vaisu e ala i le talanoaina ma le alofa o o latou tauiviga, lagolagoina i latou, ma faafesootai i latou i punaoa. E mafai ona e uunaia i latou e auai i se tasi o vaega lagolago o le toe faaleleia o vaisu a le Ekalesia. O nei vaega e mafai ona fono ma tagata po o luga o le initoneti. (Tagai AddictionRecovery.ChurchofJesusChrist.org.) Fautuaina i latou e faaaoga punaoa o loo ile vaega o “Vaisu” o le Life Help in the Gospel Library.

E mafai foi e taitai ma tagata o le Ekalesia i le lotoifale ona tuuina atu le lagolago. O nisi tagata e i ai vaisu atonu e manaomia togafitiga faafomai faapolofesa ma faalemafaufau.

O ni nai fautuaga nei mo auala e mafai ona e lagolagoina ai tagata o loo tauivi e faatoilalo le vaisu:

Faamalosia a latou taumafaiga e o mai ia Keriso. Fesoasoani ia i latou ia iloa o a latou taumafaiga e toe faaleleia ma faamaloloina e aloaia ma faatauaina e le Tama Faalelagi ma Iesu Keriso. Aoao i latou e mafai ona faamalosia i latou e ala i le Faaola ma Lana Togiola. Na te silafia atoatoa le faamoemoega o o latou loto e fai mea lelei.
Tatalo mo i latou i au lava tatalo e fai, ma tatalo faatasi ma i latou. Pe a talafeagai ai, uunaia i latou e saili se faamanuiaga faaleperisitua mai taitai perisitua i le lotoifale.
Faaauau ona aoao i latou i le talalelei a Iesu Keriso. Aoao i latou e alofa le Tama Faalelagi, le Faaola, ma le Agaga Paia ia i latou ma mananao i lo latou manuia.
Fautuaina i latou e auai soo i le lotu ma atiae faauoga ma tagata o le ekalesia.
Ia fesoasoani atu ma lagolago i ai—ae maise lava pe a latou faavaivai.

O vaisu e faigata ona faatoilaloina, ma e mafai ona tupu le toe foi i ai. E le tatau ona faateia taitai ma tagata o le Ekalesia i lenei mea. E tatau ona latou faaali atu le alofa, ae le o le faamasinoga.

O se tagata faatoa liliu mai ua faafuasei ona le toe sau i se lotu, atonu ua toe gauai atu i se vaisu tuai ma ua lagonaina le le agavaa ma le lotovaivai. E mafai ona fesoasoani se asiasiga faavave e tuuina atu i ai le faamalosiauga ma le lagolago. E tatau i tagata o le ekalesia ona faaali atu i upu ma faatinoga o le Ekalesia o se nofoaga e mafai ona maua ai le alofa o Keriso (tagai i le 3 Nifae 18:32).

Suesuega a le Tagata Lava Ia pe Faalesoa

Mafaufau i se tasi o loo e aoaoina po o se tagata fou pe ua toe foi mai o loo taumafai e faatoilalo se vaisu. Ia toe iloilo le “Faatuatua ia Iesu Keriso” ma le “Salamo” mai le lesona O Le Talalelei a Iesu Keriso” i le mataupu e 3.

O le a se mea e mafai ona e aoao atu i lena tagata mai lenei lesona ma mai lenei mataupu, o le a fesoasoani ia te ia?
Ia fai se fuafuaga o le lesona e fesoasoani ai i lenei tagata.

Aoaoina o Tagata E Leai se Talaaga FaaKerisiano

O nisi o tagata o loo e aoaoina atonu e le o i ai se talaaga faaKerisiano pe atonu foi e le talitonu i le Tama Faalelagi ma Iesu Keriso. Peitai, o le toatele o nei tagata, e i ai ni talitonuga, aga, ma ni nofoaga e paia ia te i latou. E taua lou faaalia o le faaaloalo mo o latou talitonuga ma tu masani faalelotu.

