Mga Kapanguhaan sa Pagdumala sa Espiritwal nga mga Panginahanglan

Tali sa mga misyonaryo, ang komon nga reaksyon sa sobra nga stress mao ang pagduda sa kalig-on sa ilang pagpamatuod o sa kamatuoran sa ebanghelyo. Kini nga panlimbasug kasagaran naggikan sa kakulang sa mga kapanguhaan sa pagsagubang sa sobra nga stress kaysa kakulang sa pagpamatuod. Kon aduna kay sama nga mga kalisud, sulayi ang mga sugyot sa ubos nga angay kanimo. Tan-awa usab sa “Kinatibuk-ang mga Baruganan sa Pagdumala sa Stress” nga sekyon sa mga pahina 17–22 alang sa dugang nga mga ideya.

Pagkat-on sa Paglig-on sa Akong Pagpamatuod

Hibaloi nga ang mga pangutana makaayo. Si Joseph Smith nakadawat og daghang pagpadayag agi’g tubag sa matinuoron nga mga pangutana. Mga kasulatan, mga magtutudlo, ug ang rason makatabang kanimo sa pipila ka mga pangutana, apan ang Espiritu lang ang makapanghimatuod nga ang Dios tinuod, nga si Jesus mao ang Kristo, ug nga ang Simbahan tinuod.
Sabta kon unsa ang hugot nga pagtuo. Ang pagkaadunay hugot nga pagtuo mao ang pagsalig sa hingpit nga kaayo, gugma, kaalam, ug kaangayan sa Ginoo, bisan tuod wala kita hingpit nga nakasabut. Si Alma nagtudlo nga “ang hugot nga pagtuo dili ang pagbaton sa hingpit nga kasayuran sa mga butang; busa kon kamo adunay hugot nga pagtuo kamo molaum sa mga butang diin dili makita, diin mga tinuod” (Alma 32:21). Wala ka magkinahanglan og “hingpit nga kasayuran” aron adunay hugot nga pagtuo. Tun-i ang Alma 32 aron sa paglig-on sa imong hugot nga pagtuo. (Tan-awa sa Isangyaw ang Akong Ebanghelyo, 140–42.)
Pagmapailubon. Ang panahon ug kasinatian motabang kanimo nga makasabut sa ubang butang nga makalibog sa pagkakaron. Hinumdumi ang gisulti ni Nephi: “Ako nasayud nga [ang Dios] nahigugma sa iyang mga anak; bisan pa niana, ako wala masayud sa kahulugan sa tanan nga mga butang” (1 Nephi 11:17). Palamboa ang imong nasayran pinaagi sa Espiritu nga tinuod kabahin sa Dios. (Tan-awa sa Isangyaw ang Akong Ebanghelyo, 145.)
Sunda ang mga kasugoan. Makaangkon kita og pagsalig sa Ginoo kon makat-on kita pinaagi sa kasinatian sa bili sa Iyang mga pagtulun-an. “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingon kong pagbulot-an” (Juan 7:17).

Pagkat-on sa Paghinulsol

Pagmatinuoron sa imong mission president. Kon kinahanglan ka nga maghinulsol sa seryusong mga sala nga wala pa nimo matagad, pakig-istorya sa imong mission president sa prangka ug matinuorong paagi. Motabang siya kanimo nga matarung kining mga butanga.
Pasayloa ang imong kaugalingon human sa paghinulsol. Kon naghinulsol na ka ug mibati gihapon sa kahasol sa tanlag ug kaulaw, hinumdumi nga kitang tanan nagbasol sa nangaging mga sala ug kasaypanan. Salig nga ang Pag-ula ni Kristo paigo, bisan alang kanimo. Hinumdumi nga ang paghinulsol dili lang pang backup nga plano. Ang paghinulsol mao ang plano sa kalipay sa matag tawo. Siguroa nga ang mga butang nga imong gikabalak-an kanunay mga mahinungdanon nga mga butang (sama pananglit, ang kalamboan sa imong mga investigator), dili mga butang nga makapasigarbo sa kaugalingon (sama sa unsa ang gihunahuna sa uban kanimo).
Sabta ang bahin sa pagkumpisal. Kon mobati ka og panginahanglan nga ikumpisal ang dili kaayo seryuso nga mga sala o mobalik-balik sa pagkumpisal, bisan gisigurado na sa mga lider sa priesthood nga igo na ang imong pagkumpisal, basin sobra ra ang imong paggamit sa kumpisal. Ang padayon nga pagbati og pagbasol ug kaguol sa nangaging mga sala normal ra ug wala magpasabut nga kinahanglan ka nga mokumpisal pag-usab. Ilinga ang imong kaugalingon sa sama nga mga hunahuna pinaagi sa uban nga mga kalihokan, ug paghimo og tinuyo nga pagpili sa pagtuo sa kapasayloan sa Ginoo. Ibaliwala ang tintasyon nga mabalaka o maulaw.
Pakigsulti sa imong mission president kon padayon ka nga manlimbasug.

Pagkat-on sa Makahuluganon nga Pag-ampo

Sulayi ang pag-ampo nga kusog, bisan kon ihunghong lang. Sulayi pagpangandam sa pag-ampo pinaagi sa pagsulat sa imong mga pangutana ug mga kabalaka. Hunahunaa nga anaa sa duol ang Ginoo. Pangutan-a ang Dios kon unsay imong mahimo alang Kaniya karon; dayon buhata ang mga ideya nga mahunahunaan. Usahay gamita ang imong pag-ampo sa pagpasalamat lang sa Dios alang sa daghan kaayo nga mga butang nga gipanalangin Niya kanimo.
Tun-i ang “Pag-ampo uban sa Hugot nga Pagtuo” sa Isangyaw ang Akong Ebanghelyo. Kini nga seksyon, nga makita sa mga pahina 110–11, naghatag og mga sugyot kabahin sa pag-ampo.

