Fakataha Fika Hiva
Ko Hono Fakahoko e Ngaahi Tauteá
Ko e Ngaahi Taumuʻa ʻo e Fakatahá
Lolotonga e fakataha ko ʻení, tokoniʻi e mātuʻá:
-
Ke mahino kiate kinautolu ʻa e mahuʻinga ʻo e tautea ki he ʻulungaanga ʻoku tali mo taʻetalí.
-
Ke nau ʻilo e faikehekehe ʻo e tautea fakanatulá mo e tautea ʻuhinga totonú mo e founga mo e taimi ʻoku nau tokoni ai ʻi hono tataki e ʻulungāngá.
-
Ke ʻiloʻi e founga ke fakaʻaongaʻi ai e ngaahi tautea ʻuhinga totonú.
-
Ke mahino kiate kinautolu e founga ke ngāue ʻaki ai e fakamavaheʻí ko ha tauteá.
Ko e Mahuʻinga ʻo e Tauteá
ʻOku ako e fānaú ʻi heʻenau fakahoko fakaʻaho e ngaahi filí mo aʻusia e ngaahi nunuʻa ʻo ʻenau ngaahi filí. Ko kinautolu ʻoku nau tauhi e ngaahi fekau ʻa e ʻOtuá, ngāue mālohi, mo talangofua ki he ngaahi lao ʻo e koló ʻoku lahi ange honau faingamālie ke nau nofo tuʻumālie mo ola leleí. Ko kinautolu ʻoku fakapikopiko pe talangataʻá ʻoku nau faʻa aʻu ki he tuʻunga ʻo e kakai lalahí ʻoku ʻikai ke nau mateuteu ki he moʻui tuʻumālié. Ko hono aofangatukú, ʻoku tau aʻusia kotoa pē e ngaahi nunuʻa ʻo ʻetau ngaahi ngāué. ʻE maʻu ʻe he māʻoniʻoní ʻa e moʻui taʻengatá, ka ʻe tuli ki tuʻa ʻa e kau taʻefakatomalá (vakai, Mātiu 25:46). ʻE lava ʻe he mātuʻá ʻo fakaʻaongaʻi e tauteá ʻi ha ngaahi founga ʻe tokoni ki heʻenau fānaú ke nau ako e ʻulungaanga falalaʻangá.
Naʻe fakatokangaʻi ʻe he Pīsope Pulé, H. Tēvita Pētoni “ʻoku faingataʻa maʻu pē ki he mātuʻa koloaʻiá ke nau taʻofi e fie maʻu ʻa e fānau ne tōtuʻa hono fakahōhōʻiaʻi honau lotó. ʻOku fakatuʻutāmaki ia ki heʻenau fānaú he ʻoku ʻikai ke nau ako ai ʻa e ngaahi meʻa ʻoku mahuʻinga angé, hangē ko e ngāue mālohí, ngāue ke ikunaʻi ʻete taumuʻá, faitotonú mo e angaʻofá.” 1
Fakatatau kia Viliami Tamoni, ko e talēkita ʻo e Senitā Sitenifooti ki he Toʻu Tupú, ko e ngaahi ngāue ʻa e mātuʻa tokolahi ʻe niʻihi ʻoku nau poupouʻi e siokitá mo e taʻefalalaʻangá ʻi heʻenau fānaú. 2 ʻOku feinga e mātuʻa ko ʻení ke fakamālohia e fie tangata pe fie fefine ʻenau fānaú ʻaki hono talaange kiate kinautolu ʻenau leleí ʻo ʻikai fie maʻu ha fakamoʻoni meiate kinautolu [ki he lelei ko iá]. 3 Ko e fakalāngilangi taʻengāueʻi ko ʻení ʻoku faʻa iku ia ki he fakapikopiko, fakamālohi, taʻefakaʻapaʻapa, taʻemapuleʻi e fānaú mo e toʻu tupú. Ko e mātuʻa ʻoku nau fakahōhōlotó ʻoku ʻikai ke nau loko fie maʻu ha meʻa mei heʻenau fānaú, fakahoko pe ʻikai fakahoko ha tautea ki he talangataʻá pe ʻikai lava ke fakahoko ha ngāué.
Naʻe ako ʻaki ʻe Palesiteni Siosefa F. Sāmita ʻa e mahuʻinga ʻo e ʻekea mei he fānaú ʻenau ʻulungaanga taʻefeʻungá: [“ʻOku ʻikai finangalo ʻa e ʻOtuá ke ʻi ai ha niʻihi ʻiate kitautolu ʻe fakahōhōloto taʻefakapotopoto, ʻikai faʻa fakakaukau pea fakanainaiʻi ʻetau fānaú ʻo ʻikai ke tau fakatonutonu kinautolu ʻi heʻenau ngaahi fehalākí, faihalá mo ʻenau ʻofa vale ʻi he ngaahi meʻa ʻo e māmaní ʻo lahi ange ʻi he ngaahi meʻa ʻo e māʻoniʻoní, ʻi heʻetau manavasiʻi naʻa fakaʻitaʻi kinautolú.”]4
Taki
Ko Takí ko e tamasiʻi taʻu hongofulu tupu ʻatamai lelei ka naʻe angatuʻu. Lolotonga e tataki ʻe heʻene tamaí, ko ha tangata pisinisi tuʻumālie, e ngaahi fakataha he Sāpaté, naʻe faʻa fakaʻuli taʻetokanga mo konā ʻa Taki ʻi he loto koló. Naʻe maumauʻi ʻe Taki e motokā ʻe ua lolotonga ʻene konā kava mālohí. Hili e foʻi fakatuʻutāmaki takitaha, naʻe fakatau mai ʻe heʻene tamaí ha kā foʻou maʻana.
Naʻe tui e tamai ʻa Takí naʻá ne tokoni ki hono fohá ʻi heʻene ʻoange kiate ia ʻa e meʻa naʻá ne fie maʻú. Naʻe hangē naʻe ʻahiʻahiʻi ʻe Taki pe naʻe ʻi ai ha faʻahinga fakangatangata ki hono ʻulungāngá. ʻI he ʻikai ke ne maʻu ha meʻá, naʻe hokohoko atu ʻene fekumi ki he ngaahi founga ke maumauʻi ai e ngaahi fekaú mo angatuʻu ki he ngaahi tuʻutuʻuni ʻa e koló. Hili ha ngaahi taʻu siʻi, naʻe fakahalaiaʻi ʻa Taki ki he maumau lao pea naʻe tautea ke nofo pōpula. ʻI he taimi ʻe taha hili hono fakaʻatā ia, naʻá ne tāonakita. Neongo naʻe taʻemalava ke ʻilo ʻa e meʻa ne kaunga ki he ngāue fakaʻauha fakaʻosi ko ʻeni kiate iá, ka naʻe mahino kiate kinautolu naʻa nau ʻilo iá naʻe ʻaofi ia ʻi heʻene kei tamasiʻí mei he ngaahi tautea ʻo hono ʻulungaanga talangataʻá.