Fesoasoani ia Latou Malamalama po o Ai le Atua

Atonu e te mafaufau pe faapefea ona e fetuunaia au aoaoga mo tagata e le o i ai se talaaga faaKerisiano. O mataupu faavae e fesoasoani i se tagata e fausia le faatuatua e tutusa lava i aganuu uma. Fesoasoani i tagata ia maua se malamalamaaga sa’o e uiga i le Atua ma le misiona paia a Iesu Keriso. O le auala sili mo i latou e aoao ai nei upumoni o le mauaina lea o aafiaga faaleagaga faaletagata lava ia. O nisi auala e mafai ona e fesoasoani ai ia i latou ia maua nei aafiaga o loo otooto atu i lalo:

Aoao atu o le Atua o lo tatou Tama Faalelagi, ma e alofa o Ia ia i tatou. O i tatou o Ana fanau. Valaaulia i latou e saili lena molimau mo i latou lava.
Aoao atu le fuafuaga o le faaolataga.
Aoao atu na faaali mai le Atua le Tama ma Iesu Keriso i le Perofeta o Iosefa Samita.
Tuu atu lau molimau faamaoni e uiga i le talalelei, e aofia ai ou lagona i le alofa o le Tama Faalelagi ma pe aisea ua e filifili ai e mulimuli ia Iesu Keriso.
Valaaulia i latou e faia ni tatalo faigofie, mai le loto—faatasi ma oe ma i latou lava.
Valaaulia i latou e faitau le Tusi a Mamona i aso taitasi—faatasi ma oe ma i latou lava.
Valaaulia i latou e auai i le lotu.
Faafeiloai atu i latou i tagata o le Ekalesia o e e mafai ona faamatalaina pe na faapefea ona latou talitonu i le Tama Faalelagi ma Iesu Keriso.
Valaaulia i latou e tausia poloaiga.

O le toatele o tagata e mananao ia i ai se sootaga sili atu ma le Atua ma saili le faamoemoega ma le uiga i le olaga. Fesoasoani ia i latou ia iloa pe faapefea ona avea i latou ma fanau a se Tama oi le Lagi alofa ma le ala e i ai Sana fuafuaga mo i latou. Mo se faataitaiga, e mafai ona e amata i le fai atu o se mea e pei o lenei:

O le Atua o lo tatou Tama oi le Lagi, ma e alofa o Ia ia i tatou. O i tatou o Ana fanau. Sa tatou ola faatasi ma Ia ae tatou te lei fananau mai. Ona o i tatou uma o fanau a le Atua, o i tatou uma o uso ma tuafafine. E finagalo o Ia ia tatou toefoi atu ia te Ia. Ona o Lona alofa mo i tatou, ua Ia saunia ai se ala mo i tatou e toe foi atu ai ia te Ia e ala i Lona Alo, o Iesu Keriso.

Fetuunai Au Aoaoga pe a Manaomia

E toatele tagata liliu mai talaaga e le Kerisiano ua fai mai latou te lei malamalama tele i mea sa aoao atu e faifeautalai. Peitai, sa latou lagonaina le Agaga ma mananao e fai le mea na talosagaina e faifeautalai. Ia faia mea uma e mafai ona e faia e fesoasoani ai i tagata ia malamalama i aoaoga faavae o le talalelei. Ia onosai ma lagolagosua. E ono alu ai se taimi mo tagata e aoao ai e faailoa ma tau mai o latou lagona. Atonu e tatau ona e suia le televave ma le loloto o au aoaoga ina ia fesoasoani ia i latou.

O fautuaga nei e mafai ona fesoasoani a o e sauni e aoao atu tagata e le o i ai se talaaga faaKerisiano:

Malamalama po o a manaoga faaleagaga po o mea e fiafia i ai e uunaia ai i latou e feiloai ma oe.
Ia saunia ni aotelega ma ni toe faamanatu faigofie mo lesona taitasi.
Fai i ai latou te faamatala atu mea ua latou malamalama ai ma mea na latou oo i ai.
Faamatala upu ma mataupu faavae taua. Atonu e le masani tagata i le tele o upu o le a e faaaogaina pe a e aoao atu.
Ia toe foi i tua i se lesona na aoaoina muamua e toe aoao manino atu le aoaoga faavae. Atonu e talafeagai lenei mea i soo se taimi o le faagasologa o le aoaoga.
Faailoa mai valaaulia e mafai ona e tuuina atu e fesoasoani ai i tagata ia maua faamanuiaga o le talalelei.