Pagkat-on sa Paghigugma sa mga Kasulatan

Pag-ampo og tabang nga masabtan ug matagamtam ang mga kasulatan. Gamita ang uban nimong panahon sa pagtuon sa pagsulat sa imong mga pagbati ug mga reaksyon, sa imong nakat-unan, o espirituhanong mga impresyon nga imong nadawat.
Ribyuha ang “Mga Ideya ug mga Sugyot sa Pagtuon” sa Isangyaw ang Akong Ebanghelyo. Kini nga seksyon, nga makita sa mga pahina 25–28, naghatag og mga sugyot alang sa mas mabungahong pagtuon sa kasulatan.

Pagkat-on sa Pagsalig sa Espiritu

Pagpraktis uban sa pailub. Ang pagkat-on sa pag-ila sa tingog sa Espiritu susama sa pagkat-on og pinulongan—nagkinahanglan kini og praktis, pailub, pagkamapainubsanon, ug kaandam sa pagkat-on gikan sa mga sayop nga dili moundang.
Pagkat-on gikan sa mga kinatibuk-ang komperensya. Alang sa mga ideya unsaon sa pag-ugmad og personal nga pagpadayag, tun-i ang mga pakigpulong sa kinatibuk-ang komperensya kabahin niini nga hilisgutan.
Tun-i ang Isangyaw ang Akong Ebanghelyo. Ang mga pahina 113–116 naglakip og dugang nga mga sugyot ug panabut sa pag-ila ug pagsalig sa Espiritu.

Mga Kapanguhaan sa Kasulatan

Tun-i ang mga tudling sa mosunod nga mga pahina aron sa paglig-on sa imong hugot nga pagtuo nga ang Dios mohatag kanimo og kahupayan ug tabang. Samtang imong hinumduman ang Manluluwas, ikaw “unta makabaton sa iyang Espiritu uban [kanimo]” (D&P 20:79).

Isaias 41:10	“Ayaw kahadlok; kay ania ako uban kanimo: Ayaw pagtalaw; kay ako mao ang imong Dios: Palig-onon ko ikaw; oo, buligan ko ikaw; oo, ituboy ko ikaw sa tuong kamot sa akong pagkamatarung.”
Juan 14:27	“Kaninyo ibilin ko ang kalinaw, kaninyo ihatag ko ang akong kalinaw: Hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.”
2 Timoteo 1:7	“Kay kita wala sa Dios hatagig espiritu sa katalaw kondili sa espiritu sa gahum, ug sa gugma ug sa pagpugong sa kaugalingon.”
1 Nephi 1:20	“Ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo, aron mahimo sila nga malig-on maingon ngadto sa gahum sa kaluwasan.”
Jacob 3:1	“Siya mohupay kaninyo sa inyong mga kasakit, ug siya mohangyo alang sa inyong katuyoan.”
Jacob 4:7	“Ang Ginoong Dios mipakita kanamo sa among kahuyang aron kami masayud nga pinaagi sa iyang grasya, ug sa iyang walay katapusan nga pagpakig-angay ngadto sa mga katawhan, nga kami adunay gahum sa pagbuhat niini nga mga butang.”
Mosiah 4:27	“Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog.”
Mosiah 24:13–14	“Ihangad ang inyong mga ulo ug pagmadasigon, kay Ako nasayud sa pakigsaad diin kamo mihimo ngari kanako; ug Ako makigsaad uban sa akong mga katawhan ug moluwas kanila gikan sa pagkaulipon. Ug Ako usab mopagaan sa mga alantuson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko, bisan anaa kamo sa pagkaulipon; ug kini Ako mobuhat nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit.”
Alma 7:12	“Siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.”
Alma 26:27	“Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: … antusa uban sa pailub ang inyong mga kasakit, ug Ako mohatag nganha kaninyo sa kalampusan.”
Alma 38:5	“Tungod kay ikaw mibutang sa imong pagsalig diha sa Dios mao usab nga ikaw pagaluwason gikan sa imong mga pagsulay, ug sa imong mga kasamok, ug sa imong mga kasakit.”
Ether 12:27	“Ug kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”
Doktrina ug mga Pakigsaad 6:32–36	“Gani sama nga Ako anaa diha sa taliwala kaninyo. … Busa, ayaw kahadlok, gagmay nga panon; pagbuhat og maayo; tuguti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog. Tan-awa, Ako dili manghimaraut kaninyo. … Paghunahuna ngari kanako sa matag hunahuna; ayaw pagduha-duha, ayaw kahadlok.”
Doktrina ug mga Pakigsaad 58:2–4	“Siya nga matinud-anon bisan sa kalisdanan, ang ganti sa mao dako diha sa gingharian sa langit. Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios mahitungod niadto nga mga butang nga moabut sa umaabut, ug ang himaya nga mosunod human sa daghan nga kalisdanan. Kay human sa daghan nga kalisdanan moabut ang mga panalangin.”
Doktrina ug mga Pakigsaad 122:7–9	“Kining tanan nga mga butang makahatag kanimo og kasinatian, ug alang sa imong kaayohan. Ang Anak sa Tawo mikunsad ubos kanilang tanan. … Busa, padayon.”
Bible Dictionary, “Fear”	“Ang unang epekto sa sala ni Adan mao nga siya nahadlok (Genesis 3:10). … Sukad sa Pagkapukan, ang Dios nagtudlo sa mga tawo nga dili mahadlok, apan uban sa paghinulsol mangayo og kapasayloan nga adunay hingpit nga pagsalig nga madawat kini.”
Uban nga mga kapanguhaan sa kasulatan: