Pasiuna

Christ with His arm raised calling Peter and Andrew from a small fishing boat with the sail raised.

Isip usa ka misyonaryo, gitawag ka aron morepresentar ni Jesukristo sa pagpangalagad sa mga anak sa Langitnong Amahan. Ang Manluluwas nagmahal kanimo, ug Siya motabang nga ikaw magmalampuson. Siya misaad: “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

Samtang imong gamiton ang imong hugot nga pagtuo ug tumanon ang desisyon nga mohimo sa buhat sa Ginoo, mas dali ka nga makapalambo og mga kahanas, mga gasa, ug mga kalig-on nga imong gikinahanglan. Imong mabati ang Iyang tabang ug mas masaligon sa imong abilidad sa pagserbisyo sa Ginoo.

Bisan pa sa saad nga tabang sa Ginoo, daghang halangdong mga misyonaryo sa kasaysayan mirekord nga sila nag-antus ug nanglimbasug sa ilang pag-misyon. Sila si Ammon ug ang iyang mga igsoon “[nag]antus sa hilabihan, diha sa lawas ug diha sa hunahuna, sama sa kagutom, kauhaw ug kakapoy, ug usab sa dako nga paghago diha sa espiritu” (Alma 17:5). May mga panahon, nga gusto na unta nila nga mopauli. “Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: Lakaw taliwala sa inyong mga kaigsoonan, ang mga Lamanite, ug antusa uban sa pailub ang inyong mga kasakit, ug Ako mohatag nganha kaninyo sa kalampusan” (Alma 26:27).

Unsaon sa Pagsugod

1. Basaha ang “Pagsabut sa Stress”

   Sa pagsugod, basaha ang “Pagsabut sa Stress” sa mga pahina 3–10 aron makaangkon og kinatibuk-ang panabut kabahin sa stress, sa mga panginahanglan sa misyonaryo nga buhat nga maoy nakaingon niini, ug sa mga kapanguhaan nga anaa aron sa pagdumala niini nga mga panginahanglan.

2. Kompletuha ang Pagtimbang-timbang sa Kaugalingon

   Gamita ang Rekord sa Pagtimbang-timbang sa Kaugalingon diha sa mga pahina 11–13 aron madeterminar kon unsa nga mga stress o mga panginahanglan sa misyonaryo nga buhat ang posibleng hinungdan sa kalisud karon.

3. Tan-awa ang Magamit nga mga Sugyot ug mga Himan

   Kon imo na nga masayran ang mga hinungdan sa stress, tan-awa ang mga pahina sa kapanguhaan nga anaa sa tapad sa matag seksyon sa pagtimbang-timbang. Kini nga mga sugyot makatabang kanimo sa pagdumala sa imong stress. Ang ubang mga misyonaryo ug mga lider sa misyon makatabang kanimo sa paggamit niini nga mga himan ug makasugyot og ubang mga ideya.

4. Usba kon Gikinahanglan

   Usba ang pagtimbang-timbang sa kaugalingon kon gikinahanglan sa imong tibuok misyon. Dangup niini nga basahon alang sa dugang nga mga ideya sa panahon nga gikinahanglan nimo.

Usa ka dakong sekreto sa pagdumala sa pagkawala sa kadasig ug stress nga komon sa misyonaryong pagserbisyo mao ang pagbag-o ngadto sa Ginoo sa inyong desisyon nga moserbisyo. Si President Gordon B. Hinckley nag-asoy sa iyang kasinatian sa iyang pagsugod sa iyang misyon sa England.

“Dili maayo ang akong pamati sa akong pag-abot. Sa unang mga semana, tungod sa sakit ug sa oposisyon nga atong gibati, nawad-an ko sa kadasig. Gisulatan nako ang akong buotang amahan ug miingon nga morag nag-usik-usik lang ko sa akong panahon ug sa iyang kwarta. Siya ang akong amahan ug akong stake president, ug siya usa ka maalamon ug dinasig nga tawo. Mipadala siya kanako og mubo kaayo nga sulat nga nag-ingon, “Minahal nga Gordon, nadawat nako ang imong sulat. Usa ra ang akong sugyot: kalimti ang imong kaugalingon ug pagtrabaho.’ Sayo nianang buntaga sa among klase sa kasulatan ang akong kompanyon ug ako mibasa niini nga mga pulong sa Ginoo: ‘Bisan kinsa nga buot magapatunhay sa iyang kinabuhi, mawagtangan hinoon siya niini; apan bisan kinsa nga magawagtang sa iyang kinabuhi tungod kanako ug tungod sa maayong balita, magapatunhay niini.’ (Marcos 8:35.)

“Kadto nga mga pulong sa Agalon, gisundan sa sulat sa akong amahan nga nagtambag sa paglimot sa akong kaugalingon ug sa pagtrabaho, mituhop sa akong kalag. Dala ang sulat sa akong amahan, misulod ko sa among kwarto sa balay diha sa 15 Wadham Road, diin kami nagpuyo, ug miluhod ug mihimo og pakigsaad sa Ginoo. Ako mipakigsaad nga akong kalimtan ang akong kaugalingon ug isubsob ang akong kaugalingon diha sa Iyang serbisyo.

“Kadto nga adlaw sa Hulyo 1933 mao ang akong adlaw sa pagdesisyon. Usa ka bag-ong kahayag miabut sa akong kinabuhi ug bag-ong kalipay sa akong kasingkasing. Ang gabon sa England daw nawala, ug akong nakita ang kahayag sa adlaw. Mabungahon ug maanindot ang akong kasinatian sa misyon, diin kanunay akong mapasalamaton niini” (“Taking the Gospel to Britain: A Declaration of Vision, Faith, Courage, and Truth,” Ensign, Hulyo 1987, 7).

Nagmalampuson si President Hinckley sa pagdumala sa iyang pagkawala sa kadasig samtang iyang gibag-o ang iyang desisyon sa pagserbisyo sa Ginoo. Wala madugay siya miingon: “Ang pinakamaayo nga tambal sa kabalaka nga akong nahibaloan mao ang pagtrabaho. Ang pinakamaayo nga tambal sa pagkawala sa paglaum mao ang pagserbisyo. Ang pinakamaayo nga tambal sa kakapoy mao ang pagtabang sa ubang tawo nga mas labaw pa nga gikapoy” (“Words of the Prophet: Put Your Shoulder to the Wheel,” New Era, Hulyo 2000, 7).

Paggamit Niining Booklet

Ang misyonaryo nga buhat makalipay ug makapa-stress. Kining booklet makatabang kanimo nga mas makasabut sa stress ug sa unsang paagi kini makaapekto kanimo, apan dili tuyo niini nga kausahon ra ni nimo pagbasa. Gamit ang mga instruksyon diha sa pahina 1, magiyahan ka ngadto sa mga sugyot sa mga hilisgutan nga imong gipili. Kini nga mga ideya makatabang usab sa imong pagserbisyo ug pagpangalagad ngadto sa imong kompanyon ug sa ubang mga misyonaryo.