O loo lisi atu i lalo nisi o punaoa i le Gospel Library e mafai ona e faaaogaina e fesoasoani ai ia i latou e aunoa ma se talaaga faaKerisiano:

“O Ai le Atua?”
“O Ai Iesu Keriso?”
“Iesu Keriso, le Alo o le Atua”
”O Mea e Faamoemoe i ai Pe a Asiasi Atu Faifeautalai O Le Ekalesia a Iesu Keriso o le Au Paia o Aso e Gata Ai”
“O Musalemi ma le Au Paia o Aso e Gata Ai: Talitonuga, Tulaga Faatauaina, ma Tifiga o le Olaga”

Suesuega a le Tagata Lava Ia pe Faalesoa

Afai e mafai, ia faailoa mai se tagata liliu mai o le e lei masani i le aganuu faaKerisiano, a e lei feiloai ma faifeautalai. Ia fuafua ina ia feiloai atu ia te ia, ma fesili atu mo lona aafiaga e uiga i lona liliu mai. Mo se faataitaiga, e mafai ona e fesili i le tagata e uiga i le:

O le mea na taitai atu ai o ia e talitonu i le Tama Faalelagi ma Iesu Keriso.
Na faapei le aafiaga o le tatalo mo le taimi muamua.
E faapei le taimi muamua na ia lagonaina ai se tali i le tatalo.
O le matafaioi a tusitusiga paia i lona liua.
Pe na faapei le auai i le lotu.

Tusi mea ua e aoaoina i lau tusi talaaga o suesuega.

Mafaufau e valaaulia le tagata e fesoasoani ia te oe e aoao se tasi e leai se talaaga faaKerisiano.

Manatu mo le Suesue ma le Faaaogaina

Suesuega Faaletagata Lava Ia

Ia mafaufau faapea ua e oo i se tulaga e pei ona ta’ua i lalo. E faapefea ona e faaaogaina ia mataupu faavae ma tomai o loo i lenei mataupu e fesoasoani ai i nei tagata ia alualu i luma? Ia fuafua pe o le a faapefea ona e faaaogaina ia tulaga taitasi.
- O se tasi o loo sauniuni mo le papatisoga ua ta’u atu ia te oe ua le toe manao o ia e feiloai ia te oe.
- Ua outou feiloai mo le taimi lona fitu ma se tagata na aoaoina mo ni nai taimi e nisi faifeautalai muamua i se vaitaimi o le lua tausaga ua mavae. E itiiti lava ni faailoga pe afai na i ai, o lona alualu i luma.
Filifili se lesona se tasi a faifeautalai. Ia filifili ni fuaitau se tasi pe lua mai mataupu faavae autu taitasi. Ia faataitai ona aoao atu mai na fuaitau e pei ona faailogaina i le vaega “Faaaoga ia Tusitusiga Paia” o lenei mataupu.

Suesuega Faalesoa ma le Felafolafoaiga Faalesoa

Ia faitau le tala ia Amona ma le Tupu o Lamonae i le Alema 18--19 ma le tala ia Arona i le Alema 22:4–18. A o e faitau, ia faailoa ma faamatala pe na faapefea e Amona ma Arona ona:
- Mulimuli i le Agaga ma aoao atu ma le alofa.
- Amata ona aoao atu.
- Fetuutuunai a la’ua aoaoga ina ia fetaui ma manaoga.
- Tuuina atu molimau.
- Faaaogaina ia tusitusiga paia.
- Fai fesili, faalogo, ma fesoasoani ia i latou sa latou aoaoina e foia o latou atugaluga.
- Uunaia i latou na la aoaoina e faia ia tautinoga.
Talanoaina pe na faapefea ona aafia le Tupu o Lamonae, lona tama, ma Apiso i a laua auaunaga ma aoaoga.