Ko e Faingataʻa ʻo Hono Ohi Hake e Fānaú ʻi he Ngaahi Taimi Faingataʻá
ʻOku feinga e mātuʻa ʻe niʻihi ke tākiekina e ʻulungaanga ʻo ʻenau fānaú ʻi he manavaʻofa mo e fakahōhōloto. Ko e tamai ʻa Takí ko ha tangata makehe. Naʻá ne fakakaukau ko e founga lelei taha ia ke fakahaaʻi ʻaki ʻene ʻofá ko hono ʻoange kia Taki ha faʻahinga meʻa pē naʻá ne fie maʻu. Naʻá ne manavasiʻi kapau te ne fakafisingaʻi ha kole, ʻe ʻita ʻa Taki pe te ne fakakaukau naʻe ʻikai ke ʻofaʻi ia. Ka ko e lahi ange hono ʻoange ʻe he tamai ʻa Takí, ko e lahi ange ia e meʻa ne ʻamanaki ki ai ʻa Takí pea mo e siʻisiʻi ange ia ʻene houngaʻia he meʻa naʻá ne maʻú.
Naʻe fie maʻu ʻe Taki ke tokanga ʻene ongomātuʻá kiate ia ʻi ha faʻahinga founga ʻe taha. Naʻe fie maʻu ʻe Taki ha ngaahi ngataʻanga, ngaahi fakangatangata, mo e ngaahi fatongia ke ne tupulaki ai ʻo hoko ko ha tokotaha lahi falalaʻanga. Naʻá ne fie maʻu ʻene ongomātuʻá ke na fakaʻikaiʻi ʻene ngaahi kole ʻoku ʻikai ke feʻungá mo tuku ke ne mamahi he ngaahi nunuʻa ʻo ʻene ngaahi fili koví.
ʻOku fehangahangai e mātuʻa tokolahi mo e ngaahi ʻahiʻahi faingataʻa ʻi honau ngaahi fohá mo honau ngaahi ʻofefiné. ʻOku mātuʻaki hohaʻa ʻaupito e kau taki ʻo e Siasí mo e kau mataotao kau ki he ngaahi hala ʻoku fou ai e fānau tokolahi. Fakatatau ki he fakamatala ʻo hono tāpuakiʻi ʻe he Fakamoʻuí e fānau īkí, ʻi he 3 Nīfai 17, naʻe pehē ai ʻe ʻEletā Sefilī R. Hōlani ʻo e Kōlomu ʻo e Toko Hongofulu Mā Uá:
“ʻOku ʻikai ke tau lava ʻo ʻiloʻi fakapapau ʻa e faʻahinga ongo naʻe maʻu ʻe he Fakamoʻuí ʻi he taimi fakaloloma ko ʻení, ka ʻoku tau ʻiloʻi naʻá Ne loto mamahi pea naʻá Ne toʻe ʻi Hono lotó koeʻuhí ko e ngaahi mālohi fakaʻauha ʻokú ne ʻākilotoa ʻa kinautolu ʻoku taʻehalaiá. ʻOku tau ʻiloʻi naʻá Ne ongoʻi ha fie maʻu lahi ke Ne lotua mo tāpuekina e fānaú.
“… ʻOku ʻi ai ʻa e ngaahi ʻaho ʻe niʻihi ʻoku hangē ʻa e ʻahiʻahí mo e maumau fonó ko ha tahi ʻokú ne lōmekina kinautolú. … Pea ʻoku ʻi ai foki ʻa e taimi ʻe niʻihi ʻoku ʻikai ke tau lava ʻo mapuleʻi fakafoʻituitui ʻa e ngaahi mālohi ko iá.”5
ʻOku faʻa fehangahangai e fānau tokolahi mo e faitoʻo konatapú, ʻolokaholó, ponokalafí, mo e tōʻonga fakasekisualé. ʻOku lahi e ngaahi ʻahiʻahí. Ko kinautolu ʻoku ʻikai ke nau maʻu ʻa e fakahinohino ʻa e mātuʻá, ngaahi tuʻunga ʻulungaanga mahuʻinga fakalaumālié, mo e ngaahi tautea ki he ʻulungaanga koví ʻoku nau faʻa moʻulaloa ki ai.
ʻOku ʻoange maʻu pē ʻe he mātuʻa falalaʻangá e fakahinohinó, ngaahi tuʻutuʻuní, mo e fakatonutonú ʻo makatuʻunga ʻi he ʻofa mo e tokanga. ʻI he ʻapi ʻo e mātuʻa peheé, ʻoku ʻuhinga lelei ʻa e ngaahi tuʻutuʻuní, pea ʻoku fenāpasi ʻa e tauteá mo e ʻulungaanga ʻoku taʻefeʻungá. ʻOku ako e fānau ʻi he ʻātakai ko ʻení mei he ngaahi fehalākí mo nau ongoʻi ʻoku fakafiemālie ʻa e ngaahi tauteá, neongo ʻoku ʻikai ke nau fokotuʻu e tauteá.
Ko Hono Fakahoko e Ngaahi Tauteá
ʻE tokoni e ngaahi tefitoʻi moʻoni ko ʻení ki he mātuʻá ke nau ʻilo ʻa e founga ke ngāue ʻaki totonu ai e tauteá ki heʻenau fānaú.
Fakatokangaʻi mo Fakahaaʻi e ʻUlungaanga Totonú
ʻOku fakahehema e fānaú ke toutou fai ha ngaahi ʻulungaanga ke nau maʻu e tokanga ʻenau mātuʻá. Fakatatau ki he lau ʻa e faiako Siasi ki he tauhi fānaú ko Keleni Leifemi, “ʻOku angamaheniʻaki ʻe he mātuʻá ke tukunoaʻi e peseti ʻe 95–97 ʻo e ngaahi meʻa lelei kotoa ʻoku fai ʻe heʻenau fānaú. Ka ʻo kapau ʻe ʻulungaanga kovi ha tamasiʻi, ʻoku hangē ʻoku liunga 5–6 ʻa e tokanga ʻa e mātuʻá ki he ʻulungaanga ko iá.”6 Kapau ʻoku toki tokanga pē e mātuʻá ki he ngaahi meʻa taʻefeʻunga ʻoku fai ʻe he fānaú, ʻoku totonu ke ʻoua naʻa ofo ha taha he taimi ʻoku ʻulungaanga kovi ai e fānaú.
ʻE lava ke fakamālohia ʻe he mātuʻá e ʻulungaanga ʻoku fie maʻú ʻaki hono fakahaaʻi ʻenau mahuʻingaʻia ʻi he meʻa ʻoku fai ʻe heʻenau fānaú pea ʻaki ʻenau fengāueʻaki mo kinautolu ʻi ha founga ʻoku leleí—malimali, fakahaaʻi e fakamālō, pe milimili hono tuʻá. ʻOku totonu ke moʻoni mo fakahangatonu e fakamāloó ki he ʻulungaanga ʻo e tamasiʻí pea mo hono mahuʻinga ki he mātuʻá mo e niʻihi kehé. Hangē ko ʻení: “ʻOku hounga kiate au hoʻo tokoni ke fakamaʻa e peitó. ʻOku ou fiefia heʻeta ngāue fakatahá, pea vave ange ai e ʻosi ʻa e ngāué.” Ko e fakamālō ʻoku fakahangatonu ki he tamasiʻí (“ko e tamasiʻi lelei koe”) ʻe ala hoko ia ko e taʻefaitotonu pe kākā.
Fakaʻatā e Fānaú ke Nau Aʻusia e Ngaahi Tautea Fakanatula Totonú
ʻOku fakanatula pē ke muimui mai e nunuʻá ʻi he ngāué. Hangē ko ʻení, ko ha kiʻi tamasiʻi ʻoku ʻikai ke ako ki ha sivi ʻoku faʻa māʻulalo ʻene māká. Ko ha taʻu hongofulu tupu ʻokú ne maʻu ha tikite ki he lele lahí kuo pau ke ne totongi ha moʻua. ʻOku ako vave e fakafoʻituituí, mei he ngaahi nunuʻa fakanatulá koeʻuhí ʻoku hoko e ngaahi nunuʻá neongo ai pē hano fakafepakiʻi pe fakakikihiʻi. Kapau ʻoku maluʻi ʻe he mātuʻá ʻenau fānaú mei he ngaahi nunuʻa fakanatulá, hangē ko haʻanau totongi honau moʻua he fefonongaʻakí, ʻoku nau toʻo mei he fānaú ʻa e ngaahi lēsoni mahuʻingá.
ʻE ala maumauʻi ʻe he ngaahi nunuʻa fakanatulá e fānau ʻoku nau fuʻu kei iiki ke mahino ia kiate kinautolú. Hangē ko ʻení, kuo pau ke maluʻi ha kiʻi tamasiʻi mei he ala ki he sitou velá pe luelue toko taha ʻi ha veʻe anovai pe vaʻinga ʻi ha hala femoʻuekina.
Neongo ia, ʻoku lava ʻe he mātuʻá ʻo fakaʻatā e fānau iiki angé ke nau aʻusia ha ngaahi nunuʻa fakanatula iiki, hangē ko e maumauʻi ha meʻavaʻingá ʻaki ʻene talangataʻa ʻo tā ia he kiʻi hala simá pe maumauʻi ha foʻi peni fakaʻilonga ʻaki ʻene taʻeloto ke tapuniʻi ia. ʻI he ngaahi meʻa peheé, ʻoku lava ʻo ako lelei taha e fānaú mei he ngaahi tauteá kapau kuo ʻosi akoʻi e ngaahi tuʻutuʻuní kiate kinautolu pea mahino kiate kinautolu ʻa e ngaahi nunuʻa fakanatula ʻe hoko ko e ola ia ʻo hono maumauʻi e ngaahi tuʻutuʻuní.
Fakaʻaongaʻi e Ngaahi Tautea ʻOku Mahuʻingamālié
ʻOku fakahaaʻi ʻe he mātuá e ngaahi tautea ʻoku mahuʻingamālié ʻi ha faʻahinga founga ʻoku fekauʻaki lelei mo e ʻulungaanga ʻo e tamasiʻí. Hangē ko ʻení, ʻe ala kole ki ha tamasiʻi ʻoku ʻulungaanga kovi he lolotonga e maʻumeʻatokoni efiafí ke mavahe mei he tēpilé kae ʻoua kuó ne loto fiemālie ke kai fakalongolongo. ʻOku ʻaonga taha ʻa e ngaahi tautea ʻoku ʻuhingamālié ʻi he taimi ʻoku nau:
-
ʻUhinga lelei ki he tamasiʻí.
-
Fakahaaʻi e fakaʻapaʻapa ki he tamasiʻí.
-
Fie maʻu e tamasiʻí ke ne ongoʻi loto mamahi he tauteá.
ʻOku totonu ke fakahaaʻi ia ʻe he mātuʻá ʻi ha founga fefeka mo anga fakakaumeʻá—ʻikai ke ʻita—pe ʻe hanga ʻe he tauteá ʻo fakaafeʻi mai ha loto mamahi. Hangē ko ʻení: (1) ʻOku faʻa tōmui ha tamasiʻi ki he maʻumeʻatokoni efiafí, ko ia ne ʻave ʻe he ongomātuʻá e meʻakaí mo talaange ki he tamasiʻí ko e maʻumeʻatokoni hono hokó ʻe toki fai ia he pongipongi ʻe tahá; (2) ʻOku telefoni ha tamasiʻi taʻu hongofulu tupu ʻoku puke pōpula ko e kaihaʻa he falekoloá, ke haʻu ʻene ongomātuʻá ʻo ʻave ia he vave tahá, ka naʻe tuku ʻe he ongomātuʻá ke nofo he pō ko iá he pilīsoné.
ʻI he sīpinga takitaha, ʻoku ʻuhinga lelei e tauteá ki he tamasiʻí (ʻoku fekauʻaki mo e ʻulungaanga taʻefeʻungá) pea ʻoku fie maʻu e tamasiʻí ke ongoʻi loto mamahi he tautea (ʻikai ke kai he tōmui ki he maʻumeʻatokoni efiafí; nofo pilīsone ko ʻene fakahoko ha hiá). Neongo ʻe ʻikai ke saiʻia ha taha ʻi he ongo tamaikí he tauteá, ka ʻoku kei fakaʻapaʻapaʻi pē ʻa e tauteá kapau ʻoku fakahoko totonu ʻe ha mātuʻa ʻofa ʻoku ʻikai ke na taʻeʻofa mo loto fakamaau. ʻOku fakafofongaʻi ʻe he tautea takitaha ʻa e meʻa ʻoku ʻamanekina ʻe ha taha mei hono fakahoko ʻa e fehalākí.
ʻE lava foki e mātuʻá ʻo ngāue ʻaki e ngaahi tautea ʻoku ngali siʻi ange ʻene ʻuhingamālié, hangē ko hono toʻo e faingamālie ʻo e sio televīsoné he taimi ʻoku ʻikai ke fai ai ʻe heʻena fānaú ʻenau ngāué. Kuo pau ke fekauʻaki e ngāué mo e faingamālié. Ko e sio televīsoné ko ha faingamālie ʻoku maʻu ʻaki e anga falalaʻangá. ʻE lava ke mole e faingamālié mei ha tamasiʻi ʻoku ʻikai ke anga falalaʻanga
ʻI he taimi ʻoku fakahoko ai e tauteá, ʻoku totonu ke tokanga taha e mātuʻá ki hono mapuleʻi hona ʻulungaanga kae ʻikai ko hono mapuleʻi ʻena tamasiʻí. ʻOku totonu ke fakahā ʻe he ongomātuʻá ki he tamasiʻí ʻa e meʻa ʻe fai ʻe he ongomātuʻá, kae ʻikai ko e meʻa ʻe fai ʻe he tamasiʻí, ʻa ia ʻoku ope atu ia he meʻa ʻokú na mapuleʻí. Hangē ko ʻení, te na pehē ange ki ha tamasiʻi taʻu hongofulu tupu angatuʻu: “Ko hono ngāue ʻaki ʻo e kā fakafāmilí ko ha faingamālie ia ʻokú ma ʻoange ki he kau mēmipa ʻo e fāmilí ʻa ia kuo ʻosi ʻenau ngāué. Kapau ʻokú ke fili ke ʻoua te ke fai hoʻo ngaahi ngāue ʻi ʻapi ní, ʻe ʻikai ke faingamālie e kaá kiate koe.”