Aufono a le Itu, Konafesi Faalesone, ma le Aufono a Taitai o le Misiona

Valaaulia tagata o le ekalesia po o i latou o loo aoaoina i le taimi nei i lau fonotaga. Ia faamatala atu i le vaega, e te manao i faifeautalai ina ia faaleleia o latou tomai e fetufaai atu la latou savali taua. Ia filifili se lesona ma se tomai. Ia tuu atu i faifeautalai e aoao atu i le tagata po o tagata ia le lesona ua e filifilia mo le 20 minute, ia taulai atu i le tomai ua e faailoa maia. Tuu atu ia i latou e fesuiai i latou e aoaoina pe a mavae le 20 minute. A uma ona aoao atu faifeautalai, aumai faatasi le vaega. Tuu atu i le tagata po o tagata e ta’u atu i faifeautalai le mea sa sili ona aoga ma se auala se tasi e mafai ona latou faaleleia atili ai.
Ia faaali le vitio o faataitaiga o faifeautalai o loo aoaoina pe faafesootaia foi ia tagata. Ia filifilia se tomai ma talanoaina pe o le a le lelei na faaaoga ai e faifeautalai ia mataupu faavae mo lena tomai.
Filifili se tomai, ma faailoa aoaoga faavae po o fuaitau o mau e lagolagoina. Ia aoao atu le aoaoga faavae o le tomai i faifeautalai.

Taitai Misiona ma Fesoasoani o le Misiona

Ia i ai faatasi ma faifeautalai mai lea taimi i lea taimi a o latou aoao atu. Fuafua le ala e mafai ai ona e auai i le aoaoga.
Uunaia taitai i le lotoifale e auai faatasi ma faifeautalai i a latou asiasiga faafaiaoga.
Faataitai ma fesoasoani i faifeautalai e faataitai se tasi o tomai faafaiaoga o loo faamatalaina i lenei mataupu, e pei o le faia o fesili lelei ma le faalogo.
Faataitai le faaaogaina lelei o tusitusiga paia pe a aoao atu faifeautalai i konafesi faalesone, aufono a taitai o le misiona, ma faatalanoaga. Ia faia lea lava mea e tasi pe a e aoao atu faatasi ma i latou.
Fesoasoani i faifeautalai ia malamalama i tusitusiga paia ma atiina ae se fiafia mo i latou. Sa fautuaina e Elder Jeffrey R. Holland taitai misiona:

“Ia faia se fiafia i le afioga a le Atua e matuai totonugalemu lava i lau aganuu o le misiona. … Ia faamasani i faaaliga ma le faaaogaina e le aunoa o tusitusiga faavae o se tasi o uiga autu o au faifeautalai mo o latou olaga atoa.

“Pe a e aoaoina au faifeautalai—ma o taimi uma lava na—aoao i latou mai tusitusiga paia. Tuu atu ia i latou e vaai po o fea e te maua ai lou malosi ma musumusuga. Aoao i latou ia alolofa ma faalagolago i na faaaliga ua faaputuputuina.

“[O la’u] peresitene o le misiona na aoao mai le Tusi a Mamona ma [isi] tusitusiga paia i taimi uma sa matou i ai ma ia, pe sa foliga mai foi faapena. O faatalanoaga faaletagata lava ia sa ogatusa ma tusitusiga paia. O otootoga mo … fonotaga na aumai mai tusitusiga faavae. …

“Matou te lei iloaina i lena taimi, ae sa faaauupegaina i matou e lo matou peresitene i le itu taumatau ma le itu tauagavale, ma apoapoai mai ia i matou ma le malosi atoa o lona agaga ma i faiaoga uma sa ia te ia e pipiimau i le ai uamea ina ia le fano lava [tagai 1 Nifae 15:23–25]” (“O Le Mana o Tusitusiga Paia” semina mo taitai fou o le misiona, 25 Iuni, 2022).