ʻI he ngaahi meʻá kotoa, ʻoku totonu ke fakahaaʻi e tauteá ʻi ha ʻātakai ʻo e ʻofa mo e manavaʻofa. Fakakaukau ki he fakamatala mei he Tokāteline mo e Ngaahi Fuakava 121:41–42: “ʻOku ʻikai lava pe ʻoku ʻikai totonu, ke ngāue ʻaki ha mālohi pe ivi …, kae ngata pē ʻi he feifeingaʻi ʻi he faʻa kātaki fuoloa, ʻi he angavaivai mo e angamalū pea mo e ʻofa taʻemālualoi; ʻi he angaʻofa mo e ʻilo haohaoa, ʻa ia ʻe fuʻu fakafuofuolahi ʻa e laumālié taʻe ʻi ai ha mālualoi pea taʻe-ha-kākā “
Seti
Ko Setí ko e tamasiʻi ʻoku saiʻia he fakakatá, loto-fefeka, mo loto-ʻoho. Lolotonga e ʻuluaki taʻu ʻe ua ʻo ʻene moʻuí, naʻe mahamahalo ʻene ongomātuʻa te ne fakafepakiʻi kinaua ʻi heʻene fuʻu lahí. Naʻá na ʻofa moʻoni ai mo akoʻi kiate ia e ongoongoleleí mo fakaʻapaʻapaʻi e ngaahi tuʻutuʻuni ʻa e fāmilí mo e koló. Neongo ia, naʻe faingataʻa kia Seti ke pīkitai ki he ngaahi tuʻunga moʻui ko iá. ʻI hono taʻu hivá, naʻá ne kaihaʻasi ha ngaahi peni mo ha pēketi pele mei ha falekoloa he kolo naʻe lau maile hono mamaʻó mei hono kolo tupuʻangá. Naʻe ʻilo ʻe he faʻē ʻa Setí e ʻū meʻá peá ne kole ange ke ne fakamatala kau ki ai. Naʻe talaange ʻe Seti naʻá ne kaihaʻasi mai kinautolu.
Naʻe ʻave ʻe he tamai ʻa Setí ia fakataha mo e koloá ʻo fakafoki ki he falekoloá. Naʻá ne fakahinohino ʻa Seti ke ne tala ki he pule ʻo e falekoloá ʻa e meʻa naʻá ne faí, fakafoki e koloá, kole fakamolemole heʻene ngāue naʻe faí, pea tali ha faʻahinga tautea pē ʻe fie maʻu ʻe he pule ʻo e falekoloá. Naʻe fai ʻe Seti ʻa e meʻa naʻe talaange kiate ia ʻaki e loto halaia mo mafesifesi. Naʻe fakafanongo lelei ʻa e pulé pea fakamālō ange ʻi heʻene fakahā ʻene maumaulaó pea mo hono fakafoki ange e koloá. Naʻá ne pehē naʻá ne ʻamanaki kuo ʻosi ako ʻe Seti ha lēsoni mahuʻinga ka naʻe ʻikai ke toe fai ha meʻa ki ai. ʻI he uike ʻe ua hoko maí, naʻe tuku pē ʻe he ongomātuʻá ʻa Seti ʻi honau ʻapí he taimi naʻá na ō ai ki koló. Naʻá na kole ange ke ne fakakaukau ki he meʻa naʻá ne faí mo fakapapauʻi ange ki ai te na toe ʻave ia ki kolo, fakaʻatā ange mo ha toe faingamālie ke fakahaaʻi te ne lava ʻo talangofua ki he tuʻutuʻuní.
Naʻe toe hoko mai kimui mo ha toe maumau lao lahi, hangē ko e fuhu mo e ngaahi tokouá, ʻahiʻahiʻi e tapaká mo e ʻolokaholó, maumauʻi e lao ke ʻoua ʻe toe feōʻakí, pea liʻaki e akó. ʻI he meʻa takitaha ne hokó, naʻe pau hono fakahoko ʻe he ongomātuʻa ʻa Setí e ngaahi tautea mahuʻingamālie ke tokoni kiate ia ke ne ako mei hono ʻulungaanga koví. ʻI he meimei hoko hono taʻu 18, naʻe ngata ʻaupito e ngaahi palopalema fakaeʻulungāngá. Naʻe ngāue fakafaifekau ʻa Seti, ʻosi ʻene akó mei he kolisí, mali he temipalé, pea hoko ko ha tamai falalaʻanga. ʻI he ngaahi meʻa lahi ne hokó, naʻá ne fakamālō ki heʻene ongomātuʻá ki hono fakatonutonu iá, ko ha fakatonutonu naʻá ne tokoniʻi ia ke ne hoko ko ha tokotaha lahi falalaʻanga mo tauhi-tuʻutuʻuni.
ʻOange ki he Tamasiʻí ha Fatongia
ʻI he taimi ʻoku fakafepakiʻi ai ʻe he mātuʻá e palopalema fakaeʻulungāngá pea kimuʻa ke na fakapapauʻi ha tauteá, ʻoku faʻa fakapotopoto ke aleaʻi ʻe he mātuʻá mo e tamasiʻí, ʻo fehuʻi ange ki he tamasiʻí pe ʻe anga fēfē haʻane fakatonutonu e palopalemá. ʻOku mahuʻinga e fehuʻí koeʻuhí ʻokú ne fakaʻatā ʻa e tamasiʻí ke ne fatongia ʻaki hono fakaleleiʻi e palopalemá. ʻOku meimei ke lelei ange hono fakatupulaki ʻe he fānaú honau ʻulungāngá he taimi ʻoku nau tokoni ke ʻiloʻi ai ʻa e meʻa totonu ke nau faí. Kapau ʻoku fakafisi ha tamasiʻi ke kau he fepōtalanoaʻaki ko ʻení, ʻoku totonu ke hoko atu ʻe he mātuʻá e tauteá.
Tuku ke Fai ʻe he Tauteá ʻa e Akonakí
ʻI he taimi ʻoku ngāue ʻaki ai ʻe he mātuʻá e tauteá, ʻoku tali ʻita mo fie fakakikihi e fānaú he taimi ʻe niʻihi. ʻOku hoko e ako lelei tahá he taimi ʻoku siʻisiʻi ai e lea ʻa e mātuʻá kae fai pau ki he tauteá. Kapau ʻoku mahino ʻa e fekauʻaki ʻa e tauteá mo e ʻulungaanga koví, ʻe ongoʻi ʻe he tamasiʻí ʻoku falalaʻanga peá ne ako mei heʻene aʻusiá. Neongo ia, kapau ʻe fakahoko pau ʻe he mātuʻá e tauteá pe toki fakafekiki kau ki ai mo e tamasiʻí, ʻe tukutaha e tokanga ʻa e tamasiʻí ke mālohi ʻi he fakafekikí pea ʻikai fakakaukau ki he ʻuhinga ʻo e tauteá. Hangē pē ko e ʻikai ke ʻaonga e kaikailá mo e fakahinohinoʻi ki he tonú mo e halá; te na fakatupu pē e loto ʻita ʻi he tamasiʻí. ʻOku totonu ke tuku ʻe he mātuʻá ke fai ʻe he tauteá ʻa e akonakí.
ʻOku fakatātaaʻi e mālohi ʻo e akonaki ʻaki e tauteá ʻi he sīpinga ko ʻeni ʻo ha kiʻi tamasiʻi taʻu fā mo ʻene ongomātuʻá.
|
Faʻē: |
Kuo taimi ke fakamaau e lokí. Kuo mei omi hotau ngaahi kaungāmeʻa ʻe niʻihi ki heni. |
|
Foha: |
ʻOku ʻikai ke u loto au ki ai. ʻOku ou fie sio katuni au. |
|
Tamai |
(Mokomoko pē.) Te ke lava ʻo fakamaau e meʻavaʻingá he taimí ni, pe te u fakamaau ia ʻe au. Kapau te u fakamaau ia ʻe au, he ʻikai ke ke toe sio ki ai kae ʻoua kuó ke fai ha toe ngāue ke lava ʻo fakafoki atu. Ko e fē e meʻa te ke filí? |
|
Foha: |
Fakamaau ia ʻe koe. |
ʻOku fakamaau pē ʻe he tamaí ʻa e meʻavaʻingá ʻi he loto mokomoko ʻo faʻo he tangai, pea ʻave e tangaí ʻo tuku he loki tānaki ʻanga koloá. Ko e ʻaho ʻeni hono hokó:
|
Foha: |
Ko e fē ʻeku meʻavaʻingá? |
|
Tamai |
ʻOsi tuku ia ʻe au. |
|
Foha: |
ʻOku ou fie vaʻinga ʻaki ia ʻe au. |
|
Tamai |
ʻOkú ke manatu ki ʻaneafi ki he taimi ne u kole atu ai ke ke fakamaau kinautolú pea ʻikai te ke loto ki aí? Sai, kuo nau puli ʻo hangē ko ʻeku leá. |
|
Foha: |
ʻEi, ʻoku ou fie maʻu ke fakafoki mai. ʻOku ou fie vaʻinga ʻaki ia ʻe au. |
|
Faʻē: |
(ʻI he fakaʻapaʻapa.) ʻOku ou tui ʻokú ke fie maʻu. Ko hoʻo ngaahi meʻavaʻinga manakoá ia. |
|
Foha: |
ʻOku ou fie maʻu ke fakafoki mai. ʻOmai ia kiate au. |
|
Faʻē: |
(Mo e manavaʻofa.) ʻOkú ma lava ʻo ʻilo ʻokú ke fuʻu ongoʻi loto mamahi. (Fakalongolongo, hangē ʻoku fakakaukau ki he meʻa ʻe faí.) Mahalo pē te ma lava ʻo fakakaukauʻi ha ngāue ke ke fai kae lava ʻo toe fakafoki atu. ʻOkú ke saiʻia ai? |
|
Foha: |
(Kaikaila he ʻitá.) ʻOku ʻikai te u fie maʻu ke u fai ha meʻa kae toki fakafoki mai. ʻOmai ia he taimí ni kiate au. |
|
Tamai |
Te u talaatu ha meʻa, ko e taimi ʻokú ke talanoa mokomoko aí, ʻo ʻikai kaikaila pe ʻitá, te ma sio pe ʻe lava ke ma maʻu ha founga ke ke fai ha meʻa ke lava ʻo toe fakafoki atu ai. Ka ʻi he taimi ní ʻoku ʻi ai e ngaahi meʻa kehe ʻokú ma fie maʻu ke fai. |
Mavahe e ongomātuʻá ia. Hili ha houa ʻe taha ne fakaofiofi mai e fohá ki he tamaí ke fokotuʻutuʻu ha toe ngāue ʻi ʻapi ke ne fai kae lava ke toe fakafoki ange ʻene meʻavaʻingá. ʻI he ngaahi ʻaho hono hokó, naʻá ne loto lelei ke talangofa he taimi ne kole ange ai ke ne fakamāú.
ʻOku fakatātaaʻi ʻe he sīpinga ko ʻení e ngaahi lelei lahi ʻo hono fakapapauʻi e ngaahi tautea ʻoku ʻuhingamālié:
-
ʻOku ako e tamasiʻí he ʻoku ʻuhingaʻi ʻe he mātuʻá e meʻa ʻoku nau lea ʻakí.
-
ʻOku aʻusia ʻe he tamasiʻí ʻa e ngaahi tautea ʻo e ʻulungaanga taʻefalalaʻangá.
-
ʻOku akoʻi ʻe he tauteá ʻa e pōpoaki ʻoku totonu ke anga falalaʻanga ʻa e tamasiʻí kapau ʻokú ne fie maʻu ke fiefia he ngaahi faingamālie hangē ko e vaʻinga ʻaki e ngaahi meʻavaʻingá.
-
ʻOku akoʻi ʻe he mātuʻá, ʻi he anga mokomoko, ʻoku ngāueʻi melino mo fengāueʻaki fakataha e ngaahi palopalemá kae ʻikai ko e fakahaaʻi e ʻitá ʻi he founga kākā.
-
ʻOku hanga ʻe he anga mokomoko ʻa e mātuʻá ʻo tukutaha e tokangá ki he taʻefeʻunga e ʻulungaanga ʻo e tamasiʻí. ʻOku tohoakiʻi e tokangá ki he mātuʻá ʻi he tafulú pe fakafekikí.
-
ʻI he fakafisi ʻa e mātuʻá ke fakafekikí, ʻoku nau ofi ange ai ki he meʻa ʻoku hokó mo fakaʻehiʻehi mei he toe fakafekikí mo e tupulaki ʻo e ʻitá.
ʻOku fakatātaaʻi ʻe he sīpinga ʻo e meʻa ne hokó ʻa hono fakafeʻatungiaʻi ʻe he lea valokí ha finemui mei heʻene ako ha ngaahi lēsoni mahuʻingá. ʻI he taimi ne lava ai ʻe he ongomātuʻá ʻo fakahaaʻi e ʻofá mo e poupoú kae ʻikai ko e fakafisingaʻí, naʻe lava ke tukutaha e tokanga hona ʻofefiné ʻi he ngaahi tautea fakanatula ʻo hono ʻulungāngá.
Mala
Ko Malá, taʻu 17, ko e uike ʻeni ʻe valu ʻene feitamá. Naʻá ne fakaʻosi ʻaki ʻene pehē naʻe ʻikai ke ne kei lava ʻo tatali ke tala ki heʻene ongomātuʻá ʻene feitamá. Naʻe ʻikai malava ke fai ha fakatōtama, hangē pē ko e mali kia Lailá, ko e tamai ia ʻa ʻene tamá. Naʻe ʻilo ʻe Mala ʻe fuʻu ʻita lahi ʻene ongomātuʻá. Naʻá ne sio loto ki he taʻe-toe-ʻosi ʻena loto mamahí, tafulú, ngaohikoviá, taʻofi ʻe he ongomātuʻá, mo e tā tuʻo lahi haʻana pehē, “Ne ma ʻosi talaatu kiate koe ko e nunuʻa ʻeni ʻo e [fai e ʻulungaanga fakasekisuale kimuʻa he malí]”. Kuo toki ʻosi e maʻumeʻatokoni efiafí. Naʻe manavahē mo tokakovi ʻa Mala, hangē pē ka luá. Neongo iá, naʻá ne feinga ke ne lototoʻa peá ne lea ange, “Fineʻeiki mo e Tangataʻeiki, ʻoku ʻi ai e meʻa ʻoku ʻai ke u talaatu. ʻOku ou feitama.”
Hangē pē ko e meʻa naʻá ne ʻamanaki ki aí, naʻá na fuʻu ʻohovale, ʻita, mo taʻefiemālie. Naʻe anga fēfē ʻene fai e meʻa peheé? Kuo taʻeʻaonga nai ʻena ngaahi akonakí? ʻOku ʻikai nai ke ne maʻu ha ʻulungaanga taau pe tefitoʻi moʻoni? Ko e hā nai naʻe ʻikai ke ne fakafanongo ai kiate kinauá he taimi naʻá na fakatokanga ai naʻe fuʻu lahi hono taimi mo Lailá?
Ne hoko mai e meʻa ne taʻeʻamanekiná. Ne hoko e ngaahi lea ʻita mo fakamamahí ke ne ʻoange ha faingamālie ke fakahaaʻi ai e ʻofá mo e manavaʻofá. Ne loʻimataʻia ʻene faʻeé. Naʻá ne fāʻofua kia Mala. Naʻá ne pehēange, “Pau pē ʻokú ke ongoʻi manavahē. ʻOku ou kole fakamolemole atu he hoko ʻa e meʻá ni. ʻOku ou kole fakamolemole atu heʻema fuʻu tali fefeka atú. ʻE anga fēfē haʻama tokoni atu?” Naʻe kuku fakatouʻosi kinaua ʻe he Tamaí mo ne pehēange: “Mala, ʻokú ma ʻofa ʻaupito ʻiate koe. Te ma fai ha faʻahinga meʻa pē ke tokoniʻi koe ʻi he meʻá ni.” Naʻe tangi ʻa Mala, meimei ongoʻi lōmekina he ngaahi ongo ʻo e ʻofá mo e poupoú.
Hili ha taimi nounou ne haʻu ha fakakaukau foʻou kia Mala. Kuó ne lotomoʻua he ngaahi uike lahi kau ki heʻene mātuʻá mo e anga ʻena tali iá. Kuó ne sio loto atu ki he ngaahi lau taʻetukú, valokiʻí, fakahalaiaʻi iá, fakafisingaʻí, naʻa mo e malava ke hola mei ʻapí. Ka kuo mole e ngaahi lotomoʻua ko iá. Naʻe kamata ke hā mai kiate ia ha meʻa naʻe fakamanavahē ange. Ko e hā e meʻa kuó ne fai kiate iá? Ko e hā e meʻa te ne faí? Fēfē e pēpē ʻoku ʻi hono manavá? Ko e hā e meʻa kuo hoko ki he melino mo e fiefia naʻá ne ʻilo ʻi heʻene hoko ko e mēmipa mālohi ʻi he Siasí? ʻI he fakafoki ʻene fakakaukaú ki aí, kuo faingofua ange e lotomoʻua ki heʻene mātuʻá; naʻe lava ke ne tukuakiʻi kinaua ki he loto kovi, momoko, ongoʻingataʻa, taʻeʻofa naʻá ne tui naʻá na maʻú. Kuó ne ʻilo he taimí ni naʻá ne hala. Ko ʻene palopalemá pē ʻaʻana ke fakakaukau ki aí. Pea naʻe faingataʻa ke ne fehangahangai mo e moʻoní. Kae kehe naʻá ne ʻiloʻi naʻe ʻikai tonu ke ne fehangahangai toko taha mo ia.
Ngāue ʻAki e Fakamavahé
Ko e fakamavahé ko ha tautea ia ʻoku ola lelei taha ʻi he fānau taʻu tolu ki he taʻu valú. ʻOku kau ai hono ʻave ha tamasiʻi mei ha tūkunga taʻefakafiemālie ki ha loki ʻe taha pe feituʻu ʻoku ʻikai ke maʻu ai ʻe he tamasiʻí e tokangá.
ʻOku tautautefito e tokoni ʻa e fakamavahé ki he fānau ʻoku faingofua hono ofeʻí. ʻOku ʻikai ke tokoni ia ki he fānau fakatuʻutāmaki ʻa ia ʻoku mālohi ʻenau fefaʻuhi mo ʻenau mātuʻá. Mahalo pē ʻe fuʻu loto mamahi e fānau ko ʻení ke tangutu ʻi ha sea pe nofo ʻi ha loki. Kapau ʻe fakamālohiʻi ke talangofua, te nau ala maumauʻi pe fakaʻauha ha ngaahi meʻa pe nāunau fale.
ʻOku akoʻi ʻe he fakamavahé ʻa e tamasiʻí ki ha founga ʻoku mapuleʻi, mo melino ʻi hono fakaleleiʻi e ngaahi palopalemá. ʻI he taimi ʻoku fakamavahe ai ʻe he mātuʻá e fānaú ke mavahe mei he tūkunga ko iá, ʻoku totonu ke nau anga-mokomoko mo manavaʻofa, ʻo manatuʻi ko e “ʻoku tekeʻi atu ʻa e houhaú ʻe he tali fakavaivaí” (Lea Fakatātā 15:1). Ko e taimi ko ē ʻoku fakamavahe ai mei he fāmilí ʻoku totonu ko e tauteá pē ia.
ʻOku ʻikai totonu ke ngāue ʻaki e founga ko ʻení ʻe he mātuʻa ʻoku ʻitá ʻa ia te nau toho ʻenau fānaú ki he loki kuo filí ke hoko ko ha tautea. ʻI he taimi ʻoku fili ai e mātuʻá ki ha faʻahinga ʻulungaanga ʻita mo lea ʻaki e ngaahi meʻa ʻokú ne fakamamahiʻi e tamasiʻí, ʻoku ʻikai ke nau fakatokangaʻi ʻoku nau akoʻi mo fakamamafaʻi e ʻulungaanga taʻefeʻungá. Naʻe akonaki ʻa Paula ki he kāingalotu ʻo e Siasí, “ʻOua naʻa mou fakafiufiu ki hoʻomou fānaú, telia naʻa nau fiu ai” (Kolose 3:21).
ʻOange ki he mātuʻá e ngaahi fakahinohino ko ʻení ke tokoni kiate kinautolu ke nau fakaʻaongaʻi e fakamavahé ke ola lelei. ʻOku totonu ke fai ʻeni ʻe he mātuʻá:
-
Fakahā kimuʻa ki he tamasiʻí kau ki he ʻulungaanga ʻoku ʻamanekina meiate kinautolú mo e ʻulungaanga ʻoku ʻikai ke ngofuá. Fakahā kiate kinautolu kau ki he tautea fakamavahé mo e founga hono ngāue ʻakí.
-
ʻI he taimi ʻoku hoko ai e ʻulungaanga koví, tala ki he tamasiʻí ʻi he anga mokomoko mo nounou ʻa e ʻuhinga ʻoku ʻai ai ke fakamavahe iá. Fili pē e ʻulungaanga kovi tahá kae ʻoua naʻa fakalautelau e kiʻi fehalaaki kotoa pē. (“Te ke nofo fakalongolongo he lokí ʻi he miniti ʻe tolu koeʻuhí ko hoʻo taaʻi ho tokouá.”)
-
Kole ki he tamasiʻí ke fakakaukau ki hono ʻulungāngá mo e founga ʻe lava ke fakatonutonu aí. ʻOku totonu ke fakahā foki ʻe he mātuʻá ki he tamasiʻí te na fehuʻi ange kiate ia ʻa e fakalelei ke faí hili hono fakamavahé. (ʻOku ʻikai totonu ke fakamavahe ha tamasiʻi ʻoku ʻikai lava ke ne ʻilo hono ʻuhinga.)
-
ʻAi ke kei fakamavahe pē e tamasiʻí ʻi ha kiʻi momeniti fakalongolongo, malava pē ko ha ngaahi miniti ʻa ia ʻoku feʻunga mo e taʻu motuʻa ʻo e tamasiʻí (ʻoku lava ʻo fakamavahe ha taha taʻu nima ʻi he miniti ʻe nima); fakaʻilongaʻi he uasí e taimi ʻoku fakalongolongo ai e tamasiʻí.
-
ʻAlu ki he feituʻu ʻoku fai ki ai e fakamavahé hili e fakalongolongo ʻa e tamasiʻí ʻi he ngaahi miniti kuo filí. ʻOku ʻikai totonu ke tali ʻe he mātuʻá kapau ʻoku kau e tamasiʻí he ʻulungaanga ʻoku fekumi ke maʻu e tokangá, hangē ko e tangí pe kaikailá.
-
Kimuʻa ke fakaʻatā e tamasiʻí ke mavahe mei he feituʻu naʻe fai ki ai e fakamavahé, fehuʻi ange pe ko e hā ʻene fakalelei ki he palopalemá. ʻI he ngaahi tūkunga ʻe niʻihi, ʻe ala tokoni hano fakahaaʻi ʻe he tamasiʻí ʻa e founga te ne liliu ai hono ʻulungāngá ke ʻoua naʻa toe hoko e palopalemá. Kapau ʻe ngali fakafiemālie e fakaleleí, ʻoku fakangofua leva ʻe he mātuʻá e tamasiʻí ke toe kau ki he fāmilí. Kapau ʻoku ʻikai ke mateuteu e tamasiʻí ke talangofua, ʻe lava ke ʻai ʻe he mātuʻá ke ne toe fakahoko e ngaahi ʻekitivitī ʻoku ʻoatu ʻi he fakamatala fika 3, 4 mo e 5.
-
ʻI he taimi ʻoku talangofua ai e tamasiʻí, fakamālō ki ai ʻi hono fai e meʻa naʻe kole angé. Hili iá, ʻoku totonu ke fekumi e mātuʻá ki ha faingamālie ke nau poupouʻi mo ʻoange ha fakamatala lelei kau ki he ʻulungaanga leleí, ʻo fakahaaʻi ha tupulaki ʻo e ʻofá ʻo hangē ko hono fakahaaʻi ʻi he Tokāteline mo e Ngaahi Fuakava 121:43.
ʻOku saiʻia ange e mātuʻa tokolahi he fakamavahe ki ha loki ʻa ia ʻoku siʻisiʻi ai e malava ke fakahohaʻasi pe fakatupu ha maumaú (ʻoku ʻikai ha televīsone ai, meʻavaʻinga, ʻū tohi, pe ngaahi meʻa kehe pē ʻe fiefia ai e tamasiʻí pe ʻe lava ʻe he tamasiʻí ke ne maumauʻí). Kapau ʻoku ʻikai ke maʻu ha loki pehē, ʻe fie maʻu ʻe he mātuʻá ke tangutu e tamasiʻí ʻi ha sea ʻoku fakamavaheʻi ʻi he loki tatau pē pe ko ha loki hoko mai pē ʻa ia ʻokú na lava ʻo sio ki aí. ʻOku ʻilo ʻe he mātuʻa ʻe niʻihi ʻoku ola lelei ʻa e fakamavahé he taimi ʻoku fakangofua ai e fānaú ke nau laukonga, fakafanongo ki he ngaahi fasi, ʻalu mo ia ʻo ʻeveʻeva, pe pukepuke ʻe he mātuʻá. ʻOku totonu ke fakahaaʻi ʻe he ngaahi fie maʻu ʻa e tamasiʻi fakafoʻituitui takitaha ʻa e meʻa ʻoku lelei tahá.
Fekumi ki ha Aleapau Kimuʻa kau ki he Ngaahi Tuʻutuʻuní mo e Ngaahi Tauteá
Ko e angamahení, ʻoku lelei ange e vā fetuʻutaki ʻo e mātuʻá mo ʻenau fānaú he taimi ʻoku mahino mo fiemālie ai e fānaú ki he ngaahi lao mo e ngaahi tautea ʻa e fāmilí. Ko e alēlea fakafāmilí, efiafi fakafāmili ʻi ʻapí, mo e ʻinitaviu fakatāutahá ko e ngaahi taimi lelei ia ke fakakau ai e fānaú ʻi hono aleaʻi e ngaahi tuʻutuʻuni ʻa e fāmilí, tefitoʻi ʻuhinga ʻo e ngaahi tuʻutuʻuní, mo e ngaahi tautea ʻi he talangataʻa ki he ngaahi tuʻutuʻuni ko iá. ʻI he taimi ʻoku loto ai ha tamasiʻi ki ha tuʻutuʻuni peá ne maumauʻi iá, ʻoku lava e mātuʻá ʻo fakamanatu kiate ia e laó mo e ngaahi tauteá. ʻOku lava e mātuʻá ʻo fakahaaʻi ha ongoʻi ʻofa moʻoni he mole ʻa e faingamālié. Pea hangehangē he ʻikai ke toe sio e tamasiʻí ki he ngaahi nunuʻá ko ha tautea, ʻo hangē ko hono fakahaaʻi atu ʻi he sīpinga ko ʻení.
|
Faʻē: |
ʻOkú ke manatuʻi nai ʻeta aleapau kau ki he ngaahi pō Tokonakí mo e nunuʻá kapau te ke maumauʻi e tuʻutuʻuní? |
|
ʻOfefiné: |
“ ʻIo. ʻOku totonu ke u ʻi ʻapi ʻi he hoko ʻa e 12 tuʻuapoó, pe ko e mole hoku faingamālie ke toe alu ʻo ʻeva he pō Tokonaki ka hokó. |
|
Tamaí |
Ko ia ko e hā hono ʻuhingá? |
|
ʻOfefiné: |
He ʻikai ke u toe ʻalu ʻo ʻeva he pō Tokonaki ka hokó. |
|
Faʻē: |
Ko e moʻoni. ʻOkú ma ʻilo naʻá ke palani ke ke ʻalu ʻo sio koniseti. ʻOkú ma loto mamahi he ʻikai te ke lava ʻo ʻalú. Hangē naʻe ongo fakafiefiá. |
ʻI he ʻosi hono aleaʻi e ngaahi tuʻutuʻuní pea felotoi ki ai e mātuʻá mo e fānaú, ʻoku ʻikai ke mahuʻinga hano toe aleaʻi mo fakatahaʻi he taimi ʻoku hoko ai ha fehalākí he te ne poupouʻi ke fai ʻe he fānaú ha palani kākā ke taʻofi ʻenau haʻisia ki honau ʻulungāngá. Neongo ʻoku totonu ke fakahoko ʻe he mātuʻá e ngaahi tautea ne fai ki ai e felotoí, ka ʻoku totonu ke tataki kinautolu ʻe he fakakaukau leleí mo fai ha ngaahi liliu he taimi ʻoku maama mai ai e fakamatala foʻou mo mahuʻingá.
Ngāue ʻaki e Fakaʻutoʻuta Leleí
ʻOku ʻikai fakamafaiʻi e ʻulungaanga kovi īkí ke ngāue ʻaki e tauteá. ʻOku feʻunga pē ʻa e talanoa mo e tamasiʻí. ʻOku lelei taha pē ke tukunoaʻi e ngaahi ʻulungaanga kovi ka ʻoku ʻikai ke fakatuʻutāmakí. ʻE faingofua ange hono tukuange ʻe he fānaú e ngaahi ʻulungaanga peheé he taimi ʻoku ʻikai ke fakatokangaʻi aí. ʻE ala fakamālohia pē e ʻulungaanga koví ʻi hono fakatokangaʻí.
Ko Hono Fakatonutonu ʻAki e ʻOfá
Naʻe ako ʻaki ʻe Palesiteni Sēmisi E. Fausi ʻo e Kau Palesitenisī ʻUluakí ʻa e mahuʻinga ʻo e ʻofá mo hono fakatokangaʻi e ngaahi faikehekehe ʻi he fānaú he taimi ʻoku fakatonutonu ai kinautolú: “Ko e meʻa fakafoʻituitui ʻa hono ʻohake ʻo e fānaú. ʻOku kehekehe mo makehe ʻa e taha kotoa. Ko e meʻa ʻoku ʻaonga ki he tahá ʻe ʻikai ʻaonga ia ki he tahá. ʻOku ʻikai ke u ʻilo ko hai ʻoku poto feʻunga ke tala ʻa e founga tauhi fānau ʻoku fuʻu mālohí pe ko ia ʻoku fuʻu vaivaí tukukehe ʻa e mātuʻa ʻo e fānau ko iá, ʻa ia ʻoku nau ʻofa lahi taha aí. ʻOku fie maʻu ke lotua ʻe he mātuʻa ke nau maʻu e faʻa ʻiloʻiló. Ko hono moʻoni, ko e tefitoʻi moʻoni ki hono fakatonutonu e fānaú ʻoku totonu ke makatuʻunga ʻi he ʻofá ka e ʻikai ko e tautea.”7
ʻOku ʻikai lava ke fakalahiʻi e fatongia mahuʻinga ʻoku maʻu ʻe he mātuʻá ʻi hono lehilehiʻi hake ʻenau fānaú. ʻI he fakaʻosinga ʻo e kalasi ko ʻení, mahalo ʻe tokoni ke vahevahe e fakamatala ko ʻeni meia Palesiteni Fausí, ʻa ia naʻá ne fakamamafaʻi e mahuʻinga ʻo hono akoʻí mo e hoko ko e mātuʻa leleí:
“Neongo ʻoku lahi ange e ngaahi faingataʻa ʻe niʻihi ʻa e tangatá ʻi he hoko ko ha mātuʻa leleí, ʻoku malava ke ʻoange ʻe he ngaahi faingamālie ʻe niʻihi ha fiefia ʻoku lahi angé. Ko e moʻoni ʻoku ʻikai ha ngāue ʻe toe mahuʻinga ange ke fakahoko he māmani ko ʻení ka ko hono teuteuʻi ʻetau fānaú ke manavahē-ʻOtua, fiefia, anga fakaʻeiʻeiki, mo faʻa ngāue. ʻE ʻikai ke toe maʻu ʻe he mātuʻá ha fiefia ʻoku kakato angé ka ko hano fakalāngilangiʻi kinautolu mo ʻenau ngaahi akonakí ʻe heʻenau fānaú. Ko e lāngilangi ia ʻo e hoko ko e mātuʻá. Naʻe fakamoʻoni ʻa Sione, “ʻOku ʻikai haʻaku fiefia ʻe lahi hake, ka ko ʻeku fanongo ʻoku ʻaʻeva ʻeku fānaú ʻi he moʻoní” (3 Sione 1:4). ʻI heʻeku fakakaukaú, ko e akonakí, lehilehiʻí, mo e akoʻi ʻo e fānaú ʻoku fie maʻu ha ʻilo lahi ange ki ai, ha mahino fakaenatula, loto fakatōkilalo, mālohi, poto, moʻui fakalaumālie, kītaki, mo e ngāue mālohi ʻoku lahi ange ʻi ha toe faingataʻa te tau ala maʻu ʻi he moʻuí. ʻOku tautautefito ʻene moʻoni ʻení he taimi ʻoku mōlia atu ai e ngaahi makatuʻunga angamaʻa ʻo e langilangí mo e fakaʻapaʻapá meiate kitautolú. Ke maʻu ha ngaahi ʻapi leleí, kuo pau ke akoʻi e ngaahi tuʻunga ʻulungaanga mahuʻingá, pea kuo pau ke ʻi ai ha ngaahi lao, kuo pau ke ʻi ai ha ngaahi tuʻunga moʻui mahuʻinga, pea kuo pau ke ʻi ai ha ngaahi meʻa pau. ʻOku ʻoange ʻe he ngaahi sosaieti lahi ki he mātuʻá ha kiʻi poupou siʻisiʻi ʻaupito ʻi hono akoʻi mo fakalāngilangiʻi e ngaahi tuʻunga ʻulungaanga mahuʻinga ʻo e angamaʻá. ʻOku ʻi ai ha ngaahi anga fakafonua lahi ʻoku ʻikai ke nau kei mahuʻingaʻia he ngaahi tuʻunga ʻulungaanga mahuʻingá, pea ko e tokolahi ʻo e kakai kei iiki ange ʻi he ngaahi sosaieti ko iá kuo nau hoko ko e fili ʻo e angamaʻá.
“ʻI he fakaʻauʻau hifo ʻa e ngaahi sosaietí pea mole mo honau tuʻunga fakamōlalé pea lahi mo e ngaahi ʻapi kuo movete, ko e ʻamanakiʻanga leleí pē ke tafoki ʻo tokanga lahi ange mo ngāue ki hono akoʻi ʻo e toʻu tangata hokó—ʻa ʻetau fānaú. Ke lava ʻo fakahoko ʻení, kuo pau ke tau ʻuluaki fakamālohia ʻa e kau faiako Palaimeli ʻa ʻetau fānaú. ʻOku fakamuʻomuʻa heni ʻa e mātuʻá mo e kau mēmipa kehe ʻo e fāmilí, pea ko e ʻātakai lelei tahá ʻa ʻapi. Kuo pau ke ʻi ai ha founga, ha faʻahinga meʻa te tau fai ke fakamālohia ai hotau ʻapí ke nau hoko ko ha hūfangaʻanga mei he ngaahi meʻa ʻuli, angaʻuli ʻoku nau ʻātakaiʻi kitautolú. ʻE lava ke tokoni ʻa e uouangataha, fiefia, nonga mo e ʻofa ʻi he ʻapí ke ʻoange ki he fānaú ʻa e mālohi fakaeloto ko ia ke matuʻuaki e ngaahi faingataʻa ʻo e moʻuí.”8
Ko e mātuʻa ko ia ʻoku nau maluʻi ʻenau fānaú mei he ngaahi nunuʻa kovi ʻo e talangataʻá ʻoku nau fai ha maumau lahi kiate kinautolu, ʻi hono taʻofi kinautolu mei he ako ki he mahuʻinga ʻo e talangofuá.